TBP Balochi

بلوچستان ءِ بنجاھی شھر شال ءَ بیگواھیں مردمانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ بیست ءُ پنچ روچ سرجم بوتگ – بی ایس او ءِ کمک سرکماش محمد اشرف بلوچ، جنرل سیکرٹری عظیم بلوچ، شکور بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ پاکستانی پوج ءِ زوراکی، دست گوشیں بلوچانی کوش پاکستان ءِ زوراکی دگہ درورے ڈیرہ بگٹی، کوھلو، کاھان ءَ بگر تربت ءُ مند گوادر بلوچستان ءِ چشیں دمگ ءِ نیست کہ اود ءَ ریاست ءِ زلم زوراکی نیست انت –

ماما قدیر بلوچ ءِ گوشگ ات کہ ھنچوش کہ ریاستی ادارھاں وتی دمگی کشندہ ٹولیانی کمک ءَ مردم آوار جتگ ءُ آھانی زانگولیں جون دور داتگ انت مروچی ھمے کار ءَ سی ٹی ڈی کنگ ءَ انت بیگواھیں مردمانی کھولاں ترسینگ ءِ جھد کنگ بوگ ءَ انت تانکہ بیگواھیں مردمانی کھول وتی پُرایمنیں جھد ءَ چہ دزکش بہ بنت بلے راجدپتر گواہ انت کہ پہ کُشت ءُ کُوش ایردستیں راج ھاموش کنگ نہ بنت اے زوراکیاں بیگواھیں مردمانی پُرایمنیں زھرشانی ءَ گیشتر دیمروئی رسگ ءَ انت –

ماما قدیر بلوچ ءِ گوشگ ات کہ بیگواھیں مردمانی میان استمانی روچ ءَ سرجمیں جھان زورانسری آوار جنی ءِ بگیری ءَ یکجھتی ءِ درشان کنگ انت دومی نیمگ ءَ ھزاراں بلوچ پاکستان ءِ زندانانی تہ ءَ ازیت سگگ انت کہ اود ءَ پاکستانی ادارہ آھاں لٹ ءُ کُٹ کن انت آھانی زانگولیں جوناں یکجاھیں کبرانی تہ ءَ کل کن انت –

ماما قدیر بلوچ ءِ گوشگ ات کہ جھان ءِ راج ءُ انسانی ھکانی ادارہ پاکستان ءِ زوراکیانی گواہ انت بلے اے راج ءُ ادارھانی نیمگ ءَ بلوچ چکچینی ءِ سر ءَ ھچ نگوشگ بژنی گپ ئے –

نبشتانک: سی ٹی ڈی ھمے رنگ ءَ مردمانی کوشاں برجاہ کنت؟

نبشتہ کار: درپشان بلوچ

دی بلوچستان پوسٹ

بلوچستان ءَ گوست ءَ بیگواھیں مردمانی کُشگ ءُ ریچگ دگہ وڑ بیتگ اَنت یا یکے ءِ چم بندگ بیتگ اَنت ءُ جنگلے ءَ دور دیگ بیتگ یا آئی ءِ دیم ءِ چھرگ دور کنگ بیتگ ءُ سَڑکے ءِ کش ءَ بستگیں دستانی ھواری ءَ گندگ بیتگ –

ھمک گاریں مردم ءِ پژدر ءَ آئی ءِ مردماں مدام جنگل ءُ گیاباناں ودار کتگ بلکیں بیت کنت منی چمانی چراگ ءِ جون من ءَ دز کپ ایت یا زندگی ءَ یا نیم زند ءَ بلے گیشتر مردمانی ودار ءِ دل ٹپ ءُ ٹاپ ءَ بیتگ اَنت پرچا اے وڑیں کارنامہ بلوچستان ءَ یکشل ءَ برجاہ بیتگ اَنت ءُ گیشتریں مردماں ھمے واستا ودار کتگ کہ مئے مردم ھم ھمے رنگ ءَ چگل دیگ بنت –

اے بلوچستان اِنت اد ءَ چِنکس جون ھمے رنگ ءَ دزکپتگ اَنت چنکس مردم گار بیتگ اَنت باریں بے کساس اے ھساب کنگ ءَ بازیں وھد لگ اَنت اشاں ھساب بہ کن ئے گڑا یک مردمے سرجمیں دنیا ءَ گول اِت کنت –

گوشگ ئیگ ءَ بلوچانی سر ءَ اے ازاب باریں کدی ھلاس بیت اشی ءَ باریں چُنت ماتانی چم کور کرتگ ءُ چنت جنوزام وابانی انگارانی زبھر کتگ اَنت چُنت زھگ سبزیں ساھگاں بے تاب کتگ ءُ چنت گوھار گِھیں ورنایاں سستگ ءُ جتا بیتگ اَنت –

اے تورناکیں کسہ بلوچستان ءِ ھمک کوہ ءُ گیابانی تہ ءَ نکش نکشیں سنگانی سر ءَ نکش اَنت ھمک تیرھُریں باسکانی دل ءَ ستک ءُ ایمن اَنت ءُ جمبتگیں رنگے ءَ بلگ ءَ اَنت –

گوستگیں روچ ءَ سمی ءَ گُشتانک دیان ءَ گُشتگ اَت “ ھرکس اے ملک ءَ واکداری ءَ کیت گڑا آ بس ھمے سدکی ءَ دنت کہ شمئے مردم یلو بنت بلے منی سر پِر نہ بیت مئے مردم مارا کجام ھساب ءَ یلو کنگ ءُ دیگ بنت ”-

سمی ءَ گُشتگ اَت “ اے راستی ءِ مئے مردم یلو بیگ ءَ اَنت بلے گوست ءَ دگہ ھسابے ءَ یلو بیتگ اَنت چُشکہ پیسر ءَ کُشگ ءُ جنگلاں چگل دیگ بیتگ اَنت نِی آیاں دیم پہ دیمی کُشگ ءُ دگہ بھتامے سر ءَ لڈگ ءَ اِنت ئِے کہ اے مردم جنگ ءِ میان ءَ کُشگ بیتگ اَنت ”-

اے کھر دابیں جاور بلوچستان ءِ سر ءَ بازیں وھداں کپتگ ءُ پیداک اَنت بلے اشی ءِ درچ ءَ بلوچ بس ھمے یکیں ایمنی ءَ کنگ ءَ اَنت مئے مردماں جرم کرتگ گڑا آ عدالتاں پیش کنگ بہ بنت –

اشی ءِ ودار ءَ اگاں بہ چارے گڑا بلوچانی واستا عدالت برے کُشگ ءُ چگل دیگ برے آیاں دیم پہ دیمی جنگ ءِ نام ءَ تیراں سرے توک ءَ بہ جن ءُ آیانی لاشاں پجار ءِ ھاتر ءَ ھسپتال ءَ سر کنگ –

نِی بلوچ پہ وت ءَ چی جیڑ اَنت، وتی بیگواھیں مردمانی چونیں گامگیج زرت کن اَنت یا ھمے وڑ ءَ ودار ودار ءَ وتی بیگواھیں مردمانی تیر سپتگیں لاشاں بس کل اَنت یا دشمن ءَ پاد پروش ءُ وتی زمین ءَ کَش اَنت؟ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی بلوچستان ءِ بنجاھی شھر شال ءَ ناشناسیں مردماں تیرگواری کرتگ، تیرگواری ءِ آسر ءَ یک مردمے بیران بیتگ –

گیشیں ھالانی رد ءَ شال ءَ بالی پَٹ دگ ءَ ناشناسیں مردماں تیرگواری کرتگ ءُ یک مردمے کُشتگ –

بیران بیتگیں مردم ءِ پجار موسیٰ کلیم ء سلیمان جان ءِ نام ءَ زانگ بیتگ کہ ملاخیل پشین تراٹ ءِ جھمنند اِنت-

تیرگواری ءَ پد بیران بیتگیں مردم ءِ لاش چِست کنگ ءُ نادراہ جاہ ءَ سر کنگ بیتگ – کوش ءِ سبب زانگ نہ بیتگ –

بلوچستان ءِ بنجاھی شھر شال ءَ ھوار بلوچستان ءِ دگہ جاھاں ھم تیرگواریانی وئیل پیش آیگ ءَ اَنت کہ چریشی ءَ مردمانی بیرانی ءُ زدگ بیگ ءِ ھال رسانکدراں یکشل ءَ شنگ بیگ ءَ اَنت –

کاؤنٹر ٹیرر ازم ڈیپارٹمنٹ (سی ٹی ڈی) ءَ ٹاہ داتگ کہ یک بیڑے ءِ میان ءَ دیم پہ دیمی تیرگواری ءَ یازدہ ناشرکار کُشگ بیتگ اَنت-

سی ٹی ڈی ءَ ٹاھانی رد ءَ کُشگ بیتگیں مردمانی سیادی نیکراھی ناشرکاریں گک داعش ءَ اِنت بلے تنی وھدی آئی ءَ نام پدر نہ کتگ اَنت –

زانگ بہ بیت گوستگیں بازیں وھداں سی ٹی ڈی ءَ اے وڑیں دیم پہ دیمی جنگانی ٹاہ داتگ اَنت ءُ پیسر ءَ دزگیر کرتگیں مردماں کُشگ اِنت –

لھتے روچ پیسر کوھار ڈیم لورالائی ءِ ھند ءَ سی ٹی ڈی ءَ ھپت مردمانی کُشگ ءِ ٹاہ داتگ اَت پد ءَ کُشگ بیتگیں مردمانی پجار بیگواھیں بلوچانی ناماں پدر بیتگ اِت اَنت –

اے دروگیں دیم پہ دیمی جنگ ءَ کُشگ بیتگیں سَے کسانی پجار عبدالغنی، عبدالحاد ءُ صدام حسین ءِ ناماں بیتگ اَنت پیسر ءَ دزگیر کنگ ءُ رند ءَ کُشگ بیتگ اَنت –

بلوچ راجدوستیں پاٹی نیشنل مومنٹ ءَ مروچی شنگ کرتگیں وتی درشانی ءَ گُشتگ کہ بیست ءُ شش اگست ءَ کُشگ بیتگیں غنی بلوچ بیست اکتوبر دوھزار ءُ ھبدہ ءَ ءُ صدام بلوچ بیست ءُ چار اپریل دوھزار ءُ ھژدہ ءَ پاکستانی پوج ءُ چیریں ادارھانی کارمنداں کراچی ءِ دمگ ملیر ءَ آوار جتگ ءُ برتگ – عبدالحاد پوج ءَ ھمے سال ءِ جنوری ماہ ءَ پنجگور ءِ دمگ پروم ءَ لوگ ءَ بیڑ برتگ ءُ بیگواہ کرتگ -جمیل ء مھمد ھسن نوزدہ مارچ دوھزار ءُ بیست ءُ یک ءَ چہ پنجگور ءَ پاکستانی چیریں ادارھاں دزگیر کرتگ ءُ برتگ، ھمے وڑ ساجد سال دوھزار ءُ ھژدہ ءَ پاکستانی چیریں ادارھاں بیگواہ کرتگ ءُ دگہ دو بیگواھیں مردمانی ھمراھی ءُ کُشتگ ءُ دیم پہ دیمی جنگ ءِ نام داتگ اخنت – آدگہ بیگواھیں مردمانی شناسی برجاہ اِنت – پاکستان ءِ اے جنگی جرم ھچ رنگ ءَ ناکابل کبول ءُ ناکابل ءِ بکشگ اِنت –

ھمے درگت ءَ گوستگیں روچ ءَ بیگواھیں ڈاکٹر دین مھمد ءِ جنک ءُ وائس فار بلوچ مسنگ پرسنز ءِ جوائنٹ سیکریٹری سمی بلوچ ءَ یک تامر بندے ءَ وتی شنگ کرتگیں گپانی تہ ءَ گُشتگ کہ ما گندگ ءَ ایں سی ٹی ڈی بیگواھیں مردماں دروگیں دیم پہ دیمی جنگ ءِ نام ءَ کُشگ ءِ یک نوکیں درچے بنداگ کنگ بندات کرتگ ءُ دروگیں جنگ ءِ نام ءَ ھما مردماں کُشگ اِنت کہ آ دو یا سَے سالاں چہ بیگواہ اَنت –

آئی ءَ گمان پدر کرتگ کہ آیوکیں روچاں سی ٹی ڈی گیش بیگواھیں مردماں اے رنگ ءَ دروگیں جنگ ءِ نام ءَ کُش اِت اِنت آئی ءَ بیگواھیں مردمانی کھولاں گوں دزبندی کرتگ وتی بیگواھیں مردمانی ناماں وائس فار بلوچ مسنگ پرسنز ءِ گور ءَ بیار اَنت –

آئی ءَ گُشتگ کہ بیگواھیں مردمانی اگاں شمارا دمگی سروک یا دگہ ھنچیں مردمے دارگ ءَ اِنت کہ وتی مردمانی ناماں رجسٹرڈ مہ کن اِت یا ایف آئی آر مہ کن اِت کہ شمئے مردم یلو بنت گڑا بزاں شما وتی مردمانی لاشانی ودار ءَ نشتگ ئے –

انسانی ھکانی بیگواھیں باسک راشد ھسین ءِ مات ءَ مروچی شال ءِ پریس کلب ءِ دیم ءَ زورانسری آوار جنی ءِ میان اُستمانی روچ ءِ درگت ءَ بیوکیں زھرشانی ءَ ھوار بیتگ –

راشد ھسین ءِ مات ءِ رد ءَ پاکستان ءَ ھستیں آمیدگس ءُ بیگواھیں مردمانی واستا جوڑ کرتگیں کمیشن کھولانی واستا انساپ دیگ ءَ ابید رمس ءُ دگہ بھانگانی سر ءَ آسرمندیں مردماں ترسینگ ءَ اِنت –

آئی ءَ گُشت کہ من ءَ بازیں براں بلوچستان ءِ ھائی کورٹ ءَ لوٹ اِتگ ابید ءِ گوشگ ءَ واتر کرتگ – چہ کراچی ءَ شال دراج کشیں سپر ءِ گوازینگ ءَ پد گوش اَنت برو واتر –

زھرشانی کنوکاں گوں گپ کنان ءَ گُشتگ ئِے راشد ھسین ءِ مات ءَ گُشتگ کہ شال ءَ ھستیں بیگواھیں مردمانی کمیشن ءَ راشد ھسین ءِ کیس ءِ بارو ءَ ھچ گپ نہ بیگ ءَ اِنت –

آئی ءَ گُشتگ کہ اے وڑیں رویشاں پدر بیت اِنت اد ءَ آمیدگساں انساپ ءِ رسگ ءَ ابید کھولاں لاچار کنگ ءَ اَنت کھول وتی دوستگیں مردمانی واستا کانونیاں چہ دزکش بہ بنت -اشاں ابید آیانی توپک دار شپ ءِ تھارُکی ءَ لوگاں بیڑ بر اَنت کھولاں ترسینگ ءَ اَنت –

بیگواھیں راشد ھسین ءِ مات ءَ دیمتر ءَ گُشتگ کہ منی زھگ راشد ھسین ءِ کیس کمیشن ءَ کشگ بیتگ ءُ من ءَ ججانی نیمگ ءَ ھروھد ءَ ترسی بیھار دیگ ءَ اَنت – بیگواھیں مردمانی کھولانی واستا پاکستان ءَ انساپ ءِ دروازگ بند اَنت –

بلوچستان ءِ بنجاھی شھر شال ءَ بیگواھیں مردمانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ بیست ءُ چار روچ سرجم بوتگ – بیگواھیں مردمانی کھول ءُ ھب چوکی ءَ چہ سیاسی ءُ چاگردی مردماں بنجل ءِ تر ءُ تاب کرتگ –

بنجل ءَ اتکگیں مردمانی میان ءَ تران کنان ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ ریاست سرجمیں بلوچستان ءَ بلوچانی آوار جنی ءُ آھانی کوش یکجاھیں کبرانی پالیسی سر ءَ عمل کنان انت – سرجمیں بلوچستان ءَ سیاسی باسک ءُ لس بلوچ مھلوک ءِ زورانسری آوارجنی رِد یکشل ءَ برجاہ داشتگ – پوج ءُ آئی ءِ داشتگیں کشندہ ٹولی ھوار سی ٹی ڈی اے انسان کُشیں عمل ءِ تہ ءَ ھوار انت –

ماما قدیر بلوچ ءِ گوشگ ات کہ بلوچستان ءَ پنجاہ ھزار گیش مردم زورانسری آوار جنگ بوتگ آھانی تہ ءَ بازین ءِ زانگولیں جون بلوچستان ھوار کراچی ءُ دگہ دمگاں دست کپتگ انت – ھنو دگہ نوکیں درچ ءِ بندات کنگ بوتگ کہ سی ٹی ڈی دروگیں میڑ ءِ نام ءَ بیگواھیں مردماں کُشگ انت – دو ماہ ءِ تہ ءَ سی ٹی ڈی ءَ سی مردماں گیش دیم پہ دیمی میڑ ءَ جتگ بلے نوں زاھر بوھگ انت کہ اے درسیں مردم زورانسری آوار جنگ ءُ بیگواہ کنگ بوتگ انت –

آئی ءِ گوشگ ات کہ بلوچستان ءَ چہ بازیں وھد ءَ چہ ناشناسیں مردمانی جونانی دست کپگ ءَ مئے شک یکین تہ ءَ بدل بوھگ انت کہ اے دراہ بیگواھیں مردم بوتگ انت کہ آھانی پجار کنگ نبوتگ – ھمستیں وھد ءَ چشیں بازیں وئیلاں بیگواھیں مردم جنگ بوتگ ءُ بید پجار ءَ کل ءُ کسارت کنگ بوتگ انت ءُ اے کاراں ریاست پاکستان وتی ادارھانی کمک ءَ کنگ ءَ انت –

ماما قدیر بلوچ ءِ گوشگ ات کہ پاکستان ءِ چہ بنگلہ دیش ءَ ھم ھمے وڈ کنگ بوتگ ھزاراں بنگالی باسک اوار جنی ءَ پد کُشتگ ءُ یکجاھیں کبرانی تہ ءَ کل کرتگ انت ءُ مروچی ھمے پالیسی بلوچستان ءِ تہ ءَ کنگ بوھگ انت –

زورانسری آوار جنی ءِ آماچیناں میان اُستمانی روچ ءِ درگت ءَ کراچی ءُ شال ءَ زھرشانی کرتگ – زھرشانیاں بلوچستان ءُ سندھ ءَ ھوار زورانسری بیگواھی گیر انسانی گوشگ بیتگ ءُ دراھیں بیگواھیں مردمانی یل کنگ ءِ لوٹ بیتگ اَنت –

شال ءِ پریس کلب ءِ دیم ءَ وائس فار بلوچ مسنگ پرسنز ءِ چیردستی ءَ زھرشانی کنگ بیتگ، زھرشانی ءَ پشتون تھپز مومنٹ، بلوچ یکجھتی کمیٹی ءِ رھشون، وائس فار مسنگ پرسنز آف سندھ، ہیومین رائٹس آف پاکستان، وائس فار بلوچ مسنگ پرسنز، نودر ءُ دگہ تکاں بندوکیں سیاسی پاٹیانی باسکاں بازیں کچے ءَ بھر زرتگ –

شال ءَ زھرشانی کنوکاں بلوچستان ءَ زورانسری آوارجنی ءِ آماچیں بیگواھیں جھانزیب مھمد ھسنی، راشد ھسین بلوچ، نصیب اللہ بادینی، پنجگور ءَ بیگواھیں نجیب بلوچ ءَ ھوار دگہ بیگوابیں مردمانی کھول ءُ چکاں بازیں کچے ءَ بھر زرتگ -آیاں بیگواھیں مردمانی آکس گون بیتگ ءُ اوگام جنان بیتگ اَنت-

بلوچستان ءُ سندھ ءَ گیر کانونی ءَ دزگیر کنگ ءَ پد بیگواھی ءِ آماچیں بلوچ، سندھی، شیعہ ءُ پشتون باسکانی واستا ءَ کراچی ءَ یک زھرشانی روانکے کشگ بیتگ –

کراچی ءَ زھرشانی روانک ءَ ہیومین رائٹس کمیشن آف پاکستان، وائس آف بلوچ مسنگ پرسنز، وائس فار مسنگ پرسنز آف سندھ، سندھء سجاگ فورم ءُ پشتون تھپز مومنٹ، بلوچ یکجھتی کمیٹی کراچی ءِ چیردستی ءَ گورہ کبرستان ءَ داں کراچی ءِ پریس کلب ءَ روانک کشگ بیتگ –

کراچی ءَ زھرشانی ءَ انسانی ھکانی باسک، سیاس ءُ چاگری گلانی باسکاں بازیں کچے ءَ بھر زرتگ، زھرشانی ءَ بلوچستان ءَ بیگواہ بیتگیں مردمانی کھول ھم ھوار بیتگ اَنت –

شال پریس کلب ءِ دیم ءَ برجم داشتگیں زھرشانی ءَ تران کنان ءَ بیگواھیں مردمانی کھولاں گشتگ بازیں سالاں بیگواھیانی دیمپانی مئے دوستیگیں مردم دیم ءَ آرگ بہ بنت بلے نانکہ سرکار اے تک ءَ دلگوشی گامگیج زورگ ےَ نہ کہ دگہ –

شال ءَ زھرشانی کنوکاں گشتگ کہ بلوچستان ءَ بیگواھیں مردم دروگیں دیم پہ دیمی جنگ ءِ نام ءَ کُشگ ءُ چگل دیگ بیگ ءَ اَنت ءُ اشی ءِ سر ءَ سرکاری ءُ انسانی ھکانی ادارھاں گوں دزبندی اِنت اشانی گر ءُ دار بہ بیت اِنت –

زانگ بہ بیت میان اُستمانی روچ ءَ اسرمندیں بیگواھیں مردمانی واستا شال، ڈیرہ گازی ھان، کراچی ءَ زھرشانی بنجل برجم کنگ بیتگ اَنت – ھمے وڑ چاگردی رسانکجاھاں کیمین برجم اِنت –

شال ءَ بلوچ اسٹوڈنٹس ایکشن کمیٹی ءِ دومی بنجاھی کمیٹی دیوان برجاہ دارگ بوتگ – دیوان ءَ کراچی، ھب ءُ ھزدار ءَ سیاسی ءُ ادبی مراگش ءِ اڈ دئیگ ءِ پیسلہ کنگ بوتگ –

بلوچ نودربر گل بساک ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ گل ءِ دومی بنجاھی کمیٹی ءِ دیوان بنجاھی کمک سرکماش ءِ شبیر بلوچ ءِ چیردستی ءَ ماں شال ءَ برجاہ دارگ بوتگ – دیوان ءَ گوستگیں رپورٹ، تنکیدی نشست، تنظیمی امور ءُ دمگی ءُ میاں استمانی سیاسی جاور ھالانی باوست بوتگ ءُ دیمتری کارانی ایجنڈہ سر ءَ بازیں پیسلہ زورگ بوتگ –

دیوان ءَ تران کنان ءَ بنجاھی کمک سرکماش شبیر بلوچ ءِ گوشگ ات کہ ھر وڈیں گل ءَ بنکی (اساس) ادارے ءَ گوں ھما باسک ھمگرنچ انت کہ گل ءِ ڈسپلن ءُ رھبندانی سر ءَ اوشتوک انت ھما باسک گل ءَ دیمروئی ءِ دے اَنت ءُ مھکم کن انت کہ گل ءِ رھبنداں پیلو کن انت مخلص ءُ سنجیدھیں باسک گل ءِ زمّہ واریاں پھم انت ءُ آھانی سرجم کنگے جھد ءَ کن انت –

آئی ءِ گوشگ ات کہ گل ءِ دیمروئی ءَ پہ گل ءِ نیمگ ءَ برجاہ داشتگیں تربیتی مراگش یک (کلیدی) کرد ءِ پیلو کن انت – گل ءِ نیمگ ءَ چہ باسکانی سیاسی تربیت پگری ءُ عملی درگت ءَ پھتویں پالیسی جوڑ کنگ بوتگ چریشی ءَ چہ درسیں ھنکینان یکشل ءَ اسٹڈی سرکل، لیکچر مراگش ءُ سیمنار برجم داشتگ گل ءِ نیمگ ءَ چہ نودربرانی رھشونی ءِ ھاتر ءَ کیرئیر کونسلنگ مراگش آن ھوار یونی ءِ تہ ءَ دگہ بازیں مراگش اڈ دئیگ بوتگ یونیورسٹی ءِ تہ ءَ نودربرانی جیڑھانی گیش گیواری ءُ پھازدارانی گیر زمہ داریانی بگیری ءَ گل ءِ نیمگ ءَ چہ جمہوری وڈو ڈول ءَ زھرشانی ءِ راہ ھم گچین کتگ –

آئی ءِ گوشگ ات کہ گل ءِ کارانی تہ ءَ اڈاند پیدا کنگے ھاتر ءَ گوستگیں سال ءَ چہ گل ءِ بگیری ءَ تنی وھدی پروپکنڈہ کنگ بوھگ انت اھانی یکیں مول انت کہ گل ءِ تہ باسکانی میان ءَ دوری ءُ بے نپیں باوست ءِ آرگ انت – ما یک نودربر گل ءِ باسک انت ءُ مار ءَ اے دراہ پھمگی انت ءُ آھانی یکر کنگے ھاتر ءَ گل ءِ کاراں نودربراں تاں سرکنگے جھد برجاہ دارگی انت اے درسیں پروپکنڈھانی بنکی مکسد گل ءِ باسکانی تہ ءَ کنفیوژن پیدا کنگ ءُ آھاں تربیتی دیواناں چہ دور دارگ انت اگاں مئے باسک اے وڈیں پروپکنڈھانی آماچ بنت بے نبپیں گپ باوستانی تہ ءَ وت ءَ مشگول کن انت گڑا اے پروپکنڈہ کنوک سوبین بنت ھمے ھاتر ءَ مار ءَ وتی گل ءِ زمّہ واریانی سر ءَ دھان دیگی انت گل ءِ کار دیم ءَ برگی انت ءُ ھمے امل مئے گل ءَ مھکم کرت کنت –

وتی تران ءِ گڈسر ءَ آئی گوشت کہ ھستیں دَور ءَ مکلس سنجیدہ پگر ءُ زانت ءَ سر ریچیں باسک بلوچ اسٹوڈنس ایکشن کمیٹی ءِ وارس انت کہ وتی درسیں گل ءِ زمہ واریاں پہم انت گل ءِ باسکانی نیمگ ءَ ھچ وڈیں پروپکنڈھانی جیڑھانی آماچ نبوھگ ءُ گل ءِ کاراں دیم ءَ برگ گل ءِ باسکانی پگری ءُ زانشتی پدرائی کنت – مار ءَ اے پھمگی انت اے پروپکنڈہ کہ برجاہ انت اے گوست ءَ ھم بوتگ انت ءُ دیمتر ءَ ھم اے مردم پروپکنڈہ کن انت اھانی ھلاس کنگے یکیں راہ ھمیش انت کہ گل ءِ درسیں باسک پگری ءُ زانشتی مھکم بہ بنت ءُ گل ءِ زمہ واریاں پیلو بہ کن انت گل ءِ باسکاں گوں کتاباں نزیکی کنگی انت ءُ کتب بینی ھاتر ءَ گل ءِ تہ ءَ یک علمی ءُ باوست ءِ ماھول ءِ پیدا کنگی انت-

دیوان ءَ گوستگیں رپورٹ، تنکیدی نشست، تنظیمی امور ءُ دمگی ءُ میان استمانی سیاسی جاورھانی سر ءَ باوست کنگ ءَ پد دیمتری کارانی ھاتر ءَ جتائیں پیسلہ زورگ بوتگ –

گل ءِ کارانی دیمروئی ءِ ھاتر ءَ گل ءِ نیمگ ءَ چہ کراچی، ھزدار ءُ ھب ءَ ادبی ءُ سیاسی مراگش اڈ دیگ بیت انت –

جارکش ءَ گوشتگ کہ گل ءِ بنجاھی آرگن نوشت زوت چاپ ءُ شنگ کنگ بیت انت وھدیکہ درسیں دمگانی اسکول کالج آنی تہ ءَ فعال کنگے ھاتر ءَ گامگیج زورگ بیت انت-

ڈر اِتگیں کابل ءُ بلوچستان ءِ سر ءَ آئی ءِ سان

ٹی بی پی شونگال

پانزدہ اگست ءَ تالباناں کابل ءِ سر ءَ اناگتی دستیگ کنگ ءُ اوگانستان ءِ مھتر اشرف غنی ءِ ڈیھہ ءِ یل کنگ ءَ سرجمیں جھان جیڑگی ءَ پرمات۔ اے اناگتی مٹ بیتگیں جاوراں اوگان اُلس آیانی باندات ءُ رس اتگیں آجوئی ءِ درگت ءَ پِگرانی تہ ءَ دور دات اَنت۔ کابل ءِ روگ ءَ پد زیت ھزارانی کچ ءَ اوگان شھریاں کابل ءِ بالی پَٹ ءِ نیمگ ءَ روگ بندات کُت دانکہ آ پہ وھد چہ ملک ءَ درکپت بہ کن اَنت ۔ ھمے نیام ءَ امریکہ ءُ ھواری ھاسیں بالی گرابانی سر ءَ وتی شھری ءُ کمک کارانی کشگ ءَ دلگوش بیت اَنت۔

مردمانی تُرس ءُ چیریں گلانی گپ ھما وھد ءَ ترسناکیں راستی ءِ دروشم ءَ دیم ءَ اَتک وھدے 26 اگست ءَ کابل ءِ بالی پَٹ ءِ سر ءَ بیتگیں پد ما پدی دو تراکانی تہ ءَ 100 ءَ گیش مردم بیران بیت اَنت، کہ اِشانی تہ ءَ 13 امریکی لشکری ھم ھوار اَت اے اُرشانی زمہ واری دولت اسلامیہ ھراسان ءَ من اِتگ اَت۔

تالبانانی اے ٹاہ دیگ ءَ ابید ھم کہ آیاں لس پھلی ءِ جار جتگ ءُ آ جنین آدمانی ءُ مردمی اگبالانی پھازگ ءَ باوری کن اَنت، بلے شریئت ءِ رد ءَ، اے جاور گیشتر تُرس ودی کنگ ءَ اِنت کہ زاناں تالبان پد ءَ نود ءِ دھک ءَ ترندیں کانوداں کارمرز کن اَنت؟ –

اوگانستان ءَ تالبانانی سرکار کہ جنین آدمانی ءُ کستریں راجانی ستک ءِ باندات ءِ سر ءَ مزنیں سان دور دنت، اِشی ءَ دمگ ءَ اے اناگتیں مَٹ بیتگیں جاور ایندگہ اسٹیک ھولڈرزانی سر ءَ ھم سانمند بیت، کہ اِشانی بلوچستان ءُ بلوچ اُلس ھم ھوار اَنت اوگان سرڈگار مدام پہ بلوچاں دومی لوگ ءِ دروشم ءَ بیتگ، ھمے پئیم ءَ بلوچستان چہ دھکاں لکھانی کساس ءَ اوگان میاربندیں مردمانی مھمانجلی ءَ کنگ ءَ اِنت۔

تالبان ءِ سرکار ءَ پد یک رندے پد ءَ لکھانی کساس ءَ اوگان دیم پہ بلوچستان ءَ جُنر اَنت، کہ اِشی ءِ سبب ءَ بلوچستان ءَ مزنیں مَٹی ءِ آیگ ءِ گمان اِنت۔ بلوچ سیاسی پارٹی چہ مزنیں وھدے ءَ ھمے بھتام ءَ جنگ ءَ اِنت کہ پاکستانی ریاست اوگان ءَ میار بندیں مردماں بلوچستان ءَ مزنیں کساسے ءَ شھریت دیگ ءَ گوں بلوچاں کمتری ءِ نیمگ ءَ برگ ءِ پندل سازگ ءَ اِنت۔

دومی نیمگ ءَ آجوئی لوٹوکیں سلاہ بندیں بلوچ گل ءُ پاکستان ءِ نیام ءَ دو دھکاں چہ جُنزوکیں جنگ ءِ سبب ءَ سانمندیں مردم کہ دیم پہ اوگانستان ءَ پہ باھوٹی زند ءِ گوازینگ ءَ اَتکگ اَنت، آیاں ھم کابل ءَ ھم پاکستان دوستیں سرکار ءِ سبب ءَ جیڑھانی دیمپانی کنگ کپت کنت۔

بلوچ راجی جُنز ءَ ٹپاسوکیں زانتکار ھپتاد ءِ دھک بلوچ جُنز ءِ بے سوبی ءِ مستریں سوب نجیب ءِ کمیونیسٹ سرکار ءِ کپگ ءُ نود ءِ دھک ءَ اوگانستان ءَ تالبانانی سرجمی ءَ دزگرگ ءَ لیک اَنت۔ کہ اِشی ءِ سبب ءَ بلوچ رھشوناں لاچاری ءِ تہ ءَ گوں پاکستان ءَ گپ ءُ تران کنگ ءُ واتر آیگ کپت۔

بلے ھیر اے رندیگیں جاورھال چہ گوست ءَ جتائیں دروشمے ءَ پیش دارگ ءَ اَنت، آجوئی لوٹوکیں بلوچ سلاہ بندیں گلانی سروکاں سرنڈر کنگ یک ناممکنیں گپ ءِ گندگ بیت۔ کابل ءِ سر ءَ تالبانانی دستیگی ءَ پد بلوچ آجوئی لوٹوکیں گلانی سلاہ بندیں اُرشانی تہ ءَ گیشی ءُ ھاسیں پئیم ءَ گوادر ءَ چینی انجینئرانی کاروان ءِ سر ءَ بی ایل اے ءِ وت کُشیں تراک کہ اِشی ءِ تہ ءَ شش چینی شھری مرتگ اِت اَنت اے درست یک کلوھے ءِ ھساب ءَ زیرگ بیگ ءَ اِنت کہ بلوچ سلاہ بندیں گل پد نہ کِنز اَنت۔

امریکہ ءِ روگ ءَ پد تالبان مزنیں کساسے ءَ نوکتریں امریکی سلاہ دزگیر کُتگ اَنت، اے گپ ءِ ھم مزنیں گمانی ءِ ھست کہ اے سلاہ ھم گوست ءِ پئیم ءَ بلیک مارکیٹ ءَ پہ بھا بیگ ءَ سر کنگ بنت، چہ ھمود ءَ بلوچ سلاہ بندیں گل وتی جنگی لوٹاں سرجم کن اَنت، اِشی ءِ بزانت ھمے بیت دمگ ءَ بنداتیں جنگ آیوکیں سالانی تہ ءَ ترند ءُ گیشتر دراج کش بیان بیت اِنت۔

گوستگیں روچاں سی ٹی ڈی ءَ ٹاہ داتگ اَت کہ یک دیم پہ دیمی جنگے ءِ میان ءَ ھپت مردم کُشتگ اَنت – سی ٹی ڈی ءَ ٹاہ داتگ اَت کہ کُشگ بیتگیں مردمانی سیادی سلاہ بندیں گل بلوچستان لبریشن فرنٹ ءَ اِنت –

دروگیں دیم پہ دیمی جنگ ءِ نام ءَ کُشگ بیتگیں مردمانی تہ ءَ دو کسانی پجار پیسر ءَ بیگواھیں مردمانی بیتگ اَت دگہ یک کسے ءِ پجار بیگواھیں مردمے ءِ نام ءَ بیتگ –

مروچی پجار بیتگیں مردم ءِ پجار عبدالحاد ء رُستم جھمنند پروم پنجگور ءِ نام ءَ بیتگ –

کھول ءَ دی بلوچستان پوسٹ ءَ گوں گپ کنان ءَ اے ھال ءِ راستی کرتگ – گوشتگ اِش کہ عبدالحاد پوج ءَ ھمے سال ءِ جنوری ءِ ماہ ءَ لوگ ءَ بیڑی ءِ وھد ءَ آوار جتگ ءُ بیگواہ کرتگ ءُ گوستگیں روچ ءَ دروگیں دیم پہ دیمی ءِ کُشگ ءِ ھال اش داتگ ءُ کھول ءَ را گُشتگ ئے کہ بیائیت لاش ءَ بہ بر اِت-

زانگ بہ بیت ھمے سال ءَ سی ٹی ڈی ءَ دروگیں دیم پہ دیمی جنگ ءِ نام ءَ پانزدہ مردم ءَ گیش کُشتگ اَنت –

بیست ءُ شش اگست ءَ دروگیں دیم پہ دیمی جنگ ءَ کُشگ بیتگیں صدام حسین ءِ گوھار ءَ گوستگیں روچ ءَ یک تامربندیں کلوھے ءَ گُشتگ کہ سی ٹی ڈی ءَ دروگیں جنگ ءِ نام ءَ کُشگ بیتگیں صدام حسین بیست ءُ ھپت اپریل دوھزار ءُ ھژدہ ءَ کراچی ءِ دمگ ملیر ءَ ھما وھد ءَ آوار جتگ ءُ برتگ کہ آ چہ دُبی ءَ وتی موکلاں اتکگ –

صدان حسین ءِ ھمراہ سی ٹی ڈی ءَ دروگیں جنگ ءِ نام ءَ کُشگ بیتگیں غنی بلوچ ھم پیسر ءَ دزگیر کنگ ءُ بیگواہ کنگ بیتگ ءُ سی ٹی ڈی ءِ ٹاہ رد اَنت –