TBP Balochi

بلوچستان ءِ بنجاھی شھر شال ءَ ھوار گوادر ءَ دو مردم زورانسری بیگواہ کنگ بیتگ انت-

بلوچستان ءِ بنجاھی شھر شال ءَ بی ایس او پجار ءِ بنجاھی وائس چیئرمین بابل ملک بلوچ پاکستانی لشکر ءَ دزگیر کتگ ءُ بیگواہ کتگ۔

بلوچ اسٹوڈنٹس آرگنائزیشن (پجار) ءَآئی ءِ بیگواھی ءِ پدرائی ءَ گْوشتگ کہ سینٹرل سینئر وائس چیئرمین بابل ملک بلوچ ءِ چہ پولی ٹیکنیک کالج ءِ ھاسٹل ءَ زورانسری بیگواہ کنگ ءَ ایر جنت ءُ سکا دردناکے املے ۔

بلوچ اسٹوڈنٹس آرگنائزیشن (پجار) ءِ بنجاھی جارکش ءَ وتی بیان ءِ تہ ءَ گشتگ کہ گوستگیں شپ ءَ پولی ٹیکنیک کالج ءِ ھاسٹل ءَ چہ پرامن سیاسی جنز ءَ گوں بندوکیں نودربر رھشون ءِ بیگواہ نہ ایوک ءَ ایرجنی ءِ لائک انت بلکیں بنکی انسانی ھکانی مزنیں لگتمالی یے ۔ اے امل امن ءُ ایمنی ءِ وانگ ءُ زانگ ءِ چاگِرد ءَ تُرس ءُ بیم ءِ ودی کنگ ءَ اِنت ءُ اے بلوچستان ءِ وانگ ءُ زانگ ءِ رھبند ءَ سانمند کنگ ءِ ھاتر ءَ پہ زانت سما کنگ بوگ ءَ ایں۔

جارکش ءَ گوشتگ کہ بابل ملک بلوچ یک پرامن سیاسی جھدکارے، نودربرانی وانگ ءُ زانگ ءُ جمھوری ھک ءُ وانگ ءُ زانگ ءِ دیمروئی ءِ واستا پرکاریں رنگے ءَ کار کنگ ءَ بوتگ۔ آئی ءِ اے رنگ ءَ دزگیری ءُ بیگواہ کنگ پدّریں آئین ءُ کانود ءِ لگتمالی اِنت۔ بیان ءِ تہ ءَ گوشگ بوتگ اگاں آئی ءِ سر ءَ کجام ھم بھتامے ھست گڑا آمید گس ءَ پیش کنگ بہ بیت، کانودی کارروائی کنگ بہ بیت ءُ پاکستان ءِ آئین ءِ رد ءَ کارروائی کنگ بہ بیت۔

بیان ءِ تہ ءَ گیش گْوشگ بیتگ کہ بلوچ نودربر گل (پجار) یک جمھوری ءُ سیاسی نودربر گلے، کہ پکری رنگ ءَ گوں نیشنل پارٹی ءَ ھمگرنچ اِنت، ءُ ملک ءَ پارلیمنٹ ءِ بالادستی، کانود ءِ ھاکمیت ءُ تچکیں آمیدگسی نزام ءِ سر ءَ باور کنت۔ بی ایس او پجار ءَ مدام ڈیھ ءَ جمھوری امل ءِ دلبڈی داتگ ءُ نودربرانی وانگ ءُ زانگ، جمھوری ءُ آئینی ھکانی رسگ ءَ جوانیں کرد پیلو کتگ۔

ھمے وڑ ءَ بلوچستان ءِ تیابدپی شھر گوادر اورماڑہ ءَ پاکستانی چیریں ادارھاں بیست ءُ ھپت اپریل دوھزار ءُ بیست ءُ شش ءَ سکی ء بالاچ آوار جتگ ءُ برتگ کہ آ یک پٹرول پمپے ءَ کار ءَ بوتگ-

اھوالانی رد ءَ سکی ء بالاش پسنی کلانچ ءَ سیادی دار ایت ءُ ایشی ءَ پیش دوھزار ءُ ھژدہ ءَ پاکستانی پوج ءِ دست ءَ بیگواہ کنگ بیتگ کہ داں چار سالاں بیگواہ بیتگ ءُ دوھزار ءُ دو ءَ یل کنگ بیتگ-

خدیجہ بلوچ بنت پیر جان ءِ یل نہ بوھگ ءِ ھلاپ ءَ زھرشانی پتر گیشتر، اود ءَ تربت شال ءَ روکیں سی پیک ءِ شھدگ ھیرونک ءِ ھند ءَ بند کنگ بوتگ ءُ آئی ءِ زوتیں یلہ کنگ ءِ لوٹ کنگ بوگ ءَ ایں۔

زھرشانی کنوکاں اے راہ پہ ھر وڑیں روانی ءَ بند کتگ، ایشی ءِ سبب ءَ تربت، ھوشاپ، آواران، پنجگور، سوراب ءُ شال ءِ نیام ءَ دو نیمگی ٹریفک سرجم ءَ بند کنگ بوتگ۔

زھرشانی کنوکیں مردمانی گْوشگ اِنت کہ خدیجہ بلوچ ءِ زورانسری بیگواھی ءَ بازیں روچ گوستگ بلے انگت ءَ آ یل کنگ نہ بوتگ کہ ایشی ءِ ھلاپ ءَ زھرشانی برجاہ بیت ۔

دومی نیمگ ءَ شال ءَ بولان میڈیکل کالج ءِ دیم ءَ زھرشانی ءِ دھرنا برجاہ اِنت کہ اود ءَ مزنیں کساسے ءَ سیاد ءُ وارس ساڑی اَنت ءُ انساپ ءِ لوٹ ءَ کنگ ءَ اَنت۔

زھرشانی کنوکاں لوٹ کتگ کہ اگاں خدیجہ بلوچ ءِ سر ءَ کجام جرمے بھتامے جنگ بیتگ گڑا آ زوت آمیدگس ءَ پیش کنگ بہ بیت ءُ کانود ءِ رد ءَ کیس کنگ بہ بیت۔

پنجاب ءِ دمگ ڈی جی خان ءِ ھند شادان لنڈ ءَ فوجی سیمنٹ فیکٹری ءَ چہ یک سیکورٹی گارڈے دزگیر کنگ ءُ بیگواہ کنگ بوتگ۔

دمگی اھوالانی رد ءَ بیگواھیں مردم ءِ پجار دوست محمد ءِ نام ءَ بوتگ کہ آ پاکستانی لشکر ءَ چہ ریٹائرڈ بوتگ ءُ اے وھد ءَ فوجی سیمنٹ فیکٹری ءَ سیکورٹی گارڈ ءِ بستار ءَ کار کنگ ءَ بوتگ۔ دوست محمد ءِ بابت ءَ گشگ بیت کہ آ تونسہ شریف ڈیرہ غازی خان ءِ مردم اِنت ءُ آئی ءِ اُمر 45 سال ءِ کساس ءَ اِنت۔

کھول ءَ گْوشتگ کہ دوست محمد 23 اپریل 2026 ءَ شپ ءِ 5:30 ءِ نزیک ءَ انسداد ناشرکاری ءِ کارندھاں کارخانہ ءِ نزیک ءَ چہ برتگ ءُ ایشی ءَ پد آئی ءِ بارو ءَ ھچ ھال نہ بیتگ۔

کھول ءَ لوٹ کتگ کہ دوست محمد زوت آمیدگس ءَ پیش کنگ بہ بیت یا آئی ءِ جان سلامتی دلستکی کنگ بہ بیت۔

بلوچستان ءِ دمگ کیچ تمپ ءَ مند گوگ ءِ جھمنندین مردمے ءِ لاش دزکپتگ-

گیشین اھوالانی رد ءَ لاش تمپ دازن ءَ واٹر سپلائی ءِ نزیک ءَ دزکپتگ کہ اود ءَ آئی ءِ پجار رستم ء ابراھیم ءِ نام ءَ زانگ بیتگ – ءُ آ مند گوگ ءِ جھمنند بیتگ-

دمگی مردمانی رد ءَ رستم لھتے روچ پیش ناشناسیں مردماں مند گوبرد ءَ ءَ آوار جتگ ءُ برتگ –

دمگی اھوالانی رد ءَ لاش ءِ گندگ ءَ پد لاش ءِ گور ءَ پاکستانی پوج اتکگ ءُ پد ءَ واتر شتگ-

داں انگت ءَ ایشی ءِ آوار جنگ ءُ کوش ءِ زمہ واری ھچ کس ءَ نہ زرتگ ءُ ناکہ آئی ءِ کوش ءُ آوار جنی ءِ درگت ءَ گیشین اھوال دیم ءَ اتکگ انت-

بلوچستان ءِ دمگ کیچ ءَ سلاہ بندیں مردمانی تیر گواری ءَ یک مردمے بیران ءُ آئی ءِ لوگ بانک ٹپیگ بوتگ ۔

چہ دمگی مردمانی رد ءَ بیران بوتگیں مردم ءِ پجار عامر نور ءِ نام ءَ بوتگ کہ آ تمپ ءِ دمگ کونشقلات ءِ نندوک اِنت۔

دمگی مردمانی گشگ انت کہ امیر نور نومبر 2024 ءَ پاکستانی لشکر ءَ زورانسری ءَ بیگواہ کتگ بیتگ ءُ بازیں وھداں بیگواہ بوگ ءَ پد چار روچ ءَ پیسر یل کنگ بیتگ۔

ھالانی رد ءَ آ گوں وتی جنین ءَ کراچی ءَ پہ الاج ءَ روگ ءَ بوتگ کہ راہ ءَ ناشناسیں سلاہ بندیں مردماں بس اوشتارینتگ ءُ ایر کتگ ءُ تیرگواری کتگ کہ ایشی ءِ آسر ءَ آ جاہ ءَ بیران بوتگ وھدے کہ آئی ءِ جنین ٹپی بوتگ۔

دمگی مردمانی گشگ اِنت کہ اے اُرش کنوک سرکاری کمک ءِ سلاہ بندیں گلے ءَ بوتگ کہ دمگی مردم آئی ءَ ’’ڈیتھ اسکواڈ‘‘ ءِ نام ءَ پجاہ کار انت۔

چہ نوشکی ءَ سر بیتگیں ھالانی رِد ءَ پاکستانی پوج ءِ مزنیں کچے ءَ مل ماککی ءِ دمگ ءَ سر بیتگ اَنت ءُ دمگ ءَ کومبنگ آپریشن برجاہ ءَ اِنت، اود ءَ لوگ ءَ پٹ ءُ پول کنگ ءَ اَنت-

ھالانی رِد ءَ پوج ءَ دمگ ءِ جتاجتائیں ھندانی سر ءَ ناکہ بندی کنان ءَ پٹ ءُ پول بندات کتگ، وھدے کہ پوج ءِ گاڑی شھر ءِ جتاجتائیں شھدگانی سر ءَ گشت کنگ ءَ اَنت- شھر ءِ پُترگی ءُ دراھگی راھانی سر ءَ رؤکیں آؤکیں گاڑیاں سک پٹ ءُ پول کنگ ءَ اِنت-

زانگ بہ بیت کہ نوشکی شھر ءَ پیسر ءَ چہ کرفیو ھست اِنت- ھمے سال 31 جنوری ءَ بلوچ لبریشن آرمی “آپریشن ھیروف ” ءَ چہ ھمگرنچیں اُرشاں ءُ شش روچ ءَ دستیگ ءَ پد نوشکی ءَ پوج ءِ نیمگ ءَ چہ دمگی آبادی ءِ ھلاپ ءَ کاروائی وھد وھد سر ءَ برجاہ بیتگ-

دمگی آبادی ءُ کاروباری مردم ھمکروچ پوجی آپریشناں دلسیاھی ءِ درشان کنان ءَ آیاں گوشتگ کہ آیانی ھمکروچی زند ءُ کار ءُ بار اسرمند بیتگ اَنت-

چہ شال ءِ دمگ کلی قمبرانی ،قمبرانی دگ ءَ دو ورنا بیست چار اپریل 2026 ءِ شپ ءَ زورانسری بیگواہ کتگ اَنت-

گیشیں ھالانی رِد ءَ بیست سالی ئیں سراج قمبرانی، ء غنی قمبرانی ءُ بیست دو سالی ئیں لال خان قمبرانی ء جعفر خان قمبرانی کہ نودربر اَنت ءُ کلی قمبرانی ءِ جھمنند اِنت شپ ءَ کساس 11:00 ءَ چہ آ لوگ ءَ چست کتگ اَت-

کھول ءِ رِد ءَ اے وئیل ءَ کاؤنٹر ٹیررازم ڈیپارنمنٹ (CTD) ءِ کارندہ ھوار اَنت- دوئیں ورنا زورانسری آوار جنی ءَ پد آیانی درگت ءَ ھچ وڑیں ھال دیم ءَ آرگ نہ بیتگ-

زانگ بہ بیت کہ بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، ءُ بازیں کھولے وتی دوستناکانی واتری ءِ ودار ءَ اَنت-

بلوچستان ءِ بنجاھی شھر شال ءَ بولان میڈیکل کمپلیکس ءِ دیم ءَ خدیجہ بلوچ ءِ یل کنگ ءِ ھاتر ءَ برجاھیں زھرشانی مرچی ھپتمی روچ ءَ سر بوتگ۔

بی وائی سی کوئٹہ زون ءِ گشگ انت کہ خدیجہ بلوچ ءِ زوراکیں بیگواہ کنگ بلوچ نسل کشی ءِ برجاہ دارگ ءِ درچ انت۔ مرچی خدیجہ بلوچ ءِ بندیگ جاہ ءَ ھپتمی روچ سرجم بیت۔ آ نودربرے ءُ آئی ءِ چکاس ھم مرچی بندات بوتگ اَنت۔

گوستگیں ھپت روچ اِنت کہ آ زندان ءَ بند اِنت۔ خدیجہ ءِ کھول مرچی ھپتمی روچ اِنت کہ اے گیر انسانی کار ءِ ھلاپ ءَ زھرشانی کنگ ءَ اَنت۔

آیاں خدیجہ بلوچ ءِ سلامتی ءَ یل کنگ ءِ لوٹ کرتگ۔ ھاندان ءِ گشگ اِنت کہ آ انگت ھچ آمیدگس ءَ پیش نہ بوتگ ءُ آ ترسگ ءَ اَنت کہ آ کانونی کارروائی ءِ بدل ءَ رسانکدر ءِ دیم ءَ آرگ بیت۔

چہ کراچی ءَ سر بیتگیں ھالانی رِد ءَ چہ ھُزدار ءَ سیادی داروکیں یک ورنایے جناح انٹرنیشنل ائیرپورٹ ءِ نزیک ءَ پاکستانی پوج ءَ آوار جنگ ءَ پد بیگواہ کتگ- اِھوالکار ءِ رِد ءَ اے ورنا ءِ پجّار پرویز بلوچ ء مسافر نام ءَ چہ بیتگ ءُ آئی ءِ سیادی ھُزدار ءِ دمگ اورناچ ءَ گوشگ بیگ ءَ اِنت-

رپورٹ ءَ گوشگ بیتگ کہ اے وئیل 20 اپریل 2026 ءِ شپ ءَ ھما وھد ءَ بیتگ وھدے پرویز بلعچ مسکت ءَ چہ وتی موکلانی گوازینگ ءَ واتر ڈیھ ءَ سر بیتگ- ائیرپورٹ ءَ چہ دراھگ ءَ پوج ءِ کارندھاں آ آوار جتگ، چریشی ءَ پد آئی ءَ گوں وتی کھول ءَ ھچ ھال نہ بیتگ-

کھول ءَ ورنا ءِ پہ سلامتی واتری ءِ لوٹ کنان ءَ واکدار ءَ چہ اے درگت گامگیج زیرگ ءِ دزبندی کتگ-

بلوچستان ءِ بنجاھی شھر شال ءَ بولان میڈیکل کمپلیکس ءِ دیم ءَ خدیجہ بلوچ ءِ یل کنگ ءِ واستا برجاھیں دھرنا ششمی روچ ءَ برجاہ بوتگ۔

شش روچی زھرشانی ءَ ابید انتزامیہ ءِ نیمگ ءَ ھچ وڑیں گامگیج زیرگ نہ بوتگ۔

زھرشانی کنوکیں مردمانی گْوشگ اِنت کہ انتزامیہ ایوک ءَ گپ ءُ تران ءِ بھانگ ءَ تنگ کنگ ءُ زور دیگ ءِ کوشست ءَ کنگ ءَ اِنت۔

گوستگیں روچ ءَ شال ءَ جتا جتائیں جاھاں پمفلٹ بھر ءُ بانگ کنگ بوتگ ایشی ءِ تہ ءَ بی ایم سی ھسپتال، بُوری روڈ ءُ عیسیٰ ناگری ھم ھوار اَنت۔

زھرشانی بنجل ءِ نندوکانی گْوشگ اِنت کہ اے کمپین ءِ مول ءُ مراد ریاستی زوراکیانی ءِ پاشک کنگ ءُ اے پیشدارگ بوتگ کہ بلوچ راج ھاسیں رنگے ءَ زالبول چتور پہ زور بیگواہ کنگ ءُ بندیگ کنگ بوگ ءَ اَنت۔

بلوچ یکجھتی کمیٹی ءَ گشتگ انچو کہ زھرشانی ھمینکس روچ ءَ کہ برجاہ انت انتزامیہ ءِ نیمگ ءَ ھاموشی برجاہ اِنت ءُ خدیجہ بلوچ ءِ پہ سلامتی ءِ واستا تاں انوگ ءَ ھچ وڑیں املی گامگیج زورگ نہ بوتگ۔

آیاں گْوشتگ کہ اے بے تواری ایوک ءَ لاپروائی نہ اِنت بلکیں زانتگیں پیسلھے ءُ اے پیسلہ انتزامیہ ءَ آئی ءِ برجاھیں بندیگ ءُ ریاستی زوراکیانی تہ ءَ ھمدست کنت۔

بی وائی سی ءِ رد ءَ گوستگیں شش روچ اِنت کہ آئی ءِ کھول اے ناانسالی ءِ ھلاپ ءَ مھکم ءَ اوشتاتگ ءُ توار چست کنگ ءَ اِنت وھدے کہ اے وئیل ءَ لوگ ءِ مردم سکیں زھنی ءُ جزباتگی ءُ رنج ءِ آماچ بوتگ اَنت۔

دیمتر ءَ گْوشگ بوتف کہ زوراکی ءَ بیگواہ کنگ ءِ اے سلسلہ زوت بند کنگ بہ بیت ءُ سرجمیں کیس پلگاریں رنگے ءَ گیش ءُ گیوار کنگ بہ بنت دانکہ ھانداناں انساپ بہ رس ایت۔