TBP Balochi

سر بیتگیں ھالانی رِد ءَ پنجگور ءِ دمگ پروم ءَ دو ٹیل کشیں گاڑیانی ڈیک ورگ ءِ سبب ءَ آس لگ اتگ چریشی ءَ دو مردم ستکگ ءُ بیران بوتگ انت –

وئیل پنجگور ءُ پروم ءِ میانی دمگ پروم کپ ءَ دیم ءَ اتکگ، بیران بوتگیں مردم پنجگور سول ھسپتال ءَ برگ بوتگ – بیران بوتگیں مردمانی پجار عبدالوحید ء عبدالکریم ءُ زوھیب ء حضور بخش جھمنند کلگ پنجی کھن ءِ نام ءَ چہ بوتگ انت، اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ انت –

ھمے وڑ بلوچستان ءِ دمگ ھب ءُ ویندر ءَ دو دگ ءِ وئیلاں دو مردم بیران ءُ یکے ٹپی بوتگ –

ایدھی بنشون ءِ رِد ءَ ساکران ءِ نزیک ءَ نورانی موڈ ءَ دگ ءِ وئیل ءَ یک مردمے بیران ءُ یکے زدگ بوتگ – بیران بوتگیں مردم ءِ پجار حبیب ء ولی محمد ءِ نام ءَ چہ بوتگ وھدیکے سلمان نامیں مردمے ٹپی بوتگ –

ٹپی ءُ بیران بوتگیں مردم ھما دمان ءَ نادراہ جاہ ءَ برگ بوتگ انت ٹپی بوتگیں مردم درمان کنگ ءَ پد کراچی ءَ دیم دیگ بوتگ –

دومی وئیل ویندر ءَ دیم ءَ اتکگ کہ ناکہ کھارڑی ءِ نزیک ءَ مزن شاھدگ ءِ سر ءَ مساپر کشیں کوچ ءِ ڈیکر کنگ ءَ کسانیں چُکے بیران بوتگ –

ڈیرہ مراد جمالی ءَ گاڑی ءِ ڈیکر کنگ ءَ دو ورنا بیران ءُ گاڑی ڈرائیور ٹپی-

ڈیرہ مراد جمالی ءَ میر مراد چار راہ ءِ نزیک ءَ تیز رؤگ ءِ سبب ءَ ٹوڈی گاڑی ءَ دو ورنا ڈیکر کتگ ڈیکر کنگ پد گاڑی چپی بوتگ –

ھال سر بوگ ءَ پولیس ءُ ریسکو ءَ وت ءَ وئیل جاہ ءَ سر کتگ، گاڑی ءِ ڈیکر کنگ ءَ دؤئیں ورنا بیران بوتگ انت ءُ گاڑی چپی بوگ ءَ گاڑی ڈرائیور ٹپی بوتگ – ٹپی ءُ بیران بوتگیں مردم ڈیرہ مراد جمالی نادراہ جاہ ءَ سر کنگ بوتگ انت –

دگہ وئیلے بلوچستان ءِ دمگ بیلہ ءَ دیم ءَ اتکگ کہ کور ءَ جان شودگ ءِ میان ءَ سَے کسانیں جنکو آپ ءَ بُڈیتگ ءُ بیران بوتگ انت –

ھالانی رِد ءَ بیلہ چہ سی کلومیٹر دور گوٹ سیاں مائی پیر کور ءَ جان شودگ ءِ میان ءَ سَے کسانیں جنکو بُڈیتگ ءُ بیران بوتگ انت – بیران بوتگیں جنکوانی پجار زینب ء غوث بخش، شازیہ ء عبدالحمید ءِ نام ءَ چہ بوتگ انت سیمی گونڈوے پجار دنیگت ءَ نہ بوتگ – ھر سئیں جنکو بیلہ ء دمگ گوٹ سیاں مائی پیر ء نندوک انت –

وئیل ءِ درگت ءَ ھمے گوشگ بوگ ءَ انت کہ ھر سئیں جنکو جان شودگ ءِ میان ءَ آپ جھلانکی ءَ شُتگ انت ھمے سبب ءَ در اتک نہ کرتگ ءُ بیران بوتگ انت –

ڈیرہ بگٹی ءَ ٹریکٹر ٹالی ءِ وئیل آماچ بوگ ءَ یک مردمے بیران ءُ سئے ٹپی بوتگ اَنت –

وئیل تیز رؤگ ءِ سوب ءَ دیم ءَ اتکگ کہ ٹریکٹر ءِ دیم ءِ دؤئیں ٹائر دراتکگ انت وئیل ءِ آماچ بوتگ –

ٹپی بوتگیں مردمانی تہ ءَ یکے ءِ جاور نگیگ گوشگ بوگ ءَ انت ٹپی ءُ بیران بوتگیں مردم ھما دمان ءَ نادراہ جاہ ءَ سر کنگ بوتگ انت

دومی نیمگ ءَ بلوچستان ءِ کاروباری شھر ھب ءَ دزانی تیرگواری ءَ یک مردمے بیران بوتگ –

ھالانی رِد ءَ ھب ءِ نزیک ءَ موانچ گوٹ مارکیٹ ءَ سلاہ بندیں دُزاں لٹ ءُ پُل ءِ میان ءَ گوں آھاں جنگ کنگ ءَ دزانی تیرگواری ءَ یک مردمے بیران بوتگ – وئیل ءِ پشدر ءَ دمگی مردماں بیران بوتگیں مردے جون دگ ءِ سر ءَ ایرکتگ ءُ زھرشانی کتگ –

دالبندین ءَ یک مردمے ءِ جون ءِ دست کپتگ – ھالانی رِد ءَ دالبندین بازار ءِ نزیک ءَ کور ءِ پھل ءِ چیر ءَ ناشناسیں مردمے ءِ جون ءِ دست کپتگ – دمگی پولیس ءَ جون پرنس فھد نادراجاہ ءَ سرکتگ، آئی ءِ پجار نبوتگ –

جون ءِ درگت ءَ ھمے گوشگ بوگ انت کہ بوت کنت نشھی مردمے بوتگ آئی کھول ءِ پٹ ءَ پول برجاہ انت –

کسے ءِ بھتام جنگ ءَ چہ بیگواھیں مردمانی کھول وتی دوستیگیں مردمانی یل کنائینگ ءِ ھک ءَ ھچبر دزکش نہ بنت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ سی ءُ دو روچ سرجم بوتگ – پیپلز پاٹی ءِ رھشون ءُ باسکاں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ وی بی ایم پی وتی پُرایمنیں جھد ءَ چہ میان استمان دلگوش بلوچستان ءَ انسانی ھکانی لگتمالی ءِ نیمگ ءَ ترینگ ءِ جھد برجاہ داشتگ، کسے ءِ بھتام جنگ ءَ چہ بیگواھیں مردمانی کھول وتی دوستیگیں مردمانی یل کنائینگ ءِ ھک ءَ ھچبر دزکش نہ بنت –

وی بی ایم پی ءِ رھشون ماما قدیر بلوچ ءِ گوشگ ات کہ ما دنیا ءَ گوشگ لوٹ ایں کہ پاکستان ءِ چیریں ادارھاں بلوچانی بگیری ءَ ھما پالیسی کہ وتیگی کرتگ کہ بلوچاں زورانسری آوار جنگ، زنداناں بندیگی ءِ میان ءَ آھاں لٹ ءُ کٹ کنگ ءُ شھید کنگ ءِ وڑیں جرمانی کنگ ءِ لڑاں پیسر انت آئی ءِ سر ءَ گامگیج زورگ بہ بیت –

آئی ءِ گوشگ ات کہ ما میان استمان، یورپی یونین، امریکہ ءُ دگہ ڈیھاں لوٹ کن ایں کہ آ اے بلوچ چکچینی، انسانی ھکانی بے کساس ءَ لگتمالی ءَ میان استمانی کانودی رد ءَ پاکستان ءِ بگیری ءَ پَٹ ءُ پول بہ کن انت –

نبشتانک: رُژن ءِ چیدگ من دیست

نبشتہ کار : عتیقہ بلوچ

دی بلوچستان پوسٹ

سال 2009 ءِ زمانگ ات کہ اسکول ءَ شھید سر زاھد گوں یک مھمانے ءَ سک دستگٹ ءُ دلگوش اَت سر زاهد اے مردم ءِ آیگ ءَ سگ گَل ات ءُ پہ وش وشی ءَ ھمے مردم ءَ تیوگیں اسکول ءِ ندارگ ءَ کناهینگ ءَ ات ما ھم وتی کلاس روم ءِ دَریگ ءَ چہ سر زاهد ءِ ھمے مردم ءَ وش تب ءُ وش گپتار ءَ چارگ ءَ اتیں-

ھمے میان ءَ سر زاهد ءَ وتی گام مئے کلاس روم ءِ نیمگ ءَ تیز کُت انت ءُ ھمے مرد ءَ گوں پُترت مئے استاد ءَ وتی کتاب ءِ دپ بند کت ءُ ایشاناں وش اتک ئے کت کلاس ءِ تہ ءَ ھاموشی وَد اِت ما کہ وتی چم شانک دات اَنت تا گند ایں کہ ھمے مرد گوں وتی مھکمیں بالاد ءَ مئے گور ءَ وتی پُر مهِریں بچکنداں تالان کنگ ءَ انت وتی سیاهیں کوٹ ءُ چَوٹاں ءَ جلواہ دیگ ءَ ات یک آینکے چم ءَ ات ئِے ءُ یکے گور ءَ ءُ تسبی ءِ دست ءَ اَت ما درست ھیران اتیں کہ باریں اے کَے انت ءُ چہ کجا اتکگ ءُ مروچی شهید ھم وتی وشیں تب ءَ انت ھزار جُستانی لڑ مئے دل ءَ ات بلے ما ھچ جست نہ کت-

مرد ءَ ھبر بنا کت ءُ گشت ئِے ” زاھد تئی اسکول سک ڈولدار انت ءُ تئی گونڈو ھم” سر زاھد ءَ ھمیں گپ ءَ بچکند اِت ءُ گُشت ءِ ” واجہ اے درُست تئی جهُد ءُ مهرانی مُز انت کہ من مرچی اد ءَ سر آں” سلام ءُ دروت ءَ پَد سر زاھد مار ءَ گوں دلگوش بوت ءُ گُشت ئِے ” مروچی مئے مھمان ھاس شُمئے گِندُک ءَ چہ شال ءَ اتکگ، اے منی استاد انت، منی راھشون انت، منی مھروان ءُ سنگت انت من وتی زند ءِ ھمک پِڑ چہ وتی زانتکاریں سنگت ءُ راھشون ءَ چہ در بُرتگ اے پروفیسر سباء دشتیاری انت”-

مئے واستا آ وھد ءَ اے نام نوک اَت ما نہ زانت سبا کَے انت بلے پد ءَ سر زاھد ءَ سباء ءِ زندے سر ءَ ھبر کُت، آئی ءِ سیادی گوں بلوچ راج ءُ بلوچی ءَ چنچو جُھل ات ما ھما روچ ءَ زانت-

سال 2010 ءَ پد ءَ دگہ یک مراگشے اسکول ءَ برجم دارگ بیت ءُ کلاس ھشت، نُھ ءُ دَه ءِ نودربر توار کنگ بیت انت ءُ یک برے ما پد ءَ واجہ سباء ءَ گوں دُچار کپت ایں اے رندی دیوان ءِ سرھال بلوچ بلوچی ءُ بلوچستان ات بلوچستان ءِ راجدپتر ءِ کسہ ءُ ھمک چیزانی سر ءَ گپ ئِے کُت کندیل سباء وش تَب ءُ مسکرا باز ات اَنت رحمان ملک ءَ را شیتان ملک گُشگ ءُ پد ءَ کُلیں دیوان کندگاں ءَ سرا زُرت ھر یکے ءَ گوں یک بئیگ سباء ءِ شوکیں دروشُم ات-

سال 2011 ءَ کہ کندیل سباء ءِ شهیدی ءِ ھال ما سرجمیں بلوچستان ءَ تالان بیت، گُش ئے تھاری ءَ مانشان ات چُشیں هستیانی اچ ما جُتا بوگ سک باز تورشت دنت ما وش بهتیں کہ شهید سر زاهد ءِ برکت ءَ ما چُشیں راج دوست ءُ زبان دوستیں هستی ءِ گوں ما دُچار کپت ایں ءُ آئی ءِ گوهریں دانک ءُ دیدار مارا نسیب بوت انت یک جون دو هزار ءُ یازده ءَ بلوچ ڈیهہ ءِ یک زانشتیں ءُ مهکمیں سر ءِ اچ ما بدواھاں پُلیت شهید ءَ گوں مئے گوازینتگیں ساھت چمانی دیم ءَ کتره کتره گوزان بوت انت شهید سباء ءِ پُر مهریں بچکند چمانی دیم ءَ نکش بیت انت- ما درست پُرسیگ بیت ایں- سباء ءُ سباء ءِ وڑین راجدوست اچ ما بالادی دروشُم ءَ جُتا بیت کناں بلے آهانی لیکہ ءُ سِنچ هبجر چہ دل ءَ پراموش نہ بنت،
شهید سباء دشتیاری ما بلوچ راجدپترے تہ ءَ ابدمان انت سُهر چکیں دروت ندر کناں شهید سباء دشتیاری کندیل بلوچ ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ڈوکی ءُ سولیر ءَ پاکستانی پوج ءِ سر ءَ دورجنگیں ءُ دگہ سلاھاں گوں اُرش کتگ سَے کارمند کشتگ ءُ دو ٹپی کتگ اَنت – میجر گوھرام

سربوتگیں ھالانی رِد ءَ گوستگیں روچ ءَ دو شمبے ءَ ناشناسیں سلاہ بندیں مردماں پیدارک ءِ دمگ ڈوکی ءَ برجاھیں پاکستانی پوج ءِ پانگس ءِ سر ءَ اُرش کُتگ اُرش ءَ پاکستانی پوج ءَ جانی تاوان رس اتگ –

ھمے وڑ بیست شش مئی ءَ گچک ءِ دمگ سولیر ءَ ناشناسیں سلاہ بندیں مردماں پاکستانی پوج ءِ سر ءَ اُرش کتگ ءُ جانی ءُ مالی تاوان داتگ –

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ دوشمبے ءَ کیچ ءِ دمگ پیدراک ڈوکی ءَ پاکستانی پوج ءِ پانگس ءِ سر ءَ یک کارندھے دور جنگیں توپکے نشانگ ءَ کتگ ءُ کُشتگ –

میجر گْوھرام بلوچ ءَ دیمتر ءَ گوشتگ کہ مئے سرمچاراں بیست ءُ شش مئی ءَ گچک ءِ دمگ سولیر ءَ پاکستانی پوج ءِ سر ءَ ھما وھد ءَ اُرش کتگ کہ آ لَس مھلوک ءِ سر ءَ لشکر کشی ءَ پد دمگ ءَ لُٹ ءُ پُل کنگ ءَ بوتگ اَنت -اُرش ءِ آسر ءَ دو کارمند مُرتگ ءُ دو ٹپی بوتگ انت-

گڈسر ءَ بی ایل ایف ءِ جارکش میجر گوھرام بلوچ ءَ وتی درشان ءِ تھا گوشتگ کہ زورگیریں پاکستانی پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشانی ءَ گوشتگ کہ بی ایل اے ءِ سرمچاراں گوستگیں شپ ءَ تربت ءِ دمگ آبسر ءَ پاکستانی پوج ءِ یک کاروانے ءِ سر ءَ آئی ای ڈی ءِ نشانگ کرتگ، چریشی ءَ دشمنیں پوج ءِ سَے کارمند مرتگ ءُ چار زدگ بیتگ اَنت – اے اُرش بی ایل اے ءِ اسپیشل ٹیکٹیکل آپریشنل اسکواڈ (ایس ٹی او ایس) کرتگ –

جارکش ءَ گوشتگ کہ بی ایل اے ایس ٹی او ایس ءِ ریموٹ کنٹرول بمب اُرش ءَ پوج ءِ کاروان ءَ ھواریں گاڑی ھما وھد ءَ نشانگ کرتگ آ کاروانے ءِ دروشم ءَ تربت ءِ دمگ آبسر ءَ گوزگ ءَ بیتگ – اُرش ءَ سَے کارمند مرتگ اَنت ءُ چار زدگ بیتگ، وھدیکہ دشمنیں پوج ءِ یک آپسر لیفٹینٹ کرنل عاطف ھوار اِنت –

جیئند بلوچ ءَ گوشتگ کہ بلوچ لبریشن آرمی منزل ءَ داں وتی اُرشاں برجاہ داریت ءُ پوج ءِ سر ءَ اُرش گیش ترند کنت اِنت –

نبشتانک: شھید کندیل

نبشتہ کار : زهیر بلوچ

دی بلوچستان پوسٹ

همُک چاگرد ءِ دیمروی ءِ واستا وانگ ءُ زانگ اژدری انت دُگنیا ءِ تہ ءَ هما کوم ءُ راجاں دیمروی کُتگ کہ آهاں وانگ ءُ زانگ ءَ را گیشتر ارزشت داتگ وانگ ءُ زانگ ءِ پِڑ ءَ مستریں کِرد اُستاد ءُ رهشونانی انت اُستاد ءُ رهبر وتی کوم ءِ ورناه ءُ نودربراں وتی راجی راجدپتر ءُ راجی آجوئی ءَ هوار چاگردی ءُ دگنیا ءِ آشنائی ءُ سرپدی دے اَنت پمشکا مرچی بلوچ راج ءِ استیں بدواه پہ زانت بلوچ راج ءِ اُستاد ءُ رهشون ، ادیباں، زانتکاراں، نبشتہ کاراں شهید کنت یا بیگواه کنت ءُ زندانیگ کنت-

شهید سباه دشتیاری هما اُستاد ادیب ءُ زانتکاراں چہ یکے کہ وتی کومی ءُ راجی گلامی ءِ مار اتگ ءُ جیڑ اتگ ءِ شهید ءَ وتی راج ءِ ورناه ءُ نودربراں وتی راجی آجوئی ءِ هاترا زانشتی سِنچ ءُ بود بکشاتگ ءُ آشنائی داتگ اَت شهید سباه یک نہ تُرسیں ءُ راست گُشیں اُستادے ات شهید ءَ روچ ءُ شپ وتی راجی آجوئی ءَ پہ جھد کُت داں گُڈی ساه ءَ گلامی ءِ سوچنیں درداں شهید ءِ بالاد ءَ تِرک جتگ-

شهید یک پروپیسرے ءَ هوار شاه زانت ءُ ادیب ءُ شائرے ات شهید ءَ کالج ءُ یونیورسٹیاں هوار لبزانک ءِ پِڑ ءَ اوں وتی ورناه ءُ نودربراں پہ راجی وت واجھی ءِ سِکین ئِے داتگ وتی راج ءِ دِرتہ پُچی ، بزگی، بیوسی ، لگتمالی ءُ گلامی ءِ مارشت داتگ ءُ پہ بلوچ ءَ رُژنائیں بانداتے ئِے واب ءُ سَما بکشاتگ اَت شهید سباه دشتیاری یک تچکیں ءُ ایمانداریں ءُ ستک دلیں جھدکارے ءُ اُستادے ات پہ بلوچ راجی اُکبالانی واستا دائم چو کوه ءَ مِک ات شھید ءَ زانتگ ات کہ بدواه آئی ءَ تاوان دنت آئی ءِ ساه ءُ جان ءَ تاوان دنت بلے پد ءَ اوں وتی کومی آجوئی ءَ پَد نہ کِنز ایت-

اے گپ راست انت کہ مزن شانیں رهشون وش بهتیں راجانی تہ ءَ ودی بنت منی دل ءَ بلوچ راج اوں وش بهت ئِے کہ چُشیں رهشون ءُ رهبریں استاد بلوچ راج ءِ تہ ءَ ودی بوتگ اَنت-

بدواه ءَ زانتگ کہ شهید سباه ءِ پکر ءُ زانت پہ آئی ءَ تاوان انت پمشکا بدواه ءَ زوت بلوچ راج ءِ تھاریں شپانی کندیل بالادی دروشم ءَ چہ بلوچ راج ءَ پُلیت شهید سباه بلوچ راج ءِ رژنائیں کندیل ات نوں اے ناسرپدیں بدواه ءَ کَے سرپد بکنت کہ سِنچ ءُ بود هجبر شهید کنگ ءَ هلاس نہ بنت-

اے کندیل داں ابد مان اَنت اے همیں شهیدانی رتکگیں هونانی مُز انت کہ بلوچ راج وتئی راجی وتواجھی ءُ وتی گلامی ءِ بگیر ءَ جھد ءَ انت ءُ وتی مرادانی منزل ءَ جنزان انت شهید سباه دشتیاری همک ورناه ءُ نودربرے تہ ءَ داں ابد زندگ انت ھست انت شهید ءِ زانت پکر داں ابد مئے راج ءِ ورنایانی رهشونی ءُ رهبری ءَ کنت-

مرچی همک سَکی ءُ سوریاں ابید بلوچ راج وتی راجی آجوہی ءَ پہ سوبمندی جُنزان انت اے همے کندیلانی رُژن انت کہ بلوچ ورناه ءُ نودربرانی تھاریں شپاں بلان انت ءُ تھاری ءَ پروش دیان انت-

اُستاد شهید سباه دشتیاری کندیل بلوچ نمیران انت بلوچستان آجو بات بلوچ راج وتواجہ بات، سَتم نہ انت کہ بہ بیت گُرک مئے پسانی میار بلے کہ رهزنی هر رنگ ءَ رهشون کن انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیابدپی شھر گوادر ءَ پولیس ءَ نیکراھی پاٹی جماعت اسلامی گوادر ءِ نائب امیر سعید احمد بلوچ چہ لوگ ءَ دزگیر کرتگ ءُ برتگ –

سعید احمد ءِ کھول ءِ گوشگ اِنت کہ پولیس ءَ لوگ ءِ دروازگ پروشتگ ءُ چُک ءُ جنین لَٹ ءُ کُٹ کرتگ ءُ آ دزگیر کرتگ ءُ برتگ –

سعید احمد ءِ دزگیری ءِ ھلاپ ءَ جماعت اسلامی ءُ دگہ پاٹی برانز گپتگ ءُ میرین ڈرائیو ءِ دگ بند کرتگ ءُ ٹائر مانداشتگ ءُ رو ءُ آئی مھتل کرتگ اَنت –

جماعت اسلامتی ءَ جنت بازار ءَ ھوار شھر ءِ بازیں دکان بند کرتگ ءُ سعید احمد ءِ یل کنگ ءِ لوٹ ءَ کنگ ءَ اِنت –

جماعت اسلامی ءَ گوشتگ کہ انتزامیہ ءَ گیش جاوراں ھراب کنگ لوٹ ایت ءُ شھر ءَ سیاسی مھلوک ءَ دزگیر کنگ ءُ بندیگ کنگ ءَ ایں –

زانگ بہ بیت سعید احمد بلوچ ءِ نام ءَ گوستگیں روچ ءَ ایکس کیسکو گوادر ءِ گوشگ ءَ ارزی نبشتگ کنگ بیتگ –

چاگردی رسانکاجاھاں تامر بنداں گندگ بیت کہ پولیس آئی ءِ لوگ ءَ مانریتکگ ءُ لوگ ءِ زالبولانی گون ءَ برانزی کنگ ءَ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ سی ءُ یک روچ سرجم بوتگ – وھدیکہ چاگردی ترامجاھاں سوشل میڈیا ایکٹیوسٹسانی نیمگ ءَ بیگواھیں ماجد بلوچ ءُ سعید احمد ءِ زورانسری آوار جنی ءِ بگیری ءَ کمپئین کارمرد بیتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ شوربندی ءِ رِد ءَ پندل سازی بندات کنگ بیتگ وھدیکہ بلوچ مھلوک ءِ سر ءَ بمبگواری کنگ ءِ ھاتر ءَ جواز پٹگ درست ھمے پالیسی ءِ شاہ ءَ انت کہ نوں بلوچ چکچینی گیش کنگ پُرایمنیں جھد ءَ نیزور کنگ لوٹ انت – وتی چکچینی پالیسیاں یکشل ءَ برجاہ دارگ ءِ ھاتر ءَ گوستگیں روچاں پاکستانی پوج ءَ پنجگور، کیچ، مند ءَ ابید دگہ دمگاں دمگ انگیر ءَ کرتگ انت –

آئی ءِ گوشگ ات کہ پنجگور ءِ دمگ کیلکور ءَ گوستگیں پنچ روچاں برجاھیں لشکر کشی ءِ میان ءَ دو مردم پوج ءَ کُشتگ اَنت وھدیکہ بازینے آوار جنی ءَ پد بیگواہ کنگ بوتگ اَنت ءُ جنگی بالگرد دمگاں لس مھلوک ءَ نشانگ کنگ ءَ انت –

ماما قدیر بلوچ ءَ دیمتر ءَ گوشتگ کہ پاکستان یک ھاسیں شوربندی ءِ رِد ءَ بلوچ لس مھلوک ءِ سر ءَ لشکر کشی کنگ بندات کرتگ- پاکستان ءَ وتی پاٹی ءَ چادر ءِ مانپوشتگ بلوچستان ءِ ھاکمانی دست ءَ داتگ کہ نوں بلوچ لس مھلوک ءِ سر ءَ لشکر کشی گیش کنگ بنت ءُ بلوچ ھون بے ھساب ءَ ریچگ بوگ ءَ انت مدامی نشاندھی ءَ ابید انسانی ھکانی میان اُستمانی برادری ءُ میان استمانی رسانکدر اے الکاپیں زوراکیاں بے دلگوش کنگ ءَ اَنت ءُ ایردستیں راج ءِ بارو ءَ مئے یکجاہ بے وسی ءَ پدر نہ کنگ ءَ اَنت کہ چریشی ءِ سوب ءَ پاکستان ءِ لاپ ءَ ودی بوتگیں ناشرکاری ناکہ تھنا بلوچ چکچینی راج ءِ ھاتر ءَ زوراکی آرگ انت نوں سرجمیں دنیا ءَ تالان بوتگ ءُ درسیں دنیا ءِ راج ءِ ھاتر ءَ وبایے جان ءِ جوڑ بوتگ –

دومی نیمگ ءَ چاگردی ترامجاہ ٹویٹر بیگواھیں ماجد بلوچ ءُ سعید احمد ھاتر ءَ سوشل میڈیا ایکٹوسٹس ءُ کھول ءِ نیمگ ءَ سرپدی کمئین چلائینگ بوتگ ءُ ماجد بلوچ یک نودر برے کہ آئی ءِ زورانسری ءَ دو سال سرجم بوگ ءَ کمپئین بوگ انت کھول ءِ گوشگ انت پاکستانی پوج ءَ لوگ ءَ بیڑ برتگ آوار جنی ءَ پد بیگواہ کتگ –

ھمے وڑ سعید احمد لیویز کارمندے کہ مستونگ ءِ جھمنند انت سعید اھمد ءِ کھول ءِ گوشگ انت کہ آئی ءِ آوار جنی ءَ ھشت سال سرجم بوتگ ـ سعید اھمد زورانسری ارزی گوستگیں روچ ءَ نبشتہ بوتگ بلے انگت ھاکمانی نیمگ ءَ ھشت سال ءَ پد ارزی نبشتہ کنگ ءِ درگت ءَ ھچ گپ دیم ءَ آرگ نہ بوتگ اَنت –

بیگواھیں سعید اھمد ءِ گھار فریدہ بلوچ ءَ پاکستان ءِ وزیرآعظم ءَ را جستی گپ نبشتہ کتگ کہ وزیر اعظم عمران خان ما آمیدگس، بیگواھیں مردمانی کمیشن، ڈی چوک اسلام آباد ءَ ھچ چشیں جاھے یل نداتگ بلے مئے بھر ءَ بید مایوسی ءَ دگہ ھچ، ریاست مدینہ ءِ تہ ءَ مئے ھک پھریز بوگ ءَ نہ انت مئے دوستگیں مردمانی زند ھچ زمانت نیست کہ کجا انت کس نزانت –

سمی دین بلوچ ءَ نبشتگ کہ ماجد بلوچ ءَ دو سالاں چہ زورانسری بیگواہ انت، یک نودربر ئِے جاہ زندان نہ انت بلکیں زانشجاہ انت اگاں ماجد بلوچ کتکار انت گڑا آمیدگس ءَ آرگ بہ بیت ءُ سزا دیگ بہ بیت اے وڑ زورانسری اوارجنگ ءُ بیگواھی ءَ تھنا یک مردمے ناں بلکیں سرجمیں کھول ءَ یکجاہ سزا رسگ انت-

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ پنجگور ءِ دمگ کیلکور ءَ زورگیریں پاکستانی پوج ءِ گون ءَ جنگ دیان ءَ گل ءِ سنگت شھید بوتگ – ڈیھ ءِ دیمپانی ءَ ڈیھ ءِ سرمچار ھاپز حمید بلوچ ءَ شھیدی ءِ منگھ وتی نام ءَ کرتگ –

جارکش ءَ دیمتر ءَ گوشتگ کہ ھاپز حمید بلوچ پنام ءِ دودا ء یٰسین جھمنند گرمکان پنجگور گوستگیں یک سالے ءُ شش ماہ ءَ پیسر گل ءَ ھوار بوتگ – اے میان ءَ آئی ءَ مھنت ءُ تمردی ءَ آجوئی ءِ زرمبشت ءَ وتی پرز گوں جوانی ءَ پیلو کرتگ انت ءُ دژمن ءِ بگیری ءَ جوانیں جنگاں بھر زرتگ – آئی کار ءُ نام راجدپتر ءَ مدامی یات کنگ بیت –

جئیند بلوچ ءَ گوشتگ کہ دژمنیں پوج ءَ وتی زرزیریں ڈیتھ اسکواڈ ءِ کمک ءَ مروچی شھید حمید ءِ جنازہ ءَ ھواریں مردم توپک ءِ زور ءَ ترسینگ ءِ جھد کرتگ انت کہ زورگیر ءِ پروشی ءِ درشان کنت – دومی نیمگ ءَ پاکستانی پون گوستگیں پنچ روچاں یکشل ءَ لشکر کشی کنگ ءَ انت اے میام ءَ دو دست ءُ گوشیں دمگی مردم ھم شھید کنگ بوتگ اَنت –

گڈسر ءَ جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے زورگیریں پوج ءُ آئی ءِ ھمکارانی زوراکیانی بدل ءَ الم گیپت اھاں بیمناکیں دروشم ءَ سر کنت –

بلوچستان ءِ دمگ کیچ ءِ بنجاھی شھر تربت ءَ سول سوسائٹی کیچ ءِ نیمگ ءَ نیادے برجم دارگ بیتگ، نیاد ءَ چاگردی کارانی پژدر ءَ لس گچینی ءِ مردماناں داد دیگ ءِ سوڑگ بیتگ اَنت –

نیاد سول سوسائٹی کیچ ءِ کنوینر گلزار دوست ءِ چیردستی ءَ شھر ءِ ھوٹلے ءَ برجم بیتگ کہ اود ءَ لس چاگردی کار کنوکیں مردماں بھر زرتگ –

نیاد ءَ کیچ ءَ بندوکیں مردماں چاگرد ءِ جتا جتائیں کارانی پژدر ءَ گچینی ءِ مردماں داد دیگ ءِ سوڑگ بیتگ –

اے درگت ءَ جتائیں پھناتاں بندوکیں مردمانی نیمگ ءَ چار ءُ ٹپاس کنگ بندات بیتگ ءُ کمیٹی ءَ یک ماھے ءِ موہ لت دیگ بیتگ اَنت –

کمیٹی ءَ یک ماھے ءِ تہ ءَ ھما مردمانی نام گچین کنگی اَنت کہ آیاں چاگرد ءِ واستا جوانتریں کار کرتگ اَنت –

نیاد ءَ گوشگ بیتگ کہ کمیٹی وتی گچینی ءِ ناماں دیم ءِ ماہ ءِ بیست ءُ ھپت رمس ءَ پیش کنت ءُ چریشی ءَ پد جار پرینگ بیت ءُ گچینی ءِ مردمانی نام دیم ءَ آرگ بنت اِنت –