TBP Balochi

ایرانی آمیدگس ءَ جنگولیں گل داعش ءِ پلامرزی ءِ بھتام ءَ یک بلوچ جنکے سَے سال ءَ زندانی کرتگ –

روکپتی بلوچستان ءِ دمگ بندر عباس ءَ یک ھبدہ سالی ئیں جنکے سَے سال ءِ زندانی کرتگ –

کمپین فعالین بلوچ ءِ رد ءَ گوستگیں روچاں روکپتی بلوچستان ءِ دمگ دادگاہ بندر عباس ءَ اھمد علی ءِ جنک کہ آئی ءِ عمر ھبدہ سال اِنت آ گلانی پلامرزی ءِ بھتام ءَ زنداناں کنگ بیتگ –

آئی ءِ گوشگ اِنت کہ اھمد الی روکپتی بلوچستان ءِ بنجاھی شھر دزاپ ءَ کار ءَ بیتگ کہ اود ءَ انی آ جھمنند بیتگ ءُ گوستگیں روچاں آئی ءِ جنک آمیدگس ءِ پرمان ءَ سَے سال ءَ زندانی کنگ بیتگ –

ایرانی آمیدگس ءِ رد ءَ اھمد الی ءِ جنک ءَ یک ماھے ءَ پیسر چاگردی رسانکجاہ انسٹاگرام ءَ جھان ءِ ناشرکاریں گل داعش ءِ پلامرزی ءَ پوسٹ کرتگ ءُ چریشی ءِ سر ءَ آئی ءِ سر ءَ داعش ءِ پلامرزی ءِ ھال دراتکگ اَنت –

کمپین بلوچ فعالین ءِ گوشگ اِنت کہ ایرانی آمیدگس ءَ اھمد الی ءِ جنک ءِ زمانتی ءَ سَے سد میلیون تومان لوٹگ ءَ اِنت ءُ چریشی ءِ سر ءَ اھمد الی ءِ گور ءَ سَے سد میلیون تومان کجا چہ درکیت اِنت –

آئی ءِ گوشگ اِنت کہ شمبے ءِ روچ ءَ آمیدگس ءَ آئی ءِ سر ءَ بھتام جتگ ءُ چوشیں وکیل ھم اے جنک ءِ کمک ءَ درنیتکگ –

آئی ءِ گوشگ اِنت کہ باید اھمد الی ءِ جنک سپاھی کنگ ءَ موہ دیگ بہ بیت ءُ آئی ءِ گون انساپ بہ بیت چوش یکترپ ءَ بندیگ کنگ انسانی ھکانی لگتمالی اِنت –

سر بیتگیں ھالانی رد ءَ روکپتی بلوچستان ءَ دو جون دزکپتگ اَنت، جون گوستگیں روچ ءَ چھبار ءُ پھرہ ءَ دزکپتگ اَنت –

ھالانی تہ ءَ گوشگ بیتگ کہ یک جونے ھپتگے ءَ پیسر کُشگ بیتگ کہ چھبار ءَ دزکپتگ ءُ آئی ءِ پجار نہ بیتگ –

ھالانی رد ءَ اے دوئیں جونانی گور ءَ دو کاڈ ھم دزکپتگ اَنت ھردُکانی پجار اسلم ناروئی ءُ خالد ناروئی ء چراگ ءِ ناماں زانگ بیتگ اَنت –

وئیل ءَ اے زانگ نہ بیتگ کہ اے مردم چون ءُ چتور جنگ ءُ کُشگ بیتگ اَنت، چریشی ءَ پد انتزامیہ ءَ جون چِست کرتگ اَنت ءُ برتگ اَنت –

روکپتی بلوچستان ءَ دزکپتگیں جونانی پژدر ءَ اود ءَ سیاسی مردمانی بھتام اِنت کہ ایرانی چیرین ادارھانی نیمگ ءَ لس مردمانی سلاہ بند کنگ ءُ پد ءَ ھمے مردم لس مھلوک ءَ آوار جن اَنت ءُ کُشگ ءَ اَنت –

بلے اے کپتگیں جونانی بارو ءَ دگہ گیشیں سرپدی نہ بیتگ ءُ ناکہ انتزامیہ ءِ نیمگ ءَ دگہ چوشیں ھال دیم ءَ اتکگ اَنت –

بلوچستان ءِ بنجاھی شھر شال ءَ سربیتگیں ھالانی رد ءَ پنچ کس کانگو ویروس ءِ نادراھی ءِ آماچی ءَ پدر بیتگ اَنت –

فاطمہ جناح جنرل اینڈ چیسٹ ھسپتال ءِ میڈیل سپرنٹنڈنٹ ڈاکٹر نور اللہ موسیٰ خیل ءَ کانگو ویروس ءِ نوکیں نادراھانی پدراھی راست کرتگ –

ڈاکٹر نور اللہ ءِ گوشگ اِنت گوستگیں روچ ءَ فاطمہ جناح جنرل اینڈ چیسٹ ھسپتال ءَ ھپت نادراہ آرگ بیتگ اَنت کہ چریشانی تہ ءَ پنچ کس ءَ کانگو ویروس ءِ نادراھی پدر بیتگ-

نادراھی ءِ آماچ بیتگیں مردمانی تہ ءَ موسی جان جھمنند کاج مھترزئی، ھژدہ سالی ئیں حیدر شاہ ءُ دگہ ھوار اَنت کہ دگہ دو نادراھاں کانگو ویروس ءِ نہ بوگ ءَ دراہ بیگ ءَ آ واتر کنگ بیتگ اَنت ءُ اے پنچیں نادراہ ھسپتال ءَ تھتیگ کنگ بیتگ اَنت –

گوستگیں ماہ ھشت جولائی ءَ ھم بلوچستان ءَ دو مردماں کانگو ویروس پدر بیتگ اَنت –

ڈاکٹر صادق ءَ گُشتگ اَت کہ گوستگیں ماہ ءَ گپتگیں نادراھانی تہ ءَ یکے چمن ءِ جھمنندیں یازہ سالی ئیں زھگے ءُ دومی لورالائی ءِ جھمنندیں چِل سالی ئیں مردمے ءَ کانگو ویروس پدر بیتگ اَنت –

آئی ءَ گُشتگ اَت چریشی ءَ پیسر گوستگیں یک ماہ ءُ پانزدہ روچانی تہ ءَ ھپت نادراہ ھسپتال ءَ آرگ بیتگ اَنت –

اے نادراھی باز بیمناک اِنت ءُ اشی ءِ تہ ءَ مردماں باز نیزور کنت ءُ آیاں مرگ ءِ آماچ کُت کنت –

اے نادراھی افریقہ ءُ زرباری امریکہ ءُ یورپ ءُ ایشا ءُ دگہ جاھاں ھم پدر بیتگ –

اے نادراھی ءِ بنریشگ افریقی ڈیھ ءَ گیشتر گندگ ءَ اتکگ ءُ اے ویروس ءِ بارو ءَ گوشگ بیت اِنت کہ نوزدہ سد ءُ چِل ءُ چار ءَ کریمیا ءَ اولی رند ءَ دیم ءَ اتکگ ءُ چریشی ءِ سبب ءَ کانگو ویروس سائنسی نام “کریمین ہیرمریجک کانگو فیور” ءِ نام ءَ زانگ بیت اِنت –

کانگو ویروس ءِ بارو ءَ گوشگ بیت اِنت کہ اے ویروس ءَ نادراہ تپ ءِ ارجان بیت اِنت ءُ آئی ءَ سر درد،ریشگ، بیزاری ءُ شد ءِ کمی،کمزوری، لاگری ءُ دپ ءَ دانگ درایگ ءُ چمانی گوات گرگ ءِ رنگ ءَ کنت اِنت –

گوشگ بیت اِنت ترندیں تپ ءِ سبب ءَ جان ءِ وزن ھم کم بیت اِنت ءُ چریشی ءَ ھون ءِ بندگ ھم باز کم بیت اِنت –

گوشگ بیت اِنت چرے نادراھی ءِ سبب ءَ نادراہ ءِ جسم ءَ ھون درایگ ءَ لگ اِت اِنت چندے وھدانی تہ ءَ آئی ءِ پُپ ءُ جگرانی سر ءَ اسر کنت ءُ چریشی ءَ گٹگ ھم اسرمند بنت ءُ دراھیں جان ءِ آزاہ کہ انسان ءِ تہ ءَ توان پیداک کنوک اَنت آ کار ءَ یلو کن اَنت ءُ چریشی ءِ سبب ءَ نادراہ مرگ ءِ ارجان بیت اِنت ءُ بیران بیت اِنت –

بیگواھیں مردمانی ھاتر ءَ جد ءُ جھد برجاہ مان ایت، وائس فار بلوچ مسنگ پرسنز

بلوچستان ءِ بنجاھی شھر شال ءَ بیگواھیں مردمانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ بوتگ مروچی زھرشانی ءَ چار ھزار ءُ سَے سد ءُ نود ءُ ھپت روچ سرجم بوتگ – مروچی زھرشانی بنجل ءَ جتائیں سیاسی ءُ چاگردی باسکاں کہ آھاں زالبول ھم گون بوتگ کہ بنجل ءَ اتکگ ءُ وائس فار بلوچ مسنگ پرسنز ءِ سرکماش نصراللہ بلوچ ءُ کمک سرکماش ماما قدیر بلوچ ءِ گون ءَدلپدردی درشان اتگ –

ھمے وھد ءَ آھاں تران کنان ءَ گوشتگ کہ بلوچستان ءِ تہ ءَ بیگواھیں مردمانی جیڑہ سک باز سنگین بوان انت – آھانی گوشگ ات کہ بیگواھیں مردمانی کھولاں وتی دوستیگیں مردمانی یلا کنائینگ ءِ ھاتر ءَ جھد کنوکاں دسکش کنگ ءِ ھاتر ءَ ریاستی ادارہ وڑ وڑیں پندل کنگ ءَ انت بلے بیگواھیں مردمانی کھول ءُ وائس فار بلوچ مسنگ پرسنز ءِ پُرایمنیں زھرشانی برجاہ دارگ بیت انت –

آھانی گوشگ ات کہ بیگواھیں مردمانی یل کنائینگ ءِ ھاتر ءَ جھد ءَ ھر تبکہ پگرے منوگراں بھر زورگ ءُ انسانیت ءِ رکینگ ءَ وتی کرد پیلو کنگی انت –

ماما قدیر بلوچ ءِ گوشگ ات کہ بلوچستان ءَ ریاستی زورکی، لشکر کشی مردمانی آوارجنی ءُ بیگواھی ءَ ھوار زالبولانی کم شرپی گِسانی چادر ءُ چار دیواری لگتمالی یکشل ءَ تیزی ءَ گون ءَ برجاہ انت-

بلوچستان ءِ تیابدپی شھر گوادر ءَ کرونا نادراھی ءِ پھریزی ءَ برجم کرتگیں لاک ڈاؤن ءِ مانیاروکیں دکاندارانی دکان بند کنگ بیتگ اَنت –

ڈپٹی کمشنر گوادر ءِ ھُکم ءَ تھسلدار گوادر یعقوب شیخ ءَ پولیس ءُ لیویز ءِ ھمراھی ءَ بیڑ برتگ –

ھالانی تہ ءَ گُشگ بیتگ کہ تھسلدار گوادر ءَ ایس او پیز ءِ بگیر داروکیں بازیں دکان سیل کرتگ اَنت –

یعقوب شیخ ءَ گُشتگ گوادر ءَ کرونا ءِ پھریز ءَ المی اِنت ایس او پیز بہ کن اِت –

یعقوب شیخ ءَ گُشتگ کہ بازیں روچاں پیسر انتزامیہ ءِ نیمگ ءَ ایس او پیز ءِ رھبند گوشگ بیتگ اَنت –

تھسلدار گوادر ءَ گُشتگ کہ گوستگیں روچ ءَ سی ایم او بلدیہ ءِ ھمراھی ءَ بازار ءِ تر ءُ تاب کرتگ دکاندارانی گون ءَ دزبندی کرتگ کہ وتی دکاناں رھبند ءِ ھساب ءَ بہ کن اِت –

آئی ءَ گُشتگ شھری ایس او پیز ءِ مانیاروکیں دکاناں سامان مہ زور اَنت –

آئی ءَ گُشتگ کہ جھانی وبا ءِ پھریز یکیں در اِنت شھری باید وتی جان ءُ ساھانی پھریز ءَ بہ کن اَنت ءُ ایس او پیز ءِ ھیالداری ءَ بہ کن اَنت اگاں نا گڑا رھبند سک ترند کنگ بنت –

زانگ بہ بیت جھانی وبا کرونا اے وھد ءَ بلوچستان ءِ آدگہ دمگانی تہ ءَ گیشتر کیچ ءُ گوادر ءَ پُر زور اِنت ءُ اے وھد ءَ گوادر ءَ بازیں مردمے ھمے نادراھی ءِ آماچ اَنت ءُ بازیں مردمے بیران ھم بیتگ اَنت –

اوگانستان ءِ راجی پھزگ ءِ کارگس ءِ رِد ءَ ماں بیست ءُ چار ادارانی تہ ءَ اوگان راجی لشکر ءِ تْرُندیں جنگی اُرشانی آسر ءَ 455 تالبانی جنگول کُشگ ءُ دگہ 232 سکی ءَ ٹپی بیتگ اَنت۔

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 455 تالبان جنگول کُشتگ ءُ 232 سک ٹپی ھم کُتگ اَنت۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت نگرھار، پکتیا، پکتیکا، لوگر، کندھار، ھِرات، پرھاب، جوزجان، بلگ، سمنگمان، ھِلمند، کندوز، بلگان ءُ کاپیسا ءِ ھند ءُ دمگاں کُتگ اَنت ءُ اِے اُرشاں اوگان راجی لشکر ءِ جنگی بالیگراباں تالبان ءِ بازیں سنگر ءُ بُنجاھانی سر ءَ تْرُندیں بمب گْواری ھم کُتگ اَنت –

وتی یکشلیں ٹیوٹر پیگاماں ءَ سرپدی ئِے داتگ کہ راجی آشوبی سِلاھبند ءُ اوگان راجی لشکر ءَ ھِرات ءِ دمگ گْوزرراہ، انجیل ءُ چشتی شریپ ءِ کِرّ ءُ کشاں 5 تالبان جنگی کمانداراں ھوار تالبان ءِ 54 ناشرکاریں جنگول کُشتگ اَنت۔ پہ تالبان ءِ پْروش ءَ اوگان راجی لشکر ءَ ولایت ھرات، ھلمند، کندھار ءُ دگہ ولایتاں بازیں کچے ءَ تاجگیں ملیٹری کمانڈو گوں جنگی ساز ءُ ساماناں راہ داتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 254 تالبان جنگول کُشگ ءُ 97 سکی ءَ ٹپی ھم بوت اَنت اوگان راجی لشکر ءَ ھمے جنگی اُرش گزنی، کندھار، ھِرات، پراہ، جوزجان، بلگ، سمنگان، ھِلمند، ٹکھر، کندوز، بلگان، کابُل ءُ کاپیسا ءِ ھند ءُ دمگاں کُتگ اِت اَنت۔

دومی نیمگ ءَ ماں کابُل شھر ءِ راجی ماڑی ءَ اشرپ گنی ءَ گوں بازیں گْوست ءِ جھادی سرکماش، راجدوستیں سروک، راجی پھزگ ءِ وزیر بسم اِلہ مھمدی ءُ راجی لشکر ءِ سرکماش ولی اھمدزی ءَ نِند ءُ نیادے کنان ءَ پرمان داتگ اوگان راج پہ تالبان ءِ پْروش ءَ تیار بہ کن اِت۔ ناشرکاریں تالبان ءِ ھلاپ ءَ راجی آشوبی سِلاھبندیں گلاں کُمک بہ کن اِت دیم ءَ گْوشتگ ئِے کہ داں وھدے کہ ما تالبان ءَ پْروش مہ دے ایں تالبان سُھل ءُ تْران ءَ ساڑی نہ بیت، ھو ما چار اِت ءُ مار اِت کہ ماں بیستیں سالاں تالبان پھک ءَ بدل بیتگ اَنت، بزاں اوگانستان ءِ دژمنانی دست ءَ ناشرکاریں تالبان گیشتر بے اسلامی ءُ زالم جوڑ بیتگ اَنت پمیشکا ابید جنگی پّروش ءَ دگہ راہ نیست باید انت زیت شش ماہ ءِ جنگی شَور ءُ مراسا اڈ کن اِت ءُ تالبان ءَ پْروش بہ دے اِت۔ ناشرکاریں تالبان راجمستری ءَ سِلاہ ءُ جنگ ءِ بیم ءَ پْروش دیگ ءَ باڑا اِنت بلے راجدوستی ایشی ءَ کبول نہ اَنت ءُ ما ایشی ءَ وت پْروش دے ایں۔

بلوچستان ءِ جتاجتائیں دمگاں پیش اتکگیں دگ ءِ وئیل ءُ مار ورگ ءَ ءُ سلنڈر ترکگ ءِ سبب ءَ سے مردم بیران بیتگ اَنت ءُ پنچ ٹپی بیتگ اَنت-

سربوتگیں ھالانی رِد ءَ مستونگ ءَ کردگاپ ءَ کسٹم ءِ ویگو گاڑی گوں ٹرک ءَ ڈِک وارتگ چریشی ءِ آسر ءَ کسٹم ءِ آفیسر سیلم طاھر بیران ءُ دگہ یک کارندھے علی احمد ٹپی بوتگ-

ھمے وڑ شال ءُ کراچی مزن شھدگ ءَ بینچہ عبدالرحمان دوراھی ءَ مزدا گاڑی یے چپی بوتگ ءُ چریشی ءِ آسر ءَ ڈرائیور ءَ ھوار دو مردم ٹپی بوتگ اَنت پہ دوا ءُ درمان کنگ ءِ ھاتر ءَ نادراھجاہ ءَ سر کنگ بوتگ اَنت –

بلوچستان باپاری شھر ھب ءِ نزیک ءَ ٹینکرے ءَ یک مردمے لگت داتگ ءُ آ بیران بوتگ آئی ءِ پجار عادل ء کریم بکش ءِ نام ءَ چہ بوتگ-

پنجگور ءَ دو جتائیں وئیلاں دو مردم ٹپی بوتگ اَنت – پنجگور چتکان بازار ءَ سلنڈر ءِ ترکگ ءَ طاھر ء ھدا بکش ٹپی بوتگ ءُ دکان ءِ سرجمیں سامان سُتکگ اَنت ٹپی بوتگیں مرد پہ دوا ءُ درمان کنگ ءِ ھاتر ءَ نادُراھجاہ ءَ برگ بوتگ – ھمے وڑ پنجگور سبزآپ ءَ وین گاڑی ءِ ٹائر ترک اِتگ ءُ وین گاڑی چپی بوتگ چریشی ءِ آسر ءَ یک مردمے ٹپی بوتگ-

ھُزدار ءِ دمگ نال ءَ زباد گریشگ ءَ یک ورنایے مارے ءَ وارتگ ءُ آ بیران بوتگ، بیران بوتگیں ورنا ءِ پجّار عبید ء مراد جان کوچکو گریشگ ءِ جھمنند بوتگ آ زباد گریشگ زمینانی سر ءَ دھکانکاری ءَ بوتگ-

آ گوستگیں روچ ءَ سُھب ءِ وھد ءَ ھمے زمینانی سر ءَ کار ءَ بوتگ کہ اناگاہ ءَ یک مارے ءَ ڈنگ جتگ ءُ پہ الاج کنگ ءِ ھاتر ءَ آ نادُراھجاہ ءَ برگ بوتگ بلے نیم راہ ءَ عبید ءَ وتی ساہ داتگ ءُ بیران بوتگ-

زانگ بہ بیت بلوچستان ءَ پیش اتکگیں دگ ءِ وئیلاں ھمک روچ لس مردمانی جان ءُ ساہ روگ ءَ اَنت ءُ چریشی ءِ سر ءَ لس سیاسی مردم سرکار ءِ سر ءَ ایراد گرگ ءُ دگاں “ھونواریں ” ءِ نام دیگ ءَ اَنت –

سیاسی مردمانی گوشگ اِنت کہ بلوچستان ءَ پرشت ءُ پروشکیں دگانی سر ءَ ھمک روچ گرانبھائیں جان زوال بیگ ءَ اَنت بلے سرکار تنی وھدی واب اِنت ءُ دگانی شر کنگ ءُ دگانی سر ءَ ترند روکیں گاڑیانی گر ءُ دار ءَ بے سوب بیتگ –

نبشتانک: منی شال ءِ کامریڈیں بانُک

نبشتہ کار : میرین بلوچ

دی بلوچستان پوسٹ

مرچی تو بے کساس گیر آیگ ءَ ئے چیاکہ شال ءِ ھما موسم ءُ برپانی رِچگ ءِ ندارگ تنیگت ءَ من ءَ بے کساس تاھیر دے اَنت ھما سریاب روڈ ءِ سرے کپتگیں ھُشکیں تاک ءُ سرینہ ھوٹل ءُ دگہ بازیں اما دمک ءُ در تنی وھدی یات کائینت کہ تو ھموداں چہ گوستگ ءِ بلے کامریڈ تو گپ ءِ زان ئے من مُدام چلتن ءِ کوہ ءِ ٹُل ءَ ننداں تئی وشبوئیں گوات من ءَ بے کساس تاھیر دنت ءُ ھمے یاتاں گوں دوچار کپان ءُ وت ءَ آرام دے آں –

منی شال ءِ کامریڈیں بانُک مرچی ھزار ارمان ءُ ھزار تورشت ءَ گوں لھتے بے سریں رھبند ٹھینگایاں بیت کنت تئی دل آزاری بہ بیت بلے منی مکسد کتن اے نہ انت کہ تئی ھزار ٹپاں من واد ایر بکناں ءُ ترا بے آرام بکناں گُڑا من چہ ترا پھلی لوٹاں اگاں بلکیں منی بے سریں رھبنداں چہ تئی دل آزاری ببی گڑا وتی گنوُکیں سرمچار ءَ دل اوں ستک پھل کن-

کامریڈیں بانُک من ءَ بکش کہ من تئی واستا جوانیں اسکرپٹ ءِ تیار ھم کُرت نکُرت ءُ دومی گور ءَ من ءَ پمیشکا گوں تو مھبت ءِ کہ ترا گوں کتاباں مھبت اِنت ترا گوں وتی مکسد ءَ مھبت اِنت بلے بانُک من ءَ گوں تو مھبت اِنت چیاکہ تو منی مکسد ءِ منی منزل ءِ منی کتابے –

وھدیکہ تو من ءَ یلہ بدئے ءِ گُڑا منی گور ءَ بے وسی ءُ نا اُمیدی ءُ شرمندگی ءَ ابید دگہ ھچ نیست چیاکہ ھزار واب گوں ترا دیستگ اَت کہ گوں من گون بوتگ ءُ گومن ھور ءُ ھواراں بانُک چینچُک کسم گوں ترا وارتگ ءُ تو کُجا کُجا گوں نبوتگ اَنت برے ھُزدار، ھاران ءُ آواران برے بولان، چلتن ءُ کردگاپ برے تربت ءُ شاپک ءِ کوہ ءُ ٹُل ءِ سر ءَ تو گوں من گون بوتگ ئے اے دُرست تئی درُشم ءَ جن اَنت بانُک اے تئی اُمیت ءَ پہ زندگ انت بلے ھژدری تو وت ءَ ارزشت بدے تو کہ بانک وت ءَ ارزشت مدئے ءِ اے منی گور ءَ ھچ ارزشت نہ دے انت-

گپ ءِ زان ئے کامریڈ من مدام داکتر ءِ گوشاں ھمے اُشک کُتگ سبز سبز ءُ سبز بلوچ بلے کامریڈ من مرچی سرپد بوتگاں کہ داکتر مدام سبز سبز ، سبز بلوچ بزاں بلوچستان ءِ سرزمین ! کامریڈ مرچی ھزار شزردیں ماتانی دل ءُ ھزار کوریں دِشتارانی واھگ ءُ ھزار گار ءُ بیگواہ اے کُجا شُت انت زمین ءَ وارتگ انت یا آزمان ءَ پِلکت انت بلے چے بہ گوش آں کامریڈ اے کَرّانی دیار انت اد ءَ بنی آدم ءِ گوشداروک کَے بیت

کامریڈ شال ءِ پراداریں گواش کوہ ءُ در ءُ تربت ءِ گرمیں گوات ءَ ھم تو منی دل ءُ دماگ ءَ نشتگ اَنت کامریڈ اگاں تو من ءَ یلہ بہ کن ئے تو بزاں من مُرتگاں من اگاں بانُک ءِ مھبت ءَ چہ آشنا بہ بوتیناں یکین باور کن من مھبت ءَ چہ دور گستا بوت انت ءُ مھبت ءِ چادر کدی ھم وتی کوپگان نکُرتگ اَت-

بلے چے بہ کناں چیاکہ تو منی مات ءِ رنگ ءَ گندگ بہ ئے من مُدام ترا گنداں من وتی مات ءَ شوھاز کناں ءُ ھون ءِ شریداری ءِ پاسداری من چہ ترا در برتگ کامریڈیں بانُک من ترا کُجا کُجا ندیستگ برے اے ھلک ءُ برے آ میتگ ءُ برے آ دمک ءُ در اے کوہ ءُ آ جور ءُ اے گیابان ءُ آ گُلستان اے دُرستیں جاہ ءُ ھنداں من ترا دیستگ بانُک تئی ھماروچیں گپ ءُ کندگ ءُ ٹاک تنی وھدی منی دل ءِ تہ ءَ زندگ انت چیاکہ تو منی دل ءِ تہ ءَ زندگے چیاکہ کامریڈ غلام حسین شوھاز ءُ عطاشاد مبارک قاضی ءُ سلمان ھمل ءِ شعرانی سَبک من چہ ترا دربرتگ-

کامریڈ زندگی ءِ تہ ءَ من مرچاں بس دو بنی آدم ءَ ارزشت دے آں یکے تو ئِے ءُ دومی بھار! چیاکہ منی ھستی ءُ زیبائی منی پُشت پد شُما اِت ھمبل من وھدے گُل ءُ بھار گُشت تو اے گِلگ ءَ مکن کہ من تئی نام ءَ نگران چیاکہ گُل منی زمین ءُ بھار منی زمین ءِ سرے درچک ءُ دار ھمبل تو اے ھم پھمگ ءِ جھد ءَ بکن کہ ھُشکیں زمین ھم ھُدا ءِ درد ءَ نہ وارت ھمبل تو بلکیں بھار ءَ مزان ئے بلے من جوان زاناں چیاکہ آئی ءِ تہ ءَ من برے وت ءَ ءُ برے وتی سنگتانی شوھاز ءَ درکپاں ءُ بھار ٹھک ءُ کندگ مُدام من ءَ ھمے سکین ءَ دنت کہ تئی روکیں کندیل ءِ روژنائی ءِ بشارت ءَ من ءَ دنت ھمبل اگاں من اے کوڈئیں جھان چہ سپر کُت تو منی بھار جان ءِ ھیال داری ءَ بکن چیاکہ بھار دور نہ انت بلکیں تئی دل ءِ تہ ءَ انت تئی رُو ءَ گوں پیوند ءِ ھمے چلتن ءُ بولان ءِ کوھاں گوں یلچر انت بس من گُڈ سر ءَ ھمے گوشگ لوٹ آں کہ من مُرتگ انت من ءَ وجود نیست ءُ منی رُو ءَ چُنت سالیں کہ مُرتگ ءُ منی بَچ اتگیں بس آزگ انت ءُ من وت نزاناں کہ آ کد باریں ھاکاں گوں ھوار بنت ءُ منی تہ ءِ رُو منی جندئے نہ انت بلکیں بلوچستان ءِ ھزار میلاں چہ دور کوہ چلتن ءُ کردگاپ ءُ تگران ءُ سیاھجی ءِ کوھاں گوں دپن انت ءُ آھیانی رُو من ءَ گوں پیوند انت کہ آئی پھچان( دْرستی) من ءَ، بس من ھمے گوشگ لوٹاں ” نی کنے ٹی زندہ اوس”-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کابل: امریکی بی 52 ءِ بالگرداں تالبان ءِ بازیں بنجلانی سر ءَ بمبگواری کرتگ، امریکہ ءِ برزی اُرش اُستان ھرات ءَ کنگ بیتگ اَنت –

انگریزی ھالتاک عرب نیوز ءَ اوگان ءِ واکدار ءَ گپ کنان ءَ گوشتگ ھرات ءِ کش ءُ گوراں تالبان ءُ اگان لشکر ءِ میان ءَ ترندیں جنگ ءُ چوپ یکشل ءَ برجاہ اَنت –

دومی نیمگ ءَ تالبان اوگانستان ءِ سَے مزنیں شھراں پترتگ ءُ جنگول شھراں سرکاری پوج ءِ دست ءَ گرگ ءِ جھد ءَ اَنت -درملکی ھبررساں ایجنسی ءِ رد ءَ اوگانستان ءِ سَے مزنیں شھراں تالبان ءِ اُرش برجاہ اَنت –

ھالانی تہ ءَ گوشگ بیتگ کہ جنگول اوگانستان ءِ شھر ھرات، لشکرگاہ ءُ کندھار ءَ پترتگ اَنت، لشکرگاہ ءَ اے ھال ھم سر بیتگ کہ جنگول گورنر ھاوس ءَ بس لھتے سد میٹر ءِ دوری ءَ اَنت بلے آ داں شپ دیم ءَ پشتکنزی کنگ بیتگ اَنت –

دومی نیمگ ءَ لشکر گاہ ءَ ھم اوگان ءِ لشکر ءِ بمبگواری ءَ ھسپتالے تباہ بیتگ ءُ اوگان لشکر ءِ نیمگ ءَ ھمے سبب ءَ ھسپتال ءِ سر ءَ اُرش کنگ بیتگ کہ اے ھسپتال ءِ تہ ءَ تالبانانی درمان بیگ ءَ اِنت –

دومی نیمگ ءَ لشکرگاہ ءَ ڈاکٹر مھمد دین ناریوال ءَ اے پی ءَ گپ کنان ءَ آئی ءَ اُستان ءِ سرکار ءَ گُشتگ کہ ’لشکر گاہ ءَ آیانی ھسپتال وزارت دفاع ءِ نیمگ ءُ سر بیتگیں سرپدیانی بنیات ءَ نشانگ کنگ بیتگ ‘-

ڈاکٹر مھمد دین ناریوال ءِ رد ءَ آیاں گُشتگ کہ اے اُرش ردی ءِ سر ءَ کنگ بیتگ ءُ اے ھال ردی ءَ سر بیتگ کہ اے ھسپتال ءَ تالبان جاڑیگ اَنت –

آئی ءِ رد ءَ راستی ءَ تالبان شھر ءِ دومی ھسپتالاں درمان کنگ بیگ ءَ اَنت- اُستان ءِ کونسل ءِ سروک عطا اللہ افغان ءَ اے ھال راست کرتگ ءُ گُشتگ کہ افغان برزی ارشکاران ھسپتال ءِ سر ءَ اُرش کرتگ ءُ چریشی ءَ یک مردمے مرتگ –

ھمے وڑ دومی نیمگ ءَ تالبان ءِ جارکش ذبیح اللہ مجاھد ءَ اوگان ءِ برزی ارشکارانی اُرش ءَ ھسپتال ءِ نشانگ راستگ کرتگ ءُ گُشتگ کہ لشکرگاہ ءَ ھستیں ھسپتال ءِ سر ءَ اُرش ءَ انڈین بالیگر کارمرد کنگ بیتگ اَنت ءُ چریشی ءَ درمان ءِ مزنیں جاہ ءَ آس کپتگ –

آئی ءَ گُشتگ کہ ھسپتال ءِ سر ءَ اُرش ھما وھد ءَ کنگ بیتگ کہ تالبان زرباری لشکر گاہ ءِ ھند ءِ نیمگ ءَ پیش گامی کنگ ءَ بیتگ اَنت ءُ اے وھد ءَ اوگان ءِ لشکر ءِ گون ءَ ھم مزنیں کچے ءَ جنگ برجاہ اِنت –

دمگی مردماں ھم گُشتگ کہ دمگ ءَ اوگان جنگول ءُ اوگان لشکر ءِ میان ءَ ترندیں جنگ ءُ چوپ ھم برجاہ اَنت –

بلوچستان ءِ دمگ آواران ءَ پاکستانی پوج ءِ پانگس ءِ ناشناسیں سلاہ بندیں مردمان اُرش کُتگ، اُرش ءِ زمہ واری سلاہ بندیں آجوئی لوٹوکیں گل بلوچستان لبریشن فرنٹ ءَ من اِتگ۔

سربوتگیں ھالانی رِد ءَ آواران ءِ دمگ زرانکولی کور ءِ لشکر ءِ چوکی ءِ سر ءَ سلاہ بنداں اُرش کتگ ءُ اُرش داں نیم کلاک ءَ برجاہ بوتگ

اُرش ءِ آسر ءَ لشکر ءَ جانی ءُ مالی تاوان ءِ گمان اِنت

دومی نیمگ ءَ بلوچ آجوئی لوٹوکیں گل بلوچستان لبریشن فرنٹ ءَ رسانکدر ءَ وتی یک درشانے ءِ تہ ءَ گْوشتگ کہ مئے سرمچاراں ضلع آواران ءِ دمگ زرانکولی کور ءَ ھستیں زورگریں لشکر چوکی ءِ سر ءَ گوں راکٹ ءُ مزنیں سلاھاں اُرش کتگ ءُ نیم کلاک ءَ برجاھیں میڑ ءَ لشکر ءَ مزنیں کچے ءَ جانی ءُ مالی تاوان ءِ دیمپان کنگ کپتگ-

جارکش ءَ دیمتر ءَ گْوشتگ کہ زورگریں لشکر ءُ آئی کمکارانی سر ءَ داں زورگپتگیں بلوچستان ءِ آجوئی ءَ برجاہ مان بنت-