TBP Balochi

روکپتی بلوچستان ءَ سر بیتگیں ھالانی رد ءَ جھانی وبا کرونا ویروس ءِ نادراھی ءَ بازیں مردمے مرگ ءِ دیمپان بیتگ اَنت کہ اشانی گیشتریں سبب روکپتی بلوچستان ءَ بندوکیں چاردہ شھراں جوانیں نادراہ جاہ ءِ نہ بوگ ءِ سبب گوشگ بیگ ءَ اِنت –

ھالانی تہ ءَ گوشگ بیتگ کہ ھما شھراں اگاں کمے کساس نادراہ جاہ ھست اَنت گڑا اود ءَ ڈاکٹر ءُ درمان کنوک گیش ھما جاھانی مھلوک ءَ نہ رس اَنت گوں –

ھالانی تہ ءَ گوشگ بیتگ کہ دزاپ، واش، شستون، پھرہ، نصر آباد، چھبار ءُ میناب ءِ نادراھجاھانی جاور نگیگ اَنت کہ چریشی ءَ اود ءَ مھلوک ءِ ھمپان ءَ اَنت –

آیانء گوشگ اِنت ھمے جاھاں کمے ڈاکٹرانی سبب ءَ بازیں مھلوکے مرگ ءَ وتی ارجان جتگ اَنت –

ھمے وڑ ءَ چاگردی مھلوک ءَ گُشتگ کہ روکپتی بلوچستان ءَ اگاں کرونا ویروس ءِ گیش تالان بیگ ءِ سبب ایش اِنت کہ اد ءَ چاردہ شھراں نادراہ ءِ نہ بوگ ءِ بروبری اِنت کہ چریشی ءَ مھلوک بازیں اڑ ءُ جنجالانی دیمپان اَنت –

آیانی گوشگ اِنت باید سرکار مھلوک ءِ سر ءَ دلگوش بہ کنت ءُ اے دمگاں کہ نادراہ جاہ ءُ درمانی نیست باید اے جاھاں نادراھجاھانی واستا بکس ءُ بند ءَ بہ کنت –

آیانی گوشگ اِنت کہ اگاں اے جاور بلوچستان ءَ بیت اَنت گڑا اد ءَ جھمنندیں مھلوک گیش تکانسر بیت کُت کنت –

بلوچستان ءِ بُنجاھی شھر شال ءَ سربیتگیں ھالانی رِد ءَ کانگو ویروس نادُراھی ءَ آماچیں یک مردمے بیران ءُ دگہ دو کس نادُراھی ءِ آماچ بوتگ اَنت-

شال ءَ فاطمہ جناح چیسٹ ءُ جنرل ھسپتال ءَ ھستیں کانگو ءِ ویروس ءِ یک نادُراھے بیران بوتگ وھدیکہ کانگو ءِ نادراھی ءَ دو دگہ نوکیں نادُراہ نادُراھجاہ ءَ آرگ بوتگ ءُ تھتیگ کنگ بوتگ اَنت ءُ کانگو ویروس ءِ نادُراھی ءِ آماچیں یک نادُراھے الاج کتگ ءُ وش بوتگ –

فاطمہ جناح نادُراھجاہ ءِ ڈاکٹر نوراللہ موسی خیل ءَ گْوشتگ کہ کانگو ویروس ءِ آماچ پنچ نادُراہ فاطمہ جناح جنرل اینڈ چیسٹ ھسپتال ءَ تھتیگ اَنت –

دو روچ ءَ پیش کانگو ءَ آماچ پنچ نادُراہ ھسپتال ءَ آرگ ءُ تھتیگ کنگ بوتگ اَنت ءُ اشانی تہ ءَ پشین ءَ گوں سیادی داروکیں 35 سالی ئیں نادُراہ ثنا اللہ ءَ وتی ساہ داتگ ءُ بیران بوتگ وھدیکہ دگہ یک نادُراھے جاندُراھی ءَ پد واتر وتی گس ءَ شتگ –

وھدیکہ شال ءَ سیادی داروکیں دو نوکیں نادُراہ تھتیگ کنگ ءَ چہ پد کانگو ءِ آماچ نادُراھانی کچ پنچ ءَ سر بوتگ اَنت-

بلوچستان ءِ دمگ کیچ ءَ نُھ اپریل ءَ بیگواہ بیتگیں ورنایے مروچی یل کنگ بیتگ ءُ وتی لوگ ءَ سر بیتگ –

یل بیتگیں ورنا ءِ پجار جھانزیب ء الی بکش جھمنند آبسر کیچ ءِ نام ءَ زانگ بیتگ – جھانزیب ءِ ھمراھی ءَ گرگ بیتگیں عیسی ء میردوست ءُ جلیل ء پُھلین انگت ءَ بیگواہ اَنت –

یل بیتگیں مردم ءِ یل بیگ ءِ ھال وائس فار بلوچ مسنگ پرسنز ءَ راست کرتگ ءُ گُشتگ کہ جھانزیب بیتگ ءُ آئی ءِ ھمراھی ءَ عیسی ءُ جلیل ءَ ھوار درستیں بیگواھیں مردم یل کنگ بہ بنت –

آئی ءَ گُشتگ کہ بلوچستان ءَ بیگواھیں مردمانی یلو کنگ وشی ءِ بلے باید سرکار دراھیں بندیگیں مردماں یلو بہ کنت ءُ کھولاں تہ ءَ وشی بئیت اِنت –

ھمے وڑ ءَ کیچ آبسر بلوچی بازار ءَ دگہ دو کس آوار جنگ ءُ بیگواہ کنگ بیتگ اَنت –

آوار جنگ بیتگیں مردمانی پجار عارف ء سوالی ءُ طاھر ء دل پُل جھمنند تربت آبسر بلوچی بازار ءِ نام ءَ زانگ بیتگ اَنت –

دمگی مردماں ٹی بی پی ءَ گوں گپ کنان ءَ گوشتگ کہ اے شش روچ ءَ پیسر وتی لوگ ءِ دپ ءَ نندوک بیتگ اَنت سلاہ بندیں مردماں آوار جتگ ءُ برتگ اَنت –

دمگی مردمانی رد ءَ اے ھردوک ڈیتھ اسکواڈ ءِ کارمنداں آوار جتگ اَنت ءُ برتگ اَنت کہ ھر دوک ڈرائیور اَنت –

دمگی مردمانی رد ءَ اے مردمانی آوار جنگ ءَ پد اشانی کھولاں بیھار دیگ ءَ اَنت ءُ گوشگ ءَ اَنت کہ چاردہ لَک یا دہ لک بہ دے ایت گڑا شمئے مردم یلو کنگ بنت –

بلوچستان ءَ دگہ جاھاں ھم ڈیتھ اسکواڈ ءِ مردماں ھمے وڑ ءُ گوست ءَ مردم آوار جتگ اَنت کہ آیانی کھولانی گور ءَ زر لوٹ اِتگ اَنت –

بلوچستان ءَ سیاسی مردمانی گوشگ اِنت “ڈیتھ اسکواد ” پاکستانی چیریں ادارھانی نیمگ ءَ جوڑ کنگ بیتگ کہ آ بلوچستان ءَ ناشریاں پرکار اِنت –

سر بیتگیں ھالانی رد ءَ بلوچستان ءَ دگ ءِ وئیلے ءَ ھوار کور ءِ آپ ءِ کپگ ءَ پنچ مردم بیران بیتگ اَنت-

وئیل بیلہ ءَ پیش اتکگ کہ اود ءَ چہ ھزدار ءَ دیم پہ کراچی ءَ رؤکہں مزدہ ٹرک کراڑو ءِ ھند ءَ یک پُھلے ءَ لگ اِتگ ءُ وئیل ءِ آماچ بیتگ –

وئیل ءَ ڈرائیور کلینر ءَ ھوار چار مردم بیران بیتگ اَنت – بیران بیتگیں مردمانی لاش کشگ ءُ بیلہ ھسپتال ءَ سر کنگ بیتگ اَنت –

ھالانی تہ ءَ گوشگ بیتگ کہ ٹرک پیماز ءَ لوڑ بیتگ ءُ دیم پہ کراچی ءَ روگ ءَ بیتگ کہ ناگتی وئیل ءِ آماچ بیتگ –

ھمے وڑ بلوچستان ءِ دمگ کیچ ءَ یک مردمے آپ ءَ کپتگ ءُ بیران بیتگ –

گیشیں ھالانی رد ءَ تمپ ءَ نھنگ کور ءِ آپ ءَ گوزگ ءِ وھد ءَ یک مردمے بیران بیتگ –

بیران بیتگیں مردم ءِ پجار ھزور ء عومر جھمنند کوھاڈ ءِ نام ءَ زانگ بیتگ کہ آ وتی پرپٹ ءِ سر ءَ کور ءَ گوزگ ءَ بیتگ کہ کور ءِ لوھڑاں دور داتگ ءُ چریشی ءَ آ بیران بیتگ، چریشی ءَ پد آئی ءِ لاش کشگ بیتگ –

بلوچستان ءِ دمگ نوشکی ءَ ناشناسیں سلاہ بندیں مردمانی تیرگواری ءَ چہ یک مردمے مرتگ، اُرش ءِ زمہ واری سلاہ بندیں بلوچ آجوئی لوٹوکیں گل بلوچ لبریشن آرمی ءَ منّ اِتگ-

سربیتگیں ھالانی کُشگ بیتگیں مرد ءِ پجار علی احمد محمد حسنی ءِ نام ءَ بیتگ، کہ ھندی ڈیتھ اسکواڈ ءِ باسک بیتگ۔

دومی نیمگ ءَ بلوچ لبریشن آرمی ءِ جارکش جئیند بلوچ ءَ وتی شنگ کُتگیں درشان ءِ تہ ءَ گُشتگ کہ مئے سرمچاراں نوشکی خاخوئی ءِ ھند ءَ پاکستانی پوج ءُ چیریں ادارھانی سروکی ءَ برجاھیں وتگڑیں ڈیتھ اسکواڈ ءِ کارندہ علی احمد محمد حسنی آئی ءِ لوگ نزیک ءَ نشانگ کتگ ءُ کشتگ ءُ سلاہ گوں وت برتگ اَنت۔

جارکش ءِ ردءَ علی احمد نوشکی ءِ کوھی دمگ خاخوئی، ہژدہ خول، زرین جنگل ءَ بلوچ راجی جُھد ءِ بگیری ءَ کار کنگ ءَ بیتگ- کشتگیں مرد آئی ایس آئی ءِ چاریگ ءُ خاران ءَ نفاذ امن نامیں ڈیتھ اسکواڈ ءِ کُشگ بیتگیں سروک مظفر جمالی ءِ نیٹورک ءَ گوں بندوک بیتگ کہ آ 2012 ءَ گَل ءَ خاران ءَ نشانگ کتگ ءُ کُشتگ-

جئیند بلوچ ءَ دیمترءَ گُشتگ کہ سال 2019 ءَ ہژدہ خول نوشکی ءَ بلوچ سرمچارانی سر ءَ بوتگیں اُرش ءَ کشتگیں مرد ءِ دست مان بوتگ ءُ ھمے وھد ءَ بلوچ سرمچاراں پُشت کنزینتگ اَنت

بلوچ لبریشن آرمی ءِ جارکش ءَ گُڈ سرءَ گُشتگ کہ نوشکی ءُ کش ءُ گور ءَ بلوچ راجی جُھد ءِ ھلاپ ءَ سر پُر کنوکیں ریاستی چیر دستی ءَ کار کنوکیں کارندھاں اے گوشگ لوٹ ایں کہ راجے بگیری کنوکیں مردم ھچ وڑ پھل کنگ نہ بنت۔

اقوام متھداہ ھوار دگہ ادارہ بلوچستان ءِ تہ ءَ بیگواھیں مردمانی درگت ءَ وتی زبان ءَ پچ بہ کن اَنت- ماما قدیر

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں مردمانی یل کنگ ءِ ھاتر ءَ برجاھیں وائس فار بلوچ مسنگ پرسنز ءِ زھرشانی ءَ چار ھزار ءُ سَے سد ءُ نود ءُ نُھ روچ سرجم بوتگ –

ھمے درگت ءَ بلوچ راجدوستیں رھشون ڈاکٹر عبدالحئی بلوچ، نیشنل ڈیموکریٹک پاٹی ءِ چنگیز بلوچ ءُ دگہ مردماں بنجل ءَ اتکگ ءُ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ بید ء سلاہ بندیں مھلوک ، نودربر، سیاسی باسکاں ھوار ھوار ھما سیاسی پاٹیانی رھشون ھم نشانگ کنگ بوگ ءَ انت کہ پُرایمنیں سیاسی جھد ءَ بیگواھیں مردمانی کھولانی ھمدرد انت –

آئی ءِ گوشگ ات کہ زورگیریں ریاستی پوج ءَ ھزارانی کچ ءَ بلوچ آوار جتگ ءُ بیگواہ کرتگ انت کہ آھانی تہ ءَ زالبول ءُ چُک ھم ھوار انت –

آئی ءِ گوشگ ات کہ ھزارانی کچ ءَ بیگواھیں بلوچ رھشونانی زانگول ءُ تیرسپتگیں جون بلوچستان ءِ جتا جتائیں ھند ءُ دمگاں دور دیگ بوتگ انت ءُ اے یکشل ءَ برجاہ انت، پاکستان ءِ درسیں ادارہ آ رسانکدر بیت شر یا پارلمنٹ دُراہ اے کُشت ءُ کوش ءَ ھچ گوشگ ءَ نہ انت ءُ بلوچ راج دژمن الم سرپد بنت –

آئی ءِ گوشگ ات کہ بلوچستان ءِ تہ ءَ سیاسی باسکانی زورانسری آوارجنی ءُ زنگولیں جونانی درگت ءَ دنیا ءَ گمراہ کنگ ءِ ھاتر ءَ ریاستی ادارہ وڑ وڑیں پندل کنگ ءَ انت –

آئی ءِ گوشگ ات کہ راستی ھمیش انت کہ بلوچ بیگواہ نہ انت بلکیں پاکستان ءِ زندانانی تہ ءَ ازیت سگگ ءَ انت ءُ ما اقوام متھدہ ءُ انسانی ھکانی ادارھاں چہ لوٹ کنیں کہ آ بلوچستان ءِ تہ ءَ بوؤکیں زلم ءُ زوراکی ، زورانسری آوارجنیانی درگت ءَ وتی زبان ءَ پچ بہ کن اَنت ءُ بیگواھیں مردمانی کھولاں ھک بہ دے اَنت ءُ کھول وتی دوستیگیں مردماں تاں سرکنگ ءِ وتی جھد ءَ پیلو بہ کن انت –

سر بیتگیں ھالانی رد ءَ اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 274 تالبان جنگول کُشتگ اَنت ءُ 119 ٹپی کرتگ اَنت۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش نگرھار، لوگر، کندھار، پراہ، ھِرات، جوزجان، بلگ، سمنگان، پریاب، سرئے پُل، ھِلمند بلک، ٹکھر، کندوز، بلگان، کاپیسا ءُ کابُل ءِ ھند ءُ دمگاں کرتگ اَنت۔

راجی پھزگ ءِ وتی یکشلیں ٹیوٹر پیگاماں گیشترّیں سرپدی یے دیان ءَ گْوشت کہ ھلمند ولایت ءَ اوگانی راجی لشکر ءِ بالیگراباں تالبان ءِ مُچیانی سر ءَ بمب گْواری ءِ ارش کنان ءَ پاکستانی جنگی کماندار مُلا اھمدی ءَ ھوار 54 تالبان کُشتگ اَنت ءُ دِگہ 16 ٹپی کُتگ اَنت۔

ھمے وڑ ءَ اوگان راجی لشکر بالیگراباں ولایت گزنی ءِ ھند ءُ دمگاں تالبان ءِ سنگراں بمب گْواری کُتگ 50 ناشرکاریں تالبان جنگول کُشتگ۔

اوگان راجی آشوبی سِلاھبند ءُ راجدوستییں گلاں گوں اوگان راجی لشکر ءِ کُمک ءَ ھرات ولایت ءَ ھم تالبان ءِ دو جنگی کماندار ءَ ھوار 56 تالبان جنگول کُشتگ ءُ چہ 20 گیش زدگ ھم کُتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 375 تالبان جنگول کُشگ ءُ 293 ٹپی بیتگ اوگان راجی لشکر ءَ ھمے جنگی اُرش نورستان، لوگر، کندھار، اُرزگان، ھرات، جوزجان، بلگ، سمنگان، ھلمند کاپیسا ءُ بلگان ءِ ھند ءُ دمگاں کرتگ اَت اَنت۔

دومی نیمگ ءَ کابُل شھر ءِ تہ ءَ اوگان پھزگی وزیر واجہ بسم اِلہ مھمدی ءِ گس ءَ اوگان تالبان ءَ وتکشی اُرش کُتگ ءُ چریشی ءَ پد کابُل ءَ ھوار اوگانستان ءِ دگہ مستریں شھر ءُ دمگاں پاکستان ءُ تالبان ءِ ھلاپ ءَ تْرُندیں زھرشانی ءُ روانک کشگ بیتگ اَنت۔

نبشتانک: من ھُدا آں ، وت سر نہ آں

نبشتہ کار : زرک میر

رجانک: داد شاشانی

دی بلوچستان پوسٹ

منی ھیال ءَ ھُدا ءِ زات یک انچیں نگیگی ءِ آماچ اِنت چو کہ یک راج ءُ یک زالبولے بہ بیت ۔
چُش کہ ملا ءَ ھُدا ءِ گْواچنیں پجار لگتمال کُتگ چہ زالبول ءَ گیش اندیم کُتگ ھپت آزمان ءَ چہ ھما دیم کُتگ آئی ءِ کتاب ھپت پوش ءِ تلا داتگ گوں آئی ءِ بے دروریں نبشتانکاں اِمرُوز تھ ءَ گیشین جنگ ءُ جیڑہ ھُدا ءُ زالبول ءِ سر ءَ بنا بوتگ اَنت ملا ءَ ھُدا ءُ زالبول ھردو وتی دست ءَ کُتگ اَنت چار چار سور کنگ ءِ پتوا داتگ ءُ ھما ھُدا ءِ منّوگِری ءَ پرمام کُتگ ئِے کہ آ وت آئی ءِ منّوگِر اِنت انچو کہ ھُدا ءَ پُل برھنگ ءَ ودی کُتگ ھمے رنگ ءَ مرد ءُ زالبول برھنگ ءَ ودی کُتگ اَنت پرچاکہ ھُدا وت برھنگ اِنت آئی ءِ کِر ءَ ناں کسے ( جے ڈاٹ j برانڈ ) دُکان ھست ناں کہ تارک جمیل ءِ دُکان اِنت کہ اود ءَ گُد گپت ءُ دوتک ءُ گْور ءَ بکنت۔

بلے ملا ءُ پنڈت ءُ پادری ، ناں کہ تھنا زالبول ءَ اندیم کن اَنت آ ھُدا ءِ دْرستیں وشرنگ ءُ زبیائیں ھر چیز ءَ اندیم کن اَنت دانکہ آئی ءِ واھِش سرجم نہ بنت دانکہ ھُدا ءَ را ھم اندیم نہ کُتگ ئِے بلکیں ھُدا وت ھم گْوش اِیت من تئی رگ رگ ءَ ھَوار آں من ءَ دُور ءُ دران مہ شوھاز من گْوش آں مرد ءُ زالبول مِھر زِر ءَ وت ماں وت وتی چُکّگ ءَ گُلائیش بنت الم اے وھد ءَ ھُدا گندگ ءُ ندارہ کنگ ءَ بیت بلے کَس ءَ جل ءُ پل نہ کنت ۔ بلکیں سکین دنت وت ھم چم ءُ دید گْواہ بیت بلے انگت یک روچے کسی گْواھی نہ داتگ ئِے ۔

مُلماھیں دیواناں ھُدا چَہ ملا ءُ پنڈت ءُ پادری ءِ چیر اندری ءَ کیت چوناھیگا ملا ءَ ناچ ءُ سوبت ھم بند کُتگ اَت اَنت راستیں گپ ھمیش اِنت اے ھُدا ءِ راھانی سر ءَ ڈنگر دَور دیگ ءِ جُھد ءَ اَنت پمیشکا منٹو گْوش اِیت ” ھُدا بلاھیں سیکولرے بوتگ آئی ءَ شیتان وتی گپ ءِ نہ منّگ ءَ پہ ھچ وڑیں سزا نہ داتگ اِمرُوز ءَ آجو کُتگ ءُ یل داتگ گْوشتگ ئِے اگاں آ وتی گپ ءَ مردُمان ءَ منّارینت کُت کنت بہ کنت ملا ءُ پنڈت ءِ جنگ سیکولر ازم ءِ بِگیر ءَ اِنت راستی ءَ اگاں بچار ئے ھُدا ءِ بگیری ءَ اِنت بیا اِت ھُدا ءَ چہ اے آزاب ءَ در کن اِت آئی ءِ سَسّا ءُ پکر ءَ موک اِت ھشت مارچ ءِ وڑیں روچے پہ ھُدا ءِ نام ءَ بنا بہ کن اِت ۔ روانک بہ کَش اِت جاک ءُ سلوات بہ کن اِت ۔

پلے کارڈ بہ زیر اِت آیانی سر ءَ اوگام نبشتہ کن اِت من ءَ چَہ آزمان ءَ جھل ءَ بیار اِت” منی سر ءِ چادر ءُ پوشاکاں دُور کن اِت منی ساہ بند اِنت ” منی چِراگ ءَ بل اِت ھر نیمگ ءَ روژنائی بہ بیت” منی رژن ءَ چہ پُل رُد اِیت آس روک نہ بیت ” من ھپتُمی آزمان ءَ نہ آں من مِھر ءُ دوستی کنوکانی میان ءَ ساڑی آں” بیا اِت یکجاہ بہ اِیں مِھر کن اِیں” بکال منی اَنت مُسلمان ھم منی اَنت ناں ملا ناں پنڈت ناں پادری منی اَنت ” من ءَ منی زات ءَ چہ دُور مہ کن اِت ” ” مُراد بات ترا جنکے بوتگ منی اے کار ءَ چہ ترا چے تاوان اِنت ؟ من ءَ تھنا مسیت ءُ مندراں مہ چار من باگِچھاں ھم ساڑی آں ” من ءَ مزنیں تامُر جاھاں مردُمانی بُت ءُ اکَس کَشی ءِ نُگرھیں زیبائیانی تھ ءَ بہ چار اِت ۔

من ءَ بُتانی بُنجل ءَ گوں پُر مِھریں واھگاں شان کنگ ءَ بہ چار اِت من ءَ پوریاگِرانی دست ءِ رنگیں بُرش ءِ چُکّگ ءَ بہ چار اِت من ءَ مِھر ءِ درانگاز کنوکیں مردُمانی سر ءَ پُل شانانی ءُ شاتمانی ءَ بہ چار اِت منی دیم تھار نہ بیت ھچ بر من ءَ جنگ نہ لوٹ اِیت مِھر ءُ یکجاھی لوٹ اِیت من ءَ مزھب ءِ نام ءَ مہ زان اِت مِھر ءِ نام ءَ بہ زان اِت منی ھُدائی ، منی ٹولی ءِ واھگ ءُ لوٹ اِت پرچاکہ ” من ھُدا آں ، وت سر نہ آں”-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: پروم ءِ اسکول ءُ استاد

نبشتہ کار: شاری لال

دی بلوچستان پوسٹ

مرچی کہ من چیزے لبز نویس اِت کن آں ھما استادانی برورد اَنت کہ من ءَ وانینتگ اِش اے ھما استادانی جھد اِنت کہ من ءَ وانگ ءِ سکین ءُ دلبڈّی ء داتگ آ استاد منی برات ءِ رنگ ءَ بوتگ اَنت، منی ناکو، مولوی ءُ ماسٹر ءِ رنگ ءَ ھم بوتگ اَنت من زندگ آں آ استادانی منہ وار آں۔

مرچی کہ من نَد چِست کتگ لوٹ آں ھمے استاداں چہ یک استادے ءِ بارو ءَ بہ نویس آں، بلے آ استاد ءِ من پیسری جھداں ستاکرز لیک آں بلے انیگیں ھستیں وھد ءَ آ استاد گوشگ ھم نہ کرز اِیت اِنت نہ باید اِنت کہ یک نودبرے وتی استاد ءَ بد بہ لیک اِیت، باید اِنت من وتی استاد ءِ ستا ءَ یاکہ استادروچ ءِ درگت ءَ پہ استاد ءِ یات ءَ شرّیں چیزے نبشتہ بہ کتیں، بلے من مروچی ناچار آں کہ وتی بوتگیں استاد ءِ گْواچنیں کارپداں ءَ پدّر بکن آں۔

ھمے استادانی برکت اِنت کہ چہ راجانی تہ ءَ زانتکار ءُ سوھوئیں مردم در کیت اِنت ھمے شرّیں استادانی سوَب ءَ کسان ءُ پدمنتگیں میتگاں چہ ناماوریں مردم درکیت ءُ گیدی ءِ تہ ءَ ناممکنیں کاراں ممکن جوڑ کن اَنت۔ ھمک راج ءِ پُشپدانی بندات ھمے استادانی دست ءَ اِنت۔ اگاں استاد شر بہ بیت آ راج ءِ پُشپد دیمروئی کت کنت، اگاں آ استاد ءَ تھنا استادی ءِ پوشاک گْور ءَ بہ بیت گڑا آ راج ءِ پُشپدانی باندات تھارمیم بیت اِنت۔

بلوچستان ءِ ھمک کنڈ ءَ ھمے جاور ھست اِنت کہ جاھے وانگجاہ نیست جاھے وانگجاہ کہ ھست اود ءَ وانینوک نیست اِنت، جاھے ھمے نیمون اِنت کہ وانینگ ءِ ایدگہ آسراتی نیست اِنت۔ بلے پروم ءِ جیڑہ پھک ءَ جتا اِنت پروم ءِ تہ ءَ باز وانگجاہ ھست اِنت بلے آ مستریں وانگجاہ کہ پروم ھست اِنت، آ جائین ءِ ھائی اسکول اِنت۔ اد ءَ ھر وھد ءَ کم تاں کم ۱۵ یا ۲۰ وانینوک بوتگ بلے مروچاں باز بہ بنت دو یا سہ اَنت۔ بلے ھمے دوئین ءُ سئیں وانینوک ءُ استاد پہ ٹھل ءُ ناز اَنت۔ ھمے استاداں چہ یکے ءَ پہ وت ءَ جتائیں یک زرّی وانگجاھے پچ کتگ کہ اود ءَ پہ زر وانینگ بیت اِنت۔

اے استاد ابید چہ وانگجاہ ءِ ماسٹری ءَ پیش امام ءُ پروم ءِ مستریں مولوی ءُ آدینگاں واز ھم کنت اِنت وھدے کہ آدینگاں گوں دراجی ریش ءُ اسپتیں پوشاکاں کیت ھما واز ءَ کنت گوش ئے پرشتگے چہ آزمان ءَ نازل بوتگ۔ ریشانی دراجی ءُ دمبل ءِ مزنی ءَ ھرکس بہ گِند اِیت آئی ءَ پارساھانی پارساہ لیک اِیت۔ بلے کسے آئی ءِ کارپداں بہ پھم اِیت آئی ءَ الّم ءَ راج دژمن لیک اِیت اِنت-

سرکاری ھساب ءَ اسکول ءِ وانگ سھب ءِ ۹ بجہ بندات بہ بیت بلے پروم ءِ ہائی اسکول ءِ ھمے استادانی کار اِنت یازدہ بج ءَ اسکول ءَ کاینت نودربراں یک پیرڈے ھم نہ وانین اَنت بس آھانی (حاضری) ءَ گِر اَنت پد ءَ ھما دمان واتر پہ لوگ ءَ راہ اِش دے اَنت کسے کہ آھاں جست بہ کنت شما چے ءَ چُش کن اِت گڑا گوشگ بیت ”شمئے زھگ وت وانوک نہ اَنت“ بلے وھدے کہ بیگاہ بیت دراھیں ماسٹر وتی زاتی زرّی اسکول ءَ پہ وھد ءُ پاس رو اَنت ءُ زھگاں شرّ وانین اَنت بلے سرکاری اسکول ءِ وانینگ ءِ تپ اِش کنت۔

جیڑگی گپ اِیش اِنت سھب ءِ سر ءَ وانوک ھما وانوک اَنت، وانینوک ھما وانینوک اَنت بس بدل اِنت جاگہ اد ءَ سرکاری اسکول اِنت ءُ اود ءَ پرائیوٹ اسکول اِنت۔ پرائیوٹ اسکول ءَ پہ وھد ءُ پاس دراھیں سبجکٹاں وانین اَنت ءُ سرکاری اسکول ءَ یک ساھتے اوں نہ وانین اَنت اگاں سرکار ءِ اسکول ءَ وانینوک دگر بوتین اَنت ءُ پرائیوٹ اسکول ءِ وانینوک دگر مارا ھچ ھبر نیست اَت بلے دوئیں جاہ ءِ وانینوک یک اَنت چشیں بے انساپی چیا؟ درمیان ءَ گار اَنت گریبیں بلوچ، پروم ءِ گیشتریں مردم نیزگاریں گریب اَنت آھاناں اینچو توان ءُ زر نیست پرائیوٹ اسکول ءِ زراں برداشت کت بہ کن اَنت آ ناچار ءُ بے وس اَنت تھنا وتی چُکّاں ھما جاہ ءَ دیم دے اَنت کہ اود ءَ مپتکہ وانینگ بیت اِنت چو نہ اِنت سرکاری اسکول ءَ ماسٹر مپتکہ بہ وانین اَنت ھمک ماسٹر کم تاں کم یک ماھے چل ءُ پنجاہ ھزار پگار گیپت اِنت اد ءِ ماسٹر یک تیرے ءَ دو شکار کنگ ءَ اَنت۔ پہ نام ءَ سرکاری اسکول وانینگ ءَ اَنت بلے کاینت وتی وھد ءَ گْوازین اَنت ءُ رو اَنت ماسٹرانی لیکہ ھمیش اِنت اگاں آ سرکاری اسکول ءَ شرّ بہ وانین اَنت، گڑا آھانی پرائیوٹ اسکول ءَ کس نئیت اِنت۔ بلے آھانی بدیں ساز اِتگیں پندل پدّر بوتگ-

من وتی مولوی ءُ استاد ءَ گوشگ لوٹ آں، اے اسکول ءِ پگار ءَ کہ تو وتی لاپ ءَ کن ئے پہ ترا زھریں کُچّل جوڑ بنت ءُ پہ تئی دین ءِ ھساب چوشیں کار ھرام اِنت اگاں ترا دنیا ءِ مردمانی ترس ءُ بیم نیست اِنت ترا ھدا ءِ کیامت ءِ ترس بہ بیت اِنت اے پروم ءِ پُشپدانی باندات شمئے دست ءَ اِنت ایشانی زندگی ءَ چو ارزانی ءَ برباد ءُ ویران مکن۔

تئی بربادیں نودربر شاری لال۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیابدپی شھر گوادر ءِ ھند پشکان ءَ آپ ءُ بجلی ءِ نہ بوگ ءِ سر ءَ زالبولاں زھرشانی بندات کرتگ ءُ دگ بند کرتگ –

چارشمبے ءِ سھب ءَ بازیں کچے ءَ زالبولاں شھر ءِ دکان بند کنان ءَ ھم دگ بند کرتگ ءُ نندانک جتگ ءُ نشتگ اَنت چریشی ءَ روانی مھتل بیتگ اَنت –

زھرشانی کنوکیں زالبولانی گوشگ اِنت کہ گوستگیں ماہ ءِ پانزدہ رمس ءَ بہ گر داں انیگ ءَ بجلی نیست اَنت ءُ نانکہ آپ ھست اِنت ءُ چریشی ءَ مھلوک یکدم تکانسر اَنت –

زالبولانی رد ءَ ما سک ءَ بزگی ءِ آماچ اِنت ءُ ترمپے آپ ءَ تلوسگ ءَ اِنت –

آیاں گُشتگ کہ اد ءَ دیمروئی ءِ نام ءَ ٹاہ دیوک مھلوک ءَ تن ءَ کُشگ ءَ اَنت –

آیاں گُشتگ کہ گوادر ءَ بجلی ءُ آپ ءِ جیڑہ ءَ کسے اگاں گند ایت گڑا کُچگانی جاورھال چتور اَنت اود ءِ مھلوک بے کساسیں آزابیں زندگی ءَ گوں دُچار اَنت –

آیاں گُشتگ کہ سرکار ءَ گوں دزبندی اِنت اگاں سرکار وتی دیمروئی ءِ ٹاہ ءَ برز کنگ لوٹ ایت گڑا اد ءَ جھمنندیں مھلوک ءَ ترمپے آپ بہ دنت کہ آ وتی نُک ءَ تر کُت بہ کن اَنت اگاں آیانی سیاھیں دروگ جھان ءَ سوتک کن اَنت-

زانگ بہ بیت مکران ءَ ھوار بلوچستان ءِ تیابدپی شھر گوادر ءَ گوستگیں دو ماھاں بجلی ءُ آپ ءِ نہ بوگ ءِ سر ءَ یکشل ءَ زھرشانی ءُ نندانکانی درچ برجاہ اَنت –

بلے تنی وھدی سرکاری تکاں گوادر ءُ دگہ دمگاں بجلی ءُ آپ ءِ پجارینگ ءَ بے سوبی ءَ ابید دگہ ھچ گندگ ءَ نیتکگ اَنت –