TBP Balochi

بلوچستان ءِ دمگ پنجگور ءَ سُھرک ءِ نادراھی کپتگ، داں انیگ ءَ سُھرک ءِ نادراھی ءَ سَے زھگ بیران بیتگ اَنت –

بیران بیتگیں دو زھگانی سیادی ھدابادان ءُ یکے وشبود ءَ اِنت کہ ھدابادان ءَ بیران بیتگیں ھردوک گھار اَنت –

دمگی مردمانی رد ءَ پنجگور ءَ سھرک ءِ نادراھی ترندی ءَ گوں مانشان اِنت گرمکان ءُ تسپ ءَ لھتے نادراھانی ھال سر بیتگ اَنت بلے تچکی ءَ آیانی راستی نہ بیتگ اَنت –

دمگی مردمانی رد ءَ گوستگیں روچ ءَ پنجگور ءِ ھند ھدابادان ءَ سیزدہ ءُ چاردہ سالی ئیں دو گوھار بیران بیتگ اَنت مروچی وشبود ءَ شانزدہ سالی ئیں جنکوئے بیران بیتگ –

دمگی مردماں لوٹ کرتگ ءُ گشتگ کہ نادراھی ترندی ءَ مانشان اِنت ءُ جانسلامتی زوت ءَ چہ زوت گامگیج بہ زور ایت-

زانگ بہ بیت چریشی ءَ پیسر بلوچستان ءِ دمگ تربت ءُ نیسر آباد ءَ سھرک ءِ نادراھی ءَ مانشان اِتگ کہ چریشی ءِ سبب ءَ بازیں کچے ءَ زھگ آسرمند بیتگ اَنت –

زانتکارانی گوشگ اِنت اے نادراھی ھُشک سالی ءُ دمگ ءَ ھور ءِ نہ گوارگ ءَ دنز ءُ لوڑاں چہ پیداگ بیت اِنت کہ چریشی ءَ آ کمزور ءُ نیزوریں زھگاں وتی ورجان جنت –

زھگاں وھدیکہ یک رندئے ءَ اے نادراھی شنگ ءُ تالان بیت گٍڑا شریں ءُ تاکتوریں اینٹی بائیوٹیک ءِ درماناں گون زھگاں دارگ بیت اِنت ءُ درمانانی ٹپاسگ ءَ اے چیز دارگ بیت اِنت-

چاگردی پھناتانی گوشگ اِنت بلوچستان ءَ جانسلامتی ءِ درگت ءَ آسراتی ءِ نہ بیگ ءِ برابری اِنت ءُ سھرک ءِ وڑیں نادراھی سُبکی ءَ گوں آیانی گر ءُ دار ءُ جاندراھی بیت اِنت بلے بلوچستان ءَ اے وڑیں نادراھی زھگانی مرگ یکشل ءُ بیگ ءُ پیداک اَنت –

نبشتانک: زوراکیں اھد ءُ مئے بے وانکی

نبشتانک: سعید احمد بلوچ

دی بلوچستان پوسٹ

مروچی اے سرجمیں میتگ ءِ مردمانی چمّ من ءَ سَک اَنت ھر کس گوں وتی هیالاں گوں وت ءَ جیڑگ ءَ اِنت کس ئِے گوں وتی کَش ءِ نندوکیں مردم ءَ گوں سُک سُک ءُ همے هیال کنگ ءَ اِنت بگندے کوه ءَ رؤت دومی گُشی اناں هچ نہ کنت ءُ بے وانکی ءَ نند اِیت، ھر کس گوں وتی کَش ءِ مردم ءَ بازین ئِے گوں وتی اندری مردم ءَ منی درگت تران کنان اِنت کہ باریں چی کنت-

نہ زاناں اے مردماں پرچا اے هیال گْور نہ اِنت کہ اَستیں اھد ءِ زوراکاں تھنا منی مکھیں مات نہ جتگ ءُ شھید نہ کُتگ آیاں اے کُل راج ءِ مکھیں مات جتگ ءُ شہید کُتگ آھاں کُلیں راج ءِ سینگ ٹپی کتگ آ شُمے کُلانی ننگ ءُ لج بوتگ پرچہ شُما اے گرانیں بار ءَ تھنا منی نِزوریں کوپگاں دئیگ ءَ اِت پرچہ شُما هَمُک دو مارچ اے گپ ءَ پہ پھر ءُ شان گُش اِت کہ “ما جامگ اِنت ماتانی ما لَج اِنت گُوھارانی” پرچہ مرچی اے مات ءَ وتی مات نہ لیک اِت؟

کول ء مبارک قاضی ئیگ ءَ “اے مھر ءِ پِڑ اِنت اے جنگ ءِ تہ ءَ کےَ باریں مِر اِیت کےَ زندگ بیت” هُدا بزانت کےَ داں کد زندگ اِنت پیش ءَ مئے میتگاں ورناهانی اُمر کم بوتگ بلے مروچاں مئے میتگاں بچ ءُ جنک هست ءُ ماتانی اُمر ءِ کم بوگ یک نوکیں راھے بُنگیج کنگ بوتگ شھید مَلِکناز اے راه ءِ اولی مساپر ءُ شھید کلثوم، شہید بانک کریمہ ءُ تنی وھدی منی اَماں تو اے راه ءِ گُڈی مساپرئے ترا چہ رند نہ زاناں کےَ بیت؟

من هم هما کھول ءِ مردمانی لَڑ ءَ هوار آں آ شھید مَلِکناز ءِ کھول بہ بیت یا شھید بانُک کریمہ ءِ من ءَ بہ بکش منی مکھیں مات کہ من پہ ترا دو ترمپ ارس ءُ رب ءِ گور ءَ دعا ءَ اَبید هچ کُت نہ کن آں تئی کُشنده استیں اھد ءِ هاکماں من یک نا دست رسیں چورھے آں

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ماما قدیر بلوچ

ٹی بی پی شونگال

شال ءِ یونائیٹد بینک ھزار گنجی بھر ءِ 69 سالی ئیں بینک مینیجر قدیر ریکی ءِ زندمان ھما وھد ءَ سرجم ءَ مٹ بیت وھدیکہ آئی ءِ ورنائیں بچ 13 فروری 2009 ءَ بیگواہ کنگ بیت اِنت۔ کماشیں بینک مینیجر لھتے ماہ ءَ پد چہ کار ءَ پارگ بیگی اَت بلے آئی ءِ زھگ، نامداریں سیاسی جھدکار جلیل ریکی ءِ زورانسری بیگواھی ءَ قدیر ریکی بلوچستان ءِ درستاں نامدار تریں انسانی اگبالانی جھدکار ماما قدیر ءِ دروشم ءَ مٹ کُت۔

ھما وھد ءَ کہ جلیل ریکی گمانی پیم ءَ پاکستانی چیریں گلاں زورانسری بیگواھی ءِ آماچ کُتگ اَت، اے یک انچیں وھدے اَت کہ ھمک روچی ھساب ءَ مزنیں کساسے ءَ بلوچ سیاسی جھدکار دزگیری ءَ پد بیگواہ کنگ بیگ ءَ اِت اَنت، بلے بلوچستان ءَ جنزوکیں اے انسانی اگبالانی پادمالیانی ھلاپ ءَ برانزگروکیں توار ءِ ھست نہ بیتگ اَت۔ بلوچ آجوئی لوٹوکیں سیاسی گل مزنیں کساسے ءَ وتی باسکانی ءُ بازیں رھشونانی زورانسری بیگواھی ءِ سبب ءَ چیر تریتگ اِت اَنت ءُ پارلیمانی راج دوستیں گلاں نگیگیں جاورانی آماچ بیگ ءَ چہ وت ءَ رکینگ ءِ ھاتر ءَ وتی دپ بستگ اَت۔

اے جاورانی تہ ءَ ماما قدیر ءُ دگہ بیگواھیں مردمانی کھولاں انسانی اگبالانی ھلاپ ورزیانی سر ءَ توار چِست کنگ ءِ ڈبہ زُرت۔ بیگواھیں مردمانی دیم ءَ آرگ ءِ ھاتر ءَ آیاں وتی جھد ءِ بندات جولائی 2009 ءَ کُت ءُ 27 ستمبر 2009 ءَ دلجمیں پیمی ءَ وتی جھد ءَ گلے ءِ دروشم دات اش ءُ اِشی ءِ نام “وائس فار بلوچ مسنگ پرسنز” ایر کتگ اِت اِت ۔ اے گل ءِ رھشونی ءَ داں مروچی ھم بیگواھیں مردمانی کھول ءِ مردم کنگ ءَ اَنت۔

وائس فار بلوچ مسنگ پرسنز ءَ زھرشانی ءِ دروشم ءَ سال 2009 ءَ چیدگی شُد ھڑتال ءِ بندات کُتگ اَت، کہ کساس چار ھزار ءُ نیم روچے گوزگ ءَ پد ھم برجاہ اِنت۔ اے چیدگی شُد ھڑتال بلوچستان ءِ راجدپتر ءِ سانمندتریں جھداں چہ یکے – شال پریس کلب ءِ دیم ءَ چیدگی شُد ھڑتال ءِ جتگین بُنجل، وی بی ایم پی ءِ زرمبش ءِ پجار ءُ ماما قدیر ءِ دیم ءَ جوڑ بیتگ اَنت۔ زھرشانیاں بگر داں ٹی وی مراگش ءُ بلوچستان ءَ بگر داں جنیوا ءَ ماما قدیر ھمک راستگیں پلیٹ فارمانی سر ءَ بیگواھیں مردمانی ھاتر ءَ توار چِست کنان ءُ پیداک اِنت۔

ماما قدیر ءِ جھداں میان اُستمانی ءُ اُستمانی ھردوئیں تکاں اے یک کُکار ءِ چِست کتگ اَت، انسانی اگبالانی میان اُستمانی گلاں بیگواھیں مردمانی جیڑھانی تہ ءَ دلستکی زیرگ بندات کُت بلے اِشی ءِ پجیگ ءَ ماما قدیر ءِ جنجالانی تہءَ گیشی آیگ بندات بیت اَنت، آئی ءَ بیھار رسگ بندات بیت اَنت، آئی ءِ ترسینگ ءِ ھاتر ءَ بازیں براں آئی ءِ سر ءَ اُرش کنگ بیتگ، لب دیگ بیتگ اَنت، داں انچو ھم گُشگ بیتگ اَت کہ اگاں آ وتی جھد ءَ پد کِنز بہ بیت آئی زھگ یل کنگ بیت اِنت، آئی ءِ جنجالانی تہ ءَ گیشی آرگ ءِ ھاتر ءَ چہ کار ءَ پارگی (ریٹائرمنٹ) ءَ پد آئی پینشن دارگ بیت بلے اے درستیں نگیگی ءُ جنجالاں ابید ھم ماما قدیر وتی لیکہ ءِ سر ءَ اوشتاتگ اَت۔

24 نومبر 2011 ءَ ماما قدیر ءِ زھگ جلیل ریکی ءِ تیر سُمبتگیں جون دز کپت۔آئی ءِ زھگ ءِ کشوک ھمے سرپد بیت اَنت کہ چہ اِشی ءَ پد ماما قدیر ءِ سُر ءُ پُر ھلاس بنت بلے زھگ ءِ نمیرانی ءَ پد ھم ماما قدیر ءِ گامانی تہ ءَ نزوری نیتک بلکیں آئی ءِ سُر ءُ پُرانی گیشتر گیشی ودی بیت۔

27 اکتوبر 2013 ءَ ماما قدیر ءَ ایندگہ بیگواھیں مردمانی کھولانی پجیگ ءَ شال ءَ داں کراچی ءُ پد ءَ کراچی ءَ داں اسلام آباد ءَ بیگواھیں مردمانی یل کنائینگ ءِ ھاتر ءَ یک سکیں دراجیں پند روانکے بندات کُت۔ بیگواھیں مردمانی اکس ءُ آیانی درگت ءَ گیشتریں سرپدی ءِ کاگد، پلے کارڈ یک دزگاڑی ءِ سر ءَ گون بیتگ اَنت اے پند بروکیں روانک ءَ 2800 کلومیٹر ءِ پند جتگ اَت۔

ماما قدیر ءِ گُشتن ءَ سال 2009 ءَ آئی ءَ گوں ایندگہ کھولاں گوں سوگند وارتگ اَت کہ اگاں منی زھگ یل بہ بیت ھم بلے من پد ءَ ھم وتی زھرشانی ءَ داں ھما وھد ءَ ھلاس نہ کناں دانکہ گُڈی بیگواھیں بلوچ ھم یل نہ بیت اِنت۔ آ وتی سوگند ءِ سر ءَ سیزدہ سال گوزگ ءَ پد ھم اوشتاتگ۔ آئی ءِ زھرشانی ءُ وائس فار بلوچ مسنگ پرسنز ءِ چیدگی شُد ھڑتال داں انگت یکشل ءَ برجاہ اَنت۔

مروچی ماما قدیر 81 سال ءِ سند ءِ کماشیں مرد اِنت، کہ درمانانی سر ءَ اِنت ءُ ھسپتالانی روگ ءُ آیگ ھم ھمک روچی جیڑہ جوڑ بیتگ بلے امبر ءُ جان ءَ آئی ءِ سُر ءُ پرُانی ءُ بیگواھیں مردمانی یل کنگ ءِ جزبگ ءِ تہ ءَ ھچ پیمیں کمی آرت نہ کُتگ۔ ھسپتال ءَ شپ گوازینگ ءَ پد کمو کہ آئی ءِ تہ ءَ گھتری کیت آ وتی بنجل ءِ رھشونی ءَ سر بیت۔ آئی ءِ رد ءَ دانکہ آ زندگ اِنت، آ وتی توار ءَ چِست کنان کنت ءُ آئی ءِ مرگ ھم بیگواھیں مردمانی بنجل ءِ تہ ءَ بیت اِنت۔

سول سوسائٹی ءَ وتی شنگ کرتگیں درشان ءِ تہ ءَ تربت ءِ دمگ آپسر ءَ زالبول ءِ کوش ءِ بگیری ءَ پنچ شمبے ءَ بزاں بیست ءُ سَے ستمبر ءَ زھرشانی ءِ جار پرینتگ –

سول سوسائٹی ءِ جارکش ءَ وتی درشان ءِ تہ ءَ گوشتگ کہ تربت آسکانی آپسر ءِ نندوکیں بزگریں زالبول ءِ کوش بلوچستان ءَ بازین دھکاں برجاھیں سیکورٹی فورسز ءِ زوراکیانی درچ اِنت اے وڑیں وئیل سرجمیں بلوچستان ءَ یکشل ءَ بوگ ءَ انت –

آئی ءِ گوشگ ات کہ گوستگیں سال ءَ آپسر ءَ ایپ سی ءِ کارمنداں ورنائیں نودربر ھیات بلوچ دگ ءِ سر ءَ تیر آماچ کُرتگ ءُ شھید کرتگ، راج ءِ زھر شانی ءَ پد ایپ سی ءَ آ یک کارمند ءِ ردی گوشتگ ءُ وت ءَ چہ اے ردی ءَ در کُتگ بلے اشی ءَ پیش ملک ناز، تمپ ءَ کلثوم ءُ دگہ بازیں زالبول ءُ مردین بے دردی کُشگ بوتگ انت –

جارکش ءَ گوشتگ کہ اے وئیلاں ابید بلوچستان ءِ تہ ءَ لشکر کشی ھم برجاہ انت کہ بازیں ورنایے کانود ءُ رھبنداں در آوار جتگ ءُ بیگواہ کرتگ انت ئِے –

جارکش ءَ گوشتگ کہ آپسر ءَ تاج بی بی ءِ شھیدی ءِ بگیری ءَ تربت سول سوسائٹی پنچ شمبے سھب ءِ ادار یازدہ ءَ تربت پریس کلب ءِ دیم ءَ زھرشانی ءِ جار ءَ.پرینیت ءُ اشی ءِ تہ ءَ آل پارٹیز کیچ ءُ درسیں سیاسی ءُ چاگردی ءُ نودربرگلاں ھوار بوگے ءِ لوٹ ءَ کنیں –

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں بیست ءُ یک دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ یک ھزار ءُ ھشت سد ءُ سِی ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءِ یک ھزار ءُ یکسد مردماں کرونا ویروس ٹیسٹ کنگ بوتگ کہ آھانی تک ءَ بیست ءُ یک مردماں کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار ءُ ھشت سد ءُ سِی سر بوتگ اَنت-
رپورٹ ءِ رِد ءَ بلوچستان ءِ تہ ءَ بیست ءُ چار مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ءُ یک ھزار ءُ دو سد ءُ چِل ءُ یک انت-
رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ دو سد ءُ چِل ءُ ھشت نادراہ ھست انت آھانی تہ ءَ پنچ نادراہ ھائی فلو آکسیجن اِلاج ءَ انت-
بلوچستان ءَ کرونا ویروس ءِ پوزٹیو کیسانی گیشی یک ٹک نُھ درسد بوتگ تنی وھد بلوچستان ءِ تہ ءَ کرونا ویروس ءَ سرجمی ءَ سَے سد ءُ چِل ءُ چار مردم بیران بوتگ انت-

بلوچ یکجھتی کمیٹی ءَ رسانکدراں وتی شنگ کرتگیں درشان ءب تہ ءَ سیکورٹی پوج ءِ ٹارگٹ کلنگ ایرجتگ گوشتگ کہ بلوچستان ءِ تہ ءَ بازیں وھدی ءَ گیرکانودی ءُ بے رھبندی کارانی درچ یکشل ءَ برجاہ انت کہ ھلاس بوھگے نام ءَ نہ زانت بلوچستان یک کوش جاہ ءِ جوڈ بوتگ کہ روچ ءِ ناں روچ ءِ الم یک دردناکیں وئیلے دیم ءَ کئیت – بلے بلوچستان ءِ ھاکم اے کُشت کوش ءِ دارگ ءَ ابید لشکر ءَ مھار گُٹ ءَ داتگ ءُ یلا داتگ تانکہ وتی کتکاریانی تہ ءَ گیشی بیاریت –
جارکش ءَ گوشتگ کہ مروچی یک دگہ دردناکیں وئیل ءَ سیکورٹی پوج ءَ کماشیں زالبول ءِ تیرباران کُتگ شھید کُتگ ءُ آئی ءِ لوگ واجہ ایف سی ءِ تیرگواری ءَ ٹپی بوتگ – اے وڈیں وئیل ھمک روچ بوھگ ءَ انت چریشی ءَ بلوچستان ءِ تہ ءَ سنگینیں المیہ ءِ ودی بوتگ ءُ وھد ءِ ھمراھی ءَ اشی ءِ تہ ءَ گیشی آرگ بوتگ – ایپ سی ءِ تیرگواری ءَ شھید بوتگیں زالبول ءُ آئی ءِ کھول ءَ پوج ءِ لشکر کشیانی سوب ءَ وتی دمگ یل داتگ ءُ تربت شھر ءِ نزیک ءَ آتکگ ءُ نشتگ انت ءُ در پہ دری زند گوازینگ ءَ لاچار انت – بلے اے جاور ھالاں ابید آھاں اے وڈیں پدردی وئیلانی دیمپانی کنگ کپگ انت –

بی وائی سی ءِ جارکش ءَ ھاکماں چہ لوٹ کتگ کہ آ بلوچستان ءِ تہ ءَ ایپ سی ءِ گیرکانودی ءُ بے رھبندی کارانی سر ءَ نوٹس بہ زوریت – اے وڈیں وئیلاں بلوچستان ءِ تہ ءَ انسانی المیہ اندازگ جنگ گران نہ انت – ھمود ءَ کہ ایپ سی ءِ کارمند کماشیِ زالبول ءَ تیرآماچ کن انت ھمود ءَ دومی مردمانی زند گوازینگے جاور چون بنت –

بلوچستان ءِ دمگ کیچ ءَ ایف سی ءِ کارندھاں تیرگواری کتگ ءُ پیرزالیں زالبولے کشتگ ءُ وھدیکہ آئی ءِ مرد ٹپی کتگ-

تیرگواری ءِ وئیل تربت آسکانی بازار ءَ بوتگ اود ءَ پوج ءِ تیرگواری چہ زال بیران وھدیکہ مرد ٹپی بوتگ – کُشگ بوتگیں زالبول ءِ پجّار تاج بی بی بلوچ ءِ نام ءَ چہ بوتگ کہ آئی ءِ سر ءَ تیر لگتگ اَنت- وھدیکہ نادُراھجاہ ءِ ڈاکٹرانی گْوشگ اِنت مرد ءِ جاور سک نگیگ اَنت –

کھول ءِ رِد ءَ وئیل راست کتگ ءُ گْوشتگ کہ دوئیں مرد ءُ زال دار ءِ چنگ ءَ جنگل ءَ شتگ اَنت ءُ پوج ءِ کارندھاں تیرگواری کتگ یکے کُشتگ ءُ یکے ٹپی کتگ-

دمگی مردمانی رِد ءَ اے کھول اشی ءَ چہ پیش تربت ءِ کمو گستا یک کوھی میتگے ءَ نندوک بوتگ اَنت – پوج ءَ اے میتگ ھمے بھتام ءِ سر ءَ لڈ ءُ بار کنائینتگ کہ اود ءِ میتگ مردم سرمچارانی کُمک ءَ کنگ ءَ اَنت – اے کھول ءَ ھوار سرجمیں میتگ ءِ مردم وتی میتگ ءَ چہ لڈ اِتگ ءُ شھر ءِ نزیک ءُ گوراں کرگین بستگ ءُ نشتگ اَنت-

زانگ بہ بیت پوج ءَ گوستگیں سال ءَ تربت ءَ تیرگواری کتگ ءُ کراچی شھدربرجاہ ءِ نودبر حیات بلوچ کُشتگ – حیات بلوچ ءِ کوش ءِ بگیری ءَ سول سوسائٹی ءُ بلوچ یکجھتی کمیٹی ءِ نیمگ ءَ سرجمیں ڈیھ ءَ زھرشانی کنگ بوتگ-

دنیگت ءَ اے بوتگیں وئیل درگت ءَ چہ انتزامیہ ءِ نیمگ ءَ ھچ وڑیں گپ دیم ءَ نیتکگ ءُ نانکہ راجدوستانی نیمگ ءَ چہ گپ دیم ءَ اتکگ الںت وھدیکہ دمگی مردمانی ٹاہ جتگ کہ مرد ءُ زال گندگ بوتگ اَنت بلے پد ءَ ھم پوج ءَ تیرگواری کتگ یکے کُشتگ ءُ یکے ٹپی بوتگ-

ھمے وئیل ءِ پژدر ءَ چاگردی رسانکجاھاں بلوچ پھناتاں زھر ءِ درشان بیگ ءُ گوشگ بیگ ءَ اِنت کہ اے رندی ھم بلوچ زالبول ءِ کوش ناگتی کرار دیگ بیت؟ یا ناں –

زانگ بہ بیت چوشیں بلوچستان ءِ دگہ جاھاں ھم گوست ءَ پیش اتکگ اَنت کہ تربت ڈنک ءَ ملکناز نامیں زالبولے کشگ ءُ کیچ ءَ ھواریں دمگ تمپ ءَ ھم کلثوم نامیں زالبولے کشگ بیتگ اِت اَنت –

دمگی مردماں ھردوکیں زالبولانی کوش چیریں ادارھانی نیمگ ءَ جوڑ کرتگیں گل ڈیتھ اسکواڈ ءِ سر ءَ لڈ اِتگ اَنت بلے اے کوشاں پد کوشکار ھاسیں رنگے ءَ گرگ نہ بیتگ اِت اَنت –

ھمے وڑ بی ایس او پجار تربت ھنکین ءَ مروچی پیش اتکگیں وئیل ایر جتگ ءُ گوشتگ کہ تربت آبسر دوھزار گاڑی ءِ سر ءَ پورسز ءَ تیرگواری کرتگ ءُ چریشی ءَ زالبولے بیران ءُ آئی ءِ مرد ٹپیگ بیتگ –

جارکش ءَ گشتگ کہ ھمے کساس اے وئیل ایر جنگ بہ بیت کم اِنت ءُ پولیس ءُ انتزامیہ کوشکاراں بہ گپت ءُ کھول ءَ انساپ بہ دنت –

لندن ءَ سندھی بلوچ فورم (ایس بی ایف) ءِ چیردستی ءَ یک یاتگیری مراگشے کرتگ چریشی ءَ تران کنوکاں سردار عطاء اللہ مینگل ءِ سیاسی ءُ راجدوستی جد ءُ جھد ءِ سر ءَ جتا جتائیں پھناتانی سر ءَ چمشانک داتگ –

نوزدہ ستمبر ءَ یکشمبے ءِ روچ ءَ لندن ءَ ماھرین تعلیم، سیاستدان ءُ برتانیہ ءَ بلوچ، سندھی ءُ دگہ کمیوٹیزانی انسانی ھکانی رھشون ءُ باسکاں بلوچ راجدوست رھشون سردار عطاء اللہ ءَ را ستاشانی پیش کرتگ –

لندن ءَ سندھی بلوچ فورم (ایس بی ایف) ءِ چیردستی ءَ یک یاتگیری مراگشے برجم دارگ بیتگ کہ کہ چریشی ءَ سردار عطاء اللہ ءِ سیاسی ءُ راجدوستی زند ءِ سر ءَ جتا جتائیں پھناتاں چمشانک داتگ –

بی ایچ ار سی ءِ انفارمیشن سیکریٹری قمبر ملک ءَ تلو سروکی کرتگ، یاتگیری مراگش ءَ سردار مینگل ءِ گُشتانک ءُ گلگدارانی ویڈیو شنگ کنگ بیتگ ءُ آئی ءِ پرسی شرپ ءَ یک دمانے ءِ بے تواری ءَ پد بندات بیتگ –

سردار عطاء اللہ مینگل ءِ جد ءُ جھد ءَ را دروت پیش کنان ءَ گُشگ بیتگ کہ سردار مینگل یک ھنچیں انسانے بیتگ کہ آئی ءَ وتی زند ءَ وتی مردمانی ھدمت ءَ آؤکیں وھد ءَ گھگیری ءَ ندریگ کرتگ کہ ھمود ءَ بلوچ راج شرپ ءِ گون ءَ نشت بہ کن اَنت ءُ وتی دود ءُ دل دوستیں دودمانی ءِ ھواری ءَ زند ءَ گوازینت کت بہ کن اَنت –

آیاں گشتگ کہ سردار مینگل بلوچ راجی جد ءُ جھد ءَ ھوار بیگ ءَ چہ بلوچ سیاسی باسکانی اُمیت ءُ ھاٹیگ ءِ تہ ءَ اوپار ودی بیتگ وھدیکہ نوزدہ سد ءُ چِل ءُ ھشت ءَ بلوچستان ءَ پاکستان ءِ گرگ ءَ پد بلوچ راج ترس، شک ءُ بھتامانی سیاھیں وھد ءَ گوزگ ءَ بیتگ اَنت تران کنوکاں تران کنان ءَ گشتگ کہ اے گمان ءَ ھست کہ راجدپتر ءَ مزنیں رھشونانی بیرانی بلوچ راجی لوٹانی تہ ءَ مزنیں دردے بلے آیاں اے اُمیت پدر کرتگ کہ بلوچانی اے نسل آیانی جد ءُ جھد ءِ رھشونی ءَ داں گڈی منزل ءَ برت کنت –

نیاد ءَ سندھی بلوچ فورم ءِ کنوینئر ڈاکٹر نسیر دشتی،شائر ءُ زانتکار راجپرست اکبر بارکزئی، کشمیری انسانی ھکانی پھزداریں باسک سشیل پنڈت، فورم گار سیکولر بنگلہ دیش ءِ جمرل سیکریٹری ءُ گٹھک دلال نرمل کمیٹی ءِ روبی ھک، بلوچ نیشنل مومنٹ ءِ فھیم بلوچ، بلوچستان نیشنل پاٹی ءِ شاھجان بلوچ، سردسر مینگل ءِ نماسگ میر نوردین مینگل، سکول آف اورینٹل اینڈ افریقی سٹڈیز ءِ ڈاکٹر عائشہ صدیقہ ءُ اورلڈ سندھی کانگریس ءِ جنرل سیکرٹری ڈاکٹر لکھومل لوھانہ ھوار بیتگ اَنت –

بلوچ آجوئی لوٹوکیں سلاہ بندیں گل بلوچستان لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ چار ستمبر ءَ پاکستانی پوج ءِ چیردستی ءَ کارکنوکیں کُشندہ ٹولی ءِ کارمنداں کلات ءِ دمگ نیمرگ سمالو ءَ گل ءِ ورنائیں سنگت بابو علی مراد ء درمحمد ساسولی پنام ناصر شھید کرتگ –

جارکش ءَ گوشتگ کہ شھید ناصر نودربری ءِ وھد ءَ ڈیھ ءِ پھازگی زرمبشت ءَ چہ اسرمند بوتگ ءُ سال دوھزار ءُ ھژدہ ءَ نودربر گل ءَ چہ وتی جھدے بندات کرتگ ءُ گوستگیں یک سالے بیت کہ بی ایل ٹی ءَ گوں بندوک بوتگ –

میران بلوچ ءِ گوشگ ات کہ ورنائیں سرمچار بابو علی مراد ءِ جھد پہ ورنایاں روکیں چراگ ئے ءِ بستار ءَ داریت راج ءِ درسیں ورنایانی سر ءَ پرز انت کہ ھمائی ءِ رند پداں بہ گر اَنت ءُ ماتیں سرڈگار ءِ پھازگ ءَ ھوار بہ بنت –
بی ایل ٹی ءِ جارکش ءَ شھید علی مراد ءَ را دروت ندرکتگ ءُ گوشتگ کہ سنگت ءِ شھادت ءَ ھواریں ریاستی کمک کار ھچبر پھل کنگ نہ بنت –

پیری ھوٹل ءِ نزیک ءَ برجاھیں پوجی پانگس ءِ سر ءَ اُرش کتگ ءُ جانی ءُ مالی تاوان داتگ – میجر گوھرام

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں بالگتر ءَ سی پیک ءِ دگ ءِ سر ءَ برجاھیں پاکستانی پوج ءِ پانگس ءِ سر ءَ اُرش کُتگ –
اُرش بالگتر ءَ پیری ھوٹل ءِ نزیک ءَ برجاھیں پوجی پانگس ءِ سر ءَ کنگ بوتگ اُرش ءَ پاکستانی پوج ءَ جانی ءُ مالی تاوانانی دیمپانی بوتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں یکشمبے ءِ روچ ءَ بالگتر ءَ پیری ھوٹل ءِ نزیک ءَ سی پیک دگ ءِ سر ءَ برجاھیں پاکستانی پوج ءِ پانگس ءِ سر ءَ راکٹ گولہ ءُ دگہ مزنیں سلاھاں گوں اُرش کُتگ – اُرش ءِ آسر ءَ پوج ءَ مزنیں کچے ءَ جانی ءُ مالی تاوان رس اتگ –

جارکش میجر گوھرام بلوچ ءَ گوشتگ کہ سی پیک دگ ءِ سر ءَ برجاھیں دژمنیں پوج ءِ پانگساں ناکہ تھنا بلوچ چکینیانی تہ ءَ گیشی آرتگ بلکیں لکّانی کچ ءَ مھلوک ءِ پِت ءُ پیروکی زمین پچ گپتگ ءُ آئی ڈی پیز جوڑ کرتگ انت ءُ اے درچ یکشل ءَ برجاہ انت –

جارکش ءَ گڈسر ءَ گوشتگ اے دابیں اپرش بلوچستان ءِ آجوئی ءَ تاں برجاہ مان انت –