TBP Balochi

بلوچستان ءِ جتاجتائیں دمگ، لسبیلہ، آواران، کلات ،ھرنائی ءُ قلعہ عبداللہ ءَ ناکہ بندی ءِ میان ءَ دو پنجاپ ءِ جھمنند دزگیر، ڈیتھ اسکواڈ ءُ پاکستانی پوج ءِ سر ءَ اُرش-

گیشیں ھالانی رِد ءَ قلعہ عبداللہ ءَ گوستگیں روچ ءَ پاکستانی پوج ءِ پلامرزی ڈیتھ اسکواڈ بُنجل ءِ سر ءَ ڈرون اُرش ءَ پد سلاہ بندیں مردماں پیشگامی کنوکیں ڈیتھ اسکواڈ کارندھانی سر ءَ سلاہ بندیں مردماں اُرش کتگ-

اُرش مزنیں کچے ءَ جانی تاوان ءِ ھال اِنت-

ھمے وڑ ھالانی رِد ءَ آواران ءِ دمگ گیشکور ءِ ھند ماراشم ءَ پاکستانی پوج ءُ ڈیتھ اسکواڈ کارندھانی سر ءَ سلاہ بنداں اُرش کتگ-

اُرش ءَ ڈیتھ اسکواڈ کارندھان جانی تاوان ءِ ھال اِنت-

دومی نیمگ ءَ لسبیلہ ءِ دمگ اوتھل ءِ ھند سکن ءَ پاکستانی پوج ءِ کاروان سر ءَ سلاہ بندیں مردماں اُرش کتگ-

اُرش ءَ مزنیں کچے ءَ جانی تاوان ءِ ھال اِنت-

دومی نیمگ ءَ ر کلات ءَ گوستگیں روچ ءَ منگچر ءَ چوٹانک ھند سر ءَ باپاری گاڑیاں بروکیں پوج ءِ کاروان ءُ دگ ءِ پلگاری ءَ دلگوشیں پیادگ کارندھانی سر ءَ دو اُرش کنگ بوتگ ءُ اُرش ءَ جانی تاوان ءِ گمان اِنت-

ھمے وڑ ھرنائی ءُ سنجاوی ءِ میانی شھدگ سر ءَ طورخام تنگی ءِ ھند سر ءَ سلاہ بندیں مردماں ناکہ بندی کتگ گاڑی پٹ ءُ پول کتگ اَنت-

ھالانی رِد ءَ پٹ ءُ پول ءِ میان ءَ سلاہ بندیں مردماں دو مردمانی پجّار کنگ ءَ پد وتی ھمراھی ءَ برتگ اَنت-

آوار جنگ بیتگیں مردمانی پجّار اصغر ء محمد آصف ءُ طارق نام ءَ چہ بیتگ اَنت پنجاب ءِ دمگ مظفرگڑھ ءِ ھند چوک قریشی ءَ گوشگ بیگ ءَ اَنت-

آوار جنگ بیتگیں دوئیں مردم ٹرکانی ڈرائیور بیتگ اَنت-

تنی وھدے اے وئیلانی زمہ واری ھچ گل ءَ نہ زرتگ اَنت-

بلوچستان ءِ تیابدپی شھر گوادر جیونی تھسیل ءِ نزیک ءَ دریا ءَ پاکستان کوسٹ گارڈ ءِ دو کشتیانی سر ءَ اُرش کنگ ءَ پد 15 ءَ چہ گیش کارندہ بیران بوتگ اَنت۔

انگت ءَ چہ واکداراں ٹپیانی بابت ءَ ھچ وڑیں سرکاری بیان شنگ نہ بوتگ۔ دمگی مردمانی رد ءَ اے وئیل ءَ پد جیونی ءَ فورسز ءِ سر ءُ پراں گیشی بوتگ۔ فورسز ءَ چہ دریا ءَ دمگی دریا ورد دیمتر ءِ پرمان ءِ رسگ ءَ چہ آھاں دریا ءَ روگ ءَ بند کتگ انت۔

انگت ءَ ھچ سلاہ بندیں گل ءَ اے اُرش ءِ زمہ واری نہ زرتگ۔

زانگ بہ بیت چد ءُ پیش ھم پاکستانی لشکر دریا ءَ نشانگ جوڑ کنگ بیتگ اَنت ۔ بلوچ لبریشن آرمی ءَ پہ دریائی کارروائیاں وتی یونٹ ’’حمل میری ٹائم ڈیفنس فورس‘‘ جوڑ کتگ۔

یونٹ ءَ ایشی ءَ چہ پیسر 12 اپریل 2026 ءَ جیونی ءِ نزیک ءَ ’مل تیاب‘ ءَ پاکستان بحریہ ءِ گشت ءِ کشتی ءَ را نشانگ جوڑ کتگ ات کہ ایشی ءِ آسر ءَ سئے کارندہ نائیک افضل، سپاہی جمیل ءُ سپاہی عمر بیران بوتگ ات انت۔

سلاہ بندیں مردماں فورسز ءِ کاروان ءَ نشانگ جوڑ کتگ۔

بلوچستان ءِ دمگ چہ پنجگور ءَ ھالانی رد ءَ پنجگور ءِ دمگ پنچی ءَ پاکستانی لشکر ءِ کاروان ءِ سر ءَ سلاہ بندیں مردماں سربستگ ءُ گوں مزنیں ءُ وتکاریں سلاھاں نشانگ جوڑ کتگ۔

اُرش گوستگیں روچ ءَ بوتگ کہ ایشی ءِ تہ ءَ پاکستانی لشکر ءِ دو گاڑی مزنیں اُرش ءِ زد ءَ بوتگ اَنت۔ ھال رس اِتگ کہ اے اُرش ءَ فورسز ءِ کارندہ ٹپی ءُ بیران بوتگ اَنت۔

زانگ بہ بیت کہ گوستگیں روچ ءَ بلوچستان ءِ دمگ کلات ءِ ھند دشت بابا ءَ سلاھبندیں مردماں پاکستانی لشکر ءِ کاروان ءِ سربستگ ءُ اُرش کتگ۔

ھال انت کہ اُرش ءَ پاکستانی اُرد ءِ کارندہ بیران ءُ ٹپیگ بوتگ اَنت ءُ ھمے وھد ءَ سلاہ بندیں مردماں نوشکی ءِ ریکو ءَ پاکستانی اُرد ءِ کیمپ ءَ روگ ءَ راشن ءَ گوں باریں گاڑی یے دست گپتگ۔

بلوچ آجوئی لوٹوکیں سلاہ بندیں گل اے دمگاں پرکار اَنت ءُ پاکستانی لشکر ءِ سر ءَ مُدام اُرش کنگ ءَ اَنت، البت انگت ءَ ھچ گل ءَ گْوستگیں اُرش ءِزذمہ واری نہ زرتگ۔

بلوچستان ءِ دمگ بارکھان ءَ چہ سراتی ءِ ھند ءَ دہ مردمانی لاش دزکپتگ اَنت، آ بی ایچ او راڑہ شم ءَ برتگ اَنت-

چہ لاشانی تہ ءَ دزکپتگیں پجّار کارڈانی کُمک ءَ چہ سرجمیں دہ مردمانی پجّار بیتگ اَنت- آیانی سیادی کوھلو ءِ جتاجتائیں دمگاں چہ گوشگ بیگ ءَ اِِنت- پجّار بیتگیں مردمانی تہ ءَ پائندہ خان ء تبو خان، حسن ء عمر خان، شیر محمد ء بنی بخش، اقبال ء نواب خان، مزار خان ء مھر داد خان، دین محمد ء در محمد، گھر ء دین محمد، وزیر خان ء نوارہ خان، دامر بخش ء خدا بخش ءُ سید خان ء امیر ھوار اَنت-

دزکپتگیں ھالانی رِد ءَ اشانی تہ ءَ کشگ بیتگیں مردمے ءِ پجّار اقبال نواب نام ءَ چہ بیتگ، آ 26 دسمبر 2025 ءَ رکھنی، ضلع بارکھان ءَ سیشن کورٹ دیم ءَ پاکستانی پوج ءَ زورانسری بیگواہ کتگ-

دومی نیمگ ءَ، مھکمہ انسداد ناشرکاری (سی ٹی ڈی) ءَ ٹاہ داتگ کہ بارکھان ءِ دمگ راڑہ شم ءَ انٹیلی جنس ءِ بُنیاد سر ءَ یک آپریشنے کتگ، چریشی ءِ آسر ءَ دہ سلاہ بندیں مردم جنگ بیتگ اَنت-

زانگ بہ بیت کہ گوستانک ءَ ھم سی ٹی ڈی ءَ بازیں دروگیں میڑاں مردمانی کُشگ ءِ ٹاہ داتگ، بلے اشی ءَ پد آیانی پجّار چہ بیگواھیں مردماں بیتگ اَنت-

بلوچ یکجھتی کمیٹی ءَ گشتگ کہ بلوچستان ءِ شھر مستونگ ءِ کھڈ کوچا ءِ دمگ ءَ 9 اکتوبر ءَ یک لوگے ءِ دیم ءَ ڈرون اُرش ءَ شیر محمد شاھوانی ءِ چک جاوید ھماد ءُ کبیر ھماد ءِ چک اللہ بکش سک ٹپی بوتگ انت۔ لس مھلوک ءِ لوگ ءُ آبادیانی نزیک ءَ اے رنگیں اُرش بنیاتی جُست ءَ چِست کن اَنت کہ بلوچستان ءَ لس مھلوک ءِ زند داں کدی تُرس ءُ بیم ءِ ساھگ ءَ مان ایت، زوراکی ءُ ناامنی ءِ ساھگ ءَ مان ایت۔

بی وائی سی ءَ گشتگ کہ بلوچستان ءَ ڈرون ءُ جیٹ ءِ وسیلہ ءَ لس مردمانی سرا اُرش ایوک ءَ سیکورٹی آپریشن ءِ گپ نہ انت بلکیں لس مردمانی ایمنی، انسانی شرپ ءُ بنیاتی ھکانی سنگینیں جیڑہ انت۔ ھچ وڑیں سیاسی یا پوجی توجیل ءِ وسیلہ ءَ شھری ءِ زند ءُ ایمنی ءِ نادیدہ کنگ ءِ توجیل ءِ وسیلہ ءَ کارمرز کنگ نہ بیت۔ چہ لوگاں ترس ءِ نشان ءُ آبادی ءِ جنگ ءِ میدان ءَ بدل کنگ ءَ چہ راج ءِ زند ءُ ایمنی ءِ بنیاتی ھک ءَ را ھترہ ءِ آماچ کنت۔

دیمتر ءَ گْوشتگ کہ بلوچستان ءِ مردم جنگی نشانگ نہ اَنت، آ ھما انسان اَنت کہ آھاں امن ءُ ایمنی ءُ شرپداریں زندمان ءِ ھک ھست۔ شھری آبادی ءِ سر ءَ اُرشانی سلسلہ بند کنگ بہ بیت، ٹپیگیں شھریاناں انساپ رسگ لوٹ ایت ءُ اے وڑیں وئیلانی سر ءَ آزاتیں پٹ ءُ پول ءِ وسیلگ ءَ ذمہ وارانی احتساب ءَ را دل یکیمی کنگ لوٹ ایت۔

چہ شال ءَ دالبندین ءَ روکیں مساپر بریں بس چارسر ءَ ھراب بوگ ءَ پد ناشناسیں سلاھبنداں کسٹم ءِ کارندہ محمد ابراہیم ڈومکی ءَ ھوار پنچ مردم آوار جتگ انت ۔

کسٹم ءِ کارندہ ضلع جعفر آباد ءَ گوں سیادی دار ایت ءُ ڈیوٹی ءَ روگ ءِ ھاترا بس ءَ سوار بوتگ۔ وسیلگ ءِ رد ءَ سلاہ بندیں مردماں مساپرانی شناختی کارڈ چیک کنگ ءَ پد محمد ابراہیم ڈومکی ءُ دگہ چار مسافر گوں وت ءَ ناشناسیں جاھے ءَ برتگ اَنت۔

بلوچستان ءِ دمگ مستونگ ءِ ھند کھڈکوچہ ءِ یک لوگے ءِ دیم ءَ ڈرون اُرشے ءِ آسر ءَ دو مردم سک ٹپی بیتگ اَنت-

بنداتی ھالانی رِد ءَ، کھڈکوچہ یک لوگے ءِ دیم ءَ اچانگ ءَ دیم ءَ اَتکگ اے وئیل ءَ جاوید حماد ء شیر محمد شاھوانی ءُ اللہ بخش ء کبیر حماد سک ٹپی بیتگ اَنت- وئیل ءِ ڈرون اُرش گوشگ بیگ ءَ اِنت-

وئیل ءَ پد ٹپیانی الاج ھاتر ءَ نادُراھجاہ ءَ سر کتگ، اود ءَ آ الاج کنگ بیگ ءَ اِنت-

بلوچستان ءِ دمگ چہ جھل مگسی ءَ سلاہ بندیں مردماں پنچ مردم آوار جتگ ءُ دکی ءَ کنسٹرکشن کمپنی ءِ کیمپ ءَ چہ آوار جنگ بوتگیں 11 کارمند یل کنگ بوتگ ءُ ایمنیں جاھے ءَ سر کنگ بوتگ اَنت۔

گیشیں ھالانی رد ءَ بلوچستان ءِ دمگ دکی ءِ ھند نانا صاحب زیارت ءَ یک تعمیراتی کمپنی ءِ کیمپ ءَ کساسی 12 کارمند آوار جنگ بوتگ انت کہ ایشانی تہ ءَ لہتیں روچ پیسر کوہلو ءِ دمگ نرھن کور ءَ چہ یک کارمند ءِ لاش دزکپتگ ات۔

اے وئیل ءِ تہ ءَ آوار جنگ بوتگیں دگہ 11 کارمند مرچی یل کنگ بوتگ اَنت۔

دومی نیمگ ءَ بلوچستان ءِ دمگ جھل مگسی ءَ نورانی روڈ ءَ بیس کیمپ ءَ چہ سلاہ بندیں مردماں گاڑی یے اوشتارینتگ ءُ آئی ءِ تہ ءَ پنچ مردم آوار جتگ ءُ گوں وت برتگ اَنت۔

جھل مگسی پولیس ءِ رد ءَ اے پنچیں مردم نورانی ءَ چہ گندواہ ءَ روگ ءَ بوتگ اَنت کہ راہ ءَ گاڑی ءِ ھمراھی ءَ آوار جنگ بیتگ اَنت ۔

آوار جنگ بوتگیں مردمانی تہ ءَ سئے دمگی مردم ھوار اَنت کہ گْوشگ بیتگ کہ آ چہ کھوسا ءُ مگسی ٹک ءَ اَنت ءُ دومی دوئیں چہ لاڑکانہ ءَ اتکگ انت آھانی مھمان اَنت۔

اے وئیل ءِ مول ءُ مراد انگت ءَ زانگ نہ بوتگ اَنت۔

مستونگ ءَ پاکستانی پوج ءِ سر ءَ اُرش ءُ پُھل تراکینگ بیتگ اَنت-

مستونگ ءَ پاکستانی پوج ءِ یکیں کاروان دو جتاجتائیں ھندانی سر ءَ اُرش ءِ نشانگ کنگ بیتگ-

گیشیں ھالانی رِد ءَ زی نیمروچ ءِ ساھت دو ءِ وھد ءَ مستونگ ءِ دمگ اسپلنجی ءَ پاکستانی پوج ءِ کاروان ھما وھد ءَ تُرندیں اُرش ءِ نشانگ کنگ بوتگ وھدے آ مزنیں کاروانے ءِ دروشم ءَ اسپلنجی پوجی بُنجل ءِ نیمگ ءَ روگ ءَ بیتگ، اے اولی اُرش انچش تُرند بوتگ مزنیں کچے ءَ کارندہ بیران ءُ ٹپی بیتگ اَنت-

ھمے وڑ دومی اُرش زی بیگاہ ءِ ساھت شش ءَ ھما وھد ءَ بوتگ وھدے ھمے کاروان اسپلنجی ءِ دمگ مرو ءَ چہ گوزگ ءَ بیتگ، پیسر ءَ چہ سنگر گپتگیں سلاہ بندیں مردماں پاکستانی پوج ءِ کاروان یکرندے پد ءَ تُرندیں اُرش ءِ نشانگ کتگ، اُرش ءَ پاکستانی پوج ءِ دو ءَ چہ گیش کارمند مرتگ ءُ سے ءِ نزیک ءَ ٹپی بوتگ اَنت-

دمگی مردمانی رِد ءَ پاکستانی پوج وتی بیران ءُ ٹپی بیتگیں کارندہ یل داتگ ءُ چہ اود ءَ تتکگ اَنت-

ھمے وڑ گوستگیں شپ ءَ مستونگ ءَ بلوچستان ھوٹل ءِ نزیک ءَ برجاھیں پُھل تراکناکیں شورواں گوں تراکینتگ ءُ تباہ کتگ-

دومی پُھل ژلی کبرستان ءِ نزیک ءَ تراکینتگ ءُ تباہ کتگ

وئیلانی زمہ واری انگت ھچ گل ءَ نہ زرتگ اَنت-