TBP Balochi

بلوچستان ءِ تیابدپی شھر گوادر ءَ بجلی ءِ ٹرانسفرمر ءِ ھرابی ءِ سبب ءَ مھلوک ءَ دگ بند کرتگ ءُ زھرشانی کرتگ –

گوادر ءَ سر بیتگیں ھالانی رد ءَ زھورشاہ وارڈ گوادر ءِ جھمننداں بجلیانی بندش ءِ سبب ءَ دگ بند کرتگ ءُ روگ ءُ آیگی مھلوک مھتل کرتگ اَنت –

زھرشانی کنوکانی گوشگ اِنت کہ گوستگیں پنچ روچاں زھورشاہ وارڈ گوادر ءَ ٹرانسفرمر ھراب اِنت ءُ بجلی ءِ واکدار ءُ سرکار ءِ گوشاں مورے ھم نہ وارت –

زھرشانی کنوکاں پورٹ ٹو سٹی ءِ مین روڈ میرین ڈرائیو بند کرتگ ءُ مھلوک ءِ رو ءُ آ بند کرتگ اَنت –

زھرشانی کنوکانی دُچار کپگ ءَ ایم پی اے گوادر میر ھمل کلمتی شتگ ءُ آئی ءَ زھرشانی کنوک سدکی داتگ اَنت ءُ گوشتگ کہ شپ ء ساھت یازدہ ءَ ٹرانسفرمر شر کنگ بیت ءُ بجلی دوبر پچ کنگ بنت –

زھرشانی کنوکاں ھمل کلمتی ءِ سدکی ءِ پژدر ءَ دگ بچ کرتگ ءُ وتی زھرشانی ھلاس کرتگ-

زانگ بہ بیت گوادر ءَ ھوار بجلی، آپ ءُ دگہ آسراتیانی سبب ءَ یکشل ءَ مھلوک زھرشانی کنگ ءَ گندگ بیگ ءَ اَنت –

گوستگیں روچاں گوادر ءَ ھواریں دمگ جیونی ءُ اورماڑہ ءَ ھم آپ ءِ نہ بوگ ءَ مھلوک ءَ زھرشانی کرتگ ءُ تن ءِ ھلاھوشی ءِ پروشگ ءَ سرکار ءِ گور ءَ آپ ءِ پُجارینگ ءِ لوٹ کرتگ اَت –

بلوچستان ءِ تیابدپی دمگاں ھوار بازیں ھند زند ءِ اژدری آسراتیاں زبھر اَنت ءُ مھلوک وتی زند ءِ ھمک روچی ءِ آسراتیانی واستا تلوسگ ءَ اَنت –

پنجگور ءَ یکیں ھپتگ ءِ تہ ءَ ھپت مردم کُشگ بیتگ اَنت ءُ اشانی ھواری ءَ پنجگور ءَ دُزی ءُ ڈنگی بازیں کساسے ءَ گندگ ءَ آیگ ءَ اَنت –

بلوچستان ءِ دمگ پنجگور ءَ سر بیتگیں ھالانی رد ءَ گوستگیں روچاں نیکراھی پاٹی جمیعت علما ء اسلام پنجگور ءِ رھشون مولانا عبدالحئی ءِ کوش ءِ پژدر ءَ مروچی شھری ایکشن کمیٹی ءِ دزبندی ءَ ھرتال کنگ بیتگ –

ھرتال ءَ شھر ءِ دکان ءُ باپاری بنجلانی ھواری ءَ دگہ ادارہ بند ءُ دگانی سر ءَ رو آ کساس کمے ءَ گندگ ءَ اَتکگ اَنت –

زانگ بہ بیت لھتے روچ ءَ پیسر ءَ پنجگور ءِ دمگ سوردو ءَ ناشناسیں سلاہ بندیں مردماں تیرگواری کرتگ ءُ جمعت علما ء اسلام پنجگور ءِ نائب امیر مولانا عبدالحئی کُشتگ-

عبدالحئی ءِ کوش ءِ پژدر ءَ گوستگیں روچ ءَ پسنی ءَ ھم نیکراھی مردمانی نیمگ ءَ زھر ءِ درشان بیتگ ءُ آیاں گوشتگ کہ سرکار بہ گوش ایت کہ مولانا عبدالحئی ءِ کُشندہ کَے اَنت ءُ چریشی ءَ پیسر ھم بازیں نیکراھی مردم کُشگ بیتگ اَنت –

پنجگور ءَ بیتگیں ھرتال ءِ پلامرزی تاجر برادری ءَ ھم کُرتگ ءُ وتی دکان بند کرتگ اَنت ءُ تاجر برادری ءِ گوشگ اِنت کہ اے ھرتال مئے مھلوک ءِ پھریزگ ءَ اِنت –

ھمے وڑ ءَ دومی نیمگ ءَ پنجگور ءَ پوجی لشکر کشی ءِ میان ءَ ھم دو مردم کُشگ بیتگ اَنت –

دمگی ھالانی تہ ءَ گوشگ بیتگ کہ گوستگیں سَے روچاں پوجی لشکت کشی برجاہ اِنت ءُ چار مردم پوجی لشکر کشی ءِ میان ءَ بیگواہ کنگ ءُ دو مردم کُشگ بیتگ اَنت –

ھالانی رد ءَ میر شاھو بازار، بکشی بازار ءُ شیخ ھارون بازار پوج ءَ انگیر کرتگ ءُ اود ءَ زالبول ءُ چُک ھم لَٹ ءُ کُٹانی نشانگ کنگ بیتگ اَنت ءُ پوج ءَ یک نوکیں چوکی ءِ ھم جوڑ کرتگ –

لشکر کشی ءِ میان ءَ آوار جنگ بیتگیں مردمانی پجار رھمت ء اھمد، موسیٰ ء مھمد، ھاسل ھان ء اھمد، عیسٰی ءُ بکشی ء دیدار ءِ نام ءَ زانگ بیتگ اَنت –

گوستگیں روچ ءَ ھمے دمگ ءَ پوج ءِ لشکر کشی ءِ میان ءَ پوج ءَ دو مردم بولا ء مولا بکش ےأ عصاء مارو تیر باران کرتگ ءُ کُشتگ اَنت –

پوج ءِ نیمگ ءَ تنی وھدی اے ھالانی بارہ ءَ دگہ ھچ گپ دیم ءَ نیتکگ اَنت ءُ دمگی مردمانی نیمگ ءَ گیشیں مردمانی بیگواھی ءِ گمان ءَ کنگ ءَ اَنت –

سر بیتگیں ھالانی رد ءَ روکپتی بلوچستان ءِ دمگ پشین ءَ سلاہ بندیں مردمانی تیرگواری ءَ یک شھری ءِ بیران بیتگ –

بیران بیتگیں شھری ءِ پجار ھمود رند بلوچ ءِ نام ءَ زانگ بیتگ ءُ ھمود ءِ سر ءَ سلاہ بندیں مردماں تیرگواری کرتگ ءُ کُشتگ –

ھالانی تہ ءَ گوشگ بیگ اِنت کہ ھمود گوست ءَ روکپتی بلوچستان ءِ دمگ راسک ءِ نندوک بیتگ کہ اود ءَ وت ما وتی جیڑھانی سر ءَ لڈ اِتگ ءُ پشین ءَ اتکگ بیتگ –

روکپتی بلوچستان ءَ لس مھلوک ءِ گوشگ اِنت کہ ایران ءِ چیریں ادارھانی نیمگ ءَ لس مھلوک ءِ سلاہ بند کنگ ءَ دمگانی سر ءَ کُشت ءُ کوش گیش بیتگ اَنت –

گوستگیں دو ماھانی تہ ءَ تنی وھدی چِل ءُ نُھ کس روکپتی بلوچستان ءَ تیرانی آماچ کنگ ءُ کُشگ بیتگ اَنت –

چاگی بلوچستان ءِ دلبند ءِ نام ءَ زانگ بیت اے نام بلوچانی تہ ءَ ھواریں گلاں نامینتگ، اے نام گیشتر ھما وھد ءَ زانگی ءَ دیم ءَ اتکگ کہ نوزدہ سد ءُ نود ءُ ھشت ءَ پاکستان ءِ سرکار ءَ وتی زھرناکیں بمب بزاں “ایٹمی بمب ” ءِ چکاس کرتگ –

اے چکاس ھما وھد ءَ کنگ بیتگ کہ پاکستان ءِ جمھوری سرکار میاں مھمد نواز شریف بیتگ چرے سرکارانی سوڑگ ءَ پد پاکستان ءِ سائنسدان ڈاکٹر عبدالقدیر ءِ جوڑ کرتگیں زھرناکیں تراک چکاس کنگ ءِ واستا بلوچستان ءِ دمگ چاگی ءَ راسکوہ گچین کنگ بیتگ –

یک ھالے ءَ اے گوشگ بیتگ کہ بلوچستان ءَ بازیں سیاسی گل اے کار ءَ جُست کنگ نہ بیتگ اَنت ءُ بلوچستان ءِ سر ءَ بمب تراکینگ بیتگ، اے ھال ءِ تہ ءَ چِنکس راستی ھست چنکس پدراھی ھست بلے بلوچستان ءِ جتائی ءِ واستا جوڑ بیتگیں سیاسی گلانی بھتام اِنت بلوچستان ءِ سر ءَ زھرناکیں بمب تراک ءَ سرکار ءَ ھواریں پارلیمنٹ ءِ واکداری ءَ ھوار بیتگ اَنت –

بلوچستان ءِ سر ءَ چکاس بیتگیں بمب تراک ءَ چی اسر کپتگ کجام ھساب ءَ اے اسراں دمگ ءَ تاوان بیتگ، اود ءَ نندوکیں مردمانی ھواری ءَ بازیں ساھدار ءُ دگہ نوک رُستگیاں بازیں کساسے ءَ تاوان باری بیتگ اَنت –

اے روچ ءَ بلوچستان ءَ ھما روچ ءَ بہ گر داں روچ ءِ مروچی ءَ بلوچ سیاسی گلانی نیمگ ءَ سیاھیں روچے ءِ بستار ءَ دارگ بیتگ ءُ انگت ءَ اے روچ پہ بلوچ سیاسی گلانی نیمگ ءَ گرانیں روچ ءِ دارگ بیت اِنت –

ھمود ءَ بلوچ اے روچ ءَ سیاھیں روچ سرپد ھمود ءَ اے روچ ءَ پاکستان وتی واستا پھر ءُ شان سرپد بیت اِنت ءُ پاکستان ءَ اے روچ ءَ بزانکہ “یوک ء تکبیر ” ءِ نام ءَ زانگ بیت اِنت –

ھمے درگت ءَ بلوچ امریکی کانگریس ءِ سروک تارا چند ءَ وتی یک بیانے ءَ گوشتگ کہ اے تراک ھما زمینانی سر ءَ ھنچش تاوان اِنت کہ اود ءَ تباھی کنت –

آئی ءَ گوشتگ کہ اے تراک بلوچانی زمین ءِ سر ءَ کنگ بیتگ ءُ ھمے تراک ءَ بلوچانی زندگی ءِ ھواری ءَ گواچن ھم پُل اِتگ اَنت –

بلوچستان ءَ ھواریں سیاسی گل ھم اے روچ ءَ وتی زھر ءِ درشان ءَ چاگردی رسانکجاھاں کنگ ءَ اَنت بلوچستان ءِ آجوئی ءِ واستا جد ءُ جھد کنوکیں سیاسی گل بلوچ نیشنل مومنٹ ءِ سروک چئیرمین ھلیل بلوچ ءَ چاگردی رسانکجاہ ٹوئٹر ءَ گوشتگ کہ اے روچ بلوچانی واستا سیاھیں روچے ءِ بستار ءَ زانگ بیت اِنت –

آئی ءَ گوشتگ کہ دنیا باید پاکستان ءَ اے جست ءَ بہ کنت پرچا آئی ءَ بلوچانی زمین ءِ سر ءَ چوشیں بمبانی چکاس کرتگ ءُ اود ءَ ھرچ شَئے بلوچاں پچگرگ بیتگ اَنت –

ھمے وڑ ءَ بی ایس او آزاد ءِ سیکٹری جنرل مھرزاد ءَ ٹوئٹر ءَ ٹوئٹے ءَ گوشتگ کہ ھما روچ ءَ چاگی ءِ سر ءَ تراک بیتگ ھما روچ ءَ بہ گر روچ ءِ مروچی ءَ بلوچانی سر ءَ کینسر، پوسٹ ءِ نادراھیانی ھواری ءَ بازیں نادرھیانی دیمپان اَنت –

ھمے درگت ءَ بلوچ نیشنل مومنٹ ءِ ڈپٹی سیکریٹری جنرل بابل لتیپ ءَ ھم ٹوئٹر ءَ راسکو ءِ چیھانٹ ءِ اکس شنگ کرتگ ءُ گوشتگ کہ بیست ءُ ھشت مئی پہ بلوچ راج ءُ سرڈگار ءَ سیاھیں روچے ءِ بستار ءَ زانگ بیت اِنت ءُ اے روچ ءِ سان روچ ءِ مروچی ءَ بلوچ زمین ءَ ھست اَنت –

ھمک بیست ءُ ھشت مئی ءِ وڑ ءَ اے بیست ءُ ھشت مئی ءَ ھم چاگردی رسانکجاھاں بلوچانی نیمگ ءَ ھیش ٹیک #NukeAfterMathlnBalochistan کامرد بیتگ –

اے روچ ءَ بلوچانی ھک ءُ ھساب کجام وڑ ءَ کنگ بیتگ اَنت چون اے دمگانی نادراھیانی سر ءَ گامگیج زورگ بیتگ کجام ھساب ءَ بلوچانی سر ءَ کپتگیں ڈُکالاں جیڑگ بیتگ اے آسراتانی واستا مزنیں گامگیج تنی وھدی گندگ نہ بیتگ اَنت –

عبدؤئی ءَ پاکستانی پوج ءِ پانگس ءِ سر ءَ دورجنگیں توپک ءِ سر ءَ اُرش کتگ یک کارمندے کُشتگ – جئیند بلوچ

دی بلوچستان پوسٹ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں تمپ ءِ دمگ عبدوئی ءِ کوھاں برجاھیں پاکستانی پوج ءِ پانگس ءِ سر ءَ اُرش کتگ، اُرش ءَ پاکستانی پوج ءَ جانی تاوان رس اتگ – سلاہ بندیں مردم درآیگ ءُ رؤگ ءَ سوبمند بوتگ انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں پنچ شمبے ءِ روچ ءَ تمپ ءِ دمگ عبدوئی ءَ برجاھیں زورگیریں پاکستانی پوج ءِ پانگس ءِ سر ءَ دور جنگیں توپک ءِ گون ءَ اُرش کُتگ – جارکش ءَ گوشتگ کہ دور جنگیں اُرش ءَ پاکستانی پوج ءِ یک کارمندے نشانگ کتگ ءُ کُشتگ –

گڈسر ءَ جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے کول ءَ کنت کہ سرڈگارے آجوئی ءَ تاں زورگیریں پوج ءِ سر ءَ مئے اُرش برجاہ مان انت –

مروچی ھزارانی کچ ءَ مات بے بچ انت، گھارانی برات، چکانی پت، زالبولانی لوگی پچ گرگ بوتگ انت ءُ ھر لوگ ءِ تہ ءَ پُرس پتر پچ انت – ماما قدیر بلوچ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ بیست ءُ ھشت روچ سرجم بوتگ – پشین ءَ چہ محمد یوسف عبدالسلام ھوار دگہ پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ اتکگیں مردمانی میان ءَ باوست کنان ءَ گوشتگ کہ گلامی ءِ ازیت دے آں دردانی مارگ ءَ گلامی ءِ زمزیلاں بندوکیں مردماں ھما تاکتانی بگیری ءَ یک ھنچیں پُرایمنیں جھدے بندات کرتگ کہ مرگ ءُ دیمونی دیگ ءَ رکگ ءُ وتی پجار ءِ وشھالی ءِ مان زمان اَنت-

ماما قدیر بلوچ ءَ دیمتر ءَ گوشتگ کہ شھیدانی دیمونی ءَ بلوچ راجی رکینگ ءِ جھد ءَ ءُ بلوچ راج ءَ ھنچیں پجار ءِ داتگ کہ چریشی ءَ سرجمیں دنیا ءَ بلوچ ءِ باوست بوگ انت – بیگواھیں مردمانی کھولاں وتی دوستیگیں مردمانی یل کنائینگ ءِ ھاتر ءَ وتی وشھالیں زندمان ھوار کھول ءِ تباھی دیستگ ءُ بازیں دیمونی ءِ داتگ، ھزارانی کچ ءَ بلوچ بیگواہ انت کہ پاکستانی زنداناں ازیت سگگ انت، مروچی ھزارانی کچ ءَ مات بے بچ انت، گھارانی برات، چکانی پت، زالبولانی لوگواجہ پچ گرگ بوتگ انت، ءُ ھر لوگ ءِ تہ ءَ پُرس پتر پچ انت – نواب اکبر ھان بگٹی بگر کس بکشگ نہ بوتگ –

ماما قدیر ءِ گوشگ ات کہ ھزارانی کچ ءَ مردماں وتی لوگ جاہ یل کرتگ ءُ در پہ دری زند گوازینگ ءَ لاچار انت، بلوچستان ءِ تہ ءَ ھمک روچ لشکر کشیانی تہ ءَ گیشی آرگ بوگ اِنت اے وھدی بلوچاں یکجاہ بوگ المی انت، وھدے لوٹ ھم ھمیش انت کہ اے وھد ءَ بلوچ راج بیگواھیں مردمانی یل کنائینگ ءِ ھاتر ءَ یک رِد ءَ یکجاہ بہ بنت ءُ بیگواھیں مردمانی یل کنائینگ ءِ ھاتر ءَ برجاھیں زھرشانی ءَ یک زرمبشت ءِ دروشم ءَ دیم ءَ بیار انت –

ھمود ءَ ماتانی وشی بھر بنت ھمود ءَ تاسوکیں بچانی بیگواھی ءَ مات تلوس اَنت بلوچستان ءِ ھزارانی مات گم ءُ زھیمگیں دردانی دُچار اَنت –

دی بلوچستان پوسٹ

چوشیں روچ ءِ پِر نہ گوز ایت کہ اود ءَ ماتانی چیھانٹ جھان ءَ سر ءَ نہ زورگ ءَ اَنت ءُ یکیں درد ءِ درمان کہ آیانی ورنائیں بچانی بندیگی ءُ آیاں تھاریں کوٹیانی تہ ءَ بندیگ کنگ –

لس کچے ءَ ماتانی نیم شَلونگیں گم یا مردگی ءَ آسر بیتگ اَنت یا گنوکے ءِ داب ءَ گار ءُ بیگواہ بیتگ اَنت، اے بلوچستان ءِ ھما چیھانٹ اَنت کہ ھمک ءِ گِس ءِ دپ ءَ چِستیں دست ءُ ھرسیگیں چمانی تہ ءَ گندگ ءَ کاینت –

ھمک مات مزن مزنیں ھاکماں جُست گرگ ءَ اَنت کہ مئے جُستانی پسو شُمئے گور ءَ در کپ اَنت؟ یا ما ودارانی اسر ءَ جھانیں گرانیں گماں آسر بہ کن ایں –

چہ بلوچستان ءِ دمگ کلات ءَ بیگواھیں بیتگیں ثناء اللہ شاھوانی ءِ کھول ءَ ھم ھشت سالانی درانی ودار کوار ءَ اَنت ءُ ھمک ھاکم ءُ مزن مزنیں واکداراں وتی بچ ءِ بیگواھی ءِ جُست ءَ گرگ ءَ اَنت –

آئی ءِ کھول ءِ گوشگ اِنت ثنا ء اللہ بیست ءُ چار ستمبر دوھزار ءُ سیزہ ءَ بلوچستان ءِ دمگ کلات ءَ ھما وھد ءَ چیریں ادارانی دست ءَ گرگ ءُ گار کنگ بیتگ کہ آ وتی چکاس بی اے ءِ پیپرانی دیگ ءَ واتر گِس ءَ آیگ ءَ بیتگ ءُ چیریں ادارھانی کارمنداں آئی ءِ چُم بستگ ءُ گار ءُ بیگواہ کرتگ –

اے دابیں مات ءُ کھول بلوچستان ءِ کُنڈ کُنڈ ءَ گندگ ءَ کاینت کہ آیاں وتی دوست ءُ شپابی پاساں سگوکیں درداں رودینتگیں زھگانی اکس دست ءَ اَنت ءُ ھاکمانی دراں ٹُکان اَنت –

آئی ءِ کھول ءِ گوشگ اِنت کہ بلوچستان ءَ ھمک کپتگیں جون ءِ کپگ ءَ پد ماراں تچک ءَ وتی بیگواھیں بندیگانی نیمگ ءَ گمان ءَ ترین اَنت –

بلوچستان ءَ بازیں جون دزکپگ ءَ اَنت آیانی تہ ءَ کساس کم جونانی پجار بیگ ءَ اِنت یا پجار ءِ درچ ءَ سرگوز بنت یا مزنیں دستانی چیر دستی ءَ جونانی پجار ءَ بیھاری سرپد بیگ ءَ جون ناشناس ءُ پسنگ ءِ سوب ءَ لاوارس کَل ءُ کسارات کنگ بنت –

ثناء اللہ شاھوانی ءِ مات ءُ پِس ءِ گوشگ اِنت ھما روچ ءَ ثناء اللہ گار کنگ بیتگ روچ ءِ ھما روچ ءَ ثنا ء اللہ ءِ بیگواھی ءَ روچ پہ روچ ما کروجان اِنت ءُ اشی ءِ ھمراھی ءَ ما زھنی ءُ دگہ بازیں جیڑگانی آماچ اِنت –

ثناء اللہ شاھوانی ءِ کھول ءَ انسانی ھکانی گل ءُ دگہ ادارھاں لوٹ کرتگ ءُ گوشتگ کہ ثناء اللہ یلہ کنگ بہ بیت ءُ اگاں آئی ءِ بارہ ءَ مارا ھال دیگ بہ بیت کہ کجام جاورانی آماچ اِنت ءُ چتور اِنت –

اے ھما ماتانی چیھانٹ اَنت کہ ھمک مات ءِ کُٹ ءَ کپتگیں ھرسانی تہ ءَ ندارگاں پیشدراھی کن اَنت –

دومی نیمگ ءَ بازیں سالاں بلوچستان ءِ بنجاھی شھر شال ءَ بازیں سالاں گار ءُ بیگواھیں مردمانی شوھازگ ءَ وائس فار بلوچ مسنگ پرسنز ءِ نیمگ ءَ زھرشانی نندانک برجاہ اِنت گل ءِ لوٹ اِنت کہ بلوچستان ءَ گار ءُ بیگواہ کرتگیں مردم یلہ کنگ بہ بنت ءُ آیانی کھولانی گرانیں ودار ءُ درد آسر کنگ بہ بنت –

نبشتانک: بیست ءُ ھشت سوچکان آس روک ءِ روچ

نبشتہ کار: بابا جی آر بلوچ

دی بلوچستان پوسٹ

شال ءِ برپ بستگیں یات ،کوہ ءِ چلتن ءِ ندارگ ،گیمرتگیں درچک کہ ھمک زمستان ءَ وتی زیب ءَ یلو کن اَنت ءُ گوں وتی ھشکیں شاھاں مِک بنت اے زمستانی روچ ءُ شپ پہ درستاں یک۔!
بلے درچکانی زید مٹ بنت ءُ تھنا دار اِش پشت کپ اَنت ھر دیم ءَ چماں شانک بہ دے بس کوھانی ندارگ کہ سر اش ماں برپاں مانپوش اتگ اَنت ، پورو الی بند اش بستگ ءُ تکہ انت۔ ھمے پیم ءَ ویران کرتگیں دیار ھم مئے سرزمین ءَ ھست انت چو دشت ءِ دروھاپ ءَ اَنت, گشیگہ پیلشتگیں مید اَنت ، ڈوک ھوں سیاہ دیم اَنت ، وسر ءَ بُر اَنت ءُ چنڈ چنڈ بنت ،بلے اے ھم من گوش آں کہ اے زمین ھدائی دادے کہ جھان ءَ ھچ جاہ چشیں زمین نیست،من پہ زمین ءِ زید ءَ مدام زراں گوں تھتالاں مانگیشاں وھدے چاگی ءِ یاتاں کپاں چم ارسیگ بنت دل ء دریکگ بند بند بوگ ءِ نام ءَ نہ زان اَنت ، وھدے زھریں شوروانی ھیالاں کپ آں کہ مئے سرزمین ءِ دلبند ءَ جنگ بوت ءَ من راج ءِ پگر ءَ گوں ارس ھولمب باں ءُ ھمے دل ءَ گوں گوش آں کہ بژن ما گلامانی گلام مہ بوتین ایں، مئے سرزمین دری راجاں چکاس جاھے جوڑ مہ کرتیں، پرچا کہ مئے سرزمین ءِ سر ءَ ایروشیما ءُ ناگا ساکی ءِ بڑ ءِ سر ءَ کپتگیں ٹوپانی پیمیں ٹوپ چکاسگ بوتگ اَنت،مئے سرزمین ءِ چاگی ءِ سر ءَ چگل داتگیں بمب ءِ تابناکیں برانزانی تپش ءَ انگت لھڑ ورگ ءَ انت، مئے زھگ ھزاراں پیمیں نادراھیانی آماچ اَنت، چشکہ شومک ،گرمپک ءُ پوستی دگہ بازیں نادراھیاں گوں مرگ ءُ زند ءِ گوازی ءَ انت،من ھر وھد ءَ پَراھیں پٹ ءُ کوچگاں گنداں منی پگر ھمے دمان ءَ چاگی ءِ راسکواہ ءَ روت،بس وت ءَ میاریگ کن آں ءُ جیڑاں کہ زوراک ءِ دل پہ ما سوچ اِیت چاھے آ راسکو ءِ دلبند ءَ آس بہ دنت یا زھریں شورواں گوں مارا مان بہ بند ایت، بس من ھمے زاناں کہ راسکو زدگ کنگ بیتگ راسکوہ ھون ءُ ھون ریچ اِنت راسکوہ ءَ بلوچ پسگ گوں وت برتگ گوں!-

راسکوہ وت ھم گریت ءُ مارا ھم گریوان اِیت! راسکوہ وتی میزرانی ءَ مارا ھر روچ توار پِر جنت! راسکوہ ءِ درچک ءُ دار مارا گوانک جن اَنت کہ مارا رکین اِت مارا رکین اِت پہ ما آپ شوھاز اِت مارا سبز ءُ ڈولدار کن اِت! جناورانی کیاو میاو ءُ مرگانی چِپ چِپ گوں بیست ءُ ھشت سوچکان ءَ بے برمش کنگ بوت اَنت آزمان مُجاں گِپت زمین تھار دیم بوت ءُ سرجمیں راسکوہ ءَ واہ ءُ زار بوت مردم گیش ء وت بوت اَنت ءُ راسکوہ ءِ چاگی ءِ کش ءُ گوراں ھچ پیمیں ساھدار ءَ وت ءَ داشت نہ کُت ، لھتیں مرگ ء آماچ بوت اَنت ءُ چماں کور بیت اَنت ءُ مرگانی کوکو بیگواہ کنگ بیت اَنت شپانکاں دمگ یلو کرت ءُ کش ءُ گوراں جھمند بیت اَنت ءُ بزگلانی میں میں ھم گوں شورواں بند بیت اَنت –

بیست ءُ ھشت سوچکان ءَ پہ تھاری آؤرت ءُ ھما روچ ءَ بگر تا روچ مروچی ءَ راسکوہ سیا دیم اِنت ءُ راسکوہ ءِ جھمند وڑ وڑیں نادراھیانی آماچ اَنت ءُ سرجمیں راج ھمے تراک ءَ زدگ کرتگ ءُ ھمک سال ھمے روچ ءَ چو زدگ بیتگیں مُرگ ءَ پل پَٹ ایت ارسیگ بیت ءُ پاکستان گوستگیں مزن وزیر نواز شریپ ءَ اٹ ءُ پِٹ کن سردار اکتر مینگل ءَ ھبرانی دیمپان کنت کہ اکتر مینگل ھم راسکوہ ءِ زدگ کنگ ءَ ھوار بیتگ ءُ راسکو اش زدگ کرتگ۔

بلوچ ڈیھ آجو بات ءُ راسکوہ گوں سرجمیں بلوچستان ءَ میزراں بات انکلاب تا گڈی منزل ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ لبریشن آرمی ءِ جارکش جیئند بلوچ ءَ گوشتگ کہ بلوچ لبریشن آرمی ءِ زانتکاریں ھمراہ ءُ گل ءِ مزن نامیں چہ کمانداراں یکت میر عبدالنبی بدوزئی بنگلزئی پنّام ءِ “چُنکا میر” دشمن ءِ یک اُرشے ءَ شھید بیتگ –

جارکش ءَ گوشت: شھید میر عبدالنبی بنگلزئی گوستگیں دو دھکاں راجی جد ءُ جھد ءِ آجوئی ءَ بی ایل اے ءِ پتر ءَ بھادری ءُ ارواہ ءِ ھمراھی ءَ مھکمیں کرد پیلو کنگ ءَ بیتگ –

تو سال 2002 ءَ گل ءَ ھوار بیتگ ئے ءُ 27 مئی 2021، ءَ داں وتی شھیدی ءِ روچ ءَ اوپار دار، گھگیر ءُ دلیری ءِ ھمراھی ءَ زرمبشت ءُ گل ءِ ھمراھی ءَ مھکم بیتگ ئے – تو شھید جنرل اسلم بلوچ، شھید آغا محمود خان، شھید میر عبدالغفار لانگو ءُ سگار شھید امیر بکش لانگو ءِ سک ءَ نزیکیں سنگتے بیتگ ئے –

جیئند بلوچ ءَ گوشت بلوچ لبریشن آرمی ءَ شھید میر عبدالنبی بنگلزئی ءَ را آئی ءِ دلیری، زانت ءُ سرپدی ءُ اوپار داری ءِ کرد ءِ سبب ءَ سال 2012 ءَ گل ءِ کمانداری ڈبہ داتگ -بستار ءِ کماندار شھید ءَ نا ایوک ءَ دشمن ءِ ھلاپ ءَ مزنیں شور بندی کرتگ اَنت بلکیں باز ھُرت چاری ءَ ھمراھیں سرمچارانی رھشونی کنان ءَ دشمن نیست ءُ نابودی ءِ آماچ کرتگ بلکیں گلی ءُ ٹکی بنریشگ ءِ زانت ءِ واھندی ءِ سبب ءَ تو بی ایل اے ءِ گل ءُ سکیناں جوانیں کرد پیلو کرتگ –

شھید میر عبدالنبی بنگلزئی ایوک ءَ بلوچ لبریشن آرمی ءِ واستا مڈی ءِ نہ بیتگے بلکیں ھما دراھیں بلوچ آجوئی لوٹوکیں گلانی کُمک ءَ ساجو بیتگ ئے – آئی ءِ دلیری، مھمانداری ءُ مھروانی ءِ مَٹ وت بیتگ ئے –

جارکش ءَ گوشت کہ میر عبدالنبی بنگلزئی ءِ وڑیں کماش ءُ گوشگ ءَ تروکیں ھمراھی ءَ بلوچ ورنایانی گون ءَ ھمگام بیتگ ئے ءُ سرجمیں زند ءَ جد ءُ جھد ءُ آئی ءِ شھیدی ءَ اے پدر کرتگ کہ بلوچ راجی زرمبشت ءِ آجوئی ءَ پیر ءُ ورنا یک بروبری ءَ ھوار اَنت – ھستیں جُنزوکیں زرمبشت ءَ ھمود ءَ ورنایانی جوش ءُ جزبگ ھوار اِنت ھمود ءَ شھید میر بنگلزئی ءِ وڑیں کماشانی سسّاداری ءُ اوپاری ءِ زانت اے جزبگ ءِ رھشونی ءَ کنگ ءَ اِنت –

میر عبدالنبی بنگلزئی ءِ شھیدی الم گل ءُ زرمبشت ءُ سرجمیں راج ءِ واستا ٹوھیں تاوانے ءَ کم نہ اِنت بلے آئی ءَ وتی زانت ءِ رژن ءِ روچ جد ءُ جھد ءُ زانت چو کوہ ءَ مِک کرتگ آ داں آجوئی ءِ گُڈی سیمسراں راج ءُ زرمبشت ءِ رھشونی ءَ کنان کنت ئِے –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں ھشتاد ءُ پنچ دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ءُ چار ھزار ءُ نُھ سد ءُ ھشت ءَ سر بوتگ اَنت-

جاندراھی ءِ بنشون ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں پنچ شمبے ءَ بلوچستان ءِ دَہ دمگاں جھانی وبا کرونا وائرس ءِ ھشتاد ءُ پنچ نادراہ پدر بیتگ اَنت کہ آھانی تہ ءَ شال ءَ سِی ءُ ھپت، لسبیلہ ءَ پانزدہ، پنجگور ءَ سیزدہ، ھرنائی ءُ سُھبت پور ءَ پنچ، جعفرآباد ءُ مستونگ سَے سَے، جھل مگسی ءَ دو، پشین ءُ دکی ءَ یک یک مردمے کرونا وائرس ءِ آماچ بوتگ انت – چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ءُ چار ھزار ءُ نُھ سد ءُ ھشت ءَ سر بوتگ اَنت-

رپورٹ ءِ رِد ءَ گوستگیں بیست ءُ چار ادارانی میان ءَ بیست ءُ چار مردم وش بوتگ اَنت، وش بوتگیں مردمانی کچ نوکیں کیساساں ھوار سرجمی ءَ بیست ءُ سَے ھزار ءُ پنچ سد ءُ بیست ءُ پنچ انت –

رپورٹ ءِ رِد ءَ بلوچستان ءِ تہ ءَ کرونا وائرس ءِ یک ھزار ءُ یک سد ءُ دہ نادراہ ھست انت کہ آھانی تہ ءَ سِی ءُ شش نادراہ ھائی آکسیجن فلور ءِ تہ ءَ الاج انت، وھدیکہ جھانی وبا کرونا وائرس نادراھی ءَ دو سد ءُ ھپتاد ءُ سَے مردم بیران بوتگ اَنت –