TBP Balochi

بلیدہ گلی ءَ پاکستانی پوج تراک ناکیں شوروانی نشانگ جوڑ کتگ – جئیند بلوچ

سربوتگیں ھالانی رِد ءَ بلوچستان ءِ دمگ بلیدہ ءَ پاکستانی پوج ءِ کاروان ءِ پھازگی کارمندانی سر ءَ اُرش بیتگ –

اُرش کنوکاں بلیدہ ءَ گلی ءَ پاکستانی پوج ءِ پھازگی کارمندانی سنگر ءِ تہ ءَ تراک ناکیں شورو کل کتگ تراکینتگ اَنت، تراک ءَ پاکستانی پوج ءَ جانی تاوان رسگ ءِ ھال اِنت ۔

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اُرش ءِ زمّہ واری منّ اِتگ ءُ گوشتگ کہ مئے سرمچاراں بلیدہ ءِ دمگ گلی ءَ زورگیریں پاکستانی پوج ءِ کاروان ءِ پھازگی کارمندانی سر ءَ تراک ناکیں شورواں گوں اُرش کتگ –

آئی ءَ گوشتگ کہ زورگیریں پوج ءَ اے دمگاں ءُ چپ چاگرد ءَ سنگر جوڑ کرتگ کہ ھمک وھد ءَ دژمن پوج ءِ سُرپرانی پھازگ ءِ ھاتر ءَ کارمرز کنگ بنت –
جارکش ءَ گوشتگ کہ بی ایل اے ءِ سرمچاراں شوربندی ءِ رِد ءَ پوجی کارمندانی سنگر ءِ تہ ءَ پیسر ءَ چہ تراک ناکیں شورو کل کتگ چریشی ءَ یک کارمند ءِ ٹپی بوتگ یکے ھما دمان ءَ مرتگ – بی ایل اے اے اُرش ءِ زمّہ واری ءَ من اِیت-

بلوچستان ءِ دمگ کیچ ءِ ھند تمپ ءِ جھمنندیں حوا بلوچ ءَ چاگردی رسانکجاھاں وتی یک شنگ کرتگیں درشانے ءَ گشتگ کہ منی ناکو نیاز احمد ء کادر بکش یل کنگ بہ بیت اِنت –

آئی ءِ گوشگ اَت کہ نیاز اھمد سَے دگہ مردمانی ھمراھی ءَ پانزدہ اپریل دوھزار ءُ نوزدہ ءَ آئی ءِ لوگ ءَ پاکستانی پوج ءَ دزگیر کنگ ءَ پد بیگواہ کرتگ – آئی ءِ رد ءَ آ دگہ سئیں کس یل بیتگ اَنت بلے منی ناکو انگت ءَ گار اِنت –

آئی ءَ مزن واکاں گوں نیاز اھمد ءِ سلامتی ءِ یل کنگ ءِ دزبندی ءُ انساپ ءِ لوٹ کرتگ –

زانگ بہ بیت بلوچستان ءَ زورانسری آوارجنیانی جیڑہ دو دھکاں برجاہ اِنت، بلوچستان ءَ بیگواھیں مردمانی واستا پرکاریں گل وائس فار بلوچ مسنگ پرسنز ءِ رد ءَ بلوچستان ءَ اے کچ ھزارانی کچ ءَ اِنت ھمے وڑ انسانی ھکانی میان اُستمانی گلاں بلوچستان ءَ زورانسری آوارجنیانی پدری کرتگ اَنت –

بلوچستان ءَ سیاسی ءُ انسانی ھکانی گلانی نیمگ ءَ بلوچستان ءَ زورانسری آوار جنیانی بگیری ءَ زھرشانی کنگ ءُ پیداک اَنت ءُ آیاں آمیدگساں پیش کنگ ءِ لوٹ ءَ کنگ ءَ اَنت –

بلوچستان ءِ تیابدپی شھر گوادر ءَ ھمے ماہ ءَ پاکستانی پوج ءِ دست ءَ دزگیری ءَ پد بیگواہ بیتگیں ورنا ءِ یل نہ بیگ ءِ ھلاپ ءَ زھرشانی بنجل برجاہ کنگ بیتگ –

بیگواہ بیتگیں عارف درمھمد، عادل نبی بکش، عبدالمطلب ء مھمد ھسن ءِ کھول ءَ جماعت اسلامی بلوچستان ءِ جنتل سیکریٹری ھدایت رھمان ءِ سروکی ءَ گوادر پریس کلب ءِ دیم ءَ زھرشانی بنجل برجاہ کنگ بیتگ –

اے وھد ءَ کھولاں وتی جگرانی یل نہ بیگ ءِ ھلاپ ءَ زھرشانی یاداشت کنائینتگ ءُ بیگواھیں مردمانی یل کنگ ءِ لوٹ ءُ گزدگیں کھول ءَ را انساپ دیگ ریاست ءِ زمہ واری اِنت-

آیاں گُشتت کہ بید دگہ جرمے ءَ مردماں بیگواہ کنگ درستاں مستریں جرمے ءُ بیگواہ کنوکیں ادارھانی سر ءَ ارزی نبشتگ کنگ بہ بیت ھما کہ مردماں بیگواہ کن اَنت-

آیاں گُشتگ کہ وھدیکہ مئے دوستگیں مردماں ریاستی ادارہ گرگ ءُ بیگواہ کنگ ءَ اَنت ءُ مارا گُشگ بیتگ کہ زوت آ یل کنگ بنت ءُ بلے تنی وھدی آیانی بارو ءَ مارا ھچ سرپدی نیست اِنت –

آیاں گُشتگ کہ ما ھروھد ءُ گُشگ ءَ ایں اگاں کسے ءَ جُرمے کرتگ گڑا آیاں کانون ءِ تہ ءَ آرگ ءُ آ سزا دیگ بہ بنت –

کھولاں پاکستانی ادارھاں گوں دزبندی کتگ کہ مئے دوستگیں مردماں سلامتی ءَ یلو بہ کن اَنت –

زانگ بہ بیت بلوچستان ءِ تیابدپی شھر گوادر ءَ ترندیں سیکورٹی ءُ ڈرون کیمرھانی سر ءَ مھلوک ءِ چاریگری ءَ شھریاں زھر ءِ درشان کتگ گوستگیں لھتے ماھانی تہ ءَ مھلوک ءِ زھرشانی تہ ءَ گیشی گندگ ءَ اتکگ اَنت ءُ سیکورٹی چیک پوسٹانی سر ءَ شھریانی زلیل کنگ، لوگانی سر ءَ بیڑانی ھلاپ ءَ زھرشانی کنگ ءُ پیداک اَنت –

بلوچستان ءِ دمگ پنجگور ءَ سیادی داروکیں دو برات پاکستانی پوج ءَ بیسمہ ءَ دزگیر کنگ ءَ پد بیگواہ کرتگ اَنت –

سر بیتگیں ھالانی رد ءَ ھردوکیں برات پوج ءَ ھما وھد ءَ آوار جتگ ءُ بیگواہ کتگ اَنت آ چہ شال ءَ دیم پہ پنجگور ءَ روگ ءَ بیتگ اَنت –

دمگی مردماں دی بلوچستان پوسٹ ءَ گوں گپ کنان ءَ گُشتگ کہ ھردوکیں برات گوستگیں روچاں چہ شال ءَ دیم پہ پنجگور ءَ روگ ءَ بیتگ اَنت کہ ھردوک بیسمہ ءِ ھند ءَ مساپر بریں کوچ ءَ ایر گیجگ ءُ برگ بیتگ اَنت –

ھردوکیں براتانی پجار ھمل ءُ سناء اللہ ء لال ءِ ناماں زانگ بیتگ اَنت کہ پنجگور ءِ دمگ چتکان گریب آباد ءِ جھمنند اَنت –

زانگ بہ بیت گوستگیں لھتے روچانی وھداں پنجگور ءَ ھوار بلوچستان ءِ جتا جتائیں جاھاں زورانسری بیگواھی آوارجنیانی تہ ءَ گیشی گندگ ءَ آیگ ءَ اِنت –

ھمے ماہ ءَ پوج ءَ ایوک ءَ پنجگور ءَ بازیں مردمے آوار جنگ ءَ پد بیگواہ کنگ بیتگ اَنت –

بلوچ اسٹوڈنٹس ایکشن کمٹی نال ھنکین ءِ نیمگ ءَ اسٹڈی سرکل ءِ نیاد ءِ برجم دارگ بیتگ، نیاد “شھید نواب اکبر ھان بگٹی ءِ نامہ کتاب ” بیتگ کہ آئی ءِ سرپدی عاطف بلوچ ءَ کرتگ –

سرپدی ءِ تہ ءَ نال ھنکین ءِ رھشوناں نواب اکبر ھان بگٹی ءِ زند ءِ بارو ءَ گپ کرتگ ءُ بھر زرتگیں باسک سرپد کرتگ اَنت –

آیاں نواب اکبر ھان بگٹی ءِ زند ءِ سر ءَ گپ کنان ءَ گوشتگ کہ نواب اکبر ھان بگٹی ناشرکار دوست یا زدیں انسانے نہ بیتگ آئی ءَ بلوچستان ءِ جیڑہ گپ ءُ تران ءِ سر ءَ گیشنگ ءِ جھد کرتگ –

نیاد ءَ آیاں گُشتگ کہ گپ ءُ ترانی ءِ وھد ءَ جنرل مشرف ءِ دیم داتگیں بازیں ٹولیانی گون ءَ گپ ءُ تران کرتگ ءُ آ وت ھم جنرل مشرف ءَ گوں دُچار کپگ ءَ تیار بیتگ –

آیاں گُشتگ کہ اے گپانی بیگ ءُ دُچار کپگاں ابید ھم مشرف ءَ آئی ءِ گون ءَ دُچار کپگ وتی جاہ ءَ آئی ءِ سر ءَ تاکت ءِ زور کارمرد کرتگ ءُ بلے اے آئی ءَ سماہ نہ بیتگ کہ اے امل آئی ءِ وتی گُٹ ءَ لوپ بیت اِنت –

نیاد ءَ آیاں تران کنان ءَ گُشتگ کہ نواب اکبر ھان بگٹی ءِ کوش ھروھد ءَ مشرف ءِ رندگیری ءَ کنان کنت ءُ کیت اِنت ءُ نواب اکبر ھان بگٹی ءِ دراھیں لوٹ کہ گیشتر سال وسائل ءُ بلوچستان یک وات واجھیں ڈیھے ءِ بستار ءَ گندگ لوٹ اِتگ –

آیاں گُشتگ کہ نواب اکبر ھان بگٹی ءَ اسلام آباد ءِ ھاکم وتی وھد ءَ سرپد کرتگ اَنت بلوچانی ماتیں سرڈگار ءِ سر ءَ زورگری مہ کن اِت ءُ بلکہں یک پولیٹکل اسٹیملنٹیں رنگے ءَ کار بہ زور ایت ءُ دمگی مردمانی ھکانی مانزمانی ءَ بہ دے ایت-

نیاد ءَ آیاں گُشتگ کہ نواب اکبر ھان بگٹی ءَ آیانی سرپد کنگ ءَ گُشتگ کہ بلوچستان ءَ یک میتگے سرپد مہ بیت بلے اے گپانی سرپد کنگ ءَ ابید ھم اے ھاکم منگ ءَ ساجو نہ بیتگ اَنت –

آیاں گُشتگ کہ جنرل مشرف ءَ سوئی ءَ بالیگ دیم داتگ ءُ پد ءَ واتر دیم لوٹائینتگ چُشکہ آئی ءَ وت گپ ءُ تران ءِ در بند کرتگ اَنت بلے نواب ءَ وت واکی ءِ کرد پیش کرتگ ءُ اے منّینتگ کہ آ ھچ بر کسے ءِ دیم ءَ نہ پُرشتگ ءُ کسے ءِ دیم ءَ آئی ءِ دست ٹال نہ بیتگ اَنت –

آیاں گُشتگ کہ پیر ءُ آجزی ءَ ابید کینسر ءِ نادراھی ءَ ابید آئی ءَ ایوک ءَ زوراکانی دیمپانی کنگ ءِ شوربندی کرتگ ءُ آئی ءَ وتی گس یلو کرتگ ءُ کوھانی تہ ءَ شتگ ءُ آئی ءَ زانتگ کہ کوہ بلوچانی گڈی پناہ گاہ اَنت ءُ آ بالاچ گورگیج ءِ شائری ءِ سر ءَ اسرمند بیتگ چریشی ءَ کوہ آئی ءَ بلوچانی کلات گشتگ اَنت –

آیاں گشتگ کہ وھدیکہ جنرل مشرف ءَ تراتانی ءَ لشکر کشی ءِ پیسلہ کرتگ گڑا آئی ءِ تہ ءَ تاکت مکر ءُ مزنی بیتگ ءُ نواب ساب ءِ لاش ھم چو بھٹو ءِ لاش ءِ وڑ ءَ بے تواری ءِ سر ءَ کل ءُ کسارت کنگ بیتگ –

نیاد ءَ نواب اکبر ھان بگٹی ءِ زند ءُ آئی ءِ سر ءَ گوستگیں جاورھالانی سر ءَ جتا جتائیں بنگپاں گپ کنگ بیتگ اَنت ءُ چریشانی ھواری ءَ بھر زرتگیں باسکاں دیوان ءِ سروکاں جست ءُ پرساں پد دیوان آسر کرتگ –

بلوچستان ءِ بنجاھی شھر شال ءَ نودربر گل بلوچ اسٹوڈنس ایکشن کمیٹی ءُ بلوچ نودربر گل ءَ میڈیکل انٹری ٹیسٹ دیوکیں نودبرانی جیڑہ ءِ گیش گیوار نہ کنگ ءُ سرکار ءِ نیمگ ءَ چہ نودربراں تاکت زور ءَ ھچ نہ گوشگ ءِ بگیری ءَ یکجاھی ءَ پریس کانفرنس کتگ –

پریس کانفرنس ءَ آھاں گُشتگ کہ بلوچستان اے وھد ءَ وانگی ءُ زانشتی جیڑھانی آماچ اِنت۔ تالیمی ادارہ ناکہ تھنا مالی درگت ءَ دیولانی آماچ بوتگ انت بلکیں ادارھانی تہ ءَ کرپشن، دوزواھی، سفارشی کلچر ءَ تالیمی نزام تباھی ءِ نیمگ ءَ برتگ اَنت –

آھانی گوشگ ات کہ بلوچ نودربر گل ءُ بلوچ اسٹوڈنس ایکشن کمیٹی ءِ مروچیگیں اے پریس کانفرنس ءِ مول ءُ مراد رسانکدراں یک بلاھیں جیڑہ ءِ نیمگ ءَ دلگوش کنائینگ انت –
آھانی گوشگ ات کہ گوستگیں دہ روچاں بلوچستان ءِ میڈیکل انٹری ٹیسٹ دیوکیں نودربراں لائن ٹیسٹانی تہ ءَ بے کانودی ءِ بگیری ءَ یکشل ءَ زھرشانی کنگ انت بلے سرکار اے جیڑہ ءِ گیش ءُ گیوار ءَ ابید ءِ تاکت کارمرز کنگ ءُ نودربرانی توار چیر ترینگ ءِ جھد انت کہ سک باز پدردی ءُ ایرجنگی انت – ھمے ھپتگ ءَ ہاکی پٹ ءِ چار راہ ءَ وتی لوٹانی ھک ءَ زھرشانی کنوکیں میڈیکل انٹری ٹیسٹ ءِ پُرایمنیں جھد کنوکیں نودربرانی سر ءَ شال پولیس ءَ آھانی سر ءَ لٹ شاپ کنگ ءُ زھرشانی ءَ ھواریں نودربر دزگیر کتگ ءُ جیل ءَ برتگ انت – سرکار ءِ اے زوراکیاں اے گپ پدر کتگ کہ آ وانگی جیڑھانی گیش ءُ گیوار ءَ ساڑی نہ انت بلکیں اد ءَ پُرایمنیں جھد کنوکیں نودربرانی توار تاکت ءِ زور ءَ چیر ترینگ ءِ جھد کنگ بیت –

لٹ ءُ کٹ ءُ دزگیری ءَ ابید ءِ بلوچستان ءِ وانندھیں نودربراں وتی لوٹانی گرگ ءِ ھاتر ءَ پُرایمنیں جھد ءِ راہ وتیگی کتگ وتی زھرشانی نبشتہ کنائینتگ – دہ روچ ءِ گوزگ ءَ پد ناکہ اُستانی یا بنجاھی سرکار ءَ اے جیڑہ ءِ سر ءَ گامگیج زرتگ ءُ ناکہ نودربرانی جیڑہ گوشدارگ ءَ گند ءُ نندی کمیٹی ءِ اڈ داتگ –
آھانی گوشگ ات کہ بستار نودربرانی نمائندھیں گل بی ایس او ءُ بساک اول ءِ روچ ءَ چہ بلوچ نودربراں گوں ھمکوپگ بوتگ ءُ ناکہ تھنا آھانی توار بوتگ انت بلکیں اے جیڑہ ءِ سر ءَ گل ءِ تہ ءَ ھم باوست بوتگ – دویں نودربر گلانی نیمگ ءَ اے جیڑہ ءِ درگت ءَ گوستگیں روچ ءَ شال ءَ بنجاھ ءِ نیمگ ءَ دیوان ءِ اڈ دیگ بوتگ -دیوان ءَ باوست ءَ پد ھردو گلانی اگدہ داراں نودربرانی مھکمیں توار بوگ ءُ پاکستان میڈیکل کمیشن ءِ بے راھی ءِ بگیری ءَ پُرایمنیں زھرشانیانی گیش کنگ ءِ ھاتر ءَ ءُ یکجاھیں زرمبشت ءِ چلائینگ ءِ پیسلہ کتگ – بساک ءُ بی ایس او ءَ مدامی نودربرانی وانگی لوٹانی ھاتر ءَ جھد کتگ گوست ءَ ھم ھردو گلاں یکجاھی ءَ گوں کار کتگ –

آھانی گوشگ ات کہ زیکیں دیوان ءَ ھمے پیسلہ بوتگ کہ اے جیڑہ ءِ سر ءَ بلوچ نودربر گل ءُ بلوچ اسٹوڈنس ایکشن کمیٹی یکجاہ بنت ءُ جھد کناں اے یکجاھی ءَ ھردو نودربر گل میڈیکل انٹری ٹیسٹ ءِ نودربرانی توار جوڑ بنت ءُ ھر وڑیں سیاسی ءُ جمھوری راہ ءَ گچین کن انت – بساک ءُ بی ایس او ءِ یکجاھیں الائنس نیمگ ءَ نودربرانی ھکانی لوٹ ءَ بیست ستمبر ءَ شال ءَ یک مزنیں روانک ءِ اڈ دنت کہ آئی ءِ تہ ءَ اے لوٹانی منارینگے ھاتر ءَ سرکار زور دیگ بیت اِنت –

1- پاکستان ءِ میڈیکل کمیشن ءِ چیردستی ءَ آن لائن چکاس ھلاس کنگ بہ بنت ءُ فیزیکل چکاس گرگ بہ بیت 2- انٹری ٹیسٹ سوبین بوھگے مارکس پنجاہ درسد بہ بیت 3- ھژدھمی ترمیم ءَ پد چوشکہ درسیں اُستانی وتی جیڑھاں وت کائی انت کانودی وڑ ءُ ڈول ءَ بلوچستان میڈیکل کالج ھم وتی داکلہ ٹسٹاں وت اڈ بہ دنت –
4 – انوگیں ٹیسٹانی درگت ءَ ھمے ادارہ ءِ نیمگ ءَ ردی سر ءَ نوٹس زورگ بہ بیت ءُ اشی ءِ بگیری ءَ کاروائی کنگ بہ بیت اِنت –

آھانی گوشگ ات کہ بساک ءُ بی ایس او ءِ یکجاھیں الائنس ءِ چیر دستی ءَ شال ءِ تہ ءَ بؤکیں زھرشانی ءُ روانک ءَ پد اگاں سرکار ءَ گامگیج نہ زرت نودربرانی لوٹ نہ منّ اِت اَنت گڑا ھمے زوتاں سرجمیں بلوچستان ءُ دگہ دمگاں نشتگیں دمگاں یکجاھی زھرشانی کنگ ءِ جار پرینگ بیت انت –

نبشتانک: ھیل ءُ جُھد

نبشتہ کار: آئیشہ بلوچ

دی بلوچستان پوسٹ

ھیل ءُ جُھد دو جُتائیں چیز اَنت، اگاں ما ھورت بچار ایں ایشانی تہ ءَ سک باز دگری ھست اِنت بزاں یک گُلامیں راجے ءَ زیردستی ءِ ھلاپ ءَ آگاہ کنگ ءُ راجی آجوئی ءِ آشوب ءِ رُدینگ ءِ ترا جُھد کنگ لوٹ ایت۔ زورگِریں دژمنے ءِ ھلاپ ءَ گھگری بہ کن ئے گُڑا ترا جُھد کنگ لوٹ ایت، یک کارے ءِ کنگ ءَ تو نہ زان ئے گُڑا پہ آئی ءِ دربرگ ءُ بلد بوگ ءَ ھم ترا جُھد لوٹ ایت۔ بزاں ھر چیزے ءِ بُنگیج ءَ جُھد گْوش اَنت۔ جُھد ءِ بُنگیج ءُ میان ءَ ترا وتی سوب ءُ بے سوبی ءِ مارشت ھم بنت، ترا ھمے تُرس ھم بیت کہ اگاں منی جھد بے سوب بیت گُڑا منی ءُ منی سرجمیں گل ءِ آسر چے بیت؟ جُھد ءِ توک ءَ سکی سوری ھم ھست، تاوان ءُ بیرانی ھم ھست البت اسلامی نیکراہ ءِ رِد ءَ گْوش اَنت “جُھد وَ کاپر ءِ ھم تاوان نہ روت” بلے بَے ایش اِنت شُما یکمُشت بَہ اِت۔ لھتیں جُھد وتی وھد ءَ ترا پائدگ نہ دے اَنت البت آیوکیں وھد ءَ ترا بے کساس پائدگ دے اَنت انچوشکہ اگاں ما 1950 ءُ 70 ءِ دھک ءِ بلوچ راجی سِلاھبندیں جُھداں بچار ایں اِے جُھداں راج ءَ آجوئی نہ وَ داتگ اَنت بلے راج ءِ تہ ءَ گلامی ءُ زیردستی ءِ مارشت ودی کُتگ اَنت ھمے جُھد ءِ برکت ءَ مرچاں بلوچ راج وت ءَ پاکستانی یے نہ منّ ایت دژمن ءِ زُلم ءُ زوراکی ءِ آسر ءَ بلوچ پاکستان ءَ نپرت کنت ءُ نپرت راجی آجوئی ءِ بُنگیج اِنت ما بلوچ چہ پنچ ھزار سال ءَ پیسر یک راجے ات ایں بلے پاکستان وت 1971 ءَ پْروشت ءُ پد ءَ اڈ دیگ بیتگ پمیشکا مارا گوں اِے کوڑائیں استان ءَ ھچ سْیادی نیست انت بزاں جُھد بے کار نہ روت انت۔

نی ما ھیل ءِ نیمگ ءَ کا ایں کہ ھیل جُھد ءِ چَپ اِنت، بزاں ھیل ھما چیز ءِ نام اِنت کہ تو یک چیزے ءَ جْوان سرپد ئے بس کار ءِ شَر کنگ ءَ ترا لھتیں کُتھکاری(تجربہ) کنگ لوٹ ایت۔ تچکیں پیمے ءَ گْوش آں کہ ھیل ھما انگریزی ءِ پریکٹس اِنت بزاں تو یک کارے ءِ کنگ ءَوَ زان ئے بلے پہ شَر ءُ راستیں وڑے ءَ کنگ ءَ ترا لھتیں پریکٹس لوٹ ایت۔

بہ گِند ئے گُلامیں راج ءِ وشبھتی اِنت کہ راج ءِ تہ ءَ پہ بلوچ راجی زُبان ءِ دیمروئی ءَ بازیں زُبانزانت ءُ راجی زُبان ءِ جُھدکار ھست اَنت کہ آ شپ تاں روچ وتی دزھُورکی ءِ ھمُک ساھت ءُ دمان ءَ راج ءَ ھمے سرپدی دیان اَنت کہ تو بلوچے ئے، بلوچی تئی راجی پجّار اِنت ءُ بلوچی تئی ءَ ماتی زُبان اِنت پمیشکا تو وتی ماتی زُبان ءَ سرپد وَ بَہ ئے، بلوچی وانگ ءُ دربرگ پہ بلوچ ءَ سک آسان اِنت بس مارا اشتاب بوگ نہ لوٹ ایت، ما تھنا بلوچی درونتاں وانان ءُ کم کم ءَ وتی راجی زُبان ءِ نبشتہ ھیل بہ کن ایں اگاں ھورت بہ چار ئےمرچاں چہ لھتیں دلپْروشیں نودربراں اولی پسّو ھمے بیت کہ “من بلوچی نبیسّگ ءَ نزور آں، من نبشتہ ھیل نہ آں یا من بلوچی آبینکدار (کیبورڈ) ءَ ھیل نہ آں پمیشکا بلوچی نبشتہ کُت نہ کن آں ” بزاں اے وڑیں انچیں بے سیتیں نیموناں کن اَنت کہ مئے مجوری ھمیش اِنت البت ما پہ اِے وڑیں نودربراں سرپدی دیگ لوٹ ایں کہ شُمئے وڑ ءَ پیسر ءَ ما ھم بلوچی نبشتہ ھیل نہ اِت ایں۔ ما ھچ کس ءَ ماں وانگجاھاں بلوچی نہ ونتگ ءُ ناں کہ ما بلوچاں ماں وانگجاھاں مئے جِند ءِ راجی زُبان وانینگ بیت، ما زیردستیں راج وتی راجی زُبان ءَ وتی دزھُورکی ءِ وھد ءَ وت وانگ ءُ دربرگ ءَ ایں، بلکیں راج ءَ ھم وانینگ ءَ ایں شمئے ڈول ءَ ما ھم پیش ءَ راجی زُبان ءِ وانگ ءُ نبشتہ نزور اِت ایں بلے ما وتی جُھد برجاہ داشتگ ءُ وتی راجی زُبان یکشل ءَ وانان ءَ دربُرتگ البت اگاں کسے بلوچی وانگ ءَ ھیل نہ اِنت گُڑا پیسر کم کم ءَ بلوچی درونتاں وانان ءَ بلوچی وانگ ءَ ھیل بہ کنت وھدیکہ کہ تو بلوچی درونت سرجمی ءَ ونتگ اَنت گُڑا تو بلوچی نبشتانک ءُ آزمانکاں وانان بہ کن ئے، دلگوش بہ کن کہ ھرچیزے تو وانگ ءَ بہ ئے گُڑا آئی ءِ ردیاں ھم چاران کن، چی ءَ کہ مارا چہ وتی ردیاں دربرگ لوٹ ایت، بزاں ما بلوچ راج ءَ وت ماں وت وانگی اِنت انچوشکہ انگریزی ءَ “Self Study” گْوش اَنت ئِے چی ءَ کہ مئے گُلامیں راج ءِ نودربریں زھگاں پہ وتی جند ءِ راجی زُبان ءِ دربرگ ءَ دگہ ھچ وانگجاہ ءُ آسراتی نیست انت ءُ راج ءِ پدریچ چہ دھکاں پارسی ءُ ھندی ءِ وانگ ءَ بے وس اِنت۔ اگاں تو وتی راجی زُبان ءَ وت وانان بہ ئے گُڑا تو کم کم ءَ وت نبشتہ ھیل کن ئے ما نہ گْوش ایں کہ تو یکپارگی نبیسّگ ءَ بندات بہ کن ئے باید اِنت تو نبیسّگ ءِ وھد ءَ اشتاپ مہ بہ ئے بلکیں کم کم ءَ نبیسّان کن، ھر وڑیں گالرِدے نبیسّ ئے گُڑا تو وتی ھمے گالرِد ءَ دو سے رَند ءَ وت چمشانک دیان ءَ راست بہ کن، اگاں تو وتی ردیاں وت راست کنان بَہ ئے گُڑا دربر ئے۔ ھمے ڈول ءَ مارا ونتگیں درونت ھم یات بنت، اگاں ما وٹسیپ ءُ پیسبُک ءَ راج ءَ ھم وانین ایں گُڑا راجی زُبان ھم دیمروئی کنت ءُ پد ءَ ما وت وتی راجی زُبان ءَ ھم زبر بَہ ایں۔

امیت انت کہ شُمارا چہ اِے نبشتانک ءَ بازیں سرپدی یے رستگ، شُما زیت راجی زُبان ءَ وانان دربر اِت ءُ پہ راجی زُبان دیمروئی ءَ زُبان ءِ ھزمتکار ءُ جُھدکار جوڑ بَہ اِت بلوچی شالا دیمروئی بہ کنات ءُ پہ راجی زُبان ءِ دیمروئی ءَ مُدام جُنزان بات اِت شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور پروم ءَ پاکستانی پوج ءَ یک دگہ ورناہ ءِ زورانسری آوار جتگ ءُ بیگواہ کتگ –

گوستگیں لھتے روچانی میان ءَ اے چارمی مردم انت کہ پوج ءَ پروم ءِ میتگ ءَ چہ زورانسری آوار جتگ ءُ بیگواہ کتگ –

یک روچ ءَ پیش پاکستانی پوج ءَ پروم ءِ دمگ کلیری ءَ احمد ء خداداد ءُ آئی ءَ پیش نوکبند ءَ یک لوگ ءَ بیڑ برتگ فیصل ء دوست محمد ءُ باسط ء خالد ھم زورانسری آوار جتگ ءُ بیگواہ کتگ انت کہ انگت بیگواہ انت –

مروچی زورانسری آوار جنگ بیگواہ بوتگیں مردم ءِ پجار صوال جان ء عرض محمد ء نام ءَ چہ بوتگ –
دمگی اھوالکار ءِ رِد ءَ اے ورناہ مروچی گاڑی سواریں سلاہ بندیں مردماں پروم دز ءَ چہ زورانسری آوار جتگ ءُ بیگواہ کتگ –

زانگ بہ بیت کہ بلوچستان ءَ زورانسری آوار جنیانی درگت ءَ راج دوستیں مردمانی گوشگ انت اے وڑیں کاراں پاکستانی پوج ءُ آئی ءِ جوڑ کرتگیں ڈیتھ اسکواڈ ھوار انت –

مروچی زورانسری آوار جنگ بوتگیں صوال جان ءِ یک دگہ برات ءِ پوج ءَ پیسر ءَ دو رند ءَ آوار جتگ ءُ بیگواہ کتگ کہ دو سال ءَ پوج ءَ گون بوتگ ءُ پدا رند ءَ یل کنگ بوتگ وھدیکہ مروچی آئی ءِ کستریں برات زورانسری آوار جتگ ءُ بیگواہ کتگ –

تربت سول سوسائٹی ےِ کنویںئر کامریڈ گلزار دوست ءَ تربت پریس کلب ءَ پریس کانفرنس کنان ءَ گُشتگ کہ پنجگور ءِ جاورھالانی ناگیگی پدردی اِنت یک ماھے ءِ تہ ءَ پنجگور ءَ سِی ءُ پنچ کُشگ بیتگ اَنت، ھمے رنگ ءَ گوادر ءَ ٹرالر مافیا ءُ ساپیں ورگی آپ ءِ نہ بوگ دمگی مردمانی سکیں ناوشیں جیڑھے بلے ھاکم بلوچ ءُ بلوچستان ءِ جیڑھانی سر ءَ بے تھمبل ءُ سرگوزی اَنت –

پریس کانفرنس کنان ءَ تربت سول سوسائٹی ءِ باسک امجد مراد ءُ مبارک بلوچ ھم جاڑیگ بیتگ اَنت – کامریڈ گلزار دوست ءَ گُشتگ کہ مارا پیسر ءَ ھم ھاکماں گوں بے اوست بیتگ اِنت ءُ انگت ءَ ھم بے اوست اِنت-

آئی ءَ گُشتگ کپ پنجگور ءَ لس مھلوک ءِ کُشت ءُ کوش ءُ گوادر ءِ جھمنندیں مردم چُنڈے نگن ءَ زبھر کنگ ءِ ھلاپ ءَ تربت سول سوسائٹی ھمدردی کنت ءُ اے ناوشیں جاورھال ءَ آیانی گون ءَ اوشتوک اِنت، پنجگور ءَ گوستگیں بازیں ھپتگاں یک رپک ءُ ھنرے ءَ نہ کُٹوکیں کُشت ءُ کوش بندات کنگ بیتگ اَنت کہ چریشانی تہ ءَ کسان سالیں قدیر ھلیل، چاگردی باسک جلیل سنجرانی ءَ ھوار یک ماھے ءِ تہ ءَ کچ ءُ کساس سِی ءُ پنچ مردم کُشگ بیتگ اَنت –

نِی جاور ھال ھنچش اتکگ ءُ سر بیتگ اَنت کہ لس مھلوک ءَ بِل جنین ءُ زھگ ھم مپھوز نہ اَنت بلے بژن ءِ گپ ایش اِنت کہ سرکاری ادارہ، انتزامیہ ءُ ھاکم اے آسیں جاور ءِ ندارگ ءَ بس چارگ ءَ اَنت-

ھمے رنگ ءَ گوادر ءَ دری ٹرالر مافیا جھمنندیں دریاوردانی زرکاری ءِ کوشاں کنگ ءَ اَنت ءُ نوکیں شھرے ءِ نام ءِ سر ءَ گوادر ءِ جھمنندیں مردم ترمپے آپ ءَ تلوسینگ بیگ ءَ اَنت ءُ دریا دریاوردانی دست ءَ پچگرگ ءِ سرجمیں چِن ءُ لانچ کنگ بیتگ اَنت، گوادر ءِ مھلوک گوستگیں بازیں وھداں وتی بنکی ھکانی واستا زھرشانی کنگ ءَ اَنت بلے واھشت پرستیں ھاکم وتی واھشتانی تہ ءَ گاری ءِ سبب ءَ آیانی گوشاں گواتے ھم نہ سُرین اِت تربت سول سوسائٹی اے لوٹ ءَ کت کہ گوادر ءُ پنجگور ءِ جیڑہ ھلاس کنگ بہ بنت ءُ مھلوک ءَ انساپ ءُ انسانی ھکانی بنکی ھک دیگ بہ بنت ءُ اگاں ناں تربت سول سوسائٹی گوادر ءُ پنجگور ءِ مھلوک ءِ واستا دگانی سر ءَ درایگ ءَ ھچ چک ءُ پد نہ بیت اِنت –