ماشکیل ءُ مستونگ ءَ پاکستانی لشکر ءِ سر ءَ اُرش ، سوراب ءَ بالی اُرش، سمیٹ ءَ لوڑیں گاڑی ماندارگ بیتگ

بلوچستان ءِ جتا جتائیں دمگ ماشکیل، مستونگ ءُ سوراب ءَ پاکستانی لشکر ءِ سر ءَ سلاہ بندیں وئیلانی ھال شنگ بوتگ انت کہ ایشانی تہ ءَ ماشکیل ءَ پاکستانی لشکر ءِ پوسٹ ءِ سر ءَ سلاہ بندیں مردمانی اُرش، مستونگ ءِ دمگ گرگینا ءَ لشکر ءِ سر ءَ سلاہ بندیں اُرش ، تربت ناصر آباد ءَ سمیٹ ءَ لوڑیں گاڑی ماندارگ بیتگ ءُ سوراب ءَ پاکستانی لشکر ءِ برزی بمبتراک ھوار اَنت۔

ھالانی رد ءَ ماشکیل ءَ پاکستانی فوج ءِ 58 ونگ ءَ گوں ہمگرنچیں گُوریندر پوسٹ گوستگیں روچ ءَ سلاھبندانی نشانگ جوڑ کتگ۔ اُرش ءِ وھد ءَ دوئیں نیمگ ءَ تیر گواری بوتگ ءُ اے وئیل ءَ پاکستانی لشکر ءِ 8 کارندہ بیران بوتگ اَنت ۔

بیران بوتگیں کارندہانی تہ ءَ نائیک واحد، نائیک مہتاب، نائیک نوبت علی، حوالدار ناصر، لانس نائیک مشتاق، لانس نائیک انعام، سپاہی مزمل ءُ سپاہی دانیال ھوار اَنت ءُ یک کارندھے ءِ ھم ٹپیگ بوھگ ءِ ھال اِنت۔

دومی نیمگ ءَ مستونگ ءِ دمگ گارگینا ءَ پاکستانی لشکر سلاہ بندیں مردمانی نشانگ جوڑ کنگ ءِ ھال دیم ءَ اتکگ۔ فورسز ءِ سر ءَ ھما وھد ءَ اُرش کنگ بوتگ کہ آ دمگ ءَ دیم ءَ روگ ءِ جھد ءَ بیتگ انت۔

دمگی مردمانی رد ءَ بازیں وھدے ءَ چہ دمگ ءَ تیرگواری ءِ توار اِش کنگ بیتگ۔

دومی نیمگ ءَ پاکستانی لشکر ءَ گوستگیں شپ ءَ سوراب ءِ نگاڑ ءِ دمگ ءَ بالی بمب تراک کتگ ۔

دمگی مردمانی ءِ گشگ انت کہ اے بمبتراک ءَ یک مسیتے ءُ لھتیں لوگ نشانگ جوڑ کنگ بوتگ انت کہ ایشی ءِ آسر ءَ لوگاں تاوان رس اتگ۔

دمگی مردماں اے وئیل ءِ ھلاپ ءَ زھرشانی ءِ درشان ءَ مزنیں شاھدگ بند کتگ ءُ ھمے وھد ءَ لشکر ءَ زھرشانی کنوکانی سر ءَ زوراکی کتگ۔

ھمے تربت ناصر آباد ءَ سلاہ بندیں مردماں سمیٹ ءَ لوڑیں گاڑی ءِ سر ءَ تیرگواری کتگ ءُ پد ءَ مانداشتگ۔