TBP Balochi

نبشتانک: گُلزمین ءُ سَمّو

نبشتہ کار: مھم جان گُل

دی بلوچستان پوسٹ

سَمّو! من ءَ تو ءُ گُلزمین ھردو چہ ساہ ءَ دوستر اِت ئے ، تو منی زند ءِ ھر واھِشت ءُ تماھانی یک زیبائیں ھمراھے ءُ زمین منی مات اِنت کہ آئی ءِ مھر ءُ آئی ءِ سارتیں امباز من ءَ نوکیں زندے بکشا اَنت ءُ من ءَ گیش وتی پھازگ ءِ سکین ءَ دنت کہ بدواھاں گوں وتی زُلم ءُ زُوراکاں منی ڈیھ چہ من ءَ پُل اِتگ ءُ منی سارت ءُ ساکمیں سرجاہ چہ منی سر ءِ چیر ءَ چہ پَچ گِپتگ، بِہ گْوش! گُڑا چوش من کُجا وش واب بَہ آں؟ بلے من ءَ اے مارِشت اَچ درکسانی ءَ بیتگ ءُ من جیڑ اِتگ وھدے کہ من رُدان ءُ ورنا بَہ آں گُڑا اے رستریں بدواھاں گوں راھے رواں کہ منی مات پہ زُورانسری وتی گُلام کُرتگ۔

پمیشکا من ھما کاروان ءِ سِپاھیگ بَہ آں کہ آ پہ وتی مات ءِ رکّینگ ءَ کُربان بیتگ اَنت ءُ من اھد کُتگ کہ من ھمے کاروان ءَ گوں ھوار بَہ آں ءُ جُنزان کناں کہ ھزاراں زمین زادگ جُنزان اَنت نوں من رُستگ ءُ مزن بیتگ آں ءُ ھمے کاروان ءِ سِپاھیگے آں کہ وتی مات ءِ پھازگ ءَ گوں بدواہ ءَ مِڑگ ءَ آں ءُ دُژمن سرین پُروش کُرتگ۔

بلے سَمّو! چہ تئی امبازاں من ءَ گیش گُلزمین ءِ امباز وشتر بِہ اَنت ، پرچا کہ وھدے گُلزمین وتی امبازاں پچ کنت ءُ من ءَ توار پِر جنت گُڑا تئی اَمبازانی بوہ ءُ باس ھمود ءَ پَش کَپ اَنت ءُ منی پُرشتگیں بانزُل وتی ھُونی ئیں بالاں چنڈان کنت ءُ گُلزمین ءِ اَمبازاں روت ءُ وت ءَ وتی مُدامی ئیں جاہ ءَ سر کنت کہ اُود ءَ منی مَرگ ءُ زند ءِ ھردوئینانی جاہ اِنت نہ کہ آ من ءَ کشّ اِیت چہ وتی امبازاں ءُ نہ کہ من دَر کا آں، چوشیں پُرمھریں سارتیں چہ اَمبازاں دل نہ گْوش اِیت کہ دَر بیا۔

ترا گْوشاں سَمّو! من ھر وھد ءَ کہ سپر ءَ بَہ آں گُڑا من شُمارا ھردُکاں جیڑاں ءُ جُنزان بَہ آں، پرچا کہ تو منی ودارانی راہ سر ءَ مُدامی نِشتگ ئے ءُ منی راھچاری کُتگ کہ من کدی واتر کناں ءُ تئی چَم من ءَ کپاں ءُ منی دیدار ءَ کلھے بِہ کن ئے ، ءُ من پَمیشکا ترا وتی گِیراں کاراں ءُ ترا جیڑاں پد ءَ زمین ءَ دیم ءَ کناں ءُ ترا چاراں ، پرچا کہ زمین تئی رنگ ءَ جنت ءُ منی نِزُوریں ڈیل ءَ توکل بکشا اِیت ءُ پہ جُنزگ ءَ سکین دنت کہ بِہ جُنز ترا جُنزگی اِنت، گُڑا من سپر ءَ وتی بِنا کناں ءُ جنزاں۔

وھدے من کہ آدمی رستراں گوں ڈیک وراں گُڑا جنگ دے آں ءُ مات ءِ پھازگ ءَ باریں چُنت تیر سینگ ءَ پیوست کناں وتی بلے دست ءِ تُپنگ ھر وھد ءَ دُژمن ءِ دیم ءَ تیراں چنڈان بیت ءُ سر سُجدگ ءَ کدی نہ روت ، پرچا کہ مات ءِ گیرت ءُ ننگ پادمالیں زمین کدی ھم من ءَ پہ دُژمن ءِ دیم ءَ سرجھلی ءَ نیل اَنت چی ءَ کہ داں گُڈّی ساہ ءِ دم کشّگ ءَ مات ءِ پُرمھریں امباز ھر وھد پَچ اَنت پہ وتی مزاریں بچّاں کہ بیا اِت منی کُنگراں پھریز اِت وتی مات ءَ کہ بوٹ پادیں سِپاھیگانی دیمپان اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءَ گروک ءِ کپگ ءُ ایرانی لشکر ءِ تیرگواری ءَ سَے کس بیران بیتگ اَنت ءُ یکے زدگ بیتگ –

گیشیں ھالانی رد ءَ سیستان و بلوچستان ءِ زرباری دمگ ھیدر آباد ءَ گروک ءِ کپگ ءِ سبب ءَ یک مردمے بیران بیتگ –

بیران بیتگیں مررم ءِ پجار سِی ءُ شش سالی ئیں امیر نارویی ءِ نام ءَ زانگ بیتگ کہ ھور ءِ وھد ءَ ناگتی گروک کپتگ ءُ چریشی ءَ آ بیران بیتگ –

دگہ مردمے گروک ءِ کپگ ءَ زدگ بیتگ ءُ نادراہ جاہ ءُ برگ بیتگ، ھالانی تہ ءُ گُشگ بیتگ کہ کھنوج ءَ گوستگیں روچ ءَ یک مردمے گروک ءِ گرگ ءَ بے ھوش بیتگ ءُ نادراہ جاہ ءَ سر کنگ بیتگ –

کمپین فعالین بلوچ ءِ رد ءَ ھمک سال سیستان و بلوچستان ءَ گروکانی گرگ ءَ بازیں کچے ءَ بیران بیگ ءَ اَنت –

ھمے وڑ ایرانی لشکر ءِ تیرگواری ءَ دو کس بیران بیتگ –

بیران بیتگیں مردمانی پجار ایرج شھنوازی ء درمھمد ءُ مھرداد شھنوازی ءِ جھمنند ھاش ءِ ناماں زانگ بیتگ اَنت –

ایرانی لشکر ءَ نشہ باپاری ءِ بھتام ءَ تیرگواری کرتگ ءُ ھردوک کشتگ اَنت، لس مھلوک ءِ نیمگ ءَ اشانی نشہ باپاری ءِ درگت ءَ دگہ گپ دیم ءَ نیتکگ اَنت –

گوست ءَ ھم روکپتی بلوچستان ءِ بازیں جاھاں تیرگواری ءُ پاھو ءِ ساد ءَ نشہ باپاری ءِ بھتام ءَ مھلوک کشگ بیتگ اَنت –

ایرانی ایمنسٹی انٹرنیشنل ءَ ھم چوشیں وئیلانی پاھو دیگ ءِ پدری درشان کرتگ اَت –

سربوتگیں ھالانی رِد ءَ بلوچستان ءِ دمگ کیچ سامی ءَ ناشناسیں سلاہ بندیں مردماں سی پیک دگ ءِ سر ءَ برجاھیں پوجی پانگس ءِ سر ءَ اُرش کتگ، اُرش ءِ زمّہ واری بلوچ سلاہ بندیں گل بی ایل ایف ءَ منّ اتگ –

دمگی اھوالکارانی رِد ءَ رِد ءَ اُرش سامی ءِ دمگ عومری کھن ءَ برجاھیں پوجی پانگس ءِ سر ءَ کنگ بوتگ چریشی ءَ پاکستانی پوج ءَ جانی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی بیگاہ ءِ ادار شش ءَ سامی ءِ دمگ عومری کھن ءَ چین ءُ پاکستان ءِ اکنامک کوریڈور پھازگ ءِ ھاتر ءَ برجاھیں پوجی پانگس ءِ سر ءَ دورجنگیں توپک ءَ گوں اُرش کُتگ –

جارکش ءَ گوشتگ اُرش ءِ آسر ءَ یک پوجی کارمندے مُرتگ –

میجرگوھرام بلوچ ءَ دیمتر ءَ گوشتگ کہ زورگیریں پوج ءُ آئی کمک کارانی سر ءَ مئے اُرش ایردستیں بلوچستان ءِ آجوئی ءَ تاں برجاہ مان انت –

سربوتگیں ھالانی رِد ءَ بلوچستان ءِ جتائیں دمگاں بوتگیں وئیلاں پنچ مردم بیران بوتگ اَنت ءُ ھشت مردم ٹپی بوتگ اَنت، وھدیکہ دومی نیمگ ءَ سی ٹی ڈی ءَ دو مردم ءِ دزگیری ءِ ٹاہ داتگ اَنت –

گیشیں ھالانی رِد ءَ بلوچستان ءِ دمگ ھب ءَ دگ ءِ وئیلے ءَ دو مردم بیران بوتگ اَنت –

ایدھی بنشون ءِ رِد ءَ وئیل ھب ءِ نزیک ءَ کراچی موچکو تانہ ءِ دیم ءَ پیش اتکگ کہ مساپر کشیں کوچ ءِ ڈیکر کنگ ءَ دو پرپٹ سوار بیران بوتگ انت – بنشون ءِ رِد ءَ وئیل ءَ پد ھردو مردمانی جون نادراھجاہ ءَ سر کنگ بوتگ انت ءُ آھانی پجار نہ بوتگ اَنت –

ھمے وڑ پنجگور ءَ ٹرک ءِ چپی بوگ ءَ یک مردمے بیران، شش ٹپی بوتگ اَنت –

بیران بوتگیں مردم ءِ حمل خان سمالانی ء نیک محمد سمالانی نام ءَ چہ بوتگ اَنت وھدیکہ وئیل ءَ احمد سمالانی ء کیسرخان سمالانی، کریم دادسمالانی ء محمدعظیم سمالانی، غلام حسین سمالانی ء حاجی نبی بخش سمالانی ،عبد الوھاب سمالانی ء زرک خان سمالانی ءُ محمد شفیع سمالانی ءِ غلام رسول سمالانی نام ءَ چہ بوتگ انت ـ بیران ءُ ٹپی بوتگیں مردم نادراھجاہ ءَ سر کنگ بوتگ انت –

دگہ وئیل ءِ دکی ءَ دیم ءَ اتکگ اَنت کہ ناکوزتکانی تیرگواری ءِ سوب ءَ دو رھگوز ٹپی بوتگ اَنت –

پولیس ءِ رِد ءَ وئیل دکی ءَ سبزی منڈی ءَ دیم ءَ اتکگ کہ تیرگواری ءِ سوب ءَ عبدالمالک ء صالح محمد جھمنند بغاو ءُ محمد رمضان ء خدا پاچا جھمنند پنجاپ ٹپی بوتگ انت – ھردو ٹپی بوتگیں مردم سول نادراھجاہ دکی ءَ سر کنگ بوتگ اَنت ءُ آھانی تہ ءَ یکے پہ گیشیں الاج ءِ ھاتر ءَ شال ءَ دیم دیگ بوتگ- ھمے گوشگ بوگ انت وئیل زمینی جیڑھے ءِ سر ءَ ودی بوتگ –

ھمے وڑ سبی ءَ لیویز پورس ءُ دزانی میان ءَ تیرگواری ءَ دو دُز مرتگ ءُ یکے ٹپی بوتگ تتکگ –
تیرگواری سبی ءَ بختیار اباد نزیک ءَ دیم ءَ اتکگ – سیمی دُز ءِ شوھاز برجاہ انت –

دومی نیمگ ءَ مستونگ ءَ سی ٹی ڈی ءَ دو ٹارگٹ کلر ءِ دزگیر کنگ ءِ ٹاہ داتگ –

سی ٹی ڈی جارکش ءِ رِد ءَ مستونگ ءَ یک کاروائی ءِ میان ءَ پولیس کارمندانی ءِ کوش ءَ ھوار ءَ ٹارگٹ کلر دزگیر کرتگ انت –

جارکش ءِ رِد ءَ دزگیر بوتگیں مردمانی گور ءَ یک پسٹل ءُ دو دستی بمب دست کپتگ اَنت، آئی ءِ رِد ءَ ھر دو مردمانی سیادی چہ ناشریں گلے ءَ انت کہ گوستگیں سال ءَ پولیس گاڑی ءِ سر ءَ اُرش ءِ کتگ دو پولیس کارمند بیران بوتگ –

سی ٹی ڈی ءَ گوست ءَ ھم مستونگ ءَ ھوار شال ءَ بازیں مردمانی دزگیری ءِ ٹاہ داتگ اَنت ءُ بازیں مردمے دیم پہ دیمی جنگ ءِ نام ءَ کُشتگ اَنت ءُ بلوچستان ءَ سیاسی مردمانی گوشگ اِنت کہ اے مردم پیسر ءَ آوار جنگ بیگ ءَ پد کُشگ بیتگ اَنت –

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 375 تالبان جنگول کُشتگ ءُ 293 ٹپی کرتگ اَنت۔ ایشی ءَ ابید راجی لشکر ءَ تالبان ءِ دست ءِ راہ ءُ دگانی سر ءَ 11 چیر بم ءُ شور ھم ناکار کُتگ اَنت۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش نورستان، لوگر، کندھار، اُرزگان، ھرات، جوزجان، بلگ، سمنگان، ھلمند کاپیسا ءُ بلگان ءِ ھند ءُ دمگاں کرتگ اَنت ءُ اِے اُرشاں اوگان راجی لشکر ءِ جنگی بالیگراباں تالبان ءِ بازیں سنگر ءُ بُنجاھانی سر ءَ تْرُندیں بمب گْواری ھم کرتگ۔ وتی یکشلیں ٹیوٹر پیگاماں ءَ سرپدی ئِے داتگ کہ راجی آشوبی سِلاھبند ءُ اوگان راجی لشکر ءَ ھِرات ءِ بازیں دمگاں ناشرکاریں تالبان ءِ جنگولاں پْروش داتگ ءُ نی اود ءَ تالبان تاچینگ بوگ ءَ اَنت ءُ ھِلمند ءِ لشکرگاہ شھر ءَ راجی لشکر ءِ تْرُندی بالیگرابانی اُرشاں 20 اوگان تالبان کُشگ بیتگ اَنت، 13 زدگ کنگ ءَ ھوار آیانی جنگی آسراتی ءِ کوت ھم تباہ کنگ بوتگ اَنت۔ دومی نیمگ ءَ راجی لشکر ءَ ولایت کاپیسا ءِ دمگ نجراب ھم چہ ناشرکاریں تالبان ءِ دستگیری ءَ آجو کنائینت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 455 تالبان جنگول کُشگ ءُ 232 ٹپی بیتگ اِت انت-

اوگان راجی لشکر ءَ ھمے جنگی اُرش نگرھار، پکتیکا، لوگر، کندھار، ھِرات، پرھاب، جوزجان، بلگ، سمنگمان، ھِلمند، کندوز، بلگان ءُ کاپیسا ءِ ھند ءُ دمگاں کرتگ اَنت۔

دومی نیمگ ءَ ماں کابُل شھر ءَ تھریک تالبان پاکستان ءِ ھلاپ ءَ اوگان راجدوست ءُ آزات ھیالیں رھشُون ، راجی آشوبی گلانی سروک ءُ سرکاری اسلامی مجلس ءِ باسک ءُ راجمستری ءِ رھشونانی نِند ءُ نیاد برجاہ بیتگ اَنت۔ ماں نِند ءُ نیاداں تالبان ءِ ھلاپ ءَ بازیں جنگی مراسا ءُ شور ھم اڈ دیگ بیتگ اَنت گوریچی ولایتانی راجی رھشون ابداُلہ ابداُلہ، اتا نور، امر اُلسھ، نامداریں اُزبک رھشُون عبدالرشید دوستم ءِ مستریں زھگ بوبر دوستم، راجی پھزگی سوجکار مُھب، استاد عبدالسیاپ ءُ دگہ بازیں جنگی رھشُوناں تالبان ءِ ھلاپ ءَ سِلاہ چست کنگ ءِ سوڑگ کُتگ۔ بازیناں پاکستان ءِ ھلاپ تُرندیں ھبر ءُ زھرشانی ھم درشان کُتگ اَنت۔ ھمے نِند ءُ نیاد ءَ اوگان راجی پاگواجہ ءَ گْوشتگ کہ اے جنگ اوگان راج ءُ تالبان ءِ میان ءَ وَ نہ انت بلکیں اوگان راج ءُ پنجابی ءِ میان ءَ انت۔

بازیں رھشوناں گْوشتگ کہ پاکستان پہ وتی ملک ءَ دْروگیں راجمستری، انگریزانی رھبند، ھیرامنڈی ءِ وڑیں کھبگی بازار ءُ دمک دار ایت ءُ اوگانستان ءَ اسلامی شرھیت ءِ پلہّ مُرزی کنت بہ گِند ئے اوگانستان چہ پاکستان ءَ گیشتر اسلامی انت اد ءَ سرکاری اسلامی مجلس ھم ھست ءُ اسلامی راجمستری ھم ھست گُڑا باید انت تالبان پنجابی ءِ پنت ءُ سوجاں رَد بہ کنت ءُ وت ءَ اوگان راجمستری ءِ بھرے جوڑ بہ کن اَنت۔

بلوچ ءِ کشندھیں سی پیک ءِ بگیری ءَ مئے سلاہ بندیں جھد داں منزل ءَ برجاہ مان ایت۔ بیبگر بلوچ

پنجگور ءِ دمگ بالگرد سھاکی ءَ پاکستانی پوج ءِ سر ءَ بیتگیں اُرش ءِ زمہ بلوچ ریپبلکن آرمی ءِ جارکش بیبگر بلوچ ءَ من اِتگ ءُ رسانکدراں شنگ کرتگیں درشانی ءَ گوشتگ کہ مئےسرمچاراں زیکیں بیگاہ ءَ پنجگور ءِ دمگ بالگتر سھاکی ءَ سی پیک ءِ پھریزگ ءِ ھاترا برجاھیں لشکری مزن بنجل ءِ سر ءَ چار نیمگاں نوکیں سلاھاں گوں اُرش کتگ ءُ بنجل ءِ دو پھریزی پانگس دستیگ کتگ اَنت ءُ پنچ کارمند کشتگ اَنت۔

جارکش بیبگر بلوچ ءَ گُشتگ اَت پانگسانی دستیگ کنگ ءَ پد  لشکر ءِ مزن بنجل ءِ سر ءَ گوں راکٹ ءُ وتکاریں سلاھاں ترندیں ارشے کتگ کہ اُرش ءِ آسرءَ پنچ کارمند مرتگ ءُ بازینے ءَ بنجل یل کتگ ءُ تتکگ اَنت۔

جارکش ءَ گشتگ اَت ھمے سھتاں لشکر ءِ کمک ءِ ھاترا آیوکیں کساس بیست ءَ گیش گاڑی ءُ پرپٹانی کاروان ءِ سر ءَ مزن بنجلءِ نزیک ءَ ترندیں اُرشے کتگ  کہ چریشی ءِ آسر ءَ کمک ءَ اتکگیں لشکریاں اوں جانی تاوان رس اِتگ۔ مئے سرمچاراں داں نیم کلاک ءَ لشکری پانگس دستیگ کتگ ءُ نشتگ اَنت۔

بیبگر بلوچ ءَ وتی شنگ کرتگیں درشانی ءَ گُشتگ کہ بلوچ کش ءُ نام گپتیں سی پیک کار ءِ بگیری ءَ مئے سلاہ بندیں اُرش ترند تر بنت۔ ھمے سوبمندیں اُرش ءِ تامر زوت چہ گَل ءِ آفیشنل چینل ءَ شنگ کنگ بیت اِنت۔

جارکش ءَ گڈسر ءَ گُشتگ مئے اُرش  داں آجوئیں سرڈگارے ءَ برجاہ مان اَنت-

پنجگور ءَ چار سالی ئیں زھگے ءِ آوار جتگ ءَ پد آ گوں زدگیں جاوراں یل کنگ ءُ پد ءَ بیران بوتگ-

سربوتگیں ھالانی رِد ءَ مروچی پنجگور ءِ دمگ چتکان ءَ قلم چوک ءَ ناشناسیں پرپٹ سواریں مردماں چار سالی ئیں زھگ قدیر احمد ء خلیل احمد گپتگ ءُ کشان کتگ ءُ نیم راہ ءَ گوں زدگیں جاوراں یل داتگ ءُ پد ءَ آ زھگ نادُراہ جاہ ءَ سر کتگ ءُ ھمود ءَ بیران بوتگ-

بیران بوتگیں زھگ ءِ کھول ءِ گوشگ ءِ رِد ءَ مروچی سُھب ءَ قدیر احمد قلم چوک ءَ وتی لوگ ءِ گیٹ ءِ دپ ءَ گوں دگہ زھگانی ھمراھی ءَ نندوک بیتگ اناگاہ ءَ یک پرپٹے ءَ سواریں مردماں اَتکگ ءُ قدیر ءِ پاد گپتگ ءُ کشان ئِے کتگ ءُ میتگ ءِ دمک ءَ گوں نگیگیں جاوراں یل کتگ ءُ شُتگ-

قدیر احمد گوں نگیگیں جاوراں نادُراھجاہ ءَ برگ بوتگ اود ءَ آئی ءَ ٹپانی درد نہ سگ اِتگ ءُ بیران بوتگ-

اے وئیل ءَ چہ کھول ءِ مردماں قدیر ءِ جون زرتگ ءُ پولیس اسٹیشن بُنجاھی گیٹ ءِ دپ ءَ زھرشانی کنگ ءَ اَنت – داں گڈی ھالانی رد ءَ مردم انگت ءَ زھرشانی کنگ ءَ اَنت ءُ مردمانی لوٹ اِنت کشندہ گرگ ءُ سزا دیگ بہ بنت –

ٹی بی پی پتر ھال ءَ سر بیتگیں ھالانی رد ءَ پنجگور ءِ ھند کیلکور بالگتر سھاکی ءَ گوستگیں مگرب ءِ وھد ءَ ناشناسیں سلاہ بندیں مردماں پاکستانی پوج ءِ بنجل ءِ سر ءَ اُرش کرتگ، چریشی ءَ جانی تاوانانی ھال اِنت –

دمگی مردمانی رد ءَ گوستگیں مگرب ءَ سلاہ بندیں مردماں سی پیک دگ ءِ پھازگ ءَ ھستیں بنجل ءِ سر ءَ سلاہ بندیں مردماں اُرش کرتگ ءُ بنجل سرجم ءَ دستیگ کرتگ –

دمگی مردمانی رد ءَ اُرش ءَ پد جنگجاہ ءَ کمک ءَ آوکیں پوجی کاروان ءِ سر ءَ ھم سلاہ بندیں مردماں اُرش کرتگ ءُ بازیں وھداں تیرانی توار اشکنگ بیتگ اَنت –

پوجی بنجل ءِ سر ءَ بیتگیں اُرش ءِ زمہ واری تنی وھدی ھچ گل ءَ نہ من اِتگ ءُ گوست ءَ ھم پاکستانی پوج ءِ سر ءَ چوشیں اُرشانی زمہ واری بلوچ آجوئی لوٹوکیں سلاہ بندیں گلاں منّ اِتگ اَنت –

پاکستانی پوج ءِ واکدارانی نیمگ ءَ ھم تنی وھدی چوشیں ھال دیم ءَ نیتکگ اَنت –