TBP Balochi

بلوچستان ءِ دمگ نوشکی ءَ پاکستانی پوج ءَ دو آوار جنگ ءَ پد پھمیانیں جاھاں برتگ اَنت –

بلوچستان نیشنل پاٹی ءِ رھشون میر خورشید جمالدینی ءَ شال ءَ وائس فار بلوچ مسنگ پرسنز ءِ بنجل ءَ اتکگ ءُ اے گپ جتگ اَنت –

میر خورشید جمالدینی ءِ گوشگ اَت کہ پاٹی ءِ گوستگیں رھشون ھدامرزی ئیں سرور ءِ پسگ بھرزور ء نوبھار چہ نوشکی ءَ پاکستانی پوج ءَ دزگیر کنگ ءَ پھمیانیں جاھاں برتگ اَنت چریشی ءَ پد آیانی ھچ ھال نیست اِنت –

آئی ءَ گشتگ کہ پوج ءَ شپ ء تھاری ءَ چادر ءُ چار دیوالی لگتمال کتگ اَنت اے ورنا آوار جتگ اَنت- آئی ءَ گشتگ کہ اگاں کسے ءَ جرمے کرتگ گڑا آ کانونی رنگ ءَ گرگ بہ بیت اِنت –

نبشتانک: اوستانی دیار ءَ زندگیں پیر زال

نبشتہ کار :عبدالواجد بلوچ

دی بلوچستان پوسٹ

انچو سما بیت کہ اے دیار ءَ آسے کپتگ، چیھانٹانی توار آزمان ءِ دلبند ءَ تْراکینگ ءَ اَنت، بلے ھُدا بے سما ات، آ پیرزال ءِ رتکگیں دیم ءُ چمّانی ارسانی گندگ ءَ پد یک ساھتے مردم ھبکّہ بوت کہ ھُدا ءِ بے سمائی پہ اے دیار ءَ جْوانیں نیمونے نہ انت، پرچا کہ ھمائیں من گندگ ءَ اتاں آ پیرزال وتی کاپر ءِ دیم ءَ دِرتکگیں تگرد ءَ چیرا پچیں مُسلّہ ءِ سرا نشتگ دست ے بُرزاد ات اَنت گوں ھُدا ءَ ھمتْران ات۔

پیرزال ءِ اُمبر کساس ھشتاد سال بوتگ ات، بلئے انچو گندگ بوت کہ سک دیر انت پیرزال ءِ ودار آسر نہ انت، ھو کساس یازدہ سال ات کہ زورآوریں حاکماں پیرزال ءِ پیری ءِ اسا چرائیاں پُلتگ ات، آ کسانُکیں زھگانی لُنٹانی ھُشکی ءُ دِرتگیں سواسانی تاپَتائی بزگیں داستانے ءِ رنگ ءَ وتارا پیش دارگ ءَ اتاں، گْونڈل ءَ وتی پت ندیستگ ات، پہ بے سمائی درّائینت ئِے ھو کہ منی پت ءَ برات نیست، چہ بے براتی ءَ مزنیں منّات ءِ چم یازدہ سال اِنت ارسیگ اَنت کہ اے ارسانی دریا ھشک بوھگ ءِ نام ءَ نہ زانت۔

من داں چمّ پچ کتگاں ھمائیں وتی مزنیں منّات ءَ گنداں نشتگ مُسلّہ ءِ سر ءَ بیست ءُ چار ساھت سر ء ماں سجدہ انت کَے ءَ سجدہ کنگ ءَ انت؟ اجبیں نگاھے ءَ گوں گْونڈل ءَ من ءَ پُرس ات! من اجکّہ بوتاں کہ یازدہ سالی کسانیں زھگ وتی اندر ءَ یک پُھتویں انسانے داریت، اے پُھتوی حاکمانی زورآوری ءِ برورد ات۔

وھدے من کمّے دیم ءَ رھادگ بوتاں تہ سما بوت اے کلّگ ءَ وتی دلبند ءَ کبرانی جھانے آباد کتگ ءُ ھر مانش ءِ سر ءَ سئے رنگی ئیں بیرک اے نشون ءَ دیگ ءَ ات اَنت کہ اے کلّگ ءَ ملّیں مڑوکانی بازیں کارستے وتی باتن ءَ جاگہ داتگ، زوریں حاکم پہ زور وتی بادشاھی ءَ داشت کنت، بلئے دیم ہونی دیوکیں شھزادگانی پہ زمین گنوکی ءَ ھچ پئیم ءَ سْرین پروش کت نہ کنت ھمے سبب ات کہ اے مانشانی سر ءَ سئے رنگی ئیں بیرک پہ شان گوں گوات ءَ چنڈگ ءَ ات اَنت، دو مانش ءِ مْیان ءَ پیرمردے نندوک ات، من ءَ سما بیت کہ تہ ءَ چہ پْرُشتگیں کماش سر زاھرا تیار ءُ تمرد انت، مانش ءِ سر ءَ نندگ ءُ دست ءِ شھارگ مانش ءِ سر ءَ رتکگیں ریک ءُ ڈوکاں پہ وڑ سینگارگ، اے نہ کٹّوکیں مھر ءِ کسّہ ءَ بیان کنگ ءَ ات انت من کمّو دیم ءَ کنز اتاں لوٹ ات کہ چیزے بگُشاں، بلئے پیرمرد ءَ پیسرا درّائینت “منی زند ءِ متاہ ءُ مڈّی منی زھگ ءُ آئی ءِ نوک سوریں بانور ات کہ سیر ءِ روچ ءَ زورآوراں مئے ھَلک ءَ اُرش کت ءُ چرے وئیل ءَ منی سالونکیں زھگ ءُ آئی ءِ بانور شھید بوت انت، ھمائیں کہ اشانی رؤگ ءَ پد من اے مانشانی سر ءَ زمین ءِ مھرءِ ھمراہی ءَ وتی زندءِ پشکپتگیں وھد ءَ تیلانک دیگ ءَ آں اے گپّانی اشکنگ ءَ پد من پھم ات کہ ھو ھُدا نیست، اگاں ھست، گڑا اے دیار ءَ زاھری نہ دنت۔

اے زمین ءِ سر ءَ چشیں ھزاراں داستان ات انت، اے داستانانی تہا مزن مزنیں کارست کہ وتی اندر ءَ ھلاس نہ بُوھوکیں کسّہ بیان کنگ ءَ ات اَنت-

کبرستان ءِ یک کُنڈے ءَ آ جنیں زھگ ءِ دِرتگیں پوشاک ءُ پادشپادی ءِ ندارگ بے ھیال بوت نہ کنت کہ آ جنیں زھگ چہ انسانی کٹّ ءَ دراَتکگ ات، کش ءَ نندوکیں پیرزال یکشل ءَ آئی ءِ بدن ءِ سر ءَ شالے پر دیگ ءَ ات ءُ آئی ءِ سِتر ءَ چیردیگ ءَ ات کہ حاکمانی زورآوری ءَ پیش دارگ ءَ ات، بلے ھُدا گندگ نہ بوت، پاداں زور دیم ءَ بران ات اَنت، وھدے نزیک بوت آں من چہ مات ءَ پُرس ات چی ءَ؟ چُش پرچا؟

مات ءَ گوں ارسیگیں چمّاں درّائینت کہ منی جنیں چُک چہ بوتن ءَ چُش نہ بوتگ، بلکیں گوستگیں پنچ سال ءِ ھون ھاریں زند ءِ کسھانی یک کارستے کہ ھما وھد ءَ سیر ءِ بشانگ ءَ ات کہ آئی ءِ زندگی ءِ ھمسپر ءِ تیر سُپتگیں جون سوگات کنگ بوت اے کَے ءَ کتگ ات انت ءُ چی ءَ کتگ ات انت؟ وتی جند ءِ شوھازگ ءُ وتی باتن ءِ آواز ءَ لبّیک کنگ گناہ نہ ات، بلئے اے دیار ءَ بے ھُدائی ءِ سبب ءَ بنی آدمانی ساہ زورگ ھم بلاھیں گناھے زانگ بوت، اے کسھانی آسر ھما جھان انت کہ بنی آدمانی جنت زانگ بیت۔ وتی وتن، وتی سرڈگار، وتی زبان، وتی پجّار، ھمیشانی رکینگ ءَ اے کبرستان آباد ات انت ءُ پیرزال، پیرمردیں کماش، گنوکیں جنیں زھگ پہ وتی جنت ءِ شوھازگ ءَ ہلاس نہ بوھوکیں دردانی آماچ اتنت، بلئے تکانسر نہ ات اَنت آھانی دیم ءِ بچکندگزال سوبے ءِ نشون ءَ دیگ ءَ اِت اَنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءَ دو وئیلاں سیزدہ مردم زدگ ءُ بیران بیتگ اَنت –

گیشیں ھالانی رد ءَ سیستان ءُ بلوچستان ءَ ھیشین ءِ دگ ءَ یک وئیلے ءَ سَے کس بیران بیتگ اَنت ءُ یکے زدگ بیتگ –

دگہ یک وئیلے ءَ نُھ کس زدگ بیتگ اَنت کہ وئیل دو گاڑیانی ٹکر ورگ ءَ پیش اتکگ –

ھمے وڑ ءَ گوستگیں روچ ءَ ایرانی پھزدارانی تیرگواری ءَ یک ورنایے ھم بیران بیتگ –

وئیل دلگان ءَ پیش اتکگ کہ اود ءَ ایرانی پھزدارانی تیرگواری ءَ ابراھیم سابکی بیران بیتگ –

بلوچ کمپن فعالین ءِ رد ءَ روکپتی بلوچستان ءَ نوکیں سال ءِ بنداتی ءَ داں انیگ ءَ دو سد ءُ پنجاہ مردم دگ ءِ وئیلاں زوال ءُ بیران بیتگ اَنت –

عمان ءِ گوستگیں آرمی آفیسر بیگواھیں دوست محمد زورانسری آوار جنی ءِ بگیری ءَ ھپت نومبر ءَ شال ءَ زھرشانی کنگ بیت-

وائس فار بلوچ مسنگ پرسنز ءِ وائس چئیرمین ماما قدیر بلوچ ءَ بیگواھیں مردمانی شُدکشیں ھڑتالی بُنجل ءَ چہ شنگ کتگیں تامُر کلوہ ءَ گْوشتگ کہ ھپت نومبر ءَ یکشمبے روچ ءَ ساھت دو ءَ بیگواھیں دوست محمد جھمنند پنجگور ءِ یل کنائینگ ءِ ھاتر ءَ شال پریس کلب ءِ دیم ءَ زھرشانی کنگ بیت-

زانگ بہ بیت دوست محمد عمان ءَ آرمی ءِ آفیسرے بیتگ ، چُٹّیانی گوازینگ ءَ وتی ھلک ءَ اَتکگ ءُ دوازدہ فروری 2012 ءَ واتر روگ ءَ کراچی ءِ ائیرپورٹ ءَ چہ پاکستانی چیریں ادارھانی کارندھاں دگہ سیادے ءِ ھمراھی ءَ آوار جتگ ءُ بیگواہ کتگ ءُ پد ءَ سیاد یل داتگ وھدے کہ دوست محمد انگت بیگواہ ءَ اِنت-

وائس فار بلوچ مسنگ پرسنز ءِ رِد ءَ یکشمبے ءِ روچ ءَ ساھت دو ءَ پریس کلب ءِ دیم ءَ آئی کھول ءِ نیمگ ءَ چہ وائس فار بلوچ مسنگ پرسنز ءِ سروکی ءَ یک زھرشانی ءِ کنگ بیت-

آئی ءَ گوشتگ کہ انسانی ھکّانی باسک ، نودربر گلاں ھوار ھرچ پڑ ءَ گوں بندوکیں مردماں دزبندی کن ایں آ اے زھرشانی سک باز بھر بزور اَنت تاں کہ بیگواھیں مردمانی توار سرجمیں جھان ءَ سر بہ بیت-

ٹی ٹوئنٹی ورلڈ کپ گوازی ءَ مروچی نیوزی لینڈ ءَ نمیبیا ءِ دیم ءَ پنجاہ دورن ءُ انڈیا ءَ اسکاٹ لینڈ ءِ دیم ءَ ھشت وکٹاں باج برتگ –

دبی ءَ آئی سی سی مینز ٹی ٹوئنٹی ورلڈ کپ کرکٹ گوازی ءَ مروچی آدینگ ءِ روچ ءَ اولی گوازی نیوز لینڈ ءُ نمیبیا ءِ میان ءَ شارجہ کرکٹ پٹ ءَ بوتگ – نمیبیا ءَ ٹاس کٹیتگ ءُ اولسر ءَ بالنگ کنگے پیسلہ کُتگ –

نیوز لینڈ ءِ لیبیاں جوانی ءَ گوازی کنان ءَ بیست اوورانی تہ ءَ چار وکٹانی تاوان ءَ یکسد ءُ شست ءُ سَے رنانی ٹارگٹ داتگ –

ٹارگٹ ءِ پروشگے ھاتر ءَ نمیبیا ءِ لیبیاں بیست اوورانی تہ ءَ ھپت وکٹانی تاوان ءَ یکسدو یانزدہ رن جوڑ کرت کرتگ ٹارگٹ ءِ پروشگ ءَ بے سوب بوتگ انت – ھمے وڈ نیوز لینڈ ءِ لیبیاں پنجاہ ءُ دو رناں چہ باج برتگ ءُ گوازی وتی نام ءَ کتگ –

مروچیگیں روچ ءَ دبئی انٹر نیشنل کرکٹ پٹ ءَ انڈیا ءُ اسکاٹ لینڈ ءِ میان ءَ گوازی کنگ بوتگ – انڈیا ءَ ٹاس کٹیتگ ءُ اولسر ءَ بالنگ کنگے پیسلہ کتگ –

اسکاٹ لینڈ ءِ لیبیاں اولسر ءَ بیٹنگ کنان ءَ ھبدہ اووراں ھشتاد ءُ پنچ رنانی ٹارگٹ داتگ اسکاٹ لینڈ ءَ انڈیائے بالرانی دیم ءِ داشت نہ کُت اسکاٹ لینڈ ءِ درسیں لیبی آؤٹ کنگ بوتاں –

انڈیا ءِ لیبیانی ھاتر ءَ اے ٹارگٹ ءِ پروشگ بلاھیں کار ءِ نہ ات ءُ آھاں جوانی ءَ گوازی کنان ءَ دو وکٹانی تاوان ءَ ششمی اوور ءَ ٹارگٹ پروشت ءُ ھشتاد ءُ نُھ رن جوڈ کرت وتی ٹیم کٹارینت –

بلوچستان ءِ بنجاھی شھر شال ءُ اسلام آباد ءَ نودربرانی نیمگ ءَ بلوچستان ءَ وانگ جاھاں بیڑ ءُ بلوچ نودربراں گیر کانونی ءَ گرگ ءُ بیگواھیانی ھلاپ ءَ زھرشانی کنگ بیتگ اَنت –

جامعہ بلوچستان ءِ نودربراں مزنیں کچے ءَ یونیورسٹی ءِ تہ ءُ ھمراھیں نودربر سھیل بلوچ ءُ صفی بلوچ ءِ زورانسری آوار جنی ءِ ھلاپ ءَ زھرشانی روانک کش اِتگ ءُ جامعہ بلوچستان ءِ نزیک ءَ نندانک جتگ –

دومی نیمگ ءَ اسلام آباد ءَ نودربرانی نیمگ ءَ بیگواھیں شھمیر بلوچ ءُ مرتضی بلوچ ءَ ھوار دگہ بیگواھیں مردمانی زورانسری آوار جنی ءِ ھلاپ ءَ اسلام آباد پریس کلب ءِ دیم ءَ زھرشانی کرتگ –

شال ءِ زھرشانی کنوکانی رد ےَ ھمے ھپتگ ءَ جامعہ بلوچستان ءَ آیانی دو ھمراھیں نودربر زورانسری آوار جنی ءِ آماچ کنگ بیتگ اَنت بلے انتزامیہ اے گیر کانونی امل ءِ سر ءَ سرجم ءَ بے توار اِنت –

زھرشانی کنوکیں نودربراں گشتگ کہ ھمک روچ بلوچستان ءَ وانگی ادارھانی سر ءَ بیڑ ءُ نودربرانی ترسینگ ءُ آیاں وانگ جاھاں دور کنگ ءَ آیاں آوار جنگ ءِ پندل اِنت –

زھرشانی کنوکاں جامعہ انتزامیہ ءَ چہ نودربرانی یل کنائینگ ءِ لوٹ کرتگ ءُ اگاں آیاں گشتگ کہ نودربر یل نہ بیت اَنت گڑا دیمتر ءَ مستریں گامگیج زورگ بیت اِنت-

اسلام آباد ءِ نیشنل پریس کلب ءِ دیم ءَ بازیں کچے ءَ نودربراں ھزدار یونیورسٹی ءَ چہ بلوچ اسٹوڈنٹس ایکشن کمیٹی ءِ سروک صبیحہ بلوچ ءِ برات شھمیر بلوچ ءُ بلوچستان ءَ دگہ بیگواھیں نودربرانی آوار جنی ءِ ھلاپ ءَ زھرشانی کرتگ ءُ یل کنگ ءِ لوٹ کرتگ اَنت –

اسلام آباد ءَ زھرشانی ءَ تران کنان ءَ آیاں گشتگ کہ بلوچستان ءَ ھمک روچ سیکورٹی پورسز مردماں آوار جنگ ءُ زورانسری برگ ءَ اِنت کہ اے آوار جنگ بیتگیں مردمانی تہ ءَ گیشتریں نودربرانیگ اِنت –

زھرشانی کنوکاں گوشتگ کہ نودربر رھشونانی سپائیں جد ءُ جھد ءِ پشدر ءَ ریاست آیاں مزن مزنیں سزایانی نشانگ کنگ اِنت، صبیحہ بلوچ ءِ برات ءُ آئی ءِ ناکو زتک ءِ آوار جنی ھمے زورانسریانی کڑی اِنت –

زھرشانی کنوکاں بلوچستان ءَ نودربرانی یل کنگ ءُ وانگجاھاں بیڑ برگ ءُ نودربرانی ترسینگ ءِ بند کنگ ءَ لوٹ کرتگ –

دوستین پاکستانی پوج ءُ دمگی کشندہ ٹولیانی ھمراھی ءَ سرمچارانی دلاری ءُ بلوچ چکچینی ءَ ھوار بوتگ – میجر گوھرام بلوچ

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ زیکیں بیگاہ ءَ مئے سرمچاراں پنجگور ءِ دمگ وشبود ءَ ریاستی دلار دوستین تیرباران کتگ ءُ کُشتگ –

جارکش ءَ گوشتگ کہ ھمے میان ءَ چاکر ء عبدالواحد ءَ کتکار ءِ رکینگے کوشست کتگ چریشی ءَ آ زدگ بوتگ – مار ءَ چہ آئی ءَ ھچ وڑیں دژمنی نیست بلے دوستین وڑیں دلاراں کس رکینگ ءِ کوشست ءَ مہ کنت پرچاکہ آ پاکستان ءِ جنگی جُرم ءُ بلوچ چکچینی ءَ تچکی ءَ ھوار انت –

آئی ءَ گوشتگ کہ دوستین ء پزل جھمنند وشبود بلوچ سرمچارانی دلاری ءُ ایف سی ءُ دمگی کشندہ ٹولیانی کمک کارے بوتگ – ایف سی ءُ دمگی کشندہ ٹولیانی ھاتر ءَ وشبود ءَ سرمچارانی سیاد ءُ وارس ءُ آھانی گسانی نشاندھی کار کتگ – آئی ءَ دستگوشیں مردمانی چست کنائینگ ءُ آھانی بیگواہ کنگ ءَ اشی ءِ دست مان بوتگ –

جارکش ءَ گوشتگ اے دلار کہ لھتے مپادانی ھاتر ءَ بلوچانی چکچینی ءَ زورگیریں ریاست ءِ ھمراہ داری ءَ کن انت آ ھچ وڑ ءَ پھل کنگ نہ بنت –

بلوچستان ءِ دمگ چہ پنجگور ءَ پاکستانی لشکریاں یک ورنایے دزگیر کنگ ءَ پد ناشناسیں جاھاں بُرتگ۔

ورناہ پنجگور ءِ کش ءُ کِری ھنکین چہ گَڈگی کیلکور ءَ پاکستانی لشکریاں گوستگیں روچ ءَ روچے وھد ءَ بیڑ بُرتگ ءُ دزگیر کنگ ءَ پد بیگواہ کُتگ۔

دزگیری ءَ پد بیگواہ بیتگیں ورنا ءِ پجار عاصم ء ملنگ ءِ نام ءَ بیتگ۔

وھدیکہ دومی نیمگ ءَ چار سال پیش ءَ بیگواہ بیتگیں اکیل اھمد جھمنند کلی بھرام شھی مستونگ گوستگیں روچ ءَ یل بیتگ لوگ ءَ سربیتگ۔

یل بیتگیں مردمے درگت ءَ بیگواھیں بلوچانی گل وائس فار بلوچ مسنگ پرسنز ءَ ھم سدکی کُتگ۔

بلوچستان ءِ تیابدپی شھر گوادر ءَ تیل برداریں گاڑی ءِ دمب ءَ کوسٹ گارڈ کپتگ ءُ چریشی ءَ گاڑی کپتگ ءُ گاڑی ءِ ڈرائیور کوسٹ گارڈ ءَ دزگیر کرتگ –

گیشیں ھالانی رد ءَ گاڑی ءِ کپگ ءُ کوسٹ گارڈ ءِ بیڑانی ھلاپ ءَ تیل باپار کاراں زھرشانی کنان ءَ مزن شھدگ بند کرتگ –

ھالانی تہ ءَ گوشگ بیتگ کہ زھرشانی کنوکانی نندانک ءِ سبب ءَ ھردوکیں نیمگاں روگ ءُ آیگء مھلوک مھتل بیتگ اَنت –

مھلوک ءِ گوشگ اِنت کہ سرکار ءِ اے زوراکی سگگ نہ بنت ءُ مئے مھلوک پہ لاپ ءِ گزرانہ ءَ کنگ اِنت کہ اشی ءَ ھم سرکار وتی ھرجان جنگ اِنت –

ھمے وڑ زھرشانی کنوکانی نندانک ءَ “گوادر حق دو تحریک ” ءِ سروک مولانا ھدیت الرھمان ھم سر بیتگ –

بلوچستان لبریشن فرنٹ ءِ جارکش گْوھرام بلوچ ءَ ضلع کیچ ءَ پاکستانی پوج ءِ سر ءَ بوتگیں اُرشانی زمہ واری منّ اِتگ ءُ گوشتگ کہ زی پشمبے ءِ شپ ءَ تربت شھر ءَ سنگانی سر ءِ دمگ عبدالسلام میتگ ءَ وتگڑیں کاؤنٹر ٹیررازم ڈیپارٹمنٹ ( سی ٹی ڈی ) کارندہ امتیاز ء لیاقت نشانگ کتگ ءُ کُشتگ-

جارکش ءَ گوشتگ کہ بلوچ چُکچینی ءَ سی ٹی ڈی ءِ اے وڑ ءُ پیم ءِ چارگ ءَ اے ھچ کس ءَ چیر نہ اِنت کہ اشی ءَ بلوچ چُکچینی ءَ دگہ یک ھُنرے ءَ چہ کارمرز کنگ ءَ اَنت – بیگواھیں مردماں دروگیں میڑاں کُشگ ءِ جرم ءَ ھوار اِنت پاکستانی پوج ءَ نشانگ کنگ یک بُنکی املے – اشی ءِ ھاتر ءَ پولیس ءِ اے ٹی ایف ونگ ءِ کارندھاں لب دیگ ءُ سی ٹی ڈی ءَ زورگ ءَ اِنت ئے – اشی ءِ واستا بازیں بلوچ مکن ھم کتگ اَنت – ما سرجمیں بلوچاں گوشگ لوٹ ایں ءُ مکن کن ایں آ سی ٹی ڈی ءَ ھوار پاکستان ءِ کجام چُشیں ادارھانی بھر جوڑ مہ بنت کہ آ بلوچانی کُشت ءُ کوش ءَ تچکی ءَ گون اَنت-

آئی ءَ گْوشتگ کہ گوستگیں شپ ءَ سرمچاراں اُرش ءِ وھد ءَ لھتے مردماں لیاقت ءِ رکینگ ءِ ھاتر ءَ جُھد کتگ – ھمے میان ءَ لیاقت ءَ وتاس در کتگ ءُ سرمچار نشانگ کنگی کتگ اَنت – اُرش ءَ پد سرمچاراں لیاقت ءِ وتاس وتی دستیگ کتگ – سرجمیں بلوچ اے وڑیں مردماں چہ دور بہ بنت-

جارکش ءَ دیمتر ءَ گوشتگ کہ چار نومبر ءَ تمپ ءِ دمگ موچ کور ءَ برجاھیں پاکستانی پوج ءِ چوکی ءِ سر ءَ سرمچاراں گوں اسنائپر ءَ اُرش کتگ ءُ یک کاندھے کُشتگ-

میجر گْوھرام بلوچ ءَ گوشتگ کہ زورگریں پوج ءُ آیانی کمکارانی سر ءَ اُرش داں زورگپتگیں بلوچستان ءِ وتواجھی ءَ برجاہ بنت-