بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ سرمچاراں یک ھپتگے ءِ تہ ءَ 21 کاروائیانی تہ ءَ چار کارندھاں ھوار زورگیریں پاکستانی لشکر ءِ 16 کارندہ کشتگ اَنت۔ گچینی شاھدگانی سر ءَ کنٹرول برجاہ داشتگ وھدے کہ زرکاری ناکہ بندی ءِ چیر دستی ءَ تجارتی گاڑی ءُ پھل نشانگ جوڑ کتگ اَنت۔ چہ اے اُرشاں زورگیریں لشکر کیمپاں مزنیں تاوانے رس اتگ ءُ زورگیریں لشکر ءِ آسراتیاں ھواریں چاریگانی نیٹورک تباہ کتگ انت۔ زورگیر لشکر ءِ گون ءَ جنگ ءُ چوپانی وھد ءَ یک سرمچارے شھید بوتگ۔
جارکش ءَ گوشتگ 23 ستمبر ءَ پسنی ءِ دمگ شادی کور ءَ سرمچاراں ملٹری انٹیلی جنس (ایم آئی) ءِ کارندہ احسان ء برکت جھمنند شادی کور سندھی پسو کُشتگ ءُ آئی ءِ سلاہ ءُ گاڑی دستیگ کتگ انت۔ اے کارندہ شادی کور ءُ آئی ءِ کش ءُ گوراں فوجی زوراکیاں گوں زورگیریں لشکر ءِ آسراتی ءِ تہ ءَ تچک ءَ ھوار بوتگ ءُ لوگانی سر ءَ اُرش ءُ زورانسری ءَ بیگواہ کنگ ءَ ھوار بوتگ۔ اے چاریگ ءَ زورگیریں لشکر ءِ واستا سڑک ءُ پُھلانی چارگ ءُ راہ ءِ گیش ءُ گوار کنگ ءِ کار ءَ بوتگ۔
جارکش ءَ گوشتگ 25 ستمبر ءَ بلوچ لبریشن آرمی ءِ سرمچاراں شپ ءِ وھد ءَ شال ءِ دمگ دغاری ءَ ’تُس بُٹ‘ ءَ زورگیریں پاکستانی لشکر ءِ مزنیں بنجل نشانگ جوڑ کتگ۔ سرمچاراں کہ تھرمل ءُ دگہ نوکیں سلاھاں گوں ھوار، چہ سئے نیمگاں یکیں وھد ءَ دژمن ءِ کیمپ ءِ سر ءَ اُرش کتگ۔ اے اُرش ءَ کہ یک کلاکے ءَ گیش برجاہ بوتگ، دژمن ءِ 9 کارندہ مرتگ ءُ 7 ءَ چہ گیش ٹپی بوتگ انت، ھمے وھد ءَ دژمن ءَ را مزنیں مالی تاوان ھم رس اتگ۔ اے ویلانی تہ ءَ بی ایل اے سرمچار سنگت غلام نبی بلوچ پنام ءِ بولانی کہ دیم پہ دیمہ جنگ ءَ شھید بوتگ۔ اُرش ءَ پد دومی روچ ءَ زورگیریں لشکر ءَ دمگ ءَ دیم ءَ روگ ءِ جھد کتگ کہ سرمچاراں سنگر گپتگ ءُ نشانگ جوڑ کتگ کہ ھمے وھد ءَ زورگیریں لشکر ءِ دو گاڑی تباہ بوتگ اَنت ءُ دژمن ءَ گیشتر جانی ءُ مالی تاوان رس اتگ۔
ھمے روچ ءَ سرمچاراں مستونگ ءِ دمگ اسپلنجی ءَ زورگیریں لشکر ءِ کیمپ ءِ سر ءَ بازیں راکٹ آس داتگ کہ ایشی ءِ آسر ءَ دژمن ءَ را جانی ءُ مالی تاوان رس اتگ۔
دیمترا تربت ءِ دمگ دشت (چیر کنچتی) ءِ دمگ ءَ سرمچاراں زورگیریں لشکر ءِ چاریگ عبدالوہاب ء لال بخش تیر گواری کتگ ءُ کُشتگ۔ عبدالوہاب کہ زورگیریں لشکر ءِ سرپرستی ءَ سلاہ بند بوتگ ، دشت ءُ آئی ءِ کش ءُ گوری دمگاں زورگیریں لشکر ءِ ھاترا آسراتی ءِ نیٹ ورک ءَ چلائینگ ءَ بوتگ۔ آئی ءَ زورگیریں لشکر ءَ را لوگانی چاردر ءُ چار دیواریانی ھلاپ ورزی کنگ ءَ ، زالبول ءُ پیریں مردماں بے ازت کنگ ءُ ورنایاں زورانسری ءَ بیگواہ کنگ ءَ تچک ءَ کمکے کتگ۔
جارکش ءَ گوشتگ 26ستمبر ءَ خضدار ءِ دمگ وڈھ ءَ آر سی ڈی ہائی وے ءِ سر ءَ سرمچاراں زورگیریں لشکر ءِ کاروان ءِ سربستگ ءُ اُرش کتگ۔ اے اُرش ءَ دژمن ءِ سئے گاڑی زد ءَ اتکگ ءُ تاوان بار بوتگ اَنت ءُ سئے کارندہ مرتگ ءُ کم چہ کم شش ٹپیگ بوتگ اَنت۔
ھمے روچ ءَ بی ایل اے ءِ اسنائپراں سوراب ءِ دمگ گدر ءَ زورگیر فوج ءِ بنجل ءَ جاڑیگیں کارندہ نشانگ جوڑ کتگ ءُ دو کارندہ مرتگ اَنت۔
دیمترا سرمچاراں خاران شال ءِ مزن شھدگ ءِ سر ءَ سوتگان ءَ یک مزنیں پُھلے گوں مزنیں مشینری ءِ کمک ءَ تباہ کتگ۔ ھمے شاھدگ ءِ سر ءَ دگہ پُھلے تراک کنگ ءَ ابید کلی کریم بخش ءَ زورگیریں لشکر ءِ کارمرد بوتگیں پوسٹ ھم تباہ کتگ۔
ھمے روچ ءَ تجابان ءُ ھوشاپ ءِ نیام ءَ سی پیک ءِ راہ ءِ سر ءَ سرمچاراں کنٹرول کتگ ءُ ساھتانی ساھت پٹ ءُ پول کتگ-
جارکش ءَ گوشتگ 27 ستمبر ءَ شال ءُ تپتان ءِ تجارتی راہ ءِ سر ءَ چاگی ءِ دمگ نوکچاہ ءَ سرمچاراں یک تجارتی گاڑی یے گوں آئی ءِ ساماناں دستیگ کتگ۔
جارکش ءَ گوشتگ 28 ستمبر ءَ قلات ءِ دمگ منگچر ءِ ھند سورو ءَ مزنیں شاھدگ ءِ سر ءَ آئی ای ڈی ءِ اُرش ءَ سرمچاراں زورگیریں لشکر ءِ بمب ڈسپوزل اسکواڈ ءِ کارندہ نشانگ جوڑ کتگ اَنت کہ ایشی ءِ آسر ءَ دو کارندہ جاہ مرتگ اَنت وھدے کہ یک مزنیں پُھلے ھم تباہ بوتگ۔
ھمے روچ ءَ شال ءُ تپتان ءِ تجارتی راہ ءِ چاگی (نوکچاہ) ءِ دمگ ءَ سرمچاراں مڈی ءَ باریں گاڑی ءِ سر ءَ نہ اوشتگ ءِ سبب ءَ تیر گواری کتگ ءُ پد ءَ سوتکگ۔
دیمترا خاران ءِ دمگ برشونکی ءَ سرمچاراں زورگیریں لشکر ءِ ملٹری انٹیلی جنس (ایم آئی) ءُ حافظ ممتاز ءِ سروکی چلوکیں ڈیتھ اسکواڈ ءِ دو کارندہ ( سدیس ء محمد کریم مینگل ءُ جنید ء نور محمد محمد حسنی جھمنند برشونکی) بلوچ راجی آمیدگس ءِ پیسلہ ءَ کشتگ انت-
دوئیں کارندہ لھتے روچ پیسر سرمچاراں دزگیر کتگ امت۔ بنداتی جست ءُ پرس ءِ وھد ءَ آیاں منّ اِتگ کہ آیاں بلوچ آجوئی لوٹوکیں گلانی تہ ءَ ھوار بیگ ءَ پد کلات ءِ کوھیں دمگ ءَ ٹریکنگ چپے سر کتگ۔ سرمچاراں چہ جست ءُ پرس ءَ من اتگ اش پد ءَ مات ءُ پتانی زمانت ءِ سر ءَ آ یلہ داتگ اَنت۔ بلے چہ یلہ کنگ ءَ پد اے دوئیں پد ءَ حافظ ممتاز ءِ ٹولی ءَ ھوار بوتگ اَنت کہ اود ءَ آھاں سلاہ ءُ گیشتر ٹریکنگ چپس دیگ بوتگ اَنت کہ ایشانی تہ ءَ سئے لجے ءِ دمگ ءَ سر کنگ بوتگ اَنت کہ اود ءَ رند ءَ ڈرون بمبتراک کنگ بوتگ۔ آیاں اے گپ ءِ منّ اِتگ کہ اے زوراکی ءِ وھد ءَ آ زورگیریں لشکر ءِ آسراتی ءِ کار ءَ ھوار بوتگ اَنت ءُ چہ نوشکی ءُ ھاران ءَ پہ لشکر ءَ سلاہانی سرکنگ ءُ راہ ءُ درانی پچ کنگ ءِ کاراں پیلو کنگ ءَ بوتگ اَنت۔ چاریگاں اے ھم پدر کتگ کہ آ ھم موسیٰ نامیں مردے ءِ کوش ءَ ھوار بوتگ اَنت۔
(زانگ بہ بیت کہ اے نیٹورک ءَ ھواریں محبوب ء مولابخش ماندائی کہ ھم ھمے ماہ ءَ سرمچاراں دزگیر کنگ ءُ چہ جرم ءِ منّگ ءَ پد کُشگ بوتگ)۔ سودیس ءُ جنید ءَ اے نیٹ ورک ءَ ھوار دمگ ءِ دگہ زورگیریں لشکر ءِ مردین ءُ زالبولیں کارندھانی نام ءُ راز پدر کتگ انت کہ زوت بلوچ راجی آمید گس ءَ پیش کنگ بنت۔
جارکش ءَ گوشتگ 29 ستمبر ءَ نوشکی ءِ شھر ءَ سرمچاراں پولیس ءِ کارندہانی سلاہ دستیگ کتگ ءُ چاریگری کیمرہ نشانگ جوڑ کتگ ءُ تباہ کتگ اَنت۔ دوشمبے ءِ شپ ءَ نوشکی ءِ عیدگاہ روڈ ءَ زور لشکر ءِ نیمگ ءَ ایر کنگ بوتگیں مزنیں جاسوسی کیمرہ ھم تباہ کتگ۔
ھمے روچ ءَ خاران شال روٹ ءِ سر ءَ دالی ءَ پنچ کلاک ءَ چہ گیش ناکہ بندی ءُ سنیپ چیکنگ کنگ بوتگ وھدیکہ گواڑگان ءَ ھم ناکہ بندی کتگ-
زورگیر لشکر ءِ جارکش ( آئی ایس پی آر) ءِ نیمگ ءَ گوستگیں روچاں جتگیں اے گپ کہ لھتیں روچانی تہ ءَ زیارت، شابان ءُ دگہ دمگاں 71 ءَ چہ گیش مردمانی جنگ ءِ ٹاہ داتگ، اے سیاھیں دروگ انت ءُ زمینی راستیانی چپ انت- اے دروگیں کچ ءُ کساس وتگڑیں درشانے راستیں جنگ ءِ میدان ءَ سرمچاراں دست ءَ تباہ بوگ ءُ کیمپانی سر ءَ بوتگیں تباہ کنوکیں اُرش ءُ جانی ءُ مالی مزنیں تاوان ءَ پد زورگیریں ریاست ءِ بے وسی ءُ پروش وارتگیں لیکہ ءِ یک پدریں نشانی یے ۔ اے پاکستانی فوجی مشینری ءِ یک کوھنیں دود ءُ ربیدگے کہ آ وتی شکست ءَ گوں دروگیں پروپیگنڈا ءَ چیر بہ دنت ءُ لس مھلوک ءِ دلگوش ءَ چہ راستیں تاواناں بہ کش ایت۔
پد ءَ زورگیریں ریاست ءُ آئی ءِ ادارہاں اے رھبند زانت ءُ زانت ءَ زرتگ کہ بی ایل اے ءُ دمگ ءِ دگہ جنگولیں گل (چوکہ تحریک طالبان پاکستان) یکجاہ پیش دارگ بہ بنت دانکہ دنیا ءَ اے سان دیگ بہ بیت کہ آ درست یکیں نیٹ ورک ءِ بھر اَنت۔ اے بے کارین ءُ پرشتگیں پندل ءِ یکیں مول ءُ مراد ایش انت کہ بلوچ راجی تھریک ءِ راجی آجوئی ءِ ھاترا میان استمانی تک ءَ سیاسی، سیکولر ءُ نزریاتی جھد ءِ سر ءَ اڑانگ ودینگ بہ بیت۔
ما اے پروپیگنڈا ءَ سرجم ءَ رد کنیں ءُ دو گال ءَ اے گپ ءَ پدر کنیں کہ بلوچ لبریشن آرمی ( بی ایل اے) ’براس‘ ءَ ابید دگہ گل، نزریاتی ءُ املی سیادی نیست۔ بی ایل اے یک سرجمیں وت واجھیں، مھکم ءُ راجی رِد ءُ بند داتگیں آجوئی ءِ جنبشے کہ ایوک ءَ پہ زورگپتیں بلوچستان ءِ آجوئی، راجی وسیلھانی رکھینگ ءُ آجوئیں، وت واجھیں ءُ وشھالیں بلوچ وتن ءِ رسگ ءِ ھاتر ءَ جنگ ءَ اِنت۔
اے وڑیں بے بنیں دروگ ءُ نپسیاتی پندل سازگ ءَ نا سرمچارانی ھمت ءَ پروش دات کنت ءُ نہ کہ بلوچستان ءَ راستیں ءِ بنیاد ءَ برجاھیں گھگیری ءَ چہ وتی دیم ءَ شموشکار کنت۔ بلوچ راج ءُ میان استمانی تک شر زانت کہ بی ایل اے ءِ زانشتکار، ہمگامیں ھکمت املی ءُ گراؤنڈ کنٹرول زورگیریں فوج ءِ زوال ءُ شکست ءِ اسل سوب انت۔
