TBP Balochi

بلوچستان ءِ دمگ نال ءَ لسبیلہ یونیورسٹی وڈھ کیمپس ءِ ایڈمیشن ءِ درگت ءَ گورنمنٹ بوائز ڈگری کالج نال ءَ یک مراگشے اڑ دیگ بیتگ، مراگش ءَ بازیں کچے ءَ نودربراں بھر زرتگ –

مراگش ءَ وڈھ کیمپس ءِ پروفیسر داکلہ کمیٹی ءِ باسک، نال کالج ءِ پرنسپل گورنمنٹ بوائز ھائی اسکول نال ءِ ھیڈماسٹر ایگریکلچر آفیسر نال ءَ کریئر کونسلنگ ءِ درگت ءَ سرپدی داتگ –

مراگش ءَ بلوچ اسٹوڈنٹس ایکشن کمیٹی (بساک) بلوچ اسٹوڈنٹس ارگنائزیشن (پجار) ءِ کاروان “علم حق” بھر زرتگ-

اشاں ابید کالج ءُ اسکولانی نودربراں ھوار الم دوستیں مھلوک ءَ بازیں کچے ءَ بھر زرتگ –

بھر زیروکیں مردماں گوشتگ کہ الم ءُ زانگ ھمک بنی آدم ءِ بنکہ ھک اِنت ءُ ھمک بنی آدم ءَ المی اِنت کہ وتی الم ءُ زانت ءِ چراگ ءَ روک بہ کنت –

آیاں گوشتگ کہ ھمے ھساب ءَ بلوچستان ءَ الم ءُ زانت ءِ تالان کنگ ءَ باید ھمک تکاں بندوکیں مردم وتی کرد ءَ پیلو بہ کن اَنت تانکہ بلوچستان ءِ آیوکیں باندات ءِ چراگ وتی راہ ءَ گچین کت بہ کن اَنت ءُ وتی الم ءُ زانت ءِ زور ءَ دیم ءَ شت بہ کن اَنت ءُ وتی چاگرد ءِ سماہ ءَ بہ کن اَنت –

بلوچستان ءِ باپاری شھر ھب ءَ پاکستانی چیریں ادارھاں دو بلوچ نودربر آوار جتگ ءُ گوں وت برتگ اَنت-

سربوتگیں ھالانی رِد ءَ پاکستانی چیریں ادارھاں اے دوئیں نودربر ھما وھد ءَ آوار جتگ ءُ بیگواہ کتگ اَنت کہ آ ڈاکخانہ دگ ءَ یک دکانے ءَ نندوک بوتگ اَنت-

آوار جنگ بوتگیں دو نودربرانی پجّار زبیر زھری ء سراج احمد ءُ عدنان مینگل ء خدا بخش ناماں چہ بوتگ اَنت کہ شال پولیٹکنک کالج ءِ نودربر اَنت-

دوئیں نودربر گوستگیں روچ ءَ بیگواہ کنگ بوتگ اَنت –

زانگ بہ بیت بلوچستان ءَ گوستگیں چیزے روچانی تہ ءَ شش نودربر زورانسری آوار جنگ بوتگ وھدے کہ مرچی نوشکی ءَ چہ پاکستانی پوج دو نودربر آوار جتگ ءُ بیگواہ کتگ اَنت ھمے وڑ شاھرگ ءَ ھم دو مردم آوار جتگ ءُ بیگواہ کتگ اَنت –

زانگ بہ بیت بلوچستان انسانی انسانی ھکّانی پامالی بوگ ءَ اِنت زورانسری آوار جنی ءِ تہ ءَ روچ پہ روچ گیشی بوگ ءَ اِنت برے دروگیں میڑ نام سر ءَ بیگواھیں مردماں کُش اِیت برے دروگیں بھتام جنت ءُ آھاں سلاہ بند زاھر کنت بلے پاکستانی پوج ءُ آئی چیریں ادارھانی زوراکی ءِ سر ءَ انگت ھچ وڑیں گامگیج زورگ نہ بوتگ انسانی ھکّانی باسک ءُ گلانی بے تواری پاکستانی پوج ءُ ادارھاں گیشتر مھکم کنت –

دبئی ءَ آئی سی سی مینز ٹی ٹوئنٹی ورلڈ کپ کرکٹ گوازی برجاہ انت ءُ مروچی شمبے روچ ءَ ساؤتھ افریقہ ءُ انگلینڈ، ویسٹ انڈیز ءُ آسٹریلیا ءِ میان ءَ گوازی برجاہ بوتگ اَنت کہ ساؤتھ افریقہ ءَ دہ رناں ءُ آسٹریلیا ءَ ھشت وکٹاں باج بُرتگ –

شیخ زائد کرکٹ پٹ ءَ مروچی بوتگیں گوازی ویسٹ انڈیز ءُ آسٹریلیا ءِ میان ءَ بوتگ آسٹریلیا ءَ ٹاس کٹیتگ ءُ اولسر ءَ بالنگ کنگے پیسلہ کتگ ویسٹ انڈیز ءَ اولسرءَ بیٹنگ کنان ءَ بیست اورزانی تہ ءَ ھپت وکٹانی تاوان ءَ یکسد ءُ پنجاہ ءُ ھپت رن ءِ ٹارگٹ داتگ –

آسٹریلیا ءَ ویسٹ انڈیز ءِ نیمگ ءَ داتگیں ٹارگٹ ھشت وکٹانی پجیگ اڈ کُتگ – آسٹریلیا ءِ نیمگ ءَ ڈیوڈ وارنر ءَ ھشتاد ءُ پنچ رن جوڈ کتگ ءُ ناٹ آؤٹ بوتگ وھدیکہ مچل مارش ءَ پنجاہ ءُ سَے ءُ ایون لوئس ءَ بیست ءُ نھ رن جوڈ کرتگ –

ویسٹ انڈیز ءِ نیمگ ءَ اولسر ءَ گوازی کنان ءَ بیست اوورانی تہ ءَ ھپت وکٹانی تاوان ءَ یکسد ءُ پنجاہ ءُ ھپت رن جوڈ کتگ –
ویسٹ انڈیز ءِ نیمگ ءَ کیرن پولارڈ ءَ چِل ءُ چار شمرون ءَ بیست ءُ چار رن جوڈ کتگ، آندرے رسل ءَ ھژدہ، کرس گیل ءَ پانزدہ ءُ ڈوائن ءَ دہ رن جوڈ کتگ –

آسٹریلیا ءِ نیمگ ءَ جوش ہیزل چار لیبی آؤٹ کتگ، ایڈم زمپا، مچل اسٹارک ءُ اورپیٹ ءَ یک یک وکٹ گپتگ –

انگلینڈ ءَ ٹاس کٹیتگ ءُ اولسر ءَ بالنگ کنگے پیسلہ کُتگ، ساؤتھ افریقہ ءَ بیٹنگ کنان ءَ بیست اوورانی تہ ءَ دو وکٹانی تاوان ءَ یکسدو ھشتاد ءُ نھ ءِ ٹارگٹ داتگ –

ٹارگٹ پروشگے ھاتر ءَ انگلینڈ ءِ لیبیاں بیست اوورانی تہ ءَ ھشت وکٹانی تاوان ءَ یکسد ءُ ھپتاد ءُ نھ رن جوڈینتگ ءُ ساؤتھ افریقہ ءِ ٹارگٹ پروشت نہ کرت ءُ ھار وارتگ –

سربوتگیں ھالانی رِد ءَ گوستگیں بیست ءُ چار ادارانی تہءَ بلوچستان ءَ جھانی وبا کرونا ویروس ءِ نادراھی ءِ آماچ بوتگیں ھپت دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ دو ھزار ءُ سَے سد ءُ چِل ءُ ھشت ءَ سر بوتگ اَنت-

بلوچستان جان سلامتی ءِ واکدارانی نیمگ ءَ چہ شنگ بوتگیں رپورٹ ءِ رِد ءَ مروچی شمبے ءِ روچ ءَ بلوچستان ءِ پنچ دمگاں ھپت مردمانی تہءَ کرونا نادراھی پدر بوتگ ءُ چریشی ءَ پد تنی وھدی بلوچستان ءِ تہ ءَ کرونا نادراھی ءِ آماچ بوتگیں مردمانی کچ ءُ نوکیں کیسانی ھوار بیگ ءَ پد سرجمی ءَ سی ءُ دوھزار ءُ سَے سد ءُ چِل ءُ ھشت ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ بیست ءُ چار ادارانی نیام ءَ سَے مردم وش بوتگ انت، وش بوتگیں مردمانی کچ سِی ءُ یک ھزار ءُ ھشت سدو شست پنچ سر بیتگ اَنت-

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ یک سد ءُ بیست ءُ شش نادراہ ھست انت کہ سَے نادراہ بلوچستان ءِ نادراھجاہ ءَ الاج کنگ بیگ ءَ انت ءُ آھانی تہ ءَ دو ھائی فلو آکسیجن جنگ ءُ اِلاج کنگ بیگ ءَ انت – مروچی سَے سد ءُ بیست مردمانی کرونا نادراھی ءِ ٹیسٹ کنگ بوتگ اَنت کہ اِشانی تہ ءَ تنی وھدی نود ءُ پنچ مردمانی رپورٹ نئیتکگ اَنت-

تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ پنجاہ ءُ ھپت مردم بیران بوتگ اَنت-

ھرنائی ءَ پاکستانی پوج ءَ دو مردم دزگیر کنگ ءَ پد بیگواہ کُتگ اَنت –

سربوتگیں ھالانی رِد ءَ بلوچستان ءِ دمگ ھرنائی ءَ پاکستانی پوج ءَ گِس ءِ سر ءَ بیڑ برتگ دو مردم زورانسری آوار جتگ ءُ بیگواہ کتگ انت –

گیشیں ھالانی رِد ءَ مروچی سھب ءَ ھرنائی ءِ دمگ شاھرگ ءَ دو اولاکاں سواریں پوجی کارمنداں گِس ءِ سر ءَ بیڑ برتگ دو مردم آوار جتگ –

آوار جنگ بوتگیں مردمانی پجار علی نواز ء المر ءُ گزین ء شاھنواز ءِ ناماں چہ بوتگ انت –

زانگ بہ بیت گوستگیں دو روچاں بلوچستان ءِ تہ ءَ زورانسری آوارجنیانی تہ ءَ گیشی اتکگ –

گوستگیں روچاں پوج ءَ شال ءَ ھاسٹل ءَ بیڑ برتگ ءُ دو ورناہ زورانسری آوار جتگ ءُ گون وت برتگ کہ داں انگت بیگواہ اَنت –

بلوچ اسٹوڈنس ایکشن کمیٹی ءُ بلوچ اسٹوڈنس آرگنائزیشن اوتھل ءِ نیمگ ءَ ارمابیل ءِ پریس کلب ءِ دیم ءَ پریس کانفرنس کنگ بوتگ –

پریس کانفرنس ءَ بی ایس او اُتھل ھنکین ءِ جنرل سیکریٹری رضوان بلوچ، سینئیر جوانٹ سیکریٹری یاسین بلوچ وھدیکہ بلوچ اسٹوڈنس ایکشن کمیٹی ءِ بنجاھی کمیٹی ءِ باسک بابا عجاز بلوچ، زوانک جنرل سیکریٹری آغا شیرخان ءُ دگراں گوشگ ات کہ بلوچستان ءَ وانگی ءُ پٹ ءُ پولی ادارھانی تہ ءَ کوردیدیں کردانی ساڑی بوگ ءُ آھانی ھستی ءَ پریشانی ھست –
آھانی گوشگ ات کہ بلوچستان ءِ گیشتر وانگجاھاں زانت ءُ المی سرکلانی سر ءَ بندش جنگ بوتگ ھمک روچ وانگجاھاں زانت ءِ دیمروئی اڈاند پیدا کنگ ءُ مارا نیگیٹو راہ ءَ برگ ءِ کوشت بوگ انت –

آھانی گوشگ ات کہ چریشان پدر انت کہ زوگیری ءَ برجاہ دارگ ءُ بلوچ ورنایانی زورانسری آوارجنی ءَ چہ وانگ جاھاً دور دارگ، وتی پندلان جاھلی ءُ ناونندھی گُٹ ءَ لوپ کنگ تھاری ءِ نیمگ ءَ برگ ءَ راجی جھد ءَ چہ یکر کنگ – بلے بی ایس او ءُ بساک اے وڑیں پندل، وتگڑ ساچیں شور گیرانسانی کارانی بگیری ءَ یکجاھی ءَ جھد کنگ ءِ سر ءَ اوست داریت کہ یکجاہ ءُ پھتویں جھد ءِ کمک ءَ اے وڑینانی بگیری دستوری امل ءَ پرایمنیں سیاسی جھد کنگ بیت اِنت –

آھانی گوشگ ات کہ اولی روچ ءَ چہ مارا ھمے ھیل دیگ ءِ کوشست کنگ بوتگ کہ جھلانک ءُ زانشی ادارہ ءُ دربرجاھاں بلوچ ورنایاں ترس ءُ بیھار ءَ چیرترینگ ءِ رِد ءَ ٹارچر کنگ ءُ چہ زانت ءَ دور دارگ بہ بیت – تانکہ زانتی جھد ءُ میان استمانی جاورھالاں بلوچ ورنایاں بے زانت کنگ ءُ آھاں نیست ءُ نابود کنگ بلے ورناہ وتی گچین کتگیں المی راہ درسیں اڑاندانی دیر کن ےِ ھاتر ءَ ھمک وھد ءَ ساڑی انت –

آھانی گوشگ ات کہ بلوچ اسٹوڈنس آرگنائزیشن بنجاھی رھشونانی مکران ءِ تر ءُ تاب تربت مزن شاھدربرجاہ دیم ءَ اتکگیں انتزامیہ ءِ زوراکی ایرجتگ – بلوچ ورنایاں وتی زانشجاھاں سیاسی سرکل لبزانکی مراگشاں دور دارینگ ھمے وتگڑیں ساچست ءِ سوج دیگ جھد بوتگ کہ نودربر سیاست المی گپ باوست ءَ گیردستوریں راہ کنگ ءُ آئی ءَ ھلاس کنگ اِنت –

بی ایس او ءُ بساک اے درسیں اے لُچیں کرداں سرپد کنگ لوٹ ایت کہ نودربر سیاست وتی المی، پگری ءُ پھتوی ءَ ادارہ مھکم کتگ انت ناکہ اے وڑیں مردمانی رویش وتیگی کتگ ءُ ھراب کتگ انت –

آھاں تربت شاھدربرجاہ پھازداران ھوار درسیں افیسر مکن کتگ انت گوشتگ کہ ملک ءِ دستور ءُ انسانی ھکانی چارٹر رِد ءَ زانت امل ءَ چہ اے مُجیں دیماں پاک کنگ دربرگی امل برجاہ دارگ بہ بیت –

آھانی گوشگ ات کہ ما پرایمنیں سیاسی ءُ المی جھد ءَ میان استمانی رھبندانی سر ءَ راجی دارھانی بھالی دیمروئی ھاتر ءَ پُرایمنیں سیاسی جھد ءِ سر ءَ اوست داریت –

مستونگ ءِ دمگ کانک ءَ پاکستانی پوج ءِ دست ءَ زورانسری آوار جنی ءَ پد  بیگواہ بوتگیں کانود ءِ نودربر شفیع اللہ بلوچ ءِ کھول ءَ گوشتگ کہبلوچستان ءَ گوستگیں دو دھکاں چہ درسیں تک ءُ پھناتاں سیادی داروکیں مردم زورانسری آوار جنی ءِ پئیمیں سنگینیں جیڑہ ءِ دیمپان انت –

بلوچستان ءِ سرجمیں نسل زورانسری آوار جنی ءِ دیمپانی ءَ کنگ انت بلے بیگواہ کنوکانی تُن انگت ھلاس نبوتگ ءُ آوارجنی ءِ درچ یکشل ءَ برجاہانت –

شفیع اللہ ءِ کھول ءَ وتی شنگ کرتگیں درشان ءِ تہ ءَ گوشتگ کہ بلوچستان ءَ بیگواھی ءِ واست ءَ شمار ءَ کس ءَ کتکاری ءَ ھوار بوھگے زلورتنہ انت بلکیں یک شریں انسان یک بلوچ ءُ وانندہ ءُ زانتکاریں ورناھے بوھگ بس انت – بلوچستان ءَ بیگواھیں مردمانی کچ روچ پہ روچ گیشبوھان انت ءُ ھمک روچ ایشی ءِ تہ ءَ گیشی آھان انت –

آئی ءَگوشتگ کہ بلوچستان ءَھر ھمک جاہ ءَ بیگواھیں مردمانی کچ گیش بوھان انت ءُ ورناھانی آوار جنی ءِ تہ ءَ گیشی آھان انت چریشی ءَ بلوچورناہ یک بے باوریں مارشتی ءِ آماچ انت بلکیں پژنی گپ ایش انت کہ بلوچستان ءِ نوں زانشجاھ ھم نہ رکیتگ انت کہ اودا ءَ نودربر چستکنگ بوھگ ءَ انت –

شفیع اللہ ءِ کھول ءِ رِد ءَ ھمے زورانسری آوار جنگ بوتگینانی تہ ءَ مئے ورناھیں نودربر شفیع اللہ ھم ھوار انت کہ ایف سی ءَ ھژدہ اگست ءَنوشکی ءَ چہ شال ءِ آھگ ءِ میان ءَ مستونگ پوجی پانگس ءَ آوار جتگ ءُ بیگواہ کتگ کہ انگت  بیگواہ انت ءُ آئی ءِ ھچ ھال نیست  آئی ءَ پد مادرستانی زندد ھمے ازاب ءِ تہ ءَ گوازگ ءَ اِنت، جانی ازابانی دیمپانی ءَ شفیع بلوچ کنگ ءَ انت بلے بے باوری ءَ ما دراہ ھمے درد ءِ تہ ءَ زندگوازینگ انت – وھدیکہ یک گِس ءِ تہ ءَ ورناھیں زھگے بیگواہ بہ بیت گڈا اے گپ ءِ گیشینگ انچو گران نہ انت کہ آ گِس ءِ جاورھال چون بنت-

آئی ءِ گوشگ ات کہ بید شفیع بلوچ ءَ  سرجمیں گِس ءِ تہ ءَ پُرس ءِ دروشم ءَ اِنت، گِس ءِ دراھیں مردم ھمائی یاتانی تہ ءَ گار اَنت، گِس ءُکاروبار دراہ پُشت ءَ شتگ – مارا مدامی ھمے تسلہ دئیگ بیت اِنت کہ شفیع جان یل کنگ بیت اِنت بلے نوں سَے ماہ سرجم بوھگی انت آ یلکنگ نبوتگ کہ ما تُرس ءِ تہ ءَ انت ءُ چریشی ءَ مئے گِس ءِ درسیں وشی پچ گرگ بوتگ انت – 

آئی ءِ گوشگ اَت کہ ما سک باز ودار کتگ بلے اے ودار روچ پہ روچ گیشتر بوھان انت اے درسیں روچاں گِس ءِ کلیں مردم درد ءُ اندوھانیتہءَ انت چریشی ءَ پد ما پیسلہ کتگ کہ شفیع اللہ بلوچ ءِ ھاتر ءَ ما ھپت نومبر ءَ یکشمبے روچ ءَ ادار دو بج ءَ شال پریس کلب ءِ دیم ءَ زھرشانیکنیں اے زھرشانی ءَ ھاکماں وتی گِس ءِ توار ءَ سر کنگ لوٹیں تانکہ شفیع اللہ بلوچ یل کنائینگ ءَ وتی کرد ءَ پیلو کرت بہ  کنیں –

بیگواھیں نودربر ءِ کھول ءَ چہ بلوچ راج ءَ لوٹ کتگ کہ مئے اے زھرشانی ءَ بھر بہ زور انت مئے توار بہ بنت پرچاکہ زورانسری آوار جنی ءِجیڑہ یک گِس ءِ جیڑہ نہ انت چہ مارا پیسر ھزاراں گِسانی تہ ءَ اے درد بوتگ ءُ نوں مئے گِس ءَ ھم ھمے آس روک انت اگاں ما یکجاھی ءَ اےزورانسریں آوار جنی ءِ بگیری ءَ توار چست نہ کت گڑا باند ءَ شمے گِس ءَ ھم ھمے آس روک بیت ھمے ھاتر ءَ درسیں مردماں چہ لوٹ کنیں کہشفیع بلوچ ءِ یل کنائینگے جھد ءَ مئے ھمراہ داری ءَ بہ کن انت –

شال ءِ پریس کلب ءِ دیم ءَ برجاھیں وائس فار بلوچ مسنگ پرسنز ءِ شدکشیں ھرتال برجاہ، چہ بلوچستان ءَ بیگواہ بیتگیں مردمانی کھول اتکگ ءُ وتی مردمانی بارو ءَ گل ءُ سرپدی اش داتگ –

ماما قدیر بلوچ ءِ چیردستی ءَ ھرتالی بنجل ءَ چار ھزار ءُ چار سد ءُ ھشتاد ءُ ھپت روچ سرجم بیتگ –

ھمے سال ءَ جنوری ءِ ماہ ءَ شال برورء دگ ءَ پاکستانی پوج ءِ دست ءَ آوار جنگ بیتگیں مکرم ء ماسٹر اکبر ءِ کھول ءَ گل ءَ را مکرم ءِ بارو ءَ بیگواھی ءِ سرپدی داتگ اَنت –

مکرم بلوچ ءِ کھول ءِ رد ءَ مکرم سی ٹی ڈی ءُ چیریں ادارھاں دزگیر کنگ ءَ پد گوں وت برتگ –

کھول ءِ رد ءَ مکرم آئی ءِ ھمراھے ءِ چمانی دیم ءَ ادارھاں آوار جتگ ءُ برتگ کہ چریشی ءَ پد مکرم ءِ بارو ءَ ھچ سرپدی نیست اِنت-

گل ءَ سرکار ءُ انسانی ھکانی ادارھاں چہ لوٹ کرتگ ءُ گوشتگ کہ بیگواھیں مکرم بلوچ ءُ دگہ بیگواھیں مردماں دیم ءَ بیار ایت ءُ کھولاں انساپ بہ دنت ءُ بلوچستان ءَ برجاھیں بیگواھی ءِ ناوشیں جاورانی گر ءُ دار ءَ گامگیج بہ زور ایت –

گوستگیں روچ ءَ داں انیگ ءَ چار مردم ایرانی آمیدگس ءَ پاھو ءِ ھکم داتگ اَنت –

سر بیتگیں ھالانی رد ءَ روکپتی بلوچستان ءِ بنجاھی شھر زھدان ءَ مروچی ایرانی آمیدگس ءِ پرمان ءَ یک مردمے پاھو دیگ بہ بیتگ –

پاھو دیگ بیتگیں مردم ءِ پجار یاسر گورگیج ء ناصر ءِ نام ءَ زانگ بیتگ کہ زاھدان ءِ دمگ شیر آباد ءِ جھمنند اِنت-

یاسر ایرانی سال نود ءُ چار ءَ نشہ ءِ باپاری بھتام ءَ ایرانی انٹی نارکٹس ءَ گپتگ ءُ برتگ –

ھالانی تہ ءَ گوشگ بیتگ کہ یاسر ءِ گڈی گندوک آئی ءِ کھول ءَ گوستگیں روچ ءَ بیتگ ءُ مروچی آ پاھو دیگ بیتگ –

روکپتی بلوچستان ءَ بندوکیں انسانی ھکانی واستا کار کنوکیں ادارہ بلوچ کمپن فعالین ءِ رد ءَ یاسر ءِ ھواری ءَ دگہ سَے کس ھم پاھو دیگ بیتگ اَنت کہ آیانی درگت ءَ دگہ گیشیں ھال نیست اِنت –

بلوچ کمپن فعالین ءِ رد ءَ ھمے سال ءِ بندات ءَ داں انیگ ءَ چِل ءُ چار بلوچ ایرانی آمیدگس ءَ پاھو داتگ اَنت –

روکپتی بلوچستان ءَ مردمانی پاھو دیگ ءَ انسانی ھکانی گلاں ھم پدری درشان کرتگ –

مستونگ گیس پریشر ءِ کمی ءِ بگیری ءَ دمگ مردماں شال کراچی شھدگ ، جنگل کراس ءِ ھند زھرشانی کتگ ءُ بند کتگ-

زھرشانی کنوکانی گوشگ اِنت کہ گیس ءِ پریشر ءِ کمی ھلاس نہ کُت گُڑا سوئی سدرن گیس ءِ کارگس ءَ انگیر ءَ کن ایں-

زھرشانی ءَ زالبول ءُ زھگانی مزنیں کچے ءَ بھر زرتگ بلے مستونگ ءَ چہ گچین بوتگیں نمائیندگ گیس پریشر ءِ کمی ءِ بگیری ءَ بوتگیں زھرشانی ءَ ساری ھم گندگ نہ بوتگ نانکہ زھرشانی ءَ بھر زرتگ ئِے-

زھرشانی ءِ سبب ءَ شھدگ ءَ مزن ءُ کسانیں گاڑیانی لین لگ اِتگ ءُ مساپراں بزگی ءِ دیمپان کنگ کپتگ اَنت ، تُرندیں سارتی ءَ گیس پریشر ءِ کمی ءِ بگیری ءَ میتگ ءِ مردماں شھدگ ءِ سر ءَ زھرشانی کتگ ءُ گاڑیانی روگ ءُ آھگ مھتل کتگ –

زھرشانی کنوکانی گوشگ اِنت کہ ھستیں ھکومت راج ءَ را آسراتی دیگ ءَ بے سوب بوتگ گیس بنشون ءَ ٹاھاں تُرندیں سارتی گیشی ءِ ھمراھی ءَ گیس ءِ پریشر بیگواہ بوتگ ءُ شھریاں بزگی ءِ دیمپان اَنت شھدگ ءِ بندی ءِ سبب ءَ دگ رش اِنت ءُ مساپراں بزگی ءِ دیمپان کنگ کپتگ-