TBP Balochi

بلوچستان ءِ جتاثتائیں دمگاں پاکستانی فورسز ءِ کاروان ءُ واپاری گاڑیانی نشانگ جوڑ کنگ ءِ وئیل ءِ ھال دیم ءَ اتکگ انت ۔

آواران ءِ دمگ گشکور ءَ گوستگیں روچ ءَ پاکستانی لشکر ءِ کارندہ موٹر سائیکل ءِ سر ءَ سفر کنگ ءِ وھد ءَ نشانگ جوڑ کنگ بیتگ اَنت۔ دمگی مردمانی رد ءَ اے تراک ءَ دو کارندہ بیران بوتگ اَنت بلے سرکاری کارندہانی نیمگ ءَ چہ بیران بوتگیں مردمانی سرکاری ھال ءُ اھوال دیم ءَ نیتکگ انت۔

دومی نیمگ ءَ گوستگیں شپ ءِ 5بج ءِ نزیک ءَ سوراب گدار ءَ گرڈ اسٹیشن ءِ نزیک ءَ پاکستانی اُرد ءِ سئے گاڑیانی کاروان ءَ سلاہ بندیں مردماں نشانگ جوڑ کتگ۔ بنداتی ھالانی رد ءَ اُرش ءِ آسر ءَ لشکر ءَ تاوان رس اتگ بلے انگت ءَ تاوان ءِ پدر کنگ نہ بوتگ۔

تربت ءِ دمگ ناصر آباد ءَ تھانہ ءِ دیم ءَ سلاہ بندیں مردماں دو ٹریلر گاڑیانی سر ءَ تیر گواری کتگ ءُ سوتکگ انت ۔ دمگی مردمانی رد ءَ وئیل ءِ وھد ءَ سیمنٹ ءَ لوڑیں دو گاڑی ھم برگ بیتگ انت۔ دمگی مردماں گْوشتگ کہ ھمے دمگ ءَ تیر گواری ءَ چہ دو بوزر یا ٹینکر گاڑیانی ٹائر تاوان بوتگ اَنت۔

بنشون ءِ رد ءَ ایڈیشنل سیشن جج پنجگور اسداللہ رئیسانی چار شمبے ءِ سھب ءَ وتی پرائیویٹ گاڑی ءَ گوں گن مین ءَ چہ شال ءَ پنجگور ءَ شتگ بلے آ پنجگور ءَ سر نہ بوتگ۔

بنشون ءِ گشگ انت کہ گڈی رند ءَ آئی ءَ گوں کلگلی ءَ موبائل فون ءَ رھوتے کتگ بوتگ کہ ایشی ءَ پد آئی ءَ گوں رھوت کنگ نہ بوتگ۔

اے وئیل ءَ پد آئی ءِ کھول ءُ ھمگرنچیں مردماں ترس ھست ءُ آئی ءِ شوھازگ برجاہ اِنت ءُ آئی ءِ بابت ءَ گیشتریں سرپدی ءِ ودار اِنت۔

زانگ بہ بیت کہ بلوچستان ءَ یکشل ءَ سرکاری کارندہانی آوار جنگ ءُ بیگواہ کنگ ءِ ھال دیم ءَ آیگ ءَ اَنت ۔ گوست ءَ ڈپٹی کمشنر خاران ءُ کلات ءُ منگچر ءِ ایس ایچ او ہم بیگواہ بوتگ انت بلے رند ءَ یل کنگ بوتگ انت ءُ وتی گساں سر بوتگ انت۔

بلوچستان ءِ تیابدپی شہر گوادر ءَ موبائل فون ءِ دکان ءِ سر ءَ دزبمب اُرش ءَ سئے مردم ٹپیگ بوتگ انت۔

ٹپیانی تہ ءَ شوکت، آئی ءِ بچ باقر ءُ ظفر ھوار اَنت۔

بنداتی ھالانی رد ءَ ٹپیگ کشمور ءِ مردم گشگ بیتگ انت۔ وئیل ءَ پد ٹپیگ پہ درمان کنگ ءَ نادراھجاہ ءَ سر کنگ بوتگ اَنت۔

تراک ءَ پد فورسز ءَ جاہ انگیر کتگ ءُ پٹ ءُ پول بندات کنگ بوتگ۔

بلوچستان ءِ بنجاھی شھر شال ءَ چہ 27 کلومیٹر دور ڈغاری ءِ دمگ سبی روڈ ءَ پاکستان ءِ فوج ءِ ٹرک ءُ ایندگہ گاڑیانی کاروان سلاہ بندیں اُرش ءَ نشانگ جوڑ کنگ بوتگ انت۔

دمگی بنشون ءِ رد ءَ گوستگیں روچ ءَ سلاہ بندیں مردماں فوجی کاروان نشانگ جوڑ کتگ۔ بلے اے اُرش ءِ بابت ءَ انگت ءَ فوجی واکدارانی نیمگ ءَ ھچ وڑیں بیان دیم ءَ نہ اتکگ انت۔

زانگ بہ بیت دمگ ءَ بلوچ آجوئی ءِ سلاہ بندیں گل بلوچ لبریشن آرمی ءَ گوستگیں وھداں پاکستانی لشکر ءِ سر ءَ اُرشانی زمہ واری زرتگ انت۔ بلے انگت ءَ ھچ سلاہ بندیں گل ءَ اے اُرش ءِ زمہ واری نہ زرتگ۔

زانگ بہ بیت یکشل ءَ بلوچستان ءَ بلوچ آجوئی ءِ سلاہ بندیں گلانی نیمگ ءَ پاکستانی لشکر ءُ سرکاری کارجاھانی سر ءَ اُرش ءُ بندش ءِ ھال دیم ءَ پیداک اَنت۔

گوستگیں روچاں پنجگور ءِ دمگ گوارگو فتح علی بازار ءَ زھگ گوازی کنگ ءَ بیتگ انت کہ آہاں یک شکی ئیں چیزے درچک ءِ سر ءَ دیستگ۔ وھدے کہ چُک گوں آئی ءَ گوازی کنگ ءَ بیتگ انت، اناگت ءَ ترک اتگ کہ ایشی ءِ آسر ءَ دو چُک بیران ءُ سئے ٹپی بوتگ اَنت۔

بیران بوتگیں زھگانی تہ ءَ انور ءِ زھگ 9 سالی ارمان ءُ سالم ءِ زھگ 10 سالی ئیں امل ھوار اَنت۔

تراک ءِ آسر ءَ 9 سالی شاہد، 7 سالی زاہد ءُ 12 سالی نور اللہ ٹپی بوتگ انت۔

بنداتی ءَ اے زانگ نہ بوتگ کہ چُکاں کجام وڑیں مواد رس اتگ۔ اے وئیل ءِ بابت ءَ دمگی پولیس ھم بے توار بوتگ۔

بلے یک چیریں ھالے ءِ رد ءَ اے وئیل ءَ پد پاکستانی لشکر ءَ دمگی اھوالکاراں چہ لوٹ کتگ کہ آ اے وئیل ءَ را دستی بم یا تراکناکیں شوروانی تراک ءِ رنگ ءَ پیش بہ دار انت۔ اھوال ءِ رد ءَ اے وئیل پاکستانی لشکر ءِ نیمگ ءَ کواڈ کاپٹر ءِ تہ ءَ ایر کنگ بوتگیں تراکناکانی تراک ءِ سبب ءَ بوتگ۔

زانگ بہ بیت کہ پیسر ءَ ھم پاکستانی لشکر ءِ نیمگ ءَ چہ دمگی آبادی ءِ سر ءَ ڈرون اُرش ءَ زھگ ءُ دگہ لس مردم بیران ءُ ٹپیگ بوتگ اَنت۔

بلوچستان ءِ چاگی ءِ ھند پوستی موکنٹوک زرد کوہ ءَ مائنز کمپنی ءِ کار ءِ ھاترا جوڑ کتگیں کوٹیانی سر ءَ ناشناسیں ڈرون ءِ اُرش ءِ آسر ءَ بازیں کوٹی سرجم ءَ تباہ بوتگ اَنت ءُ کمپنی ءِ ارزشت داریں سامان ھم تاوان بوتگ اَنت۔

مائنز کمپنی ءِ واھند سمیع اللہ نوتیزئی ءِ رد ءَ پوستی موکنٹوک زرد کوہ ءَ آئی ءِ مائنزکمپنی ءِ مزدورانی واستا جوڑ کتگیں کمرہ گوستگیں روچ ءَ گمانی ڈرون اُرش ءِ نشانگ جوڑ کنگ بوتگ اَنت کہ ایشی ءِ آسر ءَ بازیں کمرہ سرجم ءَ تباہ بوتگ اَنت ءُ اود ءَ ساماناں ھم مزنیں تاوانے رس اتگ۔

واھند ملک سمیع اللہ نوتیزئی ءِ رد ءَ تراک سک باز بوتگ کہ ایشی ءِ سبب ءَ کوٹیانی تہ ءَ سامان ءِ ٹکرے بازیں راہ ءَ کپتگ۔

آئی ءَ گْوشتگ کہ دمگ ءِ نا شریں امن ءُ ایمنی ءِ جاور ھال ءِ سبب ءَ نزیک ءَ پنچ ماہ پیسر مائنز بند کنگ بوتگ اَنت بلے کمپنی ءِ سامان ءُ دگہ المی چیز جاہ ءَ ھست بوتگ اَنت کہ گمانی اُرش ءِ آسر ءَ تباہ بوتگ اَنت۔

مائنز کمپنی ءِ واھند ملک سمیع اللہ نوتیزائی ءَ لوٹ کتگ کہ آئی جی ایف سی (روکپت) ءُُمزنیں واکداراں اے وئیل ءِ زوتیں نوٹس بہ زور انت ءُ کانانی کمرھانی سر ءَ گمانی ڈرون اُرش ءِ دروشم ءِ پجارینگ ءِ ھاترا تچکیں پٹ ءُ پول بہ کن انت ءُ ھمے وھد ءَ اے وئیل ءِ اسلیں راستی ھم پدر بہ کن انت۔

اے درگت ءَ ایس پی چاگی ءَ گشتگ کہ آئی ءَ را ڈرون ءِ گمانی اُرش ءِ بابت ءَ جتا جتائیں وسیلگاں چہ ھم سرپدی رس اتگ بلے پٹ ءُ پول برجاہ اِنت۔ آئی ءِ گشگ ءِ رد ءَ پٹ ءُ پول سرجم بوھگ ءَ پد سرجمیں راستی دیم ءَ کیت آ لس مھلوک ءِ دیم ءَ آرگ بنت۔

کلات ءِ دمگ منگچر ءَ تھانہ ءِ منگچر ءِ ایس ایچ او علی اصغر نیچاری ءُ آئی ءِ گن مین سلمان ءِ بیگواھی ءِ ھال انت کہ ایشی ءَ پد گمان ھست کہ اے دوئیں کارندہ گمانی آوار جنگ بوتگ اَنت۔

بنشون ءِ رد ءَ ایس ایچ او علی اصغر نیچاری ءَ گوں وتی سلاہ بندیں سلمان ءَ نجی گاڑی ءَ تھانہ ءَ چہ ھمک روچی ءِ رنگ ءَ گشت ءِ ھاترا درکپتگ انت بلے دوئیں کارندہ گشت ءَ پد تھانہ ءَ واتر نہ بوتگ انت۔

پولیس ءِ بنشون ءِ گشگ انت کہ اے وئیل ءِ درستیں تک ءُ پہناتانی سرا چار ءُ تپاسی کنگ بوھگ ءَ انت بلے بنداتی وھد ءَ اے ترس ھست انت کہ اے دوئیں کارندہ آوار جنگ بوتگ انت۔

بختیار آباد ءِ دمگ بالا ناڑی پولیس تھانہ ءِ سیمسر ءَ گوستگیں شپ ءَ ریل ءِ ٹریک ءِ سر ءَ تراک بوتگ کہ ایشی ءِ آسر ءَ ریل ءِ ٹریک ءِ نزیک ءَ 6 فٹ ءِ بھر ءَ را تاوان بوتگ۔

پولیس ءِ ردا تراک ریل ءِ پٹری ءِ سر ءَ ایر کنگ بوتگیں تراک ءِ سبب ءَ بوتگ کہ ایشی ءَ چہ پٹری ءَ را تاوان رس اتگ۔

اے وئیل ءَ تاں انوگ ءَ ھچ وڑیں جانی تاوان ءِ ھال سر نہ بیتگ انت۔ انگت ءَ اے وئیل ءِ زمہ واری کس ءَ نہ زرتگ۔

بلوچستان ءِ دمگ چاگی ، کلات ءُ سبی ءَ پاکستانی پوج ءِ سر ءَ اُرش ءُ ناکہ بندی، ریل ٹریک تراک ءَ چہ نشانگ کنگ بیتگ-

گیشیں ھالانی رِد ءَ کلات ءِ دمگ منگچر ءَ سورو ءِ ھند سر ءَ مروچی سنگر گپتگیں سلاہ بندیں مردماں پاکستانی پوج ءِ بازیں کسان ءُ مزنیں گاڑیانی کاروان اُرش ءِ نشانگ کتگ-

دمگی اِھوالکار ءِ رِد ءَ اُرش ءِ نشانگ ءَ آیگ ءَ پوج ءِ یک گاڑی یے چہ پُھل سر ءَ کپتگ ، اُرش ءَ پوج ءِ بازیں کارندھے مرتگ ءُ ٹپی ءِ ھال اِنت-

ھمے وڑ چاگی ءِ دمگ یکمچ ءَ سلاہ بندیں مردم مزنیں کچے ءَ پُترتگ اَنت کہ آیانی تہ ءَ زالبول ھم ھوار اَنت-

دمگی اِھوالکار ءِ رِد ءَ سلاہ بندیں مردماں شال ،تفتان شھدگ سر ءَ ناکہ بندی کتگ – وھدے کہ اے میان ءَ سلاہ بندیں مردماں نادرا کارگس سر ءَ اُرش کتگ ءُ آ مانداشتگ- بلے ھچ وڑیں جانی تاوان ھال نیست-

دومی نیمگ ءَ سبی ءِ ھند لم جی ءَ ریل ٹریک دو جتاجتائیں جاھاں بمب تراک ءَ چہ تباہ کتگ اَنت-

تنی وھدے وئیلانی زمہ واری انگت ھچ گل ءَ نہ زرتگ-

چہ ھاران، کیچ ءُ مستونگ ءَ سے مردم زورانسری بیگواہ وھدے کہ چہ شال ءَ یک مردمے یل کنگ بیتگ-

گیشیں ھالانی رِد ءَ ھاران ءِ جھمنندیں سی ءُ ھپت سالی ئیں ڈاکٹر عبدالمالک ء حاجی نور احمد دو اکتوبر ءِ شپ ءَ چہ ھاران ءَ ایف سی ءَ آوار جتگ ءُ بیگواہ کتگ-

کیچ ءِ دمگ شاپک ءِ جھمنندیں بیست ءُ ھپت سالی ئیں اسد بلوچ ء کھدا دل مراد ھژدہ اگست ءِ شپ ءَ آبسر تربت ءَ آئی ءِ لوگ ءَ چہ ڈیتھ اسکواڈ ءَ آوار جتگ ءُ بیگواہ کتگ-

ھمے وڑ مستونگ ءِ جھمنندیں ھژدہ سالی ئیں ممتاز بلوچ ء سلطان محمد پنچ جون ءَ چہ مستونگ ءَ ایف سی ءُ ایم آئی ءَ آوار جتگ ءُ بیگواہ کتگ-

دومی نیمگ ءَ شال سریاب ءِ جھمنندیں ملک علی نواز بلوچ ء غلام جان، کہ دو اکتوبر ءَ زورانسری بیگواہ کتگ، سے اکتوبر ءَ شال ءَ یل کنگ بیتگ-

زانگ بہ بیت بلوچستان ءَ زورانسری آوار جنیانی تہ ءَ گیشتریں کیس ریاستی زور ءُ تُرس ءِ سوب ءَ پہ وھد رپورٹ کنگ نہ بنت، ھمے ھاتر ءَ اے وڑیں وئیلانی ھال دیم ءَ آیگ ءَ دیر کن اَنت-