TBP Balochi

کیچ ءِ دمگ تمپ ءِ بالیچاہ ءِ کوھی دمگان گوستگیں روچ ءَ پاکستانی ڈرون اُرش ءَ بیران بوتگیں چار ورنایانی جنازہ ءِ نماز شمبے ءِ روچ ءَ بالیچاہ تلوکان ءَ وانگ بوتگ کہ ایشی ءِ تہ ءَ سیاسی ءُ چاگردی مردماں ھوار دمگی مھلوک ءَ مزنیں کساسے ءَ بھر زرتگ۔

کھول ءِ بنشون ءِ رد ءَ چاریں ورنایاں ھوار شش مردم پہ پکنک ءِ واستا کوھی دمگ ءَ شتگ اَنت کہ اود ءَ آدینگ ءِ روچ ءِ نیمروچ ءَ ڈرون ءِ اُرش ءَ آ نشانگ جوڑ کنگ بوتگ اَنت۔ کھول ءِ گْوشگ اِنت کہ اے وئیل ءَ دو مردم ھم ٹپیگ بیتگ اَنت کہ انگت ءَ پاکستانی لشکر ءِ دست ءَ اَنت۔

دومی نیمگ ءَ سرکاری درشان ءِ رد ءَ بیران بوتگیں مردم شکی ئیں جنگول لیکگ بوتگ اَنت۔ واکداراں ٹاہ داتگ کہ آہانی گور ءَ چہ مزنیں کساسے ءَ سلاہ ءُ گولہ بارود دزکپتگ بوتگ انت۔

وھدے کہ دمگ ءِ مردماں پاکستانی لشکر ءِ اے درشان رد کتگ ءُ اے درزان دروگ لیک اتگ ءُ گشتگ کہ بیران بوتگیں مردمانی گور ءَ ھچ وڑیں سلاہ نیست، آ بے میار ءَ کُشگ بوتگ انت۔

مھلوک ءَ پاکستانی لشکر ءِ دروگیں بیانیہ ءِ پٹ ءُ پول ءِ ھم لوٹ کتگ۔

بلوچستان ءِ دمگ دکی ءِ نانا صاحب زیارت ءِ دمگ پلڑی ءَ ناشناسیں سلاہ بندیں مردماں کنسٹرکشن کمپنی ءِ بنجل ءِ سر ءَ اُرش کتگ ءُ ایشی ءِ آسر ءَ یک سیکورٹی گارڈے بیران ءُ دو مردم ٹپیگ بوتگ اَنت ءُ سلاہ بندیں مردماں 12 کارمند آوار جتگ ءُ گوں وت برتگ اَنت۔

پولیس ءِ رد ءَ 40 تاں 45 ءِ نزیک ءَ سلاہ بندیں اُرشکاراں ایس ایم سی کنسٹرکشن کمپنی ءِ کیمپ ءِ سر ءَ اُرش کتگ ، سلاہ بندیں مردماں کارمندانی شناختی کارڈ چیک کتگ ءُ 12 کارمند آوار جتگ ۔ آوار جنگ بوتگیں کارمندانی تہ ءَ 10 ءِ سیادی گوں صوبہ پنجاب ءَ اِنت، یکے چہ دمگی ءُ یکے چہ خیبرپختونخوا ءَ اِنت۔

آیاں گیش گْوشتگ کہ تیرگواری ءِ آسر ءَ کمپنی ءِ سیکورٹی گارڈ جاہ ءَ بیران بوتگ ءُ راہ گوزی ءَ ھوار دو مردم ٹپیگ بوتگ اَنت۔ ارش کنوکاں چہ کیمپ ءَ درکپگ ءِ وھد ءَ کیمپ ءَ ھستیں مزنیں مشینری ءُ 4 گاڑی ھم سوتکگ اَنت۔

بلوچستان دو جتاجتائیں جاه شال ءُ مستونگ ءَ پاکستانی پوج ءِ سر ءَ سلاه بندیں اُرش کنگ بیتک اَنت۔

شال ءَ هواریں دمگ ڈگاری ءَ آدینگ ءِ روچ ءَ بیگاه ءِ وهد ءَ تس بُٹ ءِ هند ءَ سلاه بندیں مردماں بازیں کچے ءَ پاکستانی پوج ءِ بنجل جتاجتائیں نیمگاں نشانگ کتگ۔

دمگی مردمانی رد ءَ پورسز ءِ بنجل هر نیمگ ءَ اُرش کنگ بیتگ هر نیمگ ءَ راکٹ ءُ دگہ پشت ماں پشت اُرش کتگ بازیں وهدے ءَ داں تیرگوارک برجاه بیتگ ءُ تراکانی توار هم اشکنگ بیتگ اَنت۔

دومی نیمگ ءَ مستونگ ءِ دمگ اسپلنجی ءَ شپ ءِ سلاه بندیں مردماں فورسز ءِ بنجل ءِ سر ءَ گوں راکٹاں اُرش کتگ چم دیستگیں مردمانی رد ءَ بازیں تراک بنجل ءِ تہ ءَ کپتگ اَنت۔

داں انگت ءَ اُرشانی بارو ءَ دگہ گپ دیم ءَ نیاؤرتگ انت۔

کیچ ءِ تھسیل تمپ بالیچاہ ءِ دمگ لوتھم ءَ پکنک ءَ رؤکیں چار مردم ڈرون اُرش ءَ بیرانی ھال اِنت-

دمگی اِھوالکار ءِ رِد ءَ گوستگیں روچ ءِ دمگ ءَ شش مردم پکنک ءِ واستا نزیکیں کوھاں پکنک پوائنٹ ءَ شتگ اَنت، اود ءَ مروچی نیمروچ ءَ ھما وھد ءَ ڈرون اُرش ءَ نشانگ کتگ وھدے چار مردم یک ھندے ءَ ورگ ھڑکنگ ءَ چن ءَ لانچ ءَ بیتگ اَنت وھدے کہ دگہ دو مردم شکار واستا شتگ اَنت-

اِھوالکار ءِ رِد ءَ اُرش ءَ یاسر ء محمد کریم، زبیر ء نواب، سمیر ء عبدالخالق ءُ دیدگ ء محمد عمر جھمنند بالیچاہ بیران بیتگ اَنت-

اِھوالکار ءِ رِد ءَ چاریں مردمانی لاش اے وھد ءَ ایف سی ءِ کر ءَ اَنت، بلے اے درگت ءَ سرکاری نیمگ ءَ ھچ وڑیں درشان شنگ نہ کتگ-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں بیانے ءِ تہ ءَ گْوشتگ کہ گوستگیں شپ ءَ سرمچاراں بلوچستان ءِ دمگ سھبت پور ءَ سرکاری کارانی سر ءَ کار کنوکیں لشکری ​​کمپنی ءِ سر ءَ اُرش کتگ ءُ اود ءِ مشینری سوتکگ انت۔

جارکش ءَ گوشتگ کہ ما دمگی ٹھیکیداراں بیھار دے کہ سرکاری منسوبگاں گستا بہ بنت اگاں نہ آ وتی جان ءُ مالی تاوان ءِ زمہ وار وت بنت۔

دوستین بلوچ ءِ گشگ ءِ رد ءَ مئے سرمچاراں مرچی بلوچستان ءِ دمگ کچھی ءِ ھند کچھی ناڑی ءَ جتا جتائیں جاگہ ​​بند کتگ ءُ گاڑی پٹ ءُ پول کتگ انت۔

جارکش ءِ رد ءَ سرمچاراں جتا جتائیں دمگاں گشت کتگ بلے ھمے وھد ءَ اود ءَ ھچ وڑیں ریاستی کارندہ یا سرکاری ادارہانی کارمند گندگ نہ بوتگ انت۔ ناکہ بندی ءِ وھد ءَ سرمچاراں وتی راج ءِ مردمانی گوں مزنیں مھر ءُ دوستی ءِ درشانی کتگ۔

بی آر جی ءِ جارکش ءَ گیش گْوشتگ کہ مئے گل بی آر جی سھبت پور ءَ فوجی جوڑیشت ءِ کمپنی ءِ سر ءَ اُرش ءُ کچھی ءَ روڈ بلاک ءُ سنیپ چیکنگ ءِ زمہ واری ءَ من اِیت ءُ اے وڑیں کارروائی داں بلوچستان ءِ سرجمیں آجوئی ءَ برجاہ مان اَنت۔

بلوچستان لبریشن فرنٹ ءِ جارکش میجر گوهرم بلوچ ءَ رسانکدر ءَ شنگ کتگیں بیان ءِ تہ ءَ گْوشتگ کہ بی ایل ایف ءِ نوک جوڑ بوتگیں یونٹ کریمہ آرمڈ آسالٹ ڈویژن ءِ سرمچاراں مرچی 25 ستمبر 2026 ءَ قلات ءِ دمگ منگچر شھر ءَ گشت ءُ مزن شهدگ بستگ ءُ چک ءُ تان کتگ۔

آئی ءَ گوشت کہ بندش ءِ وھد ءَ سرمچاراں کلات ءُ مستونگ ءَ چہ دژمن ءِ کمک ءَ آیوکیں زورگیریں لشکر ءِ کاروان نشانگ جوڑ کتگ انت ایشی ءِ آسر ءَ بازیں فوجی کارندہ مرتگ ءُ ٹپی بوتگ انت۔

جارکش ءَ گشتگ کہ اے ترندیں کاروائی ءِ آسر ءَ زورگیریں لشکر ءِ بازیں کارندہ مرتگ انت وھدے کہ یک بکتربندیں گاڑی ءَ ھوار 3 گاڑی سرجم ءَ تباہ ءُ ناتوان بوتگ انت۔ اے دمگ ءَ سرمچار ءُ زورگیریں لشکر ءِ نیام ءَ انگت ءَ جنگ ءُ چوپ برجاہ اِنت۔

آئی ءَ گوشتگ کہ جنگ، سر ءُ پر، ءُ دژمن لشکر ءِ مرگ ءُ مال ءُ مڈی ءِ تاوان ءِ بابت ءَ سرجمیں بیان زوت رسانکدر ءَ شنگ کنگ بیت۔

دالبندین ءَ پاکستانی لشکر ءَ پاکستانی لشکر ءَ بلوچ لبریشن آرمی ءِ باسک نور احمد نوتیزئی پنام ءِ شادین ءِ گس ڈرینتگ اَنت۔

سر بیتگیں اکسانی رد ءَ یک لوگے ءَ بلڈوزر ءِ گون ءَ ڈرینگ ءَ انت۔

بی ایل اے ءِ یک درشانے ءِ رد ءَ نور احمد نوتیزئی ء عبدلرب نوتیزئی که آئی ءِ سیادی دالبندین ءَ بیتگ همےسال ءَ چاگی ءِ دمگ نوکچا ءَ 31اگست ءَ بیتگیں يک جنگے ءَ نمیران بوتگ۔

بلوچستان ءِ جتاجتائین جاهاں پوجی کاروائیانی وهد ءَ لوگانی تاوان دیگ یا کروجگ ءِ وئیل دیم ءَ اتکگ اَنت۔

یورپی یونین ایجنسی فارم ایزنم ءِ2026 ءِ بلوچستان ءِ درگت ءَ شنگ کتگیں رپورٹ ءِ رد ءَ فروری 2026ءَ آپریشنزانی میان ءَ سیاسی مهلوک ءُ لس شهریانی لوگ ءُ جاگہ سوچگ ءُ تاوان دیگ بوگ ءَ انت۔

ھمے وڑ ءَ تربت ءِ دمگ دیھات ءَ ھم پاکستانی پوج ءِ پلامرزی ءَ ھستیں سلاہ بندیں ٹولی ڈیتھ اسکواڈ ءِ اُرش ءِ لوگ ستکگ ءُ آئی ءِ توک ءَ کران پاک ءَ ھوار بازیں ساز ءُ سامان ستکگ انت-

بلوچستان ءِ بنجاهی شهر شال ءَ ایف سی ءِ تیرگواری ءَ 12 سالی زھگ حمزہ بیران بوتگ۔

بنشون ءِ رد ءَ مرچی نیمروچ ءَ شال ءِ بالی پٹ ءِ نزیک ءَ چہ سمنگلی ءَ محمد نبی ءِ چک 12 سالی ئیی حمزہ ٹپیگ دست کپتگ۔

اولی رند ءَ ٹپیگیں حمزہ ءَ را شہریاں بولان میڈیکل کمپلیکس ءِ نادراھجاہ ءَ سر کتگ ءُ چہ اودا رند ءَ ٹراما سنٹر ءَ سر کتگ۔

بیمارستان ءِ وسیلگ ءِ رد ءَ حمزہ وتی ٹپانی سبب ءَ بیران بوتگ۔ اے وئیل ءَ پد دمگ ءِ مردماں بچک ءِ لاش سمنگلی ءِ بالی پٹ ءِ دیم ءَ ایر کنان ءَ زھرشانی کتگ۔

سمنگلی ءِ بالی پٹ ءِ دیم ءَ نودربر ءِ بیرانی ءِ ھلاپ ءَ لوگ ءِ مردم زھرشانی کنگ ءَ اَنت ءُ اے وئیل ءِ بابت ءَ گیشتریں ھال انگت ءَ پدر نہ بوتگ اَنت۔

بلوچ یکجھتی کمیٹی (بی وائی سی) ءَ ھُزدار ءَ سے بلوچانی کوش ءُ زورانسری آوار جنی ءِ وئیل سر ءَ دلپدردی درشان کنان ءَ گوشتگ پٹ ءُ پول ءُ زمہ واراں جُست گرگ ءِ لوٹ کتگ-

بی وائی سی ءِ رِد ءَ ھُزدار ءِ دمگ چہ گریشہ ءَ سیادی داروکیں 28 سالی ئیں سرکاری ٹیچر استاد عبدالخالق ء ابراھیم 21 ستمبر 2026 ءِ شپ ءَ سلاہ بندیں مردماں لوگ ءَ تیرگواری کتگ کُشتگ- کمیٹی ءِ گوشگ اِنت کہ عبدالخالق دیر ءُ دراجیں دمگاں وانینگ ءَ بیتگ ءُ وتی دمگ ءَ نودربرانی واستا زانت ھاتر ءَ کار کنگ ءَ بیتگ اَنت-

بی وائی سی ءِ رِد ءَ وئیل ءَ پد عبدالخالق ءِ کھول ءَ اُرشکارانی رندگیری کتگ کہ آ تتکگ ءُ دمگ ءَ ساڑی ریاستی پلامرزی سلاہ بندیں مردمانی نیمگ ءَ شتگ اَنت- بی وائی سی ءَ وئیل درکانودی کوش گوشتگ کہ اِھوالکار ءُ انسانی ھکانی گلاں چہ آئی ءِ پٹ ءُ پول لوٹ کتگ-

دومی وئیل ءَ بی وائی سی ءِ رِد ءَ منیر احمد ء بابو جلال الدین جھمنند ھُزدار، 18 فروری 2026 ءَ واشک ءِ دمگ چہ بسیمہ ءَ فرنٹیئر کور (ایف سی) ءَ زورانسری بیگواہ کتگ – کمیٹی رِد ءَ ھپت ماہ ءَ پد 17 ستمبر ءَ منیر احمد ءِ لاش مشکے کراس ءِ نزیک ءَ دزکپتگ-

ھمے وڑ سفر خان ء حاجی فتح محمد، جھمنند ھزدار 03 مارچ 2026 ءَ بسیمہ، ءِ ھند چہ واشک ءَ ایف سی ءَ زورانسری بیگواہ کتگ-کمیٹی ءِ گوشگ اِنت کہ کس اس شش ماہ ءَ پد 17 ستمبر ءَ سفر خان ءِ لاش ھم مشکے کراس ءِ نزیک ءَ دزکپتگ-

بی وائی سی ءَ اے وئیل بلوچستان ءَ زورانسری آوار جنی، درکانودی کوش، دروگیں میڑاں ءُ ٹارگٹ کلنگ ءِ دْرچ ءَ ھمگرنچ کتگ اَنت-کمیٹی ءَ اکوام متھدہ، میان اُستمانی انسانی ھکانی گلاں ءُ سول سوسائیٹی ءَ چہ بلوچستان ءِ جاورانی سر ءَ زوت دلگوش گور کنگ، وئیلانی پٹ ءُ پول ءُ زمہ واراں جُست گرگ لوٹ کتگ-

بلوچ یکجھتی کمیٹی ءِ بنجاھی ڈاکٹر صبیحہ بلوچ ءَ گلزادی ءِ داتگیں امر قید ءِ سزا ءِ پژدر ءَ گشتگ کہ اے پیسلہ پاکستان ءِ آمیدگسی نزام ءِ انساپ دیگ ءَ بے سوب بوگ ءِ پدریں نشانی انت۔

ڈاکٹر صبیحہ ءِ رد ءَ گلزادی ءُ دگہ سروکاں سزا دیگ ءِ وھد ءَ ججاں زوراکی ءِ آماچ بوھگ ءِ منّ اِتگ کہ ایشی ءَ چہ آمیدگسی آجوئی ءُ وت واجھی ءِ بابت ءَ سنگینیں جُست ءُ پُرس دیم ءَ کیت۔

بلوچستان ءِ انوگیں جاور ھالانی بابت ءَ گپ جنان ءَ آئی ءَ گوشت کہ اے دمگ املی رنگ ءَ زندان ءِ رنگ ءَ بدل بوتگ، اود ءَ جتا جتائیں دمگانی تہ ءَ کرفیو ءِ جار جنگ بوھگ ءَ اِنت ءُ شھریانی زند ءِ سر ءَ بندش جنگ بوھگ ءَ اِنت۔ آئی ءِ گشگ ءِ رد ءَ زورانسری ءَ بیگواہ کنگ ءُ درکانودی ءَ کشگ ءِ تہ ءَ ھم گیشی اتکگ۔

ڈاکٹر صبیحہ ءَ گیش گْوشتگ کہ واکدارانی ٹاہ اِنت کہ آیاں گپ ءُ تران ءِ ھاترا بی وائی سی ءِ سروکاں گوں رھوت کتگ، البت آئی ءِ گْوشگ ءِ رد ءَ اسل مول ءُ مراد سروکانی توار ءِ بے توار کنگ بوتگ۔

آئی ءَ گشتگ کہ داں بلوچستان ءِ زلم ءُ زوراکی ہلاس مہ بنت مارا بے توار بوگی نہ انت۔
–