TBP Balochi

سربوتگیں ھالانی رِد ءَ بلوچستان ءِ دمگ شال، بولان، پشین، دکی ءُ نوشکی ءَ جتا جتائیں وئیلاں زھگ ءُ زالبولاں ھوار ھپت مردم بیران بوتگ اَنت ءُ نُھ ٹپی وھدیکہ بارکھان ءَ دیوال ءِ کپگ ءِ سوب ءَ مالدار ءِ شست دلوت مرتگ اَنت-

گیشیں ھالانی رِد ءَ بلوچستان ءِ بنجاھی شھر شال ءَ گاڑی ءِ چپی بوگ ءَ کسانیں زھگے بیران بوتگ ءُ ھشت مردم ٹپی بوتگ اَنت –

پولیس ءِ رِد ءَ وئیل شال ءَ لکپاس ءِ دمگ ءَ دیم ءَ اتکگ کہ گاڑی چپی بوگ ءَ امین اللہ نامیں گونڈلے بیران بوتگ وھدیکہ زھگ ءُ زالبولاں ھوار ھشت مردم ٹپی بوتگ انت – پولیس ءَ ٹپی ءُ بیران بوتگیں مردم شیخ زید نادراہ جاہ ءَ سر کنگ بیتگ انت اود ءَ اژدری چار ءُ ٹپاس ءَ پد گونڈل ءِ جون کھول ءِ ھوالگ ءَ کنگ بیتگ –

دومی نیمگ ءَ بلوچستان ءِ دمگ بولان ءَ ناشناسیں مردمانی تیرگواری ءَ یک مردمے بیران بوتگ – لیویز ءِ رِد ءَ کچھی ءِ دمگ سنی ءَ ناشناسیں مردماں عطا محمد ء محمد امین تیرباران کتگ ءُ کشتگ – لیویز ءَ مرد ءِ جون دست گپتگ ءُ نادراہ جاہ ءَ سر کتگ اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ – لیویز ءِ رِد ءَ وئیل پیشی زاتی جیڑہ ئِے سوب ءَ بوتگ –

ھمے وڑ گوستگیں روچ ءَ بلوچستان ءِ دمگ پشین ءَ سَے وئیلاں دو زالبولاں ھوار سَے مردم کُشگ بوتگ اَنت –

ھالانی رِد ءَ بوستان ءِ دمگ جلوگیر ءَ یک ناشناسیں جِنک ءِ تیر سپتگیں جون دست کپتگ کہ گُٹ ءَ تیر جنگ کشگ بوتگ، دمگی لیویز ءَ اژدری چار ءُ ٹپاس ءِ ھاتر ءَ جون پشین نادراہ جاہ ءَ سر کتگ – دومی وئیل بوستان کلی ملا خیل ءَ دیم ءَ اتکگ کہ عبدالاھد ءَ وتی لوگی ءَ را کارچ جتگ کشتگ ، دمگی لیویز ءَ کشندہ دزگیر کتگ جون اژدری چار ءُ ٹپاس ءِ ھاتر ءَ پشین نادراھجاہ ءَ سر کتگ –
ھمے وڑ پشین شھر کلی غریب آباد ءَ ناشناسیں مردماں سردار ء شیر محمد تیرباران کتگ کشتگ ءُ آئی ءِ ھمراہ علاوہ دین ٹپی کتگ ءُ تتکگ انت دمگی پولیس ءَ ارزی نبشتہ کتگ کشندھانی پٹ ءُ پول برجاہ انت –

دگہ وئیلے بلوچستان ءِ دمگ دکی ءَ دیم ءَ اتکگ کہ اشکرانی کاریز ءَ ھاک ءِ کپگ ءَ یک کاریز کارے بیران بوتگ –

وئیل ءَ بیران بوتگیں مردمے پجار زبیح اللہ جھمنند اوگانستان ءِ نام ءَ چہ بوتگ – اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ ءُ اے درگت ءَ دمگی پھازدار گیشیں پٹ ءُ پول کنگ انت ـ

ھمے وڑ نوشکی ءَ کرنٹ لگگ ءِ سوب ءَ زالبولے بیران بوتگ –
ھالانی رِد ءَ نوشکی ءِ دمگ قادر آباد ءَ کرنٹ لگگ ءِ سوب ءَ زالبولے بیران بوتگ، ھمے گوشگ بوگ ءَ انت وئیل ٹرانسفارمر ھرابی ءِ ءُ بازیں والٹیج سوب ءَ دیم ءَ اتکگگ – وئیل ءَ ابید دمگی مردمانی بازیں الکٹرک سامان ءِ چریشی ءِ سوب ءَ ستکگ انت ءُ ناکارہ بوتگ انت ـ دمگی مھلوک ءَ چہ کیسکو ءَ لوٹ کتگ کہ مدامی دمگی لیناں چیک ءُ تان بہ کن انت تانکہ چشیں وئیل دو بر مہ بیت –

دگہ وئیلے بلوچستان ءِ دمگ بارکان ءَ دیما اتک ھورانی سوب ءَ دیوال ءِ کپک ءَ مالدار ءِ شست دلوت مرتگ انت – وئیل بارکان ءِ دمگ رڈکن ءَ دیم ءَ اتکگ کہ ھور ءِ سوب ءَ حق نواز حسنی ءِ لوگ ءِ دیوال کپتگ ءُ چریشی ءَ شست دلوت مرتگ اَنت – ھمے گوشگ بوگ ءَ انت کہ مالدار ءَ کساس ھپت لک ءِ مالی تاوان بوتگ اَنت –

بلوچستان ءِ بنجاھی شھر شال ءِ پریس کلب ءِ دیم ءَ زورانسری آوار جنگ بوتگیں بلوچانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ چل ءُ ھپت روچ سرجم بوتگ – مروچی چہ ھب چوکی ءَ سیاسی ءُ چاگردی باسک اللہ داد بلوچ، غلام محمد بلوچ ءُ چہ شال ءَ سلطان کاکڑ ءُ دگہ مردماں بنجل ءِ تر ءُ تاب کتگ بیگواھیں مردمانی کھولانی گوما دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءِ تہ ءَ زوراکی برجاہ انت ءُ پاکستان ءِ بنجاھی سرکار ھم اے جیڑہ ءِ سر ءَ پد ماں پد وتی درشاناں بدل کنت راستی ءَ پنجاہ ھزار گیش بلوچ پرزند پاکستان ءِ زنداناں بندیگ انت ھمگ روچ مرگ ءِ دیمپانی ءَ کنگ انت بلے پاکستانی ھاکم وتی اے کتکاریاں چہ انکاری انت –

آئی ءَ دیمتر ءَ گوشتگ کہ میان اُستمان ءِ رد دیگ ءِ ھاتر ءَ پاکستانی سرکار ءَ بازیں مراگش ءِ اڑ داتگ ءُ بازیں کمیٹی ءِ ھم اڑ داتگ بلے ھچ وڑیں کمیٹی ءَ روچ ء مرچی ھچ وڑیں رپورٹ دیم ءَ نیاؤرتگ پرچا کہ بلوچستان یک چھاونی (پوجی بنجل) دروشم ءَ جوڑ بوتگ کہ اود ءَ درسیں پیسلہ پوج ءُ ایجنسیانی دست ءَ انت اگاں اد ءَ چیریں ادارھانی زوراکی بگیری ءَ کسے توار چست بہ کنت گڑا آ نشانگ کنگ بیت دومی نیمگ ءَ انسانی ھکانی میان اُستمانی ادارھانی بس سالانہ رپورٹ ابید دگہ ھچ نہ انت – بلوچستان ءِ تہ ءَ ھچ وڑیں میکنزم نیست ءُ تاں ھما وھد ءَ اے جاور ھال کسی ءَ منیٹر نہ کرتگ انت اشی ءَ ابید انسانی ھکانی ادارھانی نیمگ ءَ بیگواھیں مردمانی کھولاں ھچ وڑیں کانودی کمک گون نیست –

ماما قدیر بلوچ ءِ گوشگ ات کہ دلگوش کرزیں گپ ءِ ایش انت کہ انسانی ھکانی ادارھاں ھما کچ کہ بیگواھیں مردمانی شنگ کرتگ آ وی بی ایم پی ءَ رد کتگ – اے جاورھانی تہ ءَ ھمک روچ بلوچستان ءَ نودربر، استاد، وکیل، ڈاکٹر، سیاسی باسک ءُ دگہ پگرانی منوگر پاکستانی ایجنسیانی دست ءَ آوار جنگ ءُ شھید بوگ ءَ انت ھمے ھاتر ءَ وی بی ایم پی ءُ بلوچ راج ءَ پاکستانی ھاکم پارلیمنٹ ءُ دگہ ادارھانی سر ءَ ھچ وڑیں اوست نداریت پرچاکہ آ دوازدہ سالاں بگیر چہ دروگیں تسلی دیگ ءَ دیم شت نہ بوتگ ھمے ھاتر ءَ بلوچ راج اقوام متھدہ ءِ سر ءَ اوست داریت امیت کنت کہ ھما وڑ ءَ آئی ءَ رودراتکی تیمور ءُ کوسوو جیڑہ ءِ سر ءَ گامگیج زرتگ ھمے وڑ بلوچستان ءِ تہ ءَ ھم کنگ بہ بیت ءُ بلوچ راجداریں باسک ءُ دگہ پگرانی منوگریں مردماں ھوار سرجمیں بلوچ راج ءَ زورگیر ءِ زوراکیاں چہ رکینگ ءَ وتی کرد ءَ پیلو بہ کنت –

سر بیتگیں ھالانی رد ءَ بلوچستان ءِ دمگ کیچ ءِ ھند تمپ ءَ گوستگیں روچ ءَ ایف سی ءِ زنداناں بندیگیں بلوچ ورناہ گوھرام بلوچ ءِ کھول ءَ را مروچی ایف سی ءِ کارمنداں زر زیرگ ءُ کوش ءِ ھلاس کنگ گوشتگ –

دمگی مردمانی رد ءَ مروچی ایف سی ءِ دمگ ءِ سروک گوھرام ءِ لوگ ءَ اتکگ ءُ آیاں گوشتگ کہ مئے دست ءَ ردی ءِ بیتگ ءُ مارا پھل بہ کن اِت ءُ وتی زھگ ءِ کوش ءِ بدل ءَ زر بہ زیر ایت –

دمگی مردمانی رد ءَ گوھرام ءِ کھول ءَ زر ءِ زیرگ نہ منّ اِتگ ءُ گوشتگ کہ دگہ ھچ گپ کرت نہ کن ایں بلے مئے زھگ ءَ واتر کُت کن ئے یا مئے زھگ ءَ دوبر زندگ کت کن ئے؟ –

زانگ بہ بیت گوھرام دوزادہ جون ءَ تمپ کنشکلات ءَ ایف سی ءِ کارمنداں لشکر کشی ءِ میان ءَ دگہ دو کسانی ھواری ءَ آوار جتگ ءُ برتگ ءُ گوستگیں روچ ءَ آئی ءِ جون آئی ءِ کھول ءِ ھوالگ ءَ کرتگ-

دمگی مردمانی رد ءَ گوھرام ءَ زھرناکیں انجکشن ھم جنگ بیتگ ءُ آ لَٹ ءُ کُٹ ھم کنگ بیتگ ءُ چریشی ءَ آ زندان ءَ بیران بیتگ –

زانگ بہ بیت بلوچستان ءَ چِد ءُ پیسر ھم چوشیں ھال بیتگ اَنت ءُ سیاسی ءُ انسانی ھکانی گلانی گوشگ اِنت کہ بلوچستان ءَ بازیں ورنا ھمے رنگ ءَ زندانانی تہ ءَ کُشگ ءُ گار کنگ بیتگ اَنت کہ آیانی پژدر ءَ سرکار وت ءَ یک نیمگ ءَ بے دلگوش کنگ اِنت –

دومی نیمگ ءَ شال ءَ گار ءُ بیگواھیں مردمانی ھاتر ءَ وائس فار بلوچ مسنگ پرسنز ءِ نیمگ ءَ زھرشانی برجاہ اِنت –

سر بیتگیں ھالانی رد ءَ بلوچستان ءِ دمگ کیچ ءِ ھند مند ءُ تمپ ءَ نشہ آماچیں دو کس بیران بیتگ اَنت –

گیشیں ھالانی رد ءَ مروچی مند ءَ کرسٹال ءِ آماچیں نجیب ستار بیران بیتگ،ھالانی تہ ءَ گوشگ بیتگ کہ نجیب بازیں وھدے بیت کہ نشہ آماچ بیتگ ءُ چریشی ءَ آئی ءَ گیشتریں نشہ کرتگ ءُ مروچی آ بیران بیتگ –

ھمے وڑ ءَ گوستگیں روچ ءَ تمپ ءِ جھمنندیں اسکول ءِ استاد ماسٹر رستم ھم نشہ آماچی ءِ بازیں وھداں پد بیران بیتگ –

سول سوسائٹی ءِ رھشوناں گوشتگ کہ دمگ ءَ نشہ ءِ ھلاسی ءَ انتزامیہ گامگیج بہ زور ایت ءُ دمگ ءَ چوشیں سِل آواریں زھراں پاک ءُ پلگار بہ کنت –

زانگ بہ بیت بلوچستان ءِ بازیں جاھاں نشہ شنگ ءُ تالان کنگ بیتگ ءُ لس مھلوک ھمے نشہ آماچ اَنت –

گوستگیں روچاں چاگردی رسانکجاھاں پنجگور ءَ بندوکیں کسان سالیں زھگے ءِ تامر شنگ بیتگ اَت کہ آ تامر ءِ تہ ءَ سِلگتیں نشہ آماچ اِنت ءُ آ جتا جتائیں دردانی آماچ اِنت –

بلوچستان ءَ لس مھلوک ءِ گوشگ اِنت کہ نشہ باپاری کنوکانی پشت گیری ءَ مزنیں دست ھوار اَنت کہ لس جاھاں نشتگ ءُ نشہ بھا کنگ ءَ اَنت –

بلوچستان ءِ بازیں جاھاں نشہ ءَ وتی ارجان جتگ اَنت ءُ تنی وھدی بازیں ھسابے ءَ ھمے گندگ ءَ کیت کہ نشہ دمگانی تہ ءَ لس چیزانی وڑ ءَ باپاری بیگ ءَ اَنت –

نبشتانک: بےاوستیں راجدوست ءُ زُبان دوست

نبشتہ کار:اومیتان اومر

دی بلوچستان پوسٹ

چاگردی رسانکدر بٹاکیانی بازار اِنت۔انچائیں راجدوست ءُ زبان دوست چو کٹگ ءَ باز اِنت،بلے ھمے کٹگانی لِرتاں ءَ دانگے دانگے سھری ھم کپتگ کہ برےبرے گمان بیت کہ چہ زبان ءُ راجدوستی ءَ گیش وتی جند ءَ پیشدارگ لوٹ اَنت۔چونائی ءَ آ کہ زُبان دوست اَنت آئیانی کار وت گپ کن اَنت،آیاں بٹاک ءُ بازاری بوگ ءِ ھاجت نیست ءُ ھمے وڑ ءَ راجدوستی ھم چو روچ ءَ پدر اِنت،آ کہ راجدوست اَنت آیانی کار ءُ راہ گیش اِتگ اَنت۔چو و پارلیمانی مردم وت ءَ راجدوستی ءِ نام ءَ دیم ءَ کار اَنت،بلے کِرد اِش پدر اِنت کہ چنچوک راج ءِ تباھی ءَ دُژمن ءِ ھمکاری ءَ کنگ ءَ اَنت۔

وھد ھرچیز ءَ پدر کنت،ھما وھداں کہ دُردانگیں سید ھاشُمی ءَ پہ زُبان ءَ تگ ءُ تاچ کُتگ ءُ کار ءَ بوتگ آ وھد ءَ ھم لھتیں بٹاکی بوتگ کہ آیاں ھم وت ءَ زُبان دوست گْوشتگ ءُ دیم ءَ اتکگ اَنت بلے مرچی ما گندگ ءَ ایں کہ سید ءِ کار گپ کن اَنت ءُ آ انگت گار اَنت آ دور ءِ مردماں انگت چیزے بگندئے ھست کہ برےبرے اھوتی انگت گْوش اَنت کہ ما بازیں کاراں گوں سید ءَ ھوار بوتگیں بلے ۔

راجدوستی ءُ زُبان دوستی منی نِزّ ءَ یکیں چیز اَنت داں مردم راجدوست مہ بیت آ زُبان دوست بوت نہ کنت۔بلے بلوچ ءِ کِر ءَ ھرچی چپی اِنت۔بلوچ ءِ آجوئی دوستیں گل ھم انچُش اَنت یک نیمگے پہ زمین ءَ وتی جاناں ندر کنگ ءَ اَنت ءُ دومی نیمگ ءَ زُبان ءَ لپاشگ ءَ اَنت انگت راجدوستیں گلانی تہ ءَ چوشیں ھچ گلے دیم ءَ نیاتکگ کہ ما بہ گْوش ایں اے پہ زُبان ءَ ھم چیزے کن اَنت ھرکسی اوست گوں اردو ءَ بستگ ءُ اُردو ءَ لانک پہ بلوچی ءِ بیگواہ کنگ ءَ۔

پہ نادان ءَ ھلوا ءِ ورگ گْران اِنت۔گلانی تہ ءَ کہ شھید بیتگیں سرمچاران ءَ نام دیگ بیت دستار ءِ وتن،یا پلاں اسکوڈ یادگہ بازیں انچائیں گپ کہ چہ دری زُبان ءَ زُرتگ ءُ وتی گرانبھائیں شھیدانی نام ءَ کُتگ اَنت۔اے راجدوستانی وتی زُبان ءِ نزانگ ءُ چہ چیردستی ءَ گیش چیردست بوگ ءِ نشانی اِنت۔بایدیں راجدوستیں کماش وتی اے چیردستی ءِ ریشگاں بہ گُڈّ اَنت اگاں نہ پہ ما گیش درامدانی زُبان ءِ رواج دیگ گران ءَ کپ ایت۔

زُبان دوست ھم چہ زُبان ءَ گیش پیشدارگ ءِ ھشتر ءَ سوار اَنت۔وتی زُبان ءِ گالاں مانا کُرت ءُ زانت نہ کن اَنت،ملا پازُل ءَ ونت ءُ مانا کُت نہ کنت،سید ءِ گالاں گیش اینت نہ کنت بلے دری لبزانک ءِ دُرسیں ندکارانی ناماں پہ شانے گیپت ءُ بٹاک جنت کہ پلاں کس من ونتگ ءُ پلاں کس ءَ اے گْوشتگ،داں مردم وت ءَ مہ زانت ءُ درمہ بارت گڑا چہ دری لبزانک ءَ چے کاریت ءُ وتی لبزانک ءَ گُل ءُ گُلزار کنت؟-

ما وَ انگت ءَ نزانیں مست توکلی کئ اِنت،جام دُرک کَے بوتگ،بلوچی شائری ءِ تہ ءَ ملا پازُل کجام جاہ ءَ اوشتاتگ ءُ ملا پازُل ءِ شائری ءَ پما کئے مانا کنت،اے شائری ءَ کئے نگد کنت ءُ مارا دنت، وھدے کہ ما گوں دری لبزانک ءِ اردو رجانکاں وت ءَ ملما کنگ ءَ ایں مئے وتی و ھمک چیرتر ایت بلے اے بابت ءَ کس نہ جیڑ ایت،باز انچیں مردم من وت زاناں کہ منی نزیک ءَ اَنت آیاں بس دری ندکارانی لھتیں نام یات کُرتگ ءُ ھرجاہ ھمیشانی نام ءَ گیپت ءُ گپ کنت کہ پلاں ندکار ءَ بوان اِت پلاں ندکار ءَ بوان اِت۔نوں چہ اے زُبان دوست ءُ راجدوست ءَ راج کجام اوست ءَ بہ دار ایت کہ راج ھمیش اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: ھَور ءِ شھم

نبشتہ کار: شاری بلوچ

دی بلوچستان پوسٹ

انچو کہ ھَور ءَ ایر دات من پہ تگ شُت لوگ ءِ تاک ءِ دپ ءَ اُشتات ھور ءِ ندارگ ءَ چارگ ءَ بوت آں زمین ءِ بچکند منی گوشاں پُرْشان اِتاں اجب کیپے سمین ءِ کدہ ءَ اَت گُشئے مرچی کُمار شنزگ ءَ اَت دیوانگیں ھَور زمین ءَ انچو بوسہ دیگ ءَ اَت گُشئے کرنے بیت کہ گِستا بوتگ انت مرچی ناگت ءَ راہ رواجکی دُچار کپتگ اَنت ءُ مارگ ءَ اَنت کہ ھمے کترہ ءُ دمان ءَ پد ءَ گِستائی ءِ گمان میلانک اِنت۔
پمیشکا منی تُنّیگی ءَ وتی کِسّہ شُمشت، بس ھَور ءُ زمین اَت ھمے کیپ ءَ من انچو بے کِمار اِت آں کہ منا سما نہ بوت کہ کَسّے منی کَش ءَ اوشتاتگ ءُ آ ھم ندارگ سئیلی اِنت ”ھاجگُل تَچ کہ ترا ھَور ءَ میسینت“ من پچ لرزت آں داں گُشئے ھَور ءِ سر ءَ مردمے نہ بلکیں ھور ءِ شھم ءِ جند اِنت کہ تچگ ءَ اِنت پہ کُلّے ءَ ھَور مندگ اَت کہ آ تاں کُلّ ءَ سر بہ بیت پد ءَ چہ زمین ءِ امبازاں انچو در لگوشت کہ چو سِستگیں استالے چہ چماں اندیم بوت بلے ھما اِنت کہ ھور ءِ شھم دیدگاں کدی اندیم نہ بیت ھیال ءِ سپر مُدام رؤت داں ھَور ءِ شھم ءَ ھنکین کنت بلے کدی تَرّ نہ بیت۔

مرچی شش سال کُبل اَت انچوش کہ جمبر ءَ بُرّ اِت آ جَکّان ءَ چہ کُل ءَ در کپت ھَور ءِ اوشتاتگیں آپ ءِ توک ءَ وتی دپ ءِ شیکر ئِے تُک کُت منی جان ءِ توامیں پُٹ کُنٹگ بوت ءُ آس اِش گِپت داں ھَور ءِ ھیسکارگ ءِ توار اَت کَسّے کَور ءَ مان دیان اَت ناگت ءَ منی دپ ءَ در اَتک ”ھاجگل تئی شھم ھار ءَ بُرت ءُ من آسے ءَ لیپگ آں“ کسّے کہ کَور ءَ سنگ جنَگ ءَ اَت گُشت ئِے ”کلاگ ءُ بَٹ ھمسرو اَنت بلے ھمسر نہ اَنت“۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کوپا امریکہ ءِ اولی رؤنڈ ءِ سیمی گوازی ءَ ارجنٹینا ءُ چلی یک یک گولے ءَ دیمیگ ءُ چارمی گوازی ءَ پراگاؤ سَے گول ءَ باج برتگ، پورو کپ ءَ پرتگال ءَ سَے گول ءُ پرانس یک گولے ءَ باج برتگ گوازی وتی نام ءَ کتگ انت –

کوپا امریکہ ءِ گوازی برجاہ انت مروچی اولی راؤنڈ ءِ سیمی گوازی ارجنٹینا ءُ چلی ءِ میان ءَ بوتگ ءُ چارمی گوازی پیراگاؤ ءُ بولویا ءِ میان ءَ بوتگ – ارجنٹیا ءُ چلی ء یک یک گولے ءَ دیمیگ بوتگ انت وھدیکہ بولویا ءَ یک گولے داتگ، پیراگاؤ ءَ سَے گول ءَ چہ باج برتگ ءُ گوازی وتی نام ءَ کتگ –

ارجنٹینا ءِ نیمگ ءَ چہ میسی ءَ یک گولے داتگ چلی ءِ لیبی ورگس ءَ جوانی ءَ لیب کنان ءَ گول موکتگ ءُ ھردو دیمیگ بوتگ انت – وھدیکہ بولویا ءِ نیمگ ءَ چہ اِرون سویندرا ءَ یک گولے داتگ ءُ پیرگاؤ ءِ نیمگ ءَ چہ اینجل رومرو دو گول ءُ الیجندارو ءَ یک گولے داتگ ءُ گوازی وتی نام ءَ کتگ –

کوپا امریکہ ءِ دیم ءِ گوازی آدینگ ءِ روچ ءَ کولمبیا ءُ وینزیلہ، برازیل ءُ پیرو ءِ میان ءَ بوگ ءَ انت ـ

دومی نیمگ ءَ یورو کپ فٹبال گوازی اولی راؤنڈ ءَ مروچی ھنگری ءُ پرتگال، پرانس ءُ جرمنی ءِ میان ءَ گوازی بوتگ، وھدیکہ گوستگیں روچ ءَ اسپین ءُ سویڈن ءِ میان ءَ گوازی ءَ دوئیں ٹیم دیمیگ بوتگ انت-

مروچی ھنگری ءُ پرتگال میان ءَ بوتگیں گوزی ءَ پرتگال ءَ سَے گول ءَ ھنگری برتگ گوزی وتی نام ءَ کتگ، پرانس ءُ جرمنی ءِ میان ءَ بوتگیں گوازی ءَ پرانس ءَ یک گولے ءَ جرمنی برتگ گوازی وتی نام ءَ کتگ –

پرتگال ءِ نیمگ ءَ چہ رونالڈو ءَ دو گول داتگ ءُ یک گولے ءِ رپھیل ءَ داتگ گوازی وتی نام ءَ کتگ ھنگری ءِ نیمگ ءَ چہ ھچ گول کنگ نبوتگ وھدیکہ پرانس ءِ نیمگ ءَ چہ ایم ھومِل ءَ یک گول ءِ داتگ جرمنی ءِ دیما باج برتگ گوازی وتی نام ءَ کتگ –

یورو کپ ءِ دیم ءِ گوازی پائینلینڈ ءُ رشیا، ترکی ءُ والس، اٹلی ءُ سویزرلینڈ ءِ میان ءَ بانداتگیں روچ ءَ جتا جتائیں پٹ ءَ بوگ ءَ انت –

سربوتگیں ھالانی رِد ءَ بلوچستان ءِ دمگ مستونگ ءَ دگ ءِ وئیل ءَ یک مردمے بیران ءُ دو ٹپی بیتگ اَنت، ھزدار ءَ تیرگواری ءِ وئیل ءَ دو مردم بیران بوتگ انت وھدیکہ کیچ ءُ نوشکی ءَ دو جون دست کپتگ –

گیشیں ھالانی رِد ءَ بلوچستان ءِ دمگ مستونگ ءَ گاڑی ءِ چپی بوگ ءَ یک مردمے بیران ءُ دو ٹپی بوتگ اَنت –

وئیل کڈکوچہ ءِ دمگ بدرنگ ءِ نزیک ءَ دیم ءَ اتکگ کہ گاڑی ءِ چپی بوگ ءَ لیویز ءِ کارمند عبدالخالق ء محمد افضل جھمنند ھزدار بیران بوتگ ءُ آئی ءِ دو ھمراہ ٹپی بوتگ انت – ٹپی ءُ بیران بوتگیں مردم ریسکیو ءَ دمگی نادراھجاہ ءَ سر کتگ انت اود ءَ اژدری چار ءُ ٹپاس ءَ پد لیویز کارمندے جون کھول ءِ ھوالگ ءَ کنگ بوتگ –

دگہ وئیلے بلوچستان ءِ دمگ ھزدار ءَ دیم ءَ اتکگ کہ ناشناسیں مردمانی تیرگواری ءَ دو برات بیران بوتگ اَنت –
ھمے گوشگ بوگ ءَ انت وئیل زاتی جیڑہ ئِے سر ءَ ودی بوتگ کہ ناشناسیں مردماں باغبانہ گفتاری ءَ اشانی لوگ ءَ پُترتگ ءُ تیرگواری کتگ ءُ تیر گواری ءَ چہ محمد رفیق ءِ عبدالرحمن ءُ آئی برات محمد اکبر بیران بوتگ انت –

دومی نیمگ ءَ بلوچستان ءِ دمگ نوشکی ءُ کیچ ءَ دو جون دست کپتگ اَنت –

ھالانی رِد ءَ نوشکی ءِ دمگ جوئے یک مردمے ءِ جون دست کپتگ جون سول نادراھجاہ ءَ برگ بوتگ، آئی ءِ پجار محمد آصف ء چئیرمین ابراھیم جھمنند زرین جنگل ءِ نام ءَ چہ بوتگ – ڈکٹرانی گوشگ انت کہ ھمے ساھت ءَ کہ جون آرگ بوتگ آئی ءَ سَے ادار بوتگ آئی ءِ کیسگ ءَ مرگی نادراھی ءِ درمان ھم دراتکگ کہ اے مرد مرگی نادراھی ءِ آماچ بوتگ – اژدری چار ءُ ٹپاس ءَ جون کھول ءِ ھوالگ ءَ کنگ بوتگ –

ھمے وڑ کیچ کور ءَ یک مردمے ءِ جون ءِ دست کپتگ کہ آئی ءِ پجار حاجی عبدالغفور ءِ محمد یوسف جھمنند سنگانی سر ءِ نام ءَ چہ بوتگ – ھمے گوشگ بوگ ءَ انت کہ محمد یوسف بیست ءُ ھشت مئی روچ ءَ چہ گار بوتگ ءُ مروچی آئی ءِ جون دست کپتگ –

زانگ بلوچستان ءَ ھمک روچ ناوشیں وئیلانی ھال رسانکدراں شنگ بیگ ءَ اَنت ءُ آیانی پژدر ءَ گیشیں ھال نہ بیگ ءَ اَنت –

نبشتانک: من گون زندگی ءَ چو دُچار کپتگ آں؟

نبشتہ کار:شکیل بلوچ

اولی بھر

دی بلوچستان پوسٹ

“کجا نزانان من ءَ زندگی دُچار کپیت”
“کجا کجا من وتی جند ءَ درپہ در بہ کناں”

من سرپد نہ باں کہ من گون زندگی ءَ دُچار کپتگ آں یا زندگی منی پادان اشکیل بلے ھو! زندگی بزان زندان انچو کہ اِستان ءِ بندیگ جاھان تھاری بنیادم ءَ امباز اِیت من ھم یک تھاریں کوٹی ءِ تہ ءَ ،بس تھاری ءُ ابیتکی ءُ من کوٹی ءِ چاریں نیمگاں نبشتگ کہ گواچِن ءِ سگ ءُ ھاٹگ بنی آدم زات ءَ نیست،بنیادم چہ گواچن ءَ دور ءُ کر ءُ کور۔

ھو!گواچِن ھمیش اِنت کہ من یک مرتگیں زمانگے ءَ ساہ زروگ ءَ آں چو گیمرتگیں دْرچک ءُ تنگیں ولا،بلے راستی اِش اِنت بس شال اِنت کہ مدام آس گپتگیں لھتیں درد منی باتن ءَ دستونک ءُ دردانی زر ءَ ایر بک کنت، دانکہ کدی اے آس گپتگیں ودار دم توسگ ءُ بیران بیت ،اے ودار اندر ءَ چوسگریٹ ءَ روک ءُ درد گون دوتان ھمراہ ءُ شال ءِ موسم ءِ زیبائی ھمسفر “ھو بگندے زندگ بان بلے باریں کدی”
دل ارمان کنت کہ چہ بیران بوتگیں زمانگ ءَ سند ءُ دور برو مرگے ءِ توار ھم گوشان مہ کپ ایت ۔

کہ زمانگ سگگ نہ بیت زمانگ ءَ زندمان برے یک رنگ ءُ دروشم ءَ چمان سھرا کتگ ءُ برے دیدگانی گلگیں ارس، برے بچکند، برے جیڑگ ءُ شال ءِ ابیتکیں دمکانی زیبائی ءِ موسم ءَ وڑ وڑیں ندارگ سمبھینتگ ءُ دُچار کتگ برے گندگ ءُ مھر ءُ برے گریوگ ءُ تھنائی بلے تھنائی ءِ وتی لزت ءُ کپ ایت ھو راستی ھمیش اِنت کہ بنیادم گڈی ھمسفر بوت نکنت ابید چہ مھروانیں کتاب ءُ روکیں سگریٹ ءِ مھران اَنت کہ مدامی ھمسفر اَنت ۔

بگندے مردم من ءَ دیوانگ سرپد بنت کہ شال ءِ بے تواریں دمکان ویلہ ،یلچار ،سگریٹ ءِ سر ءَ سگریٹ پرچا کہ اے دمکان من ءَ را بازیں نا آشناھاں گوں شناسی کتگ شال ءَ جیڑگ پرماتگ ،مھر داتگ ءُ درد ھم بکشاتگ وھدے کہ من زندگی ءِ کتاب ءِ دپ ءَ پچ کناں ھمک تاکدیم زمانگ ءَ راَ یک نوکیں دروشمے ءَ سھرا کنت ءُ نوکیں درونتے دنت ءُ ھمک درونت وتئی اندر ءَ بیگواہ کنت ءُ پد ءَ ھمے درونت ءِ تہ ءَ چاکر ءِ کسہ من ءَ گیر کیت کہ چاکر زندگ ءُ بلے گون بیرانان شمار ءُ کہ زمانگ ءِ بار داب ءَ دیستگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءَ سر بیتگیں ھالانی رد ءَ لس مھلوک ءَ زمینانی زورگری ءِ ھلاپ ءَ وشبود ءِ جھمنندیں مھلوک ءَ زھرشانی کرتگ ءُ سی پیک دگ بند کرتگ –

گیشیں ھالانی رد ءَ دگ ءِ بندی ءِ سبب ءَ ھردوکیں نیمگاں رؤ ءُ آؤکیں گاڑی مھتل بیتگ اَنت ءُ بازیں کچے ءَ گاڑیانی لین اوشتوک اَنت ءَ چریشی ءَ مساپر جنجالانی دیمپان اَنت –

زھرشانی کنوکانی گوشگ اِنت کہ مئے زمیناں زوراک زورانسری گرگ ءُ وتی نام ءَ کنگ ءَ اَنت ءُ ما بے زمین بیگ ءَ اِنت –

آیانی گوشگ اِنت گوست ءَ ھم ما زھرشانی کرتگ ءُ بلے کسے ءَ مئے گپ دلگوش نہ کرتگ اَنت ءُ ناکہ انتزامیہ ءَ چوشیں ترندیں گامگیجے زرتگ ءُ چریشی ءَ زورگر گیشتر شیکر بیتگ ءُ مئے زمیناں گرگ ءَ اَنت –

زھرشانی کنوکانی گوشگ اِنت مئے زھرشانی ھما وھد ءَ داں برجاہ مان اِت کہ مارا تچکیں سدکی ءِ دیگ مہ بیت ءُ مئے زمینانی زمہ واری ءَ بہ زور ایت-

زھرشانی کنوکانی گور ءَ تھسلدار پنجگور شتگ آئی ءَ نشتگیں مھلوک ءَ گوں گپ ءُ تران کرتگ بلے آ وتی گپ ءُ تران ءَ بے سوب بیتگ ءُ واتر بیتگ –