TBP Balochi

کشمیر رسانکدر ءِ رد ءَ نود ءُ دو سالی ئیں کشمیری رھشون سید علی گیلانی ءِ بیرانی سری نگر ءَ پیش اتکگ –

کشمیر رسانکدر ءِ رد ءَ آئی ءِ بیرانی ءِ ھال ءِ راستی کھول ءِ یک مردمے ءَ کتگ –

سید علی گیلانی 29 ستمبر 1929 ءَ پیداک بیت آ جماعت اسلامی زیردستیں جموں کشمیر ءِ باسک ھم بیتگ چریشی ءَ پد سید علی گیلانی ءَ تحریک حریت ءِ نام ءَ وتی یک پاٹی ءِ جوڑ کتگ، آ آل پارٹیز حریت کانفرنس ءِ چیئرمین ھم بیتگ –

سید علی گیلانی ءِ بیرانی ءِ سر ءَ گوستگیں سروزیر زیردستیں کشمیر محبوبہ مفتی ءَ پدردی درشان کتگ ءُ گُشتگ کہ سید علی گیلانی ھروھد ءَ وتی رھبندانی سر ءَ اوشتوک بیتگ – بگیری داری ءَ ابید سید علی گیلانی ءِ اشرپ ھروھد ءَ کتگ –

بلوچستان ءِ دمگ پنجگور ءَ سلاہ بندیں مردمانی تیرگواری ءَ پت گوں ھمراہ ءِ دو چکاں بیران بیتگ –

تیرگواری ءِ وئیل پنجگور ءِ دمگ وشبود ءَ پیش اتکگ کہ اود ءَ تیرگواری ءَ بیران بیتگیں مردمانی پجار ھاجی موسی،قدیر ءُ صغیر ء ھاجی موسی ءِ ناماں زانگ بیتگ اَنت –

دمگی مردمانی رد ءَ اے وئیل ھما وھد ءَ پیش اتکگ اود ءَ وتی لوگ ءَ دیم ءَ ورگ ءِ ورگ ءَ بیتگ اَنت – بلے تنی وھدی وئیل ءِ بارو ءَ سرپدی نہ بیتگ –

بلوچ ہیمون رائٹس ایکٹوسٹ ءُ وکیل خالدہ بلوچ ءَ سی ٹی ڈی ءِ نیمگ ءَ پیسر ءَ دزگیر بیتگیں مردمانی دروگیں جنگ ءِ نام ءَ کُشگ ءِ پژدر ءَ یک تامر بندیں کلوہ ءِ شنگ کتگ ءُ دراھیں بیگواھیں مردمانی کھولاں گوں دزبندی کتگ کہ ھما مردم ءَ وتی بیگواھیں مردم ءِ کیس وائس فار بلوچ مسنگ پرسنز ءِ گل ءِ گور ءَ سر نہ کتگ آ زوت ءَ چہ زوت کیس ءَ وائس فار بلوچ مسنگ پرسنز ءِ گور ءَ سر بہ کنت ءُ اے درگت ءَ تگانہ ءَ ارزی نبشتگ بہ کنائین ایت-

آئی ءَ گُشتگ کہ ما ھر وھد ءَ کھولاں گوں ھمے دزبندی ءَ کنگ ءَ ایں کہ آ وتی دوستیگیں مردمانی کیساں رجسٹرڈ بہ کنائین اَنت مروچی باندا ریاست ءِ نیمگ ءَ یک نوکیں پالیسی ءِ درچ ءَ سی ٹی ڈی ءِ نام ءَ مردماں دروگیں جنگ ءِ نام ءَ کُشگ اِنت ءُ ناشرکاری ءِ بھتام ءَ جنگ اِنت ءُ آیاں آمیدگساں پیش کنگ اِنت سرپدیانی بوگ ءِ سر ءَ مارا بازیں جیڑہ بیگ ءَ اَنت –

آئی ءَ دیمتر ءَ گُشتگ کہ ما پیسر ءَ ھم سی ٹی ڈی ءِ ھلاپ ءَ ٹرینڈ ھلائینتگ،مارا گیش لاش چِست کنگ کپ اَنت ءُ ما لوٹ اِنت اے درگت ءَ سرجمیں راج اے پندل ءِ ھلاپ ءَ مئے ھمراھداری ءَ بہ کن اَنت اگاں شما کیس ءَ رجسٹرڈ کنگ لوٹ ئے گڑا ما اے گپ ءَ آسانی ءَ راست کت کن ایں کہ اے مردم پیسر ءَ دزگیر کتگین بیتگ اَنت آ دروگیں جنگ ءِ بھتام ءَ چیرترینگ بیگ ءَ اَنت یا آیاں دروگیں جنگ ءِ نام ءَ کُشگ بنت –

آیاں گُشتگ من یک رندے پد ءَ کھولاں گوں دزبندی کن ایں شما بے توار مہ بئے ءُ اے زلم ءِ ھلاپ ءَ توار چِست بہ کن اِت ءُ مئے ھمراھداری ءَ بہ کن اِت –

سرکار ءَ وتی ھزانہ ءِ دپ پچ کتگ مزنیں زر ءُ مالے سلاہ وتی داشتگیں دلاراں داتگ تانکہ آ بلوچ راجی جھد ءِ راہ ءَ بہ دار انت – ماما قدیر

بلوچستان ءِ بنجاھی شھر شال ءَ بیگواھیں بلوچانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ بیست ءُ شش روچ سرجم بوتگ – بلوچ اسٹوڈنس آرگنائزیشن ءِ بنجاھی سرکماش ظریف رند ءِ چیردستی ءَ گل ءِ دگہ اگدہ دار بنجاھی سیکرٹری جنرل چنگیز بلوچ ،جوائنٹ سیکرٹری جیئند بلوچ ءُ دگہ مردماں بنجل ءِ تر ءُ تاب کتگ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ وھدیکہ ما اے زلم ءُ زوراکیانی درگت ءَ پگر ءُ ھیال کنیں گڑا آئی ءِ دیم ءَ بس یک راھے بچ ایت کہ ما وتی پُرایمنیں جُھد ءَ زوراکی ءُ ھر وڑیں زلمانی بگیری ءَ برجاہ بہ داریں –

آئی ءِ گوشگ ات کہ زوراکیانی دیم ءِ دارگ ءِ ھاتر ءَ مار ءَ یک جاہ بوھگ ءُ وتی جھد برجاہ دارگی انت بے دلیں مرگ ءَ چہ گھتر انت کہ دلیری مرگ ءَ وت گورامبازاں بہ زوریں –

آئی ءِ گوشگ ات کہ ماتیں سرڈگار ءِ آہ ءُ سلوات، بے کپن ایں جون ءُ مات ءُ گوھارانی ھرس مارا چہ ھمے لوٹ انت کہ ما یکجاہ ءُ مھکم بہ بئیں پُرایمنیں جھد ءَ گوں بلوچستان ءَ چہ اے ریاستی زوراکیاں بہ رکّینیں –

آئی ءِ گوشگ ات کہ بلوچ ورنایانی سوبمندیں شوربندیاں ھکومت پریشان کتگ آئی ءَ وتی زرزیریں ایجنٹ ءُ دلار یل کتگ انت کہ ورنایاں شوھاز بہ کن انت پہ اے کار ءِ ھاتر ءَ سرکار ءَ وتی ھزانہ ءِ دپ پچ کتگ مزنیں زر ءُ مالے نوکیں سلاہ ءُ گاڑی داتگ انت تانکہ آ بلوچ راجی جھد ءِ راہ ءَ بہ دار انت –

آئی ءِ گوشگ ات کہ چاگردے بدکردیں مردم، نشہ باپاری کنوک، ءُ زمیرانی سوداگرانی کمک ءَ بلوچ ورنایانی دلاری ءُ آھانی جھد ءَ چہ دیر دارگ ءِ ھاتر ءَ وڑ وڑیں پندل کنگ انت بلے بلوچ ورنایانی پُرایمنیں راجی جھد وشھالیں بلوچستان ءِ مانزمان انت –

گڈسر ءَ ماما قدیر بلوچ ءَ اتکگیں مردمانی میان ءَ گوشتگ کہ ھر وڑیں زوراکیانی دراجیں شپ پد یک وشیں سھب ءِ ھم کیت کہ بلوچانی بُنکی اِنت –

سربوتگیں ھالانی رِد ءَ بلوچستان ءِ دمگ چاگی ءَ آروسیانی گاڑی چپی بوتگ، زالبول ءَ ھوار دو مردم بیران سَے زھگ ٹپی ، نوکنڈی ءَ دو مردم ءِ جون دست کپتگ اَنت –

گیشیں ھالانی رِد ءَ چاگی ءَ افغان مھاجر کیمپ ءِ نزیک ءل گردی جنگل چاگی دگ ءَ گاڑی ءِ چپی بوتگ، گاڑی ءَ سواریں جن ءُ مرد بیران بوتگ اَنت ءُ سَے زھگ ٹپی بوتگ انت –

لیویز رِد ءَ آروسیانی گون ءَ رؤکیں گاڑی ءَ بیران بوتگیں مردمانی پجار عبدالسلام ءُ مزدلفہ نامیں زالبولے بیران بوتگ وھدیکہ کلثوم، سلمہ ءُ خوبیت ٹپی بوتگ انت – ٹپی بوتگیں مردم درمان کنگ ءَ پد شال ءَ دیم دیگ بوتگ انت –

دومی نیمگ ءَ بلوچستان ءِ دمگ نوکنڈی ءَ دو ناشناسیں مردمانی جون دست کپتگ –

چاگی ءِ ڈپٹی کمشنر رِد ءَ سرچ آپریشن ءِ میان ءَ آھاں نوکنڈی ءِ دمگ ءَ دو ناشناسیں مردمانی جون دست کپتگ اَنت – جون پجار ءِ ھاتر ءَ دالبندین ڈی ایچ کیو نادراھجاہ ءَ سر کنگ بوتگ انت جوناں دیر گوزگ ءِ سبب ءَ آھانی پجار کنگ نہ بوتگ-

شال ءَ چہ بلوچ اسٹوڈنٹس ایکشن کمیٹی ایگریکلچر بنزہ ءِ نیمگ ءَ “وش اتک ئِے” مراگشے اڈ دیگ بوتگ۔

مراگش گوستگیں روچ ءَ رمس 31 اگست 2021 ءَ چہ بلوچ اسٹوڈنٹس ایکشن کمیٹی ایگریکلچر بنزہ ءِ نیمگ ءَ پہ نوک اتکگیں نودربراں “وش اتک ئِے” مراگشے اڈ دیگ بوتگ۔

مراگش ءِ گچینی ءِ مھمان پروفیسر منظور بلوچ بوتگ ءُ مراگش ءَ عبدالجبار بلوچ، قاضی اخلاق بلوچ، بساک ءِ بنجاہی کمک کماش شبیر بلوچ ءُ بنجاھی کارگشاد آصف بلوچ ساڑی بیتگ انت۔

دیوان ءِ بندات چہ بلوچ راجی سوت ءَ کنگ بوتگ۔ کہ سرجمیں دیوان پہ آئی ءِ گوشدارگ ءِ شرپ ءَ بے تواری ءَ گوں اوشتاتگ۔ ءُ راجی سوت ءَ پد مراگش ءِ مھماناں گوں نودربراں وتی ھیال ءُ لیکہ درشان کتگ انت۔ بندات ءَ بساک ءِ بنجاھی کارگشاد آصف بلوچ ءَ نوک اتکگیں نودربر وانگجاہ ءِ تہ ءَ وش اتک کت انت ءُ تران کنان ءَ اے گوشت کہ “ ما امیت کن ایں کہ نوک اتکگیں نودربر گوں ایدگہ بلوچ ورنایاں ھوار بنت ءُ وتی سیاسی ءُ چاگردی زمہ واریاں شر پیلو کن انت۔” ایشی ءَ ھوار آئی ءَ گوشت کہ “پہ گل ءُ آئی ءِ پروگرام ءِ دیمروئی ءَ گل ءِ سنگتاں وتی ذمہ واری زانگ ءُ آ پیلو کنگ لوٹ انت۔ اگاں کجام ھم گلے ءِ باسک وتی گل ءِ پروگرامانی بارو ءَ سرپدی مہ دار ایت ءُ زمہ واریاں پیلو کت مہ کنت گڑا آ گل وتی پروگرام ءَ شریں بانداتے دات کت نہ کنت۔

دیمتر ءَ آئی ءَ گوشت کہ مئے گور ءَ یک دگہ مزنیں جیڑہ ئِے ایش انت کہ مروچیگیں ورنا چہ نودربر سیاست ءَ رند چہ سیاسی جھد ءَ یّکش بوگ ءَ انت ءُ سیاسی املانی بھر جوڑ بوگ ءَ نہ انت۔ بائید ھمیش انت کہ ھر ھما نودربر وھدے کہ چہ نودربر سیاست ءَ پارگ بنت گڑا چہ آئی ءَ پد ھم ھر جاھے ءَ آ پہ وتی راج ءَ جوانیں وڑے ءَ وتی جھد ءَ برجاہ بہ دار انت۔

ھمے وڑ مراگش ءَ بنجاھی کمک کماش شبیر بلوچ ءَ وتی ھیال درشان کت انت۔ شبیر بلوچ ءَ بندات ءَ بلوچ نودربر ءُ بساک ءِ گوستگیں دہ سالانی کار ءُ پروگرامانی سر ءَ کسانیں چمشانکے دات۔ بنجاھی کمک کماش ءَ تران کنان ءَ گوشت کہ اگاں گوستگیں دھک ءِ نودربر سیاست سر ءَ چمشانک دیگ بہ بیت گڑا اود ءَ اے گندگ بیت کہ نودربراں چہ سیاست ءَ دور دارگ ھاتر ءَ وڑ وڑیں پندل سازگ بوتگ اَنت ۔ وانگجاھانی تہ ءَ کوھنگیں سوچاں وتی جتائیں جیڑھاں گوں نودربر چہ سیاست ءَ دلپروش کتگ ءُ دور دارگ ءَ پہ جھد کتگ اش ۔ بلے بساک ءَ وتی سری روچاں بگر داں مرچی مدام کوھنگیں پکرانی دیم داشتگ ءُ نودربرانی راھشونی ءَ کنگ ءَ اِنت ۔

دیمتر ءَ شبیر بلوچ ءَ تران کنان ءَ گوشت کہ گوستگیں دہ سالانی میان ءَ بساک ءَ گوں وتی دراھیں وس ءُ واکاں بلوچ نودربر سیاست پہ اوشت آماچی ءَ نہ ایشتگ۔ اے میان ءَ بلوچ اسٹوڈنٹس ایکشن کمیٹی ءَ وتی پروگرام بلوچ ڈیھ ءِ کنڈ کنڈاں سر کنگ ءِ جھد کرتگ۔ چوشکہ چہ ڈیرہ غازی خان ءَ بِگر تاں مکران ءَ یکشل ءَ گَل سازی برجاہ بوتگ ءُ برجاہ انت۔

آئی ءَ گُشت بلوچ چاگرد ءِ تہ ءَ چوشکہ بازیں کوھنگیں پروشتگیں ءُ روایتی پکر ءُ امل بوتگ انت، بساک آیانی ھلاپ ءَ یک پیم ءَ اوشتاتگ ءُ آیانی دیم ءِ داری کتگ۔ نوک نوکیں وانگی گپ ءُ گالانی دریگ پچ کنگ بوتگ انت۔ بساک ءَ پہ وتی باسکانی دیمروئی ءَ زانشکاری پروگرام اڈ داتگ کہ آیانی تہ ءَ بنزھانی گچینی ءِ دیوان ھوار انت۔

دیمتر ءَ شبیر بلوچ ءَ تران کنان ءَ گوشت کہ بساک ءَ پہ بلوچ نودربرانی جیڑھانی ھاتر ءَ ھرچ وھد، ھرچ جاہ ءَ زھرشانی ءُ دگہ درشماں توار چست کتگ۔ بساک ءَ بلوچ چاگرد ءِ تہ ءَ پہ وانگ ءُ زانگ ءِ چاگردے ءَ مدام جھد کتگ ءُ کنگ ءَ انت۔

دیمترءَ دیوانءِ ایدگہ مھمان پروفیسر عبدالجبار بلوچ، قاضی اخلاق بلوچ ءُ گچینی ءِ مھمان پروفیسر منظور بلوچ ءَ نودربرانی دیم ءَ وتی ھیال درشان کرتگ اَنت –

نبشتانک: آ پد ءَ مھر ءِ سر ٹلاں سر بیت

نبشتہ کار: ریاست خان بلوچ

رجانکار: مھروز بلوچ

دی بلوچستان پوسٹ

گوادر ءَ اگست ءِ ماہ ءَ نود شنز ءُ وشنود بیت اِنت، بیگاہ ءِ رولہ ءِ وھد ءَ زر ءِ کشوکیں کوش ءِ سارتکیں گوات ، بلوچ ءِ زِر ءِ نمبانی ھواری ءَ انسان ءِ جان ءَ گوں وھدے دُچار کپ اَنت گڑا تر ءُ تاجگی ءِ مارِشت ءَ دے اَنت – ھمے کوش ءِ لھم لھم ءَ کشوکیں سارُتکیں گوات وتی سینگ ءِ تہ ءَ جاہ دیوکیں بیست ءُ یک سالی ئیں ورناہ کہ سیاہ رنگیں شال ءِ آئی ءَ پوش اتگ ءُ بلوچ وارڈ ءَ جوڑ بؤوکیں یک نوکیں دگے ءِ یک نیمگے ءَ ھاک ءِ جُمپ ءِ سر ءَ بے انان، وشدلی، پُربیسھی یے جزبگاں گوں نشتگ – آئی ءِ کاشیں مید لھم لھمیں کوش ءِ زِری گوات ءَ گون انت ، آئی ءِ نزیک ءَ نشتگیں لھتے دریاوردیں ورنا بوجیگ ءِ تہ ءَ نشتگ ءُ کندگ ءُ مزاک ءَ اَنت ءُ زِر ءُ ماھیانی شکار ءِ کسھاں کنگ انت- ھمایانی نزیک ءَ لھتے گونڈل پٹبال گوازی ءَ دلگوش انت، دیم ءِ دگ ءَ اِنچو رش ءُ کش نیست بلے آئی ءِ سر ءَ گوزوکیں گاڑیانی ٹائراں چہ چست بوتگیں ھاکانی دنزاں گوات آلوڈ کُتگ، ھاک ءِ جُمپ ءِ سر ءَ نشتگیں بیست ءُ یک سالی ئیں ورناہ وتی کش ءُ کِر ءِ سُر پُراں گوں (سنگینی) ءَ دیان دیگ انت – آئی ءِ گوشاں بے روزگاری، آپ ءُ لین ءِ لوٹگ ءِ زھرشانی کنوکیں سداں مھلوک ءِ توار آئی ءِ گوشاں کپگ ءَ انت- ھمے نزیک ءِ نشتگیں ورناہ، پٹبال گوازی کنوکیں زھگ ءُ راھگوزانی چم آئی ءِ سر ءَ کپ انت ، گڑا آئی ءِ اود ءَ ساڑی بوگ ءَ ھچ وڑیں پُرکماری نہ مار انت بلے آ بیست ءُ یک سالی ئیں ورنا آ درسانی زاھریں سُرپُرانی پُشت ءَ چیریں مارِشتاں مار ات کنت، آ وھدیکہ آھانی نیمگ ءَ چار ایت ءُ آھانی بچکندانی پُشت ءِ مارشتاں ماریت کنت – آ گوازی کنوکیں زھگانی پُرکماریں تُرس ءَ مار ایت کنت، بلوچی پوشاک ءُ دیم گوں گشان ءَ چیرداتگیں راھگوزیں زالبول ھم وھدیکہ آئی ءِ کش ءَ گوز انت گڑا آھانی تہ ئِے بے وسی ءَ ھم مار ات کُت کنت، ھنچو کہ آ درست سرپد انت کہ آھانی باندات ءِ تباہ کنگ، آھانی ارمانانی گُٹگیر کنگ ءَ، آھانی شھر ءُ آھانی ھاک ءَ چہ زورانسری آھانی سیادی ھلاس کنگ ءِ ھاتر ءَ آؤکیں وھد ءَ یک مزنیں تاکتے ءِ ودار ءَ نشتگ کہ آئی ءَ رکگ ءِ ھچ راہ ءُ در ءِ نیست ءُ آئی ءِ دیم ءَ دُرست بے دز رس انت –

ھاک ءِ جُمپ ءِ سر ءَ نشتگیں اے ورناہ سھب ءَ چہ شھر ءِ تنکیں دمک ءِ تہ ءَ وتی چیریں بنجل ءَ وتی پوجی زند ءِ گڈی مشن ءِ چِن ءُ لانچ ءَ دزگٹ بوتگ، آئی ءَ مشن ءِ میان ءَ کار مرز بوکیں درسیں چیزے چار اِتگ انت، ایکسپلوزو ءَ بگر آئی ءَ ڈیٹونیٹ کنگ ءِ درسیں مواد ءُ آئی ءِ پِٹ کنگ ءَ تاں درسیں چیز ٹپاس اتگ انت وھدیکہ آ وتی نشانگ ءِ نیمگ ءَ بہ رو اَنت ءُ آئی ءَ نشانگ بہ کنت ھچ وڑ ءَ آ بے سوب مہ بیت – اشی ءَ پیش ھما جاہ ءَ کہ آ انو نشتگ ھمود ءَ کہ آئی ءَ وتی زند ءِ گڈی مشن کنگی انت بوت کنت پیش ءَ اتکگ ءُ ھما جاہ ءِ چاراِتگ ئِے –

آ سھب ءَ چہ بے سبری بیگاہ ءَ بوگ ءِ ودار ءَ بوتگ، ءُ وھدیکہ آئی ءَ چہ وتی بنجل درآیگ ءُ نشانگ جاہ ءَ سر بوگ ءِ ھاتر ءَ گوشگ بوت گڑا آ پھری وشی ءُ پربیسھی جزبگاں گوں تراک ناکیں شورواں گوں پُریں کوٹ ءَ گوار ءَ کنت ءُ شال ءَ وتی جان ءَ مانپوش ایت وتی زند ءِ گڈی سپر ءَ درکیت – اے بیست ءُ یک سالی ئیں ورنا مھکمیں جزبگ، پُھتویں ارادہ دلیر ءُ تمردیں سنگت سربلند بیت اِنت –

سنگت سربلند چوش کہ دور ھیالیں مازگی ءِ واھند بیت ھمے ھاتر ءَ ھنچوش کہ آ وتی نیک ءُ بد ءَ زانت وتی سرڈگار ءَ کشوکیں گوات ءِ تہ ءَ گلامی ءِ بدیں بوہ ءَ بوہ چِنت آ وتی چپ ءُ چاگرد ءِ مردمانی تہ ءَ یک دگہ وڑیں بارگیں راھے گندیت، آئی ءَ ھر نیمگ ءَ بے اوستیں ترس ءُ بیم ءِ گندگ ءَ کیت – ھنچو گُش انت کہ انسان ءِ کِرد ءِ جوڑ کنگ ءَ آئی ءِ نام ءِ بلاھیں سان ءِ بیت- بوت کنت اے گپ راست مہ بیت بلے سنگت سربلند ءِ درگت ءَ نام ءُ کرد ھردوکاں نزیکی ھست، من نزاناں چی پگر کنگ بوتگ ءُ آئی ءِ نام سربلند کنگ بوتگ بلے آئی ءِ تہ ءَ اے زانت الّم بوتگ کہ وتی کِرد ءَ وتی نام ءِ رِد ءَ ھوار بہ کنت کسان اُمری ءَ آ ھما مردمانی رم ءَ ھوار بوتگ کہ پہ تُرس ءُ بیم ءَ ھچبر سر اش جھل نہ کرتگ – تُرس، بے دلی، بے واھشی، بدواھشی ءَ چہ پاکیں سر بُلند ءِ سر مدامی چست بوتگ – آئی ءِ سپر سک باز گرانی ءَ گوستگ ھزاراں جیڑہ جنجالاں پد آ اے جاہ ءَ سربوتگ اَت – پند جنگ ءِ میان ءَ آئی نرم ءُ نازرکیں پاداں ترامبل ھم دیستگ اَت، برپ باری ءِ موسم ءُ سارتیں گوات ءِ کشگ ءَ آئی ءِ ڈولداریں دیم سُھر ھم تر اتگ اَت – آئی ءِ زمستانی سارتیں شپاں بس وت ءَ شال ءِ مانپوش اتگ ءُ ڈیھ ءِ برپ بستگیں کوھانی ٹُل ءَ ھم وپتگ اَت، نیم روچ ءَ وھد ءَ آئی ءَ روچ ءِ برانز ھم اوپار کتگ ھید ءَ جانشود ھم بوتگ اَت، سرجمیں روچ ءَ پند ءَ ھم تر اتگ بلے آئی ءِ سینگ ءَ آجوئی ءِ روکیں اشکرانی سارت کنگ ءَ اے بس نہ اِت اَنت، پد ءَ یک روچے ئے سربلند مئے دور ءِ ابراھیم “اسلم” ءَ گوں دُچار کپ ایت ، اے گند ءُ نند آئی ءِ زند ءِ جوانتریں وھد بیت آ روچ ءَ پد آئی ءَ وتی سرڈگار گوں مھر ءِ گڈسر ءَ سر بوگ ءِ راہ رس ایت سَے سالانی سبر ءُ اوپار ءَ پد آئی ءَ مھر ءُ آشوب ءَ ھون ء وپا ءِ وارینگ ءَ ھما شھر ءَ سر بیت –

ھما وھد ءَ کہ سربلند بلوچ وارڈ ءَ دگ ءِ کِر ءَ ھاک ءِ جُمپ ءِ سر ءَ نشتگ ءُ زر ءَ چہ کشوکیں زر ءِ نمبانی ھمراھی ءِ گوات ءِ سارتی آئی ءِ جان ءَ لگگ انت آ مارگ انت کہ گوات ءِ لھم لھمیں سارتُکی آئی ءَ گوں گپ جنگ انت، ھمے بزان گوات ءِ نمبپان آئی ءَ وتیگی کنگ ءَ انت آئی ءَ چہ وتی پجّار ءَ کنائینگ اَنت آ ھمے ماریت کہ گوات ءِ نمبپانیں شنز وتی کِژکِژاں آئی ءِ گون ءَ ھلوت ءَ اَنت کہ مار ءَ بلوچ ءِ زِر ءِ نمباں ھوار ھوار گلامی ءِ گند ھم ھوار اِنت کہ تو وتی ھونانی وشبو ءَ چہ آھانی دیر کنگ ءِ ھاتر ءَ سداں میل ءِ پند بُر اِتگ ءُ اد ءَ اتکگ ئے سربلند وھدیکہ وتی سر ءَ چِست کنت ءُ شھر ءِ نیمگ ءَ چاریت ھمے ماریت کہ باریں اے شھر ءَ چُنت وھد انت آئی ءِ راہ ءَ چاران انت، ھمے بزان کہ اے شھر ءَ پیسر ءَ چہ آئی ءِ آیگ ءِ شُبین بوتگ ءُ ھمے وڑ ءَ گندے یک ماتے ءِ بازیں وھدے ءَ پد وتی زھگ ءِ آیگ ءُ آئی ءَ وتی امبازاں زورگ ءَ بے تاب بہ بیت ھمے وڑ اے شھر ھم آئی ءَ وتی امبازانی زورگ ءِ ھاتر ءَ بے تاب انت سربلند ءِ گوشاں زھرشانی کنوکیں تُنیگیں مردمانی توار کہ کپ ایت گڑا آئی ءَ ھمے مارگ ءَ بیت کہ اے توار میتگ ءِ مھلوک ءِ نہ انت بلکیں ھما میتگ ءِ جندیگ انت کہ وتی بچ ءَ توار جنگ ءَ اِنت وتی (تباھی ءُ بربادی )کسہ ءَ گوشدارینگ ءَ انت –

سربلند ءِ سر چست بیت ءُ آ میتگ ءِ نیمگ ءَ چارگ ءَ بیت کہ آءَ وتی نشانگ ءَ آیگ ءَ گندیت، آ تمردی ءَ گوں چو کوھی شکاری یے مُرگ ءِ پیم ءَ دیم پہ نشانگ ءَ رؤت آئی ءَ لچ ایت آئی ءِ ھمراھی ءَ درسیں شھر لرزیت، ھما جاہ ءَ آزمان سیاھیں چادرے مانپوش ایت، بیست ءُ یک سالی ئیں سربلند ءِ جان ءِ ھر یک رگ ءُ ریشگے جتا جتا بیت ءُ گوادر ءِ ھاک آئی جان ءِ پُلکاں وتی اندر ءَ نزار کنت ءُ سربلند ءَ وتی امبازاں زور ایت ھمیشی ءِ ھمراھی ءَ اے بیست ءُ یک سالی ئیں ورناہ ءِ دراجیں ودار آسر بیت ءُ آ مھر ءِ گڑی ٹُل سربیت اِنت، نوں ھر وھدے سربلند ءِ ھم ھیال ءِ ھما شھر ءَ رؤت زِر ءِ نزیک ءَ نند ایت ، ءُ وھدے زر ءِ کشوکیں زِری گوات آئی ءں گوشانی کش ءَ کِژ کژ کنت ءُ گوزیت گڑا آ ھمے کیژ کِژاں ھواریں سربلند ءِ بچکنداں الم مار ایت کُت کنت –

چوش کہ بلوچ ءِ زِر انگت آجو نہ انت انگت ءَ اود ءِ گوات ءِ تہ ءَ گلامی ءِ گند ھست انت بلے نوں اود ءِ گوات ءِ تہ ءَ گلامی ءِ گند ءِ ھمراھی ءَ سربلند ءِ پاکیں ھون ءِ وشبوہ الّم بیت انت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ مستونگ ءِ ھند کردگاپ ءَ جھمنندیں ورناہ پاکستانی پوج ءَ زورانسری آوار جتگ ءُ پد ءَ بیگواہ کتگ اَنت چریشی ءِ پد اشانی درگت ءَ ھچ وڑیں ھال نیست اِنت-

سربوتگیں ھالانی رِد ءَ کردگاپ ءِ جھمنندیں ورناہ زاکر بلوچ ء محمد یوسف ءُ مدثر ء ٹکری سیف اللہ سرپرہ گوستگیں روچ ءَ پاکستانی پوج ءَ ھما وھد ءَ آوار جتگ اَنت کہ آ نوشکی ءِ نیمگ ءَ روگ ءَ بوتگ اَنت-

اے ورنایانی آوار جنگ ءَ پد بیگاہ ءِ وھد ءَ فرنٹئر کور ءُ سادھیں گُدانی تہ ءَ ھواریں کارندھاں نھ ءِ دمگ انگر ءَ کتگ ءُ زاکر بلوچ ءِ لوگاں بیڑبرتگ ءُ ھمے میان ءَ لوگ پٹ ءُ پول کتگ اَنت ءُ لوگانی تہ ءَ پروشت ءُ پروش کتگ – پوج ءِ کارندھاں دمگ ءَ فٹ بال ءُ کرکٹ پٹ ءَ ساڑی ئیں مردم انگر ءَ کتگ ءُ تُرس ءِ آماچ کتگ اَنت –

ورنایانی زورانسری آوار جنی ءَ پد کھول ءِ مردم تُرس ءِ آماچ اَنت کہ چیزے روچ ءَ سی ٹی ڈی ءِ نیمگ ءَ دروگیں میڑے ءِ سبب ءَ زورانسری آوار جنگ بوتگیں مردمانی کھول ھمے گمان کنگ اَنت کہ آیانی بیگواھیں مردماں دروگیں میرے ءِ نام ءَ مہ کُش اِیت ءُ دور مہ دنت-

زانگ بہ بیت بلوچستان ءِ جتاجتائیں دمگاں ھمکروچ پاکستانی پوج مردماں زورانسری آوار جنگ ءُ بیگواہ کنگ ءَ اِنت سیاسی مردمانی گوشگ اِنت کہ اگاں پاکستانی پوج ءِ چیریں آزار جاھاں یک مردمے یل کنگ بیت دگہ دہ آوار جنگ بیت یا دروگیں میڑے ءِ نام ءَ جنگ ءُ کُشگ بیت اِنت-

بلوچ سیاسی پاٹیانی گوشگ اِنت کہ بلوچستان ءِ تہ ءَ انسانی ھکّانی لگتمالی بوگ ءَ اِنت بلے انگت کس ءَ چُشیں گامگیجے نہ زرتگ کہ آ بلوچستان ءِ تہ ءَ برجاھیں انسانی ھکانی لگتمالی ءَ پاکستان ءُ آئی چیریں ادارھاں چوشیں کردانی کنگ ءَ بہ دار اَنت –

سَے سال ءَ پیسر بلوچستان ءِ دمگ نوشکی ءَ پوج ءِ دست ءَ زورانسری آورجنگ بوتگیں آصف ءُ محمد رشید ءِ کھول ءَ آیانی یل کنگ ءِ لوٹ کتگ –

آصف ءُ رشید ءِ کھول ءِ گوشگ انت آ سَے سال پیش سی ءُ یک اگست ءَ پوج ءَ دگہ نھ ھمراھانی ھواری ءَ آوار جتگ ءُ بیگواہ کتگ انت –

کھول ءِ رِد ءَ لھتے وھد ءَ پد آصف ءُ رشید ھواری ءَ آوار جنگ بوتگیں مردم رسانکدرانی دیم ءَ آرگ بوتگ انت آھانی دزگیری زاھر کتگ انت ئِے –

کھول ءِ رِد ءَ آصف ءُ رشید ءِ ھواری آوار جنگ بوتگیں مردم پد ءَ رند ءَ یک یک ءَ یل کنگ بوتگ انت بلے آصف ءُ رشید انگت بیگواہ انت –

کھول ءِ رِد ءَ وتی دوستگیں مردمانی یل کنائینگ ءِ ھاتر ءَ شال ءُ کراچی ءَ ھوار ھرجاہ ءَ زھرشانی کنگ ءَ لاچار بوتگ انت اشی ءَ ابید مئے توار اشکنوک کس نیست انت –

کھول ءِ لوٹ انت کہ اگاں آھانی دوستگیں مردماں جرم ءِ کتگ تو آ ملکی آمیدگساں آرگ بہ بنت ءُ ھک دیگ ءں موہ دیگ بہ بیت – آھانی کھول ءَ سرکار ءُ دگہ انسانی ھکانی ادارھاں چہ لوٹ کتگ کہ آ آصف ءُ رشید ءِ یل کنائینگ ءَ وتی کرد ءَ پیلو بہ کن انت –