TBP Balochi

چہ ھاران، کیچ ءُ مستونگ ءَ سے مردم زورانسری بیگواہ وھدے کہ چہ شال ءَ یک مردمے یل کنگ بیتگ-

گیشیں ھالانی رِد ءَ ھاران ءِ جھمنندیں سی ءُ ھپت سالی ئیں ڈاکٹر عبدالمالک ء حاجی نور احمد دو اکتوبر ءِ شپ ءَ چہ ھاران ءَ ایف سی ءَ آوار جتگ ءُ بیگواہ کتگ-

کیچ ءِ دمگ شاپک ءِ جھمنندیں بیست ءُ ھپت سالی ئیں اسد بلوچ ء کھدا دل مراد ھژدہ اگست ءِ شپ ءَ آبسر تربت ءَ آئی ءِ لوگ ءَ چہ ڈیتھ اسکواڈ ءَ آوار جتگ ءُ بیگواہ کتگ-

ھمے وڑ مستونگ ءِ جھمنندیں ھژدہ سالی ئیں ممتاز بلوچ ء سلطان محمد پنچ جون ءَ چہ مستونگ ءَ ایف سی ءُ ایم آئی ءَ آوار جتگ ءُ بیگواہ کتگ-

دومی نیمگ ءَ شال سریاب ءِ جھمنندیں ملک علی نواز بلوچ ء غلام جان، کہ دو اکتوبر ءَ زورانسری بیگواہ کتگ، سے اکتوبر ءَ شال ءَ یل کنگ بیتگ-

زانگ بہ بیت بلوچستان ءَ زورانسری آوار جنیانی تہ ءَ گیشتریں کیس ریاستی زور ءُ تُرس ءِ سوب ءَ پہ وھد رپورٹ کنگ نہ بنت، ھمے ھاتر ءَ اے وڑیں وئیلانی ھال دیم ءَ آیگ ءَ دیر کن اَنت-

بلوچستان ءِ جتاجتائیں جاہ، چاگی، واشک ءُ پنجگور ءَ پاکستانی لشکر ءِ سر ءَ اُرشاں بیرانیانی ھال ھست انت۔

مرچی سھب ءَ پنجگور ءِ دمگ پروم ءِ ھوکانی ءَ بمب تراک ءَ ناشناسیں مردماں پاکستانی لشکر نشانگ جوڑ کتگ۔ تراک ءَ پد دمگ ءَ بالی گراب بال ءَ گندگ بوتگ۔

گوستگیں روچ ءَ شال ءُ تفتان تجارتی شاھدگ ءِ سر ءَ چاگی ءِ چھتر ءِ دمگ ءَ ناشناسیں مردمانی بمب تراک ءَ پاکستانی فوج ءِ کاروان ءِ بکتر بندیں گاڑی نشانگ جوڑ کتگ ءُ ایشی ءِ آسر ءَ گاڑی ءَ را تاوان بوتگ۔

تراک ءَ پد تجارتی گاڑیانی کاروان تاں شپ ءِ دیر ءَ بند کنگ بوتگ انت وھدے کہ فورسز ءَ دمگ ءَ مزنیں تیرگواری کتگ ءُ جتا جتائیں نیمگاں مارٹر ءِ گولہ باری کتگ۔ چہ ایشی ءَ ابید بازیں مردمانی زورانسری ءَ بیگواہ کنگ ءِ ھال ھم ھست۔

دومی نیمگ ءَ گوستگیں روچ ءَ واشک ءِ دمگ آرماگائے ءَ سی پیک ءِ راہ ءَ پاکستانی لشکر ءِ کاروان ءِ سر ءَ سلاہ بندیں مردماں بسانی کاروان ءِ تہ ءَ روگ ءِ وھد ءَ سنگر گپتگ ءُ اُرش کتگ۔

ھالانی رد ءَ اے اُرش ءَ بازیں کارندہ بیران ءُ ٹپیگ بوتگ اَنت ءُ واکداراں یک افسرے نائیک سلام ءِ بیرانی ءُ دوازدھیں کارندہ ٹپی بوھگ ءِ پدرائی کتگ۔

انگت ءَ اے اُرشانی زمہ واری کس ءَ نہ گپتگ، بلے بلوچ سلاھ بندیں آجوئی لوٹوکیں مزن نامیں دمگاں پرکار انت اَنت۔

اسلام آباد ءَ دی بلیک ھول ءَ بلوچستان ءِ بابت ءَ برجم داشتگیں سیشن ءِ تہ ءَ چاگرد ءُ دیمروئی ءِ کارانی کارندہ ءُ پیسریگیں نگراں صوبائی وزیر ڈاکٹر فیض محمد کاکڑ ءَ بلوچستان ءِ بابت ءَ یک جستے ءِ پسو ءَ گْوشتگ کہ وانندہیں بلوچ زالبولانی گوں سرمچاراں ھوار بوھگ اے گپ ءِ سبوت اِنت کہ آ وانندہ اَنت۔ ھچ نادانیں مردم چوش سلاہ چست کُت نہ کنت۔

چہ زور ءُ توپک ءَ ایشاں ہلاس کت نہ کن ات۔ اگاں پہ لھتے ءَ ناشرکار اَنت گڑا پہ لھتے ءَ ھیرو اَنت۔

یات بہ بیت کہ بلوچ سلاہ بندیں زرمبشت ءِ تہ ءَ زالبولانی ھست بوھگ ءِ مستریں لڑ اپریل 2022 ءَ بوتگ کہ شاری بلوچ ءَ کراچی یونیورسٹی ءِ کنفیوشش انسٹیٹیوٹ ءِ نزیک ءَ یک فدائی اُرشے ءَ کنفیوشش انسٹیٹیوٹ ءِ کارندہ نشانگ جوڑ کتگ اَنت۔

اے سال ءَ بلوچ لبریشن آرمی ءَ وتی اولی زالبولیں کماندار شہناز بلوچ ءَ سرجمیں راج ءِ دیم ءَ پدر کتگ کہ اے گل ءِ کار ءَ یک مزنیں دیمروئی یے لیک اتگ۔

ستمبر 2026 ءَ تربت ءَ پاکستانی لشکر ءِ کاروان ءِ سر ءَ اُرش ءِ ھال دیم ءَ اتک ءُ ایشی ءَ پد بلوچستان لبریشن فرنٹ ءَ آپریشن ءِ زمہ واری زرتگ ءُ یک نوکیں زالبولیں سلاہ بندیں یونٹے ءِ جوڑ کنگ ءِ جار جت کہ آئی ءِ نام کریمہ آرمڈ آسالٹ ڈویژن (KAAD) اِنت۔

ھمے وڑ بلوچ لبریشن آرمی ءِ نیمگ ءَ آپریشن ھیروف ءَ بازیں زالبولیں جنگول ءُ فدائیاں بھر زرتگ۔

ماشکیل ءِ دمگ مت وپتکن ءَ سلاہ بندیں مردماں دو ٹیلی کمیونیکیشن ٹاور سوتکگ ءُ تباہ کتگ اَنت۔

انگت ءَ اے اُرش ءِ زمہ واری کس ءَ نہ زرتگ بلے بلوچستان ءِ آجوئی دوستیں سلاہ بندیں گلاں گوستگیں وھداں ھم سرکاری کارجاہ، رھوتی نزام ءُ انفراسٹرکچر نشانگ جوڑ کتگ اَنت۔

سلاہ بندیں گلانی گشگ انت کہ موبائل کمپنیانی اے ٹاور فوج ءِ نگرانی ءَ جاسوسی ءِ ھاترا کارمرز کنگ بنت۔ اے میان ءَ انٹرنیٹ ءُ کمیونیکیشن سسٹم ءِ نابودی ءَ ابید ھم بلوچستان ءِ لھتیں دوریں دمگاں موبائل کمپنی ٹاورز جوڑ کنگ بوتگ اَنت کہ مُدام بلوچ سلاھبندانی اُرشانی آماچ اَنت۔

گلزادی بلوچ اُمر ءِ کید

ٹی بی پی شونگال

بلوچ یکجھتی کمیٹی ءِ باسک گلزادی بلوچ شال ءِ یک آمیدگسے ءِ نیمگ ءَ یک آڑوک ءُ شکی ئیں کوشے ءِ یک اَرزی ءَ اُمر ءِ کید ءِ سزا دیگ ءَ پد بلوچستان ءَ سیاسی ءُ انسانی ھکانی پھناتاں یک رندے پد ءَ آمیدگسی کاروائی، ارزی ءِ ترز ءُ سیاسی باسکانی ھلاپ ءَ کانونی اَرزی ءِ کارمردی ءِ سر ءَ باوست چِست بیتگ- بلوچ یکجھتی کمیٹی ءَ پیسلہ رد کتگ ءُ آ بے انساپی نامینتگ کہ گلزادی بلوچ ءِ کانونی ٹولی ءِ لیکہ انت کہ آ ھما اَرزی ءِ سزا دیگ بیتگ آ بنجاھی جرمدار نہ انت ءُ سپاھی ءَ کانونی ھکانی کارمردی ءِ سرجمیں موز دیگ نہ بیتگ –

رکینوکانی نیمگ ءَ اے ایراد دیم ءَ اتکگ سزا ءِ گوشگ ءَ پیش تچک ءَ پوجداری ءِ تک ءَ 342 ءِ درچ ءَ گلزادی ءِ بیان یاداشت کنگ نہ بیتگ انت ءُ وکیلاں ھم گڈی دلیلانی دیگ ءِ موہ دیگ نہ بیتگ انت- کانونی ٹولی ءِ رد ءَ ھما وھد ءَ آ آمیدگس ءَ سر بیتگ انت جج اود ءَ نہ بیتگ ءُ آمیدگس ءِ ریڈر ءِ نیمگ ءَ آیاں نبشتانکی دروشمے ءَ ھکم نامہ دیگ بیتگ-

گلزادی بلوچ 7 اپریل 2025 ءَ دزگیر کنگ بیتگ- آ بنداتی ءَ دزگیر کنگ ءَ پد بیگواہ کنگ بیتگ- پد ءَ آئی ءِ دزگیری تھری ایم پی او (MPO-3) ءِ درچ ءَ دیم ءَ آرگ بیتگ- پد ءَ آئی ءِ ھلاپ ءَ نبشتگیں جتا جتائیں ارزیاں ناشرکاری ءُ پاکستان پینل کوڈ (PPC) ءِ گیشیں تَک ھوار انت – کساس سَے ماہ ءَ داں آ پولیس ءِ ریمانڈ ءَ بیتگ ءُ پد ءَ آمیدگسی ریمانڈ ءِ سر ءَ جیل ءَ برگ بیتگ- گچینی گپ ایش انت کہ گلزادی بلوچ ھما ارزی ءَ اُمر ءِ کید کنگ ءِ سزا دیگ بیتگ آ اے اَرزی ءَ دزگیر کنگ نہ بیتگ-

گلزادی بلوچ ءِ ھلاپ ءَ پیسلہ ھنچیں وھدے ءَ دیم ءَ اتکگ کہ بلوچ یکجھتی کمیٹی ءِ بازیں رھشون ءُ باسک بازیں وھدے ءَ دزگیری، ارزی ءُ سزایانی دیمپان انت- 22 جون 2026 ءَ شال ءِ ناشرکاری ءِ آمیدگس ءَ بی وائی سی ءِ رھشون ڈاکٹر ماہ رنگ بلوچ ءُ سبگت اللہ بلوچ 25،25 سال ءِ کید ءِ سزا داتگ انت-

بلوچستان ءَ ریاستی پالیسیاں پُر ایمنیں سیاست ءِ ھچ وڑیں گنجائش نیست انت – ریاست بنداتی روچ ءَ اے پالیسی ءَ بیتگ کہ بلوچستان ءَ چِست بیتگیں تواراں تاکت ءِ زور ءَ ایرموش کن آں-ھمے پالیسی ءِ تَک ءَ ریاست ءَ بلوچستان ءِ بیگواھی کتگ، دروگیں میڑ ءُ دگہ زُلم ءُ زوراکیانی زور ءَ کتگ انت- مروچی ھرکس وتی توار ءَ چِست کنت گڑا آ تاکت، دزگیری ءُ وتگڑیں آمیدگسانی کاروائیانی زور ءَ آ بے توار کنگ ءِ جھد کنگ بیت انت- مروچی بلوچ یکجھتی کمیٹی ءِ رھشونی گون ءَ ھرچی کنگ بوگ ءَ انت اے ھمے درچ ءِ یک بندے-

بلوچستان ءِ جتاجتائیں دمگاں واپاری گاڑیانی دستیگی، مزنیں مشینری ءَ گوں پُھلانی تباہ کنگ ءُ پاکستانی لشکر ءِ سر یَ اُرش ءِ وئیل رپورٹ بوتگ انت۔

ھالانی رد ءَچاگی، شال تفتان بیپاری راہ ءِ سر ءَ کاروان ءَ ھواریں دو مال برداری واپاری گاڑی چھتر ءِ دمگ ءَ سلاہ بندیں مردمانی دستیگ کتگ انت۔ البت ھچ وڑیں جانی تاوان ءِ ھال نہ بوتگ۔

دومی نیمگ ءَ قلات ءِ منگچر دمگ سورو ءَ پیادگیں پاکستانی لشکر ءِ سر ءَ سلاہ بندیں اُرش کنگ بوتگ کہ ایشی ءِ آسر ءَ لشکر ءِ کارندھاں جانی تاوان بوتگ اَنت۔

دومی نیمگ ءَ بسمہ خاران ءِ راہ ءِ سر ءَ دورگ پھل گوں مزنیں مشینری ءَ تباہ کنگ بوتگ ءُ ھزاراں مال ءُ مسافر گاڑی مھتل بیتگ اَنت۔

گوادر ءِ تحصیل پسنی ءَ چہ رس اتگیں ھالانی رد ءَ ناشناسیں سلاہ بندیں مردماں دوسی ءَ ڈیوٹی ءِ وھد ءَ کوسٹل ہائی وے پولیس ءِ کارندہ فیصل ستار آوار جتگ۔

بنشون ءِ رد ءَ اے وئیل گوستگیں شپ ءَ بوتگ کہ دو کرولا گاڑیانی تہ ءَ سواریں سلاہ بندیں مردماں اے کارندہ ءِ موبائل فون زرتگ ءُ چیک کنگ ءَ پد گوں وت برتگ۔ فیصل ستار ءِ سیادی پسنی ءِ گشگ بیتگ۔

انگت ءَ اے اُرشانی زمہ واری کس ءَ نہ زرتگ۔ بلے بلوچ لبریشن آرمی ءَ شال ءُ تفتان روٹ ءَ ہوار دگہ ھاسیں شاھدگانی کنٹرول ءِ جار جتگ کہ انگت ءَ روان اِنت۔

پنجگور ءِ دمگ جائین پروم ءِ نندوکیں محمود ہاشم نامیں مردے پاکستانی لشکر ءِ دست ءَ دزگیر کنگ ءَ پد یک رندے پد ءَ زورانسری ءَ بیگواہ کنگ بوتگ۔

آئی ءِ کھول ءِ رد ءَ محمود ھاشم 2 اکتوبر ءَ پنجگور ءِ دمگ دازی ءَ چہ دمگی ڈیتھ اسکواڈ ءُ ایف سی ءِ کارندہاں دزگیر کتگ ءُ بیگواہ کتگ۔

ایشی ءَ چہ پیسر آ ھم 16 مارچ ءُ 3 جون 2021 ءَ سیمسر ءَ آوار جنگ بیتگ بلے پد ءَ یلہ کنگ بوتگ۔

آئی ءِ کھول ءَ چہ انسانی ھکانی گلاں دزبندی کتگ کہ آ محمود هاشم ءِ سلامتی ءِ ھاتر ءَ کرد ءَ پیلو بہ کن اَنت۔

خضدار ءِ دمگ فیروز آباد ءَ سئے مردمانی لاش دست کپتگ انت۔

دمگی اھوالانی رد ءَ لاشانی دست کپگ ءَ پد آ پہ المی ئیں قانونی کارروائی ءَ نادراھجاہ ءَ دیم دیگ بوتگ اَنت۔ لاشانی پجار، بیرانی ءِ سبب ءُ وئیل ءِ گیشتریں ھال انگت ءَ پدر نہ بوتگ اَنت۔

دومی نیمگ ءَ سوراب ءِ مل شاہورائی ءِ جاہ ءَ چہ راہ ءِ کش ءَ دو مردمانی لاش دزکپتگ انت کہ انگت ءَ آھانی پجار نہ بوتگ۔

چہ دمگی مردمانی رد ءَ ھر دوئیں مردم تیرگواری ءَ بیران بوتگ اَنت۔ پولیس ءَ ھال ءِ رسگ ءَ پد لاش سول ہسپتال سوراب ءَ سرکتگ اَنت کہ اود ءَ لاش پہ پجار کنگ ءِ ھاتر ءَ ایر کنگ بوتگ اَنت۔

پولیس ءِ رد ءَ اے وئیل ءِ گیشیں پٹ ءُ پول برجاہ اِنت ءُ ھمے وھد ءَ دوئیں مردمانی پجار کنگ ءِ کوشست کنگ بوھگ ءَ اِنت۔

پولیس ءَ چہ لس مھلوک ءَ دزبندی کتگ کہ اگاں کسے اے دوئیں مردماں زانت یا پجار کنت گڑا پجار ءِ کمک ءِ ھاتر ءَ سول ہسپتال سوراب ءَ گوں رھوت بہ کنت۔

کیچ ءِ تھسیل بلیدہ ءَ زیردان ءَ ناشناسیں سلاہ بندیں مردماں تیرگواری کتگ ءُ یک مردمےکشتگ۔

بیران بوتگیں مردم ءِ پجار حامد ء سید ءِ نام ءَ بوتگ کہ گشگ بیت کہ آ دمگی سرکار ءِ گلے ءِ باسک انت۔

دمگی وسیلگ ءِ رد ءَ بیران بوتگیں مردم ءِ دمگ ءَ دُزی، ناشری ءُ دگہ جرم ءُ ھمے رنگ ءَ ٹارگٹ کیلنگ ءِ تہ ءَ ھم ھوار بوھگ ءِ گْوشگ بیت۔

خاران ءِ ڈپٹی کمشنر منیر سومرو آدینگ ءِ روچ ءَ یلہ کنگ بوتگ۔

بلوچستان مھکمہ داخلہ ءِ چیردست ءِ میڈیا بابر یوسفزئی ءَ وتی بیان ءَ ڈپٹی کمشنر ءِ سلامتی ءِ یل بوگ ءِ ھال راست کتگ ءُ گشتگ کہ آئی ءِ سلامتی ءَ یل بوگ وشی یے۔

خاران ڈپٹی کمشنر 20 ستمبر ءَ چہ شال ءَ خاران ءِ راہ ءَ روگ ءِ وھد ءَ زلہ خاران ءِ دمگ برشونکی ءَ ناشناسیں سلاہ بندیں مردماں آوار جتگ۔

آئی ءِ آوار جنگ ءِ وھد ءَ سرکاری کارندھاں گْوشتگ اَت کہ ڈپٹی کمشنر نجی گاڑی ءَ سفر کنگ ءَ بیتگ ءُ آئی ءِ ھمراھی ءَ دگہ سئے مردم ھم بوتگ اَنت کہ آ آوار جنگ بوتگ اَنت۔

آوار جنگ ءِ سیمی روچ ءَ سلاہ بندیں مردماں ڈپٹی کمشنر ءِ ڈرائیور ءُ سیکورٹی گارڈ یلہ داتگ انت۔

آئی ءِ آوار جنگ ءِ روچ ءَ بلوچستان ءِ کابینہ ءِ باسک ءَ رسانکدر ءَ گْوشتگ اَت کہ ڈپٹی کمشنر ءِ پچ گرگ ءِ ھاترا دگہ وسیلگانی ھوار قبائلی سروک کارمرز کنگ بوھگ ءَ اِنت۔