بلوچستان ءِ دمگ پنجگور ھدابادان میتگ ءَ جنکانی ھاتر ءَ “بی بی عصمت ملک کتاب جاہ” پچ کنگ بوتگ کتاب جاہ ءِ دیمدرائی ڈپٹی کمشنر عبدالرزاق ساسولی کتگ –

دیمدرائی مراگش ءَ سٹلمنٹ آفیسر یونس سنجرانی، اسسٹنٹ کمشنر برکت بلوچ، دمگی ایجوکیشن آفیسر عابد بلوچ ءُ محمد جان بلوچ ءَ بھر زرتگ –

دیمدرائی ءَ مراگش ءَ نودربراں گوں تران کنان ءَ عبدالرزاق ساسولی گوشگ ات کہ کتاب جاہ ءَ چہ زانت ءُ زانشت ءِ دیمروئی ءَ گیشی بیت اِنت ءُ چُک کتابانی نیمگ ءَ دلگوش دئے اَنت – پنجگور ءِ تہ ءَ زانت ءُ زانشت آرگ مئے اولی واھشت انت ءُ اے وانگجاہ ھمے جھد ءِ برورد انت – اشی ءِ تہ ءَ گیشتر کتاب ھم مان کنگ بیت انت تانکہ زھگ گیشتر وانگ ءِ نیمگ ءَ بیا انت –

آئی ءِ گوشگ ات کہ زانت ءُ زانشت راجانی دیمروئی اولی راہ انت چاگرد ءِ تہ ءَ کتابانی گوم ءَ نزیکی کنگ ءِ ھاتر ءَ مار ءَ درساں کار کنگ لوٹ ایت تانکہ مئے زھگانی تہ ءَ سنچ بئیت اِنت کتاباں چہ گستاء بوگ ءَ چاگرد ھرابی نیمگ ءَ رؤت – مئے زمہ واری انت کہ ما کتاب وانگی ارزشت بہ دئے ـ وانندھیں نودربراں لوٹ ایت جوانیں پگر ءَ گوں کتاب ءِ ارزشت ءَ وتی مکسد جوڑ بہ کن انت –

سربوتگیں ھالانی رِد ءَ مروچی بیگاھ ءِ وھد ءَ ناشناسیں سلاہ بندیں مردماں پاکستانی پوج ءِ پانگس ءِ سر ءَ اُرش کتگ –

اُرش آواران ءِ دمگ گشانگ ءَ برجاھیں پوجی پانگس ءِ سر ءَ بوتگ اُرش ءَ پاکستانی پوج ءَ جانی ءُ مالی تاوان رستگ ءُ سلاہ بندیں مردم دراھگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں مروچی پنچ شمبے ءِ بیگاھے ادار پنچ ءَ گشانگ پوجی پانگس ءِ سر ءَ دیرجنگیں، راکٹ ءُ دگہ وتکاریں سلاھانی گوم ءَ اُرش کُتگ –

جارکش ءَ گوشتگ کہ راکٹ گولہ پانگس ءِ تہ ءَ کپتگ انت چریشی ءَ زورگیریں پوج ءَ جانی ءُ مالی تاوان ءِ دیمپانی بوتگ –

گڈسر ءَ جارکش ءَ وتی درشان ءِ تہ ءَ گوشتگ زورگیریِ پوج ءِ سر ءَ مئے اُرش ایردستیں بلوچستان ءِ آجوئی ءَ تاں برجاہ مان انت –

بلوچستان ءِ دمگ پنجگور ءَ پاکستانی پوج ءُ چیریں ادارھانی کارمنداں دگہ یک ورنایے آوار جنگ ءَ پد بیگواہ کرتگ-

گرگ بیتگیں ورنا پوج ءَ پنجگور ءِ دمگ پروم کلیری ءَ دزگیر کنگ ءَ پد بیگواہ کرتگ کہ آئی ءِ پجار اھمد ء ھدا داد ءِ نام ءَ زانگ بیتگ –

کھول ءَ دی بلوچستان پوسٹ ءَ گوں گپ کنان ءَ اے گپ ءِ راستی کرتگ –

کھول ءِ رد ءَ یک ماھے ءِ وھد ءَ مئے کھول ءِ تہ ءَ اے سیمی ورناہ اِنت کہ پوج ءَ دزگیر کنگ ءَ پد بیگواہ کرتگ کہ اشی ءَ پیسر پروم نوکبند ءَ یک لوگے ءَ بیڑئے ءِ وھد ءَ فیصل ء دوست مھمد ءُ باسد ء ھالد دزگیر کنگ ءَ پد بیگواہ کنگ بیتگ اَنت کہ تنی وھدی بیگواہ اَنت –

زانگ بہ بیت بلوچستان ءَ بیگواھیانی درچ یکشل ءَ برجاہ اَنت ھمے ماہ ءَ پوج ءَ بلوچستان ءِ جتا جتائیں جاھاں بازیں کچے ءَ مردم دزگیر کنگ ءَ پد بیگواہ کرتگ اَنت –

گوستگیں روچاں بلوچ نیشنل مومنٹ ءِ انفارمیشن سیکرٹری دلمراد بلوچ ءَ انسانی ھکانی درگت ءَ جون ءِ ماہ ءِ رپورٹ ءِ شنگ کرتگ اَت کہ جون ءِ ماہ ءَ پنجاہ ءَ گیش فوجی آپریشناں نوزدہ مردم کشگ ءُ چِل ءُ ھپت مردم بیگواہ کہ بازیں کچے ءَ زالبول جنسی زیادتی ءِ نشانگ بازیں کچے ءَ لوگ ماندارگ ءُ سدانی کچ ءَ پس ءُ گوک برگ بیتگ اَنت –

گوستگیں روچ ءَ سلاہ بندیں مردماں بولان ءِ دمگ جعفری ءَ پاکستانی پوج ءِ یک پوسٹے ءِ واستا آب بروکیں ٹینکر ءِ سر ءَ اُرش کرتگ اَت – اُرش ءَ گاڑی ءَ تاوان رس اِتگ اَت –

دومی نیمگ ءَ اے اُرش ءِ زمہ واری بلوچستان ءِ آجوئی ءِ واستا جنگ کنوکیں گل بی ایل اے ءِ جارکش جیئند بلوچ ءَ منّ اِتگ –

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گُشتگ کہ گوستگیں روچ ءَ جعفری پوسٹ ءِ واستا آب بروکیں ٹینکر بمبے ءِ نشانگ کتگ –

آئی ءَ گُشتگ کہ چرے اُرش ءَ ٹینکر ءَ تاوان بیتگ ءُ بی ایل اے اُرش ءِ زمہ واری ءَ منّ اِیت اِنت –

جارکش ءَ گُشتگ کہ بی ایل اے وڑیں اُرش برجاہ بنت ءُ اشی ءَ ستک کنت مول ءُ مرادانی رد ءَ دشمن ءِ سر ءَ اُرش برجاہ بنت –

گوستگیں روچ ءَ میر علی محمد غلامانی وتی کھول ءِ ھمراھی ءَ ھزادر پریس کلب ءَ تران کنان ءَ گوشتگ کہ سید شجاع الحق ءِ گور ءَ ما وتی زر لوٹ اتگ انت گڑا سید شجاع الحق شاہ ءَ وت مردم دیم داتگ انت کہ مار ءَ وھد بہ دئے اِت شجاع ءَ ھما کہ ھاسیں منوگر انت آ وت مئے گِس ءَ اتکگ انت مِنت ءِ کتگ دگہ مردمانی ھم وام ھست انت ما گُشت کہ اگاں مردم شمار ءَ یک ماھے مھلت دئے اَنت من شمار ءَ دو ماہ ءِ دیاں اگاں مردم چار ماہ دیاں من ھشت ماہ دیاں آئی ءَ چہ ابید یک سالے ءِ پرگوزگ ءَ گڑا ما زرانی گرگ ءَ شُتگ ایں آئی ءَ ھمے گوشتگ کہ ناشرکار اتکگ انت مدرسہ ءں تہ ءَ اُرش ءَ اتکگ انت ھمے ھاتر ءَ ما اے کانفرنس کُتگ کہ ما بے گناھیں ءُ اے مئے ھک انت ما ھچ وڑیں ناشر کار نہ اِنت ءُ ناکہ چشیں گلاں گوں سیادی داریں-

آھانی گوشگ ات کہ مئے دمگ ھزدار ءَ آئی پیری مرید سک باز انت کہ گوں ھمائی ءَ ھوار انت ما وتی دمگ ءِ مردم کماش ھر یکے ءِ گوم ءَ منت کُتگ گڈی ءَ ما آئی ءِ لوگ ءَ شتگ ھمائی اجازت ءَ چہ ھمے پیسلہ گپتگ ءُ ھمائی ءِ مرزی ءَ مرید ھم ھمود ءَ نندوک بوتگ انت آئی ءَ وتی دستاں گوں لکتگ کہ اے ماہ ءَ انچو کِست دنت بلے ھپتی ھشتمی ماہ گوستگ بلے دیگ ءَ تیار نہ اِنت-

آ تھنا مئے وامدار نہ انت دگہ بازیں مردمانی ھم وامدار انت بندات ءَ کہ کاروبار بوگ ءَ ات مئے ھم زر دیان کتاں بلے گیشتر وامدار بوت گڑا یکبرے وت ءَ نادراہ کت کہ من ءَ پالج انت نادراھائی ءِ میان ءَ من وت شتگ ءُ آئی ءِ جند ءِ لوگ ءَ انسانیت ھاتر ءَ دہ لک کلدار دستی داتگ کہ تو لاچار ءِ وتی الاج ءَ بہ کن تئی سر ءَ پیسر چل پنجاہ لک ھست انت اے ھم انچوک نہ اَنت آئی ءِ گوشگ ات کہ یکبرے من ءَ خان پوری ءِ ھاتر ءَ گوشتگ ئِے کہ مئےچل پنجاہ ءِ مرید انت کہ اشاں ما ھر ماہ ھزار دوھزار گریں ھرماہ کِست ءِ سر ءَ ترا ما پنجاہ ھزار دئیں کِست ءِ سر ءَ ما ھمے ھاتر ءَ زر نہ زرتگ انت کہ زر تھنا مئے نہ انت مردمانی انت مردم مار ءَ دیگی انت اے ھم مسام نبوتگ کہ کَے ھزار دنت کَے پنچ سد ءُ ما ھر ماہ چہ کے ءَ زراں بگریں-

آھانی گوشگ ات مئے وتی لھتے لاچاری ھست انت کہ شمئے اھوالکارانی دیم ءَ ایر اش کنیں کہ ظہورالحق شاہ، شجاع الحق شاہ ءُ فرید شاہ شست ءُ دو لک ءُ پنجاہ ھزار ءَ مئے وامدار انت کہ آھانی دیگ ءِ ھاتر ءَ اے مردم مرچی باند ءَ کتگ ءُ دانکہ نوں اے وامداری چہ انکاری انت گوستگیں بازیں وھداں اے مردم وامدار انت ءُ ما وت ءُ دمگی سرکماشانی کمک ءَ سمجائینگ ءِ ھر وڑیں جھد کتگ ءُ سردار مراد خان شیخ ءُ میر شفیق گچکی ءُ دگہ بازیں ازت داریں مردماں ھم گوشتگ کہ اشاں بگوش ایت مئے زراں بہ دئے اَنت – بنداتی ءَ شجاع الحق شاہ ءَ لھتے مردم دیم داتگ کہ ما مردمانی ازت کتگ ءُ وام کِست ءِ سر ءَ کتگ ءُ تاکہ دیگ ءَ ارزانی بہ بیت بلے ھچ وڑیں پائدگ نبوتگ- نوں اے مردم بدماشی کنگ ءَ انت ھر وھد ءَ کہ ما وتی زراں لوٹیں گڑا مئے سر ءَ ناشرکاری ءِ الزام جن انت ءُ مار ءَ بیھار دیگ بیت اِنت –

آھانی گوشگ ات کہ ما وتی ھک ھاتر ءَ دمگی پھازدار ءُ پولیس ءِ گور ءَ وتی ارز برتگ وتی لاچاری آھاں گوشتگ چہ وتی ھک ءِ گرگے لوٹ کتگ بلے انگت ھچ کنگ نبوتگ – اے مردماں وتی ھر کجا اشانی دست بوتگ اشاں مئے ارزی سرد ھانہ کتگ – لاچاری ءَ ما پیسر ءَ ھم یک پریس کانفرنسے کتگ چہ آئی ءَ پد دمگ ھیرھواھاں مئے گوم ءَ ھال ءُ اھوال کتگ ءُ مئے ھک دیگ ءں سدکی کنائینتگ – بلے اے مردماں اشانی ھم ھچ گپ گوش نداشتگ بلکیں آھاں دُز ءِ ھما رپک کارمرز کتگ ءُ واتر مار ءَ بیھار داتگ ءُ ھچ نگوشگ ءِ جھد کنگ بوتگ ءُ وتی مریدانی دست ءَ مار ءَ کُشگ ءِ ھم بیھار دیگ بوتگ بلے ما وتی ھک ءِ پچ گرگ ءَ ھچ وڑ ءَ پد کنز نہ بہ ایں –

آھانی گوشگ ات کہ نوں شمئے اھوالکار ءُ زالبولانی ھواری ءَدو روچ ءَ زھرشانی کنیں ءُ اشی ءَ پد ھمے مردمانی شجاع الحق ءِ مزھبی جلسہ ءَ ھم رؤئیں وتی زھرشانی ءَنبشتہ کنائینیں – اگاں مئے سر ءَ اُرش بوت یا مار ءَ تاوان دکگ بوت گڑا اشی ءِ زمہ دار شجاع الحق، ظہور شاہ فرید شاہ انت –

آھانی گوشگ ات کہ زراں آ اے وڑ وامدار بوتگ انت کہ مئے گاڑی ءِ کاروبار بوتگ کہ ما کابلی گاڑی آرتگ زیرگ ءُ بھا کنگ ءَ آ شست ءُ دو لک ءَ وامدار بوتگ گڑا مار ءَ جواب داتگ ئِے –
آئی ءِ گوشگ ات کہ کانفرنس ءَ پیش ما گپ جتگ ات کہ دمگ ءِ کماش ءُ سروکاً مئے میان ءَ اتکگ انت مار ءَ چہ وھد ءِ لوٹ اتگ ما وھد داتگ گپ جتگ بلے انگت مار ءَ زرانی ھچ وڑیں آسر ءَ نہ رس اتگ – ما دیمتر ءَ پوسٹر جوڑ کنیں ءُ روانک کشیں ءُ جلوس دیم ماہ ءِ سَے رمس بیت انت گڑا ما وتی شرپ ءُ ازت ءَ زوریں وتی ھک ءِ ھاتر ءَ زھرشانی کنیں – گڈسر ءَ آھانی گوشگ ات کہ اے کاروبار انت مردم مئے گِس ءَ کائنت مار ءَ زاہ ءُ بد کناں کہ مئے زراں بہ دئے –

نبشتانک: مئے ایردستی پدمنتگی ءَ را تژن جنت

نبشتہ کار: سیپ بلوچ

دی بلوچستان پوسٹ

پدمنتگی چوناها همک راجانی تہ ءَ هست ، بلے تپاک اوں هست آنت ، اگاں ما وتی گْوست ءَ پچاریں ما چہ بن ءَ ایردستیں راج ءِ ایں ، بلے اهدی مردم گْوش اَنت کہ ما هلکے ءِ مردماں یکیں چات ءَ آپ کش اتگ ءُ وارتگ بلے مرچی ما وتی ربیدگ ءَ پچاریں، دو برات یکیں چات ءَ آپ وْرگ ءَ نہ اِنت ، ایشی ءِ مول مراد ایش اِنت کہ ما گٌوں دنیا ءِ هساب ءَ وتی دود مٹنیتگ انت بلے مارا گیشتر ناتپاکی چہ گْوازنگ ءَ همراه اِنت-

بلے ما اوبادگ ءُ پدریچ هما راج ئِیگ ایں پرچا آ بلوچان پورهیں هلک ءِ اگاں بیتگ یکیں ڈگار ءَ کار اِش کتگ نان اش وارتگ یکیں هَش ءَ دان اش ڈل اِتگ وتی روچ اش تیلانک داتگ انت، ءُ اگاں کسے ءِ بارکش ءُ سواری ءُ مهری اگاں ساربان ءَ نہ اتکگاں یکے دومی ءَ گوں تپاکی ءَ وتی روچ اش تیلانک داتگ انت ، دنیا ءِ دیم ءَ یک زندگیں راج ءِ نام ءِ پدر اِنت کہ بلوچ اِنت ءُ آ بلوچ ما ءُ شما اِنت –

چوناها ما بلوچ زندگیں راجیں، بلے پرچا وت ءَ را ایردستی ءُ پدمنتگی ءِ امبار ءَ کتگ ؟ اگاں دْرور یک براتے دست روت دومی یک جاهے بلے اول گْوش ایت آ وتی ءَ وت زانت من وتی کار ءَ شر کن آں ایشی چہ مراد ایش اِنت اے بندات ءَ ناتپاکی گْوشگ بیت ءُ دومی وتی برات ءِ سر ءَ وت پرستی ءُ ایر دیگ ءُ دیم ءَ آیگ نیلگ انت ، وهد ئے کہ یک ایردستیں راجے ناتپاک بیت آئی ءَ را بگیر تپاکی ءَ هچ الاج نیست پہ دیمروئی ءَ-

زندمان ءِ بازیں جیڑه ءُ جنجال ءَ نوں مارا گٹ ءَ رسینتگ بلے ما وتی ایردستی ءَ گوں انگت برات ءِ بوجیگ ءَ جمّازیں اگاں مرچی من تاکت ور باں منی برات بے وارس ءُ ناکس اِنت جاهے نادراه جاهے کپتگ جاهے زندانے ءُ یا کہ زندگی ءِ کجام دردے هنکین ءَ کپتگ اگاں من تو آئی ءَ پہ نیستی ءُ نادست رسی ءُ نابودی دور بہ دئیں گڑا منی ءُ تئی تہ ءَ ایردستی ءُ پدمتنگی هچ ایر رواه نہ بیت چاهے من تو کجام تاکت ءُ دولت ءِ واهند بہ بہ ایں-

مئے رهشونی ءُ سروکی رپتگیں ءُ بیگواهیں سراں هزار بر کتگ مارا ایردستی ءُ پدمنتگی ءِ هزار راهے در پیش داشتگ بلے مرچی منی اگاں دست دپا روت من گْوشاں دومی همساهگ وتی ءَ وت زانت ، گڑا ایشی تہ ءَ منی ءُ تئی رهشونانی رهشونی ءِ هچ کسہ ءَ جاه نہ کتگ اسل گپ ایش اِنت من تو وتی رهشون ءُ راجی سروک پہ دیم ءَ تران کنگ ءَ اش کتگ انت املی جیڑه هچ گیش ءُ گیوار نہ کتگ-

مرچی من تو وتی جیڑھاں پچاریں من تو بلوچ گْوشگ بہ ایں من تو وتی جیڑه ءَ بلوچ ءِ گوش ایں بلے هما وهد ءَ من تو گار ءُ بیگواه کنگ بہ ایں یا کہ کُشگ ءُ شهید کنگ ءُ دور دیگ بہ ایں، اگاں تپاکی مرچی منی ءُ تئی تہ ءَ مہ ایت ، منی تئی آؤکیں پدریچ اچ من ءُ اچا شما چہ نابود ءُنالائک تر بیت چاهے پورهیں دنیا ءَ بوان ایت-

تپاکی ءُ یک دستی منی ءُ تئی راج ءَ ٹوهینت کت کنت بلے هنچو کہ ما وتی تہ ءَ یکمشتی بیار ایں من تو وتی برات ءِ دوزواه بہ بہ ایں، ءُ وتی پدمنتگیں همساهگ ءُ مھلوک ءَ وتی پاداں گوں بیاریں –
ْ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس ایکشن کمیٹی ءِ رھشوناں ھزدار پریس کلب ءَ گپ ءُ تران کنان ءَ گْوشتگ کہ بلوچستان ءَ وانگی نزام مزنیں وڑے ءَ ترسناک اِنت ءُ جوانیں وانگی ادارہ کم کچ ءَ ھست اَنت-

آیاں گْوشتگ کہ بلوچستان ءَ وانگی ادارھانی نہ بوگ ءِ سبب ءَ مزنیں کچے ءَ نودربر چہ وانگ ءَ زبھر اَنت –

بلوچستان ءِ جتائیں شھراں ھستیں وانگی ادارھاں بے راھبندی ءِ سبب ءَ نودربر جتائیں اڑ ءُ جنجالانی دیمپان اَنت ءُ انتزامہ بے راھبندی ءَ مدام نودربرانی دیم ءَ اوشتوک اِنت-

آیانی گْوشگ اِنت کہ بلوچستان ءَ اود ءَ وانگی ادارہ نہ بوگ ءُ اود ءَ انجینئرنگ ادارہ کم کچ ءَ ھست اَنت ءُ بلوچستان “شھدربرجاہ آف انجینئرنگ اینڈ ٹیکنالوجی” خضدار ءَ ھم یکیں جاھے وانگی ادارہ ءَ کنگ بیت –

بلوچستان یونیورسٹی آف انجینئرنگ اینڈ خضدار کہ بلوچستان ءِ مستریں انجینئرنگ یونیورسٹی زانگ بیت سرجمیں بلوچستان ءَ نودبر ٹیکنیکل ءُ انجینئرنگ ءِ پڑ ءَ ھوار بوگ ءِ ھاتر ءَ شھدربرجاہ ءَ رو اَنت- سرجمیں بلوچستان ءَ نودربر وانگی تُن ءِ پروشوک یکیں وانگی ادارہ ءَ گوستگیں بازیں مدتے ءَ انتظامیہ بے راھبندی دیمپان اِنت چریشی ءِ آسر ءَ نودربر جتائیں اَڑ ءُ جنجلانی دیمپان اَت-

راھشوناں گوشتگ کہ شھدربرجاہ ءَ انتزامیہ ءِ بے راھبندی ءِ سبب ءَ مزنیں اوشتے ءَ چہ نودربر ڈاٹریکٹریٹ اسکالرشپ ءَ چہ زبھر اَنت-

بلوچستان کہ آ ڈیھ ءِ اسر کپتگیں استان ءَ چہ زانگ بیت ءُ ھمود ءَ ھزاراں نودربر چہ مالی جاوراں چہ نزور بوگ ءِ سبب جتائیں شھدربرجاھاں اسکالرشپ ءِ ھاتر ءَ سالانی داکلہ زور اَنت – نودربرانی وانگی مدامی چارتگ ءُ ھکومت ءِ نیمگ ءَ چہ “یونیورسٹی آف انجینئرنگ اینڈ ٹیکنالوجی خضدار ” نودربرانی واست ءَ ڈائریکٹریٹ اسکالرشپ ءِ درگت ءَ دیم ءَ آورتگ کہ گوستگیں سے سال ءَ چہ بند اِنت ءُ نودربر اسکالرشپ ءَ چہ زبھر اَنت-

ھکومتی باسک ءُ شھدربرجاہ بنشون ھمے جیڑہ ءَ چہ سرپد کنگ ءِ جھد کنگ بوتگ وھدیکہ ھچ وڑیں پروم ءِ سر ءَ نودبر دیھان دیگ نہ بوتگ اَنت-

بلوچستان یونیورسٹی آف انجینئرنگ اینڈ ٹیکنالوجی خضدار ءِ نودربراں اسکالرشپ ءَ چہ زبھر کنگ یک بلاھیں دردناکیں گپے – گوستگیں سے سال ءَ چہ نودربراں اسکالرشپ دیم ءَ نیارگ ءِ سبب ءَ بازیں کچے ءَ نودربرانی زندمان جنجلانی دیمپان کنگ بوگ ءَ اِنت – اے گپ ءُ ترانانی تہ ءَ ما ھکومت ءَ وھد ءُ وانگی پڑ ءَ ھواریں سرجمیں مردماں دزبندی کن ایں کہ نودبرانی جیڑہ ءَ جوانیں وڑے ءَ بہ چار اَنت زوت ءَ چہ زوت جیڑہ ءِ ھلاس کنگ گام چست بہ کن اَنت – اگاں نودربر اسکالرشپ دیم ءَ نیاورت ءُ بنشون نیمگ ءَ یکشلہ زھرشانی کنگ بیت گُڑا گل اے درگت ءَ چہ زھرشانی ءِ جمھوری وڑ ءُ پیم ءَ زور اِیت-

بلوچ یکجھتی کمیٹی ءَ رسانکدراں وتی شنگ کرتگیں درشان ءِ تہ ءَ بلوچ راج ءِ ھستی کماشیں رھشون ماما قدیر ءِ جاندراھی ءِ ھاتر ءَ چہ راج ءَ نیک دوائی کنگ ءِ لوٹ کتگ ءُ گوشتگ کہ بلوچستان ءُ سرجمیں پاکستان ءِ دگہ ایردستیں راجانی بیگواھیں مردمانی ھاتر ءَ جھد کنوکیں کِرد ماما قدیر بلوچ ءِ اے وھدی ناجوڑ انت آئی ءِ جاندراھی ءِ ھاتر ءَ راج ءَ نیک دوائی لوٹ کنیں –

آئی ءِ گوشتگ کہ ماما قدیر بلوچ راج ءِ کیمتی ءِ ھستی اِنت آئی ءَ تھنا اے گرانیں جھد ءِ بار ناں بلکیں وتی یک بچے ءِ شھیدی درد ھم اوپار کُتگ ءُ بلکیں آئی ءَ بلوچستان ءِ ھر بچ ءِ درد سگتگ – سرجمیں بلوچستان ءَ ھزاراں مات ءُ گوھاراں وتی ھرسیگیں چماں وتی پریات ماما قدیر ءِ کرا کُتگ انت گوستگیں سیزدہ سالاں ماما قدیر ءَ وتی جھد برجاہ داشتگ ھر وڑیں جاور ھالاں بیگواھیں مردمانی ھاتر ءَ جھد ءِ ھلاس کنگ ءَ چہ آ گیشتر مھکم ءُ یکجاہ کتگ –

جارکش ءَ گوشتگ کہ ماما قدیر ءَ ھر وڑیں جاورھالانی دیمپانی کتگ بلے بیگواھیں مردمانی یل کنائینگے جھد ءَ ھچ وڑ ءَ پدکنز نبوتگ – اے میان ءَ ماما قدیر بیھار دئیگ بوتگ آئی ھاموش کنگے ھاتر ءَ ور وڑیں پندل کنگ بوتگ بلکیں آئی ءِ ورنائیں بچ ءِ جون ھم آئی ءَ سر کنگ بیت بلے آئی ءِ حوسلہ انگت برز بالا ات اَنت ھر وڑیں جاورھالاں بنجل ءَ اتکگ – یک ھنچیں وھدے ھم اتکگ ات کہ آ بنجل ءِ نیمگ ءَ کس نہ شُتگ بلے اے وڑیں جاور ھالاں ھم ماما مایوس نہ بوتگ ءُ وتی جھد برجاہ داشتگ ئِے، آئی ءَ وتی زند ءِ تہ ءَ وتی گور ءَ بازیں مردم ھم دیستگ ءُ ھنچیں وھد ءَ آئی ءَ مردمے ھم نہ اتکگ بلے درسیں جاورھالاں آئی ءَ بیگواھیں مردمانی یل کنائینگ ءِ جھد برجاہ داشتگ – ماما ستاشان ءُ بے کساس ءَ یک جوان ءُ سسائیں یکشلیں جھد ءُ بازیں دیمونیانی سوب ءَ بازیں بیگواھیں مردماں وتی گِساں واتر بوتگ مروچی بلوچستان ھزاراں لوگانی تہ ءَ اتکگیں وشیانی پُشت ءَ ماما قدیر انت، آئی ءِ ھنچیں کِرد ءِ کہ پہ لپز درشان کنگ نہ بیت آئی ءَ وتی زند ءِ ھنچیں بھرے پہ راج ءَ ندرکتگ کہ اے اُمر ءَ انسان وتی لوگ ءُ مردمانی گور ءَ گوازینیت – ماما قدءر بلوچ راج ءِ گوھر کیمتی ءِ ھستی اِنت آئی ءِ درور بس آ وت اِنت –

گڈسر ءَ جارکش ءَ وتی درشان ءِ تہ ءَ گوشتگ کہ درسیں مردماں چہ لوٹ کنان کہ وتی گوھر کیمتی ءِ جاندراھی ءِ ھاتر ءَ دوا بہ کن اِت ماما قدیر ءِ جھد ءِ ستاشانی ھاتر ءَ چاگردی ترامجاھاں

MamaOurNationalPride

کمپئین جار ءَ جنیں ءُ بلوچستان ءُ پاکستان ءِ سرجمیں مردماں چہ لوٹ کنیں کہ پہ اے ازیمیں کردار ءِ ھاتر ءَ نیک دوائی ءَ ھوار ھوار آئی جھد ءِ ستاشانی ءَ بہ کن اِت-

بلوچستان ءِ دمگ کیچ ءِ ھند شاپک ءَ پاکستانی پوج ءَ یک ورنایے دزگیر کنگ ءَ پد پھمیانیں جاگے ءَ برتگ –

ھالانی تہ ءَ گوشگ بیتگ کہ گوستگیں دو شپاں پیسر پاکستانی پوج ءَ کیچ ءِ دمگ سری شاپک ءَ سید نامیں مردمے ءِ لوگ ءِ سر ءَ بیڑ برتگ ءُ اود ءَ سید ءِ ورنائیں بچ ھزار ھان آوار جتگ ءُ گوں برتگ –

زانگ بہ بیت بلوچستان ءَ آوار جنیانی درچ یکشل ءَ برجاہ اَنت ءُ سیاسی پاٹیانی گوشگ اِنت کہ بلوچستان ءَ اے وھد ءَ بازیں ھسابے ءَ مردم گرگ ءُ گار کنگ بیتگ اَنت –

گوستگیں دو روچانی تہ ءَ پنجگور ءَ دو کس پاکستانی پوج ءُ چیریں ادارھانی چیردستی ءَ جوڑ کرتگیں سلاہ بندیں گل ڈیتھ اسکواڈ ءَ آوار جتگ ءُ برتگ اَنت –