TBP Balochi

کیچ ءَ پاکستانی پوج ءِ سر ءَ اُرش ءُ نوشکی ءَ دگہ یک پولیس ایس ایچ اوے سلاہ بنداں دزگیر کتگ-

گیشیں ھالانی رِد ءَ کیچ ءِ بُنجاھی شھر تربت جوسک ءِ ھند سر ءَ پاکستانی پوج ءِ کاروان ءِ سر ءَ سلاہ بندیں مردماں تُرندیں اُرشے کتگ –

اُرش ءِ وھد ءَ پوج ءِ دو گاڑی تچکی ءَ نشانگ ءَ اَتکگ اَنت ءُ چریشی ءِ آسر ءَ پوج ءَ مزنیں کچے ءَ جانی ءُ مالی تاوان ءِ گمان اِنت-

اے ھم گوشگ بیگ ءَ اِنت کہ اُرش ءِ وھد ءَ زالبولیں جنگول ھم ھوار بوتگ اَنت-

دومی نیمگ ءَ سرکاری واکدار ءَ اے اُرش راست کتگ گوشتگ کہ اُرش ءَ یک کارندھے بیران ءُ دو ٹپی بیتگ اَنت-

ھمے وڑ چہ نوشکی ءِ دمگ احمد وال ءَ گوستگیں شپ ءَ احمد وال ءِ جھمنندیں مل تھانہ ءِ ایس ایچ او ءَ دزگیر کتگ ءُ ناشناسیں جاھے ءَ برتگ اَنت-

چہ نوشکی ءَ سلاہ بندانی دست ءَ دزگیر بیتگیں ایس ایچ او ءِ پجّار میر ماندا خان ماندائی ءِ نام ءَ چہ بیتگ ،گوستگیں روچانی میان ءَ بلوچستان ءِ اے دومی وئیل اِنت کہ اود ءَ سلاہ بندیں مردماں پولیس ایس ایچ او دزگیر کتگ اَنت-

اشی ءِ ساری شمبے ءِ روچ ءَ سلاہ بندیں مردماں چاگی ءَ قائم ھند پولیس ایس ایچ او، اے ایس آئی گل شاہ آوار جتگ-

ھمے وڑ گوستگیں روچاں بلوچستان ءِ دمگ ھاران ءُ چہ مستونگ ءَ سلاہ بندیں مردماں ڈپٹی کمشنر ھاران ءُ ھپت پولیس کارمند آوار جتگ اَنت، کہ تنی وھدے دیم ءَ آرگ نہ بیتگ اَنت-

ھمے وڑ مروچی بلوچستان ءِ دمگ ھُزدار ءَ سلاہ بندیں مردماں باغبانہ پولیس تھانہ سر ءَ اُرش کتگ تھانہ تباہ کتگ ،وھدے کہ اُرش ءَ پولیس ایس ایچ او منیر عالم جتک ءَ ھوار دو پولیس کارندہ ٹپی بیتگ اَنت-

تنی وھدے تربت ءَ پوج ءِ سر ءَ اُرش ءُ پولیس آفیسرانی دزگیری ءِ زمہ واری ھچ گل ءَ نہ زرتگ اَنت-

سلاہ بندیں مردماں دو جتا جتائیں اُرشاں پولیس ءُ کیو آر ایف ءِ ٹیم نشانگ جوڑ کتگ انت۔

بلوچستان ءِ دمگ کیچ ءِ بنجاھی شھر تربت ءَ ایم 8 شھدگ ءِ سر ءَ جوسک پولیس اسٹیشن ءِ نزیک ءَ ریموٹ کنٹرول بمب تراک ءَ گوں سلاہ بندیں مردماں کیو آر ایف ءِ ٹیم نشانگ جوڑ کتگ۔

بنشون ءِ رد ءَ اے اُرش جوسک تھانہ ءِ نزیک ءَ بوتگ کہ ایشی ءِ آسر ءَ بنداتی ھالانی رد ءَ یک کارندھے بیران ءُ دو ٹپیگ بوتگ اَنت۔

دومی نیمگ ءَ ھزدار ءِ دمگ باغبانہ ءَ ناشناسیں سلاہ بندیں مردماں پولیس تھانہ ءِ سر ءَ اُرش کتگ ءُ مانداشتگ ۔

اے اُرش ءَ تھانہ ءِ SHO ءَ ھوار دو پولیس کارندہ ٹپیگ بوتگ اَنت۔ پولیس ءُ دگہ سیادی داروکیں ادارہ انگت ءَ اے دوئیں وئیلانی بابت ءَ سرکاری لیکہ درشان نہ کتگ انت۔

زانگ بہ بیت مرچی نوشکی ءَ سلاہبنداں دو پولیس کارندہ تیر گواری کتگ ءُ کُشتگ اَنت، پد ءَ آیانی سلاہ ھم دست ءَ گرگ بیتگ اَنت۔

گوستگیں دو روچاں بلوچستان ءِ دمگ مستونگ، چاگی ءُ خاران ءَ چہ سلاہ بندیں مردماں چہ یک ڈپٹی کمشنر ءُ یک ایس ایچ او ءِ ھوار 7 پولیس کارندہ آوار جتگ انت کہ انگت ءَ آ یلہ کنگ نہ بوتگ انت۔

نوشکی ءِ دمگ جمال آباد ءَ ناشناسیں مردماں پولیو ٹیم ءِ پھزداری ءِ واستا پولیس کارندھانی سر ءَ تیرگواری کتگ، چریشی ءِ آسر ءَ دو کارندہ بیران بیتگ انت-

ایس ایچ او نوشکی منور احمد ءِ رد ءَ تیرگواری ءَ بیران بیتگیں کارندھانی پجار یاسر احمد ءُ عبدالرؤف ءِ ناماں بیتگ انت-

پولیس ءِ رد ءَ اُرشکاراں اُرش ءَ پد کارندھانی سرکاری سلاہ گون وت برتگ انت-

وئیل ءِ سبب زانگ نہ بیتگ ءُ نانکہ کسے ءَ زمہ واری زرتگ-

کلات ءِ دمگدار ءَ لشکری واک ءِ گوشگ ءِ پد ءَ شور پارود ءُ گزگ ءِ ھنداں جھمنندی ءِ مھلوک ءَ را 28 ستمبر 2026 ءَ لڈ ءُ بار ءِ بیھار داتگ انت-

ھمے درگت ءَ اسسٹنٹ کمشنر کلات ءُ خالق آباد ءِ نیمگ ءَ شنگ بیتگیں نوٹس ءَ گوشگ بیتگ امن ءُ ایمنی ءِ جاورھالانی پژدر ءَ دمگانی مھلوک ءَ رمس ءِ تک ءَ لڈ ءُ بار کنگی انت-

نوٹس ءَ دراھیں مھلوک ءَ دمگدار ءِ ھکم ءِ پاسداری کنگی انت ءُ وتی پھریزی ءَ ستکی بہ کن انت ھمے انتزامیہ ءُ کانون سازگار کنوکیں ادارھاں ھم نوٹس ءِ ھال دیگ بوتگ-

زانگ بہ بیت ستمبر ءِ بندات ءَ سروزیر بلوچستان ءَ شور پارود ءِ کوھی دمگاں کساس ھزار مردم ءِ آیگ ءِ گپ جتگ ات-

زانگ بہ بیت اے وھد ءَ بلوچستان ءِ بازیں جاہ درجاری پوجی آپریشن ءِ زد ءَ انت ءُ پورسز ءِ نیمگ ءَ بازیں برزی ءُ ڈرون اُرشاں بازیں شھری بیران ءُ ٹپی بیتگ انت-

کیچ ءِ دمگ تمپ ءَ پاکستانی پوج ءَ آبادی ءِ سر ءَ بیڑبرتگ ءُ لوگانی پٹ ءُ پول ءِ ھمراھی ءَ یک لوگے مانداشتگ-

دمگی اِھوالکار ءِ رِد ءَ پاکستانی پوج ءَ تمپ ءِ ھند “کسانو” ءَ بیڑبرتگ مردمانی سر ءَ زوراکی کتگ-

بیڑ ءِ میان ءَ پوج ءَ لوگاں چہ گرانبھائیں سامان ھم وتی ھمراھی ءَ برتگ اَنت، وھدے کہ اے میان ءَ پوج ءَ اکرام بلوچ ءِ لوگ مانداشتگ اَنت-

رسانکدر ءَ شنگ بیتگیں اکسانی تہ ءَ گندگ کئیت کہ لوگانی ھمراھی ءَ قرآن پاک ھم سوتکگ اَنت-

زانگ بہ بیت کہ اشی ءَ ساری ھم پوج ءَ تمپ ءَ ھوار بیڑانی میان ءَ لوگ لُٹ ءُ پُل، ماندارگ ءُ لوگانی پروشگ ءِ وئیل دیم ءَ اَتکگ اَنت-

بلوچ یکجھتی کمیٹی ءَ گلزادی بلوچ ءِ سر ءَ اُمر بندی ءِ سزا رد کتگ ءُ پیش ٹھینگ بوتگیں پیسلہ ءُ پُرایمنیں بلوچ سیاسی توارانی ھلاپ ءَ ریاستی کارانی برجاھی لیک اِتگ ءُ رد کتگ۔

بی وائی سی ءِ نیمگ ءَ شنگ بوتگیں بیان ءِ تہ ءَ گْوشگ بیتگ کہ ایڈیشنل سیشن جج ون قادر شاہ بخاری ءَ گلزادی بلوچ ءِ کیس نمبر ۱۵/۲۲ ءَ ھمر قید ءِ سزا داتگ۔ گل ءَ پیسر ءَ اے کیس ءِ آمید گس ءِ کارروائی ءِ بابت ءَ شکی ءِ درشانی کتگ۔

بیان ءِ تہ ءَ گْوشگ بوتگ کہ 8 ستمبر 2026 ءَ بی وائی سی ءَ اے گپ ءِ نیمگ ءَ دلگوش کرتگ اَت کہ جج ءَ بازیں رند ءَ اے گپ ءِ ھال داتگ کہ آ پریشر دیگ بوگ ءَ انت ءُ گلزادی بلوچ ءَ را اُمر کید یا مرگ ءِ سزا دیگ بوت کنت۔

گل ءِ رد ءَ آمید گس ءِ سرجم بوھگ ءَ پیسر داتگیں اے گپ بے گناھی ءِ گمان ءُ ادالتی آجوئی ءَ را سانمند کن اَنت ءُ مرچیگیں پیسلہ اے جیڑہانی پدرائی ءَ کنت۔

بی وائی سی ءَ گوشتگ کہ آمید گس ءِ ہڑتال ءُ 7 ستمبر ءَ پھریزی وکیل ءِ نہ بوھگ ءِ ابید آمید گس ءَ کارروائی برجاہ داشتگ ءُ پھریزگی نمائندگی ءِ ھست نہ بوھگ ءِ گواہ ءِ جست ءُ پرس کتگ کہ اے آئین ءِ آرٹیکل ۱۰ ءُ شھری ءُ سیاسی ھکانی درگت ءَ میان اُستمانی مسام ءِ ( آئی سی سی پی آر) ءِ آرٹیکل ۱۴ (۳) (ب) ءُ (د) ءَ داتگیں موزگری ءِ درچاں ایر کپت نہ کنت-

بیان ءِ تہ ءَ گوشگ بیتگ کہ گوستگیں سئے ماھانی تہ ءَ بی وائی سی ءِ سروکی ءِ سر ءَ اے سیمی امر کید ءِ سزا اِنت، ایشی ءَ پیش جون ءَ ڈاکٹر مھرنگ بلوچ ءُ سبگت اللہ شاہجی ءَ را ھم امر کید ءِ سزا دیگ بوتگ۔

گل ءَ اے گپ ءِ رد ءَ ادلیہ ءِ وسیلگ ءَ کیسانی میرٹ ءِ پیسلہ کنگ ءِ بدل ءَ تھریک ءِ سروکی ءَ دور کنگ ءِ لیک اِتگ۔

بی وائی سی ءَ اے پیسلہ رد کتگ ءُ گْوشتگ کہ ھما جج کہ سزا ءِ جار جنگ ءِ ھاترا زور ءِ منّگ ءَ اِنت آ ھیر جانبدار زانگ نہ بیت وھدے کہ گیر جانبداری ءِ سابت کنگ ءِ زمہ واری ادلیہ ءِ سر ءَ اِنت نہ کہ سزا داتگیں مردمانی سر ءَ۔

بیان ءِ تہ ءَ گْوشگ بیتگ کہ سزا ءِ پد ءَ ھم گلزادی بلوچ ءُ بی وائی سی ءِ سروکی وتی لیکہ ءَ اوشتوک اَنت ءُ آیانی پہ راستی، بیگواھیں مردمانی پچ گرگ ءُ بلوچ ھکانی واستا آھانی پرامنیں جھد برجاہ مان اِیت۔

بی وائی سی ءَ لوٹ کتگ کہ سزبندی آمیدگس ءُ آئینی ادارگ گلزادی بلوچ ءِ امر کید ءِ سزا ءِ آزات ءُ ترندیں چار ءُ تپاسی ءَ بہ کن اَنت، سیادی داروکیں جج ءِ رھبند ءِ پٹ ءُ پول ءَ بہ کن اَنت ءُ رھبند ءِ برجمی ءَ دل یکیمی بہ کن اَنت۔

گل ءَ گشتگ کہ ھچ ادارہ ءَ را اجازت دیگ مہ بیت کہ آ ادالت ءِ امل ءَ را سیاسی سزا ءِ وسیلگ جوڑ بہ کنت۔

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءَ گوشتگ گوستگیں شپ ءَ سرمچاراں بلوچستان ءِ دمگ نصیر آباد ءِ ھند میر حسن ءِ نزیک ءَ اوچ پاور پلانٹ ءَ درکپوکیں بجلی ءِ بنجاھی لائن ءِ یک ٹاورے تراکناکیں شورواں گوں تباہ کتگ-

دوستین بلوچ ءَ گوشتگ اے اُرش ءِ زمہ واری ءَ مئے گل بی آر جی من ایت ءُ اے دابیں کاروائی بلوچستان ءِ آجوئی ءَ داں برجاہ بنت-

بلوچستان ءَ زورانسری بیگواھی ءِ درچ یکشل یَ برجاہ اَنت، سوراب ءُ ھب ءَ سَے مردم دزگیر کنگ ءَ پد بیگواھی ءِ ھال دیم ءَ اتکگ انت۔

ھالانی رد ءَ چہ سوراب ءَ مجید بلوچ ء محمد علی 19 ستمبر 2026 ءَ بیگاہ ءِ ساھت 6 بج ءِ نزیک ءَ ایف سی ءِ کارندہاں گرڈ اسٹیشن ءِ نزیک ءَ دزگیر کتگ ءُ بیگواہ کتگ۔

ھمے روچ ءَ سوراب ءَ مجید بلوچ مجید بلوچ ء اسحاق ھم پاکستانی لشکر ءَ زورانسری بیگواہ کتگ۔ ھالانی رد ءَ آ بیگاہ ءِ ساھت شش ءُ نیم ءِ نزیک ءَ ایف سی ءِ کارندھاں چہ آر سی ڈی ءِ مستریں روڈ ءَ دزگیر کتگ۔

دومی نیمگ ءَ کیچ ءِ دمگ چہ ھوشاب ءَ 22 سالی سلال بلوچ ء ھزوربخش ھم کراچی ءَ چہ تربت ءَ روگ ءِ وھد ءَ حب ءِ دمگ بھوانی ءَ چہ دزگیر کنگ ءَ پد بیگواہ بوتگ۔

کھول ءِ گْوشگ اِنت کہ سلال بلوچ کہ پرکوٹگ، ھوشاب ءِ نندوک اِنت، وتی پت ءِ ٹرک ءِ سر ءَ کلینڈری ءِ کار ءَ کنگ ءَ بیتگ ءُ پہ روزگار ءَ کراچی ءَ شُتگ اَنت۔ کھول ءِ رد ءَ واتر بوھگ ءِ وھد ءَ آ گوں وتی پت ءِ ھمراھی ءَ ٹرکے سامان ءَ بار کتگ ءُ تربت ءَ آھگ ءَ بیتگ کہ پاکستانی لشکر ءَ آ سھب ءِ چار بج ءِ نزیک ءَ بھوانی ءَ دزگیر کتگ ۔

شال ءَ گوں ھمگرنچیں دمگاں مروچی پاکستانی لشکر آپریشن کنگ ءَ اِنت کہ ایشی ءِ تہ ءَ گن شپ ھیلی کاپٹر ءُ ڈرون بھر زورگ ءَ اَنت ءُ ھمے وڑ یکشل یَ مارٹر شیلنگ کنگ بیگ ءَ اِنت۔

مرچی سھب ءَ شال ءَ گوں ھمگرنچیں زرگون ءُ کش ءُ گوری دمگاں پاکستانی لشکر ءَ جنگی آپریشن بندات کتگ کہ ایشی ءِ تہ ءَ لشکر ءِ پیادگیں کارندہ،گن شپ ھیلی کاپٹر ءُ ڈرون مزنیں کساسے ءَ بھر زورگ ءَ اَنت۔

دمگی مردمانی رد ءَ زرگون، شیرکی کچ، زرگون گیس فیلڈ ءُ کش ءُ گور ءِ دمگ آپریشن ءِ تہ ءَ انت۔ آیاں گْوشتگ کہ گْوستگیں شپ ءَ ھم لشکر ءَ چہ جتا جتائیں نیمگاں مارٹر ءِ گولہ باری ءُ بمب گواری کتگ۔

آپریشن ءِ سبب ءَ جانی ءُ مال ءِ تاوان ءِ بابت ءَ انگت ءَ ھال ءُ اھوال دیم ءَ نیتکگ انت۔

￶رسانکدر ءِ ￵ارزشت ءُ ￶بلوچ راجی جُنز

نبشتہ کار: زِروان بلوچ

دی بلوچستان پوسٹ

چوشکہ بیست ءُ ￶یکمی کرن ءِ تہ ءَ ￵رسانکدر ءِ مزنیں ارزشتے ￵ھست دگنیا ءِ ￵بازیں ملکاں ￴رسانکدر ءِ ￵وسیلگ ءَ وتی توار ￴دیم ءَ بُرتگ ، بازیں ایردستیں راج ￴ رسانکدر ءِ ارزشت ءَ ￴پوہ بوتگ انت وتی توار اش دیم ءَ بُرتگ ات دگنیا ءَ سر اش کتگ ، اے ڈیجیٹل اھد ءِ تہ ءَ دنیا تیزی ءَ گو دیم ءَ جنزان اِنت ھرچ ریاست ءِ ￵جدیدیت ءِ ￵نیمگ ءَ ￴دلگوش دئیگ انت ، اگاں مروچی دگنیا ءِ توک ءَ رسانکدر ءِ ￵جنگ ءَ ￴ ھرکس ءَ ￴باج بُرت گڑا آ دگنیا ءِ ￵مستریں تاکت بوت کنت ، پرچا کہ تاکت توپک ءُ تیر ءِ ￵ئیگ انت بلے توار ءِ ￵دیم ءَ بَروک رسانکدر ءِ ￵ انوگیں اھد ءِ ￵تہ ءَ جنگی تاکت تھنا بمب ءُ ￶ٹوپاں ￴گوں بندوک نہ انت بلکیں بازیں فیلڈ ھست یک فیلڈے ￵رسانکدر انت کہ مروچی جنگانی تہ ءَ مزنیں اسرے ￵داریت جنگانی میان ءَ دژمن ءِ ￵ پروپگینڈہ ءَ ￴کاونٹر کنت، دگنیا ءِ ￵دیم ءَ راستی ءَ ￵پیشداریت ۔

ایردستیں راج ءِ واستا رسانکدر ءِ مزنیں ارزشتے ایش انت ھر ھما راج رسانکدر ءِ ￵کارمرز کنگ زانت آ دژمن ءِ ￵پروپیکنڈا کاونٹر کُت کنت گڑا ھما راج راستی ءَ دگنیا ءِ ￵دیم ءَ پَدر بیت ، چوشک ما گِندگ ءَ ایں ھر وھد ءَ پاکستان ءِ فوج لٹ وارت گڑا رسانکدر ءَ ￴کئیت پروپگینڈا کنت دگنیا ءِ دیم ءَ وتی تاکت ءَ ￴پیشداریت “چوشکہ آئی ایس پی آر میڈیا دیم ءَ کئیت بریلنگ دنت ” پاک فوج نے دہشت گردوں کے ٹھکانوں پر بڑا حملہ کیا ” وتی بیانیہ ءَ پروموٹ کنت ، نو اے بیانیہ ءَ ￴ھما وھدا کاونٹر کنگ بیت کہ تو سوشل میڈیا کارمرز کنگ بزان ئے ، بلے ھما راج کہ سوشل میڈیا کارمرز کنت گڑا آیاں ریاست ءِ بیانیہ کاونٹر کنگی انت رسانکدر ءِ کارمرز کنگ زانگی انت کہ کجام جاہ ءَ کجام گپ کنگی انت بلے بلوچ راج ءَ ￴ھمینکس بودناک بئیگی انت کہ رسانکدر ءِ ارزشت ءَ بزان انت وت ءَ ٹیکنیکل جوڑ بہ کنت پرچہ کہ انوں جنگ ءِ ￵بھرے سوشل میڈیا تھ ءَ ھم ھست ـ

انو ما بچاریں دگنیا ءِ ورلڈ آرڈر بدل بوتگ جنگ ءِ یک بھرے ھست آ میڈیا وارفئیر گُشگ بیت ھما راج کہ میڈیا وارفئیر ءِ تہ ءَ وت ءَ را منارینت گڑا دنیا ھما راج ءِ ھم کوپگ بیت مروچی پاکستان میڈیا ءِ ￵تہ ءَ وت ءَ را مزبوت کنگ ءِ ایپکس کمیٹی جوڑ کنت سوشل میڈیا ءِ تہ ءَ وتی مردم ءَ یل کنت ھر وھد ءَ بلوچ جنگ ءِ کاونٹر کنگ واستا بیانیہ ” ڈسکورس ” جوڑ کنت ، نو باید بلوچ ورنا ریاست ءِ بیانیہ کاونٹر کنگ ءِ واستا جھد ءَ تیز بکن انت ، گیش چہ گیش بلوچ تھریک ءَ پروموٹ بہ کن انت ھمُک ساھت ءَ بلوچستان ءِ راستی ءَ پَدر بہ کن انت وتی امل ءُ جھد ءَ گیش بہ کن انت ـ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-