بلوچستان ءِ چاگی ءِ ھند پوستی موکنٹوک زرد کوہ ءَ مائنز کمپنی ءِ کار ءِ ھاترا جوڑ کتگیں کوٹیانی سر ءَ ناشناسیں ڈرون ءِ اُرش ءِ آسر ءَ بازیں کوٹی سرجم ءَ تباہ بوتگ اَنت ءُ کمپنی ءِ ارزشت داریں سامان ھم تاوان بوتگ اَنت۔
مائنز کمپنی ءِ واھند سمیع اللہ نوتیزئی ءِ رد ءَ پوستی موکنٹوک زرد کوہ ءَ آئی ءِ مائنزکمپنی ءِ مزدورانی واستا جوڑ کتگیں کمرہ گوستگیں روچ ءَ گمانی ڈرون اُرش ءِ نشانگ جوڑ کنگ بوتگ اَنت کہ ایشی ءِ آسر ءَ بازیں کمرہ سرجم ءَ تباہ بوتگ اَنت ءُ اود ءَ ساماناں ھم مزنیں تاوانے رس اتگ۔
واھند ملک سمیع اللہ نوتیزئی ءِ رد ءَ تراک سک باز بوتگ کہ ایشی ءِ سبب ءَ کوٹیانی تہ ءَ سامان ءِ ٹکرے بازیں راہ ءَ کپتگ۔
آئی ءَ گْوشتگ کہ دمگ ءِ نا شریں امن ءُ ایمنی ءِ جاور ھال ءِ سبب ءَ نزیک ءَ پنچ ماہ پیسر مائنز بند کنگ بوتگ اَنت بلے کمپنی ءِ سامان ءُ دگہ المی چیز جاہ ءَ ھست بوتگ اَنت کہ گمانی اُرش ءِ آسر ءَ تباہ بوتگ اَنت۔
مائنز کمپنی ءِ واھند ملک سمیع اللہ نوتیزائی ءَ لوٹ کتگ کہ آئی جی ایف سی (روکپت) ءُُمزنیں واکداراں اے وئیل ءِ زوتیں نوٹس بہ زور انت ءُ کانانی کمرھانی سر ءَ گمانی ڈرون اُرش ءِ دروشم ءِ پجارینگ ءِ ھاترا تچکیں پٹ ءُ پول بہ کن انت ءُ ھمے وھد ءَ اے وئیل ءِ اسلیں راستی ھم پدر بہ کن انت۔
اے درگت ءَ ایس پی چاگی ءَ گشتگ کہ آئی ءَ را ڈرون ءِ گمانی اُرش ءِ بابت ءَ جتا جتائیں وسیلگاں چہ ھم سرپدی رس اتگ بلے پٹ ءُ پول برجاہ اِنت۔ آئی ءِ گشگ ءِ رد ءَ پٹ ءُ پول سرجم بوھگ ءَ پد سرجمیں راستی دیم ءَ کیت آ لس مھلوک ءِ دیم ءَ آرگ بنت۔