TBP Balochi

شال ءَ میڈیکل انٹری ٹیسٹ ءُ پولیس ءِ زوراکیانی ھلاپ ءَ نودربراِ گورنر ءُ سر وزیر ھاؤس ءِ دیم ءَ نندانک جتگ ءُ نشتگ اَنت، نندانک ءَ ھواریں نودربر پولیس ءَ لَٹ ءُ کُٹ ءُ آنسو گیس جتگ اَنت بازیں نودربرے زدگ بیتگ اَنت –

آل بلوچستان میڈیکل اسٹوڈنٹساں پاکستان میڈیکل کمیشن ءِ نیمگ ءَ گرگ بیتگیں میڈیکل ٹیسٹ ءِ ھلاپ ءَ گوستگیں روچاں شال ءَ گورنر ءُ سر وزیر ءِ ھاؤس ءِ نزیک ءَ بنجاھی چوک بند کرتگ –

زھرشانی کنوکانی گوشگ اَت کہ آن لائن ٹیسٹ ءِ چَپ ءُ چوٹیانی سبب ےَ بلوچستان ءَ گیشتر نودربر سوبمند نہ بیتگ اَنت، آن لائن ءَ ابید دوبر فزیکلی ٹیسٹ گرگ بہ بنت-

زھرشانی کنوکاں اے لوٹ کرتگ کہ اے جیڑہ پی ایم سی ءُ بنجاھی سرکار ءِ دیم ءَ چِست کنگ بہ بیت اِنت –

گوستگیں شپ ءَ واکدارانی گپ ءُ تران بندات بیتگ بلے نیم شپ ءَ پولیس ءَ گورنر ھاؤس ءِ دیم ءَ نشتگیں نودربرانی سر ءَ لَٹ ءُ کُٹ کنان ءَ نودربر دزگیر کرتگ اَنت ءُ ھمے رنگ ءَ بازیں رنگے ءَ نودربر لَٹ ءُ کُٹانی سبب ءَ زدگ بیتگ اَنت –

بلوچ اسٹوڈنٹس ایکشن کمیٹی ءُ بی ایس او ءِ ھمگرنچیں جار ءَ گُشگ بیتگ کہ زھرشانی کنوکانی سر ءَ بیتگیں زوراکیانی ھلاپ ءَ مروچی شال ءِ پریس کلب ءِ دیم ءَ زھرشانی کنگ بیت اِنت –

نودربراں اے ھم گوشتگ کہ لوٹانی سرجمی ءَ زھرشانی برجاہ بیت اِنت-

بلوچستان نیشنل پاٹی کیچ ءِ جارکش ءَ گشتگ کہ نودربر ایمنی ءِ نندانک ءَ نشتگ اَنت ءُ آ وتی ھکانی لوٹ ءَ کنگ ءَ بیتگ اَنت اشی ءَ ابید آیانی گپ گوشدارگ بہ بیت اِنت ءُ گپ گشینگ بہ بیت اِنت وتگڑیں سرکار ءُ کمرشپیں انتزامیہ ءِ رویش ایش اِنت کہ نودربرانی سر ءَ لٹ ءُ کُٹ اش کرتگ اِنت ئِے –

ھمے وڑ ءَ ھزدار ءَ پی ایم سی ءِ نودربرانی ھک ءَ گوستگیں روچ ءَ سول سوسائٹی ءِ نیمگ ءَ زھرشانی کنگ بیتگ چریشی ءَ نودربر گل ءُ پاٹیانی پلامرزی بیتگ، زھرشانی روانک شھید پروفیسر رزاق چوک ءَ بندات بیتگ ءُ ھزدار پریس کلب ءِ دیم ءَ ھلاس بیتگ –

بلوچستان نیشنل پاٹی ءِ ھزدار ءِ سروک شفیق الرھمان ساسولی ءَ شال ءَ نودربرانی سر ءَ لَٹ ءُ کُٹ رستری ءِ مستریں درچ گشتگ کہ شپ ء یک بج ءَ گورنر ھاؤس ءِ دیم ءَ مئے آوکیں بانداتیں نودربرانی سر ءَ لَٹ ءُ کُٹ کنگ بیتگ اَنت اے گنڈہ گردی ءُ ناشرکاری ءِ درچ بند کنگ بہ بیت اِنت –

نبشتانک: بلوچ ربیدگی وردِن

نبشتہ کار : حیمنہ بلوچ

دی بلوچستان پوسٹ

ھمُک کوم ءَ یک دُود ءُ ربیدگ ءِ ھست ھما کوم کہ وتی دود ءَ بے ھیال کنت ءُ آھاں برجم ندار ایت کوم زوت گار بیت۔

اے گپ راست اِنت کہ بلوچستان ءِ ھر دمَگ دومی دمگ ءَ چہ جتا اِنت ءُ آھانی وَرد ءُ وراکانی تہ ءَ پرک ھست لھتے انچیں ورد ءُ وراک ھست اِنت کہ سرجمیں بلوچستان ءَ زانگ ءُ ورگ بنت بلے لھتے انچیں وراک ھست اَنت کہ آ تھنا یک ھلک ءُ دمگے ءَ ورگ بنت دومی ھلک ءِ مردُم آهانی زانت ءَ چہ زبھر بیت-

اے سک بژنیں گپے کہ ما بلوچ ایں ءُ وتی بلوچی ورد ءُ وراکانی نام ءَ نزان اِنت ءُ نہ وارتگ اَنت من ءَ یات انت اولی رند ءَ منی دزگوھار ءَ من ءَ جُست کُت کہ تو تباھگ وارتگ؟ من هیران بوتاں اے لبز پمن نوک اَت ءُ من نزانت کہ تباھگ چی انت، من گڑا وتی دزگوھار ءَ جُست کت کہ تباھگ چی انت؟ گڑا آھاں منی سر کند اِت ءُ من ءَ کچور ءَ کت ءُ گشت کہ تو زاناں بلوچ ءِ نہ ئے کہ تباھگ ءَ نزان ئے ؟ پد ءَ منی دزگوھار ءَ من ءَ سرپدی دات کہ تباھگ بلوچ دود ءُ ربیدگی وراکانی تہ ءَ یک وش تامیں وراکے ءُ چہ کدیم ءَ چہ ائیدے وھد ءَ اڈ کنگ بیت اِنت

مزنیں ائید ءَ وهدے مردُم پَس کُش اَنت گُڑا پد ءَ همے پَس ءِ گوشت ءَ چہ گوشت زور انت گوشت ءَ کپ کپ کن انت پد ءَ واد مسالہ جنّ انت اش پد ءَ انار دانگ جنّ انت اش ءُ پد ءَ سادے زور انت گوشت ءَ یک یک ءَ ساد ءِ توک ءَ مان کن انت روچ ءِ سر ءَ تاپ ءَ دئے اِنت اِش داں بیست روچ ءَ گوشت هُشک بیت اِنت پد ءَ هرکس وتی وڑ ءَ اڈ اش کن انت –

منی دل سک مان بیت گڑا من وتی زند ءِ تہ ءَ تباھگ ھش نہ کتگ ءُ نہ وارتگ ھم چوناها تیاب دپی دمَگاں تباھگ اڈ نہ بیت ءُ باز مردم نزانت من گڑا وتی دز گوھار ءَ را گشت کہ وھدے ملک ءَ روئے پمن تباھگ بیار گوں ٢٠٢٠ ءِ گڈی ءَ من شال ءَ شُت اں هود ءَ منی دزگوھار ءَ من ءَ شیلانچ ءُ بٹاگ ءِ ناروشت, واد ھاپ, ڈلگ, کوری ماھیگ, نیگیز وارینت انچوں کہ دگہ بلوچی وَرد است انت ماش بٹ, پُرانی, تَلُو ، واد ھاپ, تباھگ, مدر, چانگل سیر سک سھرو ءِ نان, پلپل ھاپ, نیگیز, ڈلگ, سوجی، ناہ ءِ ھلوہ, شیلانچ, بستگ ءُ دگہ باز۔

اے نوں مئے ذمہ واری انت کہ ماں وتی دوداں برجم بداریں ءُ وتی آوکیں پدریچ ءَ سر بکنیں دانکہ مئے آوکیں پدریچ وتی دودمانی وردِناں بزان انت ءُ اے ورد ءُ وراکاں گار مہ بنت چیا کہ اے مئے دوداں گوں بندوک انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پنجگور چتکان ءَ گورنمنٹ بوائز ہائیر سیکینڈری وانگجاہ غریب آباد ءَ مراگشے اڈ دیگ بوتگ، مراگش ءَ سال دوھزار بیست ءُ یک ءِ شش ماھی چکاس ءَ سوبین بوتگیں ءُ وانگجاہ ءِ تہ ءَ جوانیں کرد ءِ پیش داروکیں نودربراں داد دیگ بوتگ اَنت –

مراگش ءِ گچینی مھمان وانگجاہ ءِ ھیڈماسٹر فدا احمد بلوچ بوتگ مراگش اسٹیج سیکریٹری عاصم بلوچ بوتگ –

مراگش ءَ نودربراں ھوار ءَ اسکول ءِ ماسٹر ساڑی بوتگ انت ھما نودربراں سال ءِ تہ ءَجوانیں کرد پیش داشتگ ءُ چکاس ءَ گوں جوانیں نمبراں سوبین بوتگ انت آ ساڑاگ بوتگ ءُ آھاں داد دیگ بوتگ –

مراگش ءَ تران کنان ءَ آھاں گُشت کہ ھما نودربراں جوانیں کرد پیش داشتگ ءُ وانگجاہ ءِ دیمروئی ءِ جھد کتگ وتی جھد ءِ کوشست ءَ جوانیں نمبر گپتگ ءُ چکاس ءَ سوبین بوتگ انت آ کابل ءِ ساڑایگ انت ھما نودربراں کہ کمے نمبر گپتگ آ ھمے نودربراں چہ اسرمند بہ بنت ءُ وتی جھد ءِ تہ ءَ گیشی بیار انت –

آھانی گوشگ ات کہ راجانی دیمروئی راز زانت ءُ زانشت ءِ تہ ءَ انت مروچیگیں مئے زھگ مئے باندات ءِ امیت انت اگاں زانت ءُ زانشت ءَ مئے زھگ وتی مکسد جوڑ بہ کن اَنت اھانی سوبمندی المی انت –

وانگجاہ ءِ ہیڈ ماسٹر ءِ گوشگ ات کہ وانگجاہ ءِ ماسٹر جوانی ءَ زھگاں درونت دیگ ءَ انت مروچی زھگانی چکاس ءَ جوانی ءَ سوبین بوگ ءَ وانگجاہ ءِ تہ ءَ شریں وانگی نزام آرگ اے گپ ءِ گواہ انت ماسٹر شری ءَ زھگاں وانینگ ءَ انت –

آئی ءِ گوشگ ات کہ ماسٹرانی ھمراہ داری ابید وانگجاہ ءِ تہ ءَ زانت ءِ دربرگ ناممکن انت من درساں ماسٹرانی دل ءِ جھلانکی ءَ منت ءَ گراں کہ زانت ءُ زانشتی پڑ ءَ گوں ماں ھمکوپگ انت دیمتر ءَ انشاءاللہ جوانیں کرد پیش دار اَنت –

یاروس ولنگی راجی دلار ءِ بلوچ راج چہ اشی ءَ وت ءَ دور بہ دار انت – دوستین بلوچ

سربوتگیں ھالانی رِد ءَ ناشناسیں مردماں ڈیرہ مراد جمالی ءَ یارو سولنگی نامیں مردمے ءِ بنجل ءِ سر ءَ دستی بمب اُرش ءِ کنگ بیتگ- اُرش ءَ یارو سولنگی رکیتگ ءُ یک مردمے زدگ بوگ ءِ ھال انت – یارو سولنگی ءِ سر ءَ بوتگیں دستی بمب اُرش ءِ زمّہ واری بلوچ آجوئی لوٹوکیں سلاہ بندیں گل بی آر جی ءَ منّ اِتگ –

رسانکدراں وتی شنگ کرتگیں درشان ءِ تہ ءَ بلوچ ریپبلکن گارڈ ءِ جارکش دوستین بلوچ ءَ گوشتگ کہ مئے سرمچاراں مروچی ادار دو ءَ بلوچستان ءِ شھر ڈیرہ مراد جمالی ءَ ھستیں وھد ءَ چیریں ادارھانی کارمند یارو سولنگی ءِ سر ءَ ھما وھد ءَ دستی بمب اُرش ءِ کُتگ کہ وتی بنجل ءِ تہ ءَ ساڑی بوتگ، اُرش ءَ یارو سولنگی وت رکیتگ بلے آئی ءِ کارمند ءِ زدگ بوتگ –

جارکش ءَ گوشتگ مار ءَ یارو سولنگی جنگی بوتگ پرچاکہ اے کارندہ بلوچ راج ءِ بگیری ءَ بازیں کتکاریاں ھوار انت –

آئی ءَ وتی درشان ءِ تہ ءَ دمگ ءِ کُلیں بلوچانی گوں لوٹ کُتگ گوشتگ کہ یارو سولنگی ءَ چہ وت ءَ دور بہ دار انت آئی ءِ سر ءَ کجام ھم وھد ءَ اُرش بوت کنت، یارو سولنگی ءَ ھوار درستیں راج دژمنانی ما کُشگے دمب ایں ءُ مئے جُھد آجوئیں سرڈگار ءَ تاں برجاہ مان انت –

بلوچستان ءِ دمگ کیچ ءِ بنجاھی شھر تربت ءَ گوستگیں روچ ءَ پاکستانی سیکورٹی پورس ءِ تیرگواراری ءَ کشگ بیتگیں زالبول تاج بی بی ءِ کوش ءِ ھلاپ ءَ آل پارٹیز کیچ ءُ سول سوسائٹی ءِ نیمگ ءَ روانک ءُ زھرشانی کنگ بیتگ –

آل پارٹیز کیچ ءِ کنونیئر مشکور انور ایڈوکیٹ ءِ چیردستی ءَ جتا جتائیں پکرانی مردم ءُ زالبولاں شھید فدا چوک ءِ سر ءَ مُچ بیتگ اَنت –

ھمے وھد ءَ زھرشانی کنوکاں تران کنان ءَ گُشتگ کہ پورسز ءِ تیرگواری ءَ بلوچ زالبول تاج بی بی ءِ کوش ءَ ایر جن ایں ءُ بلوچ کُش پالیسیانی درچ اِنت –

آیاں گُشتگ کہ کھول ءِ نامگپتی ءِ رد ءَ ایف آئی آر درج ءُ دزگیری کنگ ءِ گامگیج آرگ بہ بیت اِنت –

زھرشانی کنوکاں گوشتگ کہ تچکیں پَٹ ءُ پول بہ بیت ءُ جرم ءَ ھواریں جرمکار کانون ءِ چیر ءَ آرگ بہ بیت اِنت-

آیاں گُشتگ کہ بلوچستان ءَ مھلوک ءِ ترس آماچ کنگ ءِ واستا اے وڑیں وئیل کنگ بیگ ءَ اَنت –

زھرشانی ءَ جسٹس فار شاھینہ شاھین کمیٹی ءِ کنوینئر معصومہ رفیق ءَ تران کنان ءَ گُشتگ کہ جسٹس فار شاھینہ شاھین کمیٹی بے گناھیں زالبول تاج بی بی بلوچ ءِ کوش ءَ ایر جنت ءُ کھول ءِ گون ءَ پدردی درشان کنت ءُ ھمگرنچی ءِ واستا انساپ ءِ لوٹ ءَ کنت –

آئی ءَ گُشتگ کہ شاھینہ شاھین ءَ بہ گر تاج بی بی ءَ داں بلوچ زالبولانی کوش ءُ کوشکارانی دزگیر نہ کنگ یک چیدگی گپے –

ھمے وڑ تاج بی بی ءِ کھول ءَ ڈپٹی کمشنر ءِ گپ رد کرتگ اَنت –

ڈپٹی کمشنر کیچ ءَ گشتگ پورسز ات وئیل ءَ دزمان جن نہ اِنت وھدیکہ کھول ءَ مروچی اے گپ ءِ پژدر ءَ تربت پریس کلب ءَ پریس کانفرنس کنان ءَ گشتگ کہ کُشندہ پاکستانی پوج ءِ تیرگواری چہ تاج بی بی بیران بیتگ –

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ءِ جتا جتائیں جاھاں دگہ چار کس آوار جنگ ءَ پد بیگواہ کنگ بیتگ اَنت کہ چریشانی تہ ءَ یک چاگردی باسک ءُ یک استادے ھوار اِنت –

بلوچستان ءِ بنجاھی شھر شال ءَ عرفان زھری نامیں ورنایے دو روچ ءَ پیسر بیگواہ بیتگ، عرفان زھری یک چاگردی باسکے بیتگ –

چاگردی رسانکجاھاں بلوچستان ءَ سیادی داروکیں جتا جتائیں پکرانی منوگراں عرفان زھری ءِ بیگواھی ءِ سر ءَ زھر ءِ درشان کنان ءَ گوشتگ کہ بلوچستان ءَ سیاسی باسکاں پد نِی چاگردی باسک زورانسری آوار جنی ءِ آماچ کنگ بیگ ءَ اَنت –

ھمے وڑ شال ءِ دمگ سریاب دگ ءَ برما ھوٹل ءَ ھزدار ءِ جھمنندیِ یک مردمے دزگیر کنگ ءَ پد بیگواہ کنگ بیتگ –

گیشیں ھالانی رد ءَ سی ٹی ڈی ءُ دگہ سیکورٹی پورسز ءِ کارمنداں برما ھوٹل ءَ ڈرائیورانی واستا ھستیں کوٹیانی چہ استاد منیر رئیس ء شکر ھان جھمنند زھری ھزدار دزگیر کنگ ءَ پد بیگواہ کرتگ – استاد منیر رئیس مساپر بریِ وینے ھلائینگ ءَ بیتگ ءُ وتی زند ءِ روچاں تیلانک دیگ ءَ بیتگ –

ھمے وڑ ءَ بلوچستان ءِ دمگ کیچ ءِ ھند بلیدہ ءَ یک ورنایے دزگیر کنگ ءَ پد بیگواہ کنگ بیتگ –

دمگی مردمانی رد ءَ سیکورٹی فورسز ءَ لوگانی سر ءَ بیڑ برتگ ءُ مھلوک ترس ءِ آماچ کرتگ اَنت ھمے وڑ ھمے وھد ءَ ندیم ء ابراھیم جھمنند بلیدہ دزگیر کرتگ ءُ گوں وت اش برتگ –

اشاں ابید زورانسری آوار جنی ءِ آماچ بیتگیں مردمے ءِ پجار قادر زھری ءِ نام ءَ زانگ بیتگ ءُ یک استادئے ءُ ماڈل پبلک ھائی اسکول ءِ نام ءَ یک اسکولے پچے کرتگ، ھمے وڑ ھزدار ءِ دمگ زھری ءَ یک مپتی ٹیوشن سینٹرے ھم پچے کرتگ – دمگی مردمانی رد ءَ ھبدہ ستمبر ءَ وھدیکہ آ چہ کلات ءِ دمگ منگچر ءَ روگ ءَ بیتگ کہ اود ءَ آ انجنئر ڈیم ءِ سر ءَ کار ءَ بیتگ آ پاکستانی پوج ءَ زورانسری آوار جتگ ءُ بیگواہ کرتگ –

دمگی مردمانی رد ءَ آئی ءَ سیکورٹی پورسز ءِ نیمگ ءَ بیھار رس اِتگ اَنت ءُ آ جست ءُ پرس ءِ واستا ھزدار ءَ آرمی ءِ مزن بنجل ءَ آیگ ءِ پرمان بیتگ –

قادر زھری ءِ آوار جنی ءِ روچ ءَ پاکستانی پوج ءَ بازیں کچے ءَ زھری ءِ ھند ءَ اسکول بازیں اداراں انگیر ءَ کرتگ – چم دیستگیں مردمانی رد ءَ وھدیکہ پوجی کارمنداں اسکول ءِ انگیر کنگ ءِ بارو ءَ پُرس اِتگ گڑا آیاں ” جی پی ایس سسٹم ءِ کیلیبریٹ کنگ گشتگ “-

بلوچستان ءَ بیگواھیانی درچ روچ پہ روچ ناوش بیان اَنت ءُ ناوشیں جاور ودینگ ءَ اَنت-

بلوچستان ءَ سیاسی ءُ گلانی نیمگ ءَ بیگواھیں مردمانی یل کنگ ءِ واستا گوستگیں بازیں وھداں جد ءُ جھد بیگ ءَ اِنت ءُ اشی ءِ ھواری ءَ شال ءِ پریس کلب ءِ دیم ءَ گوستگیں یک دھکے ءَ ماما قدیر بلوچ ءُ نصر اللہ بلوچ ءِ سروکی ءَ پُرایمنیں زھرشانی بیگ ءَ اَنت –

بلوچ اسٹوڈنٹس آرگنائزیشن آزاد ءِ بُنجاھی جارکش ءَ تربت ءَ پیرزالیں زالبول ءِ دردناکیں کوش گوں تُرندیں لبزاں ایر جتگ ءُ گْوشتگ کہ اے وئیل بلوچ ھونریچی ءُ انسانی ھکّانی سرجمی ءَ ھلاپ ورزی اِنت اے وئیل ءِ درگت ءَ انسانی ھکانی ادارھانی بے تواری دلپدردناک اِنت-

آئی ءَ گْوشتگ کہ گوستگیں روچ ءَ بوتگیں دردناکیں وئیل نوکیں گپے نہ اِنت بلکیں بلوچستان ءِ سر ءَ زوانسری کبزہ کنگ ءَ بگر داں انو زوراوی یکشل ءَ برجاہ اَنت – ریاستی پوج ءَ ریاست ءِ گوشگ ءِ سر ءَ مدام انسانی ھکّاں پادمال کنگ ءُ بلوچ راج ءِ ھونریچی ءَ کنگ ءُ آیگ ءَ اِنت – ریاستی پوج ءِ نیمگ ءَ ھمود ءَ کہ میتگ نشانگ کنگ بنت ءُ اود ءَ لَس مھلوک تیر باران کنگ بنت – گوستگیں سال ءَ پوج ءَ وتی زوراوری ءَ ھَد گْوازینتگ ءُ حیات بلوچ تربت ءِ دمگ آپسر ءَ مات ءِ چمّانی دیم ءَ تیرباران کتگ اَت – گوستگیں روچ ءَ تاج بی بی کوش ھم بلوچ ھونریچی ءِ پالیسی ءِ سبب اِنت-

آئی ءَ دیمتر ءَ گْوشتگ کہ ریاستی پوج ءِ زوراکیاں لَس مھلوک در پہ دری زند گوازینگ ءَ لاچار کتگ اَنت – اود ءِ مھلوک ءَ وتی بُنکی ھنکین یل داتگ ءُ جتائیں دمگاں باھوٹی زند گوازینگ ءَ اَبید ریاستی زوراکی یکشل ءَ گیش بوان اَنت – تاج بی بی ءُ گوں وتی کھول ءِ ھمراھی ءَ ریاستی زوراکی ءَ بیزار بوتگ وتی بُنکی ھنکیں یل اش داتگ ءُ تربت ءَ باھوٹ بوگ ءَ لاچار بوتگ اَنت – گوستگیں روچ ءَ پیرزالیں تاج بی بی ءُ آئی ءِ لوگ واجہ دار ءِ چنگ ءِ ھاتر ءَ شھر ءَ کمو گستا شتگ اَنت کہ اود ءَ ریاستی پوج ءَ تیرگواری کتگ ءُ تاج بی بی کشتگ ءُ وھدے کہ آئی ءِ لوگ واجہ ٹپی کتگ – ریاستی پوج ءِ نیمگ ءَ چہ بوتگیں اے دردناکیں وئیل ریاستی زوراکی ءِ مسالے –

جارکش ءَ گُڈی ءَ وتی درشان ءِ تہ ءَ گْوشتگ ریاستی پوج ءِ نیمگ ءَ چہ یکشل ءَ انسانی ھکّانی پادمالی کنگ بوگ ءَ اِنت وھدے کہ انسان ھکّانی ادارھاں بے تواری چادر چست اَنت – انسانی ھکّانی ادارھانی بے تواری ریاستی زوراکی گیشتر مھکم کنگ ءَ اَنت ءُ ریاستی پوج ھر روچ زوراکیاں یکشل ءَ گیش کنان اِنت – انسانی ھکّانی گشوکیں ڈیھ ءُ ادارھاں گوں دزبندی کن ایں پاکستان ءَ بلوچستان ءَ بؤکیں زوراکیاں جُست بگر اَنت –

سریاب دگ ءِ سر ءَ پرپٹ سواریں کارمند نشانگ کرتگ انت، دو کارمند مُرتگ دو زدگ کتگ اَنت – جئیند بلوچ

سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں دگ ءِ سر ءَ تراک ناکیں شورو چیرکتگ ترکینتگ انت-

تراک شال ءِ دمگ موسی کالونی نزیک ءَ سریاب دگ ءِ سر ءَ کنگ بوتگ کہ ایگل اسکواڈ ءِ کارمند نشانگ کنگ بوتگ انت، چریشی ءَ ایگل اسکواڈ ءِ کارمنداں جانی تاوانانی دیمپانی بوتگ – تراک ءِ زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ –

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ تراک ءِ زمّہ واری منّ اِتگ ءُ گوشتگ کہ مئے سرمچاراں شال ءَ زورگیریں پاکستان ءِ پولیس فورس ءِ ایگل اسکواڈ تراک ناکیں شوروانی نشانگ جوڑ کتگ – مئے سرمچاراں زورگیریں پوج موسی کالونی ءِ نزیک ءَ سریاب دگ ءِ سر ءَ ھما وھد ءَ نشانگ کتگ وھدیکہ آ دو پرپٹانی سر ءَ تر ءُ تاب ءَ بوتگ انت –

جارکش ءَ گوشتگ کہ تراک ءِ زد ءَ اتکگیں یک پرپٹ ءَ سواریں دو کارمند ھما دمان ءَ مُرتگ اَنت ءُ دومی پرپٹ ءِ دؤئیں کارمند زدگ بوتگ انت –

آئی ءَ گوشتگ کہ زورگیریں دژمن ءِ پولیس فورس ءِ جھلی ادارہ ایگل اسکواڈ بلوچ راج ءَ ھرجاہ دارگ ءُ آھانی پٹ ءُ پول کنگ ءُ آھانی کم شرپی ءَ ھوار بوتگ وھدیکہ بلوچ ورنایاں آوار جنی ءُ دروگیں میڑ ءِ نام ءَ کُشگ ءَ ریاست ءِ ناشرکاریں ادارہ سی ٹی ڈی ءِ کمک کار انت –

جارکش ءَ گوشتگ کہ بی ایل اے ریاستی پوج ءُ آئی ءِ کمک کنوکیں دمگی پوج ءَ بلوچ راج ءِ سر ءَ بوتگیں زلمانی ھساب ءَ الم گپت انت –

کراچی پریس کلب ءِ باسک ءُ اھوالکار وارث رضا گوستگیں شپ ءَ جند ءِ گِس ءَ آوار جنگ بوتگ –

اھوالکار وارث رضا ءِ زھگ لیلہ رضا ءَ چاگردی ترامجاھاں آئی ءِ آوار جنی ءِ گپ راست کُتگ گوشتگ کہ آئی ءِ پت کانود جوڑ کنوکیں ادارھاں آوار جتگ گوں وت برتگ آئی ءَ گوشتگ اے درسیں دیمروئی لوٹوکیں تواراں ایرموش کنگ لوٹ انت ، منی پت ءَ راستی گوشگ ءَ ابید دگہ ھچ وڑیں ردیں کار نہ کُتگ –

کراچی یونین آف جنرنلسٹ ءِ رِد ءَ ھپتاد سالی ئیں راجدپتری جھد ءَ کتاب ءِ دروشم ءَ دیم ءَ آروکیں وارث رضا گوستگیں شپ ءَ آوار جنگ ءُ چیریں جاھاں برگ بوتگ – کے یو جج نیمگ ءَ چہ آئی ءِ دزگیری ایرجتگ ءُ آئی ءِ یل کنگ ءں لوٹ کُتگ –

پی ایف یو جے ءَ اھوالکار وارث رضا دزگیری ءِ بگیری ءَ سرجمیں ملک ءَ زھرشانی ءِ جار پرینتگ – آزادیں آھوالکاری ءُ گپانی درشان کنگ ءِ آزاتی ءِ پچ گرگ ءِ زوراکیں کوشست ءَ بے سوب کنگ ءِ ھاتر ءَ بیست ءُ سَے ستمبر ءَ پنچ شمبے ءِ روچ ءَ پی ایف یو جے ءِ درسیں باسک یوجیز ءُ یونٹس سرجمیں پاکستان ءَ زھرشانی کن انت –

پاکستان فیڈرل یونین آف جنرلسٹس ءَ اوار جنی ایرجتگ آئی ءِ یل کنگ ءِ لوٹ کُتگ – سرکماش ءُ شھزادہ ذوالفقار ءُ سیکرٹری جنرل ناصر زیدی ءَ وتی یکجاھیں درشان ءِ تہ ءَ گوشتگ کہ وارث رضا ءِ وڑیں زمہ داریں اھوالکار ءِ آوار جنگ پدردی گپ ئِے ملک ءِ تہ ءَ ھر ھما توار ءِ ایرموش کنگ ءِ جھد بوگ ءَ انت ازاتیں اھوالکاری ءُ درشان دئے ءِ جھد انت –

آھانی گوشگ ات کہ اے وڑیں گامگیجاں ناں مئے رھشون ءُ باسک پدکنز بوتگ ءُ ناں بنت اگاں سرکار ھمے پھمیت کہ لھتے ءِ آوار جنی ءَ آھانی بگیری ءَ ارزی دیگ ءَ آھانی راہ ساپ بیت آ واب گندگ انت – وارث رضا رسانکدراں ءُ دگہ ادارھاں گوں ھمگرنچ بوتگ آئی ءَ پاکستان فیڈرل یونین آف جنرلسٹس ءِ راجدپتر ءُ ملک ءِ تہ ءَ ازاتیں اھوالکار ءِ ھپتاد سالی ئیں جھد ءَ کتابی دروشم ءَ دیم ءَ آرگ ءِ ھاتر ءَ کار کتگ ءُ آئی ءَ مدامی ازاتیں درشان دئے ءُ اھوالکاری ءِ ھاتر ءَ چست بوکیں زرمبشت ءَ بھر زرتگ –

اینکر پرسن حامد میر ءَ وارث رضا یل کنگ ءِ لوٹ کتگ –

سیستان و بلوچستان ءِ بنجاھی شھر دزاپ ءَ سپاہ ءِ تیرگواری ءَ یک سیاسی زندانی ءَ ھوار دو کس بیران بیتگ اَنت –

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ سپاہ ءَ تیرگواری کرتگ ءُ دو کس کشتگ اَنت –

کشگ بیتگیں مردمانی پجار ھالد شاہ بکش ء ھاجی یوسف ءُ داد شاہ شاہ بکش ء سید مھمد ءِ ناماں زانگ بیتگ اَنت –

ھالانی تہ ءَ گوشگ بیتگ کہ سپاہ ءَ اے مردمانی سر بستگ ءُ اشانی سر ءَ تیرگواری کرتگ کہ چریشی ءَ دادشاہ ھما جاہ ءَ بیران بیتگ ءُ ھالد زدگ بیتگ ءُ چریشی ءَ پد ھالد ءَ وتی ٹپ نہ سگ اِتگ ءُ بیران بیتگ –

دگہ یک ھالے ءِ رد ءَ ھالد گوست ءَ ھاجی ناسر شاہ بکش ءِ جمھوری اسلامی ءِ بگیری ءِ بھتام ءَ گرگ بیتگ –

گوشگ بیتگ کہ ھالد ءِ ھمراھانی تہ ءَ دو کس شیر مھمد ءُ شاپور ھما وھد ءَ گرگ بیتگ اَنت ءُ زندان ءِ تہ ءَ اے دوئیں کس لٹ ءُ کُٹانی سبب ءَ بیران بیتگ اَنت –

ھالانی تہ ءَ گوشگ بیتگ کہ اے ھپت سال ءِ بندیگی ءَ پد ھالد یلو بیتگ ءُ گوستگیں روچاں آئی ءِ سر ءَ سپاہ ءَ تیرگواری کرتگ ءُ مروچی آئی ءَ ٹپ نہ سگ اِتگ ءُ بیران بیتگ –