TBP Balochi

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں ھشت دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ یک ھزار چار ءُ سد ءُ پنجاہ ءُ نھ ءَ سر بوتگ اَنت وھدیکہ دو دگہ نادراہ بیران بوتگ اَنت –

بلوچستان ءِ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں دو شمبے ءَ بلوچستان ءِ چار دمگاں ھشت مردماں کرونا نادراھی پدر بوتگ، کہ آھانی تہ ءَ تربت ءَ سَے، شال ءُ مستونگ ءَ دو دو، وھدیکہ گوادر ءَ یک مردمے ءَ کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار چار سد ءُ پنجاہ ءُ نُھ ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ گوستگیں روچ ءَ چِل ءُ ھپت مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ھزار ءُ ھپت سد ءُ بیست ءُ ھپت انت –
رپورٹ ءِ رِد ءَ بلوچستان ءِ تہ ءَ گوستگیں روچ ءَ پنچ سد ءُ بیست ءُ ھپت مردمانی کرونا ٹیسٹ کنگ بوتگ اَنت، کہ آھانی تہ ءَ ھشت مردماں کرونا نادراھی پدر بوتگ ءُ وھدیکہ پنجاہ ءُ ھپت مردمانی رپورٹ دنیگت ءَ نہ اتکگ انت –

رپورٹ ءِ رِد ءَ بلوچستان ءِ تہ ءَ اے وھدی کرونا وائرس ءِ سَے سد ءُ نود ءُ دو نادراہ ھست انت کہ شش نادراہ بلوچستان ءِ نادراھجاہ الاج کنگ ءَ انت ءُ آھانی تہ ءَ دو نادراہ ھائی فلو آکسیجن ءُ چار لاؤ فلو آکسیجن ءَ اِلاج ءَ انت-

بلوچستان ءَ کرونا وائرس ءِ پوزٹیو کیسانی گیشی یک ٹک پنجاہ ءُ دو درسد بوتگ تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ چِل ءُ دو مردم بیران بوتگ انت-

بلوچستان ءِ دمگ پنجگور ءَ گوستگیں لھتے ماھاں یکشل ءَ تیرگواریانی وئیل برجاہ اَنت ءُ گوستگیں ھپتگ ءَ پت گوں دو چکانی ھواری ءَ ناشناسیں مردمانی دست ءَ کُشگ بیتگ اَنت ءُ مروچی تیرگواری ءُ دگہ دو مردم بیران بیتگ اَنت –

مروچی پنجگور ءِ دمگ غریب آباد ءَ تیرگواری ءِ وئیلے دیم ءَ اتکگ کہ تیرگواری ءِ وئیل ءَ بیران بیتگیں مردمانی پجار جلیل ء الاھی بکش ءُ علاوالدین ء اختر ناماں بیتگ اَنت کہ ھردوک پروم ءِ جھمنند گوشگ بیتگ اَنت –

دمگ ءِ نادراہ جاہ ءِ رد ءَ جلیل ھما جاہ ءَ بیران بیتگ ءُ علاولدین زدگ بیتگ ءُ نادراہ جاہ ءَ سر بیتگ ءُ آئی ءَ ساہ داتگ اَنت –

ھمے وڑ وڈھ ءَنکلی بن پیر مھمد ءَ ناشناسیں مردماں مھمد عالم نامیں مردمے ءِ لوگ ءِ سر ءَ بمبے چگل داتگ ءُ تتکگ اَنت بلے دگہ جانی تاوانانی ھال نہ بیتگ اَنت-

لیویز ءُ پھزدار وئیل جاہ سر بیتگ ءُ چم دیستگیں مردمانی یکجاہ کنگ اش بنا کتگ اِت –

اوگستان ءَ تالبان ءِ جارکش ذبیح اللہ مجاھد ءَ ٹاہ داتگ کہ آئی ءِ جنگولاں وادی ءِ پنجشیر ءَ سرجمی ءَ واک وتی دستیگ کرتگ، دومی نیمگ ءَ قومی مزاحمتی فرنٹ ءَ تالبان ءِ ٹاہ رد کرتگ ءُ گوشتگ کہ انگت ءَ اود ءَ آئی ءِ لشکر جاڑیگ اِنت –

دوشمبے ءَ کابل ءَ پریس کانفرنس کنان ءَ تالبان ءِ جارکش ذبیح اللہ مجاھد ءَ گُشتگ اَت کہ پنجشیر ءَ سرجمی ءَ واک وتی دست ءَ کتگ ءُ اود ءَ جنگ ءِ دوران ءَ شھریانی بیرانی نہ بیتگ اَنت-

آئی ءَ گُشتگ اَت کہ دستیگ ءِ کنگ ءِ ھواری ءَ سرجمیں ڈیھ ءَ جنگ ھلاس بیتگ –

تالبان ءِ جارکش ءَ گُشتگ اَت کہ پنجشیر ءِ شھری مئے برات اَنت ءُ آیانی بگیری ءَ ھچ رنگ ءَ انتزامی کاروائی کنگ نہ بیت اِنت-

ذبیح اللہ مجاھد ءَ دو شمبے ءَ کابل ءَ پریس کانفرنس کنان ءَ گُشتگ اَت کہ گوستگیں بیست سالاں ھیلکار کنوکیں اوگان لشکر ءَ گوشگ بیت اِنت کہ آ دوبر تالبان ءِ کارکنوکانی ھواری ءَ دوبر پھزداری لپاٹ ءِ تہ ءَ ھوار بہ بنت-آئی ءَ گُشتگ اَت کہ ھاکمی ھلاپ ءَ کجام ھم رنگیں شورشاں ترندی ءَ ھلاس کن ایں –

آئی ءَ گُشتگ اَت کہ امارت اسلامیہ ءَ شورشانی بارو ءَ باز رپیک اِنت ءُ ھرکس شورش ءِ بندات کنگ ءَ بندات کنت آ ترندی ءَ گار کنگ بیت اِنت ما کسے ءَ اجازت نہ دیں –

تران ءَ آئی ءَ نوکیں سرکار ءِ بارو ءَ گُشتگ اَت کہ گڈی سوبمندی بیتگ بس تکنیکی جیڑھانی سر ءَ کار کنگ ءَ ایں زوت تکنیکی جیڑہ ھلاس بنت گڑا ھما وھد ءَ نوکیں سرکار ءِ جار پِرینگ بیت اِنت-

ذبیح اللہ مجاھد ءَ گُشتگ اَت کہ درملکی لشکر ءِ درایگ ءِ وھد ءَ جنگی سامان دزگ ءُ پنجشیر ءَ برگ بیتگ اَنت کہ واتر پجگرگ بیتگ اَنت-

لس مھلوک ءِ نیمگ ءَ تالبان ءں پنجشیر ءِ دستیگ کنگ ءِ راستی نہ بیتگ اَنت –

زانگ بہ بیت کابل ءِ دستیگ کنگ ءَ پد گوستگیں دوھپتگاں تالبان ءِ جنگولاں پنجشیر ءَ جنگ ءِ دیمپانی کنگ کپتگ –

ھما توار کہ وتی سر کنگ ءَ وت جھد ءَ اَت مروچی ھما توار تھت ءِ باھوٹ اِنت ءُ کپتگ آ وتی توار ءِ سرکنگ ءَ مردمانی کمک ءِ دزبندی ءَ کنگ ءَ اِنت ھما توار گوست ءَ دگہ دروشمے ءَ اَت مروچی یک تھتے ءِ سر ءَ کپتگ ءُ وتی کمک ءِ دزبندی ءَ کنگ ءَ اِنت –

بلوچستان ءَ سیادی داروکیں گشندہ اشرف رضاء گوست ءَ تپ ءِ نادراھی ءِ اسراں پد آئی ءِ گٹگ ءُ جگرانی نادراھی ءَ آ گور جتگ ءُ ناگیگ کتگ –

آ اے وھد ءَ کراچی ءَ جناح ھسپتال ءَ تھت ءِ باھوٹ اِنت کہ آئی ءِ گوشگ اِنت کہ منی جگر ءُ گٹگ ناگیگ اَنت چریشی ءَ ڈاکٹرانی گوشگ اِنت آئی ءَ اژدری بُر ءُ برین ءِ زلورت اِت اِنت چرے بُر ءُ بریناں آئی ءَ مزنیں زرانی درکاری اِنت –

چاگردی رسانکجاھاں شنگ بیتگیں تامربندانی تہ ءَ گندگ بیت کہ آ سک ناگیگیں وڑے ءَ گپ ءَ اِنت ءُ وتی کمک ءِ لوٹ ءَ کنگ ءَ اِنت –

اشرف بنکی ءَ پسنی ءِ دمگ نلینٹ کلانچ ءِ نندوک اِنت بلے آئی ءَ بازیں وھداں پیسر لڈ اِتگ ءُ دیم پہ کراچی ءِ دمگ پرانا گولیمار ءَ شتگ-

اشرف رضاء ءِ بارو ءَ گوشگ بیت کہ آ بلوچی زبان ءِ ازمکار ءُ گشندھے کہ آئی ءَ اولی پت بند ایوکی ءَ کش اِتگ ءُ دومی پت بند آئی ءَ عارف کریم ءِ ھواری ءَ پُر کتگ ءُ کش اِتگ ءُ سیمی پت آئی ءَ ساجو کتگ ءُ بلے چرے پت بند ءِ ایگ ءَ پیسر آ گٹگانی نادراھی ءَ وتی ارجان جتگ ءُ پت بند اوشت ءِ آماچ بیتگ –

اشرف رضاء ءَ وتی راج ءُ ادب دوست ءُ زبان دوست ءُ گھبودی گل ءُ بلوچی ءِ دوستداروکیں مردماں کمک ءِ دزبندی کتگ ءُ وتی بینک نمبر zoological. garden.po.bix7462 Bank.UBL
0109 0002 3415 3653
اے اکاونٹ ءَ کمک ءِ روان دیگ ءِ دزبندی کتگ –

زانگ بہ بیت گوست ءَ ھمے رنگ ءَ ھم بلوچی زبان ءِ گشندہ نادراھی ءِ آماچی ءَ پد آیاں زر ءِ نہ بوگ ءِ سر ءَ مرگ ءَ وتی ارجان جتگ اَنت کہ چریشانی تہ ءَ ھمے زوتاں عبداللہ ثناء اَت کہ جگرانی نادراھی ءَ پد بیران بیتگ اَت-

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں بیست ءُ نھ دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ یک ھزار چار ءُ سد ءُ پنجاہ ءُ یکءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں یکشمبے ءَ بلوچستان ءِ پنچ دمگاں بیست ءُ نھ مردماں کرونا نادراھی پدر بوتگ، کہ آھانی تہ ءَ درساں گیش بلوچستان ءِ بنجاھی شھر شال ءَ بیست ءُ سَے، گوادر ءُ لورلائی ءَ دو دو، وھدیکہ ھزدار ءُ پنجگور ءَ یک یک مردمے ءَ کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار چار سد ءُ پنجاہ ءُ یک ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ گوستگیں روچ ءَ ھپتاد ءُ ھپت مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ھزار ءُ شش سد ءُ ھشتاد انت –
رپورٹ ءِ رِد ءَ بلوچستان ءِ تہ ءَ گوستگیں روچ ءَ یک ھزار ءُ پنجاہ ءُ دو مردمانی کرونا ٹیسٹ کنگ بوتگ اَنت، کہ آھانی تہ ءَ بیست ءُ نھ مردماں کرونا نادراھی پدر بوتگ ءُ وھدیکہ دو سد ءُ سِی ءُ پنچ مردمانی رپورٹ دنیگت ءَ نہ اتکگ انت-
رپورٹ ءِ رِد ءَ بلوچستان ءِ تہ ءَ اے وھدی کرونا وائرس ءِ چار سد ءُ سِی ءُ یک نادراہ ھست انت کہ دہ نادراہ بلوچستان ءِ نادراھجاہ الاج کنگ ءَ انت ءُ آھانی تہ ءَ شش نادراہ ھائی فلو آکسیجن ءُ چار لاؤ فلو آکسیجن ءَ اِلاج ءَ انت-

بلوچستان ءَ کرونا وائرس ءِ پوزٹیو کیسانی گیشی دو ٹک ھشتاد ءُ شش درسد بوتگ تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ چِل مردم بیران بوتگ انت-

دی بلوچستان پتر ءَ سربوتگیں ھالانی رِد ءَ بلوچستان ءِ بنجاھی شھر شال ءَ پاکستانی پوج ءَ ھشت مردم زورانسری آوار جتگ ءُ بیگواہ کتگ اَنت –

پاکستانی پوج ءَ شال ءِ دمگ کلی سھراب قمبرانی ءَ آروسی مراگشے ءَ بیڑ برتگ ءُ ھشت ورناہ زورانسری آوار جتگ ءُ بیگواہ کرتگ اَنت کہ آھانی پجار منصور قمبرانی، واسع قمبرانی ، داؤد قمبرانی، زبیر قمبرانی، عزیر زھری، شکیل شاھوانی، عمیر زھری ءُ شبیر سمالانی ءِ ناماں چہ بوتگ انت –

چم دیستگیں مردمانی رِد ءَ اے ورناہ آروسی مراگش ءَ گون بوتگ انت کہ مزنیں کساسے ءَ پوج اتکگ ورناہ آوار جتگ ءُ بیگواہ کرتگ انت –

زانگ بہ بیت اے مردمانی تہ ءَ منصور قمبرانی یکرندے پیسر ءَ ھمے سال ءِ جون ماہ ءَ آوار جنگ ءُ بیگواہ کنگ بوتگ اَت پد ءَ رند ءَ یل کنگ بوتگ – منصور قمبرانی دمگ ءَ برجاھیں مرید ایڈونچر کلب ءِ کوہ سواری انت وھدیکہ ایندگر ورنایانی سیادی ھم چہ ھمے کلب ءَ انت –

بلوچستان ءَ زورانسری آوارجنی ءَ بازیں وھد ءِ بیت کہ برجاہ انت بلے اے زورانسری آوارجنیانی تہ ءَ ھمے سال ءِ ماہ ءِ اگست ءَ گیشی اتکگ ھمے سال ءِ اگست ماہ ءَ بلوچستان ءِ جتا جتائیں دمگاں دہ مردم ءَ گیش آوار جنگ بوتگ اَنت کہ آھانی تہ ءَ ماھیگیر اتھاد ءِ جنرل سیکرٹری یونس انور ھم ھوار انت کہ پد ءَ رند ءَ یل کنگ بوتگ –

ھمے ماہ ءَ ستمبر ءَ مستونگ ءُ شال ءَ چہ چار ورناہ زورانسری آوار جنگ بوتگ اَنت یک ستمبر ءَ بلوچستان ءِ بنجاھی شھر شال ءَ پاکستانی پوج ءَ گِسانی سر ءَ بیڑ برتگ فیاض بلوچ ء حاجی محمد آعظم جھمنند جیل روڈ ہدہ، جاوید شمس ء شمس الحق جھمنند کیچی بیگ آوار جتگ ءُ بیگواہ کرتگ انت وھدیکہ ھمے روچ ءَ مستونگ ءَ چہ نوشکی ءَ رؤکیں دو ورناہ زاکر بلوچ ء محمد یوسف، مدثر ٹکری سیف اللہ زورانسری آوار جنگ بوتگ انت –

بلوچستان ءَ برجاھیں بیگواھیں مردمانی کھولانی گل وائس فار بلوچ مسنگ پرسنز ءِ رِد ءَ ھمے ماہ ءَ زورانسری آوار جنیانی تہ ءَ گیشی اتکگ ھمے وڑ بازیں مردمے دروگیں میڑ ءِ نام ءَ جنگ بوتگ اَنت –

وائس فار بلوچ مسنگ پرسنز ءِ رھشون ماما قدیر بلوچ ءَ بلوچستان ءِ تہ ءَ میان اُستمانی ادارھانی ھچ نگوشگ ءِ سر ءَ ایراد گرگ بیتگ کہ میان استمان انسانی ھکانی ادارھانی ھچ نہ گوشگ ءَ بلوچستان یک کوش جاھے ءِ تہ ءَ بدل بوتگ –

وائس فار بلوچ مسنگ پرسنز ءِ رپورٹ ءِ رِد ءَ بلوچستان ءَ بیست ھزار ءَ گیش مردم آوار جنگ بوتگ ءُ آھانی تہ ءَ ھپت ھزار کُشگ ءُ چگل دیگ بوتگ اَنت –

میان استمانی ادارہ ایمنسٹی انٹرنیشنل ءَ ھم بلوچستان ءِ تہ ءَ زورانسری اوار جنی انسانی المیہ ءِ گوشتگ ءُ پاکستان ءَ چہ لوٹ کتگ کہ سیاسی باسکانی زورانسری آوار جنی بہ دار ایت –

بلوچستان ءِ تیاب دپی دمگ گوادر ءَ ناشناسیں مردماں زیارت مچی ءَ ھستیں یوفون ٹاور یکرند ءِ پد ءَ مانداشتگ –
ھالانی رِد ءَ اے ٹاور یکرندے پیسر ءَ گوستگیں ماہ ءِ رمس ھشت ءَ ماندارگ بوتگ بلے گوستگیں روچ ءَ بزاں آدینگ ءِ بیگاہ ءِ ادار پنچ ءَ یکبرے پد ءَ ناشناسیں مردماں آئی ءِ مشینری مانداشتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدران وتی شنگ کرتگیں درشان ءِ تہ ءَ ٹاور ءِ مشینریانی ماندارگ ءِ زمّہ واری منّ اِتگ ءُ گوشتگ کہ مئے سرمچاراں گوادر ءِ دمگ زیارت مچی ءَ یوفون کمپنی ءِ ٹاور ءُ آئی مشینری یکرندے پد ءَ مانداشتگ انت –

جارکش ءَ گوشتگ کہ دو ھپتگ ءَ پیش اے ٹاور ءِ سر ءَ اُرش کتگ ءُ مشینری سوتکگ انت بلے دوبر شر کنگ بوتگ ءُ آئی ءَ پاکستانی پوج ءِ سیکورٹی دیگ بوتگ کہ شپاں اشی ءِ سر ءَ گاٹ دار انت مئے سرمچاراں دو ستمبر ءِ بیگاہ ءِ ادار پنچ ءَ اُرش کتگ ءُ یکرندے پد ءَ مانداشتگ –

آئی ءِ گوشگ ات کہ پاکستانی زورگیریں یک نیمگ ءِ سی پیک نزیکیں دمگی مردماں زورانسری درپہ در کنگ ءَ لاچار کنگ انت ءُ دومی نیمگ ءَ وتی پوج ءِ پھازگی ءَ یوفون ٹاور ءِ کارمرز کنگ انت – اے کمپنی زورگیراں پائدگ دیگ ءَ کار کنگ انت –

گڈسر ءَ جارکش ءَ وتی درشان ءِ تہ ءَ گوشتگ کہ مئے اُرش بلوچستان ءِ اجوئی تاں برجاہ مان انت –

گوستگیں روچ ءَ شال پریس کلب ءِ دیم ءَ خالد نواب تگاپی ءِ گوھار ءُ دگہ بیگواھیں مردمانی کھولانی ھمراھی ءَ وتی ھیالانی درشان کُتگ ءُ گوشتگ کہ کستریں برات شھید مقبول نواب ءِ زانگولیں جون کراچی منگھوپیر ءَ دست کپتگ وھدیکہ دومی برات ھشت سال انت کہ زورانسری آوار جنگ ءُ بیگواہ کنگ بوتگ – ملکی کانودانی رِد ءَ وتی ھکانی لوٹ ءَ کنگ انت –
اے وھد ءَ ایکٹوسٹ خالدہ قاضی ایڈوکیٹ، وی بی ایم پی ءِ رھشون ماما قدیر بلوچ ءُ عبدالغفار قمبرانی ھم ساڑی بوتگ انت –

بیگواھیں خالد نواب ءِ گوھار ءِ گوشگ ات کہ شانزدہ فروری دوھزار ءُ سیزدہ ءَ شمبے ءِ روچ ءَ سھب ءِ شش ءَ خاران ءَ ایف سی، آئی ایس آئی ءُ دمگی کشندہ ٹولیانی ھمراھی ءَ مئے گِس ءَ بیڑ اش برتگ آھاں کساس ھپتاد گاڑی گون بوتگ – یک لوگے ءَ منی پیریں مات وتی دؤئیں چکاں وپتگ بوتگ دومی لوگ ءَ زامات گوں وتی چکاں وپتگ بوتگ –

آئی ءِ گوشگ ات کہ پاکستانی پوج ءَ منی دؤئیں برات گوں زامات ءِ ھمراھی ءَ آھانی چماں پٹی بستگ ءُ بے دردی گاڑی ءِ تہ ءَ دور داتگ انت، کساس سَے ادار پد منی زامات ھاران ءَ چہ چِل کلومیٹر دیر گروک میدانی دور داتگ ءُ منی دؤئیں برات گوں وت برتگ ءُ بیگواہ کتگ انت – بیست ءُ یک روچ ءَ پد بزاں ھپت مارچ دوھزار ءُ سیزدہ ءَ منی کستریں برات شھید مکبول ءِ زانگولیں جون گوں یک دگہ پنجگوری مردمی ءِ ھمراھی ءَ کراچی منگھو پیر ءَ دور داتگ انت ءُ منی دومی برات خالد نواب ھنگت بیگواہ انت ءُ ھمے ھکومتی ادارھانی گور ءَ بندیگ انت –

آئی ءِ گوشگ ات کہ اے ھشتیں سالانی دراجیں سپر چوں گوستگ مئے دل شری ءَ زانت ءُ مئے کھول زانت –

آئی ءَ دیمتر ءَ گوشتگ منی پیریں مات ءَ وتی چُک ءِ راہ ءَ چاران ءَ داں کور بوتگ ھمک روچ پہ ما پہ مئے کھول ءَ قیامت ءَ چہ کمتر نہ انت ما چہ پاکستان ءِ ھکومت ءَ گوشگ لوٹیں کہ اگاں مئے براتانی سر ءَ للزام ءِ بوتگ گڑا اے ملک ءِ تہ ءَ آمیدگس ھست انت آمیدگس آں آرگ بہ بیت آمیدگس ھما سزا دنت مار ءَ کبول انت بلے اے وڈ یک انسان ءَ بیگواہ کنگ ءُ پدا زاندانانی تہ ءَ جنگ ءُ آھانی زانگولیں جونانی دور دئیگ کجام کانود ءُ ھک دئی انت –

آئی ءِ گوشگ ات کہ ما چہ پریس کانفرنس ءَ پاکستان ءِ ھکومت، پاکستان ءِ چیف جسٹس، آرمی چیف، بلوچستان ءِ ھکومت ءَ دگہ ھاکماں ءَ چہ لوٹ کنیں کہ پہ رب ءَ بچار ایت انسانیت ءِ ھاتر ءَ منی برات خالد نواب تگاپی ءَ یل بکن ات منی پیریں مات ءِ کوری ءَ ھلاس بہ کن انت –

دومی نیمگ ءَ خالد نواب تگاپی ءِ کھول ءَ آئی زورانسری آوار جنی ءِ درسیں ھال ہروفارمہ نبشتہ کتگ ءُ وائس فار بلوچ مسنگ پرسنز ءِ کر ءَ جمع کتگ انت –

یک سالے ءِ پرگوزگ ءَ پد ھم منی گوھار ءِ کوشکار دزگیر نہ بیت، بیت کنت دمگ ءِ انتزامیہ ءَ مزنیں تاکتانی زور ءِ پژدر ءَ کوشکاراں گپت کنگ ءَ نہ اِنت نندانک ءَ نشتگیں شاھینہ شاھین ءِ گوھار ءَ رسانکدراں گوں تران ءِ میان ءَ اے گپ جتگ انت-

بلوچستان ءِ دمگ کیچ ءِ بنجاھی شھر تربت ءَ مروچی دومی روچ ءَ بلوچ آرٹسٹ ءُ اھوالکار شاھینہ شاھین ءِ کشندھانی دزگیر نہ کنگ ءِ ھلاپ ءَ یک سالے ءِ سرجم بیگ ءَ نندانکی زھرشانی ءُ روانک کشگ بیتگ –

روانک شھید فدا چوک ءَ بندات ءُ پولیس ءِ کارگس ءَ سر بیتگ ءُروانک ءَ زالبول ءُ چکاں ھواراں چاگردی مردم، انسانی ھکانی مردماں بھر زرتگ ءُ پولیس کارگس ءِ دیم ءَ انساپ دیگ ءِ لوٹ کتگ-

آیاں گُشتگ کہ یک سالے ءِ گوزگ ءَ پد ھم بلوچ آرٹسٹ ءُ اھوالکار شاھینہ شاھین ءِ کشندہ انگت ءَ ڈن ءَ ترگ ءَ اَنت ءُ دمگدار ءُ واکداراں اے مسام کتگ کہ اے کشندہ گرگ بنت بلے یک سالے ءِ گوزگ ءَ پد ھم اے کشندہ دزگیر نہ بیتگ اَنت –

زانگ بہ بیت بلوچ اھوالکار ءُ آرٹسٹ شاھینہ شاھین پنچ ستمبر دوھزار ءُ بیست ءَ تیر جنگ ءُ کُشگ بیتگ اَت، آئی ءِ کوش ءِ نامزدین جرمکار آئی ءِ لوگ واجہ مھراب گچکی ءُ آئی ءِ ھمراہ سمید سعید ءِ نام ءَ ارزی نبشتگ کرتگ اَت-

شاھینہ شاھین ءِ کوش ءَ ھواریں یک جرمکار سَے نومبر دوھزار ءُ بیست ءَ دزگیر کنگ بیتگ اَت-

پولیس ءَ اے ٹاہ داتگ اَت نامزدیں جرمکار سمید سعید دزگیر کرتگ ءُ گوں وت برتگ – ایپ آئی آر ءِ دومی نامزدیں جرمکار مھراب گچکی انگت ءَ باگی اِنت-