TBP Balochi

بلوچستان ءِ دمگ مستونگ ءِ ھند دشت تیرہ میل ءَ بے وارسیں سَے لاش کل ءُ کسارت کنگ بیتگ اَنت – لاشانی کل ءُ کسارت لاش بروکیں ادارھانی چیردستی ءَ بیتگ اَنت –

اے درگت ءَ دمگی مردمانی گوشگ اِنت کہ دگہ سیزدہ مردمانی لاش سول ھسپتال شال ءَ پجار ءِ ھاتر ءَ ایر اَنت ءُ پجار نہ بوگ ءِ سر ءَ لاش کل ءُ کسارت کنگ بیگ ءَ اَنت-

زانگ بہ بیت گوستگیں ماہ ءَ ھمے ھند ءَ بے وارسیں دَہ لاش کل ءُ کسارت کنگ بیتگ اَنت، کل کرتگیں لاش کل کنوکیں ادارہ چھیپا ءِ چیردستی ءَ کنگ بیتگ اَنت – اشی ءَ پیسر نُھ جنوری سال دوھزار ءُ نوزدہ ءَ ھم ایدھی فاؤنڈیشن ءَ ھمے کبرستان ءَ دَہ بے وارسیں لاش کل ءُ کسارت کتگ اَنت کہ کوھی دمگاں شگالی بیتگ ءُ کپتگ بیتگ اَنت اے کبرستان ءَ گوستگیں پنچ سالاں داں انیگ ءَ یک ءُ سد ءُ شست مردماں گیش نا پجاریں مردمانی لاش کل کنگ بیتگ اَنت –

بلوچستان ءَ دزکپتگیں لاش ءُ ابید ءِ پجار ءَ اے درگت ءَ ڈی این اے ءُ دگہ آسراتیانی بروبری ءِ نہ کنگ ءِ ھلاپ ءَ انسانی ھکانی دمگی گل، سول سوسائٹی ءُ سیاسی پاٹی یکشل ءَ زھر ء درشان ءَ کنگ ءَ اَنت، بلے سرکاری پھناتاں تنی وھدی اے وڑیں کارانی سر ءَ دگہ ھچ گامگیج نہ زرتگ اَنت –

گوستگیں ماہ ءَ بے وارسانی نام ءِ دیگ ءَ لاشانی کل ءُ کسارت کنگ ءِ سر ءَ بلوچ نیشنل مومنٹ ءَ وتی درشانی ءَ گُشتگ کہ بلوچستان ءَ انسانی کُشگ ءُ کل ءِ جاور بندات بیتگ اَنت – میان اُستمابی ادارھانء بے تواری ءِ سبب ءَ ات انسان کوشیں جاور روچ پہ روچ گیش ردوم زورگ ءَ اَنت، مُچیں گورانی دزکپگ،کُشگ ءُ ڈلگ ءُ دروگیں میڑ ءِ نام ءَ بیگواھیں بلوچاں بے وار کنگ ءُ کل کنگ ءَ اَنت –

بلوچستان لبریشن فرنٹ ءِ جارکش میجر گوھرام بلوچ ءَ گل ءِ سرمچار امان پنام ءِ ڈگار ءِ ناگتی بیرانی ءِ سر ءَ آئی ءَ را سھر چکیں دروت ندر کرتگ ءُ گوشتگ کہ سرڈگار ءِ بندوکی ءُ آئی ءِ جھد ءِ آجوئی ءَ وتی زمہ واریانی پیلو کنان ءَ سلاہ بندیں جد ءُ جھد پہ وت ءَ گچین کرتگ ءُ آئی ءَ گڈی ساہ ءَ داں جھد ءَ بندوک بیتگ اَنت –

میجر گوھرام بلوچ ءَ گُشتگ کہ امان پنام ءِ ڈگار سال دوھزار ءُ دَہ ءَ بی ایل ایف ءَ گوں بندوک بیتگ، آ یک جوانیں چیرجنگیں سرمچارے بیتگ ءُ بازیں جنگاں ھوار بیتگ ءُ آئی ءِ سرڈگار ءِ پھریز کنان ءَ دشمن باز بر ءَ پروشی ءِ دیمپان کرتگ آئی ءِ گران بھائیں کربانی ھروھد ءَ یات کنگ بنت –

بی ایل ایف ءِ جارکش ءَ گُشتگ کہ آ بازیں وھداں نادراہ بیتگ ءُ آئی ءِ جاندراھی بیگ ءَ بیتگ –

ما آئی ءِ کربانی ءُ بلوچ سرڈگار ءِ پھریزگ ءُ آجوئی ءِ واستا آئی ءِ بر اِتگیں پند ءِ راھیگ اِنت ما آئی ءِ واھشت ءَ سرڈگار ءِ پھریزگ ءُ آجوئی ءَ داں اے دراجیں پند ءِ جد ءُ جھد ءَ بلوچستان ءِ آجوئی ءَ داں برجاہ داریں –

بلوچستان ءِ بُنجاھی شھر شال ءَ فرنٹیئر کور پوسٹ ءِ نزیک ءَ تراکے بوتگ کم چہ کم سے مردم بیران ءُ سیزدہ زدگ بوتگ اَنت-

پولیس ءِ رِد ءَ شال ءِ دمگ سونا خان ءَ مستونگ دگ ءِ سر ءَ ایف سی چیک پوسٹ نزیک ءَ تراکے بوتگ ءُ تراک زانگ نہ بوتگ کہ چینچو تُرند بوتگ-

تراک ءِ آسر ءَ زدگ بوتگیں مردم پہ الاج ءِ ھاتر ءَ نادراھجاہ ءَ سر کنگ بوتگ اَنت-

تراک ءَ چہ پد پولیس ءُ پوج مزنیں کچے ءَ سر بوتگ ءُ دمگ ءِ راہ ءُ در بند کتگ اَنت –

دومی نیمگ ءَ تحریک طالبان ءَ اے اُرش ءِ زمہ واری منّ اِتگ-

تحریک طالبان ءَ چاگردی رسانکجاھاں شنگ کرتگیں ھالے ءَ گُشتگ کہ اے اُرش تحریک طالبان ءَ کرتگ ءُ اشی ءِ زمہ واری ءَ منّ ایت –

نبشتانک: اَنگریں ترانگ

نبشتہ کار: سعید احمد بلوچ

دی بلوچستان پوسٹ

گوش ئے تو گوں وتی هواری ءَ منی زندمان ءِ دراھیں شادمانی وتی گرنچ ءَ ڈک دات ءُ گوں وت بُرتگ اَنت- ترا چَہ پَد من تئی جتائی ءِ یاتانی آس ءَ گوں سُچگ ءُ زندگی کنگ ءَ آں، زندگی ھر روچ تئی جتائی ءِ یاتاں گیش کنان کنت ءُ روچے دابـے ءُ ڈولے سینگار اِیت ءُ مئے سُتکگیں بالاد ءَ گیش تِر سوچیت نہ زاناں اے زندگی ءَ گوں تئی یاتاں پرچہ انچو مھر اِنت؟؟ زندگی پرچہ منی جند ءَ دوست نہ داریت ءُ مارا پرچہ مُجتی گوں انگراں لئیب دار اِیت؟ نہ زاناں من کدی زندگی ترا رُکست کناں بلے داں زندگ آں ترا یات کن آں اگاں بوت ترا مرگ ءَ رند هم یات کن آں کہ تو من ءَ چوں آزارانی دیمپان کتگ-

منی ءُ زندگی ءِ میان ءَ دژمنی نہ زاناں کدی بُنگیج بوتگ من ءَ یات نہ اِنت بلے انچو الّم گوش آں هما اِنت کہ تو رَپتگ ئے هما اِنت کہ تو مئے دیدگاں چو بے اِنانی گار بوتگ ئے هما اِنت کہ منی ءُ زندگی ءِ میان ءَ اے آس روک بوتگ ءُ روچ پہ روچ ودّان اِنت مروچاں گوش ئے منی سرجمیں بالاد همے آس ءَ سوتکگ ءُ انگر کُتگ بلے انگت همے آس ایرموشی ءِ نام ءَ نہ زانت ءُ ھر روچ من ءَ سُھریں دَاگو ءَ گوں داگ پِر داریت-

هما اِنت اے آس منی بالاد ءَ ودّان اِنت گوش ئے من ءَ کسّی هیال گوْر نہ اِنت ناں لوگ ءِ مردماں گوں مھر ءُ دوستی است ناں دوست ءُ یاراں گوں نزیکی ءُ ناں ائید ءُ وشیں روچاں گَل ءُ شادانی بس گوں تئی جتائی ءِ آس ءَ سچگ ءُ انگر بوان آں، هما اِنت کہ اے آس روک بوتگ گوش ئے من ءَ وتی سُچگ ءَ گیش وشی رس اِیت امنچو گیش وت ءَ سوچاں امنچو گیش ملار بہ آں-

برے برے من جیڑ آں تَاں هیال کن آں کہ من پہ وت وشھالی ‎ءِ جُھدے بنا کن آں مُردنی من لوٹاں کہ همے آس ءِ بگیری ءَ پہ وت ءَ یک کسانیں جُھدے بندات بہ کن آں بلے اے منی وس ءُ واک ءَ چَہ ڈن اِنت تئی جتائی ءِ آس اَنچو جمبور اِنت کہ آئی ءِ توسگ منی وس ءُ واک ءَ نہ اِنت-

ھردیں من جُھد کن آں تَہ اے زندمان چَہ من رُکستی لوٹ اِیت من یک شکست وارتگیں سُپاھیگے آں کہ من تئی مھر ءِ پڑ ءِ جنگ ءَ شکست وارتگ ءُ تو اَچ من باج بُرتگ بس گُڈی ترا اینچو گُش آں ترا چہ پد مئے اے زندمان ءَ شکست وارتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ ضلع کیچ ءِ بُنجاھی دمگ تربت ءَ ناشناسیں سلاہ بندیں مردماں نیم جوڑ بوتگیں شورمہ ڈیم سر ءَ اُرش کتگ ءُ مشینری مانداشتگ ءُ وھدیکہ تیرگواری آسر ءَ لیویز کارندھے ٹپی-

لیویز بنشون ءِ رِد ءَ ناشناسیں سلاہ بندیں مردماں شمبے ءِ روچ ءَ گھنہ ءِ نزیک ءَ نیم جوڑ بوتگیں شورمہ ڈیم ءِ کمپنی ءِ مشینریانی سر ءَ اُرش کتگ ءُ مانداشتگ اَنت وھدیکہ اود ءِ پھازوک ءِ دست ءُ پادانی بندگ ءَ چہ اَبید اود ءِ ساڑی ئیں فردوس نامیں لیویز کارندہ ءِ سر ءَ تیرگواری کتگ ءُ چریشی ءِ آسر ءَ آ ٹپی بوتگ ءُ اُرشکاراں لیویز ءِ پرپٹ گوں وت برتگ –

وئیل ءَ چہ پد پوج مزنیں کچے ءَ سر بوتگ اَنت بلے اُرشکار تچگ ءَ سوبمند بوتگ اَنت-

اے بوتگیں اُرش ءِ زمہ واری انگت ھچ گل ءَ نہ زرتگ-

کیچ ءِ بنجاھی شھر تربت ءَ جسٹس فار شھید شاھینہ شاھین کمیٹی ءِ نیمگ ءَ بلوچ آرٹسٹ ادیب ءُ ایڈیٹر شاھینہ شاھین بلوچ ءِ کوش ءِ سال ءِ پرگوزگ ءَ پد آئی ءِ کشندھانی دزگیر نہ کنگ ءِ بگیری ءَ مروچی شھید فدا چوک تربت ءَ زھرشانی بنجل جنگ بوتگ –

زھرشانی بنجل ءَ سیاسی ءُ چاگردی باسکاں ھوار دگہ مردماں بنجل ءِ تر ءُ تاب کُتگ –

آھانی گوشگ ات کہ مارا مرچی سال یے سرجم انت برے یک جاھے ءَ برے کراچی ءُ برے شال ءَ ما انساپ ءِ لوٹ ءَ کنگ ءَ ایں، بلے انگت کُشندہ دزگیر کنگ نہ بوتگ، مئے گوم ءَ ھک کنگ نبوتگ- ما چار گھار ایں ما چی کُت کنیں مار ءَ نوں دمبرتگ انچو چار راھانی سر ءَ نندگ ءُ کوکار کنگ ءَ –

آھانی گوشگ ات کہ ما تربت انتزامیہ ءُ پولیس ءَ چہ جُست کنگ لوٹیں کہ سالے بس نہ اِنت پہ یک قاتلے ءِ دزگیر کنگ ءَ؟
دگہ چُنت سال لگیت پہ قاتل ءِ دزگیر کنگ ءَ؟ اگاں نہ اے ملک ءِ تہا انساپ بس یک لبزے کہ بے مانا اِنت؟-

آھاں چہ درسیں سیاسی ءُ چاگردی ءُ دگہ تک ءُ پھناتاں سیادی داروکیں مردماں چہ لوٹ کتگ کہ مئے ھمراہ داری ءَ بہ کن انت مار ءَ انساپ دیگ ءَ وتی کرد پیلو بہ کن انت –

گوستگیں روچ ءَ شھید شاھینہ شاھین کمیٹی ءِ نیمگ ءَ تربت پریس کانفرس تران کنان ءَ کمیٹی ءِ باسکانی گوشگ ات کہ اے زھرشانی بنجل دو روچ ءَ بزاں شمبے ءُ یکشمبے ءَ برجاہ دارگ بیت انت ءُ آئی پد اگاں ھنگت کشندہ دزگیر کنگ نبوتاں گڈا تربت پولیس کارگس ءِ دیم ءَ زھرشانی کنگ بیت انت –

وئیل سبی ءُ ڈیرہ مراد جمالی ءَ پیش اتکگ اَنت کہ اود ءَ دگ ءِ وئیلے ءَ دو کس بیران ءُ لوگی جیڑہ ئِے سر ءَ پت ءُ گوں یک زھگے ءَ زدگ ءُ دومی زھگ بیران-

سر بیتگیں ھالانی رد ءَ سبی دگ ءَ اسٹیل مل ءِ نزیک ءَ پرپٹ ءُ ٹریکٹرے ءَ ٹکر وارتگ، چریشی ءَ دو کس بیران ءُ یکے زدگ بیتگ –

بیران بیتگیں مردمانی پجار خان مھمد ء مھمد ءُ مھمد پیرل ء گاڑو خان جھنند کلی کمالو ءِ ناماں زانگ بیتگ اَنت –

زدگ بیتگیں مردم ءِ پجار دین مھمد ء عبدالحمید جھمنند نوابشاہ ءِ نام ءَ زانگ بیتگ، زدگ بیتگیں ءُ بیران بیتگیں مردم نادراہ جاہ ءَ سر کنگ بیتگ اَنت –

ھمے وڑ ڈیرہ مراد جمالی ءَ ھان کوٹ پولیس تھانہ ءَ گوٹھ حبیب ءَ لوگی جیڑہ ئِے سر ءَ تیرگواری ءَ برات بیران ءُ پت ءُ دگہ زھگے ءَ زدگ بیتگ اَنت –

پولیس ءِ رد ءُ جرمکار مھمد انور مگسی ءِ تیرگواری ءَ آئی ءِ برات زاکر حسین بیران بیتگ –

پولیس ءِ رد ءَ چرے تیرگواری ءَ آئی ءِ پت موسیٰ خان ءُ آئی ءِ کستریں برات نوردین مگسی زدگ بیتگ اَنت –

جرمکار جرم ءِ کنگ ءَ تچگ ءَ سوبمند بیتگ ءُ لاش ءُ زدگ بیتگیں مردم نادراہ جاہ ءَ سر کنگ بیتگ اَنت ءُ جیڑہ لوگی جیڑہ ئِے گوشگ بیتگ ءُ گیشیں پٹ ءُ پول پولیس کنگ ءَ اِنت-

لچہ: ندر پہ راجی شھید تابش جان(ریھان) بلوچ ءِ نام ءَ

لچہ کار: آبدرھشون

دی بلوچستان پوسٹ

آ پہ جان ءُ دل کہ زور ایت مئے مُراداں ناتوام ءُ پْرشتگیں
جَنگ ءِ دْرچک ءَ جزماں مین ایت گوں شھیدی ھونی تْرمپاں ششتگیں

ڈیھ پھازیں پگر باندات راجی لوٹاں یکّ یکّ ءَ سدّکاں
کنت پیلّو ، گوں امیتاں روک کنتیں ھر چراگ ءَ کُشتگیں

گلزمین ءِ دوستی ءَ پہ سُھریں تیراں سرمچاریں کُنگرے
کنت وشّاتک ، دنت بوسہ بیرک ءَ ءُ وارت اِش جان ءَ مُشتگیں

آ کہ زانت ءُ زانش ءَ گوں ساہ دنت ءُ بیت نمیران دپتر ءَ
کنت رُژنا سرزمین ءَ گوں وتی ھر جُھد ءُ کِرد ءَ اِشتگیں

مئے کلم داں ساہ کشّ ایت مئے سر ءَ داں ساہ رھشؔون روت ءُ کیت
پہ بلوچاں ، سرمچاراں ، پہ شھیداں مئے اے گال اَنت گُشتگیں

چاگردی رسانکجاھاں چندے دماناں شنگ بیتگیں تامر بندے ءَ اے گندگ بیت اِنت کہ بازیں کچے ءَ مردم کوھانی تہ ءَ مردم ھرانی سر ءَ تیل کشگ ءَ گندگ ببت –

اے دمگ سراوان ءِ دمگ ءَ سیمسری دمگ گندگ بنت اے مردم پہ لاپ ءِ شوھاز ءَ زند کشیں باپاری ءَ اے وڑ ءَ لاچار اَنت ءُ اے لاچاری ءِ تہ ءَ بازیں کسانی جان ءُ ساہ شتگ اَنت –

گوستگیں روچاں ایرانی لشکر ءَ ھمے باپاریانی سر ءَ تیرگواری کتگ ءُ کُشگ ءِ بیھار داتگ اَنت بلے اے تیرگواری ءَ کسے ءِ ساہ گرگ نہ بیتگ اَنت ءُ دراھیں مردم سلامتی ءَ وتی منزلاں سر بیتگ اِت اَنت-

چوشین بازیں تیرگواری وئیلانی مرگ ءِ دیمپانی بلوچستان ءِ نیزگاریں مھلوک ءَ پہ سیمسراں کپ ایت ءُ ھمے تیرگواریانی دیمپانی ءَ بازیں نیزگار ھم مرگ ءَ وتی ارجان جتگ اَنت –

روکپتی بلوچستان ءُ رودراتکی بلوچستان ءِ میان ءَ کش اِتگیں لکیر ءَ بازیں بلوچ نیزگارانی ساہ گپتگ اَنت بلے ساھگیری ءِ ھواری ءَ انگت ءَ اے مھلوک پہ چُنڈے نان ءِ ھاتر ءَ ساہ کشیں کار ءَ گوں لچوک اَنت –

گوشگ بیت اِنت کہ بلوچستان ءَ ھاسیں روزگار ءِ نہ بوگ ءِ سر ءَ مھلوک چوشیِں جان کشیں کار ءِ کنگ ءَ لاچار اَنت –

زانگ بہ بیت گوست ءَ یک ھمے رنگیں وئیلے ءَ سیمسری پھزدارانی تیرگواری ءَ کم چہ کم سِی مردم یکیں جاہ ءَ بیران بیتگ اِت اَنت مردمانی بیرانی ءِ پژدر ءَ روکپتی بلوچستان ءَ مھلوک ءَ زھر ءِ درشان کتگ اَت –