TBP Balochi

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں کیچ ءِ بنجاھی شھر تربت ءِ دمگ ھوت آباد ءَ دگ جوڑ کنوکیں کمپنی ءِ سر ءَ اُرش کُتگ کمپنی ءِ مشینری تیر جتگ ءُ مانداشتگ انت –

کمپنی ءِ مشینری ءِ ماندارگ ءُ آئی ءِ تباہ کنگ ءِ زمّہ واری بلوچ سلاہ بندیں گل بلوچ ریپبلکن آرمی ءَ منّ اِتگ-

بلوچ ریپبلکن آرمی جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں گوستگیں شپ ءِ ادار یازدہ ءَ تربت دمگ ھوت آباد ءَ زورگیریں پوج ءِ نپ ءُ سیتّانی ھاتر ءَ جوڑ بوؤکیں کمکی دَگ ءِ سر ءَ کار کنوکیں کمپنی ءِ مشینریانی سر ءَ تیر گواری کتگ ءُ بے کار کتگ اَنت ءُ پد ءَ دراھیں مشینری مانداشتگ اَنت-

جارکش ءَ وتی درشان ءِ تہ ءَ گوشتگ کہ ما یکرندے پد ءَ سرجمیں ٹھیکیداراں مکن کن ایں کہ زورگیریں پاکستان ءِ پوج ءِ پولنگ آماچیں پندلاں گیشتر مھکم مہ کن اَنت۔

آئی ءَ گوشتگ کہ پاکستانی پوج ءِ نپ ءُ سیتّانی ھاترءَ کارمرز بوؤکیں پروجکٹسانی سر ءَ کار کنوکاں ترندیں آسرانی دیمپانی کنگ کپیت ءُ مئے اے دابیں اُرش بلوچستان ءِ آجوئی تاں برجاہ مان انت –

شال ءَ نودربرگل بلوچ اسٹوڈنس ایکشن کمیٹی ءُ بی ایس او ءِ نیمگ ءَ میڈیکل نودربرانی لوٹانی ھک ءَ جامعہ بلوچستان ءَ بگر تاں ایدھی چوک ءَ زھرشانی روانکے کشگ بوتگ – روانک ءَ نودربراں ھوار دگہ تک ءُ پھناتاں سیادی داروکیں مردماں مزنیں کچے ءَ بھر زرتگ –

زھرشانی روانک ءَ تران کنان ءَ دوئیں نودربر گلانی رھشونانی گوشگ ات کہ بلوچستان ءَ زانت ءُ زانشت نزام سک باز یکدم جھل ءَ پِرینگ بیتگ انت وھدیکہ بنجاھی ءِ نیمگ ءَ چہ جوڑ کرتگیں انتزامی ادارہ ھمک وھد ءَ بلوچستان ءُ دگہ سوبھاں ڈالچار کنگ انت – بنجاھی سرکار ءِ نیمگ ءَ جوڑ کنگ بوتگیں ادارھاں بلوچستان ءِ زمینی پھمگ ءَ ابید ھنچوشیں پالیسی اڈ داتگ چریشی ءَ بلوچستان ءُ ھاسکر ھما دمگاں کہ بلوچ گیشتر انت اود ءِ نودربرانی زانشتی کیرئیر اسراندار بوتگ – اے ادارھانی نیمگ ءَ جوڑ بوتگیں پالیسی پنجاپ ءُ دگہ سوبھانی ھاتر ءَ وڑے ناں وڑے ءَ جانبدار انت بلوچستان ءِ نودربر کہ اود ءَ ھچ وڑیں آسراتی نہ بوگ ءَ ابید زانت ءُزانشت ءِ دربرگ ءَ یک اسٹیجے ءَ سر بنت ءُ ھمے پالیسیانی آماچ بنت چریشی ءَ نودربرانی زانشتی کیرئیر ھلاس بیت –

آھانی گوشگ ات کہ پی ایم سی وڑیں ادارہ ءِ نیمگ ءَ چہ میڈیکل انٹری ٹیسٹانی تہ ءَ بے کانودی رد کاری ءَ ھزاراں نودربرانی باندات تھاری دیم ءَ روان انت وھدیکہ وانندھیں نودربرانی ھک جنی ءِ ترس ھم ھست انت ـ سوبہ ءِ نودربرانی گوم ءَ بوتگیں اے مسکرا ءَ پد ھم سوبائی سرکار کر گوش واب انت ءُ نودربرانی لوٹ ھچ وڑ ءَ الکاپی ءَ گوں زورگ بوگ ءَ نہ انت بلوچستان نودربرانی گوم ءَ ھمک وھد ءَ بوتگیں ناھکیانی بگیری ءَ نودربر گلاں مدامی توار چست کتگ بلے ھک ءُ انساپ ءِ ھاتر ءَ چست بوتگیں توار ھمک وھد ءَ تاکت ءِ زور ءَ ایرموش کنگ بوتگ انت ءُ سوبائی سرکار نودربرانی سر ءَ تاکت کارمرز کنت –

آھانی گوشگ ات پی ایم سی جیڑہ ءَ بہ پھمیت ءُ زوتاں زوت وتی پالیسیانی سر ءَ چمشانک ءِ بہ دنت ءُ ٹیسٹ ءِ آن لائن کنگ مہ بنت وھدیکہ نودربرانی پاسنگ مارکس پنجاہ کنگ بہ بیت – ما بلوچستان ءِ سرکار ءَ لوٹ کنیں کہ نودربرانی اے جیڑہ ایوان ءِ واک ءَ برگ بہ بیت ءُ پاکستان میڈیکل کمیشن ءَ چہ لوٹانی درگت ءَ سپارش دیم دیگ بہ بیت – اگاں ھستیں وھدے سرکار ءَ نودربرانی جیڑہ ءِ سر ءَ دلگوش نہ دات ءُ جیڑہ ڈالچار کنگ بوتاں گڑا اے درگت ءَ ھمے زوتاں سرجمیں ملک ءَ زھرشانی ءِ درچ ءِ بندات کنگ بنت-

بلوچستان ءِ تیابدپی شھر گوادر ءَ مروچی سیمی روچ ءَ بیگواہ بیتگیں کھولانی زھرشانی نندانک برجاہ اِنت-

زھرشانی نندانک گوادر پریس کلب ءَ بلوچستان ءِ جماعت اسلامی ءِ رھشون ھدایت رھمان ءِ ھمراھی ءَ کنگ بیتگ –

زھرشانی نندانک چہ گوادر ءَ بیگواہ بیتگیں عارف درمھمد، عادل نبی بکش، قاسم ھاشم ءُ عبدالطلب مھمد ھسن ءِ کھول ھوار اَنت –

زھرشانی نندانک ءَ کھولانی گوشگ اِنت کہ مئے مردم گوستگیں وھد ءَ پاکستانی چیریں ادارھاں آوار جتگ ءُ برتگ اَنت چریشی ءَ پد آیانی درگت ءَ چیریں ادارھاں مارا ھچ ھال نہ داتگ –

زھرشانی نندانک ءَ قاسم ءِ پت ھاشم ءِ گوشگ اِنت کہ منی زھگ قاسم چیریں ادارھاں فش ھاربر کمپلکس ءَ لوٹائینتگ ءُ من وت ھمود ءَ جاڑیگ بیتگ اَنت کہ ایاں جست ءُ پرس ءِ واستا لوٹائینتگ –

ھاشم ءِ گوشگ اِنت کہ منی زھگ دریاوردے ءُ اشاں پہ جست ءَ برتگ ءُ پد ءَ ھما اِنت کہ آئی ءِ درگت ءَ ھچ ھال نیست اِنت –

آئی ءِ گوشگ اِنت کہ اے کجام کانون اِنت کہ یک مردمے ءَ زبان بہ دے ما تئی زھگ ءَ جست ءُ پرس ءَ لوٹ ایں پد ءَ وتی زبان ءَ بجگ ءُ منی زھگ ءِ گار کنگ اے منی ءُ کانون ءِ واستا کجام انساپ اِنت –

آیاں ڈیھی ادارھاں لوٹ کرتگ ءُ گشتگ کہ اگاں مئے مردماں جرم یا گناھے کرتگ گڑا آ آیاں وتی آمیدگساں پیش بہ کن اَنت ءُ سزا بہ دے اَنت –

بلوچستان ءَ گار ءُ بیگواھیانی درچ یکشل ءَ برجاہ اَنت ءُ گوست ءَ بازیں جاھاں گار ءُ بیگواھیں مردمانی ھاتر ءَ یکشل ءَ زھرشانی گندگ ءَ آیگ ءَ اَنت –

ھمے وڑ وائس فار بلوچ مسنگ پرسنز ءِ وائس چیئرمین ماما کدیر بلوچ ءَ چاگردی رسانکجاھاں گشتگ کہ اگاں گوادر ءَ نشتگیں مردم شال ءَ زھرشانی بنجل ءَ اتک نہ کن اَنت گڑا باید آ وتی بیگواھیں مردمانی بارو ءَ وائس فار بلوچ مسنگ پرسنز ءَ وتی سرجمیں گپاں بہ گوش اَنت –

ماما قدیر بلوچ ءِ گوشگ اِنت کہ بلوچستان ءَ گار ءُ بیگواھیں مردم وتی وتی ھنداں زھرشانی بنجل بہ جن اَنت پُر ایمنیں زھرشانی بہ کن اَنت –

سر بیتگیں ھالانی رد ءَ روکپتی بلوچستان ءِ دمگ ھاش ءَ انٹی نارکوٹکس ءِ تیرگواری ءَ دو بلوچ بیران بیتگ اَنت –

ھالانی تہ ءَ گوشگ بیتگ کہ اے دو کس روگ ءَ بیتگ اَنت کہ ھمے وھد ءَ ابید ءِ دست دیگ ءَ انٹی نارکوٹکس ءَ آیانی سر ءَ تیرگواری کرتگ ءُ چریشی ءَ ھردوک بیران بیتگ اَنت-

بیران بیتگیں مردمانی پجار خداداد ء جنگی ھان جھمنند پشتکوہ ھاش ءُ مھمد رفیع ھسین ءِ ناماں زانگ بیتگ اَنت –

دمگی مردمانی رد ءَ اے گاڑی ھاش ءَ امام خمینی نادراہ جاہ ءِ گور ءَ روگ ءَ بیتگ ناگتاں انٹی نارکوٹکس ءَ آیانی سر ءَ تیرگواری کرتگ –

ایرانی پولیس ءُ دگہ ادارھانی تیرگواریاں ھمک وھد ءَ مردم بیران ءُ زدگ بیگ ءَ اَنت بلے جست ءُ پرس کسے ءِ ھم گندگ ءَ نئیت اِنت –

مردمانی گوشگ اِنت کہ ایرانی پولیس ءُ دگہ ادارھاں آمیدگسانی پرمان گون اِنت چریشی ءَ بیران ءُ زدگ بیتگیں مردمانی گپ ھچ رنگ ءَ آمیدگساں گوشدارگ نہ بیت اِنت –

بلوچ کمپن فعالین ءِ رد ءَ گوستگیں سال ءَ چہ اے سال ءَ مردمانی کوش ءُ زدگیانی تہ ءَ سیستان و بلوچستان ءَ دَہ درسد گیشی اتکگ –

آیانی گوشگ اِنت ھمک سال کوش ءُ دگہ وئیلانی تہ ءَ گیشی آیگ اِنت بلے اشانی گر ءُ دار ءَ ابید اے روچ پہ روچ گیش بیان اَنت –

آیانی گوشگ اِنت اے کوش ءُ تیرگواری وئیل اگاں دارگ نہ بیت اَنت گڑا روکپتی بلوچستان ءَ بازیں کچے ءَ مردمانی جان ءُ ساھانی زوالی کیت اِنت –

کراچی ءَ چہ بلوچ متحدہ مھاز ءِ نیمگ ءَ بلوچ راجدوستیں رھشون سردار عطاء اللہ خان مینگل ءِ یاتگیری ءَ مراگشے اڈ دیگ بوتگ –

مراگش گوستگیں روچ ءِ بزاں نوزدہ ستمبر چارشمبے بیگاہ ءِ ادار پنچ ءَ بلوچ چوک چاکیواڑہ پٹبال ہاؤس ءِ نزیک ءَ برجم دارگ بوتگ – مراگش ءَ بلوچ متحدہ مھاز، بلوچ یکجھتی کمیٹی، نیشنل پاٹی، سند یونائیٹڈ پاٹی، پختون عوامی ملی پاٹی، نیشنل ڈیموکریٹک پاٹی، عوامی نیشنل پاٹی، عوامی ورکرز پاٹی، بی این پی مینگل ءِ باسک ءُ رھشوناں ھوار دگہ تک ءُ پھناتاں سیادی داروکیں باسکاں بھر زرتگ –

مراگش ءَ تران کنان ءَ ڈاکٹر مالک بلوچ ءِ گوشگ ات کہ یک مُچے ءَ ما سردار صاھب ءِ واماں سرجم کرت نہ کنیں سردار ءَ جمھوری ءُ سلاہ بندی جنگی جھد کتگ سردار عطا اللہ مینگل ءُ غوث بخش بزنجو آ ایوک ءَ پہ بلوچاں ناں بلکیں پہ درساں روکیں چراگ ءِ مانند بوتگ انت – مروچیگ ءَ چہ گلانی تہ ءَ کرپشن ھلاس کنگی اِنت سردار عطاء اللہ ءَ راجانی ءُ جمھوریت ءِ جھد کرتگ آئی ءِ گوشگ ات کہ کراچی بلوچ راج ءِ جھد ءِ بنجاہ بوتگ مروچی ما یکی دومی ءَ چہ جتا انت بلوچستان مئے مات انت ما یکے دومی ءِ بھر انت بلے اے مئے بدکسمتی انت مروچی ما کراچی ءِ رھشون شموشتگ انت بلے وھد ءِ لوٹ ھمیشن انت ما کراچی ءُ بلوچستان ءِ بلوچاں راجداری ءَ یکجاہ بہ کن انت –

بلوچ متھدہ مھاز ءِ کوآرڈینیٹر یوسف مستی خان ءَ مراگش ءَ تران کنان ءَ آئی ءِ گوشگ ات کہ سردار عطاء اللہ مینگل ءِ راجداری ءِ وھد ءَ دنیا دو بنجلانی تہ ءَ بھر بوتگ مئے سیاسی رھشونانی راجداری سوشلسٹ بوتگ، سویت یونین ءِ ھلاسی ءَ پد راج دوست ءُ دیمروئی لوٹوکیں راجداری دکہ ءِ لگتگ ءُ مئے راجداریں گلاں پارلیمانی سیاست کنگ ءِ جھد کتگ ءُ اے گپ ءَ چہ پراموش بوتگ آں کہ اد ءَ سیاست جی ایچ کیو ءِ چلیت ءُ آئی ءِ ھلاس کنگ ءَ ابید راستیگیں سیاست نہ بیت سردار عطا اللہ مینگل ءِ سیاست ءَ سرجم کنگ ءِ ھاتر ءَ یک سامراج دژمن ءُ اینٹی اسٹبلشمنٹ یکجاھی ءِ جوڑ کنگی اِنت – سیاست ءِ تہ ءَ رھبندانی کمپرومائیز کنگ مہ بیت –

آئی ءِ گوشگ ات کہ درسیں راج ءَ ایردستیں یکجاہ کنگی انت – ملک ءِ سیاسی بُت بدل کنگ لوٹ ایت – آئی ءِ گوشگ ات کہ بلوچ متھدہ مھاز سندیانی بگیری ءَ جوڑ کنگ نہ بوتگ مار ءَ چہ مستریں سندھی کس نیست اے گپ منگی انت –

لالا فقیر محمد ءَ تران کنان ءَ گوشت کہ سردار عطاء اللہ مینگل ءَ لیاری ءَ چہ وتی سیاست ءِ بندات کتگ آئی ءَ گُشت کہ سردار عطاء اللہ مینگل ءَ بس اسداللہ وتی چُک نہ لیکتگ بلکیں ھر ھما کس ءَ کہ بلوچستان ءُ بلوچ ءِ ھاتر ءَ جھد کُتگ آ دراہ سردار ءَ وتی زھگ لیکتگ انت –

مراگش ءَ سندھ یونائیٹڈ پاٹی ءِ رھشون جگدیش آہوجا ءِ گوشگ ات کہ سردار عطاء اللہ، جی ایم سید یا باچا خان ءَ مدامی زوراکی ءِ بگیری ءَ توار چست کتگ – سندھی ءُ بلوچ ءُ پختوناں ھچبر ھچ وڑیں زوراکانی دیم ءَ وتی سر جھل نہ کرتگ آھاں مدامی آھانی بگیری ءَ جھد کرتگ ءُ مروچی ھم وتی ھکانی ھاتر ءَ.جھد ءَ انت – سندھی ءُ بلوچاں چاگرد ءِ تہ ءَ بھر کنگ ءِ جھد بوگ ءَ انت بلے سندھی ءُ بلوچانی یکجاھی ھر وڑیں پندلاں بے سوب کنت – مروچی مئے رھشون ءُ باسک ناشرکاری ءِ الزام ءَ زنداناں بندیگ انت – پنچاپ ءِ مزلومیں راج ءَ سندھ بلوچستان ءُ پختوناں گوں کول کنگی انت کہ مھر ءِ بنیاد ءَ یکجاھی ءِ جوڑ کنیں ءُ جھد کنیں –

پختون عوامی ملی پاٹی ءِ رھشون عبدالرحیم زیاتت وال ءِ گوشگ ات کہ سردار عطاءاللہ ءَ مینگل ءَ ایردستیں راجانی ھاتر ءَ توار چست کتگ ءُ مئے رھشوناں انگریزانی بگیری ءَ جُھد کتگ وھدیکہ انگریزانی ھدمت کنوک ھاکم جوڑ بوتگ انت ءُ آھاں ھما بندات ءَ راجانی ھک نہ دیگ ءِ پندل سازتگ ءُ ملک ءِ ڈنی پالیسی ایردستیں راجانی ھکانی ورگ ءِ سر ءَ اے ملک ءَ بیست ءُ شش سال بے کانود بوتگ – آئی ءِ بگیری ءَ ما توار چست کتگ ءُ مار ءَ گدار گوشگ بوتگ پارلمنٹ مئیگ انت بلے ما بے اختیار انت رھبند پُشت ءَ یلا داتگ –

آئی ءِ گوشگ ات کہ ملک سیاسی ھوالہ ءَ تھنائی آماچ انت مالی درگت ءَ نزور انت ما ھما مردمانی پیروکار انت کہ گوشتگ ئے فیڈریشن ءَ فیڈریشن ءِ وڑ ءُ ڈول ءَ چلائینگ ءِ ھاتر ءَ راجانی پجار منگی انت آئی ءِ گرگ ءِ ھاتر ءَ پی ڈیم ایم جوڑ کنگ بوتگ – آئی ءَ گشت کہ سردار عطاءاللہ مینگل ءَ ملک راستگیں جمھوری راہ ءَ چلائینگ ءِ جھد کُتگ ما آئی ءِ منوگریں –

دیمتر ءَ بلوچ یکجھتی کمیٹی ءِ آمنہ بلوچ ءَ تران کنان ءَ گُشت کہ سردار عطاء اللہ مینگل ءَ مدامی بلوچ بوگ ءِ ھاتر ءَ پکر کُتگ آئی ءَ راجانی لگتمالی مدامی ایرجتگ گوں آھاں بگیری داشتگ –

بلوچ متھدہ مھاز ءِ کلثوم بلوچ ءِ گوشگ ات کہ سردار عطاءاللہ مینگل ءَ مدامی راجانی ھواری ءِ گپ جتگ ءُ آئی ءَ وتی سیاست ءِ وھد ءَ بلوچ ءُ پشتون مدامی یک کرتگ انت ءُ مدامی آئی ءَ وھدے لوٹانی رِد ءَ سیاست کتگ مار ءَ لوٹ ایت ما آئی ءِ گپاں گوں وت ھوار بہ کنیں آئی ءَ وتی سرجمین زند پہ بلوچ راج ءُ بلوچستان ءِ ھاتر ءَ ندر کتگ مروچی سیاست ءِ لوٹ انت کہ ملک ءِ ھر کُنڈ ءَ نشتگیں بلوچ گوں زورگ ءُ ھواری ءَ دیم ءَ رؤگی انت –

مراگش ءَ تران کنان ءَ نیشنل ڈیموکریٹک پاٹی ءِ سرکماش ڈاکٹر حئی بلوچ ءِ گوشگ ات کہ کراچی راج ءَ مدامی وتن دوستی ءِ سیاست ءِ ھمراہ داری کتگ ءُ مروچی ھم کراچی ءِ راج ءَ جمھوری سیاست ءِ تہ ءَ وتی کرد پیلو کنگی انت – ھپتاد ءُ چار سالاں وتی ھکانی نہ گرگ مئے واست ءَ سوالیہ نشان ئے آئی ءِ گوشگ ات کہ ملک ءِ سیاست ءَ سیاسی پاٹی چلائینگ انت اگاں ناں دگہ نیمگ ءِ چلائینگ بوگ ءَ انت – آئی ءَ گُشت کہ سردار عطاء اللہ مینگل ءَ وتی سرجمیں زند ایردستیں راجانی ھاتر ءَ ندر کتگ – ضیاءالحق ءَ پد مروچی سیاست ءِ تہ ءَ کمینٹ منٹ جند ءِ نیست بلکیں کاروبار ءِ جوڑ بوتگ – مروچی جاور ھال سک باز ھراب انت انسانی ھکانی لگتمالی برجاہ انت مردم زورانسری آوار جنگ ءُ بیگواہ کنگ بوگ ءَ انت، مروچی قبضہ مافیا دور انت – آئی ءِ گوشگ ات کہ زورگیری ءِ بگیری ءَ جھد کنگی انت زِرانی سر ءَ کبزہ ءِ پندلانی بگیری ءَ جھد کنگی انت – سردار صاھب سھر چکیں دروت ندر کنیں گڑا مار ءَ راج دوستی ءِ سیاست وتیگی کنگی انت وھد ءِ لوٹ ھمیش انت کہ ایردستیں راجانی یکجاھی ءُ پی ڈی ایم ھمراھ داری کنگی انت-

عوامی نیشنل پاٹی ءِ امیر نواب خان ءَ تران کنان ءَ گُشت سردار عطاء اللہ مینگل یک نزریہ ءِ نام انت آئی ءِ رھبندانی سیاست کتگ ءُ سردار ءَ سرداری نزام ھلاس کتگ مروچی سیاست ءِ لوٹ انت کہ مزلومیں راجانی ھکانی ھاتر ءَ جھد کنوکیں پارٹیاں یک پلیٹ فارمے ءَ یکجاہ بوگ لوٹ ایت –

عوامی ورکرز پاٹی ءِ بنجاھی سیکریٹری جنرل ایڈوکیٹ اختر حسین ءِ گوشگ ات کہ سردار عطاء اللہ ءِ سیاست وفاقیت سامراج دژمن ءُ مزلومیں راجانی ھکانی سر ءَ بوتگ سردار ءِ سیاست سامراجیت ءِ بگیری ءُ سیکیولر ازم ءِ سر ءَ بوتگ آئی ءِ سیاسی کرد ءُ زاتی کرد ءِ تہ ءَ ھچ تپاوت نبوتگ –

بی این پی مینگل ءِ انفارمیشن سیکریٹری آغا حسن ءِ گوشگ ات کہ سردار عطاءاللہ خان مینگل بلوچ ءُ بلوچستان مزلومیں راجانی سیاست ءَ ھچ پدکنز نبوتگ آ یک مھربان سیاسی استادے بوتگ مدامی ورنایانی رھشونی کتگ ءُ آئی ءَ مدامی بلوچ راج ءُ دگہ مزلومیں راجانی ھکانی وکالت کتگ – آئی ءِ گوشگ ات کہ آئی ءَ سندھ، پختونستان، ءُ بلوچستان ءِ ھاتر ءَ شھید بوتگیں پرزند وتی پرزند ءُ وارث لیکتگ انت آئی ءِ گوشگ ات کہ بلوچاں سندھیانی گوم ءَ وپاداری کنگی انت وتی زبان ءُ سیاسی ھکانی ھاتر ءَ جھد کنگ ءَ یک پلیٹ فارمے ءَ ءیکجاہ بوگی انت ءُ بلوچ متحدہ مھاز ءِ ڈبہ ءَ وتی کوپگاں بہ زوریت ءُ سردار عطاء اللہ ءِ سیاست ءِ دیم ءَ برگے راستیگیں وڑ ءُ ڈول ھمیش انت-

سر بیتگیں ھالانی رد ءَ روکپتی بلوچستان ءِ دمگ نیکشھر ءُ چھبار ءَ ایرانی چیریں ادارھاں دو کس دزگیر کنگ ءَ پد پھمیانیں جاگاھاں برتگ اَنت –

ھالانی ءَ تہ ءَ گوشگ بیتگ کہ نیکشھر ءَ نیاز ملازھی ء کمال جھمنند مھبان ءُ طارق عزیزی ھم دزگیر کنگ ءُ برگ بیتگ اَنت –

گرگ بیتگیں مردمانی ھال بلوچ کمپین فعالین ءَ راست کرتگ ءُ گوشتگ کہ نیاز ملازھی گوستگیں روچ ءَ نیکشھر ءَ ایرانی چیریں ادارھاں دزگیر کرتگ ءُ برتگ –

آئی ءَ گشتگ کہ نیاز ءِ براے حمید اللہ اربابی گوستگیں دو سالاں نیکشھر ءَ دزگیر کنگ بیتگ ءُ اشی ءَ پد آئی ءِ برات ھم برگ بیتگ ءُ گار کنگ بیتگ کہ ھردوکانی ھال نیست اِنت –

آئی ءَ گشتگ کہ آدینگ ءِ روچ ءَ چیریں ادارھاں ایرانشھر ءَ چارق عزیزی ھم دزگیر کرتگ ءُ برتگ کہ چریشی ءَ پد آئی ءِ ھچ ھال نیست اِنت –

روکپتی بلوچستان ءَ مردمانی گار ءُ بیگواھی ءِ ھال یکشل ءَ ھست اَنت ءُ چاگردی رسانکجاھاں شنگ بیگ ءَ اَنت ءُ آیانی بیگواھی ءِ ھالاں ایرانی چیریں ادارھانی سر ءَ لڈگ ءَ اَنت –

بلوچستان لبریشن فرنٹ ءِ جارکش میجر گْوھرام بلوچ ءَ پاکستانی پوج ءِ سر ءَ بوتگیں اُرشانی زمہ واری منّ ِاِتگ ءُ گْوشتگ کہ شمبے ءِ بیگاہ ءِ ساھت ھشت ءَ مئے سرمچاراں تربت ءِ شھر سنیما چوک ءَ ھستیں پوج ءِ چوکی ءِ سر ءَ دزبمبے چگل داتگ چریشی ءِ آسر ءَ دو کارندہ مرتگ اَنت-

میجر گْوھرام بلوچ ءَ دیمتر ءَ گْوشتگ کہ آواران ءَ ءُ شمبے ءِ بیگاہ ءَ ساھت پنچ ءَ جھاؤ ءِ دمگ نوندڑہ ءَ نوکو ھوٹل ءِ ھند ءَ ھستیں پوج ءِ چوکی گوں ٹوھیں سلاھاں نشانگ کتگ چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ اے اُرش داں بلوچستان ءِ آجوئی ءَ برجاہ بنت-

نبشتانک: بابا عبداللّہ جان جمالدینی

نبشتہ کار: آزات جمالدینی (ثانی)

دی بلوچستان پوسٹ

19 ستمبر 2021 بابا عبداللّہ جان جمالدینی، منی مھروانیں پیرُک ءِ مرگ ءِ پنچمی سالروچ اَت بلوچستان سنڈے پارٹی ءُ سنگت اکیڈمی آف سائنسز ءِ واٹس ایپ گُروپاں بابا عبداللّہ جان ءِ زِند ءُ کِرد ءِ سر ءَ ھر کس وتی مارشت ءُ ھیالاں نِوشتہ کنان اَت، چیزے من ھم وتی اومان،واھگ ءُ پُر مِھریں مارِشتاں درشان کَنان اَت آں کہ ہمے وخت ءَ بابا مری (ڈاکٹر شاہ محمد مَری) ءَ گُشت ئِے، آزات آتِنوکیں پوہ ءُ زانت یا بلوچستان سنڈے پارٹی ءِ مجلس ءَ ترا بابا عبداللّہ جان ءِ بارو ءَ 2 یا 3 پَنّ وانگی اِنت منی پِکراں کمیں پدی کِنز اِت ءُ دل ءَ گُشت ئِے آزات گوں تو اے ڈَولیں لَوز نیست کہ تو وتی ھیالاں بابا عبداللّہ جان ءِ بارو ءَ دَرشان کُرت پِکن ءُ منی دل ءِ اے گپ راست ات۔ منی دل اوں زانت یک بے سِیمسریں دریاب ءِ وڑ ءَ شہ بابا ءِ یاتاں سَرریچ ءُ پُر اَت اَنت۔ منی واھگ چو چلتن ءُ مِہردَر ءِ کوہانی وڑ ءَ برز ءُ پُرّ بہارگاہ اَت اَنت بلے گوں من لبز نہ ات کہ من وتی بے تاھیریں دل ءُ کرار بِداتین آں ءُ وتی ابّاجی (بابا عبداللّہ جان) ءِ بارو ءَ وتی دلی مارِشتاں درشان پِکُرتین آں۔ بابا شاہ محمد مری ءِ اے کَلَوہ ءِ وانگ ءَ پَد من وتی دوست ءُ سنگت ءُ وتی گُلاہیں بابا، بابا عبداللّہ جان ءِ یاتانی تہ ءَ کَپت آں ءُ منی چَمّ شہ ارساں پُر بوت اَنت۔ منی چم مُچ بوت اَنت۔ من یاتانی یک ہنچیں راہسرے ءَ شُت آں کہ اود ءَ من ات آں ءُ منی ابّاجی (بابا عبداللّہ جان) اَت۔ من ءَ منی کسانی ءِ ہما روچ یات آھت انت کہ بابا عبداللّہ جان من ءَ دروت ءَ دات ئِے ءُ گُشت ئِے اے منی براس عبدالواحد جان اِنت ،اے منی براس آزات اِنت، اے منی براس بَنگُل جان اِنت۔ آ ساھتاں منی زانت کہ ھیالانی وشنِمائیں لَڑاں بابا عبداللّہ جان ءِ بارو ءَ بندگ ءَ اَت انت من نوشکی ءَ وتی لوگ ءَ ابّاجی ءِ جِند ءِ کچّائیں کوٹی ءِ تہ ءَ نِندوک ات آں۔ اے ہَما کوٹی اِنت کہ بابا عبداللّہ جان زِمستان ءِ گوریچی ءُ سیاہ چِلّگیں شپاں تہ ءِ نِشت ءُ مئے کََہول ءِ مُچ مردم، کسان ءُ مَزن کاھت اَنت ءُ ابّاجی ءِ گِرد نشت اَنت ءُ ابّاجی گوں آوان مجلس ءَ کُرت ئِے ءُ آوانی ذہنی رُدوم ءَ کُرت ئِے۔ من ناگت ءَ مار اِت اوں کہ کوٹی ءِ نیام ءَ اِسٹوپ ایر بوت ءَ ءُ اِسٹوپ ءِ راستیں نیمگ ءَ بابا عبداللّہ جان نِندوک بوت ءَ ءُ آئی ءِ ھَد ءَ آئی لوگ بانک ءُ مئے مہروانیں بَلّک نِشتہ ءُ آوانی نَزّینک ءَ آوانی زھگ (منی مہروانیں تُرو ءُ ناکو کہ کسان بوتگ اَنت) نشتگ اَنت ءُ ابّا پَر اِش بلوچی گیدی کِسّہاں گُشتگ ئِے۔ ہِلیل بِلیل کہ دو شِنکّانی کِسہ اِنت الّم ءَ مئے بَّلک پہ وتی زاھگاں گُشتگ ئِے۔ من ءَ یقین اِنت کہ ابّاجی پہ وتی جنکاں یک بلوچ شیرزالیں Character بزاں کارِستے ءِ کِسّہ ءَ الّم ءَ کُرتگ ئِے ءُ آ Character کوہ تفتان ءِ کَشّ ءُ گوْر ءَ نِشتگیں کمانڈر شیرزالیں گُل بی بی بوتگ کہ انگریز سامراج ءُ جنرل ڈائر ءِ خلاف ءَ سرین بستگ ءُ پہ جنگ ءَ تیار بوتگ ءُ ھِچبر پدی نہ کِنز اِتگ۔ ابّاجی ءِ دوستیں شخصیتاں یکّے گُل بی بی ھم بوتگ۔ ابّاجی7 یا 8 سال ءِ بوتگ کہ گُل بی بی آئی ناکو فقیرجان جمالدینی ءِ گِس ءَ کَچّو ءَ آھتہ ءُ سِلاہ بند بوتگ۔ آ اولی ءُ گُڈی وار بوتگ کہ ابّاجی گُل بی بی را دِیست اَت ئِے۔

نوشکی ءَ چِلّگ ءِ سارتیں روچاں ابّاجی وتی کتاباں زُرت ئِے، اوور کوٹ ءَ گور ءَ کُرت ئِے ءُ مئے گسانی پُشت ءَ زیبائیں ریکے نام ئِے پیتاپ اِنت، شُت وانت ئِے ءُ نَوشتہ کُرت ئِے۔ بَرے بَرے بِہ اوتان ءِ زیبا ءُ بُرزیں ریک سر ءَ ھَم شُت ءُ وتی زھگ، براس زھگ ءُ گُہار زَھگاں ھم گوں وت ءَ را ہمراہ کُرت ئِے۔ راہ ءَ ابّاجی گوں آواں چو سنگت ءِ وڑ ءَ مجلس ءَ کُرت ئِے۔ کَدی آواں کارل مارکس ءُ لینن ءِ بارو ءَ پہ آسانیں زبان ءَ سَرپَدی دات ئِے، کدی شیکسپیئر،صدرالدّین عینی ءُ شہ دگہ مزنیں ناماں سرپد کنائینت اِش ءُ کدی آرٹ ءُ سائنس ءَ پوہ اِش کنائینت۔ اے ڈول ءَ ابّاجی وتی زھگانی ذہنی رُدوم ءَ کُرت ئِے۔

اوتان ءِ راہ ءِ سر ءَ ماہ گُل نامی ئیں جنکے ءِ گُنبد بوتگ ءُ ماہ گل ھما گنبد ءِ تہ ءَ کَڈ بُوتگ ابّاجی گوں وتی زھگاں ماہ گُل ءِ کسہ ءَ ھم کُرت ئِے۔ ماہ گل یک شَرّ رَنگ ءُ زیبائیں جنکے بُوتگ۔ آئی ءِ مرد نبی بخش پہ دِگرانی بَستگیں دروگ ءُ تُہمتاں آئی ءِ نازرکیں دل ءِ بنداں تِیر جَت ئِے ءُ شَرّ رنگیں ماہ گل ءَ کُشت ئِے۔ مئے چاگِرد ءَ دِگہ بازیں ماہ گل پہ غیرت ءِ نام ءَ کُشَگ بُوتگ اَنت ءُ تَنِنگ بَیَگ ءَ اَنت۔ ماہ گل ءِ بارو ءَ من ابّاجی ءِ ھِچّیں نِوِشتانک نہ دیستگ آں بلے منی دل اے مارِیت کہ ابّاجی پہ ماہ گل ءِ کُشَگ ءَ سک دل پدرد بوتگ۔ نوں ھم ھر کدی کہ من شہ ماہ گل ءِ سَرُون ءَ گوزِین اے محسوس کنین کہ ماہ گل شہ من اے جُست ءَ کنت، “منی قصور ءُ رَدی چے اَت کہ من ءَ اے ناروا ءُ زوراکیں چاگرد ءِ مردماں پہ بے دِلی کُشت ءُ رُسواہ اِش کُرت؟ بابا عبداللّہ جان ءَ ھَنچش کہ ما آئی ءِ کتاب ءُ نِوشتانکانی تہ ءَ گِنداں کہ مِہر ءُ اِنسانیت ءِ یک مزنیں چیدگےبُوتگ۔ عَملی زند ءَ ھم آ ھمے وڑ بلکِن شِد ءَ زیات پُر مِہر ءُ انسان دوستیں مردمے بُوتگ۔ من ءَ یات اِنت یک برے منی تُرو گُشت ئِے شہ نوشکی ءَ مۓ وَستاکار ءِ جنین ءُ زھگ کوئٹہ مۓ گِس ءَ آھت اَنت۔ گوں ابّاجی مۓ کَہول ءِ یک دگہ مردمے نِندوک اَت۔ ابّاجی وستاکار ءِ جنین ءُ زھگ ءَ کہ دیست ئِےباز وش بوت۔ پاد آھت دیم اَیش شُت ءُ وش آھت کُرت اِش۔ زھگ ءَ بَڈ کُرت ئے ءُ دُروت دات ئِے۔ دَمے جوان گون اِش نِشت۔ آ مردم کہ گون اَبّاجی نِندوک اَت گُشت ئِے لالا تو اے وستاکار ءِ زھگ ءُ جنین ءَ ہَنچُش مِہر ءُ عزت دات ئِے ھرکس گُشیت تہی گس ءِ مردم اَنت۔ ابّاجی گُشت ئِے ما مُچ مردم اَن گُڑا اے فرق ءَ پرچے پکن اَن؟ اگاں زند ءِ تہ ءَ مہر ءُ عزت نہ بوت گڑا آ زند ءِ چِے پائدگ۔ اِے منی مردُم اَنت ءُ من ایشانی مردم آں۔

بابا عبداللّہ ءَ نہ تہنا پہ بزگر، خواری کَشّ، بگجت ءُ جَہل ءِ تبقہ ءِ مردمانی زِند ءِ واست ءَ گَپ جت ءُ نِوشتہ کرت ئِے بلکن وتی Bureaucratic زند ءَ یلہ دات ءُ عَملی وڑ ءَ گوں آوان یک جاہ بوت ءُ سنگت بوت۔ آوان وانینت ئِے۔ بابا عبداللّہ جان ءُ آئی ءِ مزنین براس، بلوچی زبان ءِ آشوبی شاعر آزات جمالدینی شہ وتی ڈگاراں بزّگیں مردماں مفت ءَ دات اَنت کہ پہ وتا گس ءُ جاگہ بہ بند اَنت۔ آوان وتی زند ءِ تمامیں عیش ءُ آرام یلہ دات انت ءُ یک وختے ہَنچیں آھت کہ گِس ءَ پہ وَرَگ ءَ آوان نان ھم نہ ات۔ بلے زندمان ءِ اے جَوریں وختاں پہ دلیری ءُ تمردی سَگ اِت اَنت ءُ مدام پہ وتی اُستمان ءُ راج ءِ شرتِریں زندے ءِ سر ءُ سوجاں اَت اَنت۔ آوان 1958 ءَ وتی ھَلک جمالدینی ءَ گوں وتی میتگ ءِ مردماں مِیٹنگے کُرت انت۔ اے مِیٹنگ ءِ تہ ءَ بلوچی زبان ءُ لبزانک ءِ Wright Brothers بزاں بابا آزات ءُ عبداللّہ جان ءَ ابید میر بلال خان جمالدینی، ملک عبدالصمد جمالدینی میر چندن خان جمالدینی، محمد حنیف جمالدینی ءُ دگہ مردم ھم ساڑی ات انت۔ اے نندد ءُ گند ءِ تہ ءَ اے فیصلہ کنگ بوت کہ ما وت پہ وت ءَ را سکول بندن ءُ وتی زھگاں وانین اَن ءُ وتی ھلک ءِ تہ ءَ پولٹری فارمے ھم جوڑکنن۔ اے کارانی واست ءَ اے دوئیں براساں وتی زمین دات انت اے دُراہ سنگت وت خِشت بُرّاِت انت ءُ سکول ءِ بنیات ءَ ایر اِش کُرت۔ بلَے وھدے کہ اکتوبر 1958 ءَ مارشل لا لگ اِت بابا آزات ءُ بابا عبداللّہ جان گوں آدگہ سنگتاں ھوار دزگیر کنگ بوت انت ءُ بندی کنگ بوت اَنت۔ آوانی گس ءَ حکومت ءَ چاپہ ھم جت ءُ بابا آزات ءِ کتاب مستیں توار ءِ سر ءَ پابندی جَت ئِے۔ پرچے کہ اے کتاب ءِ Main Focuss بزاں بنرہ بلوچستان اَت ءُ بلوچستان ءِ خواری کَشّ ءُ مُزّوراں شہ واب ءَ پاد کنگ ءُ وَش حالیں زندے گوازینگ ءِ سِکین دَیَگ ات۔ مزنیں مدتے ءَ پد اے دوئیں براس یلہ بوت اَنت۔ 1963 ءَ بابا آزات ایران ءَ شُت ءُ ایرانی بلوچاں بلوچی لبزانک ءُ زبان ءِ نیمگ ءَ دلگوش کنائینگ لوٹت ئِے بلے ایرانی انٹیلجنس آئی پد ءَ ات ءُ زوت دزگیر کُرت ئِے ءُ بندی جاہ ءَ بند کُرت ئے ءُ بابا عبداللّہ جان آوھد ءَ پہ روزگار ءِ واست ءَ کراچی شُتگ ات اے تمامیں جاوراں آوانی ماس بی بی پری جان ءَ سک دل پدرد کُرت ئِے۔ آ مُدام پہ وتی بَچکّاں گریت ئِے۔ بابا آزات ءِ یاتانی تہ ءَ 10 سال مدام گریت ئِے ءُ گڈسر ءَ چم ئِے سیاہ آپ (کالا پانی) ءِ شکار بوت اَنت ءُ بَلّی پری جان ءِ چمانی روشائی شُت آ گوں زہیرواریں ءُ سوھتگیں دِلے ءَ وتی بَچّک عبدالواحد آزات ءِ یاتانی تہ ءَ شہ اے دنیا ءَ شُت۔

زند ءِ روچ گوزان اَت انت ابّاجی وتی علم ءُ زانت ءَ تمامیں بلوچستان ءَ تالان کناں ات۔ 1970 ءَ بلوچستان یونیورسٹی جوڑ کَنَگ بوت۔ بابا عبداللّہ پاکستان سٹڈی سینٹر ءَ لیکچرر ءِ جَہت ءَ کار ئِے کُرت، 1985 ءَ بلوچی ڈیپارٹمنٹ جوڑ کَنَگ بوت۔ بابا اسِٹنٹ پروفیسر بوت۔ آ وھد ءَ ھر کس کہ بلوچی زبان ءِ سر ءَ کار پکرتین آئی کِرّا اَلّم ءَ کات ءُ بابا آواں کُمک ءَ کُرت ئِے۔
بلوچستان ءَ ابید دَری مردم ھم آئی ھَد ءَ آھت اَنت ءُ بلوچی وانت اَنت ابّاجی آوان وتی اولاد ءِ وڑ ءَ وانینتئِے ءُ وتی گِس ءَ جاگہ دات اِش جوزف ایلفنبائن ءُ ڈاکٹر کارینہ جہانی کہ بلوچی زبان ءِ مزنیں نام اَنت، گوں بابا آئی گِس ءَ ہَڈّ اِش کُرت ءُ چو گس ءِ مردمانی ءِ وڑ ءَ ات انت۔ بزاں بابا عبداللْہ جان علم ءِ سرچمّگے اَت ھرکس کات ءُ شہ آئی علم ءَ سیرآپ ءَ بوت
باباعبداللّہ جان مہر ءُ انسانیت ءِ سفیرے ات ھرکس یک وارے آئی مجلس ءَ بہ نشتیں پد ءَ تمامیں زند آئرا شہ دل ءَ نہ بُرت ئِے ءُ الم ءَ آئی ھَدّ ءَ کات بابا عبداللّہ جان ءِ مہرانی سبب ات کہ آئی ءِ زند ءِ تہ ءَ آھرا باز مِہر ءُ عزت رس ات۔ مروچی ابّاجی گوں ما نہ اِنت بلے آئی یات ءُ گُشتگیں پنت ءُ نصیحت مدام مئے دل ءُ دیدگانی تہ ءَ اَنت گُڈسر ءَ من ابّاجی ءِ بارو ءَ ہمے گُش ایں۔

داں کُوچگ ءَ آسے بَلیت تو زندگ ئے
داں بُرز ءَ استارے چمِیت تو زندگ ئے

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ندر پہ نہ ترسین لیڈر شهید حاجی رزاق ءِ نام ءَ

لچہ: سلیم ناز

دی بلوچستان پوسٹ

حاجی رَزاق حاجی رَزاق
راج ءِ دل ءَ کُت داگ داگ

تو رَهبر ءُ رهشون اِت ئے
هر مُچیاں تو گون اِت ئے
ویران بوت سَبزیں مے باگ

دژمن تو داتگ جور جواب
تئی گْواچن اِنت دُرین کتاب
دارگ نہ بیت پِگرانی واگ

بکشات وتی هیشی سر ءَ
راج ءِ وتی پہ هاتر ءَ
کرتگ بلوچ ءِ نوک تو پاگ

چون اِنت تئی مهر ءِ وتن
بستگ سر ءَ سرجم کپن
لُڈ اِیت زر ءَ سبزیں کہ شاگ

میڈیکل انٹری چکاس ءِ اَسرکپتگیں نودربراں شال ءِ پریس کلب ءَ گپ ءُ تران کنان ءَ گْوشتگ کہ بلوچستان ءَ وانگی نزام سک ھرابیں جاور ءَ اَنت – اود ءَ مزنیں کچے ءَ وانگجاہ ھست ءُ ھزاراں کچ ءَ ٹیچر ھست- بلے اگاں یک جاگھے وانگجاہ پچ اَنت ءُ ٹیچر ساڑی نہ اَنت اگاں ٹیچر ساڑی اَنت گُڑا آ جاگہ ءَ بُنکی آسراتیاں چہ زبھر اَنت بلے سرجمیں جیڑھاں اوپار کنگ ءَ چہ اَبید اگاں بلوچستان ءِ لھتے نودربر دیمروئی کن اَنت گُڑا آیانی بگیر ءَ بازیں پندل ساز اَنت آیانی نیکیں واھگاں تھاروکی ءَ دور دے اَنت ءُ آھاں در پہ در ءُ سکّیانی دیمپان کنگ ءَ لاچار کن اَنت چریشی ءِ تچکی ءِ مسال 2021 میڈیکل انٹری چکاس ءَ کنگ بوتگیں بے راھبندی اِنت-

بلوچستان ءِ نودربر گوستگیں چینچو سالاں چہ جتائیں جیڑھانی سر ءَ لاچار بوتگ ءُ ھر وھد ءَ زھرشانی کن اَنت ءُ پولیس ءُ بازیں زوراکیانی نشانگ جوڑ بوگ ءَ گندگ بوگ ءَ اَنت-

توری آ بلوچستان شھدربرجاہ ءِ اسکینڈل بہ بیت یا کہ بی ایم سی ءِ جیڑہ ءَ بہ بیت –

آھاں گْوشتگ کہ اے رند ءَ ھم نودربر گوستگیں دہ روچاں چہ انٹری چکاس ءَ بوتگیں بے راھبندی ءِ بگیری ءَ سھت ماں سھت زھرشانی اَنت – ما وتی کیمتی ءِ وھد ءُ پت ءَ چہ یکجاہ کتگیں زر زرتگ میڈیکل انٹری چکاس ءِ گیگی ءَ شپ ءُ روچ یکجاہ کنگ ءَ اَتکگیں – اشی ءِ مز ءَ مارا ھمے دیگ بیت کہ گوں شوربندی ءِ سر ءَ بے راھبندی کنگ ءُ مئے ھکّ پُلگ بنت ءُ مئے واباں بے مانا کن اَنت – درد اش اِنت کہ بلوچستان ءِ زندمان یکشلہ دگانی سر ءَ گندگ کاینت ءُ سرکار وتی تہ ءُ توکی کار ءُ مپادانی سر ءَ انچش تھل اَنت مہ آ نودربرانی جیڑہ ءِ سر ءَ ھچ وڑ دیھان دیَگ نہ بوگ ءَ اِنت- سرکار وتی ھکومت ءِ رکینگ ءَ دلگوش اِنت ءُ اپوزیشن وتی مپادانی مُھر کنگ ءِ ھاتر ءَ شپ ءُ روچ یک کتگ اَنت-

آھاں گْوشتگ کہ وتی لوٹ دیم ءَ آورتگ ءُ گْوشتگ کہ ما پی ایم سی ءِ برجم داشتگیں آنلائن ٹسٹ یک کر کتگ ءُ لوٹ کتگ کہ دوبر فزیکل چکاس برجم دارگ بہ بنت- انٹری چکاس ءِ سوبمندی ءِ نمبر پنجاہ درسد ایر بہ کن اَنت – بلوچستان / فاٹا ءِ ھاسیں سیٹ کہ ھلاس کنگ بوتگ اَنت آ دوبر آرگ بہ بنت یا کہ آئی ءِ بدل ءَ بلوچستان ءِ میڈیکل کالجز ءَ مئے سیٹاں گیش بہ کن اَنت- شال پولیس ءِ کجام کارندہ نودربرانی سر ءَ زوراکی کتگ ءُ آ کار چہ دارگ بہ بنت ءُ آیانی بگیر ءَ گامگیج بزور اَنت –

آیاں دیمتر ءَ گْوشتگ کہ مارا کُمک ءُ آسراتی دیگ وتی جاہ ءَ نودبر گل ءِ نام ءِ سر ءَ لھتے چمّ جھل پہ کزنی ءَ مئے جُھد ءَ نزور کنگ ءُ بھر ءُ بانگ کنگ ءَ یکشلہ جُھد کنگ ءَ اَنت اے ھما مردم اَنت مدام ھمے ساھت ءَ سر بنت ءُ وتی پروموشن ءُ ٹولی گرگ ءِ تچ ءُ تاگ ءَ اَنت وھدیکہ پُشت اندر ءَ ھمے مردم زھرشانی ءَ نندوکیں نودربراں مدام چست کنگ ءِ بیھار دیگ ءَ پدر بوتگ اَنت-

آیاں گْوشتگ کہ ما وتی لوٹاں منّنیگ ءِ ھاتر ءَ 23 ستمبر یک ” گرینڈ زھرشانی ” جار ءَ جن ایں ءُ راج وکیل ٹیچرز ایسوسی ایشنز، کار ءُ باری مردم ، ڈاکٹر ءُ نودربرانی گل ، مزدور یونینز ءُ دگہ وانگ دوستیں مردماں گوں دزبندی کن ایں آ گرینڈ زھرشانی ءَ بھر جوڑ بہ بنت ءُ بلوچستان ءِ باندات بزانکہ آن لائن انٹری چکاس ءِ اسر کپتگیں نودربراں آیانی ھک دیگ ءِ ھک ءَ پیلو بہ کن اَنت-