بلوچستان ءِ دمگ کچھی ءَ پاکستانی لشکر ءِ نیمگ ءَ دومی ھم آپریشن برجاہ اِنت۔
کچھی، ڈھاڈر ءُ ایشی ءِ کش ءُ گور ءِ دمگ آپریشن ءِ زد ءَ اَنت کہ ایشی ءِ تہ ءَ گن شپ ءِ ھیلی کاپٹر ءُ ڈرون بھر زورگ ءَ اَنت۔
دمگ ءِ بازیں جاھاں تیرگواری ءِ ھم ھال ھست، وھدیکہ گوستگیں روچ ءَ پاکستانی لشکر ءُ سلاھبندانی نیام ءَ جنگ ءُ چوپ ءِ ھال ھم بیتگ۔
اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔
کیچ ءِ دمگ چہ تمپ ءَ سر بیتگیں ھالانی رد ءَ گوستگیں روچ ءَ کوھی دمگاں پاکستانی لشکر ءِ سر ءُ پسر گندگ بیتگ انت۔
دمکی مردمانی رد ءَ فوجی کارندہ ، بکتربند گاڑی ءُ ٹینکانی ھواری ءَ سر ءُ پراں تمپ ءِ ھند گومازی ، دیزیگ ، مار ءُ کِر ءَ گندگ بیتگ ءُ گوماز ءَ کچ ءُ کساساں ھم گیشی اتکگ ۔
ھمے وڑ ءَ مزنبند ءِ کوھی دمگاں ھم فوجی ھیلی کاپٹر بال ءَ گندگ پیتگ انت ءُ ڈرون ھم بال ءَ گندگ بیتگ انت۔
دمگاں فوجی سر ءُ پر ءُ برزی دلگوشداری ءِ دمگی مردماں جیڑگانی دیمپانی۔
داں انگت ءَ جانی تاوانانی اھوال نیست انت ءُ ناکہ فوجی واکدارانی نیمگ ءَ دمگ ءَ فوجی آپریشنانی درگت ءَ دگہ اھوال دیم ءَ آرگ بیتگ انت۔
زانگ بہ بیت بلوچستان ءِ بازیں دمگ اے وھد ءَ درجاریں فوجی آپریشنانی چیر ءَ اَنت کہ اود ءَ مھلوک ءِ زورانسری لڈ ءُ بار ، برزی اُرشاں جانی تاوانانی اھوال دیم ءَ اتکگ انت-
بلوچستان ءِ دمگ لسبیلہ ءَ پاکستانی کوسٹ گارڈز ءَ شست ءُ یک کدرتی ءُ کیمتی شاھین دستکپتگ انت- کہ پد ءَ مھمکہ ءِ جنگلات ءَ آجو کتگ انت-
لسبیلہ ءِ جنگی رسترانی اسسٹنٹ کنزرویٹر حاصل بلوچ ءِ رد ءَ کوسٹ گارڈز ءِ کارندھاں شکاری ءِ مرگ اوتھل چیک پوسٹ ءَ کاروائی ءِ وھد ءَ دستیگ کتگ انت – کدرتی مرگ چہ شال ءَ کراچی ءِ برگ ءِ وھد ءَ دو مساپر بریں بساں دزکپتگ انت کہ اود ءَ آ چیرکائی برگ ءَ بیتگ ات انت-
حاصل بلوچ ءِ رد ءَ مرگاں چہ شال ءَ دیم پہ کراچی ءَ برگ ءِ وھد ءَ گپتگ انت- اژدری چار ءُ ٹپاس ءَ پد یل داتگ انت-
بلوچستان ءِ دمگ نصیر آباد ءَ سر بیتگیں ھالانی رد ءَ نوتال پولیس تھانہ ءِ سیمسراں ناشناسیں مردماں بی آ سی “ بلوچستان ریڈنشل کالج “ ءِ جوڑ بوکیں ماڑی گوں تراک ءَ تباہ کنگ بوتگ۔
ھالانی رد ءَ چہ تراک ءَ ماڑی ءَ تاوان رس اتگ بلے اود ءَ کسے ءِ نہ بوگ ءَ دگہ جانی تاوان نہ بیتگ۔
زانگ بہ بیت تباہ بیتگیں سرکاری ماڑی سال ۲۰۱۸ ءَ یکشم ءَ جوڑ بیگ ءَ بیتگ۔
وئیل ءَ پد پاکستانی پورس ءُ پولیس وئیلجاہ ءَ سر بیتگ انت دمگ اش بند کتگ ، وئیل ءِ سبب زانگ نہ بیتگ۔
بلوچستان ءِ جتاجتائیں دمگاں بُنجاھی شھدگانی ناکہ بندی ءُ پاکستانی پوج ءِ سر ءَ بیتگیں وئیلانی زمہ واری بی ایل ایف، بی آر جی ءُ یو بی اے ءَ منّ اِتگ اَنت-
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ کریمہ آرمڈ اسالٹ ڈویژن (کاڑ) ءِ سرمچاراں کلات ءِ دمگ دشت گوران ءَ شال -کراشی شھدگ سر ءَ سھب دوازدہ ناکہ بندی برجاہ داشتگ سوبمندی ءَ چہ پٹ ءُ پول کتگ- اے میان ءَ سرمچاراں شھدگ سر ءَ سُر ءُ پُرکنوکیں گاڑی پٹ ءُ پول کتگ ءُ گلی ءُ راجی کار پیلو کتگ اَنت- بیگاہ ءِ پنچ ءَ تاں وتی مول ءُ مرادانی سرجم کنگ ءَ پد دگہ بندی ھلاس کتگ ءُ اے میان ءَ زورگریں پوج ءَ ھچ وڑیں سُر ءُ پُر نہ کتگ-
جارکش ءَ گْوشتگ دگہ یک کاروائی ءَ 26 ستمبر 2026 ءَ کریمہ آرمڈ اسالٹ ڈویژن ءِ سرمچاراں ھُزدار ءِ دمگ لاکھوریان ءَ شال – کراچی بُنجاھی شھدگ سر ءَ نیمروچ ساھت دو ءَ بیگاہ ءَ پنچ ءَ تاں ناکہ بندی برجاہ داشتگ سوبمندی ءَ گوں پٹ ءُ پول کتگ- اے میان ءَ سرمچاراں شھدگ سر ءَ سُر ءُ پُر کنوکیں گاڑیانی پٹ ءُ پول کتگ گلی ءُ راجی کار پیلو کتگ اَنت-
جارکش ءَ گوشتگ بیگاہ پنچ ءَ ناکہ بندی ھلاس کنگ ءَ پد ھم کاڑ ءِ جاڑیگیں سرمچاراں شال – کراچی شھدگ ءِ نزیک ءَ سنگر داشتگ ءُ شپ ھشت ءَ تاں زورگریں پاکستانی پوج ءِ آیگ ءِ ودار ءَ بیتگ اَنت ءُ شھدگ وتی دستیگ کتگ، بلے سرمچارانی ساڑی بیگ ھال ءَ اَبید زورگریں پوج ءِ کارمند تُرس ءِ سوب ءَ دیم ءِ آیگ ءُ دیم پہ دیم بیگ ءِ ھمت ئِے کُت نہ کتگ – سرجمیں مول ءُ مرادانی سرجم کنگ ءَ پد سرمچار پہ سلامتی وتی مُھریں اوتاکاں نیمگ ءَ شتگ اَنت-
جارکش ءَ گوشتگ بی ایل ایف کلات ءُ ھُزدار ءَ بُنجاھی شھدگانی سر ءَ ناکہ بندی ءُ دمگ ءِ سرجمی ءَ دستیگ کنگ زمہ واری ءَ منّ اِیت-
بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مروچی سھب مئے سرمچاراں کچھی ءِ دمگ ڈھاڈر ءُ سنی دگ ،چیتری ھند ءِ سر ءَ آپریشن ءِ نیئت آؤکیں زورگریں پوج ءِ کاروان سنگر گپتگ ءُ مزنیں ءُ وتکاریں سلاھاں چہ نشانگ کتگ-اے کاروائی ءِ میان ءَ پوج ءِ دو گاڑی تچکی ءَ اُرش ءِ نشانگ ءَ اَتکگ اَنت ،چریشی ءِ آسر ءَ پنچ پوجی کارندہ مرتگ اَنت ءُ بازین ئِے ٹپی بوتگ اَنت ،وھدے کہ سرمچاراں کاروان سر ءَ چاروگی ءِ یک کواڈ کاپٹرے ھم نشانگ کتگ ءُ دور داتگ-
جارکش ءَ دیمتر ءَ گوشتگ کہ بی آر جی ءِ سرمچاراں بلوچستان ءِ دمگ نصیر آباد ءِ ھند نوتال ءَ زورگریں پاکستانی پوج ءِ یک چیک پوسٹے مزنیں سلاہ ءُ وتکاریں سلاھاں چہ اُرش کتگ – اے اُرش ءِ آسر ءَ زورگریں پوج ءِ یک کارندھے مرتگ ءُ بازین ئِے ٹپی بیتگ اَنت-
جارکش ءَ گْوشتگ اے اُرشانی زمہ واری ءَ مئے گل بی آر جی منّ اِیت ءُ اے وڑیں کاروائی بلوچستان ءِ وتواجھی ءَ تاں برجاہ بنت
یونائیٹڈ بلوچ آرمی ءِ جارکش مزار بلوچ ءَ وتی درشانے ءَ گوشتگ کہ سرمچاراں نیمروچ ءِ ساھت دو ءُ چل ءَ بولان ءِ ھند پیر اللہ یار شاہ دربار ءَ پہ لشکر کشی ءِ چن ءُ لانچ کنوکیں پاکستانی پوج ءِ کارندھانی سر ءَ یو بی اے ءِ سنائپر ٹولی ءَ سنائپر ءَ اُرش کر
تگ۔
آئی گوشتگ اُرش ءِ آسر ءَ پوج ءِ دو کارندہ جاھی مرتگ۔ کاروائی ھما وھد ءَ کنگ بوتگ کہ زورگریں پوج ءِ کارندہ پہ آپریشن ءِ چن ءُ لانچ ءَ یکجاہ مچ بوتگ اَنت۔
مزار بلوچ ءَ اُرش ءِ زمہ واری من اِتگ ءُ گوشتگ کہ مئے اے وڑیں کاروائی داں بلوچستان ءِ آجوئی ءَ برجاہ بنت۔
بلوچستان : جتاجتائیں دمگ ھاران، کلات ءُ سوراب ءَ بُنجاھی شھدگانی سر ءَ سلاہ بندانی ناکہ بندیءِ جتاجتائیں دمگاں سلاہ بندیں مردمانی نیمگ ءَ چہ ناکہ بندی ءُ گاڑیانی پٹ ءُ پول ءِ ھال اِنت، کہ اود ءَ ھاران، کلات ءُ سوراب ھوار اَنت-
اِھوالکار ءِ رِد ءَ ھاران ءِ دمگ دالی ءَ سلاہ بندیں مردماں ناکہ جتگ، اود ءَ آؤکیں ءُ رؤکیں گاڑیاں پٹ ءُ پول کنگ ءَ اَنت-
ھمے وڑ کلات ءِ دمگ دشت گوران ءَ ھم شال –کراچی بُنجاھی شھدگ سر ءَ سلاہ بندانی نیمگ ناکہ بندی ءُ گاڑیانی پٹ ءُ پول ءِ ھال اِنت-
اِھوالکار ءِ رِد ءَ دشت گوران ءَ مردینانی ھمراھی ءَ زالبول ھم ھوار اَنت-
ھمے وڑ چہ سوراب ءَ سلاہ بندیں مردمانی نیمگ ناکہ بندی کنگ ھال اِنت اود ءَ مردین ءُ زالبولانی ساڑی بیگ ھال اِنت-
نوشکی ءَ سلاہ بندیں مردم شھر ءَ پترتگ ءُ تیرگواری ای کتگ ءُ پولیس کارندھانی سلاھانی برگ ءِ اھوال دیم ءَ اتکگ انت۔
دمگی مردمانی رد ءَ سلاہ بندیں مردماں شھر ءَ ھستیں یک بینکے ءِ تیرگواری کتگ ، چریشی ءَ بینک ءِ سیکورٹی کیمرہ ناکارہ بیتگ انت۔
وئیل ءَ دگہ جانی یا زدگ بوگ ءِ ھچ وڑیں تاوان پیش نیتکگ ۔
دمگی مردمانی رد ءَ سلاہ بندیں مردماں پد ءَ بازار ءَ طارق چوک ءَ دو پولیس کارندھانی اش برتگ اَنت۔
بلوچستان ءِ دمگ مستونگ ءِ تھسیل کھڈکوچہ ءِ دمگ ریکی بوز ء گوستگیں بیگاہ ءَ پجّار نہ بوتگیں سلاہ بندیں مردماں مدینہ ھوٹل گوں تراکناکیں شورواں تباہ کتگ چریشی ءِ آسر ءَ ھوٹل ءِ ماڑی سرجمی ءَ تباہ بیتگ ءُ کپتگ-
دمگی اِھوالکار ءِ رِد ءَ تراک ءِ ھمگرنچیں پرچون دکان ھم سرجمی ءَ تباہ بیتگ وھدے کہ نزیکیں ٹیوب ویلانی کساس 250 سولر پلیٹس ناکارہ بوتگ اَنت-
تراک ءِ تُرندی ءَ چہ نزیکیں لوگانی دریگانی کانچ ھم پروشتگ اَنت- وئیل ءَ پد دمگ ءَ سک تُرس ودی بیتگ-
بلے وئیل ءِ سوب انگت زانگ نہ بیت ءُ دمگی انتزامیہ نیمگ ءَ ھم ھچ وڑیں درشان دیم ءَ نیتکگ-
کیچ ءِ دمگ دشت ءَ پاکستانی لشکر ءِ جھلی ءُ برزی آپریشن برجاہ ۔
گیشیں ھالانی رد ءَ دشت ءِ بازیں جاھاں پاکستانی لشکر ءَ مزنیں کچے ءَ جھلی ءُ برزی لشکر کشی بندات کتگ ۔
دمگی مردمانی رد ءَ دشت سیاھجی ءِ کوھی دمگاں ھوار سرجمیں دمگ ءَ پاکستانی فوج مانرتکگ ءُ لشکر کشی کنگ ءَ انت –
زانگ بہ بیت بلوچستان ءِ بازیں جاھاں لشکر کشی برجاہ انت ءُ دشت ءِ آپریشن ءِ درگت ءَ انگت ءَ واکدارانی نیمگ ءَ دگہ اھوال دیم ءَ نیتکگ انت۔
بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں بیانے ءِ تہ ءَ گْوشتگ کہ مرچی سرمچاراں کچھی ءِ دمگ بولان ءَ کھٹان پولیس تھانہ ءِ سر ءَ اُرش کُتگ۔
جارکش ءِ رد ءَ سرمچاراں تراکناکیں شورواں گوں پولیس تھانہ سرجمی ءَ تباہ کتگ۔
دوستین بلوچ ءِ رد ءَ بی آر جی ءِسرمچاراں نصیر آباد ءِ دمگ منگولی پولیس تھانہ ءِ سیمسر ءَ ریل ءِ ٹریک ءِ سر ءَ تراکناکیں شورواں کوں تباہ کتگ۔
جارکش ءَ گوشتگ کہ گوستگیں روچ ءَ مئے سرمچاراں سندھ ءِ دمگ خیر پور ءَ ریل اسٹیشن ءِ نزیک ءَ ریل ءِ ٹریک نشانگ جوڑ کتگ، ایشی ءِ سبب ءَ مال بردار ریل ٹریک ءَ چہ کپتگ، وھدیکہ ریل ٹریک ءُ ٹرین ءَ را ھم سک باز تاوان بوتگ۔
بی آر جی ءِ جارکش ءَ گیش گْوشتگ: مئے گل بی آر جی اے اُرشانی زمہ واری ءَ من ایت ءُ داں بلوچستان ءِ سرجمیں آجوئی ءَ اے وڑیں کاروائی برجاہ مان اَنت۔
