TBP Balochi

سر بیتگیں ھالانی رد ءَ بلوچستان چلتن رایفل شست ءُ چار ونگ ایف سی ءِ گاڑی وئیل آماچ بیتگ، چریشی ءَ دو کارمند بیران، چار زدگ بیتگ اَنت –

ھالانی تہ ءَ گوشگ بیتگ کہ فرنٹئر کور (ایف سی) ءِ گاڑی وئیل ءِ آماچ ءُ چریشی ءَ ایف سی ءِ دو کارمند ھما دمان ءَ مرتگ اَنت ءُ دگہ چار کارمند زدگ بیتگ اَنت –

زدگ ءُ بیران بیتگیں کارمند چِست کنگ ءُ نادراہ جاہ ءَ برگ بیتگ اَنت –

ھمے وڑ بلوچستان ءَ دگہ یک وئیلے ءَ دو گاڑیاں ھم تاوان بیتگ-

ھالانی تہ ءَ گوشگ بیتگ کہ ھرنائی ءُ شال ءَ روکیں دگ ءَ ناکس گوچنہ ءَ لیویز چوکی ءِ نزیک ءَ دو گاڑیاں ٹکر وارتگ ءُ چریشی ءَ ھردوکیں گاڑیاں تاوان بیتگ بلے دگہ جانی تاوانانی ھال نہ بیتگ اَنت –

اوگانستان ءَ بلوچ کمیونٹی ءِ جتا جتائیں پھناتاں مروچی سکے ستمبر ءَ کابل ءَ انٹرنیشنل کانٹی نینٹل ہوٹل ءَ کانفرنس ھال یک مزنیں مُچی ءَ تالبان ءِ سرکار ءِ پلامرزی کنگ ءِ جار جتگ –

اے نیاد ءَ بدخشان، ہرات، ہلمند، فراہ، نیمروز ءُ اوگانستان ءِ دگہ اُستاناں جھمنندیں بلوچانی رھشوناں بھر از زرتگ-

نیاد ءَ دوحہ ءَ گپ ءُ ترانی ٹولی ءِ باسک مولانا شھاب الدین دلاور ءُ مولانا عبدالرشید بلوچ ءَ وتی وتی لیکہ درشان کرتگ اَنت-

علماء، یونیورسٹی ءِ پروفیسرز ءُ نامی ئیں اوگان بلوچ سیاسی ءُ چاگردی دھشتاں اوگانستان ءِ اسلامی نزام ءِ پلامرزی ءِ جار جتگ –

بلوچانی نیمگ ءَ گپ کنوکیں رھشوناں وتی راجی ءُ نیکراھی پجار ءِ سر ءَ کڈنی کرتگ ءُ امارات اسلامی ءِ رھبندانانی شوربندی ءُ ھدمت ءِ واستا وتی ساجو کنگ ءِ جار جتگ اَنت – اے نیاد ءِ درچ طالبان کونسل ءِ نیمگ ءَ مولانا شھاب الدین دلاور ءَ طالبان ءِ لوٹ ءُ پالیسیانی سرپدی کتگ اَنت-

آئی ءَ کڈن کتگ کہ امارات اسلامی سرجمیں اوگانستان ئیگ اِنت ءُ دراھیں رنگ ءُ پرک ءُ پیرانی سر ءَ وتی کرد ءَ پیلو کنت –

نیاد ءِ گڈسر ءَ طالبان ءِ رھشون مولانا عبدالرشید بلوچ ءَ بلوچی ءَ تران کنان ءَ پارلیمنٹ ءِ اتکگیں مردم وش اتک کتگ اَنت-

سیشن ءِ گڈسر ءَ بلوچانی پلامرزی ءِ سر ءَ رومی محی الدین بلوچ ءَ دوا کتگ-

زانگ بہ بیت اوگانستان ءَ بلوچ آبادی ءِ کچ ءِ بارو ءَ راستیں کچ ءُ کساس نیست اَنت بلے آ گیشتر اُستاناں جھمنند اَنت ءُ اوگانستان ءَ دگہ نسلی ٹولیانی ھمراھی ءَ برادری ءِ زند ءِ گوازینگ ءَ اَنت –

بلوچ راجدوستیں رھشون، بلوچستان ءِ گوستگیں سر وزیر ءُ نیشنل پاٹی ءِ کلانیں رھشون سردار عطاء اللہ مینگل ءِ نماز ءِ جنازہ آئی بنکی ھنکین ھزدار وڈھ ءَ شھید اسد کرکٹ اسٹیڈیم ءَ وانگ بوتگ – آئی ءِ نماز جنازہ جمیت علما اسلام وڈھ ءِ امیر مُلا عبدالکبیر ءِ وانینتگ –

سردار عطاء اللہ مینگل ءِ جسد بلوچستان ءِ سرزمین ءَ داکل بیتگ ءُ اود ءَ بی این پی ءِ باسکاں ھوار دگہ سیاسی مردماں آئی ءِ وش اتک ءَ پُر درشان کنان ءَ وش اتک کتگ –

بلوچستان ءِ جتا جتائیں جاھاں سردار عطا ء اللہ مینگل ءِ جسد یک شرپے ءِ نگاہ ءَ وش اتک کنگ بیتگ ھب ءَ ھوار اوتھل ءُ دگہ جاھاں آئی ءِ جسد ءِ سر ءَ پُل درشان کنگ بیتگ اَنت –

سردار عطاء اللہ مینگل ءِ بیرانی ءَ بلوچستان ءَ سیاسی پاٹیان ھوار جتا جتائیں مھلوک پرسیگ درشان کنگ ءَ اَنت –

چاگردی رسانکجاھاں سردار عطاء اللہ مینگل ءِ اکس بازیں وال ءُ تندجاھاں شنگ بیگ ءُ آئی ءِ بیرانی ءَ پدردی درشان کنگ بیگ ءَ اِنت –

سردارعطاء اللہ مینگل ءِ بیرانی ءَ سر ءَ بلوچ پھناتاں ھمے گوشگ بیگ ءَ اِنت بلوچ مھلوک یک کلانیں راجدوست ءُ سیاستدانے ءَ زبھر بیتگ –

سردار عطاءاللہ مینگل گوستگیں روچ ءَ سندھ ءِ مزن شھر کراچی ءَ بیران بوتگ ، مروچی سھب ءَ آ چہ کراچی دیم پہ وڈھ ءَ مھلوک ءِ کاروان ءِ ھمراھی ءَ برگ بوتگ ءُ آئی ءِ بنکی ھنکین وڈھ ءَ کل ءُ کسارت کنگ بوتگ – سردار عطاءاللہ مینگل ءِ نماز جنازہ ءَ سیاسی ءُ چاگردی باسکاں ھوار ھزارانی کچ ءَ لس مھلوک ءَ بھر زرتگ –

بلوچستان ءِ دمگ تربت ءَ جسٹس فار شھید شاھینہ شاھین کمیٹی کیچ ءِ رھشون معصومہ شاھین ءَ تربت پریس کلب ءَ پریس کانفرنس کنان ءَ گُشتگ کہ یک سالے ءِ گوزگ ءَ ابید آئی ءِ کوشکار دزگیر کنگ نہ بیتگ اَنت –

آئی ءَ گُشتگ کہ بلوچ آرٹسٹ ادیب ءُ ایڈیٹر شاھینہ شاھین بلوچ ءِ کشندہ شاھی تمپ تربت ءِ جھمنندیں محراب گچکی انگت ءَ گرگ نہ بیتگ –

آئی ءَ گُشتگ کہ بلوچستان ءِ پولیس ءُ بلوچستان ءِ سرکار مارا انساپ دیگ ءَ بے سوب بیتگ اَنت ءُ کہ یک سالے ءِ گوزگ ءَ پد منی گوھار ءِ کشندہ دزگیر کنگ نہ بیتگ اَنت –

آئی ءَ گُشتگ کہ چار ءُ پنچ ستمبر شمبے ءُ یکشمبے ءِ روچ ءَ شھید فدا چوک ءَ “جسٹس فار شھید شاھینہ شاھین کمیٹی ” ءِ نیمگ ءَ نندانکی زھرشانی کنگ بیت اِنت –

آئی ءَ گُشتگ کہ اے دردناکیں کوش ءِ سر ءَ کوشکارانی دزگیر نہ کنگ ءَ زھرشانی نندانک ءَ پد تربت پولیس کارگس ءِ دیم ءَ زھرشانی کنگ بیت اِنت –

آئی ءَ زھرشانی ءَ سیاسی،چاگردی، ادبی گلاں ھوار دراھیں تکاں بندوکیں مردماں گوں بھر زیرگ ءِ دزبندی کتگ ءُ گوشتگ کہ اے زھرشانی ءَ بھر بہ زور اَنت ءُ وتی انسانیت ءِ کرد ءَ پیلو بہ کن اَنت –

بلوچ یکجھتی کیمٹی ڈی جی خان ءِ نیمگ ءَ چہ دو ستمبر ءَ ڈیرہ غازی خان ءَ بواٹہ وئیل ءَ اسر کپتگیں رابعہ بلوچ ءُ شال ءَ لَٹ ءُ کُٹاں چہ ءَ کُشگ بوتگیں ورنا محراب پندرانی ءَ چہ درد درشانی ءِ ھاتر ءَ یک رھرشانی ئیں روانکے برجم داشتگ ءُ چریشی ءِ آسر ءَ بازیں کچے ءَ جتاجتائیں ھیال لیکہ ءِ سیاسی داروکیں مردماں بھر زرتگ ءُ اسر کپتگیناں انساپ ءِ دیگ ءِ لوٹ کتگ-

زانگ بہ بیت ھپدہ اگست ءَ بواٹہ فروٹ منرو ءَ ایف سی چیک پوسٹ ءِ نزیک ءَ ناشناسیں مردماں الہی بخش لغاری ءِ لوگ ءَ پترتگ تیرگواری کتگ ءُ کھول ءِ سے مردم کشتگ وھدیکہ سے مردم سک ٹپی کتگ اَنت تیرگواری ءَ یک شیرمچیں نُنُّک رابعہ بلوچ ھم ٹپی بوتگ-

ڈیرہ غازی خان ءَ روانک ءَ ھواریں مردماں گْوشتگ کہ لوگ ءِ نزیک ءَ ایف سی چیک پوسٹ ءِ ساڑی بوگ ءَ ھم اے دردناکیں وئیل بوگ ءَ بازیں جُستے دراھگ ءَ اِنت ءُ تنی وھدی کُشکارانی شوھازگ ءَ ھچ وڑیں جُھد ءِ نہ کنگ کھول ءِ گوم ءَ زُلم اِنت چریشی ءِ بگیری ءَ ھچ وڑ بے توار نہ بہ ئے ایں-

زانگ بہ بیت محراب پندرانی نامداریں ٹرانسپورٹ ءُ سدابھار ٹرانسپورٹ ءِ واھنند ھاجی دولت خان لھڑی ءِ گور ءَ کار ءَ بوتگ-

محراب پندرانی ءِ کھول ءِ رِد ءَ محراب پندارانی سدابھار ٹرانسپورٹ ءِ واجھاں گوں تُرندی ءَ لَٹ ءُ کُٹانی نشانگ کتگ ءُ چریشی ءِ آسر ءَ آ وتی ساہ داتگ اَنت-

کسانیں ورناہ محراب ءِ میڈیکل رپورٹ ءِ رِد ءَ آ آسن ءُ لَٹانی سر ءَ نشانگ کتگ چریشی ءِ آسر ءَ آ مرتگ-

رپورٹ ءِ رِد ءَ محراب پندرانی ءِ سرجمیں جان لَٹانی نشانگ کتگ ءُ سینگ ءِ پھلیگ ھک پرشتگ اَنت-

چریشی ءِ بگیر ءَ شال ، کراچی ءُ اسلام آباد ءَ زھرشانی ءُ روانک کشگ بوتگ-

سر بیتھیں ھالانی رد ءَ خیبرپختونواہ ءِ دمگ صوابی ءَ سلاہ بندیں مردمانی تیرگواری ءَ پشتو ءِ زبان ءِ گشندہ بیران بیتگ –

گیشیں ھالانی رد ءَ آدینگ ءِ نماز ءَ پد سلاہ بندیں مردمانی تیرگواری ءَ پشتو زبان ءِ نامی ئیں گشندہ کفایت شاہ باچہ بیران بیتگ –

تیرگواری ءَ پد کفایت شاہ ءِ لاش چِست کنگ ءُ نادراہ جاہ ءَ سر کنگ بیتگ، کوش ءِ سبب زانگ نہ بیتگ، پولیس گیشیں پَٹ ءُ پول کنگ ءَ اِنت –

بلوچ یکجھتی کمیٹی ءَ بلوچ راجی زرمبشت ءِ سرھیل سردار عطاء اللہ مینگل ءِ بیرانی ءِ سر ءَ پدردی درشان کنان ءَ گُشتگ کہ سردار عطاء اللہ مینگل ءَ وتی سرجمیں زند بلوچ راجی جد ءُ جھد ءِ واستا ندر کرتگ، آئی ءَ جیل ءُ زندانانی نوبت، درانڈیھی ءِ درد ءُ زھگ ءِ شھیدی ءِ درد اوپار کرتگ اَنت بلے آئی ءَ اے دراھیں ناانساپیانی بیگ ءَ ابید وتی زیردستیں راج ءِ واستا جد ءُ جھد برجاہ داشتگ ءُ ھروھد ءَ ناانساپیانی ھلاپ ءَ گپ ئِے جتگ آئی ءِ توار ءُ گپ ھروھد ءَ ھاکمانی واستا زِبر بیتگ اَنت آئی ءَ بستار سردار ناں بلکیں بلوچ سیاسی رھشونے ءِ بستار ءَ بلوچستان ءِ مھلوک ءِ واستا جد ءُ جھد کتگ ءُ زندگی ءِ گڈء روچاں داں ھاکمامی دیم ءَ سرجھل نہ کتگ –

جارکش ءَ گُشتگ کہ وشبھتیں راجاں ھروھد ءَ زندگ دلیں ءُ دلیریں رھشون نسیب بنت – اے بلوچ راج ءِ وشبھتی اِنت آیاں اے وڑیں جوانیں رھشون بیتگ اَنت آیاں باز ناوشیں جاوراں ھم زاتی زندگی یکگور کرتگ ءُ راجی لوٹ دیم ءَ برتگ اَنت ھمک رنگیں جاورانی دیمپانی مزنیں دلیری ءُ بھادری ءَ کرتگ ئِے – آئی ءَ سیاست ءِ تہ ءَ زاتی لوٹانی مٹ ءَ وتی مردمانی زندگی ءِ چار اِتگ ءُ جد ءُ جھد ءُ گھگیری ءِ راہ گچین کتگ ءُ داں گڈی وھد ءَ بلوچ راج ءِ گون ءَ ستکدلی ءُ ایمانداری ءَ گون بیتگ – سرکار ءَ آئی ءِ جھل دور دیگ ءُ بے توار کنگ ءَ ھروڑیں پندل ساز اِتگ اَنت آئی ءَ وتی راج ءِ ھاتر ءَ داں سِی سال ءَ درانڈیھی ءِ زند گوازینتگ – سردار عطاء اللہ ءِ زندگی ءُ جد ءُ جھد ءِ دراھیں سیاسی پاٹی ءُ رھشونانی واستا ءَ چراگے ءِ رژن اِنت – عطاء اللہ مینگل ءِ بیرانی ءَ مروچی سرجمیں راج پرسیگ اِنت –

جارکش ءَ وتی درشان ءِ گُڈسر ءَ عطا ء اللہ مینگل ءِ کھول ءِ گون ءَ پدردی درشان کتگ ءُ گوشتگ کہ عطاء اللہ مینگل ایوک ءَ یک کھولے نہ اِنت بلکیں سرجمیں بلوچستان ءِ واستا یک دانا ءُ دور چاریں رھشونے بیتگ – آئی ءِ بیرانی ءَ سرجمیں راج پرسیگ ءُ پھریگ اِنت – سردار عطاء اللہ مینگل ءِ روگ ءَ چہ بلوچ راج وتی یک کماش ءُ دانائیں سیاسی رھبرے ءَ زبھر بوتگ ءُ آئی ءِ ھورکیں جاہ ءِ پُر کنگ ءَ بیت کنت بازیں دھک درکار بنت – عطاء اللہ مینگل بلوچ راجدپتر ءَ ھروھد ءَ یک راجی رھبر ءُ رھشونے ءِ رنگ ءَ یات کنگ بیت اِنت –

نبشتانک: بکڑ ، دی کنفوژن

نبشتہ کار: ماھنور بلوچ

دی بلوچستان پوسٹ

اے گپ ءَ ھچ دْروگ نیست اِنت بلکیں یک راست ءُ تچکیں گپے کہ دنیا ءِ تہ ءَ بلوچ یک گُلامیں راجے ءُ گُلامیں راجاں آیانی زُبان ماں وانگجاھاں وانینگ نہ بنت بلکیں دژمن آئی ءَ راجی دود ءُ ربیدگاں ھوار، اول سر آئی ءِ راجی زُبان ءَ تاوان دنت۔ کم کم ءَ زیردستیں راج ءِ زُبان ءِ گار ءُ بیگْوھی ءَ وڑ وڑیں پندل ساز ایت۔ راج ءِ لس مھلوک ءَ کم کم ءَ ردیان ءَ راج ءِ تہ ءَ بکڑ ودی کنت۔ راج ءَ بھر ءُ بانگ کنگ ءِ ھاتر ءَ زَر، لب ءُ لالچ ءِ وڑ وڑیں سِلکاریاں کنائین ایت۔ راجی رھشُوناں وت ماں گْورجیگ کنائین ایت۔ بزاں پہ زیردستیں راج ءِ رَد دیگ ءُ بیگْواھی ءَ ھچ وڑیں بَزّگی یے نیار ایت۔

چوناھا اِے وڑیں بدیں پندل چو آسانی ءَ گِندگ نہ بنت بلے لھتیں زانتکار ءُ راجدوستیں مردم اِے وڑیں پندلاں زوت سرپد ءُ سما کن اَنت ءُ راج ءَ بدیں پندلانی بابت ءَ آگاھی ءُ سرپدی دے اَنت کہ راج نوں تیار بَہ ئے، نوں تیار بَہ ئے کہ رستریں دژمن تئی گاری ءُ بیگْواھی ءِ جُھد ءَ انت۔
وھدے کہ راج ءَ وتی ھلاپ ءَ اے وڑیں پندل ءُ بکڑ پھم اِت اَنت گُڑا راج ءِ تہ ءَ راجی آجوئی ءِ آشوب ودی بنت، دژمن ءِ ھلاپ ءَ گھگری جُنز دیم ءَ کا اَنت۔

اے وَ دنیا ءِ رِد ءُ بند اَنت ءُ دنیا ءِ ھر وڑیں زوراک دستگریں راجانی سر ءَ اِے وڑ زورانسری کن اَنت۔ اگاں ھورت بہ گِند ئے بلوچ راج ھم چہ کرناں اے وڑیں پندل ءُ بکڑانی آماچ اِنت۔ توری بلوچ راج ءِ رھشُونے بہ گْوش ئے یا توری راج ءِ وانِندگے بچار ئے، ھر کس بکڑ ءِ آماچ اِنت، لھتیں لالچی ئیں دمگی کوڑائیں میر ءُ سردار دژمن ءِ لب ءُ لالچ ءَ کور کُتگ اَنت ءُ لھتیں دژمن ءِ بیھار( بلیک میل) ءِ آماچ اَنت۔ اے وڑیں چیزاں بلوچ راج ءِ زانتکاریں راجدوست جْوان سرپد اَنت پمیشکا نبشتانک ءِ تہ ءَ اے وڑیں دمگی میر ءُ نوابانی نام گِرگ شر نہ اِنت کہ ھرکسے ءِ وتی شرپ ءُ اِزت ھست البت ما گوں ھُدا ءَ دُوا ءِ دزبندی کن ایں اَے ھُدا اِے وڑیں کاسگ چٹّاں ھوش بہ دئے۔

البت من وتی نبشتانک ءِ تہ ءَ یک دو بکڑ ءِ بابت ءَ لازُم گپ کن آں کہ ھمے بکڑ راجی زُبان ءِ بابت ءَ اَنت۔ راجی زُبان ءِ دیمروئی زِندگیں راجانی پجّار اِنت ءُ زُبان ءِ وانگ ءُ نبیسّگ ءَ لس مھلوک ءِ تہ ءَ راجدوستی یے ودی بیت پمیشکا ھورت بچار ئے دژمن ءَ گیشتر زیانی ءُ بکڑ زبان ءِ تہ ءَ ودی کُتگ اَنت راج ءَ وتی زُبان ماں وانینگ نہ بیتگ پمیشکا راج وتی زُبان ءِ وانگ ءُ نبیسّگ ءَ ھیل نہ اِنت ماں وانگجاھاں پارسی ءُ ھندی ءِ وانگ ءِ آسر ءَ ھرکسی دپ ءَ دژمن ءِ پوتاری اِنت، ھاس جھل ءِ دوئیں بکڑ اَنت-

1- بلوچی گوں اردو ءِ آباں نبیسّگ نہ بیت۔ ما بلوچی ءَ رومن گوں رومن آباں نبیسّ ایں۔
2 اَربی آبانی کَشگ ما گُناھگار بَہ ایں بزاں اربی گال گوں بلوچی آبانی نبیسّگ ءَ گال بے مانا بنت یا مانا اش بدل بیت! چوناھا اے دوئیں بکڑانی بابت ءَ سک باز باوست بیتگ ءُ بازیں زانتکار ءُ زُبانزانتاں ھم اِے بابت ءَ راج ءَ بے کساس سرپدی داتگ بلے منی دل ءَ لوٹ اِتگ کہ من ھم اِے بکڑانی بابت ءَ چیزے نبشتہ بکنان ءُ راج ءَ سرپدی بہ دے آں۔ اولی بکڑ ءَ ھما ناسرپدیں مردم آماچ اَنت کہ آیاں بلوچی ءِ یک درونتے نہ وانتگ۔ آیاں اِے سرپدی ھم نیست کہ اے آب وَ اردو ءِ پت ءِ نہ اَنت۔ اردو وت ھندی اِنت۔ بلکیں گوں اِے آباں پارسی، دری، پشتو، تاجک، اُزبک، سندھی، کشمیری، پنجابی، کُرد ءُ اَربی ءَ ھوار دنیا ءِ سی ءُ ھشت زُبان نبیسّگ بیت۔ بزاں تئی نزیکیں ھمساھِگ ھمے سْیاھگ ءَ زُور اَنت گُڑا تو گُلامیں راج چون گوں انگریزی آباں بلوچی نبیسّ ئے؟ روایرشُت ءُ رودرآتکی بلوچاں پارسی ءُ ھندی وانینگ بوگ ءَ اَنت چمیشکا ھرکس ھمے سْیاھگ ءَ ھیل انت ھورت بچار ئے اگاں بلوچ راجی وتی راجی زُبان ءَ وتی دزھُورکی ءِ وھد ءَ وت وانگ ءُ نبیسّگ ءِ جُھد بہ کنت گُڑا یک ھپتگے ءِ تہ ءَ وت ھم ھیل کُت کنت انچوشکہ ما دْراہ وتی جھد ردیاں دربُرتگ۔ چی ءَ کہ اِے گُلامی ءَ بلوچ راج ءَ ماں وانگجاھاں ناں بلوچی گوں اربی سْیاھگ ءَ وانینگ بیت ءُ ناں کہ رومن پمیشکا پہ راجی زُبان ءِ وانگ ءُ نبیسّگ ءَ بلوچ اربی سْیاھگ ءَ زوت وت ھیل کُت کنت کہ ایران ءُ پاکستان ءِ زیردستی ءَ بلوچ ءَ پارسی ءُ ھندی وانینگ بوگ ءَ اَنت۔ البت وھدے کہ تو آجو بہ ئے، تئی وتواجھیں راجمستری سرکارے جوڑ بیت گُڑا تئی سرکار یک سوڑگے کنت کہ ما رومن سْیاھگ ءَ زِور ایں یا اربی سّیاھگ ءَ، چی ءَ کہ گلامی ءِ ساھگ ءَ رومن راجی زُبان ءَ دیمرئی نہ دنت۔

دومی بکڑ ءِ بابت ءَ بازیں زِبان زانتکاراں نبیسّ ات ءُ راج سرپد کُت بلے من ھم گْوش آں کہ بے دوزواھیں آباں نبیسّگ ءَ کس گُناھگار نہ بیت اگاں اربی نام ءُ گال بنگالی، روسی چچن، ھندی، سری لنکائی، ترکی رومن ءُ انگریزی آباں نبیسّگ بنت گُڑا ایشانی مانا بدل نہ بنت گُڑا بلوچی ءَ چون مانا اش بدل بنت؟ اگاں ھمے راج ءِ مسلمان گُناھگار نہ بنت گُڑا ما بلوچ چی ءَ گُناھگار بَہ ایں؟ اگاں تو “مھمد، ابدلکادر، کُران ءُ اَلہ” ءَ بنگالی ءُ انگریزی ءَ نبیسّ ئے گُڑا زاناں ایشانی مانا بدل بنت؟ اِنّا مانا بدل نہ بنت اش ءُ نَیکہ کسے گُناھگار بیت ایشانی تھنا نبیسّگ ءِ دْروشم بدل بنت ءُ مانا وَ ھم بُندری اِنت۔

اگاں ھورت بہ چار ئے اے وڑیں بکڑانی ودی کنوک گیشتر دژمن ءِ دپچٹ اَنت ھاس ھما مردم اَنت کہ آیاں دژمن ءِ پوتاری سک دلگوش کُتگ اَنت۔ گُڑا مارا اِے وڑیں سِلیں مردم ڈالچار کنگ لوٹ ایت باید اِنت ما بلوچ راج دژمن ءِ اِے وڑیں پندلاں بزان ایں ءُ اے وڑیں بکڑاں دلگوش مہ کن ایں۔ بلوچ مُدام راج آباد بات اَنت ءُ بلوچ راجی زُبان براھوئی ءُ بلوچی دیمرئی بہ کنات اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنل مومنٹ ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ بلوچ راجدوستیں رھشون سردار عطاء اللہ مینگل ءِ بیرانی ءَ دلپدردی درشان کُرتگ ءُ گْوشتگ کہ سردار عطاء اللہ خان مینگل ءِ سرجمیں زند گوں بلوچ راجی جُھد ءَ بندوک بیتگ- آئی ءِ بیرانی ءَ بلوچ چہ یک نامی ئیں سروکے ءَ زبھر بوت، آئی ءِ جاہ ءَ کس گیپت نہ کنت –

جارکش ءَ گْوشتگ کہ سردار عطاء اللہ مینگل ءَ وتی ھمبل میر غوث بخش بزنجو، نواب خیربخش مری ءُ اکبرخان بگٹی ءِ ھواری ءَ بلوچستان ءَ نوکیں سیاسی چاگرد ئے ءِ بنیاد ایر کُرتگ ءُ بلوچ راج ءِ تہ ءَ راجی وتواجھی، راجی مڈی ءُ راجی ارزیشت ءِ سکین داتگ اَنت – آئی ءَ راج ءَ را اے مارِشت داتگ کہ اگاں پہ سرڈگار ءَ جنگ نہ کُرت گڑا پاکستان چہ ما مئے سرڈگار، ھستی ءُ مڈیاں پُل ایت ءُ مارا پہ مدامی وتی چیردست کنت-

آئی ءَ گْوشتگ کہ سردار ءِ راجکاری ءَ بگیری دارگ بیت بلے آئی ءِ داتگیں دیمونی بیھال کنگ نہ بنت – پاکستان ءَ بلوچ ورنایانی بیگواہ کنگ ءِ بندات چہ ھمائی ءِ ورنائیں بچ ءَ کُرتگ – آئی وتی زھگ ءِ یل بیگ ءِ راہ چار اِت داں چہ کوڈھیں دنیا ءَ شُت بلے داں روچ ءِ مرچی کس ءَ چہ آئی ءِ زُبان ءَ بژن ءِ گپ اِش نہ کُرتگ، آئی ءَ بندیگجاہ ءُ دگہ جنجالانی دیمپانی ھم کُرتگ بلے پاکستانی ھاکمانی دیم ءَ سرجھل نہ کُرتگ بلکیں گوں بلوچی شان ءُ راجدوستی ءِ جوزگ ءَ ھمک زوراک ءِ دیم پہ دیمی کُرتگ-

آئی ءَ گْوشتگ کہ سردار عطاء اللہ مینگل ءَ وتی مزنیں سیاسی زانت ءِ آسر ءَ اے گپ تچک کُرتگ اَت کہ پاکستانی پارلیمانی سیاست ءَ بلوچ راج ھچبر وتی ھستی ءُ سرڈگار ءَ پھریز اِت نہ کنت، پمشکا توانداری ءَ ابید آ چہ پاکستانی پارلیمانی سیاست ءَ یکِر بوت-

گڈسر ءَ بی این ایم ءِ جارکش ءَ گْوشتگ کہ ما سردار عطااللہ خان ءِ پُشپد، سیاسی رندگیر کنوک ءُ باسکاں دلپدردی درشان کنیں ءُ اے ناگیگیں وھد ءَ ما گوں آھاں ھواریں-

بلوچ نودربر گل آزات ءَ وتی شنگ کرتگیں درشان ءِ تہ ءَ راجی رھشون سردار عطا اللہ مینگل دروت ندرکتگ گوشتگ کہ سردار عطاءاللہ مینگل بلوچ راجی زرمبشت بنکی سرھیلیں رھشوناں چہ یکے، کہ آئی ءَ بلوچستان ءِ سر ءَ پاکستان ءِ زورگیری بگیری ءَ مدامی جھد ءِ گام سکین داتگ اَنت، اے جھد ءِ تہ ءَ آئی ءَ گرانتریں ساھتانی دیمپانی کتگ ءُ وتی یک زھگے ءِ شھیدی درد ھم اوپار کتگ بلے وتی سرڈگار ءِ ھچ وڑ ءَ نہ بکشاتگ آئی ءَ پہ سرڈگار ءِ ھاتر ءَ ھچبر کسانیں ءُ پہ وھدی آسائش نوک نہ نداتگ انت ءُ راجدپتر ءِ تہ ءَ وتی جاہ مدام بُرز کتگ -ائی ءَ وتی زند ءِ تہ ءَ ھچبر بلوچ ڈیھ ءِ سودا نہ جتگ ءُ بلوچ راج دپتر ءِ تہ ءَ عطاءاللہ مینگل سردار ءِ ناں بلکیں بلوچ راجی رھشون ءُ بلوچ جُھد ءِ سرھیلیں رھشونانی تہ ءَ ھوار بیت -.

جارکش ءَ گوشتگ کہ راجدپتر ءِ تاکانی تہ ءَ مدامی ھما مردم مان انت کہ آسائش بدل ءَ رھبند ءُ وقتی مپادانی بدل ءَ راجی مپاد ءَ نوکی کار اَنت اے وڑیں ازیمیں کردانی واھنداں راجدپتر ءُ راج ھچبر نہ شموش ات – سردار عطاءاللہ مینگل ھما رھشونانی تہ ءَ ھوار بیت کہ اھاں ھچبر مایوسی درشان نہ کتگ بلکیں بلوچ ورنایاناں مدامی جھد ءِ راہ پیش داشتگ وتی سر ءَ بوتگیں ھچ وڑیں زوراکیاں پد کنز نبوتگ آئی ءِ زند ، جھد، جیڑہ ءُ جنجال بلوچ راج ءِ کُلیں ورنایانی ھاتر ءَ روکیں چراگ ءِ مانند انت راجدپتر ءِ تہ ءَ ھما کردار زندگ مان انت کہ مدامی جھد ءُ سر جھل نہ کنگ ءِ پیسلہ کن انت وھدیکہ سرجھل کنوک ءُ وتی مپادانی ھاتر ءَ زند گوازینوکاں راجدپتر ءِ تہ ءَ ھچ وڑیں ھیسیت نیست –

جارکش ءَ گڈسر ءَ سردار عطاءاللہ مینگل دروت ندرکتگ ءُ بلوچ راج ءِ ورنایاں چہ لوٹ کتگ کہ آ سردار ءِ گپانی سر ءَ بہ اوشت انت راجی جھدے تہ ءَ ھوار بہ بنت ءُ راجی جھد ءَ مھکم بہ کن انت نوں راج ءِ پرز انت کہ راجی جھد ءَ سوبمندی نیمگ ءَ بہ بر انت اے وڑیں کلانیں کردانی واھنداں مدامی زندگ بہ دار انت بلوچ راجی راجدپتر ءِ ھکئیں وارس ھمیش انت –

ھمے وڑ بلوچ ریپبلکن پارٹی ءِ بنجاھی جارکش شیر محمد بگٹی ءَ وتی شنگ کرتگیں درشان ءِ بزرگ راجدوستیں رھشون سردار عطاءاللہ مینگل بیرانی ءَ دلپدردی درشانتگ گوشتگ کہ سردار عطاء اللہ مینگل ءِ بیرانی ءَ بلوچستان چہ یک نہ تُرس تمرد ءُ راستیگیں رھشون ءَ زبھر بوتگ –

آئی ءِ گوشگ ات کہ سردار عطاءاللہ مینگل بلوچستان ءِ ھاتر ءَ جھد ءُ دیمونیانی راجدپتر ءَ مدامی زندگ مانیت ءُ آئی ءِ داتگیں درونت راج ءُ آوکیں پدریچ ءِ رھشونی ءَ کن انت –

جارکش ءَ گوشتگ کہ بلوچ ریپبلکن پارٹی سردار عطاءاللہ مینگل ءِ بلوچ سرڈگار ھاتر ءِ جُھد ءَ دروت ندرکنت ءُ اے کول ءَ کنت کہ ما وتی بزرگانی داتگیں درونتانی سر ءَ امل کنیں ءُ وتی جھد ءَ برجاہ داریں –

کماشیں بلوچ راجدوست رھشون سردار عطا ء اللہ مینگل پشمبے ءِ بیگاہ ءَ کراچی ءَ یک نادراہ جاھے ءَ بیران بیتگ – سردار عطاء اللہ مینگل بازیں وھداں نادراہ بیتگ – بلوچستان نیشنل پاٹی (مینگل) ءَ سردار مینگل ءِ بیرانی ھال راست کرتگ-

سردار عطاء اللہ مینگل یک مئی نوزدہ سد ءُ ھپتاد ءُ دو ءَ فروری نوزدہ سد ءُ ھپتاد ءُ سَے ءَ داں بلوچستان ءِ سروزیر بیتگ -آئی ءِ سرکار ءِ وھد ءَ سروزیر ذولفقار علی بھٹو ءَ ھلاس کتگ اَت – بھٹو ءِ سرکار ءَ سردار مینگل ھیدر آباد ءِ کیس ءِ لڑ ءَ زانتکار پشتون ءُ بلوچ رھشون خان عبدالولی خان، نمیرانیں ھیر بکش مری ءُ دگہ ھمراھانی ھمراھی ءَ بندیگ بیتگ –

بھٹو ءِ سرکار ءِ ھلاسی ءَ پد سردار مینگل دراںڈیھ بیتگ ءَ لندن ءَ شتگ – نوزدہ سد ءُ نود ءِ زمانگ ءَ آ بلوچستان ءَ واتر اتکگ ءُ بی این پی ءِ بنھشت ءِ ایر کرتگ ءُ لس پاٹیانی لڑ ءَ آ مستریں پاٹی بیتگ –

سردار مینگل ءَ پاکستان ءَ زیردستیں راجانی زرمبشت (PONM) ءِ سروکی ھم کتگ – آئی ءِ زھگ سردار اختر مینگل نوزدہ سد ءُ نود ءُ ھپت ءَ چہ نوزدہ سد ءُ نود ءُ ھشت ءَ داں بلوچستان ءِ سروزیر بیتگ –

سردار عطاء اللہ مینگل ءِ سیادی ھزدار ءِ دمگ وڈھ ءَ بیتگ آ پاکستان ءَ بلوچ مھلوک ءِ ھکانی واستا توار چِست کنوکیں مردمے زانگ بیتگ آ بنکی ھنکین وڈھ ءَ زمین ءِ باھوٹ کنگ بیت اِنت ءُ گیشتریں ھالاں بی این پی شنگ کنت-

سردار عطاء اللہ ءِ بیرانی ءَ چاگردی رسانکجاھاں بلوچ پھناتاں پدردی درشان بیگ ءَ اِنت ءُ آئی ءِ نمیرانی ءَ پدردی سماہ کنگ ءَ اَنت-