بلوچستان ءِ دمگ کیچ ءِ بنجاھی شھر تربت ءِ ھند کلاتک ءَ ناشناسیں مردمانی تیرگواری ءَ دو درملکی مردم بیران بیتگ انت-
دمگی مردمانی رد ءَ وئیل کلاتک ءَ پیش اتکگ کہ اود ءَ ناشناسیں مردماں تیرگواری کتگ ءُ دو مردم کشتگ انت- تیرگواری ءَ پد اُرشکات تتکگ انت-
بیران بیتگیں مردمانی پجار صدام ء عبدالحق رند ءُ زھیر ء کبیر علی ءِ ناماں زانگ بیتگ انت کہ ھردوکانی سندھ ءَ انت-
اُرش ءِ سبب زانگ نہ بیت ءُ ناکہ دگہ کسے ءَ اُرش ءِ زمہ واری زرتگ-
بلوچ ریپبلکن گارڈز ءِ جارکش دوستین بلوچ ءَ رسانکدر ءَ دیم داتگیں بیانے ءَ گْوشتگ گوستگیں شپ ءَ بلوچ ریپبلکن گارڈز ءِ سرمچاراں سندھ ءِ دمگ خیر پور رانی پور ءِ نزیک ءَ تراکناکیں شورواں گوں چہ کراچی ءَ پنجاب ءَ روکیں ریل ءِ سر ءَ ریموٹ کنٹرول بمب ءَ نشانگ جوڑ کتگ۔ تراک ءَ چہ ریل ءُ ریل ءِ پٹری ءَ مزنیں تاوانے رس اتگ ۔
آئی ءَ گْوشتگ: مئے گل بی آر جی اے اُرش ءِ زمہ واری ءَ من ایت ءُ داں بلوچستان ءِ آجوئی ءَ اے وڑیں اُرش برجاہ مان اَنت۔
پاکستان ءِ ھال رسانی ءِ وزیر عطا اللہ تاڑو ءَ گوشتگ کہ برزی لشکر ءُ ڈرون ءَ اوگانستان ءِ ھما جاھانی سر ءَ 10 ’’ سکا ترندیں اُرش کتگ کہ ڈرون ءِ آس دیگ ءُ ایر کنگ ءِ ھاترا کارمرد کنگ بوھگ ءَ بیتگ اَنت‘‘۔
پاکستان ءَ اے جاھانی بابت ءَ ھچ وڑیں ھال ءُ اھوال نہ داتگ بلے اے اُرش ھما وھد ءَ بوتگ اَنت کہ پاکستانی سرکاری چینل ءَ سیکورٹی وسیلگ ءِ رد ءَ ھال داتگ اَنت کہ پاکستان ءَ چار شمبے ءِ سھب ءَ چہ اوگانستان ءَ وتی ھوائی دمگ ءَ اتکگیں ھشت ڈرون دور داتگ اَنت۔
پنچ شمبے ءِ روچ ءَ سھب ءَ اے جار ءِ پد ءَ اوگانستان ءِ تلوؤ نیوز ءِ خوست ءِ گورنر جارکش مستغفرگربز ھال داتگ کہ ’پاکستان ءِ اُرش سھب ءِ سئے ءُ نیم ءَ بوتگ اَنت ءُ گُربوز ءِ کمپ گلان ءِ دمگ ءُ ھمے رنگ ءَ اسماعیل خیل ءُ مندوزی ءِ لھتیں دمگ نشانگ جوڑ کنگ بوتگ اَنت۔‘ آئی ءِ گْوشگ ءِ رد ءَ اُرشانی تہ ءَ ھچ وڑیں ٹپی ءُ بیران نہ بوتگ۔
اوگانستان ءِ طالبان سرکار ءَ اے اُرشانی نشانگ جوڑ بوتگیں دگہ جاھانی پجار نہ کتگ بلے گیٹی امیجز ءَ اے ایف پی ءِ ھال رسانکی ادارگ ءِ نیمگ ءَ داتگیں لھتیں اکس شنگ کتگ اَنت کہ آھانی تہ ءَ قندھار ءَ بالی اُرش ءَ پد آس ءُ دوت ءِ چست بوھگ ءَ گندگ ءَ کاینت۔
سوشل میڈیا پلیٹ فارم ایکس ءِ سر ءَ وتی پوسٹ ءِ تہ ءَ وزیر اتلات ءَ الزام جتگ کہ گوستگیں روچ ءَ (23ستمبر) اوگان سرزمین ءَ چہ پاکستان ءِ تہ ءَ ڈرون روان دیگ بوتگ انت۔
عطا اللہ تارڑ گشگ ءِ رد ءَ اے پاکستان ءِ ھاکمیت ءُ سرزمین ءِ ءِ پدریں لگتمالی ءُ یک سنگین ءُ نا منّگ بوتگیں زوراکی ءِ کارے ۔
زانگ بہ بیت کہ گوستگیں روچ ءَ پاکستانی سرکاری رسانکدر ءَ سیکورٹی وسیلگ ءِ رد ءَ ھال داتگ کہ چار شمبے 23 ستمبر ءِ سھب ءَ پاکستان ءَ 8 ڈرون تیرگواری کتگ کہ چہ اوگانستان ءَ سیمسراں آیگ ءَ بیتگ اَنت۔
سرکاری رسانکدر ءَ شنگ بوتگیں سیکورٹی وسیلگ ءِ رد ءَ ‘اے ڈرون اوگان طالبان ءِ بوتگ اَنت’ کہ ایشانی تہ ءَ چار تورخم ءِ سیمسر ءِ کش ءُ گور ءِ دمگاں تیرگواری کنگ بوتگ اَنت ءُ دگہ چار کوہاٹ ءِ سیمسر ءِ کوہانی دمگاں نشانگ جوڑ کنگ بوتگ اَنت۔
بلے اوگانستان ءِ تہ ءَ طالبان سرکار ءِ وزارت دفاع ءِ جارکش صدیق اللہ نصرت ءَ اے گپ رد کتگ کہ اوگانستان ءَ چہ ھشت ڈرون پاکستان ءِ برزی دمگ ءَ اتکگ اَنت۔
ایشی ءَ چہ پیسر دوشمبے ءِ روچ ءَ (21 ستمبر) ءَ پاکستان ءَ ٹاپار جتگ ات کہ آئی ءَ ’’مستند انٹیلی جنس‘‘ ءِ بنیاد ءَ کش ءُ گور ءِ اوگان دمگ ءَ تھریک طالبان پاکستان ءُ آئی ءِ ہمگرنچیں گلانی پناہ گاہاں گوں مزنیں زانتکاری ءَ نشانگ جوڑ کتگ ءُ ایشی ءِ آسر ءَ بازیں ’’وتکش تراکاں” ھوار بیست ءُ ھچت ناشرکار کشگ بیتگ انت۔
ھمے روچ ءَ اوگان طالبان ءِ سرکار ءِ جارکش زبی اللہ مجاھد ءَ وتی پوسٹ ءَ گْوشتگ کہ ”اوگان راج اے زوراکی ءِ سر ءَ ھما وڑیں پسو ءَ دنت“۔
بلے بی بی سی ءَ گوں گپ ءُ تران ءَ اوگان دفاع ءِ وزارت ءِ جارکش صدیق اللہ نصرت ءَ اے گپ رد کتگ کہ اوگانستان ءَ ھم پاکستانی اُرشانی پسو ءَ پاکستان ءَ ڈرون روانگ کتگ۔
بی بی سی ءَ گوں تران کنان ءَ آئی ءَ گْوشتگ کہ ”اوگان بالی اُرد ءَ انگت ءَ ھچ وڑیں ڈرون اُرش نہ کتگ ءُ اے پسو ءِ وھد ءُ دروشم ءِ پیسلہ آھانی سر ءَ اِنت۔“
نوٹیفکیشن ءِ رد ءَ سرجمیں اُستان ءَ بند آری ءِ بیت انت ءُ اے ھکم داں یک ماھے ءَ برجاہ بیت انت-
ایشی ءِ چیر دستی ءَ لس جاھاں سلاھانی پیشدارگ، مچی، دھرنا، روانک ءُ زھرشانی ءِ سر ءَ بندش جنگ بوتگ۔
مھکمہ داکلہ بلوچستان ءِ رد ءَ 144 بند آری 23 ستمبر 2026 ءَ سرجمیں رنگ ءَ سِی روچ ءِ واستا برجم بیت انت-
نوٹیفکیشن ءِ رد ءَ لس جاھاں پنچ یا گیش مردمانی مچی، روانک ءُ اے وڑیں کارانی سر ءَ بندش جنگ بیت ءُ ھمے وھد ءَ ھر وڑیں سلاہانی پیشدارگ ءِ سر ءَ ھم بندش جنگ بوتگ۔
سرکار ءَ مھلوک ءِ مچی ءَ دیم ءِ پوشگ یا دگہ ھرچ وڑیں وسیلگ ءِ کارمرد کنگ ءِ سر ءَ ھم بندش جتگ کہ آ مردم ءِ پجار ءِ تہ ءَ رکاوٹ جوڑ بہ بنت۔
اے نوٹیفکیشن بلوچستان ءِ ایڈیشنل چیف سیکرٹری حمزہ شفقت ءِ نیمگ ءَ شنگ کنگ بوتگ۔
بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ جتا جتائیں دمگاں 25 کاروائیانی میان ءَ 18 زورگیریں پاکستانی لشکر ءِ کارندہ کشتگ ءُ بازینے ٹپیگ کتگ اَنت۔ مند ءُ ھزدار ءِ سَے جتا جتائیں کاروائیانی وھد ءَ سرمچاراں جتا جتائیں دمگ ءُ پولیس تھانہ سرجمی ءَ کنٹرول ءَ گپتگ اَنت ءُ اُرشانی تہ ءَ زورگیریں لشکر ءَ گوں سیادی داروکیں فوجی کارجاہ ھم نشانگ جوڑ کتگ اَنت۔ بی ایل اے ءِ دَہ سرمچار جتا جتاجتائیں جاھاں گوں دژمن ءَ ترندیں جنگ ءُ چوپاں نمیران بیتگ انت-
جارکش ءَ گوشتگ 14 ستمبر ءَ پنجگور ءِ دمگ گوارگو ءَ سرمچاراں ڈیتھ اسکواڈ ءِ کارندہ نشانگ جوڑ کتگ ءُ تاوان داتگ انت۔
جارکش ءَ گوشتگ 15 ستمبر ءَ سرمچاراں پنجگور ءِ دمگ گوارگو ءُ فتح علی ءِ نیام ءَ جاسوسی کیمرھانی واستا ھستیں رھوتی ٹاور گون تراکناکیں شورواں تباہ کتگ۔
آئی ءَ گوشتگ 16 ستمبر ءَ کیچ ءِ دمگ کولواہ بدرنگ ءَ بلوچ لبریشن آرمی ءِ سرمچاراں زورگیریں پاکستانی لشکر ءِ موٹر سائیکل ءُ گاڑیانی کاروان ءِ سر ءَ ھما وھد ءَ سربستگ ءُ اُرش کتگ کہ آ یک استھسالی کمپنی ءِ پھزداری ءَ بیتگ انت۔ اے اُرش ءِ آسر ءَ زورگیریں لشکر ءِ چار کارندہ ھما جاہ ءَ مرتگ ءُ پنچ ٹپیگ بوتگ اَنت۔ دومی نیمگ ءَ تربت ءِ دمگ کلاتک ءَ مینو کراس ءَ زورگیریں پاکستانی لشکر ءِ کاروان ءِ سربستگ ءُ اُرش کتگ کہ ایشی ءِ تہ ءَ دژمن ءِ دو کارندہ مرتگ ءُ چار ٹپیگ بوتگ اَنت۔ دیمترا ھاران ءِ دمگ دالی ءَ پاکستانی زور گیریں لشکر ءِ سربستگ ءُ اُرش کتگ کہ ایشی ءِ تہ ءَ دژمن ءِ یک کارندہے مرتگ ءُ کم چہ کم دو ٹپیگ بوتگ اَنت۔ ھمے روچ ءَ تمپ ءِ دمگ رودبن ءَ سرمچاراں زورگیریں لشکر ءِ کاروان ءِ سر ءَ اُرش کتگ ءُ چریشی ءَ لشکر ءَ جانی ءُ مالی تاوانانی دیمپانی بیتگ۔
جارکش ءَ گوشتگ 17 ستمبر ءَ ھزدار ءِ دمگ سونارو ءَ زورگیریں فوج ءِ گاڑی نشانگ جوڑ کتگ ءُ آئی ءَ را تاوان داتگ۔ مستونگ ءِ کردگاپ ءِ دمگ ءَ سرمچاراں شال ءُ تپتان ءِ تجارتی راہ ءِ سر ءَ مستریں پھل تراک ءَ گوں تباہ کتگ۔
ھمے روچ ءَ چہ ھاران ءَ سرمچاراں زورپاکستانی لشکر ءُ ڈیتھ اسکواڈ ءِ ایجنٹ برشونکی ءِ نندوک محبوب ء مولابخش ماندائی دزگیر کتگ۔ محبوب ءَ جست ءُ پرس ءِ وھد ءَ من اتگ کہ آ صوفی ممتاز ءِ سرپرستی ءَ زورگیریں لشکر ءِ ھاتر ءَ چاریگری ءِ بستار ءَ کار کنگ ءَ بوتگ۔ چاریگ ءَ اے گپ پدر کتگ کہ آئی ءَ ھبڑ یک ہوٹلے ءِ نزیک ءَ ٹریکنگ چپے چیر داتگ وھدے کہ آئی ءَ لجے ءِ دو جاھاں ٹریکنگ چپ چیر کتگ انت کہ ایشی ءِ پجارینگ ءِ سر ءَ زورگیریں لشکر ءَ ڈرون ءِ اُرش کتگ۔ چاریگ ءَ اے گپ ھم پدر کتگ کہ آ نوشکی ءِ کچکی پوسٹ ءَ چہ تافوئی ءَ ءُ چہ خاران ءَ پتکن پوسٹ ءَ پہ زور گیریں لشکر ءَ سلاہ ءُ گولہ بارود گاڑی ءَ لڈ اتگ ءُ چیرکائی سر کتگ انت- چاریگ محبوب ءَ گشتگ کہ آ خاران، لجے ءُ آئی ءِ کش ءُ گور ءِ دمگاں زورگیریں لشکر ءِ راہ ءُ درانی پچ کنگ ءَ گم ھوار بوتگ۔ سرشون کنوک ءَ اے ھم گْوشتگ کہ آ صوفی ممتاز ءِ سرپرستی ءَ جتا جتائیں دُزی ءُ لٹ ءُ کُٹی کاراں ھوار بوتگ، ایشانی تہ ءَ برشونکی ءَ سرور ءِ باگاں چہ سولر انوارٹر ءِ دُزی ءُ بنجاھی چہ داناں پُریں ٹرک ءِ لٹ ءُ پُل ھوار اَنت۔ چاریگ محبوب ءَ را بلوچ راجی گداری ءِ مزنیں جرم ءِ گناہ گار کنگ ءَ پد بلوچ راجی آمیدگس ءَ مرگ ءِ سزا داتگ کہ سرمچاراں ترندیں وڑے ءَ ایشی ءِ سر ءَ امل کتگ ءُ گڈی آسری ءَ سر کتگ۔
ھمے روچ ءَ سرمچاراں پنجگور ءِ گوارگو ءِ دمگ ءَ اُرشے ءَ زورگیریں لشکر نشانگ جوڑ کتگ ءُ ایشی ءِ آسر ءَ زورگیریں لشکر ءِ یک گاڑی یے دیم پہ دیمیں اُرش ءِ سبب ءَ ناکارہ بوتگ ءُ گاڑی ءِ تہ ءَ سواریں چار کارندہ جاہ پہ جاہ ءَ مرتگ اَنت ءُ بازیں کارندہ ٹپیگ بوتگ اَنت۔ سرمچاراں زورگیریں لشکر ءِ کواڈ کاپٹر ھم جتگ ءُ دور داتگ۔ ایشی ءَ پد زورگیریں لشکر ءُ سرمچارانی نیام ءَ دراجیں جنگ ءُ چوپے برجاہ بوتگ ءُ اے جنگانی تہ ءَ بی ایل اے ءِ چار سرمچار شفیق پنام ءِ زگرین، ساکم پنام ءِ میران، حبیب پنام ءِ خالد ءُ صفی اللہ پنام ءِ امیر شھید بوتگ اَنت۔
جارکش ءَ گوشتگ 18 ستمبر ءَ سرمچاراں مند ءِ بلوچ آباد ءُ بلو دمگ کنٹرول کتگ انت۔ سرمچاراں درستیں ھاسیں در ءُ راھانی سر ءَ چیک پوسٹ جوڑ کتگ ءُ ھمے وھد ءَ لس مچی مھلوک ءَ گوں تران کتگ۔ بزدلیں زورگیریں لشکر ءَ کواڈ کاپٹر ءِ کمک ءَ شھری آبادی نشانگ جوڑ کتگ کہ ایشی ءِ تہ ءَ پنچ مردم ٹپی بوتگ انت ءُ سرمچاراں دژمن ءِ کواڈ کاپٹر ءِ سر یَ تیرگواری کتگ۔ ھمے روچ ءَ ماشکیل ءِ گلوگہ ءِ دمگ ءَ سرمچاراں زورگیریں پاکستانی لشکر ءِ دو گاڑیانی سربستگ ءُ اُرش کتگ کہ یکے سرجم ءَ تباہ بوتگ ءُ اے اُرش ءَ زورگیریں لشکر ءِ سَے کارندہ مرتگ ءُ پنچ ءَ چہ گیش ٹپیگ بوتگ اَنت۔
جارکش ءَ گیشتر گشتگ بسیمہ ءِ دمگ پتک ءَ مڈی بروکیں یک لٹ ءُ پُلی گاڑی ءِ سر ءَ اُرش کتگ ءُ مانداشتگ ءُ نوشکی ءِ دمگ بٹو ءَ جاسوسی کیمرہ ءِ واستا ھستیں یک ٹاورے گوں تراکناکیں شورواں تباہ کتگ۔
آئی ءَ گوشتگ 19 ستمبر ءَ مستونگ ءِ دمگ شیرناپ ءَ ناگمان ءِ ھند ءَ سرمچاراں پاکستانی لشکر ءِ گاڑیانی سربستگ ءُ اُرش کتگ کہ زورگیریں پوج ءُ سرمچارانی نیام ءَ دراجیں جنگ ءُ چوپے برجاہ بوتگ ؛ اے جنگانی میان ءَ دژمن ءِ بازیں کارندہ مرتگ ءُ ٹپی بوتگ انت ءُ پد ءَ زورگیریں لشکر ءَ بزدلی ءِ درشانی کنان ءَ سرمچاراں گوں ڈرون ءِ گون ءَ اُرش ءِ نشانگ جوڑ کتگ انت ءُ ایشی ءِ آسر ءَ دگہ چار سرمچار امیر عباس کرد پنام ءِ ساجد، عبدالحلیم محمد شھی پنام ءِ دانش، حکمے اللہ لھڑی پنام ءِ پھد ءُ محمد نسیم لھڑی پنام ءِ گروک نمیران بوتگ انت۔
جارکش ءَ گوشتگ 20 ستمبر ءَ نوشکی ءِ شھر ءَ شھید بالاچ خان اسٹیڈیم ءِ نزیک ءَ بائی پاس روڈ ءِ سر ءَ سرمچاراں پاکستانی لشکر ءِ سر ءَ اُرش کتگ ھمے جاہ ءَ ھما ءَ وھد ءَ نشانگ کتگ انت ناکہ بندی ءِ تک ءَ مھلوک ءَ تنگ کنگ ءَ بیتگ انت۔ اے اُرش ءَ زورگیریں لشکر ءِ دو سپاھیگ جاہ پہ جاہ ءَ مرتگ ءُ کم چہ کم چار ٹپیگ بوتگ اَنت۔ ھمے روچ ءَ سرمچاراں بلیدہ ءِ دمگ کوشک ءَ زورگیریں لشکر ءِ پوسٹ ءِ سر ءَ چہ گرنیڈ لانچر ءَ بازیں گولہ باری کتگ ءُ دژمن ءَ را مزنیں تاوان داتگ۔
جارکش ءَ گوشتگ 21 ستمبر ءَ سرمچاراں مند ءِ دمگ ردیگ کنٹرول کتگ ءُ گچینی جاھانی سر ءَ ناکہ بندی کتگ ءُ ھمے وھد ءَ زورگیریں لشکر ءِ مزنیں کیمپ ءِ سر ءَ گوں مزنیں ءُ وتکاریں سلاھاں اُرش کتگ ءُ تاونانی دیمپان کتگ ءُ سرمچارانی دگہ ٹولے ءَ کسٹم ءِ پوسٹ دستیگ کتگ ءُ مانداشتگ۔ ھمے روچ ءَ واشک ءِ دمگ زیارت کراس ءَ سرمچاراں زورگیریں پاکستانی لشکر ءِ راشن ءِ بروکیں گاڑی ءِ سر ءَ اُرش کتگ ءُ دستیگ کتگ۔
جارکش ءَ گوشتگ 22 ستمبر ءَ شال ءَ ھواریں دمگ دشت ءِ تیرہ میل ءَ سرمچاراں آئی ای ڈی تراک ءَ زورگیر لشکر ءِ بمب ڈسپوزل اسکواڈ ءِ پیادگیں سپاھیگ نشانگ جوڑ کتگ اَنت کہ ایشی ءِ آسر ءَ یک کارندھے جاہ پہ جاہ ءَ مرتگ ءُ دومی ٹپی بوتگ۔ ھمے روچ ءَ سرمچاراں ھزدار ءِ دمگ باغبانہ ءِ پولیس تھانہ سرجمی ءَ گپتگ ءُ اود ءَ دراھیں سلاہ ءُ جنگی سامان دستیگ کتگ انت۔ ھمے وھد ءَ پولیس (اے ٹی ایف) ءُ ڈیتھ اسکواڈ ءِ کارندھاں دمگ ءَ دیم ءَ روگ ءِ کوشست کتگ کہ سرمچارانی یک ٹولی ءَ سربستگ ءُ اُرش کتگ انت کہ ایشی ءِ آسر ءَ ڈیتھ اسکواڈ ءِ بازیں کارندہ مرتگ اَنت وھدے کہ ایس ایچ او منیر عالم جتک ءَ ھوار بازیں پولیس ءِ کارندہ ٹپیگ بوتگ اَنت۔
جارکش ءَ 23 ستمبر ءَ سرمچاراں کیچ ءِ دمگ ھیرونک ءَ آئی ای ڈی ءِ تراک ءَ گوں زورگیریں لشکر ءِ کارندہ نشانگ جوڑ کتگ انت۔
جارکش ءَ گوشتگ ایشی ءَ ابید 6 ستمبر ءَ مستونگ ءِ دمگ کھڈکوچا ءَ گوں زورگیریں پاکستانی لشکر ءَ بوتگیں جنگ ءَ بی ایل اے ءِ دو سرمچار عرفان مینگل پنام ءِ خلیل ءُ رفیع اللہ گرگناڑی پنام ءِ تنویر شھید بوتگ اَنت۔
جیئند بلوچ ءَ گوشتگ بلوچ لبریشن آرمی وتی کول ءَ پدر کنت کہ راجی مڈیانی لٹ ءُ پُل، ڈیتھ اسکواڈانی سرپرستی ءُ زورگیریں ریاست ءِ لٹ ءُ پلی پندلانی ھلاپ ءَ مئے لشکری کاروائی گوں سرجمیں زور ءَ برجاہ بنت۔ گل اے درستیں دھیں مزن شانیں شھید، سنگت شفیق پنام ءِ زگرین، سنگت ساکم پنام ءِ میران، سنگت حبیب پنام ءِ خالد، سنگت صفی اللہ پنام ءِ امیر، سنگت امیر عباس کرد پنام ءِ ساجد، سنگت عبدالحلیم محمد شھی پنام ءِ دانش، حمکت اللہ لھڑی پنام ء پھد، محمد نسیم لھڑی عرف گروک، عرفان مینگل پنام ءِ خلیل ءُ رفیع اللہ گرگناڑی پنام ءِ تنویر ءِ کرد ءُ آیانی کربانیاں سھر چکیں دروت ندرکن این مئے سرمچارانی اے کربانی ءُ زرکاری بندش ءِ گچینی گام ھمک دیم ءَ زورگیریں لشکر ءَ شکست دیگ ءَ اَنت۔ داں گُڈّی گدار ھلاس کنگ مہ بیت ءُ یک آزات ءُ وت واجھیں بلوچستانے ءِ اڈ کنگ مہ بیت بی ایل اے ءِ اے جنگی جھد ھمک روچ تْرند بیت انت-
بلوچستان ءِ تیابدپی شھر گوادر ءِ ھند پسنی شادی کور ءَ سلاہ بندیں مردمانی اُرش ءَ یک مردمے بیران بوتگ۔
بیران بوتگیں مردم ءِ پجار احسان ء برکت ءِ نام ءَ بوتگ۔ ارش کنوکاں مرد ءِ سلاہ ءُ موٹر سائیکل گوں وت برتگ انت۔
دمگی مردمانی گشگ انت کہ احسان ءِ سیادی گوں سرکاری کمک ءَ بوتگیں سلاہ بندیں گل ڈیتھ اسکواڈ ءَ بوتگ۔
بلے انگت ءَ اے وئیل ءِ مول ءُ مراد زانگ نہ بوتگ ءُ نہ کہ انگت ءَ کس ءَ اے وئیل ءِ زمہ واری زرتگ۔
بلوچستان لبریشن فرنٹ ءَ وتی نوک جوڑ بوتگیں زالبولانی فوجی یونٹ ”کریمہ آرمڈ اسالٹ ڈویژن“ (کاڈ/ KAAD) ءِ جوڑ کنگ ءُ اولی آپریشنل آپریشن ءِ تامر شنگ کتگ کہ یونٹ ءِ دراھیں باسک نوکیں سلاھانی کامردی ءَ گندگ بنت-
شنگ بوتگیں ویڈیو ءِ تہ ءَ زالبول پوجی پوشاکاں گندگ بنت کہ آ ھیلکاری کنگ ءَ اَنت۔ یونٹ ءِ درستیں باسک نوکیں ءُ بھاری سلاہانی کارمرز کنگ ءِ ھیلکاری کنگ ءَ اَنت۔
زالبولاں فوجی وردی پوش اِتگ، ھیلکاری ءِ ندارگانی وھد ءَ ”کاڈ“ ءِ زالبولیں باسک موٹر سائیکل ءُ گاڑی ءِ سر ءَ رؤگ ءَ گندگ بنت۔ ایشی ءَ ابید ویڈیو ءَ باسکاں موٹر سائیکل ءِ سوار بوھگ ءِ وھد ءَ مارٹر ءِ گولہ ءِ تیرگواری ، دستی بم ءِ جنگ ءُ چہ رھادگیں گاڑیاں ٹارگٹ ءِ سر ءَ تیرگواری ءِ ھیلکاری ءِ کنگ ءَ گندگ بیت۔
بی ایل ایف ءِ نیمگ ءَ زالبولانی یونٹ ءِ جار گوستگیں روچ ءَ تربت ءَ پاکستانی لشکر ءِ کاروان ءِ نشانگ جوڑ کنگ ءَ پد بوتگ۔ جارکش میجر گوھرام بلوچ ءَ وتی کسانیں بیانے ءَ گوشت کہ بی ایل ایف ءِ نوک جوڑ بوتگیں زالبولیں یونٹ کریمہ آرمڈ اسالٹ ڈویژن ءَ تربت ءِ نزیک ءَ جوسک ءَ سی پیک ءِ شاھدگ ءِ سر ءَ پاکستانی اُرد ءِ ایکشن ٹاسک فورس ءِ کاروان ءِ سر بستگ ءُ اُرش کتگ۔
زانگ بہ بیت کہ ایشی ءِ پیش ءَ زالبولیں کماندار شھناز بلوچ پنام ءِ سدو ءِ ویڈیو بلوچ لبریشن آرمی ءِ نیمگ ءَ شنگ کنگ بیتگ۔ اے اولی رند ات کہ زالبولیں کمانڈرے لس مھلوک ءِ دیم ءَ اتکگ ات۔
پد ءَ ھمے سال ءَ بی ایل اے ءِ آپریشن ہیروف دوم ءِ وھد ءَ بلوچ زالبول دیم ءَ جنگ ءَ گندگ بوتگ اَنت۔ آپریشن ھیروف ءِ وھس ءَ شال، نوشکی، گوادر، پسنی ءُ دگہ دمگاں بلوچ زالبولاں آپریشناں بھر زرتگ۔
بلوچستان ءِ بنجاھی شھر شال ءُ کیچ ءَ پاکستانی لشکر ءِ سر ءَ اُرش کنگ بیتگ ءُ جتا جتائیں وئیلانی تہ ءَ بمب تراک ءُ سلاہ بندیں اُرشانی تہ ءَ لشکر نشانگ جوڑ کنگ بوتگ انت۔
شال ءِ دمگ آگبرگ ءَ پولیس ءِ پوسٹ ءِ سر ءَ سلاہ بندیں مردماں اُرش کتگ ءُ پولیس ءُ سلاہ بندیں مردمانی نیام ءَ جنگ ءُ چوپ بوتگ۔
پولیس ءَ ٹاہ داتگ کہ آئی ءَ پنچ اُرشکار کُشتگ اَنت۔
دومی نیمگ ءَ مرچی سھب ءَ کیچ ءِ دمگ ھیرونک ءَ ناشناسیں مردماں پاکستانی لشکر ءِ پندی کارندہ نشانگ جوڑ کتگ اَنت۔ ھالانی رد ءَ بمبتراک ءِ آسر ءَ کارندہ ھما وھد ءَ نشانگ جوڑ کنگ بوتگ انت کہ آ دگ ءِ پلگارگ ءَ دزبند بوتگ انت۔
تراک ءِ آسر ءَ کارندہانی جانی تاوان ءِ ھال ھست بلے انگت ءَ واکداراں اے درگت ءَ ھچ وڑیں ھال ءُ اھوال نہ داتگ۔
نمدی یے پہ شھید بشیر دشتی ءِ نام ءَ
نبشتہ کار: س۔ا
دی بلوچستان پوسٹ
بشیر دْروت ءُ سلام زندگیں مردم ءِ ھاتر ءَ کارمرز بیت من ترا دْروت ءُ سلام کُت نہ کناں ءُ گُشت کُت نہ کناں کہ شالا تو سلامت بات بہ بَہ ئے پرچاکہ ترا سی ٹی ڈی ءَ دروگیں میڑ ءَ شھید کُت بزاں تو اے بے وپائیں جھان ءَ نیست ئے بلے گْواچن ایش اِنت کہ تو دائمی نمیران بوت ئے ءُ بلوچ راجدپتر ءَ ھر سال ءِ 13 نومبر ءَ سُھریں دْروت کنگ بیت۔
بشیر من پیسر ءَ وت نہ زانتگ اَت کہ اسل ءَ تئی نام بشیر دشتی اِنت یا بشیر گْوادری اِنت بلے من ءَ پد ءَ مالوم بوت کہ بشیر دشتی بُندر ءَ چہ دشت ءَ سیادی کنت ءُ مرچاں گْوادر ءَ جھمنند اِنت۔ بشیر من چمیشکا تئی اسلی نام ءَ زانگ ءَ نہ اِتاں پرچاکہ کوٹی ءِ دیوال ءَ دوئیں بشیر دشتی ءُ بشیر گوادری نبشتہ اَت۔
بشیر ترا باور کن تئی نبشتہ کُتگیں ھر ھما لبز کہ کوٹی ءِ دیوال ءَ ساپ ساپ ءَ زاھر اِت اَنت سک باز دردناک اِت اَنت تئی لبزانی وانگ ءَ چہ پد باور کن من ءَ تئی سر ءَ سک باز بزّگ پیداک اَت بلے دومی نیمگ ءَ ٹارچر سیل زالمیں رسترانی نیمگاں تو یک بھادریں ءُ دلیریں، ناتُرسیں ءُ تمردیں سرمچارے اِت ئے۔
بشیر من ءَ تئی سر ءَ بزّگ چمیشکا بوگ ءَ اَت پرچاکہ تو یکیں ساھت ءَ سے مردم ءِ بستار ءَ زانگ بوگ ءَ اِت ئے: یکے چُکے پہ مات ءَ تلوسگ ءَ اَت، دومی مردے پہ جن ءَ تلوسگ ءَ اَت ءُ سیمی پتے پہ چُک ءَ زرگ ءَ اَت۔
بشیر تو کوٹی ءِ دیوال ءَ ھمے نبشتہ کُتگ اَت کہ ”چِپُّک“ تو من ءَ سک یات کا ئے، ماتی من ءَ ماپ کن، ءُ سَمّو جان تو من ءَ سک دوست ئے۔ بشیر درد ءِ گپ ایش اِنت کہ تو کوٹی ءِ چاریں نیمگ ءَ نبشتہ کُتگ اَت کہ ماتی من ءَ ماپ کن، سمّو جان تو من ءَ سک دوست ئے، ءُ چِپُّک تو من ءَ یات کائے۔
بشیر تو چمیشکا ناتُرس ءُ تمردے اِت ئے پرچاکہ ٹارچر سیل ءِ ھُونواریں رستراں زندان ءَ تئی دلیری ءِ توسیپ کُت کہ بشیر دشتی ءَ 14 پنجابی ءِ کوش گوں دلیری ءَ منّ اِتگ ءُ جج ءِ دیم ءَ اوں 64 کُتگ بلے تو ئے کہ بازیں لَٹاں اَبید منّگ ءَ تیار نہ ئے۔
بشیر بگند ئے ایم آئی ءِ گپ تئی بابت ءَ راست بہ بنت بگندئے دروگ بہ بنت ءُ یاکہ بگندئے آیاں تئی منّگ ءِ گُشت کہ من اوں بہ منّ آں۔
بشیر اگاں تو واکی وتی سر بُرز ءَ کُت ءُ گشت کہ ھو! اے پنجابی من جتگ اَنت، ترا تئی تمردی ءُ سرمستی ءَ من وت سلام کناں۔
گڈی ءَ بشیر پل منی ھیال ءَ اے اولی رند بیت کہ اے دنیا ءِ تہ ءَ یک مُرتگیں مردمے ءِ دوستی گوں یک زندگیں مردمے ءِ گوم ءَ اَت۔ من زندگ اِتاں ٹارچر سیل ءَ سگّگ ءَ اتاں بلے تو شھید بوتگ اِت ئے منی ءُ تئی دوستی ءُ مارشت بس چہ دیوال ءِ نبشتہ کُتگیں لبزاں بندات بوت۔ بشیر پل اے گپ راست اِنت کہ تئی دُچار کپگ گوں مات، سَمّو ءُ چِپُّک ءَ بھ نہ بوت بلے اے ھبر ءَ دژمن شر زانت کہ بشیر ءِ وڑیں سرمچار بلوچستان ءِ دلبند ءَ انگت مان اِیت۔ بشیر پل باگیں بھشت ءَ بات ئے ءُ منی ءُ تئی سنگتی داں دنیا ھست بہ مانات۔
تئی س۔ا۔بلوچ
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ گل ءَ نوک جوڑ کتگیں زالبول یونٹ کریمہ آرمڈ اسالٹ ڈویژن ءِ سرمچاراں تربت ءِ نزیک ءَ جوسک ھند ءِ سر ءَ سی پیک (CPEC) ءِ شھدگ سر ءَ سنگر گپتگ زورگریں پاکستانی پوج ءِ ایکشن ٹاسک فورس ءِ کاروان اُرش ءِ نشانگ کتگ- اے اُرش ءِ آسر ءَ زورگریں پوج ءِ بازیں کارندھے مرتگ ءُ ٹپی بیتگ اَنت، وھدے کہ آیانی گاڑیاں تاوان رس اِتگ-اے دیمروئی ءُ کاروائی کریمہ آرمڈ اسالٹ ڈویژن ءِ کنوکیں اولی پوجی پیشگامی اِنت-
جارکش ءَ گْوشتگ کہ اے سوبمندیں کاروائی، دُژمن ءِ جانی ءُ مالی تاواناں ءُ کاڈ (کاڈ) ءِ پوجی نشانگ ءَ چہ ھمگرنچیں درشان ءَ زوت رسانکدر ءَ شنگ کن ایں-
