TBP Balochi

بلوچ لبریشن آرمی ءِ رد ءَ بیست ستمبر ءَ یک میڑے ءِ وھد ءَ بی ایل اے ءِ سرمجار ھارون رشید بزدار شھید بیتگ ۔

بی ایل اے ءِ رد ءَ کمانڈر ھارون رشید بزدار پنام ءِ مبارک ( واھگ بزدار ) گ عبدالرشید بزدار جھمنند چنالہ ، کوہ سلیمان ، ڈیرہ گازی خان بیتگ ، آئی ءَ بی ایس سائیکالوجی، انٹرنیشنل اسلامک یونیورسٹی اسلام آباد ءَ ، آ سے سال ءَ بلوچ اسٹوڈنٹس آرگنائزیشن (آزاد) ءُ سے سال ءَ بلوچ نیشنل مومنٹ ءَ بیتگ، آئی ءَ سال 2022 ءَ بی ایل اے ءِ شھری کوریلا ءَبھر زرتگ ءُ اکتوبر 2023 ءَ بولان ، کاھان ءُ چمالنگ ءِ کوھاں شتگ بیتگ ، آ گشتی کمانڈ بیتگ ءُ 20 ستمبر 2026 لھڑی سبی ءَ میڑ ءِ وھد ءَ شھید بیتگ ۔

بی ایل اے ءِ رد ءَ کمانڈر ہارون راشد بزدار پنام ءِ واہگ بزدار (مبارک) بلوچ لبرشن آرمی ءِ یک کربان بیوک ، دلیر، زانتکار ءُ گشت ءِ کمانڈر ءُ بلوچ راجی تھریک ءِ یک دیریگیں ہمراہ یے بوتگ کہ آئی ءَ چہ یک دراجیں سیاسی ءُ فوجی زند ءُ جد ءُ جھد ءَ پد شھیدی ءِ مزنیں بستارے رس اِتگ ، 20 ستمبر ءَ لھڑی سبی ءِ میدان ءَ دشمن ءِ ھلاپ ءَ یک آپریشنے ءِ وھد ءَ شھید بیتگ ۔ کمانڈر ہارون بزدار ءِ سیادی گوں بلوچستان ءِ سرزمین ڈیرہ غازی خان ءَ بوتگ کہ زورگیریں پاکستان ءِ انتزامیہ رد ءَ نام وتگڑیں پنجاب ءِ بہرے جوڑ کتگ بلے آئی ءَ وتی ورنائی ءَ راجی گلامی ءِ سما بوتگ ءُ پہ راجی آجوئی ءَ سیاسی پتر ءَ پرکار بوتگ۔ انٹرنیشنل اسلامک یونیورسٹی اسلام آباد ءَ چہ ونتگیں کمانڈر ہارون بلوچ ءَ وتی نودربری زمانگ ءَ بلوچ اسٹوڈنٹس آرگنائزیشن آزات ءِ پلیٹ فارم ءَ چہ راجی آجوئی ءِ بنکی جہد بندات کتگ ءُ سئے سال ءَ نودربر سیاست ءَ پرکار بوتگ۔ پد ءَ آئی ءَ وتی سیاسی زند چہ بلوچ نیشنل موومنٹ ءِ پلیٹ فارم ءَ گوازینتگ۔ آئی ءَ ڈیرہ غازی خان ءُ کوہ سلیمان ءِ جتاجتائیں دمگاں بلوچ ورنایاں راجی آجوئی ءِ نیمگ ءَ دلگوش کنگ ءُ آہاں مازگی ءُ پکری تربیت دیگ ءَ گوستانکی کرد پیلو کتگ۔

دراجیں سیاسی جنز ءَ پد آئی ءَ 2022 ءَ بلوچ راجی آجوئی ءِ ھاترا جنگی پلیٹ فارم ءِ گچین کنگ ءَ چہ شہری گوریلا جنگول ءِ بستار ءَ وتی کار بندات کتگ اَنت۔ یک سالے ءَ آئی ءَ وتی گوریلا کار چہ شھری تک ءَ گل ءِ رہشونی ءَ برجاہ داشتگ انت، اود ءَ آئی ءَ وتی تجربگاں کمیں وھد ءِ تہ ءَ کارمرز کنان ءَ گل ءِ پروگراماں سوبمندیں رنگے ءَ سرجم کتگ۔ یک سالے شہری میدان ءَ گوازینگ ءَ پد آ گل ءِ گوشگ ءَ بولان میدان ءَ روان دیگ بوتگ کہ اود ءَ آئی ءِ یکشل ءَ اوشتگ، یکشلی ءُ جنگی ھستانک ءَ بولان جنگی میدان ءَ سرجمی ءَ پیش دارگ بوتگ انت۔ آئی ءَ وتی سیاسی ءُ شہری میدان ءِ تجربگ ءُ المی بستار ءَ جنگی میدان ءِ سر ءَ کمانڈ ءِ بستار ءَ کارمرز کتگ ءُ دژمن ءِ ھلاپ ءَ ھاسیں آپریشن ءِ بھر بوتگ۔ سیاسی زانشت ءُ سرپدی ءِ ہمراہی ءَ آئی ءَ ابرمی جنگی زانشت ہم بوتگ انت ءُ آ آپریشن ہیروپ ءِ وڑیں راجدپتری کارروائیانی تہ ءَ فرنٹ لائن کمانڈر ءِ بستار ءَ پرکار بوتگ ۔

اے زانشتانی ھیال ءَ دارگ ءَ گل ءَ آئی ءَ را گشت ءِ کمانڈ ءِ زمہ واری داتگ انت کہ آئی ءَ تاں گڈی ءَ زمہ واری ءِ سر ءَ سرجم کت ءُ گشت ءِ کمانڈر ءِ بستار ءَ آئی ءَ چمالنگ ءُ کاہان ءِ میدان ءِ سر ءَ دیم ءَ جنزینگ ، آپریشنل پلاننگ ءِ جوڑ کنگ ءُ گوریلا ملٹری لشکر ءِ ھلاپ ءَ کارانی کنگ ءَ مزنیں کردے پیلو کتگ۔ جنگی میدان ءَ پرکار بوھگ ءِ ابید آئی ءَ راجی تھریک ءِ بابت ءَ سرپدی پیداک کنگ ءِ ھاترا قلم ءِ وسیلگ ءَ وتی زمہ واری ھم پیلو کتگ انت۔ واھگ بزدار ءِ قلمی نام ءَ بازیں نبشتانک نبشتہ کتگ ءُ جتاجتائیں سرھالانی سر یَ وتی ھیال ءُ لیکہ درشان کتگ اَنت۔ شہید ہارون ءَ آجوئی ءِ مزنیں مول ءُ مراد ءِ ھاتر ءَ مزاحمت ءِ دراجیں زند گوازینتگ۔ آ بلوچ راجی ریاست ءِ دیم ءَ برگ ءِ جد ءُ جھد ءَ یک مزنیں بامرد، مزاحمت کار ءُ یک شرپداریں ءُ بستار داریں سنگتے ءِ بستار ءَ یات کنگ بیت۔

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ یک ھپتگے ءِ تہ ءَ بلوچ لبریشن آرمی ءِ سرمچاراں بلوچستان ءِ جتا جتائیں دمگاں 22 کاروائی کتگ کہ ایشی ءِ تہ ءَ زورگیریں پاکستانی لشکر، آئی ءِ کارندہ، چاریکانی نیٹ ورک ءُ فوجی کارجاہ تچک ءَ نشانگ جوڑ کتگ انت۔ اے ترندیں اُرشانی آسر ءَ زورگیریں لشکر ءِ 24 کارندہ مرتگ ءُ درزنانی کچ ءَ ٹپی بوتگ اَنت، سرمچاراں گچینی شھدگانی سر ءَ کنٹرول برجاہ داشتگ ءُ زرکاری بندش ءِ چیر ءَ دژمن ءِ رھادگ بوھگ سکا نابود بوتگ۔ ھمے وھد ءَ بی ایل اے ءِ یک بھادریں سرمچارے ھم گوں زورگیریں لشکر ءَ جنگ ءَ نمیران بیتگ۔

یکم اکتوبر ءَ سرمچاراں بُلیدہ ءِ دمگ جنتری ءَ زورگیریں پاکستانی لشکر ءِ کاروان ءِ سربستگ ءُ زبردستیں اُرش کتگ ءُ دژمن ءَ جانی ءُ مالی تاوان رس اتگ۔

جاکش ءَ گوشتگ 2 اکتوبر مستونگ ءِ دمگ گارگینا ءَ سرمچاراں زورگیریں لشکر نشانگ جوڑ کتگ ءُ ھما وھد ءَ کہ آ دمگ ءَ دیم ءَ روگ ءِ جھد ءَ بیتگ ھمے وھد ءَ کہ بازیں وھدے ءَ جنگ ءُ چوپ برجاہ بوتگ اَنت دژمن ءِ سئے کارندہ مرتگ انت ءُ بازیں ٹپیگ بوتگ اَنت۔ ھمے شپ ءَ زورگیریں لشکر ءَ کلات ءِ منگچر ءِ دمگ ءَ ھم پیادگ ءَ دیم ءَ روگ ءِ جھد کتگ کہ سرمچارانی ترندیں کارروائی ءَ چہ پد پشتکنزی ءَ لاچار بیتگ۔

ھمے روچ ءَ نوشکی ءِ قادر آباد بائی پاس ءَ بی ایل اے ءِ سرمچاراں زورگیریں پاکستانی لشکر ءِ ملٹری انٹیلی جنس ءِ یک ھاسیں کارمندے شاہ خالد کہ نوشکی ءِ قاضی آباد ءِ نندوک اِنت سلاہ بندیں اُرشے ءَ کُشتگ۔ اے چاریگ زورگیریں فوج ءِ ھاتر ءَ ھال ءِ دیگ ءُ لوگانی سر ءَ اُرش ءِ وھد ءَ فوج ءِ کمک کنگ ءَ تچگ ءَ ھوار بوتگ۔ ایشی ءَ ابید آ زالبولانی بلیک میلنگ ءُ دگہ چاگردی بدکاریانی تہ ءَ ہم ھوار بوتگ۔ اے نیٹ ورک ءَ گوں ھمگرنچیں دگہ مردم ھم پجارگ بوتگ اَنت ءُ زوت آمیدگس ءِ دیم ءَ آرگ بنت۔

جارکش ءَ گوشتگ 3اکتوبر ءَ سرمچاراں بلوچ راجی آمیدگس ءِ پیسلہ ءِ سرا ”ڈیتھ اسکواڈ“ ءِ دزگیریں کارندہ ھامد سید کشتگ کہ آ زیردان (بلیدہ) ءَ نندوک اِنت۔ ایجنٹ حامد 23 ستمبر ءَ دستگیر کنگ بوتگ؛ جست ءُ پرس ءِ وھد ءَ آئی ءَ من اتگ کہ آ گوں غفار ءِ ڈیتھ اسکواڈ ءَ ھمگرنچ اِنت۔ آئی ءَ بلیدہ، پڈک ڈن ءُ گزبوستان ءَ جنگی اُرش ءِ وھد ءَ راہ بند کنگ ءُ لشکر ءِ آسراتی دیگ ءِ من اتگ ءُ ھمے وھد ءَ آ اے دمگاں دُزی ءُ لٹ ءُ کُٹ ءِ کاراں ھم ھوار بوتگ۔ ایجنٹ حامد ءَ اے گپ ھم پدر کتگ کہ نظام ء علی نامیں ورناھے زوراکی ءَ بیگواہ کنگ بوتگ ءُ ڈیتھ اسکواڈ ءِ سروک حمید ءِ لوگ ءَ دیم دیگ بوتگ کہ چار روچ ءَ پد آئی ءِ ٹپ ءُ ٹوریں لاش دزکپتگ بوتگ۔

ھمے روچ ءَ سرمچاراں ماشکیل ءِ پتکن ءُ مت ءَ رھوتی ءِ نزام نشانگ جوڑ کتگ ءُ دو ٹاور سرجم ءَ تباہ کتگ انت۔

جارکش ءَ گوشتگ 4 اکتوبر ءَ چاگی ءَ شال ءُ تفتان ءِ تجارتی راہ ءِ سر ءَ چھتر ءَ سرمچاراں زورگیریں لشکر ءُ تجارتی گاڑیانی کاروان ءِ تہ ءَ دژمن ءِ بکتربندیں گاڑی ریموٹ کنٹرول ءِ سر ءَ آئی ای ڈی ءِ تراک ءَ نشانگ جوڑ کتگ ءُ ایشی ءِ آسر ءَ بکتربندیں گاڑی ءَ را مزنیں تاوانے رس اتگ۔ دومی نیمگ ءَ واشک ءِ دمگ آرماگائے ءَ سی پیک ءِ راہ ءَ سرمچاراں زورگیریں لشکر ءِ بس ءُ دگہ سیکورٹی گاڑیانی سربستگ ءُ اُرش کتگ کہ زورگیریں لشکر ءِ 5 کارندہ مرتگ ءُ سیزدہ ءَ چہ گیش ٹپیگ بوتگ اَنت۔

ھمے روچ ءَ مستونگ ءِ دمگ پڑنگ آباد ءِ لکپاس ءِ نزیک ءَ سرمچاراں بنداتی ءَ زورگیریں پاکستانی لشکر ءِ پوسٹ ءِ سر ءَ گوں اسنائپراں اُرش کتگ ءُ پد ءَ گوں دگہ نوکیں سلاہاں اُرش کتگ کہ ایشی ءِ آسر ءَ دو کارندہ جاہ پہ جاہ ءَ مرتک ءُ دگہ بازیں کارندہ سک ٹپیگ بوتگ اَنت۔ دومی نیمگ ءَ کلات ءِ دمگ منگچر (سورو) ءَ سرمچاراں زورگیریں اُرد ءِ بمب ڈسپوزل ٹولی ءِ سربستگ ءُ نشانگ جوڑ کتگ۔ ایشی ءَ ابید چاگی ءِ دمگ چھتر ءَ سرمچاراں یک تجارتی گاڑی یے ھم دست کپتگ ءُ دگہ گاڑی یے ءِ ٹائر تراکینتک اَنت۔

جارکش ءَ گوشتگ 5 اکتوبر ءَ پنجگور ءِ دمگ پروم (ہوکانی) ءَ سرمچاراں تراک ءُ سلاہ بندیں اُرش ءَ پاکستانی زورگیریں لشکر ءَ را مزنیں تاوانے داتگ۔ بندات ءَ یک گاڑی یے ءَ را ریموٹ کنٹرول آئی ای ڈی ءَ نشانگ جوڑ کتگ ءُ دژمن ءِ سئے کارندہ جاہ پہ جاہ ءَ بیران بوتگ ءُ دو دگہ سک ٹپیگ بوتگ اَنت ءُ وھدے کہ گیشیں لشکر اتکگ اَنت گڑا سرمچاراں سلاہ بندیں اُرش ءَ گیشتر کارندہ کشتگ ءُ دژمن ءِ نگرانی ڈرون ھم تباہ کتگ۔

ھمے وڑ ءَ کلات ءِ منگچر (سورو) ءِ دمگ ءَ سرمچاراں گوں مزنیں سلاھاں لشکر ءِ کاروان ءِ سربستگ ءُ اُرش کتگ دژمن ءِ گاڑی یے تباہ بیتگ ءُ چار کارندہ مرتگ ءُ بازیں ٹپیگ بوتگ اَنت۔ دیمترا مستونگ ءِ کردگاپ ءِ دمگ ءَ آئی ای ڈی ءِ اُرش ءَ لشکر ءِ گاڑی ءَ را تاوان رس اتگ ءُ شال ءِ دمگ ڈغاری (سبی روڈ) ءَ ھم لشکر ءِ کاروان ءِ سربستگ ءُ اُرش کتگ ءُ چہ ایشی ءَ جانی ءُ مالی تاوان اش رس اتگ ۔

جارکش ءَ گوشتگ 6 اکتوبر ءَ آواران ءِ دمگ گیشکور ءَ سرمچاراں آئی ای ڈی ءِ تراک ءَ گوں موٹر سائیکل ءِ سر ءَ سواریں فوج ءِ کاروان ءَ نشانگ جوڑ کتگ ءُ دو کارندہ جاہ پہ جاہ ءَ مرتگ انت۔

سئے شمبے ءِ شپ ءَ گوادر ءِ شھر جنت بازار ءَ لشکر ءِ کارندھانی پناہ گاہ ءِ سر ءَ دستی بمب ءِ سر ءَ اُرش کتگ ءُ سئے کارندہ ٹپیگ بوتگ اَنت۔

ھرنائی دمگ شاھرگ ءَ دزکیر کتگیں زورگیریں لشکر ءِ دو کارندہ عمران بابڑ ء خدائے داد ءُ بلال ء اسلم کہ سرمچاراں جرمانی منگ ءَ پد کشتگ انت۔ عمران ءَ من اتگ کہ آ گوستگیں دو سالاں چہ زورگیر ءِ لشکر ءِ ھاتر ءَ ھال رسانی ءُ آسراتی ءِ کار ءَ کنگ ءَ اِنت، شاہرگ ءَ فوجی زوراکی ءُ ماڑی گیس ءِ جاہ ءِ سر ءَ اُرش ءَ پد لشکر ءِ رھشونی ءُ راہ ءُ درانی پلکارگ کنگ ءَ ھم ھوار بوتگ ءُ موٹر سائیکل دُزی ءِ تہ ءَ ھم پرکار بوتگ۔

دومی چاریگ بلال ھما وھد ءَ دزگیر کنگ بوتگ کہ بی ایل اے ءِ انٹیلی جنس ونگ ءَ چیریں ھال رس اِتگ کہ آ ھمدرد ءِ دروشم ءَ پیش دارگ ءَ بی ایل اے ءِ لڑانی تہ ءَ ھوار بوھگ ءِ جھد ءَ اِنت۔ جست ءُ پرس ءِ وھد ءَ بلال ءَ من اتگ کہ آ پہ فوج ءَ کار کنگ ءَ اِنت ءُ سامان ءِ ھمراھی ءَ ٹریکنگ چپ ءِ سرمچاراں سر کنگ ءِ نا شریں کوشست ءَ اِنت۔

جارکش ءَ گوشتگ 20 ستمبر ءَ سبی ءِ دمگ لھڑی ءَ سرمچار وتی پھریزی ھمک روچی ءِ گشت ءَ بیتگ انت کہ آھانی دیما زورگیریں پاکستانی لشکر ءَ ڈک وارتگ۔ اے دیم پہ دیم بوھگ ءَ سرمچاراں ھنر ءُ رپکاں درشانی کتگ ءُ پھریزی پوزیشن گپتگ ءُ دژمن ءِ زوراکی ءِ پسو داتک کہ ایشی ءِ آسر ءَ زورگیریں لشکر ءَ مزنیں جانی تاوانانی دیمپانی کنگ کپتگ۔ اے دیم پہ دیم بوھگ ءِ وھد ءَ بلوچ لبریشن آرمی ءِ سرمچار کمانڈر ھارون رشید بزدار پنام ءِ مبارک (واھگ بزدار) ءَ دیم پہ دیم ءِ لیکہ ءِ سر ءَ جنگ کنان ءَ نمیران بیتگ۔ گل آئی ءِ بے دروریں کربانی ءَ را یات کنت ءُ وتی جزم ءَ پد ءَ پدر کنت کہ شہیدانی مشن ءَ آیانی رھبندانی رد ءَ گڈی منزل ءَ سر کنت۔

نامداریں بلوچ راجدوست سیاسی رھشون ڈاکٹر حکیم لھڑی گوں آہ ءُ زاری ءَ گلزمین ءِ میار کنگ بیتگ، ءُ آئی ءِ میت ءِ سر ءَ بلوچستان ءِ بیرک ایر کنگ بوتگ۔

نماز ءِ جنازہ ءُ کسارت کنگ ءَ نیشنل پارٹی ءِ سروک ڈاکٹر مالک بلوچ، بی این پی ءِ سروک ثنا بلوچ، ولی کاکڑ، اصغر اچکزئی، ءُ مزنیں کساسے ءَ بلوچ ءُ پشتون سیاسی ءُ چاگردی مردم، جھدکار، سیاد ءُ وارساں بھر زرتگ۔

ھمے موہ ءَ جاور گم ءِ رنگ ءَ بوتگ وھدیکہ شریکیں مردماں ڈاکٹر حکیم لھڑی ءِ سیاسی ءُ راجی ازمتاناں شگر ءُ منت درشان کتگ۔

زانگ بہ بیت ڈاکٹر حکیم لھڑی ءِ مزنیں نادراھی ءَ پد گوستگیں روچ ءَ کراچی ءَ بیران بوتگ۔ آ بلوچستان ءِ راجدوستیں سیاست ءِ تہ ءَ یک برجمیں نامے اَت ءُ بازیں دھکاں تاں بلوچ راجی جنز، راجی ھک، سیاسی وت واجھی ءُ بلوچستان ءِ سیاسی جیڑھانی بارو ءَ وتی لیکہ ءِ دیم ءَ ایر کنگ ءَ اَت۔

آ بازیں وھدے ءَ گوں بلوچ سیاسی سروک ءُ جھدکاراں ھمگرنچ بوتگ ءُ بلوچستان ءِ سیاسی راجدپتر ءِ جتائیں دور ءُ زمانگ ءِ ھاسیں واکھانی چمّانی شاھد ءُ بھر زوروک بوتگ۔

ڈاکٹر حکیم لھڑی بلوچ راجدوست رھشون سردار عطا اللہ مینگل ءِ نزیکیں سیاسی ھمراھاں چہ یکے زانگ بوتگ۔ آئی ءَ گوں بلوچستان ءِ سیاست ءِ ھما دوراں ھمگرنچ بوتگ کہ راجدوستیں سیاست یک ھاسیں سیاسی کوت ءِ دروشم ءَ دیم ءَ اتکگ۔

آئی ءَ جتاجتائیں موھاں بلوچستان ءِ سیاسی تاریک، بلوچ راجی زرمبش ءُ گوستگیں سیاسی جنزانی بارو ءَ وتی تجربگ ءُ ھیال ءُ لیکہ درشان کت انت۔

ڈاکٹر حکیم لھڑی ءَ وتی سیاسی زند ءِ تہ ءَ بلوچستان ءِ جتاجتائیں سیاسی جاور ءُ واکھات گوں نزیکی ءَ دیستگ انت۔ ون یونٹ ءِ پُروشگ ءَ پد بلوچستان ءِ سیاسی جاور، 1970 ءِ دھک ءِ نیشنلسٹ سیاست، بلوچ رھشونانی میان ءَ سیاسی اکتلاپ، ءُ رند ءِ دوراں بلوچستان ءَ ودی بوتگیں جاورانی بابت ءَ آئی ءِ داتگیں گپ اھم لیکگ بوتگ اَنت۔

چہ شال، ھُزدار ءُ کراچی ءَ سر بیتگیں ھالانی رِد ءَ دو مردم زورانسری آوار جنی ءِ نشانگ بوتگ اَنت وھدے چہ کراچی ءَ یک مردمے یل کنگ بیتگ-

ھُزدار ءِ دمگ باغبانہ ءِ جھمنندیں شست ءُ شش سالی ئیں قادر بخش ء محمد رمضان کہ شش ستمبر 2026 ءِ شپ ساھت نُھ ءَ چہ آر سی ڈی دگ، ھُزدار ءَ پاکستانی پوج ءَ آوار جتگ ءُ بیگواہ کتگ-

وھدے کہ شال ءِ دمگ کلی نیو مسلم آباد ءِ جھمنند نوزدہ سالی ئیں نودربر زوھیب گل بلوچ ء گل میر یک جنوری 2026 ءِ شپ ساھت یک ءَ چہ لوگ ءَ بیگواہ کنگ بیتگ-

دومی نیمگ ءَ شھروز قیوم ء عبدالقیوم، جھمنند ملیر، کراچی کہ سی ءُ یک مارچ 2026 ءَ چہ بیگواہ بیتگ، ھپت اکتوبر 2026 ءَ چہ ڈسٹرکٹ جیل ملیر، کراچی ءَ یل بیت-

زانگ بہ بیت کہ بلوچستان ءَ زورانسری آوار جنی ءِ کیس گیشتر ریاستی زور ءُ تُرس سوب ءَ پہ وھد نکش نہ بنت-

چیئرمین ، منی راھشون

نبشتہ کار :سرفراز ستار

دی بلوچستان پوسٹ

اے زمین ءِ آجوئی جنگ ءَ مئے انچیں سر چہ ما پچ گپتگ اَنت کہ آھانی کنڈ ءِ پُر کنگ بگندئے ھرکسی وس ءُ واک ءَ مہ بیت۔ چیئرمین ساچان ھما سرانی لڑ ءَ ھوار اِنت کہ آ توکل، ھمت، زانشت ءَ چہ سریچ بوتگ اَنت ءُ پہ مادریں ڈیھ ءَ ندر بوتگ اَنت۔ چیئرمین ھما سر اَت کہ آئی ءِ کردار ءِ گیشینگ ءَ من ءَ لبز دست نہ دنت۔

یارر! تو انچیں کردے ءِ واھندئے کہ منی وڑیں نابودے تئی بُرز ءُ بلندیں کرد ءِ ستاہ ءَ ھم کُت نہ کنت۔

اے منی زندگی ءِ مستریں وشبھتی بوتگ کہ من تئی ساھگ ءَ رُستگ ءُ چہ ترا باز دربُرتگ یاررر ، سنگتی ، مھروانی ، ھمراھداری ، برداشت ، جنگ ، ھوسلہ ، امید ، مُکلسی ءُ ایمانداری ۔

تو یارر پہ من کاملیں استادے بوتگ ئے۔من ءَ یات اِنت وھدے کہ من تو ڈیک وارت تاں ما مزن شاھدربرجاہ ءِ کیفیٹیریا ءَ کونایے ءَ نِشتگ اِتیں ھم دیوان اِتیں، اے مئے اولی دیوان اَت۔ من نوک شھر ءَ اتکگ اِتاں پہ وانگ ءَ ءُ منی وشبھتی ھمیش اَت کہ من ھمے شاھدربرجاہ ءَ اتکگ اِتاں کہ اودا تئی وڑیں اُستادے ھست اَت کہ مئے وڑیں نابودے ءِ زورگ ءُ سر ءُ سوج کنگ ءَ تو شپ ءُ روچ نہ چار اِت مُدام تچ ءُ تاگ کنگ ءَ اِت ئے۔ پہ بلوچ ءِ آجوئی جُھد ءَ مُدام ورناھاں یکجاہ کنگ، آھانی تربیت کنگ ءَ تو دم نہ بُرت۔من ھم ھمے لڑ ءَ ھوار اِتاں کہ من ءَ تئی دیوان نسیب ءَ بوت اَنت ءُ منی مستریں وشبھتی ھمیش اَت کہ من ءَ تئی نزدیکی نسیب بوت ءُ من تئی روم میٹ بوتاں، وھد گْوزان بوت ءُ مئے سنگتی گیش بوان بوت مئے دیوان گیش بوت اَنت، من ھمے راہ ءِ مُساپر بوتاں کہ تو ھمے راہ ءَ سپر کنگ ءَ اِت ئے۔

ھردے کہ من ترا دیست تاں سما کُت یاررر اے چوُنیں انسانے، چنچک مُھکم اِنت، چنچو کار کنگ ءَ اِنت۔ھردے کہ بلوچ ورنایے چہ بلوچستان ءَ یا چہ پاکستان ءِ کُجام کُنڈ ءَ آوار جنگ ءُ گار ءُ بیگواہ کنگ بوت تاں من چیئرمین تچ ءُ تاگ ءَ دیست، چیئرمین اَت کہ ورناھاں یکجاہ کنگ ءَ اَت، چیئرمین اَت کہ پریس کلبانی دیم ءَ اَت کُلیں بلوچ ورنایے گُوں وت یکجاہ کُتگ اِت اَنت ، چیئرمین اَت کہ نارہ جنگ ءَ اَت ، چیئرمین اَت کہ گُشتانک دیگ ءَ اَت ، چیئرمین اَت کہ تربیت کنگ ءَ اَت ، چیئرمین اَت کہ راج ءَ باسما کنگ ءَ اَت کہ پادا اِت جُھد کن اِت پہ راج ءَ پہ بلوچ ءِ وشھالیں باندات ءَ کہ گُلامی مارا ولگج کنت، مئے ھستانک ءَ گار کنت ، پہ ما ھچ پشت نہ کپ اِیت اگاں ما مرچی پاد نیتکیں ءُ جُھد نہ کُت اے گُلامی مئے مجگاں جاگہ کنت ءُ ما چرے اِلّت ءَ رک اِت نہ کن ایں۔

چیئرمین ءَ من ءَ ھوار باریں چنچک ورنا ھمے لڑ ءَ ھوار کُتگ اَت کہ آ جُھد کنگ ءَ اِت اَنت، تچ ءُ تاگ ءَ اِت اَنت۔ وھدے کہ چیئرمین ءَ دیواناں یا ھاسٹل ءِ کوٹی ءَ نشت ءُ گوں ما ھم دیوان بوت گڑا من تھنا چیئرمین گُوش داشت، چیئرمین ءِ زبان ءَ مُدام من بلوچ ءِ بزگی ءُ گلامی ءَ ھوار بلوچ جنگ ، جھدکار ، کوہ ءَ نشتگیں سنگتانی مُھکمی، تکلیپی ءُ شھید بوتگیں سنگتانی ستا اِش کُت اَنت ۔

من ءَ یاد اِنت وھدے چیئرمین دیم پہ کوہ ءَ در کپگ ءَ اَت، دسمبر ءِ ماہ اَت، اسلام آباد سک سارت اَت، گار ءُ بیگواھیں بلوچ پُسگانی پیملی اسلامآباد پریس کلب ءِ دیم ءَ زھرشانی ءَ نِشتگ اِت اَنت ءُ من گوں چیئرمین ءَ ھوار مُدام ھمے درنا ءِ سر ءَ اِتیں۔ برے بینرے ٹھینگ ءَ اِتیں، برے نِشتگ ءُ گوشدارگ ءَ اِتیں ھمے مات کہ مُدام گریوگ ءَ اِت اَنت، چیئرمین ءَ وھدے اے ماتانی ھِیسکگ دیست اَنت تاں چیئرمین جیڑگے ءَ کپت ، چیئرمین سرجم ءَ گار اَت ھیالانی تہ ءَ ءُ ھترناکیں ھاموشی یے ءَ جاہ جتگ اَت۔

ما وھدے شپ ءَ زھرشانی ءِ سر ءَ آسے روک کُت ءُ نشتیں تاں آس ءِ چپ ءُ چاگرد ءَ ورناھاں انگیر کُتگ اَت ءُ چیئرمین ءَ گوشدارگ ءَ اِت اَنت، چیئرمین ءَ وتی ھاموشی پروشتگ اَت، چیئرمین اَت کہ جنگ ءِ سر ءَ گپ کنگ ءَ اَت ءُ من ءَ ھوار سک باز ورناہ چیئرمین ءَ گوشدارگ ءَ اِت اَنت۔ بلے چیئرمین ءِ گپ ھشکیں گپ نہ اِت اَنت ، چیئرمین ءَ وتی گپ املی دُروشمے دات اَنت۔ چیئرمین اَت کہ ھمے دسمبر ءِ ماہ ءَ دیم پہ کوہ ءَ درکپتگ اَت ، چیئرمین اَت کہ جنگ کنگ ءَ اَت ، چیئرمین اَت کہ پند جنگ ءَ اَت ، جنگ ءَ اَت کہ نوکیں جنگی رپک ءُ ھُنر سازگ ءَ اَت ، چیئرمین اَت کہ چو کوہ ءِ البُرز ءَ مُھکم اَت ، چیئرمین مُدامی ھال ءَ اَت جنگ ءَ مھلوک ءَ سر کنگ ءَ اَت ، ورناھان جنگ ءَ ھوار بُوگ ءِ سکین ءَ دیگ ءَ اَت، چیئرمین اَت کہ ورناھاں جنگ ءَ ھوار کنگ ءَ اَت۔
چیئرمین اَت کہ دمبرگ ءِ نام ئِے نہ زانت۔چیئرمین وھدے پہ کوہ ءَ در کپت انچش سما بوت کہ سرجمیں اسلام آباد ورگ ءَ اتک ، من اِتاں کہ بے تاھیر اِتاں ، ھردے کہ شھیدیں کمبُرو من ڈیک دات تاں ما نِشتیں ءُ مئے باوستاں تھنا چیئرمین اَت کہ کساس ۲ ماہ ئِے سرجم بوتگ اَت کہ دیم پہ کوہ ءَ در کپتگ اَت ءُ پد ءَ نیٹورک ءَ نہ اَت، ھما اَت گوما چیئرمین ءِ ھال نہ بوتگ اَت۔ مارا گیش ھمے گپ ءَ بے تاھیر کُتگ اَت کہ چیئرمین وھدے درکپگ ءَ اَت گُوشت ئِے سرپو وھدے کہ سر بوتاں تاں الم گوُں تو ھال کناں بلے چیئرمین اَت کہ ھال کنگ ءَ نہ اِت۔ چیئرمین دست گٹ اَت گُوں وتی کاراں چیئرمین ءَ نیٹورک ءَ آیگ ءَ موہ رسگ ءَ نہ اَت ءُ من ءَ چیئرمین ءِ یک میسجے ءِ انتزار اَت کہ چیئرمین من ءَ ھالے کنت ءُ گوش اِیت کہ یار سرپو من سربوتگاں سنگتانی گور ءَ ، من سپر ءَ آں ، من گُوں ھبیسیں ریاست ءَ دیم پہ دیم آں۔ بلے آھر منی ودار سرجم بوت ءُ 2 ماہ ءُ 17 روچ ءَ پد چیئرمین ءَ من ءَ ھال کُت، ما دُنیا ءُ جھان ءِ گپ کُت اَنت، چیئرمین ءِ گوما منا سک باز گپ ھست اَت بلے چیئرمین اَت کہ سپر ءَ اَت مئے باوست آسرے ءَ سر نہ بوت ءُ چیئرمین چہ نیٹورک ءَ درکپت کہ چیئرمین ءَ سپرے ءَ روگی اَت ءُ من اِتاں کہ نشتگ اِتاں بس ھمے ودار ءَ کہ من کدی گوُں چیئرمین ءَ ھم سپر بِباں ءُ اے جھد ءِ پِڑ ءَ ما ھوار سپر ءَ بہ بئیں، یکیں سنگر ءَ جنگ کنگ ءَ بہ بئیں، چیئرمین ءَ اے بَری من ءَ رُکست کُت ءُ شُت بلے گڈی میسج کہ چیئرمین ءَ ایر کُت۔ آئی ءِ گڈی میسج اِش اَت کہ ( سرپو اشتاپ مہ کن یارر من پد ءَ نیٹورک ءَ کایاں گُڑا تپسیلی ھالے کن ایں ، اواریں کُرباناں )۔ گوں ھمے میسج ءَ چیئرمین چہ لین ءَ در کپت۔

من مُدام چیئرمین ءِ میسج ءِ انتزار ءَ اِتاں ، ھردے شھید کمبرو ءَ گوما ڈیک وارت تاں منی جُست ھمیش اَت کہ یار چیئرمین ءِ ھالاں دے نہ یتکگ نیٹورک ءَ۔ ما دوئیں ھمے انتزار ءَ اِتیں کہ اے بری چیئرمین ءِ گوما ھال بہ بیت گُڑا ما الم در کپیں دیم پہ کوہ ءَ گوں چیئرمین ءَ ھمسپر باں۔چیئرمین ءَ 6 ماہ بوتگ اَت کہ کوہ ءَ اَت جنگ ءَ اَت ءُ من نوکی دیم پہ کوہ ءَ در کپگ ءَ اِتاں گوں ھمراہ ءِ شھید کمبرو ءَ، من ءَ یاد اِنت وھدے کہ ما اوتاگ ءَ سر بوتیں تاں کساس ۲۵ سنگت ھست اَت اوتاھ ءَ بلے چیئرمین اود ءَ نہ اَت، چیئرمین سپر ءَ اَت ،وھد گوازان اَت ما ھم ھمے راہ ءَ جُنزگ ءَ اِتیں، ما ھم سپر جنگ ءَ اِتیں، بلے چیئرمین اَت کہ ڈیک ورگ ءَ نہ اَت، من ءَ کوہ ءَ سالے سرجم بوت گُوں سنگتانی ھمراھی ءَ ھمے پند ءُ سپر ءَ گوُں سنگتاں ، سنگت کُل ھما وڑ اِت اَنت کہ چیئرمین ءَ مُدام گُشتگ اَت، مھروانی ءُ سنگتی ءَ چہ سر ریچیں ھمراہ اِت اَنت۔ یک سال ءُ ماھے ءَ پد من چیئرمین ءَ گوں زامران ءَ ڈیک وارت۔زامران ءَ سنگت بازیں کساسے ءَ یکجاہ اِت اَنت من ءُ چیئرمین ھم ھمد ءَ اِتیں۔من وھدے چیئرمین دیست تاں چیئرمین ھما چیئرمین اِنت کُلیں سنگتاں گوں انچش یکجاہ اِنت ، چیئرمین اِنت کہ چیزاں ترتیب دیگ ءَ اِنت سنگتاں گیشینگ ءَ اِنت ، چیئرمین اِنت کہ سنگتانی نیام ءَ چو اُستاد ءَ جاگہ کُتگ ئِے ، مُدام سر ءُ سوج کنگ ءَ اِنت ، ءُ ھمے میان ءَ من شپ ءِ انتزار ءَ آں کہ چیئرمین چہ سنگتاں بہ گیش اِیت کہ من ءَ دنیا ءُ جھان ءِ گپ ھست اَنت گُوں چیئرمین ءَ۔شپ کہ بیت تاں من گوں چیئرمین ءَ شُتاں وابجاہ ءَ، ما چادرے پچ کُت ءُ وتی توپک ءُ جاٹہ درکُت ءُ کش ءَ ایر کُت اَنت ءُ تچک بوتیں۔اے سرجمیں شپ ءَ من گوُں چیئرمین ءَ نشت ءُ گپ کُت، شپ وتی گُڈی پاس ءَ رست تاں ما وپتیں کہ سھب ءَ ماھلہ پاد آیگی اَت۔وھد گوں تیزی ءَ گوزان اَت، جنگ تیز بُوان اَت، چیئرمین ھمے تیزی ءَ گُوں جنُزگ ءَ اَت، نوکیں ورناھانی جنگی تربیت کنگ ءِ زمہ واری چیئرمین ءِ کوپگ ءَ اِت اَنت ءُ من چیئرمین ءِ ٹیم ءَ ھوار اِتاں۔ ھرچ ورنایے کہ نوک جنگ ءَ ھوار بوت تاں آ مئے گور ءَ تربیت گاہ ءَ دیم دیگ بوت کہ اود ءَ چیئرمین اَت کہ روچ ءُ شپ تربیت کنگ ءَ اَت ، ورناھانی زھنی ءُ جنگی تربیت ءَ کنگ ءَ اَت ، آھاں جنگی نوکیں رپک ءُ ھُنراں سرپد کنگ ءَ اَت۔
آھاں پہ بلوچ ءِ راجی لشکر ءَ تمردیں کُنگر جُوڑ کنگ اَت۔
وھد گوزان بوت ءُ چیئرمین ءَ چہ گل ءِ نیمگ ءَ گیش زمہ واری دیگ بوت، چیئرمین اَت کہ کیمپے ءِ کمان ءَ کنگ ءَ اَت ورناھاں گیشینگ ءَ اَت، مُدام بچار نوکیں پندل سازگ ءَ اِنت پہ دُژمن ءِ پُروش دیگ ءَ ۔

برے کلیں سنگت ئِے جم کُت اَنت پہ دُژمن ءِ بُنجل ئِےکبزہ کنگ ءَ، برے بچار دُژمن ءِ کُلیں دگ ءُ راہ ئِے بستگ اَنت کہ دُژمن سرُپرُ کت مہ کنت ، مُدام ھمے جیڑگ ءِ توک ءَ اَت کہ اے دیوسیں دُژمن انچیں شاہ رگے ءَ چہ گِرگی اِنت کہ سُرِت کُت مہ کنت ، ءُ چیئرمین تو دُژمن انچش گِپتگ اَت کہ ُدژمن ءَ سُرت نہ کُت ءُ تئی تربیت کُتگیں سنگت انگت ھمے راہ ءَ جُنزگ ءَ اَنت ءُ دُژمن ءَ گوُں انچش دیم پہ دیم اَنت کہ دُژمن سما کنت کہ اے اُستادے ءِ دست ءِ چیر ءَ تربیت بوتگیں سنگت اَنت ءُ آ اُستاد چیئرمین اِنت کہ مرچی ھزارانی کساس ءَ ورناھانی دُروشم ءَ زندگ اِنت ءُ جنگ کنگ ءَ اِنت ۔
چیئرمین مُدام جنگی نوکیں رپک ءُ ھُنرانی سازگ ءَ اَت سنگتاں گیشینان ءُ سپر ءَ دیم دیان اَت ، مُدام دُژمن ءِ بُنجل ءُ راھاں پہ دُژمن ءَ تنگ کنگ ءِ جُھد ءَ اَت ءُ سنگتے ھما کچ ءَ تیار کُتگ اِت اَنت کہ سنگت مُدامی ھمے کاراں کنان اِت اَنت ، ھمے میان ءَ چیئرمین ءَ من ءَ ھم سپرے ءَ دیم دات بلے من ءَ سما نہ اَت کہ اے منی گوں چیئرمین ءَ گُڈی دیوان بیت، سپر ءَ روگ ءَ پیش من گوں چیئرمین ءَ ھم دیوان اِت اَنت تاں کار ءُ پراگرامانی سر ءَ دنیا ءُ جھان ءِ سر ءُ سوج ئِے کُت اَنت۔
من ءَ گُڈی ءَ ھمے گُوشت ئِےکہ تو بُرو جُنزاں کن کاراں بندات کن اِت اگاں زندگی ءَ موہ دات گُڑا من کایاں شمے نیمگ ءَ الم۔ ھواریں کُرباناں ۔ ھمے مئے گُڈی ھواری بوت ءُ من دیم پہ سپر ءَ در کپتاں۔ مئے سپر ءَ نوکی ۴ روچ سرجم اَت کہ ما وتی جاہ ءَ سر اِتیں ءُ چیئرمین ءِ گُشگ ءِ پد ءَ وتی کاراں بُنگیج کنگ ءَ اِتیں کہ مارا ھال رست کہ دُژمن ءَ زامران ءَ آپریشن کُتگ ءُ مئے سنگت دُژمن ءَ گوں دیم پہ دیم اِنت، لگوریں دژمن گوں وتی ھیلی کاپٹر ءُ ڈروناں اتکگ سنگت دُژمن ءِ گیرہ ءَ کپتگ اَنت ءُ ھمے میان ءَ مھابرہ ءَ ھال بوت گوں چیئرمین ءَ کہ روگ ءَ اَت سنگتانی نیمگ ءَ کہ سنگتاں منی زرورت اِنت سنگت گیرہ ءَ کپتگ اَنت من روگ ءَ آں سنگتانی نیمگ ءَ۔

ھمے گوں چیئرمین ءَ گُڈی ھال بوت ءُ پد ءَ سیمی روچ ءَ مارا ھال رست کہ چیئرمین سوب مند بوتگ چیئرمین ءَ وتی سنگت چہ دُژمن ءِ گیرہ ءَ درکُتگ اَنت کُل سنگت سلامت اَنت، بلے چیئرمین وت۔۔۔۔چیئرمین ھمے میان ءَ گوں دُژمن ءَ دیم پہ دیمی جنگ ءَ شھید بوتگ ۔ گوں ھمے ھال ءِ اشکنگ ءَ گُوش ئے آسمان سر ءَ کپت ءُ زمین چہ پادانی چیر ءَ گار بوت، چیئرمین ءِ ساھگ چہ مئے سر ءَ شُت یارر! باور کن یاررر تاں ماھے ءَ گیش من اے کُچلیں راستی ایر بُرت نہ کُتگ ، کہ چیئرمین ءَ چو جلدی روگی نہ اَت یاررر ، چیئرمین انگت ترا گیش کنگی اَت ۔سک باز کار اِت اَنت کہ پشت کپتگ اِت اَنت۔
بلے چیئرمین ءَ زمین زُرتگ اَت ، جنگ زُرتگ اَت ، کوم زُرتگ اَت ءُ تاں گُڈی ساہ ءَ پہ کوم ءُ زمین ءَ جنگ ءَ اَت۔چیئرمین یارر منی چاریں دانک تئی کرد ءِ ستا ءَ پہ سک کم اَنت ،،،، بلے ترا گُڈی ءَ ھمے گُوشاں بس ۔

اے زندگی ، اے راہ ، اے سپر ، اے جُھد ، تئی داتگیں دادے یاررررر ،، منی راھشون ، منی اُستاد تو ابدمان ئے ، تو نمیران ئے ، تو ھست ئے ، ھرچ بلوچ ورناہ ءِ دُروشم ءَ ، ءُ تو جنگ ءَ ئے ،،۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔

بلوچستان ءِ دمگ ھاران ءُ چاگی ءَ پاکستانی پوج ءِ پوسٹ سر ءَ سلاہ بندیں مردماں اُرش ءَ ھوار باپاری دگ سر ءَ سلاہ بندیں مردمانی نیمگ ءَ ناکہ بندی کنگ بیتگ-

مروچی سھب ءَ ھاران ءِ دمگ روتینکو ءَ پاکستانی پوج ءِ پوسٹ ءَ ساڑی کارندہ اسنائپر اُرش ءَ نشانگ کتگ اَنت – اِھوالکار ءِ رِد ءَ اُرش ءَ یک کارندھے بیرانی ءِ ھال اِنت بلے واکدار ءَ اے درگت ءَ ھچ وڑیں درشان شنگ نہ کتگ-

ھمے وڑ سُھب ءَ سلاہ بندیں مردماں مزنیں کچے ءَ شال تفتان باپاری دگ سر ءَ چاگی ءِ دمگ نوکچاہ ءِ نزیک ءَ چیک پوائنٹ برجاہ داشتگ پٹ ءُ پول کتگ- سلاہ بندیں مردمانی نیمگ ءَ ھرچ وڑیں گاڑی پٹ ءُ پول ءِ ھال اِنت-

وئیلانی زمہ واری انگت ھچ گل ءَ نہ زرتگ اَنت-

پنجگور ءِ دمگ خدا آبادان ءَ ناشناسیں سلاہ بندیں مردماں پولیس کارندہ پیر جان ء محمد ابراھیم ءِ لوگ ءِ سر ءَ دزبمب ءُ وتکبریں سلاہاں گوں اُرش کتگ ءُ پولیس پیر جان ھما جاہ ءَ بیران بوتگ۔

پولیس ءِ بنشون ءِ رد ءَ سلاہ بندیں مردماں لوگ نشانگ جوڑ کتگ ءُ تیر گواری ءِ ھمراھی ءَ دستی بم ھم جتگ ۔ اے وئیل ءَ پد پولیس جاہ ءَ سر بوتگ ءُ چمدیستگیں مردم جم کنگ ءِ کار بندات کتگ وھدے کہ ارش کنوکانی پٹ ءُ پول برجاہ اِنت۔

گوا: ہندوستان ءِ نامداریں ازمکار نانا پاٹیکر 75 سال ءِ اُمر ءَ گوا ءَ بیران بوتگ۔

ھندوستانی رسانکدر ءَ ھال داتگ کہ بالی ووڈ ءِ 75 سالی ازمکار نانا پاٹیکر گوا ءَ وتی لوگ ءَ دل ءِ نادراھی ءَ بیران بوتگ۔

نانا پاٹیکر کہ آئی ءِ پیدائشی نام وشوناتھ پاٹیکر بوتگ آ وتی لوگ ءَ بے ھوش بوتگ ءُ سھب ءِ 5:20 ءِ نزیک ءَ ڈونا پاؤلا ءِ منی پال نادراھجاہ ءَ سر کنگ بوتگ کہ اودا 45 منٹ ءَ سی پی آر ءِ مدامیں کوشست ءَ ابید آ ھوش ءَ آرگ نہ بیتگ۔

منی پال ہسپتال ءِ آنکولوجی ءِ شئبہ ءِ سروک ڈاکٹر شیکھر سالکر ءَ گشتگ کہ میڈیکو لیگل کیس درج کنگ بوتگ ءُ لاش ءِ پوسٹ مارٹم کنگ بیت۔

پاٹیکر ءَ ہندی ءُ مراٹھی سینما ءِ تہ ءَ یادگاریں کار کتگ۔ اے وھد ءِ تہا آئی ءَ 3 نیشنل فلم ایوارڈ، 4 فلم فیئر ایوارڈ ءُ 2 مہاراشٹر اسٹیٹ فلم ایوارڈ زرتگ۔ آئی ءَ را ہندوستانی سینما ءَ مزنیں ناماں چہ یکے زانگ بیت ءُ 2013 ءَ آئی ءَ را سینما ءُ آرٹس ءِ ھاتر ءَ وتی ھزمتانی ھاتر ءَ پدم شری ءِ داد دیگ بوتگ۔

آئی ءَ 1978 ءَ ڈرامہ فلم گمن ءَ بالی ووڈ ءِ اولی رند ءَ کار کتگ ءُ چہ ایشی ءَ پد آئی ءَ بازیں مراٹھی ءُ ہندی فلماں اداکاری کتگ۔ اکیڈمی ایوارڈ ءِ نامینتگیں فلم سلام بمبئی ءِ تہ ءَ کار کنگ ءَ پد! 1988 ءَ پاٹیکر ءَ کرائم ڈرامہ پراندہ (1989) ءِ تہ ءَ وتی کرد ءِ ھاتر ءَ نیشنل فلم ایوارڈ ءُ فلم فیئر ایوارڈ ءِ ھاتر ءَ جوانیں اداکاری ءِ ھاتر ءَ زرتگ ات۔

آئی ءَ فلم انگار (1992) ءِ ھاتر ءَ وتی اولی فلم فیئر ایوارڈ ءِ ھاتر ءَ جوانیں ولن ءِ ھاتر ءَ زرتگ ات ، وھدے کہ اپھرن ءَ آئی ءَ را وتی دومی فلم فیئر ایوارڈ ءِ ھاتر ءَ جوانیں ولن ءِ ھاتر ءَ زرتگ ات ۔

ھُزدار ءِ دمگ چہ نال ءَ سی ءُ دو سالی ئیں ڈرائیور منیر احمد ء شریف چہ لوگ ءَ زورانسری بیگواہ کتگ- کھول ءِ رِد ءَ منیر احمد دو اکتوبر 2026 ءِ شپ نُھ ءَ چہ دمگی ڈیتھ اسکواڈ کارندھاں زورانسری بیگواہ کتگ –

دومی نیمگ ءَ گوادر ءِ دمگ چہ شادی کور پسنی ءَ 30 اگست 2026 ءَ زورانسری بیگواہ کنگ بیتگیں رشید بلوچ ء قادر بخش بیست ءُ ھپت ستمبر 2026 ءَ چہ شادی کور پسنی ءَ یل بیتگ ءُ وتی لوگ ءَ سر بیتگ-

زانگ بہ بیت بلوچستان ءَ ھمکروچی ھساب ءَ مردم زورانسری آوار جنی ءِ نشانگ کنگ بنت بلے بازیں رپورٹ کھول مردم تُرس ءِ سوب ءَ گپ ءَ دیم ءَ نیار اَنت-

اھوالانی رد ءَ نامداریں بلوچ راجدوسیں رھشون ڈاکٹر حکیم لھڑی دراجیں نادراھی ءَ پد مرچی بیگاہ ءَ کراچی ءَ بیران بوتگ۔

ڈاکٹر حکیم لہڑی بلوچ راجداری سیاست ءِ تہ ءَ یک مزنیں نامے بیتگ ءُ بازیں دھکاں چہ بلوچ راجی ھک، سیاسی وت واجھی ءُ بلوچستان ءِ سیاسی جیڑھانی واستا مھکمیں توارے بوتگ ۔ آ بلوچ آجوئی ءِ جنز ءِ ھمراہ ءُ ھمدردے بیتگ۔