TBP Balochi

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ یک بندیگیں یک بلوچے پاھو دیگ بیتگ –

پاھو دیگ بیتگیں مردم ءِ پجار جواد قلجائی جھمننف شیر آباد دزاپ ءِ نام ءَ زانگ بیتگ –

ایران ءِ اُستانانی تہ ءَ سیستان ءُ بلوچستان ءَ پاھو دیگانی لڑ درستیں جاھاں گیشتر گندگ ءَ آیگ ءَ اَنت –

گوستگیں روچاں ھم یک کسان سالے ورنایے ایرانی آمیدگس ءِ پرمان ءَ پاھو دیگ بیتگ اَت –

روکپتی بلوچستان ءَ گیشتریں مردمانی پاھو نامہ کوش، نشہ باپاری ءُ ڈیھ ءِ بگیری ءَ چِست بیتگیں توارانی گٹگیر کنگ ءَ بیگ ءَ اَنت –

روکپتی بلوچستان ءَ بندوکیں مردمانی گوشگ اِنت کہ ایرانی آمیدگس پاھو دیگ بیتگیں مردماں آمیدگساں وتی راستیانی موہ دیگ ءَ نہ اِنت –

بلوچستان ءِ جتائیں دمگ پنجگور ءُ شال ءَ تیرگواری ءِ آسر ءَ زالبولے ءَ ھوار سے مردم بیران ءُ یکے ٹپی-

سربوتگیں ھالانی رِد ءَ پنجگور ءِ دمگ وشبود ءَ ناشناسیں سلاہ بندیں مردمانی تیرگواری ءِ آسر ءَ یک مردمے بیران ءُ یکے ٹپی بوتگ –

بیران بوتگیں مردم نام دوست نام ءَ چہ بوتگ ءُ ٹپی بوتگیں مردم چاکر نام ءَ چہ بوتگ-

لاش ءُ ٹپی بوتگیں مردم نادُراھجاہ ءَ برگ بوتگ اَنت-

ھمے وڑ گوستگیں روچ ءَ شال ءِ ھند نواں کلی ءَ سلاہ بندیں مردماں یک گسے ءَ دور کتگ ءُ تیرگواری کتگ –

تیرگواری ءِ آسر ءَ جنین گوں وتی لوگ واجہ بیران بوتگ اَنت-

بیران بوتگیں مردمانی لاش نادُراھجاہ ءَ برتگ اَنت چار ءُ ٹپاس کنگ ءَ پد کھول ءَ دستیگ کتگ اَنت-

شال سریاب دگ ءَ فرنٹیر کور ءِ دو کارمند کُشتگ اَنت – جئیند بلوچ

سربوتگیں ھالانی رِد ءَ مروچی بلوچستان ءِ بنجاھی شھر شال ءَ ناشناسیں مردماں پاکستانی پوج ءِ کارمند بمب تراک ءِ نشانگ کتگ انت –

اُرش پاکستانی پوج ءِ فرنٹیر کور کاروان ءِ سر ءَ ھما وھد ءَ کنگ بوتگ کہ شال سریاب دگ ءَ گوزگ ءَ بوتگ انت – اُرش ءِ زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ –

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں مروچی شال ءَ فرنٹئیر کور ءِ چار پرپٹ ءُ یک گاڑی ءِ کاروان ءِ سر ءَ ھما وھد ءَ اُرش کتگ کہ سریاب روڈ حق آباد پھاٹک ءَ چہ گوزگ ءَ بوتگ انت –

جارکش ءَ گوشتگ کہ اُرش ءِ آسر ءَ فرنٹیر کور ءِ دو پرپٹ تباہ بوتگ اَنت چریشی ءَ دو دژمنیں کارمند ھما دمان ءَ مُرتگ اَنت وھدیکہ یکے زدگ بوتگ – دژمنیں پوج ءِ سر ءَ بوتگیں اُرش ءَ مئے گل من ایت –

جارکش ءَ گوشتگ کہ اُرش ءَ پد فرنٹیر کور ءُ پولیس ءَ دمگ چپ ءُ چاگرداں انگیر کتگ ھمک وھد ءِ وڑ ءَ وتی جانی ءُ مالی تاوانانی چیر دیگ ءِ جھد کتگ تانکہ وتی پروش وارتگیں پوج ءِ مورال ءَ برز داشت بہ کنت –

جارکش جئیند بلوچ ءَ وتی درشان ءِ تہ ءَ گوشتگ کہ بلوچستان ءَ زورگیریں پوج ءُ آئی ءِ دمگی دلار ءُ بند ساچیانی سر ءَ ھما وھد ءَ تاں وتی اُرشاں برجاہ داریں تا ھما وھد ءَ زورگیریں پاکستانی پوج بلوچستان ءِ سر ءَ وتی کبزہ ءَ ھلاس نہ کنت ءُ در نئیت –

دی بلوچستان پتر ھال ءَ سربیتگیں ھالانی رِد ءَ بلوچستان شاھدربر جاہ ءَ پاکستانی پوج ءَ نوشکی ءِ جھمنندیں دو نودبر زورانسری آوار جتگ ءُ چیریں جاہ ءَ برتگ انت –

ھردو ورناہ پوج ءَ بلوچستان شاھدربرجاہ ءِ ھاسٹل ءَ چہ آوار جتگ ءُ گوں وت برتگ انت، نودربرانی پجار سھیل احمد ء لال محمد ءُ صفی بلوچ ءِ ناماں بوتگ انت –

اھوالکار ءِ رِد ءَ ھردو ورناہ پاکستان اسٹڈی ءِ نودربر بوتگ انت کہ ھمے ھپتگ ءِ دو شمبے روچ ءَ پوج ءَ آوار جتگ ءُ بیگواہ کتگ انت –

بلوچستان شاھدبرجاہ ءَ نودربرانی زورانسری آوار جنی ءُ ھاسٹلانی سر ءَ بیڑ برگ ءِ بگیری ءَ باندا ادار یازدہ ءَ نودربراں زھرشانی کنگ ءِ جار پرینتگ –

سر بیتگیں ھالانی رد ءَ کراچی ءِ دمگ ملیر ءَ گوستگیں روچ ءَ دمگی ایم پی ءِ کارمندانی لٹ ءُ کُٹ ءَ ناظن الدین نامیں ورنایے بیران بیتگ –

ناظم ءِ کھول ءِ گوشگ اِنت کہ ناظم ءَ گوستگیں وھداں عرب شکاریانی چَرز ءِ شکار ءَ تامر جوڑ کرتگ ءُ چریشی ءَ واجہ کارانی دست ءَ آ شھید بیتگ –

ناظم ءِ کھول ءَ آئی ءِ کوش دمگ ءِ ایم پی اے ءُ پیپلز پاٹی ءِ اسمبلی ءِ باسک اویس گھرام جوکھیو ءُ آئی ءِ کارمندانی نام ءَ نبشتگ کنائینتگ –

ناظم ءِ کھول ءَ مروچی زھرشانی کنان ءَ مزن شھدگ بند کرتگ ءُ انساپ ءِ لوٹ ءَ کنگ ءَ اَنت – آیانی گوشگ اِنت کہ گوستگیں روچ ءَ ارزی ءِ نبشتگ کنگ ءَ ابید ھم جرمکار انگت ءَ دزگیر کنگ نہ بیتگ اَنت –

آیانی گوشگ اِنت کہ ناظم ءَ عرب شکاری چرز ءِ شکار ءَ مکن کتگ ءُ آیانی تامر جوڑ کرتگ ءُ چریشی ءِ پژدر ءَ دمگی واجہکار جام اویس گوھرام ءَ ناظم وتی بنجل ءَ لوٹائینتگ ءُ آ بے کساس لَٹ ءُ کُٹ کرتگ ءُ ھمے لَٹ ءُ کُٹانی میان ءَ ناظم بیران بیتگ ءُ آئی ءِ لاش ڈن ءَ چگل دیگ بیتگ –

دمگی اھوالکار گل ھسن ٹگڑ ءَ بی بی سی اردو ءَ گوں گپ کنان ءَ گشتگ کہ مزن شھدگ ءَ اے وھد ءَ سرجم ءَ روانی مھتل اَنت ءُ گاڑیانی دراجیں کتار لگ اِتگ اَنت ءُ آئی ءَ گشتگ کہ زھرشانی کنوکانی گور ءَ گپ ءُ تران ءَ تنی وھدی سیاسی نا دمگدار سر بیتگ اَنت –

ھمے وھد ءَ ناظم جوکھیو ءِ برات افضل جوکھیو ءَ رسانکدراں گپ کنان ءَ لوٹ کرتگ ءُ گوشتگ کہ ایف آئی آر ءَ نامزد کنگ بیتگیں اسمبلی ءِ باسک جام اویس گوھران جوکھیو ءَ ھوار دراھیں جرمکار گرگ بہ بنت آئی ءَ گشتگ کہ ایف آئی آر ءِ نبشتگ بیگ ءَ پد ھم انگت ءَ پولیس ءَ ایم پی اے ءِ دزگیری ءَ ھچ وڑیں گامگیج نہ زرتگ –

شھیدیں بانُک کریمہ بلوچ

اضغر نودربر

تاکشان تو مہ بوتیں

دی بلوچستان پوسٹ

چُک گلاں بال اٙنت
آزمان ءٙ نزور کپتگیں روچ ءٙ گوں تران کن اٙنت
ءُ شپانی نز آرتگیں تھارمائی ءٙ تچان اٙنت
برے پہ ٹیلو ءُ برے پہ کوکیلا ءٙ
کہ دومی ءٙ تاچین اٙنت ءُ وت چیر کپ اٙنت
میتگانی پُشتی نیمگے ڈلاں
ءُ برے گُلزمین ءِ کوھانی دلبند ءٙ
اجب رنگیں گوازی کن اٙنت
مئے ھلک ءُ میتگانی چُک
چینچو مھر اِنت ایشاں گوں ھاکاں
کہ گوں نوکیں گُداں در کاینت سُھب ءٙ
شپاں ھاک بستگیں گُد گون بنت ایشاں
ھمے ندارا کنائین اٙنت مردُمان ءٙ
کہ مھر چے ءٙ گوش اٙنت گوں ھاک ءٙ
گل بباں گُلاٹی جن اٙنت ھاک ءٙ
ءُ گریوگاں وتی پہ پادانی لتارینگ ءٙ گوازین اٙنت
کہ چون ھمگرنچ اٙنت ھاک ءٙ گوں وتی
سد سلام اے پُلان ءٙ
مھرے اے چیدگان ءٙ
ءُ زمستان ءِ شپاں آھانی لالٹین ءِ ندارا
ھاموشی ایوکی کملانی تلا
جیڑ اٙنت پہ باندات ءِ روژناھیں ساھتاں
کہ کاریت اِنت روژناھی ھزار زِمین دور نشتگیں لُمہ ئے
کہ شہ ھمودا چہ وتی جبین ءٙ لالٹین ءِ ندارا ءٙ کنائین اِیت
آ ھمگرنیچیں لُمہ کہ ھمگرنچ اِنت گوں گُلزمین ءِ ڈلاں
کوھانی تلار ءُ گوں پٹ ءُ ریکاں
ھو چونیں اجیبیں مھرے اے ھاکے وتی
کہ دور نشتگیں لُمہ ءِ تنیگہ بو کش اِیت ئے
ءُ اے بو ءٙ مان ایر رچیت ئے وتی جبین ءٙ
اے مسکیں بو کہ چہ گُلزمین ءٙ در کپ اِیت
چہ پادانی لتارینگ ءٙ زِمین پھازوکیں چُکانی
کہ کمار کن اٙنت وتی لُمہ ءٙ ھزار زِمین دور
اے پادانی لتارینگ زِمین ءِ سر ءٙ
گوش ئے لُمہ ءِ ھست ءٙ سُرین اٙنت
ءُ در کن اِنت ئے کشکے ءٙ پہ مِنزلے شوھاز ءٙ
مِنزلے شوھاز کہ نہ چاریت بھار لیوار ءُ سارتیں مولُم
اے کشک دراجیں کہ بھاران ءٙ بندات بیت
نہ بیت ھلاس تاکشان ءٙ روان اِنت انچو سال پہ سال
ءُ بس لوٹ اِیت کرنانی کرن پہ کُٹگ ءٙ
اے مِنزل سک شوکیں مِنزل ئے
اے کشک کہ پُر اِنت چہ دُنیا ءِ اڈانداں
ءُ چہ وڑ پہ وڑیں جنجالاں
بلے اے مِنزلے راھی لُمہ
کہ جوزہ ءٙ چہ پُر اِنت
روان اِنت آئی سپر چہ بھاران ءٙ دیم پہ تاکشان ءٙ
وتی وس ءُ واکیں روژنائی دئے آن ءٙ
اے روژنائی کہ چیدگ اِنت سوبمندی ئے
نوکیں بانداتے ئے
ءُ وشھالی پہ پراھگانیں گُلزمین ءٙ
اے روژناھی شومیں چماں منی
گوش ئے مدان بوھان اِنت
تاکشان ءِ اے سارتیں مولُم ءٙ
ءُ اناگت ھلاس بیت روژناھی بزگانی
مِنزلے شوھاز کنوکانی
بگند تھارمائی ایر کپتگ دراجیں شپاں
ھمک دمکاں ویرانی ءِ کپتگ
ءُ وتگڑیں تُرس ئے
دل ءُ ترکگ ءٙ اِنت پریات ءٙ اِنت
ارس چہ ھُشکیں چماں شلان اٙنت
دپ لرزان ءٙ گوش اِیت
اے سیاھیں روچ ویرانگیں ماہ ءُ شومیں سال مہ بوتیں
ھاں ھاں مہ بوتیں اے تاکشان
ھو ھچ مہ بوتیں
ھو تاکشان تو مہ بوتیں

بلوچستان ءِ بنجاھی شھر شال ءَ بمب تراکے ءَ پاکستانی ایف سی نشانگ کنگ بیتگ –

گیشیں ھالانی رد ءَ بلوچستان ءِ بنجاھی شھر شال ءَ سریاب دگ ءَ حق آباد ءَ ریلوے پھاٹک ءِ ھند ءَ تراک بیتگ، چریشی ءِ آسر ءَ پوجی کارمندانی جانی تاوانانی گمان کنگ بیتگ –

دمگی مردمانی رد ءَ فرنٹیئر کور ءِ کارمند گاڑی ءُ پرپٹانی ھمراھی ءَ تر ءُ تاب ءَ بیتگ اَنت کہ ناگتی تراک بوتگ –

تراک ءَ پد پولیس بازیں کچے ءَ سر بیتگ ءُ تراک جاہ انگیر ءَ کرتگ ءُ پُٹ ءُ پول اش بندات کتگ ئِے –

ھالانی تہ ءَ گوشگ بیتگ کہ تراک ریلوے ٹریک ءِ نزیک ءَ بیتگ ءُ پولیس ءَ ھمے جاہ سرجم ءَ انگیر ءَ کرتگ –

واکدارانی نیمگ ءَ تنی وھدی اے ھال ءِ بارو ءَ دگہ گیشیں ھال دیم ءَ نیتکگ اَنت –

ھمے وڑ بلوچستان ءِ دمگ ڈیرہ بگٹی ءَ تیرگواری وئیلے ءَ لیویز کارمندے ءَ ھوار دو مردم بیران بیتگ اَنت –

تیرگواری ءِ وئیل ڈیرہ بگٹی ءِ دمگ پھیلاوغ ءَ دیم ءَ اتکگ کہ اود ءَ دو مردم کشگ بیتگ اَنت –

زانگ بہ بیت گوستگیں شپ ءَ کیچ تربت آبسر ءَ تیرگواری وئیلے ءَ پولیس کارمندے بیران ءُ یکے زدگ بیتگ اَت –

بیران بیتگیں مردم ءِ پجار امتیاز ء لیاقت ءِ نام ءَ زانگ بیتگ اَت کہ کاؤنٹرٹیررازم ڈپارٹمنٹ (سی ٹی ڈی) ءِ کارمندے بیتگ –

دمگی مردمانی رد ءَ ھردوک وتی اسٹور ءَ نندوک بیتگ اَنت کہ سلاہ بنفیں مردماں آیانی سر ءَ تیرگواری کرتگ –

بلوچستان ءِ بنجاھی شھر شال ءَ چار شمبے ءِ شپ ءَ یک دزبمب تراکے ءَ سَے مردم زدگ بیتگ اَنت –

ھالانی تہ ءَ گوشگ بیتگ شال ءِ دمگ سریاب دگ ءَ یک دکانے ءَ ناشناسیں مردماں دزبمبے چگل داتگ ءُ تتکگ اَنت-

تراک ءِ آسر ءَ سَے مردم زدگ بیتگ اَنت کہ آ درمان کنگ ءَ سول ھسپتال ءَ برگ بیتگ اَنت –

تراک ءَ پد سیکورٹی پورسز ءَ دمگ انگیر ءَ کرتگ ءُ راہ ءُ دربستگ اَنت، تراک ءِ زمہ واری تنی وھدی ھچ گل ءَ پہ وت ءَ نہ زرتگ –

زانگ بہ بیت گوستگیں روچ ءَ تیابدپی شھر جیونی ءُ گوستگیں روچاں پنجگور ءُ ھاران ءَ ھم بمب تراک بیتگ اِت اَنت ھر چاریں تراکانی زمہ واری تنی وھدی ھچ گل ءَ پہ وت ءَ نہ زرتگ اَنت –

بلوچستان ءِ تیابدپی شھر گوادر ءِ نامی ئیں ڈاکٹر عزیز بلوچ گوستگیں روچ ءَ بیران بیتگ –

بی این پی ءِ کلانیں باسک ڈاکٹت عزیر بلوچ ماں بازیں روچاں نادراھی ءَ پد گوستگیں روچ ءَ کراچی ءَ لیاقت نیشنل ھسپتال ءَ آئی ءَ وتی ساہ داتگ اَنت –

ڈاکٹر عزیر بلوچ بلوچستان نیشنل پاٹی ءِ ماھگیر ءُ کسان سیکرٹری بیتگ ءُ آئی ءِ مرگ ءِ سر ءَ بلوچستان نیشنل پاٹی ءَ سَے روچ ءَ پرس دارگ ءِ جار پِرینتگ –

ھمے وڑ ڈاکٹر عزیز بلوچ ءِ بیرانی ءِ پشدر ءَ چاگردی رسانکجاھاں ھم بلوچ پھناتاں پدردی درشان بیگ ءَ اِنت –

بلوچ پھناتاں بندوکیں مردمانی گوشگ اِنت کہ گوادر ءِ مھلوک یک مھروان ڈاکٹر ءِ ھواری ءَ یک سیاسی مردمے ءَ زبھر بیتگ اَنت –

بلوچستان ءِ جتاجتائیں دمگاں تیرگواری ءُ دگ ءِ وئیلاں سَے مردم بیران بیتگ اَنت ءُ دو ٹپی بیتگ اَنت-

بلوچستان ءِ دمگ ڈیرہ اللہ یار ءَ دگ ءِ وئیلے ءَ پٹواری احمد خان عمرانی بیران بیتگ –

پٹواری احمد خان عمرانی روگ ءَ بیتگ کہ ناگتی آئی ءِ گاڑی دگ ءِ وئیل ءِ آماچ بیتگ ءُ چریشی ءَ چہ آ بیران بیتگ –

ھمے وڑ گوستگیں روچ ءَ گوادر ءَ دگ ءَ یک گاڑی یے چپی بوتگ ءُ چریشی ءِ آسر ءَ یک مردمے بیران ءُ یک زالبولے ٹپی بوتگ-

ٹپی بوتگیں زالبول ءِ پجّار جنکانی وانگجاہ گوادر ءِ پرسنل سبین نام ءَ چہ بوتگ وھدے کہ آئی ءِ لوگ واجہ زیاالحق بیران بوتگ-

مردمانی رِد ءَ اے گاڑی ھما وھد ءَ چپی بوتگ کہ آ گوادر ءَ چہ کراچی ءَ روگ ءَ بوتگ ، ٹپی بوتگیں سبین پہ الاج ءِ ھاتر ءَ کراچی ءَ برگ بوتگ-

ھمے وڑ کیچ ءِ دمگ سنگانی سر ءَ ناشناسیں پرپٹ سواریں مردمانی تیرگواری ءَ چہ یک مردمے بیران ءُ یکے ٹپی بوتگ –

تیرگواری ءِ آسر ءَ امیتاز ء لیاقت ء جھمنند سنگانی سر بیران ءُ احسن ء لیاقت ٹپی بوتگ – تیرگواری ھما وھد ءَ کنگ بوتگ کہ آ وتی سٹور ءَ نندوک بوتگ اَنت –

ٹپی بوتگیں احسن پہ دوا درمان کنگ ءَ نادُراھجاہ ءَ برگ بوتگ-