بلوچستان ءِ تیابدپی شھر گوادر ءِ تھسیل پسنی ءِ دمگ سردشت ءُ کلانچ ءَ ھزاراں دمگی مردماں وتی بُن پیروکی جاہ یل کتگ ءُ دیم پہ پسنی، گوادر ءُ تربت ءَ شُتگ اَنت۔
بنشون ءِ رد ءَ کلانچ ءِ دمگاں ڈنڈو کلانچ، تولگو ءُ سردشت ءِ سرجمیں میتگ یلہ کنگ بوتگ انت۔ اے اولی رند نہ اِنت کہ مردماں مزنیں کچے ءَ لڈ ءُ بار کتگ۔ ایشی ءَ چہ پیسر پسنی ءِ دمگ شادی کور ءِ مردماں ھم وتی ارزشت داریں کشت ءُ کشاری زمین یلہ داتگ انت ءُ دگہ دمگاں شتگ انت۔
زانگ بہ بیت کہ گوستگیں روچاں پبلک ہیلتھ ڈیپارٹمنٹ گوادر ءِ نیمگ ءَ سردشت ءِ دمگ ءَ ٹینکرانی وسیلگ ءَ آپ ءِ پجارینگ ءِ واستا 15.2ملین کلدار ءِ ٹینڈر ھم جاری کنگ بوتگ ات، ایشی ءِ وسیلگ ءَ دمگ ءَ آپ دیگ بوتگ ات۔
دومی نیمگ ءَ دمگی انتزامیہ مزنیں کساسے ءَ مردمانی لڈ ءُ بار ءِ سبب ءِ پدر کنگ ءَ چک ءُ پد انت ءُ لڈ ءُ بار کتگیں مردم ھم ترس ءِ سوب ءَ رسانکدر ءَ راستیں جاور ھال ءِ سرپد کنگ ءَ چک ءُ پد انت۔
لڈ ءُ بار کتگیں مردماں مزنیں کساسے ءَ تربت ءِ دمگ کوہ مراد ءَ پناہ گپتگ ءُ گیشتریں مردماں پسنی ءِ نیمگ ءَ رھادگ بوتگ اَنت۔
دومی نیمگ ءَ پسنی پولیس ءَ پسنی ءِ دمگی مردم بیھار داتگ انت کہ اگاں آ سردشت، کلانچ ءُ کش ءُ گور ءِ دمگاں چہ لڈ ءُ بار کتگیں مردماں وتی لوگاں پناہ دیگ ءَ اَنت گڑا تھانہ ءَ برو اِت ءُ وتی سرجمیں ھالاں پیش بہ کن اَنت۔
سردشت ءُ کلانچ ءَ چہ انچیں مزنیں کساسے ءَ مردمانی لڈ ءُ بار ءَ یک مزنیں جاورھالے ودی کتگ، کہ مردم مجبور اَنت کہ وتی ارزشت داریں کشت ءُ کشاری زمین، لوگ ءُ مال ءُ مڈیاں یلہ بہ کن اَنت ءُ نا شریں جاوراں دگہ شھراں پناہ بہ زور اَنت۔
دمگی مھلوک ءِ لوٹ انت کہ انتزامیہ ءَ چہ زوت لڈ ءُ بار کتگیں مردمانی سبب پدر بہ بنت ءُ سانمندیں ھاندانانی کمک ءِ ھاتر ءَ جوانیں گامگیج بہ زور انت۔
یات دارگ بہ بیت کہ پیسر ءَ پاکستانی لشکر ءَ ھم چہ زمران ءَ دمگی مردماں لڈ ءُ بار کنگ ءَ مجبور کتگ اَنت، وھدے کہ کلات ءِ شورا پارود ءُ کش ءُ گوراں دمگی مردماں ھم لڈ ءُ بار کنگ ءِ سرکاری پرمان رس اتگ۔
دمگی مردمانی گشگ ءِ رد ءَ آیاں وتی سرکاری نمائندگاں چہ دمگی مردمانی زوراکی ءَ چہ وتی پت ءُ پیروکی زمیناں کہ سداں سالاں آباد بوتگ اَنت ، سرپد کتگ اَنت بلے آیاں اے گپ ءَ گوں لشکر ءَ چست کنگ ءَ بے وسی ءِ درشانی کتگ ۔