TBP Balochi

جھاؤ ءَ پاکستانی پوج ءِ تر ءُ گرد کنوکیں ٹولی ءِ سر ءَ اُرش کتگ دو کارمند کُشتگ اَنت- میجرگوھرام بلوچ

سربوتگیں ھالانی رِد ءَ آواران ءِ دمگ جھاؤ ءَ ناشناسیں سلاہ بندیں مردماں پاکستانی پوج ءِ پیادگ ءَ تر ءُ گرد کنوکیں ٹولی ءِ سر ءَ اُرش کتگ – اُرش جھاؤ ءِ دمگ بارگیں گزی ءَ پاکستانی پوج سر ءَ کنگ بوتگ دمگی مردمانی رد ءَ چریشی ءَ پوج ءَ جانی تاوان رس اتگ، سلاہ بندیں مردم درایگ ءُ روگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں یکشمبے ءِ سھب ءَ آواران ءِ دمگ جھاؤ ءَ بارگیں گزی ءِ ھند ءَ پیش ءَ چہ راہ بستگ ءُ پاکستانی پوج ءِ پیادگ ءَ تر ءُ گرد کنوکیں ٹولی ءِ سر ءَ راکٹ ءُ دگہ مزنیں سلاھانی گون ءَ اُرش کتگ، اُرش ءِ آسرا پاکستانی پوج ءِ دو کارمند مرتگ ءُ چار ٹپی بوتگ اَنت-

میجر گوھرام بلوچ ءَ گڈسر ءَ وتی درشان ءِ تہ ءَ گوشتگ کہ پاکستانی پوج ءِ سر ءَ اُرش بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ سر بیتگیں ھالانی رد ءَ شال ءِ دمگ چمن ءَ مروچی چارُمی روچ ءَ دگ گاڑیانی واھنداں بند کرتگ –

گیشیں ھالانی رد ءَ گاڑیانی واھندانی گوشگ اِنت کہ ایف سی ءَ پَٹ ءُ پول کرتگ ءُ مئے گاڑی گپتگ اَنت چریشی ءَ داں مئے گاڑی یلہ نہ بنت ما وتی پُر ایمنیں زھرشانی برجاہ داریں –

گوستگیں شپ ءَ انتزامیہ ءِ واکدار دگ ءِ پچ کنگ ءَ گپ ءُ تران ءَ شتگ اَنت بلے زھرشانی ءَ نندانک ءَ نشتگیں مردماں انتزامیہ ءِ گپ نہ منّ اِتگ اَنت –

آیانی گوشگ اِنت انتزامیہ ءَ وتی سوبمندی ءِ ھال چاگردی رسانکجاھاں شنگ کرتگ بلے اے گپ رد اِنت ءُ ما انگت ءَ نشتگ ایں –

آیانی گوشگ اِنت کہ ایف سی ءَ پَٹ ءُ پول کرتگ ءُ “نان کِسٹم “گاڑی گپتگ اَنت ءُ زھرشانی کنوکاں کوژک ءِ ھند ءَ مزن شھدگ بند کرتگ ءُ رؤک ءُ آؤکیں مساپر مھتل کرتگ اَنت –

مساپرانی گوشگ اِنت اے ترندیں گرم ءَ دگ بند اِنت ءُ ما اد ءَ ٹوھیں جنجالانی دیمپان اِنت ءُ باید اُستان ءِ سرکار زوت ءَ زُت گامگیج بہ زور ایت ءُ مردمانی گپ ءُ تران ءَ سِتکی بہ کنت –

بلوچستان ءِ دمگ پنجگور ءَ گھبودی گل ھمدرد فاؤنڈیشن ءِ ماھانہ نیاد بیتگ کہ چریشی ءَ نیاد ءَ گھبودی گل ءِ باسکاں سوڑ اِتگ کہ آؤکیں ائید ءَ پنجگور ءِ نیزگاریں زھگاں پُچ، دگہ زلورت مندیں ساز ءُ سامان دیگ بنت اِنت –

آیاں گوشت کہ مئے ءُ گل ءِ لوٹ ھمیش اِنت کہ نیزگارانی کمک کنگ ءُ نادراھانی گور ءُ دلگوش کنگ اِنت کہ چریشی ءَ ما ھروھد ءَ ھند ءُ دمگاں وتی کچ ءُ کساس ءَ جھد ءَ ایں –

آیاں گوشت کہ اشی ءَ درستیں مھلوک سرپد اِنت ھمدرد فاؤنڈیشن پنجگور یک چاگردی باسکے کہ پنجگور ءَ ھوار دراھیں ھند ءُ دمگاں ھر ھما نیزگاریں چور ءُ تنگدستیں مھلوک ءِ کمک کنگ اِنت ءُ ھمدرد فاؤنڈیشن ھمک شش ماہ ءِ سر ءَ یک نیاد برجم داریت ءُ چریشی ءَ چاگردی کارانی سر ءَ جتا جتائیں بنگپانی سر ءَ گپ کنگ بیت اِنت –

آیاں گوشت کہ آؤکیں ائید ءَ نیزگاریں زھگانی واستا پُچ ءُ چمپل ءُ دگہ ساز ءُ سامان دیگ بنت ءُ چریشی ءَ ھما زھگاں کہ نیست آیاں اے وشی دیگ بیت اِنت –

آیاں گوشت کہ نیاد ءَ لھتے نادراھاں گوں گند ءُ دُچاری بیتگ ءُ آؤکیں ھپتگ ءِ تہ ءَ آیانی جاندرھی ءِ درمانی ءَ گل ءِ باسک گامگیج زور اَنت –

آیاں گوشت کہ یکشمبے ءِ روچ ءَ گھبودی گل ءِ نیمگ ءَ پنجگور سول ھسپتال ءَ یک سرپدی ءِ دیگ بیت اِنت کہ اود ءَ ھسپتال ءِ سپائی ءُ گھتری ءِ واستا کڈنی کنت –

آیاں گوشت کہ آؤکیں ھپتگ ءَ ڈپٹی کمشنر پنجگور ءَ گل ءِ باسک گند ءُ دُچار کپ اَنت ءُ دمگ ءَ چاگرد ءِ کارانی گھتری ءِ واستا کمک ءِ دزبندی ءَ کن اَنت –

زانگ بہ بیت بلوچستان ءَ اے وھد ءَ بازیں گھبودی گل وتی کمک ءَ وت کار کنگ ءَ گندگ آیگ ءَ اَنت –

بلوچستان ءَ گھبودی گلانی گوشگ اِنت کہ اگاں سرکار ءُ دگہ ادارہ بلوچستان ءَ گھبودی گلاں کمک بہ کن اَنت گڑا آیانی کمک ءَ بلوچستان ءَ بازیں نیزگار ءُ نادزرسیں مھلوک ءِ تنگدستی ھلاس بیان کنان اَنت –

بلوچستان ءِ دمگ چہ کیچ ءَ سر بیتگیں ھالانی رد ءَ پاکستانی پوج ءَ یک لوگے ءَ بیڑ برتگ ءُ اود ءَ یک مردمے آوار جتگ ءُ برتگ –

گوزوکیں ھپتگ ءَ بلوچستان ءِ جتا جتائیں جاھاں پاکستانی پوج ءِ دست ءَ مردمانی آوارجنی گیشی ءَ گندگ ءَ آیگ ءَ اَنت – ءُ گوستگیں دو روچانی تہ ءَ ایوک ءَ کیچ ءَ ھپت مردم دزگیر کنگ ءَ پد بیگواہ کنگ بیتگ اَنت ءُ اشاں ابید ھزدار ءُ شال ءَ ھم آوارجنیانی ھال سر بیتگ اَنت –

کیچ ءِ بنجاھی شھر تربت ءَ پاکستانی پوج ءَ دگہ یک ورنایے آوار جتگ ءُ بیگواہ کرتگ، آوار جنگ بیتگیں ورنا ءِ پجار داؤد لطیف ءِ نام ءَ زانگ بیتگ –

دمگی مردمانی رد ھَ داؤد لطیف پیراملٹری فورس ایف سی ءِ کارمنداں 11 جون 2012 ءِ ساھت چار ءَ کیچ ءِ دمگ آبسر ءَ بیڑی ءِ وھد ءَ دزگیر کنگ ءَ پد بیگواہ کرتگ –

دمگی مردماں گوشت کہ بیڑی ءِ وھد ءَ پوج ءَ لوگ ءَ جاڑیگیں دگہ مردم لَٹ ءُ کُٹانی نشانگ کرتگ اَنت –

ھمے وڑ ءَ کیچ ءَ گوستگیں روچاں سمیر مراد ءُ رستم ھسن آوار جتگ ءُ بیگواہ کرتگ اَنت کہ نودربر گوشگ بیتگ اَنت –

دمگی مردمانی رد ءَ ھردوکیں ورنائیں نودربر پوج ءَ نُھ جون ءَ کیچ ءِ بنجاھی شھر تربت ءِ ھند ھیرونک ءَ روگ ءِ وھد ءَ دزگیر کرتگ ءُ بیگواہ کرتگ اَنت –

ھمے وڑ ءَ ھزدار ءَ علی ھسپتال ءَ ناشناسیں مردماں یک مردمے دزگیر کرتگ ءُ برتگ کہ آئی ءِ پجار وسیم ء شریم ءِ نام ءَ زانگ بیتگ –

چاگردی رسانکجاھاں شنگ بیتگیں ھالانی رد ءَ وسیم براھوئی ءِ زبان ءِ شائر ءُ نبشتہ کارے ءُ آئی ءِ پِت گوست ءَ ھم ناشناسیں مردمانی نشانگ ءَ اتکگ ءُ زدگ بیتگ –

وسیم ءِ بارہ ءَ گوشگ بیگ ءَ اِنت کہ وسیم ءَ چاگردی رسانکجاھاں بلوچستان ءَ بیوکیں ناوشیں جاورانی سر ءَ نبشتگ کرتگ ءُ وتی انساپ ءِ لوٹ ھروھد ءَ کرتگ چریشی ءِ پژدر ءَ وسیم ھم آوار جنگ ءُ بیگواہ کنگ بیتگ –

بلوچستان ءَ نودربر، شائر ءُ زانتکاریں مردماں ھوار لس مردمانی بیگواھی یک دراج کشیں رنگے ءَ یکشل ءَ برجاہ اَنت ءُ دومی نیمگ ءَ شال ءَ بلوچستان ءَ گار ءُ بیگواہ بیتگیں مردمانی واستا توار چِست کنوکیں گل وائس فار بلوچ مسنگ پرسنز ءِ زھرشانی برجاہ اِنت –

گل ءِ لوٹ اِنت کہ ھر مردمے گار ءُ برگ بیتگ اَنت آ آمیدگساں پیش کنگ بہ بیت گل ءِ بھتام اِنت کہ آوار جنوکاں پاکستانی پوج ءِ چیریں ادارہ دزمان جن اَنت –

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشانی ءَ گوادر ءَ یونیورسٹی ءِ جوڑ کنگ ءَ کڈن کنان ءَ گوشتگ کہ گوادر ءِ وڑیں پرگنجیں جاھے ءَ ابید جامعہ ءِ جوڑ نہ کنگ ءَ ھچ گامگیج نہ زورگ ءُ وانگی ادارھانی جوڑ نہ کنگ، وانگی ءِ بارو ءَ سرکار ءِ بے وسی ءُ شُلگی ءِ تچکیں پدراھی یے –

آئی ءَ گوشتگ کہ گوادر ءِ وانگی جاورھال بلوچستان ءِ دگہ ھندانی وڑ ءَ نہ بوگ ءِ ندارگاں پیشدارگ ءَ پیش کنگ ءَ اِنت پرائمری ءَ بہ گر داں کالجزاں سرجمی ءَ وانگی ادارہ یک وڑ ءَ نیستی ءِ بروبری ءِ آماچ اِنت-

آئی ءَ گوشتگ کہ ھمود ءَ وانگی ادارہ ھُشک ءُ ھالیگ ءَ کپتگ اَنت ھمود ءَ دومی نیمگ ءَ وانگی ادارھانی بدیں لیکہ داروکیں مردم جاڑیگ اَنت وانگی ادارھانی نہ بوگ ءَ ورنایانی بازیں کچے شال، کراچی ءُ ڈیھ ءِ اُستاناں روگ ءَ اَنت –

آئی ءَ گوشتگ کہ سی پیک ءُ گوادر پورٹ ءِ بدولت ءَ گوادر سُھر ءِ نھاد ءَ زانگ بیت اِنت بلے گوادر ءِ ورنا وانگی وڑیں بنکی آسراتیاں زبھر اَنت –

آئی ءَ گوشت: وانگی ایمرجنسی ءِ نام ءَ سرکار ءِ ڈاھورینگی بندات بیتگ اَنت بلے آ مروچی سرجم ءَ بے سوب اِنت ءُ داں مروچی ءَ پرائمری ءَ بہ گر داں کالج ءَ برو آسراتیاں زبھر اَنت اے وڑ ءَ جاورھال اَنت ھنچیں جاھاں مھلوک وانگی آسراتیاں سرجم ءَ زبھر اَنت ءُ وانگی بارہ ءَ ھچ وڑیں جامع ءِ پالیسیانی دیم ءَ نیارگ گڑا وانگی ایمرجنسی ءُ دیمروئی ءِ وڑیں منانکانی دیم ءَ آرگ ھاک ءُ پُر اَنت –

آئی ءَ گوشت کہ اُستان ءَ لھتے یونیورسٹیاں برجم کنگ ءِ سبب ءَ ورنایانی نسل وانگی موہ ءَ سرجم ءَ زبھر اَنت، وانگی درچاں ھمود ءَ نودربر دگہ اُستاناں درپہ در اَنت ءُ ٹکر وران اَنت ءُ ھمے وڑ ءَ ھمے سال ءَ ھما اُستاناں نامینتگیں نشست ھلاس کنگ بیتگ اَنت وانگی موہ دیگ ءِ نہ بوگ ءِ سبب ءَ ورنایانی پدریچی چاگرد بے راھاں کپان ءُ روان اَنت – گوادر ءِ بلوچستان ءِ ھما لڑاں گنجان آبادیں جاھاں ھوار اِنت ءُ گوادر ءَ یونیورسٹی ءِ جوڑ نہ کنگ وانگ ءِ دشمنی ءِ پالیسیانی یک تچکیں پدراھی ءِ – سرکار ءَ گوں دزبندی کن ایں آ گوادر ءِ یونیورسٹی ءِ سرجمی ءَ وتی گامگیج ءَ بہ زور ایت ءُ دانکہ آؤکیں نسل راج ءِ رژنائیں باندات ءِ مانزمان بہ بنت –

رودان سر ءِ پانگس ءِ سر ءَ راکٹ ءُ دگہ مزنیں سلاھانی گون ءَ اُرش کتگ جانی ءُ مالی تاوان داتگ – میجر گوھرام

سربوتگیں ھالانی رِد ءَ گوستگیں روچ ءَ بیگاہ ءِ ادار ھشت ءَ ناشناسیں سلاہ بندیں مردماں مند ءِ دمگ گوک ءَ پوجی پانگس ءِ سر ءَ اُرش کتگ – اُرش گوک ءَ رودان سر ءِ برجاھیں پانگس ءِ سر ءَ کنگ بوتگ، چریشی ءَ پاکستانی پوج ءَ جانی ءُ مالی تاوان رس اتگ سلاہ بندیں مردم درآیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں بیگاہ ءِ ادار ءَ ھشت ءَ کیچ ءِ دمگ مند ءَ رودان سر ءَ برجاھیں پاکستانی پوج ءِ پانگس ءِ سر ءَ راکٹ ءُ دگہ مزنیں سلاھانی گون ءَ اُرش کتگ- اے اُرش ءَ زورگیریں پوج ءَ جانی ءُ مالی تاوان رس اتگ –

میجر گوھرام بلوچ ءَ وتی درشان ءِ گڈسر ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی تاں برجاہ مان انت –

بیگواھیں مردم ءُ شھیدانی کھول ءِ زھرشانی بنجل برجاہ، زھرشانی بنجل ءَ مروچی چار ءُ ھزار ءُ سَے سد ءُ چل ءُ سَے روچ سرجم بوتگ، چہ منگچر ءَ سیاسی ءُ چاگردی باسک میر صدام لانگو ءُ غوث بخش لانگو ءَ بنجل ءَ اتکگ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءِ تہ ءَ پاکستان ءِ زورگیری، انسانی ھکانی میان اُستمانی کانودانی لگتمالی، میان استمانی اداری ءُ ھاسکر اقوام متھدہ ءِ ھچ نہ گوشگ ءِ بگیری ءَ سیاھیں روچ دارگی انت –

ماما قدیر بلوچ ءِ گوشگ ات کہ دوھزار ءُ سینزدہ ءَ اقوام متھدہ ءِ ورکنگ ٹولی ھم بلوچستان ءَ زورگیرانی نیمگ ءَ بلوچانی چک چینی کتگکاری پدر کتگ انت بلے اشاں چہ ابید دنیگت ءَ تاں امریکہ ءُ یورپی ڈیھ اقوام متھدہ ءُ میان استمانی ادارہ انسانی ھکاں شمشکار انت پاکستان ءَ مالی ءُ سیاسی کمک کنگ ءَ انت کہ پاکستان ءِ دستاں انسانی ھکانی لگتمالی گیشی ءِ سبب انت –

ماما قدیر بلوچ ءَ دیمتر ءَ گوشتگ کہ دنگیت ءَ ھمے جھد انت کہ میان استمانی پیشگامی ءِ سر ءَ وت ءَ بہ رکینیت ءُبلوچانی چکچینی ءِ ھاتر ءَ وت ءَ مھکم بداریت پاکستان ءِ دوتل ءُ دوپوستیں کرد ءُ اے دمگاں ھوار سرجمیں دنیا ءَ بدامنی، نیکرھی ءُ ناشرکاری تالان کنگ ءَ پاکستان ءِ پدریں کرد ءَ ابید میان استمانی ادارہ پاکستان ءِ بگیری ءَ گامگیج زورگ ءَ پھریزگ ءَ انت –

آئی ءِ گوشگ ات کہ پاکستان میان استمان ءِ ھاموشی ءَ بلوچ چکچینی ءِ پالیسی برجم داشتگ پرایمنیں جھدے بگیری ءَ چست کن بجن چگل دے پالیسی ءِ سر ءَ امل کنان ءُ پاکستان ءِ چیریں ادارھاں لھتے سالانی تہ ءَ ھزاراں بلوچ پرزندانی آوار جنی ءَ پد شھید اش کرتگ انت، بلے میان استمانی ادارہ ءُ انسانی ھکانی پانکجنیں ڈیھانی نیمگ ءَ ھچ وڑیں گامگیج زورگ بوگ ءَ نہ انت کہ وت یک مزنیں زوراکی ءَ چہ کمتر نہ انت –

سر بیتگیں ھالانی رد ءَ بلوچستان ءِ دمگ شیرانی ءَ اسکول وین ءُ ٹرکے ءِ میان ءَ وئیل بیتگ کہ چریشی ءَ سیزدہ نودر زدگ بیتگ اَنت –

وئیل ڈی آئی ھان دگ ءَ کیپ ءِ نزیک ءَ پیش اتکگ کہ اود ءَ ٹرکے ءَ پشتکائی اسکول ءِ وین ءَ را ٹکر جتگ ءُ چریشی ءَ سیزدہ نودربر زدگ بیتگ اَنت ءُ چار کسانی جاور نگیگ ءُ شال ءَ برگ بیتگ اَنت –

زدگ بیتگیں نودربرانی سیادی عالم خان ءِ ھند ءَ گوشگ بیگ ءَ اَنت –

ھمے وڑ ھزدار ءَ اچر بند ءَ دو گاڑیانی ڈک ورگ ءَ بی این پی ھزدار ءِ رھشون عالم فراز مینگل ءُ آئی ءِ ھمراہ زدگ بیتگ اَنت –

زانگ بہ بیت گوستگیں روچ ءَ ھزدار ءَ بیتگیں دگ ءِ وئیلے ءَ بیست مردم بیران ءُ پنجاہ ءَ گیش زدگ بیتگ اِت اَنت –

بلوچستان ءِ دگانی پردی نام مھلوک ءِ نیمگ ءَ “ھونی دگ ” ایر کنگ بیتگ اَنت بازیں مردم بلوچستان ءِ دگانی سر ءَ سپر کنگ ءَ وتی زند ءِ گڈی روچ سرپد بنت اِنت –

دگانی بارہ ءَ گوشگ بیت کہ پروشت ءُ پروشی ءِ ھواری ءَ بلوچستان ءَ ڈرائیورانی نادلگوشی ءُ دگانی سر ءَ گر ءُ داری ءِ نہ بوگ ءِ برابری اِنت –

نبشتانک: پتھ اسکواڈ ءِ کامریڈ وشین

نبشتہ کار: ملا امین بلوچ
رجانک: آئیشہ بلوچ

دی بلوچستان پوسٹ

جنگ ءِ کمانڈ ءُ کنٹرول دْراہ واجہ کمانڈر ریئس بلوچ ءِ دست ءَ اَت گُڑا سوڑگ ئِے کُتگ کہ باج ءِ گل (پتھ اسکاڈ) ءِ کمانڈر دیم ءَ بیا اَنت گُڑا شھید وشین ھم ھما وھد ءَ باج ءِ گل ءِ یک باسکے اَت گُڑا ماں ھمے جنگ ءَ پہ شھید وشین ءَ گوں کمانڈر اسلم ءِ گل ءَ ھوار بوگ یک دادے اَت پمیشکا آ سک باز گل اَت۔ گُڑا وتی سی تیری ئیں تُپنگ ءَ گرنیڈ لانچرے بستگ ءُ ھشت دانگ گولہ ئِے ھم زُرتگ ءُ پہ جنگ ءَ وتی سنگتاں ھوار بوتگ انچوشکہ اُرشی ٹارگٹ جاہ سک دُور اَت پمیشکا تیوگیں سنگتاں گْوارچ بوگی ءَ اَت پمیشکا سپر ءِ بلاھیں بھرے ماں شپ ءِ تھاروکیاں ایرکنگ بیتگ۔

گُڑا 31 مئی ءِ بیگاھیں پاس 6 ادار ءُ 36 مِلٹ ءَ اولی اُرش کنوکیں سنگتاں دژمن ءِ بُنجل ءِ سر ءَ اُرش کُتگ گُڑا پتھ اسکواڈ ءِ گل پہ وتی جنگی شست ءِ مکسد ءَ دیم جُنزان بوت اَنت، گُش ئے کساس 9 مِلٹ ءِ تہ ءَ کمانڈر اسلم ءُ شھید لیلا ءَ دژمن ءِ اولی سنگر دستیگ کُتگ۔ پد ءَ دیم پہ دیمی تیر گْواری ئیں جنگے بُنگیج بوتگ شھید سارنگ چہ دْرستاں پیسر دژمن ءِ تیرانی آماچ بیتگ پد ءَ شھید وشین یکشل ءَ گرنیڈ لانچر جنّگ ءَ ات پد ءَ شھید وشین دژمن ءِ بُنجل ءِ تہ ءَ پُتریت ما دومی نیمگے ءَ جنگ ءَ دزگٹّ اِت ایں کہ چہ واکی ٹاکی ءَ گْوانکے آتک کہ وشیں ٹپی بوتگ۔

گُڑا مارا وتی جاہ یلہ دیگ بوتگ اَنت، ما چہ زِرباری کش ءَ درکپان ءُ گوریچی کش ءَ آتک ایں کہ اود ءَ سنگت وشین ٹپی ءُ ھون ئِے ریچگ ءَ اَت مئے بْرمش ءُ تواراں ھم اشکُنگ ءَ ات سنگتاں کُنٹگیں باڑ دِر ات ءُ تہ ءَ آتک انت گُڑا وشین ءَ ھکل کُتگ ءُ گْوشت “ماما تئٹی بفرے نمے خلیک بڑوا (ماما توک ءَ مَیا اِت کہ بڑوا شُمارا شُما نشانگ کن اَنت)” بلے سنگت نہ اوشتگ اَنت، شُت ءُ وشین گوں تُپنگ ءَ در ءَ کش اِت اش۔ وشیں انگت ءَ سرجمی ءَ ھوش اَت آئی ءَ مارا چار اِت ءُ گْوشت “ماما سنگتاتے تے پا کن کے پریشان مفیرے اللہ خیر کیک (ماما سنگتاں بہ گْوش کہ منی واست ءَ پریشان مہ بنت، ھُدا وت ھیر کنت)”-

سنگتاں وشین زُرت ءُ پُشتی نیمگ ءَ شُت اَنت ءُ ما پد ءَ جنگ ءَ دزگٹّ بوت ایں گُڑا کساس دہ یا پانزدہ دمان ءَ رند چہ واکی ٹاکی ءَ گْوانکے آتک کہ وشین ءَ مارا یلہ دات ءُ جنرل اسلم ءُ گوں دِگہ سنگتاں ھوار بوت گُڑا ما گْوشت کہ شھیداں چہ اد ءَ بہ کش اِت بلے ھمے دمان ءَ یک سنگتے تتک ءَ آتک ءُ گْوشت کہ وشین ءَ وسیت کُت کہ منی جون ءَ ھمد ءَ یلہ بہ کن اِت کہ منی کھول منی جون ءَ بہ سبھال ایت۔

گُڑا ما پسّو دات کہ ما نہ لوٹ ایں کہ وشین ءِ مات دژمن ءِ دست ءَ جنجال بہ بیت ءُ اے شھیدانی بُندری وارس وَ شُما سرمچار وت اِت گُڑا زاناں شُما وتی برات ءِ جون ءَ دژمن ءِ دست ءَ دے اِت؟ کہ دژمن ایشانی چمّاں بہ کش اَنت؟ اِنّاں وتی سنگتانی جون ءَ مہ پِرّین اِت گُڑا بر اِت ءُ وتی شھیدانی جوناں چہ اد ءَ بہ کش اِت من زھر ءَ کوکار کُت ءُ گْوشت کہ وتی راجی بامردانی جوناں دژمن ءِ دستیگ نہ کن ایں وتی شھیدانی جوناں چہ اد ءَ بِہ کش اِت۔

لھتیں سنگت شھیدانی برگ ءَ روان بیتگ اَنت، جنگ انگت ءَ تْرُندی ءَ برجاہ اَت کہ پد ءَ گْوانکے پیداک ءَ اَت “لیلا ٹپی بوتگ بہ سنبھال اِت ئِے” گُڑا لھتے سنگتاں پہ لیلا ءِ کُمک ءَ تتک انت۔ البت دِگہ سنگتاں پہ سنگر ءِ دزگیر کنگ ءِ واست ءَ
جنگ برجاہ داشتگ۔

سنگر ءِ دزگیر کنگ ءُ دژمن ءِ سرجمیں کارندانی کُشگ ءَ پد شھیدانی جون ءُ ٹپی ئیں سنگت لیلا ءِ ھمراھی ءَ ما واتر بوت ایں۔ گُڑا شپ ءِ نیم اَت ءُ ما سنگت لیلا ھم بُنگیجی درمان ءُ الاج ھم کُتگ اَت بلے لیلا مکن کنگ ءَ اَت کہ وت ءَ تکانسر مہ کن اِت۔ کساس شپ ءِ یک ساھت اَت کہ ما تیوگیں گل یکجاہ بوت ایں۔ ما شھید وشین ءُ شھید سارنگ ءَ سرڈگار ءِ ھاکاں باھوٹ کنگ ءَ ات ایں کہ کمانڈر میرو ءَ ھال دات کہ سنگت لیلا ءَ ھم نوں مارا یلہ دات ءُ سنگت وشین ءُ سارنگ ءَ ھوار بوتگ ما ھرسئیں سنگت بولان سرڈگار ھاکاں باھوٹ دات ءُ وت چہ اود ءَ درکپت ایں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءَ ھواریں دمگ تمپ ءَ پاکستانی پوج ءَ بیڑ برتگ ءُ مھلوک ءِ لوگ پَٹ ءُ پول کرتگ اَنت ءُ چار کس آوار جتگ ءُ برتگ اَنت –

دمگی مردمانی رد ءَ گوستگیں شپ ءَ تمپ ءِ دمگ کُنشکلات ءَ پاکستانی پوج ءُ چیریں ادارھانی چیردستی ءَ جوڑ کرتگیں “ڈیتھ اسکواڈ ” ءِ کارمنداں بازیں لوگاں بیڑ برتگ ءُ اود ءَ جنین ءُ چُک لَٹ ءُ کُٹانی نشانگ کرتگ اَنت ءُ چار کس آوار جتگ ءُ برتگ –

آوار جنگ بیتگیں مردمانی پجار عبداللہ ء ھسین علی، سھراب ء رحیم بکش، گوھرام ء نادل ءُ ستار ء الاھی بکش ءِ ناماں زانگ بیتگ اَنت –

تمپ ءَ ھوار بلوچستان ءِ بازیں جاھاں پاکستانی پوج ءِ لشکر کشی ءُ مردمانی آوار جنیانی ھال یکشل ءَ پیداک اَنت –

بلوچ سیاسی ءُ بلوچستان ءَ انسانی ھکانی گلانی بھتام اِنت کہ پاکستانی پوج ھمود ءَ کمے مردم یلہ کنت ءُ دومی نیمگ ءَ گیش مردماں گرگ ءُ بیگواہ کنگ اِنت –

بلوچستان ءَ گار ءُ بیگواھیں مردمانی واستا انسانی ھکانی کمیشن ءِ نام گپت ءَ جوڑ بیتگ بلے بیگواھیں مردمانی کھول یکشل ءَ کمیشن ءَ پیش بیگ ءَ اَنت آیانی گوشگ اِنت کمیشن ءِ سروک ءُ آئی ءِ واکدار نانکہ مئے مردماں یل کنت بلے اشی ءِ پجیگ ءَ مارا کمشرپ ھم کنگ اِنت –

ھمے وڑ گوستگیں ماہ ءَ کُنشکلات ءَ پاکستانی پوج ءِ دست ءَ آوار جنگ بیتگیں ھیسم ء نوربکش ھم یل کنگ بیتگ ءُ وتی لوگ ءَ سر بیتگ