TBP Balochi

فرانس ءِ مھتر ایمانوئل میکخواں گوشتگ کہ فرانس تالبان ءَ چہ اوگانستان ءِ شھری ءُ ترس ءِ آماچی ءِ مھلوک ءِ درایگ ءِ واستا گپ ءُ تران کنگ اِنت ھما کہ تالبان ءَ ڈیھ ءِ نوکیں ھاکم نہ منّ اِت اِنت ٹ

فرانسیسی خبر رساں ادارہ اے ایف پی ءِ رد ءَ ایمانوئل میکخوں ءَ عراق ءِ تر ءُ تاب ءِ وھد ءَ ٹی ایف ون ٹیلی ویژن نیوز ءَ گپ کنان ءَ گُشتگ کہ مارا اوگانستان ءِ درایگ ءِ واستا چن ءُ لانچ کنگی اِنت –

آئی ءَ گُشتگ کہ اے وھد ءَ گر ءُ دار تالبان ءِ دست ءَ اَنت مارا گوں آیاں گپ کنگی اِنت اشی ءِ مول ءُ مراد آ ھچ رنگ ءَ منّگ نہ بنت ما وتی شرت ءُ ایر کرتگ اَنت –

دومی نیمگ ءَ تالبان ءَ سد ڈیھانی ٹولیاں یک ستکء داتگ کہ آ درملکی ءُ ھما اوگانیانی گور ءَ سپری راھگوز ھست اَنت کہ آ امریکہ ءِ درایگ ءَ پد بید ءِ دارگ ءَ سپر کنگ ءِ اجازت دیگ بنت اِنت –

یکشمبے ءِ روچ ءَ سد ڈیھاں ھواریں ڈیھی ٹولیاں یک ھمگرنچیں درشانی ءَ گُشتگ کہ مارا تالبان ءِ نیمگ ءَ سدکی رس اِتگ کہ دراھیں درملکی ءَ ھما اوگانیاں کہ آیانی گور ءَ سپری رھگوز ھست اَنر ایاں ابید ءِ دارگ ءَ اجازت دیگ بیت اِنت اشانی تہ ءَ امریکہ، جرمنی، برطانیہ ءُ فرانس ھوار اَنت –

درشانی ءَ گُشگ بیتگ کہ نیٹو ءُ یورپی یونین ءِ دسھت ءَ اِنت گوشگ بیتگ کہ ما وتی شھری،جھمنند، ملازم، مئے گون ءَ کار کنوک ءُ ھما اوگانی کہ آیاں اوگان ءَ ترس اِنت بید ءِ دار ءُ مدار ءَ اوگانستان ءَ یل کت کن اَنت –

ٹولی ءِ گوشگ اِنت آ ستک اَنت اشی ءِ سر ءَ اوگانیاں سپر ءِ واستا رھگوزی جوڑینگ بنت – زانگ بہ بیت اے ٹولی ءِ تہ ءَ دسھتی ءَ چین ءُ روس ھوار نہ اَنت –

منی برات زورانسری آوار جنی ءُ بیگواھی ءَ پد دروگیں میڑ ءَ شھید کنگ بوتگ – سُھیلہ بلوچ

بیست ءُ شش اگست ءَ سی ٹی ڈی ءَ ٹاہ داتگ ات کہ آھاں بلوچستان ءِ دمگ لورلائی ءَ دیم پہ دیمی میڑ ءَ ھپت مردم جتگ – سی ٹی ڈی ءِ گوشگ اَت کہ ھپتیں مردمانی سیادی بلوچ سلاہ بندین گل بلوچستان لبریشن فرنٹ ءَ اِنت – بلے پد ءَ ھم پٹ ءُ پول ءُ بیگواھیں مردمانی پانکجنیں گل ءَ چہ جست ءَ پد ءَ پد اے گپ پدر بوت کہ میڑ ءِ نام ءَ جنگ بوتگیں درسیں مردمانی پجار بوت کہ آ پیسر ءَ زورانسری آوار جنگ ءُ بیگواہ کنگ بوتگ اَنت کہ بازیں سالاں پاکستانی پوج ءِ چیریں زندانان بندیگ بوتگ انت –

جنگ بوتگیں دو مردمانی پجار عبدالغنی ءُ صدام ءِ نام ءَ چہ بوتگ انت – بیگواھیں مردمانی کھولاں گل وائس فار بلوچ مسنگ پرسنز ءِ نیمگ ءَ چاگردی ترامجاھاں شنگ بوتگیں تامری درشان ءِ تہ ءَ دورگیں میڑ ءِ نام ءَ جنگ بوتگیں صدام حسین بلوچ ءِ گوھار ءَ اے گپ راست کُتگ گوشتگ کہ آئی ءِ برات زورانسری آوار جنی ءُ بیگواھی ءَ پد دروگیں میڑ ءِ نام جنگ بوتگ –

سی ٹی ڈی ءِ دروگیں میڑ ءَ جنگ بوتگیں صدام حسین بلوچ ءِ گوھار ءِ رِد ءَ آئی ءِ برات بیست ءُ ھپت اپریل دوھزار ءُ ھژدہ ءَ کراچی ملیر ءَ آوار جنگ بوتگ کہ آ دُبئی ءَ چہ وتی چٹیانی گوازینگ ءَ ملک ءَ آیگ ءَ بوتگ ھما اِنت کہ بیگواہ بوتگ –
صدام حسین گوھار ءِ رِد ءَ سی ٹی ڈی ءِ دروگیں میڑ ءَ جنگ بوتگیں آئی ءِ ھمراہ ھم پیسر ءَ چہ زورانسری آوار جنگ ءُ بیگواہ کنگ بوتگ، سی ٹی ڈی آھاں دیم پہ دیمی میڑ ءِ نام ءَ دنت دروگ بندیت –

زانگ بہ بیت ھمے سال ءَ سی ٹی ڈی ءَ دروگیں میڑ ءِ نام ءَ پانزدہ مردم ءَ گیش کُشتگ وھدیکہ یانزدہ اگست ءَ سی ٹی ڈی ءَ شال ءِ دمگ نیوٹاؤن ءَ پنچ آوار جنگ بوتگیں مردم دروگیں میڑ ءِ نام ءَ کُشتگ اِت انت –

شال ءَ جنگ بوتگیں سَے مردمانی پجار کہ پیسر ءَ آوار جنگ بوتگ انت جمیل ء محمد حسین جھمنند پنجگور ءُ شعیب عطا محمد جھمنند پنجگور ، خان محمد جھمنند گدر سوراب ءِ نام ءَ چہ بوتگ انت – شال نیوکاھان ءَ دروگیں میڑ ءِ نام ءَ جنگ بوتگیں سَیں مردمانی کھولاں دی بلوچستان پوسٹ ءَ داتگیں وتی درشان ءِ اے گپ پدر کتگ کہ ھر سَیں مردم پیسر ءَ آوار جنگ بوتگ انت پد ءَ رند ءَ دروگیں میڑ ءِ نام جتگ انت –

دومی نیمگ ءَ مروچی بزاں سی اگست ءَ زورانسری آوار جنی ءِ میان استمانی روچ ءِ درگت ءَ ایچ آر سی پی، وی بی ایم پی، شعیہ، پشتون، سندی مسنگ پرسنز گلانی نیمگ ءَ چہ ادار چار ءَ کراچی گورا کبرستان ءَ بگر تاں کراچی پریس کلب ءَ پیدل روانک کشگ ءِ جار پرینگ بوتگ اَنت –

چاگردی ترامجاھاں بیگواھیں مردمانی کھول، بیگواھیں ڈاکٹر دین محمد زھگ سمی بلوچ، بیگواھیں شبیر بلوچ ءِ گوھار سیما بلوچ، بیگواھیں راشد ھسین ءِ مات ءُ ایڈوکیٹ محب آزاد لغاری ءُ سندھی ایکٹوسٹ دگہ مردماں وتی شنگ کرتگیں تامری درشان ءِ تہ ءَ سی ٹی ڈی نیمگ ءَ چہ زورانسری آوار جنگ ءُ بیگواھیں بوتگیں مردماں دروگیں میڑ ءِ نام ءَ جنگ ءُ سی اگست بزاں مروچی زورانسری آوار جنی ءِ میان استمانی روچ ءِ روانک ءِ درگت ءَ چہ سیاسی ءُ چاگردی دگہ پھناتاں سیادی داروکیں مردماں بھر زورگ ءِ لوٹ کتگ –

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ ایرانی آمیدگس ءِ پرمان ءَ یک بلوچ بندیگے پاھو دیگ بیتگ –

ھالانی تہ ءَ گوشگ بیتگ کہ دزاپ ءِ مزنیں زندان ءَ یک مردمے ایرانی آمیدگس ءَ پاھو داتگ –

پاھو دیگ بیتگیں مردم ءِ پجاع منصور کھرازئی ءِ نام ءَ زانگ بیتگ –

ھالانی تہ ءَ گوشگ بیتگ کہ منصور گوست ءَ ایرانی لشکر ءَ وتی ناکو ءِ کوش ءِ بھتام ءَ دزگیر کرتگ ءُ زندانی کرتگ –

منصور ءِ ٹک ءَ وت ماں وت ءَ جیڑہ ھلاس نہ کرتگ ءُ چریشی ءَ ایرانی آمیدگس ءَ منصور ءِ سر ءَ پاھو ءِ پرمان کرتگ ءُ آ گوستگیں روچ ءَ روکپتی بلوچستان ءِ بنجاھی شھر زاھدان ءَ پاھو دیگ بیتگ –

ایران ءِ اے کانون ءِ سر ءَ انسانی ھکانی گل ھم ایراد گرگ ءَ اَنت ءُ گوشگ ءَ اَنت ایران باید چوش مردماں پاھو مہ دنت بلکیں آیاں موہ دیگ بہ بیت اِنت –

گوستگیں وھداں ایرانی آمیدگس ءَ بازیں مردمے ھمے وڑ ءَ پاھو داتگ اَنت کہ آیانی سر ءَ جتا جتائیں بھتامانی سر ءَ پاھو داتگ اَنت –

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں چِل ءُ سَے دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سیءُ یک ھزار دوسد ءُ پنجاہ ءُ دو ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں یکشمبے ءَ بلوچستان ءِ شش دمگاں چِل ءُ سَے مردماں کرونا نادراھی پدر بوتگ، کہ آھانی تہ ءَ درساں گیش بلوچستان ءِ دمگ بارکھان ءَ پانزدہ، شال ءَ سینزدہ ،مستونگ ءَ نھ، تربت ،گوادر، پنجگور ءَ دو دو، مردماں کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار دوسد ءُ پنجاہ ءُ دو ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ گوستگیں روچ ءَ ھپتاد ءُ سَے مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ھزار ءُ چار سد ءُ یک انت –

رپورٹ ءِ رِد ءَ بلوچستان ءِ تہ ءَ گوستگیں روچ ءَ ھشت سد ءُ سِی ءُ پنچ مردمانی کرونا ٹیسٹ کنگ بوتگ اَنت، کہ آھانی تہ ءَ چِل ءُ سَے مردماں کرونا نادراھی پدر بوتگ ءُ وھدیکہ ھپتاد ءُ دو مردمانی رپورٹ دنیگت ءَ نہ اتکگ انت-

رپورٹ ءِ رِد ءَ بلوچستان ءِ تہ ءَ اے وھدی کرونا وائرس ءِ پنچ سد ءُ سینزدہ نادراہ ھست انت کہ شانزدہ نادراہ بلوچستان ءِ نادراھجاہ الاج کنگ ءَ انت ءُ آھانی تہ ءَ ھپت نادراہ ھائی فلو آکسیجن ءَ اِلاج ءَ انت –

بلوچستان ءَ کرونا وائرس ءِ پوزٹیو کیسانی گیشی پنچ ٹک پانزدہ درسد بوتگ تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ سِی ءُ ھشت مردم بیران بوتگ انت-

بلوچستان ءِ تیاب دپی شھر گوادر ءَ یکشمبے روچ ءَ بیگواھیں مردمانی یل کنائینگ ءِ ھاتر ءَ زھرشانی کنگ بوتگ-

آل پارٹیز گوادر ءِ جار سر ءَ ماھیگر یکجاھی ءِ بیگواہ کنگ بوتگیں جنرل سیکرٹری یونس انور ءَ ھوار گوادر ءَ بیگواہ بوتگیں دگہ ورنایانی زروانسری آوار جنی ءِ بگیری ءَ شھر ءِ دزبندیں جاگہ زھرشانی کنگ بوتگ-

اے زھرشانی ءَ گوادر ءِ سیاسی ءُ نیکراھی ٹولیانی اھوالکاراں ماھیگر یکجاھی ءِ جنرل سیکرٹری انور یونس بلوچ ءُ گوستگیں روچاں دگہ بیگواہ کنگ بوتگیں ورنایانی زورانسری آوار جنی ءَ ایر جن ایں ءُ اشاں زوت دیم ءِ آرگ ءِ لوٹ کتگ-

آھاں گْوشتگ کہ پھازوکی ءِ نام ءِ سر ءَ بلوچ دوداں ادارہ لگتمال کنگ ءَ اِنت شپ ءِ تھاری ءَ مردمانی لوگانی کمپان ءَ دور کن اَنت ءُ لوگانی تہ ءَ پُتر اَنت آھاں بیگواہ کن اَنت –

آھاں دیمتر ءَ گْوشتگ کہ اگاں آ اے ریاست ءِ کُتکار اَنت گُڑا اھاں راھبندانی وڑ ءُ پیم ءَ پولیس ءِ دست ءَ دزگیر بہ کنائین اَنت اے وڑ دُزانی رنگ ءَ مردمانی چست کنگ ءَ ھچ راہ ءُ راھبندانی تہ ءَ نیست اِنت-

زھرشانی کنوکاں گْوشتگ کہ ما دیمروئی ءِ بگیر نہ اِنت بلے اے سی پیک مئے چُکانی ھونانی سر ءَ جوڑ بوگ ءَ اِنت اے مارا کبول نہ اِنت –

آیانی گْوشگ اِنت کہ گوادر چاریں نیمگاں جتائیں پھازوکی پوج ءِ ادارہ اوشتارینتگ اَنت ءُ آ وتی بے سوبے ءِ چیردیگ ءَ لَس مھلوک تکانسر کنگ ءَ اَنت-

آل پارٹیز رھشوناں بیگواھیں ماھیگر رھشون ءَ ھوار گوادر ءَ دگہ بیگواہ بوتگیں مردمانی یل کنائینگ ءِ لوٹ کتگ ءُ گْوشتگ کہ اشاں زوت دیم بیار اِت ءُ مردمانی ننگ ءُ ناموس ءُ دودانی لگتمال کنگ ءَ ھیال بہ کن اَنت-

سر بیتگیں ھالانی رد ءَ بلوچستان ءِ دمگ پنجگور ءَ سلاہ بندیں مردمانی تیرگواری ءَ پولیس کارمندے بیران بیتگ –

گیشیں ھالانی رد ءَ پنجگور ءِ دمگ تسپ ءَ پسکول کور ءَ سلاہ بندیں مردماں تیرگواری کرتگ ءُ چریشی ءَ پولیس کارمندے بیران بیتگ –

بیران بیتگیں پولیس کارمند ءِ پجار افتاف بلوچ ءِ نام ءَ زانگ بیتگ ءُ پولیس کارمند ڈی پی او کارگس ءَ کار ءَ بیتگ –

ھمے وڑ ءَ پنجگور چتکان ٹرمینل ءِ ھند ءَ یک پَسلے ءَ جونے دزکپتگ –

ھالانی تہ ءَ گوشگ بیتگ کہ چتکان ءَ ٹرمینل ھند ءَ یک پسلے ءَ جونے دزکپتگ ءُ جون پولیس ءَ چِست کرتگ ءُ نادراہ جاہ ءَ پجار ءِ ھاتر ءَ برتگ –

میان استمانی ادارھانی ھچ نگوشگ ءَ بلوچستان کوش جاہ ءِ جوڑ بوتگ- ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ بیست ءُ سَے روچ سرجم بوتگ – ورکرز پاٹی ءِ سوبائی کلانیں سروک ضیاء بھٹی ءُ آئی ءِ دگہ سنگتاں بنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ گوشتگ کہ پاکستانی ایجنسی، ایف سی ءُ آئی ءِ جوڑ کرتگیں کشندہ ٹولی ءِ دستاں پُرایمنیں جھد کنوکیں ورناہ، کماش، زالبول ءُ سیاسی باسکانی ٹارگٹ کلنگ زورانسری آوار جنی ءُ زانگولیں جونانی دور دیگ ءِ رِد یکشل ءَ برجاہ انت ءُ آئی ءِ تہ ءَ گیشی آرگ بوتگ –

آئی ءِ گوشگ ات کہ وتگڑیں سرکار بلوچستان ءِ تہ ءَ گامگیج ھچ جاہ گندگ نہ بیت بلے ھو سرکار ءِ نام ءَ پوج کار انت ءُ بیگواھیں مردماں سی ٹی ڈی دروگیں میڑ ءِ نام ءَ شھید کنگ ءَ انت –

آئی ءِ گوشگ ات کہ ریاستی کشندہ ٹولی بلوچ ورنایاں آوار جنت ءُ کُش ایت ءُ وتی ھاکماں چہ داد ءُ زر گپت اِنت –

ماما قدیر بلوچ ءِ گوشگ ات کہ بلوچستان ءِ تہ ءَ بنگلہ دیش ءِ راجدپتر نوک کنگ بوھگ انت کہ آئی بیمناکیں رزلٹ ءِ درکیت انت –

آئی ءِ گوشگ ات کہ بلوچ سیاسی باسکانی زورانسری آوار جنی، کُشگ ءُ بلوچستان ءِ چپ ءُ چاگرداں لشکر کشی بلوچ ءِ زِر ءُ مال ءُ مڈیانی پُلگ ءَ گیشی آرگ انت –

ماما قدیر بلوچ ءِ گوشگ ات کہ پیش ءَ چہ آوار جتگیں سیاسی باسکاں دروگیں میڑ ءِ نام ءَ شھید کنگ ریاستی زوراکی ءُ ترس ءِ تہ ءَ گیشی آرگی انت –

آئی ءَ یکرندے پد ءَ میان استمانی انسانی ھکانی گلاں چہ بلوچستان ءِ تہ ءَ ریاستی زوراکی ءِ بگیری ءَ توار چست کنگ ءِ لوٹ کتگ ءُ گوشتگ کہ میاں استمانی ادارہ ءُ انسانی ھکانی ادارھانی ھچ نگوشگ ءَ بلوچستان کوش جاہ ءِ جوڑ بوتگ –

شمبے ءَ یمن ءِ اُستان لحج ءَ لشکری بنجلے ءِ سر ءَ بیتگیں ارشاں بازیں کساساں لشکری بیران ءُ زدگ بیتگ اَنت –

یمن ءِ زرباری لشکر ءِ جارکش مھمد النقیب ءَ گُشتگ کک حوثیاں الاناد لشکری بنجل ءِ سر ءَ مسلح ڈرون ءُ بیلسٹک میزائل کارمرد کتگ اَنت –

النقیب ءَ گُشتگ کہ سِی ءَ چہ چِل پوجی بیران ءُ کم چہ کم شست زدگ بیتگ اَنت، بیرانیانی کچ گیش بوت کن اَنت پرچاکہ کمکی کارمند تنی وھدی پَٹ ءُ پول کنگ ءَ اَنت –

نادراہ جاہ ءِ رد ءَ لاج اُستان ءَ بنجاھی نادراہ جاہ ءَ بازیں لاش آرگ بیتگ اَنت چریشانی شانزدہ دگہ زدگ اَنت – اشی ءِ سرپدی نیست اِنت کہ بیران بیتگینانی تہ ءَ لس شھری ھوار اَنت –

جھمننداں گشتگ کہ الاناد ءِ دمگ ءَ بازیں بمب تراک بیتگ اَنت چریشانی توار دور دور ءَ اشکنگ بیتگ اَنت کہ زرباری بندن ءِ شھر عدن ءَ ھپتاد کیلو میٹر دوری ءَ گوریچانی نیمگ ءَ چِل ءُ سَے میل ءِ نیمگ ءَ اِنت –

شھر ءِ تائز ءِ دگہ جھمننداں گشتگ کہ شھر ءَ حوثینانی دستیگ کنگ ءَ رودراتکی نیمگ ءَ لانچرانی بیلسٹک میزائلانی توار اشکنگ بیتگ اَنت –

زانگ بہ بیت ات اُرش ھنچیں وھدے ءَ بیرگ اَنت کہ سعودی ءِ چیردستی ءَ ھمسنتی ءُ حوثینانی میان ءَ ایمنی ءِ گپ ءُ تران ءُ میان اُستمان ءُ امریکہ ءِ پلامرزی، دوئیں نیمگاں بے سوبی ءَ پد دارگ بیتگ – گپ ءُ تران حوثینانی دستیگیں بندن ءُ صنعاء ءِ بالی پَٹ ءَ سلاہ بندی ءِ گامگیج بیتگ اَنت چریشی ءِ مٹ ءَ ایران ءَ ھواریں ٹولی ءِ نیمگ ءَ جنگ بندی ءِ گپ ءُ ترانانی مسام بیتگ اَنت –

نبشتانک: پدائین سربُلند بلوچ

نبشتہ کار: نرگِس بلوچ

دی بلوچستان پوسٹ

شھید پِدائین سنگت سر بلند بلوچ سال دوهزار ءَ 13تاریک نُھمی ماہ ءَ پَروم پنجگور ءَ ودی بوتگ رسر بلند ءَ ہپتُمی سال ءَ the oasis private school panjgur ءَ وانگ بندات کتگ سر بلند ءَ وانَگ ءِ سک باز شوک بوتگ ھر وھد ھمے گپ ئِے جتگ کہ من واناں ءُ پہ بلوچ ءُ بلوچستان ءَ کار کناں۔ سر بلند ءَ 17 سال اَت نُھمی جمائت ءَ وانَگ ءَ اَت کہ آئی ءَ وتی بلوچ براتانی بیگواھی ءُ تنگ دستی، گُژن ءُ بزّگی ءِ گم وتی نازُرکیں کوپگاں زُرت سک باز جیڑ اِت پہ وتی راج ءَ کہ چُتور غُلامیں زند گوازینگ بوھگ ءَ اِنت اے جیڑگ ءُ وسواس ءَ آئی ءَ را بے تاهیر کُت ءُ راجی مارشت ءَ پہ جهد کنگ ءَ سکین دات سر بلند اُمر ءُ بالاد ءَ کسان اَت اے وھد آئی ءِ لیب ءُ گوازی ءِ وھد اَت بلے آئی ءَ راج ءِ گم ءُ غلامی ءِ تاھیر کنَگ ءَ اَت چہ وتی زند ءَ گیش آئی ءَ وتی زِر ءُ زمین ءِ واستا جیڑ اِت ءُ سِلاہ بند بوت پہ زِر ءُ زمین ءِ پھازگ ءَ کوھاں رپت۔

من جیڑ اں کہ چتور کسانوکیں سر بلند چہ وتی کھول ءِ مردم مات، پت، برات، گوھار، دوست، سنگت ءُ سیاداں چہ وت ءَ گِستہ کُت بلے اے هما راجی مارشت انت کہ آئی ءَ چہ درساں گیش وتی راج ءُ گلزمین ءِ دوستی ءَ پہ اے پاکیں راه ءَ جُنزگ ءِ توکل دات-

دنیا ءِ وشّی، واھشت ءُ ارمان چو انوگیں ایندگہ نوجوانانی پیم ءَ شوک ءُ سینگار، اِشک ءُ آشکی، سیل ءُ گردگ نہ کُت ءُ آئی ءِ مستریں ھُب ءُ واھگ وانَگ اَت آ ھم کُربان کُت سر بلند سکیں دل سپا ءُ وش تَب ایں مردمے اَت گوں ہر کس ءَ یک ءُ تپاک اَت من شھید ءِ توسیپ ءُ ستا ءَ نکناں چیاکہ شہید منی توسیپ ءُ ستایانی وازمندگ نہ اِنت سر بلند ءَ وتی سر دنیا ءُ جھان ءِ دیم ءَ بلند کت گڈی ءَ من وتی ہر دوئیں دستاں بُرز کناں ءُ کُل شھیدانی ماتاں گوں اوار شھید سر بلند ءِ مات ءَ سد سلام گشاں سُهرچکیں دروت کُلیں شهیداں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔