خاران انتزامیہ ءَ دو مردمانی جون چست کتگ انت۔
بلوچستان ءِ دمگ خاران ءِ ھند برشونکی ءَ چہ دو مردمانی لاش دزکپتگ انت ءُ پہ پجارینگ ءَ نادراھجاہ ءَ سر کنگ بوتگ انت۔ ایشانی کُشگ ءَ پد لاش وئیل جاہ ءَ چگل دیگ بیتگ اَنت۔
دزکپتگیں لاشانی پجار گمانی ریاستی سرپرستی ءِ ڈیتھ اسکواڈ ءِ باسک بوتگ انت کہ آہانی پجار برشونکی ءِ نندوکیں محمد کریم ءِ چک سودیس ءُ برشونکی ءِ نندوکیں نور محمد ءِ چک جنید ءِ ناماں بوتگ انت۔
وئیل ءِ گیشیں پٹ ءُ پول خاران پولیس ءِ نیمگ ءَ کنگ بوھگ ءَ اِنت۔
بلوچستان ءِ دمگ کیچ ءِ ھند بلیدہ ءَ الندور ءَ ناشناسیں سلاہ بندیں مردماں راکٹ لانچر اُرش ءَ ڈیتھ اسکواڈ ءِ پناہ گاہ نشانگ جوڑ کتگ۔
دمگی مردمانی رد ءَ اے اُرش ءَ پروم پنجگور ءِ نندوکیں حاجی حسن ءِ چُک یحییٰ ءُ عائشہ بنت لعل محمد بیران بوتگ اَنت ءُ شیھک ء نور اللہ ءُ شہاب ء صغیر جھمنند ٹپیگ بوتگ اَنت۔
مردمانی گشگ اِنت کہ اے اُرش ءِ آماچیں مردمانی سیادی گوں سرکاری کمک ءَ بوتگیں سلاہ بندیں گلے ءَ بوتگ کہ بلوچستان ءَ ”ڈیتھ اسکواڈ“ ءِ نام ءَ زانگ بیت۔
بلوچستان ءَ پہ اے وڑیں سلاہ بندیں گلاں ”ڈیتھ اسکواڈ“ ءِ گالبند کارمرد کنگ بوتگ۔ کہ آ سیاسی جھدکار، بلوچ راجدوست ءُ مھلوک ءِ ھلاپ ءَ کاروائیانی واستا کارمرد بنت۔
کیچ: پاکستانی لشکر ءِ نیمگ ءَ جنین ءُ کسان سالیں زھگے آوار جنگ بیتگ انت
گوستگیں شپ ءَ کیچ ءِ دمگ سامی بلوچی بازار ءِ دمگ ءَ پاکستانی پوج ءَ چہ وتی لوگ ءَ زالبول گوں ھمراھے زھگے ءَ آوار جتگ ءُ برتگ انت۔
دمگی مردمانی رد ءَ پاکستانی لشکر ءُ آھانی سلاہ بندیں مردماں شپ ءِ دیر ءَ یک لوگے ءَ شُتگ ءُ چاردر ءُ چار دیواری لگتمال کنان ءَ جنین ءُ آئی ءِ کسان سالیں جنک گوں وت برتگ اَنت۔
دمگی مردماں زالبول ءِ پجار لطیف ءِ چُک ھانی ءِ نام ءَ کتگ ءُ جنک ءِ پجار علی جان ءِ چُک عائشہ ءِ نام ءَ بوتگ۔
کھول ءِ مردم ءُ دمگی وسیلگ گْوشتگ کہ اے وئیل ءَ پد اے دوئیں مردمانی بابت ءَ ھچ وڑیں ھال ءُ اھوال پدر نہ بوتگ ءُ ھما جاہ ءِ بابت ءَ ھم ھال ءُ اھوال دست نہ کپتگ کہ آ کجام جاہ ءَ برگ بوتگ اَنت۔
چاگی، شال – تفتان باپاری دگ سر ءَ سلاہ بندیں مردم نوکچاہ ءِ ھند سر ءَ یک لوڈیں باپاری گاڑی یے دستیگ کتگ وتی ھمراھی ءَ برتگ، وھدے کہ دمگ ءَ سلاہ بندانی ساڑی بیگ ھال اِنت-
زانگ بہ بیت کہ ھمے سال ءَ بلوچ آجوئی لوٹوکیں سلاہ بندیں گل بلوچ لبریشن آرمی ءَ بلوچستان ءَ مالی ناکہ بندی ءِ جار جتگ اَت، چریشی ءَ پد سرجمیں بلوچستان ءَ ھاسکار شال – تفتان ءُ شال – کراچی شھدگانی سر ءَ باپاری گاڑی اُرشانی دیمپانی کنگ کپتگ-
بلوچ آجوئی لوٹوکانی نیمگ ءَ چہ ایل پی جی بروکیں گاڑیانی، دگہ باپاری گاڑی ءُ پھازداری کنوکیں پاکستانی پوج اُرشانی نشانگ کنگ بوتگ درزنانی گاڑی تباہ ءُ بازیں پوجی کارندھے بیران بیتگ اَنت-
بلے مروچی چاگی ءَ بیتگیں وئیل ءِ زمہ واری انگت ھچ گل ءَ نہ زرتگ-
بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں یک بیانے ءِ تہ ءَ گْوشتگ کہ مرچی سھب ءَ بلوچستان ءِ دمگ سبی ءُ بختیار آباد ءِ میان ءَ دمگ ءِ مزن شھدگ ءِ سر ءَ سرمچاراں ناکہ بندی کتگ ءُ گاڑی پٹ ءُ پول کتگ اَنت۔
جارکش ءِ رد ءَ ھمے پٹ ءُ پول ءِ وھد ءَ اود ءَ ھچ وڑیں ریاستی کارندہ یا سرکاری ادارہ ءِ کارندہ گندگ نہ بوتگ ءُ بلوچستان ءِ راجی مڈیانی بروکیں پنجاب ءَ برگ ءِ ھچ گاڑی گوست نہ بوتگ۔
دوستین بلوچ ءَ دیمترا گْوشتگ کہ مئے گل بی آر جی اے بندش ءِ زمہ واری ءَ من ایت ءُ مئے اے وڑیں کاروائی داں بلوچستان ءِ آجوئی ءَ برجاہ مان اَنت۔
بلوچستان ءِ تیابدپی شھر گوادر ءِ تھسیل پسنی ءِ دمگ سردشت ءُ کلانچ ءَ ھزاراں دمگی مردماں وتی بُن پیروکی جاہ یل کتگ ءُ دیم پہ پسنی، گوادر ءُ تربت ءَ شُتگ اَنت۔
بنشون ءِ رد ءَ کلانچ ءِ دمگاں ڈنڈو کلانچ، تولگو ءُ سردشت ءِ سرجمیں میتگ یلہ کنگ بوتگ انت۔ اے اولی رند نہ اِنت کہ مردماں مزنیں کچے ءَ لڈ ءُ بار کتگ۔ ایشی ءَ چہ پیسر پسنی ءِ دمگ شادی کور ءِ مردماں ھم وتی ارزشت داریں کشت ءُ کشاری زمین یلہ داتگ انت ءُ دگہ دمگاں شتگ انت۔
زانگ بہ بیت کہ گوستگیں روچاں پبلک ہیلتھ ڈیپارٹمنٹ گوادر ءِ نیمگ ءَ سردشت ءِ دمگ ءَ ٹینکرانی وسیلگ ءَ آپ ءِ پجارینگ ءِ واستا 15.2ملین کلدار ءِ ٹینڈر ھم جاری کنگ بوتگ ات، ایشی ءِ وسیلگ ءَ دمگ ءَ آپ دیگ بوتگ ات۔
دومی نیمگ ءَ دمگی انتزامیہ مزنیں کساسے ءَ مردمانی لڈ ءُ بار ءِ سبب ءِ پدر کنگ ءَ چک ءُ پد انت ءُ لڈ ءُ بار کتگیں مردم ھم ترس ءِ سوب ءَ رسانکدر ءَ راستیں جاور ھال ءِ سرپد کنگ ءَ چک ءُ پد انت۔
لڈ ءُ بار کتگیں مردماں مزنیں کساسے ءَ تربت ءِ دمگ کوہ مراد ءَ پناہ گپتگ ءُ گیشتریں مردماں پسنی ءِ نیمگ ءَ رھادگ بوتگ اَنت۔
دومی نیمگ ءَ پسنی پولیس ءَ پسنی ءِ دمگی مردم بیھار داتگ انت کہ اگاں آ سردشت، کلانچ ءُ کش ءُ گور ءِ دمگاں چہ لڈ ءُ بار کتگیں مردماں وتی لوگاں پناہ دیگ ءَ اَنت گڑا تھانہ ءَ برو اِت ءُ وتی سرجمیں ھالاں پیش بہ کن اَنت۔
سردشت ءُ کلانچ ءَ چہ انچیں مزنیں کساسے ءَ مردمانی لڈ ءُ بار ءَ یک مزنیں جاورھالے ودی کتگ، کہ مردم مجبور اَنت کہ وتی ارزشت داریں کشت ءُ کشاری زمین، لوگ ءُ مال ءُ مڈیاں یلہ بہ کن اَنت ءُ نا شریں جاوراں دگہ شھراں پناہ بہ زور اَنت۔
دمگی مھلوک ءِ لوٹ انت کہ انتزامیہ ءَ چہ زوت لڈ ءُ بار کتگیں مردمانی سبب پدر بہ بنت ءُ سانمندیں ھاندانانی کمک ءِ ھاتر ءَ جوانیں گامگیج بہ زور انت۔
یات دارگ بہ بیت کہ پیسر ءَ پاکستانی لشکر ءَ ھم چہ زمران ءَ دمگی مردماں لڈ ءُ بار کنگ ءَ مجبور کتگ اَنت، وھدے کہ کلات ءِ شورا پارود ءُ کش ءُ گوراں دمگی مردماں ھم لڈ ءُ بار کنگ ءِ سرکاری پرمان رس اتگ۔
دمگی مردمانی گشگ ءِ رد ءَ آیاں وتی سرکاری نمائندگاں چہ دمگی مردمانی زوراکی ءَ چہ وتی پت ءُ پیروکی زمیناں کہ سداں سالاں آباد بوتگ اَنت ، سرپد کتگ اَنت بلے آیاں اے گپ ءَ گوں لشکر ءَ چست کنگ ءَ بے وسی ءِ درشانی کتگ ۔
بلوچ زالبولانی مَٹ بیوکیں کِرد ءُ جُنز ءِ نوکیں دَر
ٹی بی پی شونگال
22 ستمبر 2026 ءَ تربت ءَ یک پاکستانی پوجی کاروانے ءِ سر ءَ اُرش ءِ ھال دیم ءَ اتکگ اَت چریشی ءَ پد بلوچستان لبریشن فرنٹ ءَ اے کاروائی ءِ زمہ واری من اتگ ات ءُ کریمہ آرمڈ اسالٹ ڈویژن(KAAD) نامیں یک نوکیں زالبول سلاه بندیں یونٹے ءِ جار جتگ ـ اے وئیل ءِ گچینی ایش اِنت کہ بی ایل ایف ءَ نا ایوک ءَ کاروائی ءِ زمہ واری من اتگ بلکیں ایشی ءِ همراهی ءَ گل ءِ یک نوکیں درے ءِ بنگیج کتگ۔ بلوچ زالبول پیش ءَ جتاجتائیں رنگاں بلوچ سلاه بندیں زرمبشت ءَ گوں همگرنچ بیتگ اَنت همے واستا اے یک نوکیں گامگیجے کہ اولی رند ءَ سلاه بندیں گلے ءِ زالبولانی یک سرجمی ءَ جتا ءُ نامینتگيں سلاه بندیں بنهشتے دیم ءَ اتکگ۔
بلوچ سیاست ءَ زالبولانی جاڑیگی ایوک ءَ سلاه بندیں گلانی گوستانک ءَ گوں جوڑینگ هم اکس ءَ پدر کنت ۔بلوچستان ءَ زالبولاں دراجیں وهدے ءَ بیگواهيں مردم، زورانسری بیگواهی ، درکانودی کوش ءُ سیاسی ھکانی جیڑہ ءِ سر ءَ زھرشانی ءُ چاگردی زرمبشتاں کرد پیلو کتگ ،ھمے وڑ بلوچ سلاہ بندیں زرمبشتاں زالبولانی جاڑیگی ءِ درستاں گیش کرد اپریل 2022 ءَ دیم ءَ اتکگ ، وھدیکہ کراچی یونیورسٹی ءِ کنفیوشس انسٹی ٹیوٹ ءِ نزیک ءَ فدائی اُرش ءَ شاری بلوچ کنفیوشس انسٹی ٹیوٹ ءِ کارندہ نشانگ کتگ اَنت ۔اے وئیل ھمے واستا جتا بیتگ ایشی ءَ پیش بلوچ سلاہ بندیں زرمبشت ءَ جنگولانی اکس بس مردیناں گوں بندوک بیتگ ۔شاری ءَ اے دود پروشتگ ۔
زالبولانی سلاہ بندیں گلاں ھوار بوگ ایوک ءَ سلاہ ءِ چست کنوکیں زالبولانی کساس ءَ نہ اِنت بلکیں اے جست ءَ ودّین ایت کہ بلوچ چاگرد ءَ زالبولانی سیاسی کرد کجام کساس ءَ مٹ بوگ ءَ انت ۔اے مٹ بوگ ایوک ءَ سلاہ بندیں گلاں تاں نہ انت ایشی ءِ سان سیاسی زرمبشت ، ورنایانی پدریچ ، ریاستی پالیسی ءُ چاگردی رویشاں داں سر بنت۔
بلوچ سلاہ بندیں زرمبشت ءَ زالبولانی جاڑیگی ءِ ھیال ءَ پروشتگ کہ اے زرمبشت ءَ سلاہ بندیں کاروائیاں ایوک ءَ مرد کن اَنت ،بلوچستان ءَ زالبولانی مٹ بوکیں سیاسی بستار ایوک ءَ گلے ءِ جار یا لھتے وئیل نہ انت بلکیں یک دراج کشیں چاگردی ءَ گوں بندوک انت ۔بلوجستان ءِ جیڑہ نی ایوک ءَ ریاست ءُ سلاہ بندیں گلانی میان ءَ لشکری جنگ ءَ نہ انت بلکیں آئی ءَ چاگرد ءِ میان ءَ سیاسی پجار ،ورنایانی پدریچ ءُ مچانکی زانشتانی جست کتگ انت ۔ سلاہ بندیں زرمبشت ءَ زالبولانی بھر زیرگ ھما در ءِ بھر انت۔
اوگانستان ءِ واکدارانی رد ءَ شمبے ءِ روچ ءَ اوگانستان ءِ رودراتکی صوبہ چہ نوریستان ءَ ڈیورنڈ لائن ءِ سر ءَ پترگ ءِ کوشست بے کنگ بوتگ۔
اوگانستان ءِ واکدارانی رد ءَ “ ناشریں ٹولی” ’’اوگانستان فریڈم فرنٹ / اے ایف ایف‘‘ داعش ءِ ھمکاری ءَ امن ءُ ایمنی ءِ ھراب کنگ ءِ ھاترا نورستان ءِ تہ ءَ ھوار بوھگ ءِ جھد ءَ بیتگ انت۔
دیمترا گْوشگ بیتگ کہ اوگانستان ءِ سیمسر ءِ لشکر ءَ ’’شِر ءُ ناشریں ‘‘ ءُ داعش ءِ دہ مردم کُشتگ ءُ بازیں مردم ٹپیگ کتگ اَنت ءُ شش مردم ھم دزگیر کنگ بوتگ اَنت۔
دزگیریں مردمانی گپ ویڈیوانی تہ ءَ گوشدارگ بیت کہ آ چہ ایران ءَ پاکستان ءِ دمگ چترال ءَ دیم دیگ بوتگ اَنت کہ اودا۔ َ آیاں پاکستانی لشکر ءِ کیمپاں تربیت زرتگ۔
بلوچستان ءِ جتاجتائیں دمگاں بیتگیں کاروائیانی زمہ واری بی آر جی ءُ بی آر اے ءَ منّ اِتگ اَنت-
بلوچ ریپبلکن آرمی ءِ جارکش سرباز بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ ڈیرہ بگٹی ءِ دمگ بیھ لوٹی ءَ پُلپانچیں کمپنی ماری انرجیز لمیٹڈ ءِ سائیٹ سر ءَ راکٹ ءُ مزنیں سلاھاں چہ اُرش کتگ، اے اُرش ءَ کمپنی ءِ سئے کاردار مرتگ ءُ بازین ئِے ٹپی بیتگ اَنت-
آئی ءَ گوشتگ کہ اُرش ءَ پد پاکستانی پوج ءُ آئی ءِ دمگی کمکاراں چہ میڑ بیتگ کہ ھشت کلاک ءَ چہ گیش برجاہ بیتگ – اے میان ءَ پاکستانی پوج ءِ نُھ کارندہ وھدے کہ کمکارانی سئے کارندہ مرتگ اَنت یکجاھی ھساب ءَ درزنے ءَ چہ گیش کارندہ ءُ کمکار ٹپی بیتگ اَنت-
جارکش ءَ گوشتگ اے میڑ ءَ شش بلوچ پُسگ سرڈگار ءِ پھازگ ءَ شھید بیتگ- بی آر اے ڈیھ ءِ دلیریں پُسگانی بے دروریں دیمونی ءِ سر ءَ سُھرچکیں دروت ندر کنت ءُ اے اِھد کنت کہ ڈیھ ءِ پھاز ءُ دلیریں پُسگانی ھون ء ترمپ ترمپ ءِ ھساب ءَ گریں-
جارکش ءَ گْوشتگ کہ بلوچ ریپبلکن آرمی اشی ءَ ساری ھم ماری انرجیز لمیٹڈ سر ءَ بازیں اُرشاں چہ کڈن کتگ کہ بلوچ سرڈگار سر ءَ راجی مڈیانی لُٹ ءُ پُل موکل ھچ وڑ ندے ایں، دمگی ھساب ءَ کمپنیانی کمکار کنوک ءُ آئی ءَ چہ ھمگرنچیں مردم کجام وڑ ءَ اے درگت ءَ چہ اے کمپنیاں چہ ھمگرنچ اَنت باز رند ءَ کڈن کتگ اَنت- بلے مروچی ءَ پد گل جار جنت کہ اے کمپنی ءُ آیاں چہ ھمگرنچیں مردم کمکاراں، مئے بے رھمیں اُرشانی نشانگ ءَ بنت-
ھمے وڑ بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ مروچی سرمچاراں ھاجی شھر سر ءَ کاروائی کنان ءَ سرجمی ءَ دستیگ کنگ ءَ پد سرمچاراں مھکمی ءَ سنگر گپتگ یکیں وھد ءَ وتی گچین کتگیں نشانگانی سر ءَ اُرش کتگ سرجمیں شھر وتی دستیگ کتگ-
آئی ءَ گْوشتگ کہ آپریشن بندات کنان ءَ اولی بھرگ ءَ سرمچاراں شھر ءِ سرجمیں تھی ءُ ڈنی راھانی سر ءَ ناکہ بندی جتگ پٹ ءُ پول بندات کتگ- اے میان ءَ سرمچارانی یک ٹولی ءَ پولیس تھانہ سرجمی ءَ وتی دستیگ کتگ تراکناکیں شورو پٹ کتگ ءُ تراک ءَ چہ تباہ کتگ، پولیس کارندہ پیسرگیں وڑ ءَ تتکگ اَنت-
جارکش ءَ گوشتگ سرمچاراں ایری شھر سر ءَ اُرش کتگ سوبمندی ءَ چہ آئی ءِ سر ءَ دستیگ کتگ ءُ اود ءَ سرجمیں سرکاری ماڑی وتی دستیگ کتگ اَنت- آپریشن سرجم کنگ ءَ پد مئے سرمچاراں پہ سلامتی درتکگ ءُ مُھریں اوتاکاں سر بیتگ اَنت-
جارکش ءَ گوشتگ اے اُرشانی زمہ واری ءَ مئے گل بی آر جی منّ اِیت ءُ مئے اے وڑیں کاروائی بلوچستان ءِ وتواجھی ءَ تاں برجاہ بنت-
ڈیرہ بگٹی ءِ دمگ بیکڑ ءَ بی لوٹی ءِ ھند ‘کھجوری’ ءَ گیس شوھاز کنوکیں یک شرکتے ءِ بُنجل ناشناسیں سلاہ بندیں مردماں نشانگ کتگ-
اُرش ءَ پد بُنجل ءِ پھازدار سرکاری سلاہ بندیں ٹولی ءُ اُرشکارانی میان ءَ تُرندیں تیرگواری رِد برجاہ بیتگ-
ایس پی نارتھ ڈیرہ بگٹی سردار ھاشم ءَ گوشتگ کہ تیرگواری ءِ رِد ءَ سرکاری پلامرزی سلاہ بندیں ٹولی ءِ یک کارندھے مرتگ وھدے کہ سے ٹپی بیتگ اَنت، پہ الاج ھاتر ءَ انڈس ھسپتال سوئی ءَ سر کتگ اَنت- پد ءَ بُرزی ایمبولینس ءَ چہ سکھر ءَ سر کتگ اَنت-
ایس پی نارتھ ڈیرہ بگٹی ءِ رِد ءَ ھال رسگ ءَ فورسز ءُ ایف سی ءِ کارندہ وئیلجاہ ءَ سر بیتگ اَنت-
دمگی پولیس ءَ ٹاہ داتگ کہ بازیں کلاکاں تاں برجاہ میڑ ءَ کم چہ کم پنچ اُرشکار جنگ بیتگ، وھدے کہ سے ٹپی بیتگ اَنت-
پولیس ءِ گوشگ اِنت کہ پوج ءُ۔سرکاری ٹولی کارندہ آ دگہ اُرشکار انگیر ءَ کتگ اَنت ءُ کاروائی برجاہ ءَ اِنت-
ھمے وڑ ھُزدار ءِ دمگ وڈھ ءَ آر سی ڈی بُنجاھی شھدگ سر ءَ سلاہ بندیں مردماں پاکستانی پوج ءِ کاروان سر ءَ اُرش کتگ ءُ اُرش ءِ نشانگ ءَ یک ٹرکے ءَ ھوار دگہ گاڑی اتکگ اَنت چریشی ءَ جانی تاوان ءِ گمان اِنت-
دومی نیمگ ءَ سوراب ءِ دمگ گدر ءَ پاکستانی پوج ءِ بُنجاھی بُنجل ءِ سر ءَ ساڑی کارندھانی سر ءَ سلاہ بنداں اُرش کتگ ءُ اُرش ءِ آسر ءَ دو کارندھانی بیرانی ءِ ھال اِنت-
وئیلانی زمہ واری انگت ھچ گل ءَ نہ زرتگ اَنت
