TBP Balochi

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بی ایل اے سرمچار تابش عنایت پنام ءِ ریحان بیست ءُ نھ جولائی ءِ شپ ءَ پنجگور ءَ ڈیھ ءِ رکینگ ءِ جھدءَ زورگیریں دژمن ءِ گوم ءَ دیم پہ دیمی ترندیں میڑ ءَ پد شھید بوتگ –

جارکش ءَ گوشتگ کہ بی ایل اے ءِ ایس ٹی او ایس بزاں “اسپیشل ٹیکٹیکل آپریشنل اسکواڈ” ءِ باسک سنگت تابش عنایت گل ءِ یک ھاسیں کار ءِ انجام دئیگ ءَ بوتگ کہ آ پنجگور ءَ عیسئی ءِ ھند ءَ زورگیریں پوج ءُ کُشندہ ٹولی ءِ ڈیک ءَ کپتگ ءُ دیم پہ دیم بوتگ انت کہ اودا بازیں اداراں میڑ ءَ پد دژمن ءَ ھاکاں ھوار کنگ ءَ پد آئی ءِ تیر ھلاس بوتگ انت بلے سنگت تابش ءَ دزگیر بوھگ ءِ بدل ءَ گڈی تیر ءِ لیکہ ءِ گچین کتگ ءُ وتی گڈی تیر وتی سینگ ءَ وت جتگ ءُ شھیدی نوش اِتگ –

جئیند بلوچ ءَ گوشتگ کہ پنجگور خدابادان ءِ جھمنند تابش عنایت پنام ریحان ء عنایت اللہ سال دوھزار چاردہ چہ بی ایل اے نترسیں سنگت ءِ بوتگ، وتی بے دروریں دلیری، زانت ءُ جنگی زانشتانی سوب ءَ آ سکیں کمیں وھد ءِ تہ ءَ بی ایل اے ءِ اسپیشل ٹیکٹیکل اپریشنل اسکواڈ ءِ بھرے جوڈ بوتگ – اے میان ءَ آئی ءَ پنجگور ءِ شھر، گچک ءُ کیلکور ءَ وتی پرز پیلو کرتگ ءُ بازیں جوانیں سنگراں دژمن ءِ پروش دئیگ ءَ وتی کرد پیلو کرتگ-

جارکش ءَ گوشتگ کہ تابش عنایت ءَ گڈی تیر ءِ لیکہ ءِ گچین کرتگ ءُ گل ءِ چیریں راز مدامی ءِ ھاتر ءَ وتی سینگ ءِ تہ ءَ چیر داتگ ءُ پھازتگ انت ءُ دژمن ءَ کلہو داتگ کہ بلوچ ھچبر وتی ڈیھے آجوئی ءِ جھد ءَ دسکش نہ بیت اِنت –

آئی ءَ گوشتگ کہ تابش عنایت شھیدی ءِ درگت ءَ پٹ پول سرجم کنگ ءَ پد گل ءِ نیمگ ءَ چہ اے درشان شنگ کنگ بوھگ ءَ اِنت، سنگت تابش ءِ شھیدی ءَ ھواریں مردم زوت وتی آسر ءَ سر کنگ بنت –

گڈسر ءَ جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے ءُ بلوچ راج ھچبر وتی تمردیں شھیداں بیھال نہ کنت ءُ بلوچ شھیدانی ھونانی بیر آجوئیں بلوچستان ءِ دروشم ءَ گرگ بیت –

سر بیتگیں ھالانی رد ءَ مستونگ ءَ چیف آف علیزئی ءِ دزگیری ءِ ھلاپ ءَ زھرشانی، دگ بند کنگ بیتگ –

زھرشانی کنوکاں شال ءُ کراچی ءِ شھدگ مستونگ ءَ نواب ھوٹل ءِ ھند ءَ بند کرتگ ءُ روگ ءُ آیگی مساپر مھتل کرتگ اَنت –

زھرشانی کنوکانی گوشگ اِنت کہ علیزئی ٹک ءِ سردار زمان ءِ سر ءَ دورگیں ازری نامہ جنگ بیتگ ءُ آ گرگ ءُ برگ بیتگ –

آیانی گوشگ اِنت سردار ءِ گرگ ءُ بندیگ جنگ ٹکی دودمانی لگتمالی اِنت باید پولیس اے دروگیں ارزی نامہ ءَ واتر بہ کنت آئی ءَ شری ءِ سر ءَ یلو بہ کنت –

زانگ بہ بیت چیف آف علیزئی سردار زمان دزگیر کرتگ ءُ برتگ، داں گڈی ھالانی تہ ءَ زھرشانی برجاہ بیتگ ءُ سردار ءِ یلو کنگ ءِ لوٹ ءَ کنگ ءَ اَنت –

بلوچستان ءَ دگ ءِ وئیل ءُ تیرگواری وئیلاں چار مردم زدگ بیتگ اَنت ءُ زالبولے ءَ ھوار دو کس بیران بیتگ اَنت، ھب ءَ یک لاشے دزکپتگ-

سر بیتگیں ھالانی رد ءَ بلوچستان ءِ دمگ مستونگ ءَ مزن شھدگ ءَ ریکی بوز ءِ ھند ءَ دو گاڑیانی ٹکر ورگ ءَ زالبولے ءَ ھوار دو کس ھما جاہ ءَ بیران بیتگ اَنت ءُ زالبولے ءَ ھوار سَے زدگ بیتگ اَنت –

زدگ بیتگیں مردم نواب غوث بکش رئیسانی نادراہ جاہ مستونگ ءَ برگ بیتگ اَنت –

ھمے وڑ ءَ بلوچستان ءِ دمگ کیچ ءَ ناشناسیں مردمانی تیرگواری ءَ وانگ جاہ ءِ ھیڈ ماسٹر زدگ بیتگ –

دی بلوچستان پتر ھال ءَ سر بیتگیں ھالانی رد ءَ آدینگ ءِ سھب ءَ ناشناسیں مردمانی تیرگواری ءَ گورنمنٹ بوائز ھائی اسکول کوشکلات ءِ ھیڈ ماسٹر لیاقت بلوچ زدگ بیتگ، زدگیں جاوراں نادراہ جاہ ءَ سر کنگ بیتگ –

تیرگواری ءِ وئیل ھما وھد ءَ پیش اتکگ کہ زدگ کرتگءں مرد وتی گس کوشکلات ءَ دیم پہ اسکول ءَ روگ ءَ بیتگ راہ ءَ علی آباد کوشکلات ءِ ھند ءَ راہسر بستگیں مردماں تیرگواری کرتگ، چریشی ءِ سبب ءَ آئی ءَ دو دانگ تیر لاپ ءَ لگ اتگ اَنت – بلے تنی وھدی تیرگواری ءِ سبب زانگ نہ بیتگ اَنت –

ھمے وڑ ءَ بلوچستان ءِ باپاری شھر ھب ءَ یک لاشے دزکپتگ،لاش چِست کنگ بیتگ ءُ نادراہ جاہ ءَ رسینگ بیتگ –

نبشتانک: بلوچ چہ کُجا اتکگ

نبشتہ کار: براھیم گُؔل

دی بلوچستان پوسٹ

بلوچ کَے اِنت ءُ چہ کُجا اتکگ اے ھبر انگت شَریں وڑے ءَ دیم ءَ نیتکگ پرچا کہ بلوچ آ وھد ءَ دیم ءَ آرگ نہ بیتگ ءُ آیانی پُشدر یک شوکیں دابے ءَ نز آرگ نہ بوتگ پد ءَ بےکِساس ندکار ھست اَنت کہ بلوچ ءَ را جِتا جِتائیں رنگءَ نبیستگ اِش-

لھتیں ندکار  گُوْشیت کہ ” بلوچ ” چہ ھزرت ھمزھ ءِ نَسل ءَ چہ در آتکگ پیداک اِنت لھتیں ندکار ھمے گُوش ایت کہ” بلوچ ” چہ عرب نسل ءَ اتکگ لھتیں ندکار گوْش ایت کہ ” بلوچ ” کوہ ءُ گارانی مردُم بیتگ اَنت ءُ ھرجاگہ کہ سبزی یِے بوتگ گُڑا داں ھمود ءَ جاہ منند بیتگ اَنت اِنچو پہ دِلجمے گُشگ بیت کہ بلوچ پیسرا کوہ ءُ گارانی جاہ منند بوتگ اَنت۔

بلے اَنویں لھتیں روچ ءِ ھبرے کہ نوکیں ماھتاکے اتکگ اَت کہ آئی ءِ تہ ءَ یک شوکیں نبشتہ کارے ءَ بلوچ ءَ را بلاشکی ءِ نام ءَ زانگ ءِ پیوست کُتگ اَت-

من اے ماھتاک ءِ نام ءَ نہ گِراں ھود ءَ بلوچ ءَ را آ شوکیں نبشتہ کار اَنت کہ بلوچی چہ بلاشکی ءِ نام ءَ زانگ کُتگ اَت-

اے وڑ رَد اِنت پرچا کہ بلاشکی ءُ بلوچ دو ٹوھیں ھبر اَنت ءُ اِشانی تہءَ سک باز تِپاوت ھست من
اگاں پَس ءَ را گوک بُہ گُشاں گُڑا من رَد باں زمین ءَ آزمان بُہ گُش آں من رَد باں شپ ءَ را روچ بُہ گُش آں من رَد باں پرچا کہ بلاش(بَ. لَا. شْ): چہ پارس ءِ بادشاھاں بوتگ کہ پیروز ءِ چُکّ اِنت ایشی ءَ ملک شاہ ھم گْوش اَنت باز مردم پہ نزانتکاری ایشی ءَ بلوچانی پیرُک گْوش ایت البت اے گپ نمنّگ نہ بیت کہ آ بلوچے بوتگ پرچاکہ چوشیں بازیں سردار ءُ امیرے پارس ءِ تہ ءَ بلوچ بوتگ اَنت انچوش کہ پارس ءِ مستریں بادشاہ “کوروش” کہ بلوچی لچّہ کاراں ھمے گال پْروشتگ ءُ “قریش” کرتگ ءُ رِند اِش “قریش” ءِ ٹکّ ءَ ھمگرنچ کرتگ اَنت-

ھمے وڑ ءَ اگاں ما بِچاریں “کوروش ءُ قریش ” بلاشکی ءُ بلوچ باز تِپاوت اِنت اے ھبر ھَو منّتگیں ھبرے کہ بلوچ چہ بِندات ءَ آریا نسل ءِ سَے ھزار سال ءَ ساریگیں لَڈ ءُ بار ءِ بَھرے بوتگ لڈ اتگ ءُ اَتک ءَ ایران ءِ کوہ ءُ گارانی تہ ءَ نِشتگ اَنت پد ءَ بلوچ کوم سکیں اَیاش پرستیں کُومے بیت ءُ آیار ءَ دِگر ءِ پُلگ ءُ ورگ سک وش بیت اَیاش پرستے بیت ءُ چاریت کہ کَسے اگاں کمو ھزگار اِنت یا کمو شوک ءُ شاھگانیں گُڑا یکدم آئی ءَ را پُل اِتگ اِش-

بلوچ ءِ بابت ءَ انگت تَک چُشیں نبشتہ کاری ءَ شرّیں وڑے ءَ پَٹ ءُ پول نہ کُتگ کہ سرجمیں کِسّہ دیم ءَ آرگ بِہ بیت ءُ شوکیں وڑے ءَ نبشتہ نہ کُتگ کہ بلوچ ءِ پُشدر ساپ ساپ ءَ زاھر بِہ بیت پد ءَ ھر نبشتہ کار ءِ وتی پَٹ ءُ پول ءِ ھرکَس ءَ وتی وڑ ءَ شُوھاز اتگ ءُ نبشتہ کُتگ اَنچو کہ لھتیں نبشتہ کاراں وتی کِتابانی تہ ءَ ھمے نبشتہ کُتگ  کہ بلوچ ھزرت ھمزہ ءِ پُشدر ءَ چہ آھوک اِنت ءُ آ ھزرت ھمزہ ءِ چُک ءُ نِماسگاں چہ زانگ بیت اِنت-

پد ءَ لھتیں نبشتہ کار اے ھبر ءَ کنت کہ بلوچ چہ عرب ءَ اتکگ ءُ آئی ءِ بُنی ھنکین عرب بوتگ آ چہ عرب ءَ در کنگ بنت ءُ اِیران ءِ نیمگ ءَ رھادگ بنت۔

نوں اے ھبر پدّر اِنت کہ بلوچ ءِ پُشدر انگت چُشیں رنگےءَ دیمءَ نیتکگ کہ تو گوں دلجمی گُشت بِہ کن ئے کہ بلوچ پِلان جاگہ ئے بیتگ بلے اَمنچو زانگ بیت ءُ دلجمی ءَ گوں گُشگ بیت کہ بلوچ چہ اود ءَ لڈ ءُ بار ءِ آماچ بوگ ءَ رَند کیت ایران ءِ کوہ ءُ گارانی تہ ءَ کیت نِندیت ءُ سِدرا کنت ءُ جاہ منند بیت ھمے کوہ ءِ نام “کوہِ البُرز” بیت کہ اود ءَ بلوچ جامنند بیت۔

پد ءَ بلوچ کوم سکیں بھادُریں کومے بیت ءُ انگت بھادُر اِنت آئی ءَ کہ ھر کُجا دیستگ کَسّے کمو ھزگار ءُ مالدار اِنت گُڑا آئی ءَ را ھر وڑ ءَ پُلتگ پد ءَ بلوچ کوم ءَ کدی اوں وت ءَ را نِزور بوگ ءَ نِشتگ۔

بلوچ کوم  ایران ءِ مَردُماں گوں کنجیں پُلگ ءُ ورگ ءَ اَمِنچو بزگ دلسیاہ کناں کہ اِیران ءِ مَردُم مجبور باں رواں بادشاہ ءِ گوْرءَ اے وھد ءَ ایران ءِ بادشاہ نوشیروان عادل بیت گُڑا ایران ءِ بادشاہ نوشیروان عادل کہ وتی مھلوک ءِ جیڑاھاں گوشداریت داں ھمے پیسلہ دنت  کہ ھر کُجا بلوچی گِندئے بُہ کُش اِت اِنت بلے کہ زھگے ، زالبولے یا کماشے یک بلوچے ھر جاہ کہ شُما دیست بس بُہ کُش ات ئِے گُڑا ایران ءِ مردُم بادشاہ ءِ ھبرانی اِش کنگ ءَ چہ پد آئی ءِ ھبر ءِ سر ءَ کار کن اَنت ھرجاہ کہ بلوچے گِنداں گُڑا آئی ءِ جنگ ءُ کُشگ بِنا کن اَنت بازیں زالبول ، کماش ، ورنا ءُ زھگ گُشگ بنت چہ ھمد ءَ بلوچ ءِ مزنیں کُٹمے ولگوْج بیت ءُ کمو مَردُم وتی جِند ءَ پہ ھزابی کَشّ ایت چہ ایران ءَ دیر سرجنان کنت۔

سرجنان سرجنان کیت “جھالاوان ” ءِ کوھانی نیمگ ءَ سر بیت ءُ مِزاں مِزاں سوراب ، ماراپ ءُ کلات ءُ بازیں دگہ نیمگ ءَ آیان کنت ءُ آباد بوگ بِندات بیت بلوچ کوم اَنچیں وفا دارے بیت کہ پہ وفا ءِ ھاتر ءَ جِندا بیران اوں کنت گُڑا بلوچ کوم اے جاہ ءَ وتی ماتی زمین لیکگ بِندات کنت اے وھد ءَ کہ بلوچ کیت کلات ءِ نیمگاں آباد بوگ بِندات کنت داں اے وھد ءَ کلات ءُ کلات ءِ کِرّ ءُ گوْراں ” ہندو ھاندانی ” ءِ واجائی بیت ءُ آئی ءِ زُبان “دراوڑی” بیت پد ءَ مِزّاں مِزّاں اے “دراوڑی” زُبان بِگڑان بیت ” بروہی” ءُ ” براہوئی” ءِ تہ ءَ کپان بیت بلوچستان ءِ تہ ءَ داں روچ مرچی اے  براہوئی زُبان گُشگ بیت۔

پد ءَ بلوچانی گِشتیریں نیم چہ ایران ءِ تاچینگ ءَ گوں جنّگ ءُ کُشّگ بوتگ اَت سک باز کم بلوچ پہ مرگ ءُ زِند ءَ چہ ایران ءِ ھاکمیانی چانگلاں پَشت کپتگ اَت ءُ آ اتکگ اِت آں کلات ءِ نیمگ ءَ گُڑا بلوچانی واست ءَ تکریبًا دگہ راہ ءُ دِر ھم نیست اَت کہ پہ وت ءَ یک زُبانے جوڑ بِہ کن اَنت پمیشکا تکریبًا سک مجبور باں ءُ گوں براہوئی ءَ ھوار بوان بَنت ءُ براہوئی ءَ وتی زُبان لیک اَنت آئی ءِ اتراپ ءَ ھیل کنگ بِنا کن اَنت بلوچانی آباد بوگ ءَ چہ رَند اے دیار کہ ھمود ءَ بلوچ نِشتگ اَت بلوچ ءَ وتی دیار لیک اِت ءُ بلوچستان ءِ نام ءَ چہ دُنیا ءِ دیم ءَ اتک گوں براھوئیاں سور ءُ سانگ کنان داں سک باز سیادی بوت ءُ آکِر ھوار بوت آں ما پمیشکا گُش آں کہ بلوچ ھما وش بَھت اِنت کہ آئی ءَ را دو زُبان ھست منی وتن ، منی دیار، منی ڈگار ءُ سر زمین ءُ مُچ منی کَے تو اتکگ ئے کہ جُست کن ءِ کہ من کَے آں؟ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

لچہ: کشار

لچہ کار: فیض سنجر

دی بلوچستان پوسٹ

سینگ ءَ آسے بَلین مُومیں دِل ءَ اِشکَر بکن
سر بہ گْوز دیوانگی ءَ اشک ءَ جاهے سر بکن

آجِزی پہ آدم ءَ شادانیانی مُژده اِنت
چہ جَهان ءِ شرّی ءَ پیسر وتارا شَر بکن

بِل اے کاڑانی گَماں اے شَهگل ءُ ماهیں گُلاں
بید ء درد ءَ هچ نہ داں مُهبَت ترا باوَر بکن

باجوئیں همراه مُدام دْروهنت راه ءِ نیمی ءَ
پہ اشاں دِلرنج مہ بو تو یُکّی ءَ لَشکَر بکن

اے جَهاں دائم ترا ایر جنت گوں جُهد ءَ تئی
سوبمَندی ءَ اگاں لوٹ ئے وتارا کَرّ بکن

شاه بہ بیت یا بَزگَرے هر کس وَتی واجہ وت اِنت
تو اے گپ ءِ مانَہ ءَ پہ هَرکس ءَ پَدّر بکن

دِینداریں مُلّهانی واز ءِ بُنگپ دُوزه اِنت
تو وتی اُوست ءِ بَهشت ءَ هازِر ءُ نازِر بکن

مُوجِزاهانی وَدار ءَ داں کداں نند ئے تو دوست!؟
چو مہ بیت کہ دُژمنے بئیت لوگ ءَ تئی سَنگَر بکن

فیض گوں هون ءَ وَتی اَنچیں کِشارے تو بہ کِشّ
اے کِشار ءِ ساهِگ ءَ تئی کوم ءِ باندات بَر بکن

سربوتگیں ھالانی رِد ءَ گوستگیں روچ ءَ بزاں دو اگست ءَ ناشناسیں مردماں بلوچستان ءِ دمگ آواران جاؤ ءَ پاکستانی پوج تراک ناکیں شوروانی نشانگ جوڑ کرتگ، پوج ءِ سر ءَ بوتگیں اُرش ءِ زمّہ واری بلوچ سلاہ بندیں گل بی ایل ایف ءَ منّ اِتگ –

دمگی اھوالکارانی رِد ءَ ناشناسیں مردماں جاؤ ءِ دمگ سیڑ ءَ پوجی کاروانانی پھازگ ءِ ھاتر ءَ برجمیں پوجی سنگر ءِ تہ ءَ پیش ءَ تراک ناکیں شورو کل کتگ، پاکستانی پوج تراک ناکیں شوروانی زد ءَ اتکگ اَنت شوروانی تراک ءَ پاکستانی پوج ءَ جانی تاوانانی دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اشی ءِ زمّہ واری منّ اِتگ گوشتگ کہ مئے سرمچاراں دو اگست ءَ آواران ءِ دمگ جاؤ سیڑ ءَ پوجی کاروان آنی پھازگ ءِ ھاتر ءَ برجاھیں یک سنگر ءِ تہ ءَ تراک ناکیں شورو کل کُتگ – ھنچوش کہ پوجی کارمند سنگر ءِ تہ ءَ پُترتگ انت گڑا تراک ناکیں شوروانی زد ءَ اتکگ انت، چریشی ءَ یک پوجی کارمند ءِ ھما دمان ءَ مُرتگ ءُ سَے زدگ بوتگ –

جارکش ءَ گوشتگ کہ ایشی ءَ پد پاکستانی پوج ءَ جھل جاؤ ءِ کوھی دمگاں زمینی پوج ءِ ھمراھی ءَ جنگی بالگردانی کمک ءَ تر ءُ تاب ءُ زوراکہ بندات کُتگ ءُ لشکر کشی مروچی ایں روچ ءَ پنچ شمبے ءَ ھم یکشل ءَ برجاہ بوتگ –

آئی ءَ گوشتگ کہ پاکستانی پوج ءں ھمراھی ءَ دمگی لیویز ھم گون بوتگ، ءُ پاکستانی پوج ءِ ھاتر ءَ اولی بھر ءِ کرد ءَ پیلو کنگ انت –

میجر گوھرام بلوچ ءَ گوشتگ کہ ما پیش ءَ ھم لیویز ءُ پولیس مکن کرتگ انت کہ آ زورگیریں پاکستانی پوج ءِ کمک کنگ ءَ پھریز بہ کن انت ءُ بلوچ آجوئی جھد ءِ بگیری ءَ زورگیریں ریاست ءِ ھمراہ داری ءَ مہ کن انت –

آئی ءَ گوشتگ کہ ما لیویز ءُ پولیس ءَ گڈی رند ءَ مکن کنیں کہ آ زورگیریں پوج ءِ کمکاری ءَ یل بہ کن انت اگں ناں آھانی گوم ءَ ھما وڈ کنگ بیت کہ پاکستانی پوج ءِ گون ءَ کنگ بوگ ءِ انت –

پاکستانی پوج ءِ سر ءَ دوجتا جتائیں اُرش بوتگ ءُ اُرشانی آسر ءَ پوچ جانی تاوانانی دیمپان کنگ کپتگ-

سربوتگیں ھالانی رِد ءَ زرباری وزیرستان ءِ تحصیل لدھا پوج ءِ گاڑی ھما وھد ءَ ریموٹ کنٹرول بمب ءَ گوں نشانگ کتگ کہ گاڑی ایف سی کیمپ ءَ چہ درایگ ءَ بوتگ –

تراک ءِ آسر ءَ کم چہ کم پنچ کارندہ مرتگ ءُ بازینے زدگ بوتگ اَنت وھدیکہ تراک ءِ آسر ءَ گاڑی سرجم ءَ تباہ بوتگ ءُ پروشتگ-

دومی نیمگ ءَ گوستگیں روچ ءَ باجوڑ ایجنسی ءِ تحصیل واڑہ ماموند المازو ٹاپ ءِ سر ءَ پاکستانی پوج ءِ چیک پوسٹ ءَ ساڑی ئیں پوج ءِ یک کاندھے گوں اسنائپر توپگ ءَ نشانگ کتگ ءُ ھما دمان ءَ مرتگ-

اے دوئیں اُرشانی زمہ واری تحریک طالبان پاکستان ءَ منّ اِتگ اَنت، طالبان ءِ جارکش محمد خراسانی ءَ دیمتر ءَ گْوشتگ کہ 28 جولائی ءَ ھم آیانی جنگولاں باجوڑ ایجنسی چمرکنڈ ءَ یک پوجی کارندھے گوں اسنائپر ءَ نشانگ کتگ ءُ کُشتگ-

عوامی نیشنل پاٹی (اے این پی) ءِ بیگواھیں بیتگیں بنجاھی پتر ءِ باسک ملک عبیداللہ کاسی ءِ جون دزکپتگ –

ملک عبیداللہ کاسی ءِ کھول ءِ رد ءَ آ بیست ءُ شش جون ءَ شال ءِ دمگ کچلاک ءَ کلی کتیر ءَ آوار جنگ بیتگ –

اے این پی ءِ باسک ءُ رھشوناں آئی ءِ آوار جنگ ءِ گپ ءَ پد شال ءَ زھرشانی ھم کرتگ اَت چریشی ءَ آیاں مزن شھدگ بند کرتگ اَت –

کچلاک ءَ پولیس کارگس ءَ ملک امن اللہ کاسی ءِ رد ءَ ارزی نبشتگ کنگ ءِ رد ءَ بیست ءُ شش جون ءَ بیگاہ ءِ ھپت ءُ نیم ءَ آئی ءِ برات زتک جان شیر ءَ ھال داتگ آئی ءِ ناکو عبید اللہ کاسی کلی کتیر ءَ آوار جنگ بیتگ –

جان شیر ءَ گُشتگ اَت کہ یک گولڈن رنگیں گاڑی ءَ چار سلاہ بندیں مردم ایر کپتگ ءُ زورانسری منی برات گاڑی ءَ ایر گپتگ ءُ وتی گاڑی ءَ سوار اش کرتگ –

ھمے درگت ءَ پشتون تھپز مومنٹ ءِ رھشون مھسن داوڑ ءَ چاگردی رسانکجاہ ٹوئٹر ءَ عبید اللہ کاسی ءِ کوش ایر جتگ ءُ کھول ءِ گون ءَ پدردی درشان اِتگ –

آئی ءَ گُشتگ کہ ریاست ءِ نیمگ ءَ پشتونانی کوش یکشل ءَ برجاہ اَنت ءُ اے کوش ءَ ھوار پشتونانی کوش ءَ یکے گیش بیتگ –

ھمے درگت ءَ جلیلہ ھیدر ٹوئٹر ءَ نبشتگ کنت شھر ء ناپرسان ءَ اکسانی تہ ءَ یک دگہ اکسے گیش بیتگ –

آ نبشتگ کنت نی کانون، انساپ، ریاست ءِ داروک، انتزامیہ ءِ بے سوبی، جرم کنوکانی گر ءُ دار ءَ کجام شرم ءِ گپ ءَ کُرت کن اَنت-

زانگ بہ بیت چریشی ءَ پیسر ھمے سال ءِ فروری ماہ ءَ اے این پی ءِ رھشون اسد خان اچکزئی ءِ لاش دزکپتگ اَت کہ آ ستمبر دوھزار ءُ بیست ءَ بیگواہ کنگ بیتگ اَت –

سر بیتگیں ھالانی رد ءَ اوگانستان ءَ اوگان لشکر ءُ تالیبان ءِ میان ءَ بازیں جاھاں جنگ ءُ چوپانی درچ یکشل ءَ برجاہ اَنت –

اوگان لشکر ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ گوں بالیگرابانی بمب گْواری ءَ ھوار اوگان راجی لشکر ءَ وتی تْرُندیں جنگی اُرشاں 303 تالبان جنگول کُشتگ اَنت ءُ 125 ٹپی ھم کرتگ اَنت۔

دومی نیمگ ءَ اوگان راجی آشوبی سِلاھبندیں گل ءُ اوگان راجی لشکر ءَ لوگمان ولایت ءِ دمگ بادپش ھم چہ ناشرکاریں تالبان ءِ دستگیری ءَ آجو کُتگ۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں اُرش نگرھار، لوگمان، گزنی، پکتیکا، کندھار، زابُل، ھِرات، جوزجان، سمنگان، پریاب، سر ء پُل، ھِلمند، نمروز، کندوز، بلگان ءُ کاپیسا ءِ ھند ءُ دمگاں کرتگ اَنت۔

راجی پھزگ ءَ وتی یکشلیں ٹیوٹر پیگاماں گیشتریں سرپدی یے دیان ءَ گْوشت کہ دوشی شپ ءَ ھلمند ولایت ءِ بُنجاھی شھر لشکرگاہ ءِ کِر ءُ کش ءِ دمگاں اوگانی راجی لشکر ءِ کمانڈواں آپریشن کنان ءَ ناشرکاریں تالبان ءِ 5 جنگول کُشتگ اَنت۔

ولایت ھرات ءِ انجیل، گْوزراہ ءُ دِگہ نزیکیں دمگاں گوں اوگان راجی لشکر ءِ بالیگرابانی بمب گْواری ءِ کمک ءَ آشوبی سِلاھبند، راجدوستییں گل ءُ راجی لشکر ءِ جنگی اُرشاں 19 ناشرکاریں تالبان کُشگ ءُ دِگہ 12 زدگ بیتگ اَنت۔

زانگ بہ بیت کہ ھِرات ولایت ءِ دمگاں راجی آشوبی سِلاھبندیں گلاں تالبان ءِ ھلاپ ءَ سِلاہ چِست کُتگ اَنت ایشی ءَ پد ءَ راجی اوگام “اللہ اکبر” سرجمیں اوگانستان ءَ گوں روانک ءُ زھرشانیاں البار بیتگ اَنت۔ زی ھرات شھر ءُ دِگہ دمگاں اوگان زالبوالاں ھم سِلاہ دست ءَ کُتگ ءُ تالبان ءُ پاکستان ءِ ھلاپ “اللہ اکبر” ءِ اوگام جتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 274 تالبان جنگول کُشگ ءُ 119 ٹپی بیتگ اَنت-

اوگان راجی لشکر ءَ ھمے جنگی اُرش نگرھار، لوگر، کندھار، پراہ، ھِرات، جوزجان، بلگ، سمنگان، پریاب، سرئے پُل، ھِلمند بلک، ٹکھر، کندوز، بلگان، کاپیسا ءُ کابُل ءِ ھند ءُ دمگاں کرتگ اَت اَنت۔

دومی نیمگ ءَ اوگانستان ءِ تاجک، اُزبک، پشتون، ترکمان ءُ بلوچ راجی سروکاں ھم وتی ولایت ءُ دمگاں تالبان ءِ ھلاپ ءَ سِلاہ چست کنگ ءِ جار جتگ-

اگان کارگس ءَ ھالانی تہ ءَ گوشگ بیتگ کہ زی ئیں دِیگر ءَ اوگانستان ءِ مستریں راجدوست ءُ جنگی سرکماش ابدلرشید دوستم چہ تُرکی ءَ اوگانستان ءِ جوزجان ءَ سر بیتگ ءُ مرچی گوں دگہ راجانی سروکاں نِند ءُ نیادے ءَ پد تالبان ءِ ھلاپ ءَ جنگ ءِ جار جنَگ بیت اِنت ۔

ھمے زی ئیں دِیگر ءِ وھد ءَ اوگان راجی لشکر ءِ سروک چیپ آپ جنرل اسٹاپ ولی مھمد اھمدزی ءَ گوں اوگانستان ءِ امریکی جنگی اگدہ ءُ جنرلاں وتی کارگس ءَ جنگی تیاری ءُ مراسانی سر ءَ گپ ءُ تران کُتگ اَنت۔

ستاشانی

بلوچستان ءِ ھمک گشندہ یات کنگ بنت، ھمک وش الھانیں گشندھانی ستاہ وتی وتی تکاں مھلوک ءِ نیمگ ءَ کنگ بنت ھمے گشندھانی لڑ ءَ یکے بلوچی زبان ءُ ساز ءُ زیمل ءِ وش الھانیں گشندہ ءُ شائر نور خان بزنجو ءِ اِنت کہ آئی ءَ بلوچستان ءُ بلوچستان ءِ مھلوک بے تاھیریں رنگے ءَ یات کن اَنت-

ھنچش سما بیت بلوچستان ءَ نور خان بزنجو ءِ وڑیں ازمکارانی کرد انگت ءَ مھلوک ءِ دلاں ھچ رنگ ءَ کم نہ بیتگ –

مروچی ھمے نیمرانیں سر ءِ بیرانی ءَ ھژدہ سال سرجم بوتگ، نمیرانیں نور خان بزنجو ءِ بارو ءَ گوشگ بیت کہ آ چار دسمبر نوزدہ سد ءُ شست ءُ نھ ءَ بلوچستان ءِ تیاب دپی دمگ پسنی ءَ گلام سرور ءِ لوگ ءَ ودی بیتگ –

بلوچستان ءِ اے رژنائیں چراگ ءَ وتی چمانی بچ کنگ ھما جاہ ءَ کرتگ کہ اود ءَ ازمکار ءُ شائرانی مزنیں لڑے اے وھد ءَ جاڑیگ اِنت کہ مروچی آیانی تہ ءَ مبارک کازی، منیر مومن، انور ساھب کان، اکرم ساھب کان ءُ زبیر مکتار ءِ وڑیں ازم ساچستکارانی شھر ءَ ودی بیتگیں ازمکار مروچی ھم بلوچستان ءِ کُوچگ کوچگ میتگ میتگ ءَ یک شرپداریں رنگے ءَ گوشدارگ بیگ ءَ اِنت –

نمیرانیں نورخان بزنجو ءِ بارو ءَ گوشگ بیت کہ آئی ءَ بنداتی وانگ زانگ چہ پسنی ءَ بنگیج کتگ تاں دھمی تبک ءَ ھمود ءَ پسنی ءَ وانگ ءَ بوتگ پسنی میٹرک چکاس ءَ سوبین بوگ ءَ پد آ پہ گیشیں وانگ ءِ ھاتر ءَ کیچ تربت ءَ شُتگ ءُ اود ءَ آئی ءَ آرٹ ءِ تہ ءَ داکلہ زرتگ ءُ بیچلر آف آرٹ ءِ سرجم ڈگری گرگ ءَ پد گیشیں وانگ ءِ ھاتر ءَ آ دیم پہ بلوچستان ءِ بنجاھی شھر شال ءَ اود ءَ آئی ءَ آرٹ ءِ تہ ءَ وانگ سرجم کرتگ ءُ چریشی ءَ پد واتر وتی بنکی میتگ پسنی ءَ اتکگ ءُ چیزے وھد ءَ سرکاری اسکول پسنی ءَ ماسٹر ھم بوتگ –
نمیرانیں نور خان بزنجو ءِ بارو ءَ گوشگ بیت کہ آ چہ کسانی ءَ ساز ءُ زیمل ءِ واھگدار بوتگ آئی ءَ چہ ساز ءُ زیمل ءِ کلانیں استاد عبدالستار بلوچ ءُ ولی محمد بلوچ ءِ کر ءَ زیمر دربُرتگ ءُ کسانیں وھدے ءَ پد آئی ءَ وتی اولی نوار“ شیرکنیں یات شنگ” تالان کتگ ءُ آئی ءَ پد دگہ نوارے گزل شنگ ءُ تالان کرتگ انت –

نمیرانیں نورخان بزنجو ءِ بارو ءَ گوشگ بیت کہ ساز ءُ زیمل ءَ ھوار آ یک شائرے ھم بوتگ آئی ءَ بلوچی زبان ءَ ھوار اردو ءِ تہ ءَ ھم شائری کتگ- بلوچی آئی دو شاعری کتاب ھم نبشتہ کرتگ اَنت –

نمیرانیں نورخان بزنجو کہ آئی گڈی مراگش مند ءَ بوت ءُ پد ءَ آئی ءَ پنچ اگست دوھزار سَے ءَ بزاں سی ءُ سَے سال ءِ اُمر ءَ اے کوڈھیں دنیا یلا دات ءُ وتی ابدی جاہ ءَ شُت اے گرانیں بار پہ وتی ساچستیں بالاد ءَ یلو کرت ءُ شت –

نور خان بزنجو ءِ یاتگیری ءَ بچکند پلم ءِ نیمگ ءَ یک کسانیں ڈوکمینٹری ءِ ھم شنگ تالان کنگ بوتگ اَت کہ آئی ءِ آزم ءِ بارو ءَ آئی ءِ نزیکیں مردماں وتی ھیال شکساتگ اَنت –

دی بلوچستان پوسٹ بلوچی نمیرانیں نور خان بزنجو ءِ ھژدھمی سالروچ ءِ درگت ءَ آئی ءَ گون اے شَیر ءَ یات کنت –

جُھد منی لوٹ ءُ واھگ انت بیلاں
جھد چنالانی ساھگ انت بیلاں
جھد کئی زند ء مرادانی سمین
جھد کئی آجو ءِ مستاگیں درین
جھد وانندہ ءُ شائرانی کلم
جھد عنابیں جدیمگ انت بیلاں
جھد مھرانی نوک ترپیں بام انت
جھد کاڑانی براہ ءُ شیشام انت
جھد ترپ ءُ لاس ءُ لال ءُ مروارد
جھد دوست ءِ شبینگ انت بیلاں
جھد سدگنج ءُ ھانی ءِ مھر انت
جھد گلیں سھرکشانی ءِ مھر انت
جھد شاران ءُ شدری ءُ شاری
جھد مھرانی چمگ انت بیلاں
جھد ھمید جان ءِ پاھو ءِ لوپ انت
جھد مجید جان ءِ سینگ ءِ توپ انت
جھد گوھرام ءِ دو دپی زھم انت
جھد نواب ءِ نہردگ انت بیلاں
جھد نہ انت کُچل ءُ ترندآپیں شراب
جھد بھشت اِنت ءُ نیکیانی سواب
جھد بے کیفیں دیدگانی کمار
جھد شھد انت ءُ بینگ انت بیلاں