TBP Balochi

پاکستانی پوج ءَ مند ءَ ھشت مردم ْآوار جنی ءَ پد بیگواہ کتگ اَنت کہ اشانی تہءَ پنچ کس یلو کرتگ اَنت ءُ سَے کس دنیگت بیگواہ اَنت۔

سربوتگیں ھالانی رِد ءَ گوستگیں روچ ءَ مند ءُ دشت ءِ میان ءَ کوھی دمگ بانسر ، کلّکور ، ننگاور ءَ پاکستانی پوج ءَ راہ ءُ در بستگ بوتگ اَنت مزنیں کچے ءَ لشکر کشی کتگ –

ھمے لشکر کشی ءِ میان ءَ پاکستانی پوج ءَ ھشت مردم آوار جتگ ءُ گوں وت برتگ اَنت، اے ھشتیں مردم پاکستانی پوج ءَ ھما وھد ءَ آوار جتگ اَنت کہ آ ھمے دمگ ءَ پکنک ءَ بوتگ اَنت –

پاکستانی پوج ءِ دست ءَ آوار جنگ بوتگیں مردمانی پجّار سلمان ء عبدالرسول جھمنند گَواک، گُلزار ء بالاچ جھمنند گوبرد ، عادل ء نادل جھمنند گوبرد ، نعیم ء ندیم جھمنند گواک ، باسط ء سعید جھمنند گواک عبید ء مجید جھمنند گواک ءُ دگہ دو مردمانی پجّار انگت نہ بوتگ اَنت –

اِھوالکارانی رِد ءَ آوار جنگ بوتگیں مردمانی لھتے مروچی شپ ءَ آجو بوتگ اَنت، وھدیکہ اشانی ھمراھی ءَ آوار جنگ بوتگیں سلمان ء عبدالرسول ءُ گلزار ء بالاچ ءُ نئیم ء ندیم انگت بیگواہ ءَ اَنت –

دمگی مردمانی رِد ءَ پاکستانی پوج ءَ دو روچ اِنت کہ کترینز ءِ راہ ءُ در بستگ ءُ نشتگ مردماں روگ ءَ آیگ ءَ نئیلگ ءَ اِنت –

زانگ بہ بیت بلوچستان ءِ گیشتریں دمگاں چُشیں روچ ءِ نہ گوزیت اِنت کہ پاکستانی پوج ءِ زمینی ءُ آزمانی لشکر کشی برجاہ نہ اِنت، چُشیں روچے نہ گوزیت کہ زورانسری آوار جنی نہ بوگ ءَ اِنت –

دبئی ءَ آئی سی سی ٹی ٹوئنٹی ورلڈ کرکٹ گوازی ءَ بھارت ءَ اوگانستان شست ءُ شش رنزاں پروش داتگ ءُ گوازی وتی نام ءَ کُتگ –

اوگانستان ءَ ٹاس کٹیتگ ءُ اولسر ءَ بالنگ کنگ ءِ پیسلہ کُتگ،  بھارت ءِ لیبیاں جوانی ءَ گوازی کنان ءَ بیست اوورانی تہ ءَ  اوگانستان ءِ دیم ءَدو سد ءُ دہ رنانی ٹارگٹ ایر کُتگ –

اوگانستان ءَ ٹارگٹ ءِ پروشگے ھاتر ءَ گوازی پٹ ءَ ایرکپت بلے بے سوب بوتگ، اوگانستان ءِ لئیبیاں بیست اوورانی تہ ءَ یکسد ءُ چِل ءُ چاررنز جوڑ کُرتگ –

بھارت ءِ نیمگ ءَ روھِت شرما ءُ کے ایل راھل ءَ جونیں لیب پیش داشت ءُ ھردوکاں نیم سنچری اڈ کت – روھِت ءَ وتی ٹیم ءِھاتر ءَدرساں گیش ھپتاد ءُ چار رن جوڈ کرت ھمے وڈ راھل ءَ چُل ءُ ھشت بالاں شست ءُ نھ رن جوڈ کرت – پنت ءَ سینزدہ بالاں بیست ءُ ھپتوھدیکہ پانڈیا ءَ سِی ءُ پنچ رن جوڈینت – 

اوگانستان ءِ نیمگ ءَ حضرت اللہ زازئی ءَ سینزدہ رحمان اللہ ءَ نوزدہ گلبدین ءَ ھژدہ نجیب اللہ ءَ یانزدہ رن جوڈ کرتگ – 

بھارت ءِ نیمگ ءَ محمد سمیع ءَ سَے اشون ءَ دو بمراہ ءُ جڈیجہ ءَ یک یک لیبی ءِ آؤٹ کتگ – 

دبئی انٹر نیشنل کرکٹ پٹ ءَ نیوزلینڈ ءُ اسکاٹ لینڈ ءِ میان ءَ بوتگیں گوازی ءَ نیوز لینڈ ءَ شانزدہ رناں باج برتگ – 

اسکاٹ لینڈ ءَ ٹاس کٹیتگ اولسر ءَ بالنگ کنگے پیسلہ کتگ گڑا نیوز لینڈ ءَ بیست اوررانی تہ ءَ پنچ وکٹانی تاوان ءَ یکسد ءُ ھپتاد ءُ دو ٹارگٹ داتگ – 

ٹارگٹ ءِ پروشگے ھاتر ءَ اسکاٹ لینڈ پٹ ءَ اتکگ ءُ آئی ءَ بیست اوورانی تہ ءَ پنچ وکٹانی تاوان ءَ بس یکسدو ءُ یکسدو پنجاہ ءُ شش رن جوڈینتگ-

دمگی ٹیکہ داراں مکن کنیں زورگیریں پوج ءِ سامراجی شوربندیانی بھر مہ بنت – میجر گوھرام

سربوتگیں ھالانی رد ءَ ناشناسیں سلاہ بندیں مردماں کیچ ءِ دمگ ھوشاپ ءَ پاکستانی پوج ءِ ایف ڈبلیو او ءِ بندساچی کمپنی ءِ مشین مانداشتگ اَنت –

ھالانی رِد ءَ ایف ڈبلیو او ءِ مشین گوستگیں شپ ءَ ھوشاپ سنگ بازار ءَ مراد بکش ہوٹل ءِ دیم ءَ ماندارگ بوتگ انت – اشانی ماندارگے زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں ھوشاپ سنگ بازار ءَ مراد بکش ھوٹل ءِ دیم ءَ پاکستانی پوج ءِ بند ساچی کمپنی ایف ڈبلیو او مشین مانداشتگ انت –

جارکش ءَ دیمتر ءَ وتی درشان ءِ تہ ءَ گوشتگ کہ سی پیک روٹ ءِ نام ءَ پوجی کمپنی بلوچستان ءِ مردماں اے پروجیکٹ روٹ نہ تھنا در پہ در کنگ ءَ لاچار کنگ ءَ اِنت بلکینہ ھمے وتساچیں سامراجی پروجیکٹ ءِ نام ءَ ایردستیں بلوچستان ءِ تہ ءَ وتی ایردستی ءَ مھکم کنگ لوٹیت ءُ بلوچ راج ءِ چکچینی ءَ کنگ ءَ انت –

جارکش میجر گوھرام بلوچ ءَ گوشتگ ما یکرندے پدا دمگی ٹیکہ داراں مکن کنیں کہ آ زورگیریں پوج ءِ سامراجی بند ساچی شوربندیانی بھر مہ بنت اگاں ناں وتی ھر وڑیں جانی ءُ مالی تاوان ءِ زمّہ وار وت انت –

جارکش ءَ گڈسر ءَ وتی درشان ءِ تہ ءَ گوشتگ کہ ریاستی پوج ءُ آئی ءِ کمک کارانی سر ءَ مئے اُرش مادریں بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ بیگواھیں مردمانی پانکجیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ چار سد ءُ ھشتاد ءُ چار روچ سرجم بوتگ – جتائیں پگر ءِ منوگراں بنجل ءِ تر ءُ تاب کتگ بیگواھیں مردمانی کھول گوم ءَ دلپدردی درشان اتگ –

ھمے وھد ءَ وائس فار بلوش مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءَ روچ پہ روچ جاور ھال ھراب تر بوان انت اے جاورھالاں انسانی ھکانی ادارھانی ھچ نہ گوشگ دلپدردی یے –

آئی ءِ گوشگ ات کہ بلوچستان ءَ ریاستی ادارھانی نیمگ ءَ انسانی ھکانی لگتمالی برجاہ انت بلوچستان ءِ تہ چیریں ادارھانی کارمند ءُ سیکورٹی پوج دست گوشیں باسکاں زورانسری آوار جنگ انت بیگواھیں مردمانی ھاتر ءَ توار چست کنوکیں باسکاں ترسینگے کوشست بوھگ انت بلے اے ریاست ءِ وتی اخلاقی پروش انت کہ آئی ءَ بلوچ ءَ چہ زھنی ھوالہ وتی جنگ ءَ چہ پروش وارتگ-

ماما قدیر بلوچ ءِ گوشگ ات کہ ریاست ءِ اے درسیں زوراکیاں ابید بلوچ ورناہ چہ وتی پرایمنیں جھد دسکش نہ بنت ءُ وائس فار بلوچ مسنگ پرسنز ءِ ھمراھی ءَ بیگواھیں مردمانی یل کنائینگے جھد ءَ برجاہ دار انت –

نماسگ ءِ راہ ءَ ودار کنوکیں بیگواھیں عظیم دوست ءِ بلک ءَ اے امروز یلو کرتگ –

عظیم دوست شش سال ءَ پیسر پاکستانی پوج ءَ سَے جولائی دوھزار ءُ پانزدہ ءَ چہ گوادر ءَ زورانسری آوار جتگ ءُ برتگ کہ انگت ءَ بیگواہ اِنت –

بیگواھیں عظیم دوست بلوچی زبان ءِ ورنائیں شائرے بیتگ کہ آ پوج ءَ دزگیر کنگ ءَ پد بیگواہ کرتگ –

گار بیتگیں مردم ءِ کھول ءَ عظیم دوست ءِ یل کنائینگ ءِ واستا ھر رنگ ءَ جھد بلے انگت ءَ یلو نہ بیتگ –

تراک تیابدپی شھر گوادر ءِ دمگ جیونی ءَ بیتگ –

دمگی مردمانی رد ءَ تراک پرپٹے ءَ پِٹ بیتگ کہ چریشی ءَ ترک اِتگ ءُ تراک بیتگ، جیونی ءِ تھسلدار ءِ لوگ ءَ ڈن اوشتوکیں پَرپٹ ءَ چہ تراک بیتگ ءُ چریشی ءَ دگہ جانی تاوانانی ھال نہ بیتگ اَنت –

دمگی مردمانی رد ءَ تراک ءِ نزیک ءَ اوشتوکیں گاڑیاں کمے کساس ءَ تاوان بیتگ بلے اے درگت ءَ انتزامیہ ءِ گپ دیم ءَ نیتکگ اَنت نانکہ دگہ گلے ءَ تراک ءِ زمہ واری پہ وت ءَ زرتگ –

بلوچستان ءِ دمگ لسبیلہ یک مردمے ءِ لاش دزکپتگ، بلے مرگ ءِ سبب زانگ نہ بیتگ-

گیشیں ھالانی رد ءَ لسبیلہ ءِ دمگ اوتھل ءِ کوھی دمگ کھرڑی ءَ یک مردمے ءِ لاش دزکپتگ کہ آئی ءِ پجار مھمد عمر جاموٹ ءِ نام ءَ زانگ بیتگ کہ ابو ھوٹل ءِ جھمنند اِنت –

لاش سول ھسپتال ءَ برگ بیتگ کہ مرگ ءِ سبب زانگ نہ بیتگ –

ھمے وڑ گوستگیں روچ ءَ بلوچستان ءِ تیابدپی دمگ گوادر ءَ ھم یک مردمے ءِ لاش دزکپتگ –

لاش پدی زر ءَ دزکپتگ کہ آئی ءِ پجار رشید ء حسن ءِ نام ءَ زانگ بیتگ –

دمگی مردمانی رد ءَ اے مرد نشہ آماچیں مردمے بیتگ ءُ گوستگیں روچ ءَ گار بیتگ ءُ دومی روچ ءَ آئی ءِ لاش دزکپتگ –

نبشتانک: مساپر ءُ جاتوگ

نبشتہ کار: شاھد اھمد

دی بلوچستان پوسٹ

شپ ءِ وھد اَت یک مردے یک جنگلے ءَ روگ ءَ اَت چاریں نیمگاں سیاہ ءُ تَھار اَت آزمان سیاہ سیاھیں جمبراں اُرش کتگ اَت گْوات ءَ دم بُرتگ اَت ھچ کَشّگ ءَ نہ اَت ءُ گْوشے یکے ءَ دْرچکانی تاک دم کُتگ اَنت سَجھیں جنگل ھاموش اَت شپ ءِ دْوازدہ بج بوّگ ءَ اَت۔

شپ ءِ تھاری ءُ ھاموشی مساپر ءِ دل ءَ میزان میزان وتی سِھر ءِ سان کنگ ءَ اَت یک نیمگے ءَ بے گمانیں تُرسے آئی ءِ دل ءَ وَدّان بوان اَت انچوکہ اَود ءَ ھچ نیست اَت بلے مساپر وت دل ءَ چاریں نیمگاں چارگ ءَ پد گڑا وتی گام تیز کُت اَنت میزان میزان ءَ مساپر ءَ مارشت بوگ ءَ اَت کہ یک مردے آئی ءِ ھمراھی ءَ پُشت ءَ پیداک اَت، آ روگ روگ ءَ اوشتات ءُ آئی ءَ پُشت ءَ چار اِت اود ءَ کس نیست اَت گڑا آئی ءَ وتی راستیں نیمگ ءَ چار اِت اد ءَ ھم کس نیست اَت بلے چَپّیں نیمگ ءَ مساپر ءَ چپیں نیمگ ءَ چار اِت۔

ھو! اے نیمگ ءَ چیزے ھست اَت بلکیں جنینے اَت کہ وتی سر ءِ مِدْ دراج کُتگ ءُ اوشتاتگ اَت ھمے ساھت ءَ مساپر ءِ دل سرد بوت ءُ گْوات ءَ کَشّگ بندات کُت ءُ جنین گنوکانی پیم ءَ لَرزگ ءَ لگ اِت منی ھُدا جاتوگ! مساپر ءَ وتی دل ءِ تہ ءَ گْوشت۔

آئی ءَ اَود ءَ چِہ تَچّگی اَت بلے آئی پاداں گُشّے یکے ءَ سِنگّانی گوم ءَ بَستگ اِت اَنت آئی ءَ چمود ءَ چِہ سُرّگی نہ اَت آ بس جاتوگ ءَ چارگ ءَ اَت پیشانی ءَ مزن مزنیں ائید پِٹّگ ءَ اَت ءُ آئی ءِ ھون جم اِتگ اَت چونیں لگوری یے ! آئی ءَ وت ءَ وت گْوشت ءُ وت دلیر کنگ ءِ جُھد کُت ءُ گْوشت ءِ دگنیا ءِ تہ ءَ جاتوگ نیست اِنت۔

مساپر ءَ زانتگ اَت ناں دگنیا ءِ تہ ءَ جِن ھست نئیکہ جاتوگ انچوکہ آئی ءَ دیست ئِے جاتوگ پَھم اِتگ اِت اَت کہ آ یک داربروش اَت کہ ایر اَت مساپر ءِ دل ءَ لوٹ اِت کہ بِہ کنداں بلے آئی ءَ اے وڑ نہ کُت کندگ ءَ چِہ تُرسگ ءَ اَت ھمے ساھت ءَ یک مزنیں گُگّوے دْرچک ءِ سر ءَ بال کنان ءُ مساپر ءِ کَش ءُ کِرا گْوست ءُ مساپر کُوکار در اَتک گڑا آئی ءَ وتی دوئیں دست مُشت کُت ءُ تَتکْ دیم پہ وتی لوگ ءِ نیمگ ءَ وھدے کہ آئی ءَ وت ءَ کمبل پِر دات ءُ آئی ءِ جسم سک گرم بوگ ءَ اَت آ بازیں روچاں تَپی بوت ءُ بار بار گْوشگ ءَ اَت ۔ من ءَ تی کِرا نہ تُرس اِیت جاتوگ اد ءَ چہ بُرو۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربیا ءَ بیوکیں جھانی بوکسور ءِ تہ ءَ روکپتی بلوچستان ءَ بندوکیں دانیال شاہ بکش ءَ جھانی داد گپتگ ءُ وتی نام ءَ کرتگ –

گوشگ بیتگ کہ ایران ءِ راجدپتر ءِ تہ ءَ جھانی بوکسینگ ءِ تہ ءَ روکپتی بلوچستان ءَ بندوکیں دانیال شاہ بکش اولی بوکسور اِنت کہ آئی ءَ جھانی بوکسنگ ءِ تہ ءَ داد گپتگ –

دانیال شاہ بکش ءَ چِل کلو گرام “ادگاراس اسکوردیلیس ” کرتگ ءُ سیمی پائنل ءَ سر بیتگ ءُ اود ءَ آئی ءَ جھانی بوکسینگ ءَ وتی نام رژنا کرتگ –

دانیال شاہ بکش ءِ جھانی داد ءِ گرگ ءَ آئی ءَ سوبمندی ءُ ایران ءِ راجدپتر ءَ جھانی اولی مردم گوشگ ءُ آئی ءِ ستاشانی بیگ ءَ اِنت –

بلوچ اسٹوڈنٹس آرگنائزیشن ءِ جارکش ءَ وتی بیان ءِ تہ ءَ گوشتگ کہ بی ایس او ءِ بنجاھی پتر ءِ باسک اے وھد ءَ مکران ءَ گل ءِ کارانی واستا تر ءُ تاب ءَ اِنت، اود ءَ گوادر، پسنی، جیونی،تمپ ءُ کیچ ءَ وانگی بنجلاں تر ءُ تاب ءُ جتا جتائیں وانگی مراگشاں بھر زرتگ –

گل ءِ پتر ءِ رھشوناں وتی تر ءُ تاب ءِ وھد ءَ استاد،نودربر ءُ سیاسی رھشوناں گند ءُ نند کرتگ، گل ءِ رھشون مروچی تربت یونیورسٹی ءَ استاد ءُ نودربرانی گندوک ءَ روگ ءَ بیتگ اَنت کہ آ گیٹ ءِ دپ ءَ وتسر ءَ دارگ بیتگ اَنت ھمے وھد ءَ یونیورسٹی ءِ انتزامیہ ءُ چیف سیکورٹی ءِ گون ءَ رھوت کرتگ گڑا ایاں گشتگ کہ یونیورسٹی ءَ نودربر رھشونانی روگ ءَ سرجم ءَ پابندی اِنت-

جارکش ءَ گشتگ کہ بہ بستار ءِ دیمروئی نودربر گل ءِ نیمگ ءَ ما بلوچستان ءِ نودربرانی توار اِنت – مئے مول ءُ مراد نودربر ءُ استادانی میان ءَ یکجاھی ءِ کرد ءِ پیلو کنگ اِنت ءُ وانگی ادارھاں راستیں سیاست ءُ باوستانی سرکلانی تہ ءَ آباد کنگ نودربراں ھر کجا ھمک رنگیں وانگی، سیاسی پرکاری ءُ مراگشاں اجازت ھست اِنت –

آئی ءَ گشتگ کہ تربت یونیورسٹی ءِ انتزامیہ ءَ اولی روچ ءَ چہ استاد ءُ نودربرانی توار گٹگیر کرتگ، یونیورسٹی ءِ انتزامیہ ءِ بے رھبندی ءِ ھلاپ ءَ اگاں نودربر گہ بہ کن اَنت گڑا نودربر ڈراپ آوٹ کنگ ءِ بیھار دیگ بنت – یک وانگی ادارھے ءَ سیاسی سرکلنگ ءِ سر ءَ پابندی پدردی اِنت-

جارکش ءَ گشتگ کہ تربت یونیورسٹی ءَ جتا جتائیں ٹولی ءُ مزنیں ٹولی دارگ بیتگ اَنت ءُ آیاں گل سازی ءُ دگہ پرکاریاں اجازت دیگ ءَ نہ اِنت تچکی ءَ سیاسی پراگرامات برجم کنگ ءُ نودربراں زورانسری بھر زیرگ ءِ کڈنی ءَ کن اَنت بلے بی ایس او ءِ وڑیں نودربر رھشونیں گلے ءِ بنجاھی پتر ءَ گیٹ ءِ دپ ءَ دارگ ءُ تہ ءَ روگ ءَ نہ ھیلگ بازیں جست ایر کن اَنت –

جارکش ءَ گشتگ کہ تربت یونیورسٹی ءِ انتزامیہ ءَ نودربرانی توار بند کرتگ ءُ کرپشن وتمانی ءِ ردومینگ ءُ وانگی سنچ ءَ ناگیگ کنگ ءِ پندل ءَ کنگ ءَ اِنت ما اشی ءَ ھچبر اجازت نہ دے – انتزامیہ نودربر ءُ اسٹاف ءِ گون ءَ وتی رویشاں تچک بہ کنت اگاں گڑا نودربراں ھوار بہ ایں انتزامیہ ءِ ھلاپ ءَ ترندیں گامگیج زورگ بیت اِنت –

گڈی ءَ جارکش ءَ گل ءِ بنجاھی پتر ءَ یونیورسٹی ءِ انتزامیہ ءِ نیمگ ءَ تہ ءَ نہ ھیلگ ءُ انتزامیہ ءِ زوراکیں پالیسانی ھلاپ ءَ بی ایس او ءِ نیمگ ءَ باندا سَے نومبر ءَ کیچ، گوادر، اوتھل ءُ مستونگ ءَ زھرشانیانی جار پرینتگ اَنت –