TBP Balochi

نبشتانک: گونڈیں تپلانی چیھال

نبشتہ کار: ھدایت بلوچ

دی بلوچستان پوسٹ

سکیں پدردیں ھال انت کہ روچے یکبرے مئے گوشاں کپ اَنت چیا چوش بیت چیا چوش بُوگ ءَ انت؟ کسے ءَ اے سما بیت اے کیامتی روچ چہ کُجا مئے سر ءَ اوشتاتگ انت اے کسانین تپل چو پہ بے دردی کُشگ ءُ بنت ماتانی چماّنی روک گار کنگ بنت  داں کدین ءَ وابی ءِ چم کُٹی ءِ واب ءَ باریں کدیں بُست کن اِت باریں کدیں تئی ھوش کیت باریں کدیں ترا اے سما بیت کہ اے کار ءَ اے زوراکی ءَ گون ءَ کے کنگ ءَ انت کے انت کہ مئے بزگیں راج ءِ سر ءَ زوراکی کنگ ءَ انت ۔

داں ھما وھد ءَ مئے گون ءَ اے وڑیں زوراکی بیت داں مئے چم چہ چم کُٹی ءِ واب ءَ پچ مہ بنت داں ھما روچ ءَ مئے گون ءَ اے وڑ بیت داں راج ءِ تہ ءَ سِل کار ءُ نشھیاں ما وتی پاسباں لیک آں ءُ آھانی ھرابیانی گندگ مئے چم کور بنت مئے سر جھل بیت داں ھما روچ ءَ مئے گون ءَ اے وڑ بیت داں ما وتی سر ء چامپٹ ءِ جنوکیں زوراکاں وتی مستر ءُ کماش لیک آں –

مرچی پنجگور ءِ تہ ءَ ایوک ءَ گوں ھلیل ءِ چُک ءَ قدیر جان چوش نہ بوتگ ھمے زوراکی لھتے روچ ءَ پیسر یک کسانسالیں چُکے ماں ھوشاپ ءِ دمگ ءَ مراد امیر ءِ نام ءَ زانگ بیت گُمائی جنسی زیادتی بوتگ کُشگ ءُ  دوردیگ بوتگ بلوچستان ءِ کُنڈ کُنڈ ءَ چُشیں زوراکی ھر روچ بوگ ءَ انت جنیں ءُ زالبول کُشگ ءُ دور دیگ بوگ ءَ انت کماش ءُ  پیریں مردم گار کنگ بوگ ءَ انت ءُ مئے راج ءِ وانندہ ءُ زانتکاریں رھشوں گار ءُ گور کنگ بوگ ءَ انت ھزارانی ھساب ءَ لوگ ماندارگ بوگ ءَ انت بلے کسے ءِ گوشاں مورے اوں نہ وارت-

مئے گون ءَ زوراکاں چے کُرتگ ءُ مارا چے پیش داشتگ بلے کجام ورنا ءَ کجام واجہ ءُ میر ءَ وتی چم پچ کُرتگ انت اے زوراکی مار اتگ وتی چمانی سیاھیں چم بند بستگ ۔

واجہ یات بہ کن اگاں تو وتی زبان ھنچو گُنگ کُرت زر ءُ متاہ ءِ لالچ ترا کور کُرت وتی راج بزگی نہ مارت بے ھیائی کبول کُرت گڑا ھمے زوراکی تئی ءُ منی ءُ راج ءِ ھمک لوگ ءَ سر بیت ھمگ گدان زوراکیانی آماچ بیت اگاں تو تُرسوک ءِ یا امن پسند ءِ اے لوڑ تئی لوگ ءَ مان شان ایت اگان تئی چم پچ مہ بنت اگاں ترا اے سما مہ بیت منی سر ءَ زوراکی کنوک منی گار کنوک منی سر ءَ ھر وڑیں جنجال ءِ دور دیوک کے انت یات بہ کن اگاں ھرچیز بیت  من تو ءُ وت ءَ را بے سما بکن آں ھمے تپلانی چیھال ماتانی ارس گوھارانی پریات مارا ھچبر ماپ نہ کن انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءَ گوستگیں روچاں کُشگ بیتگیں چار سالی ئیں قدیر بلوچ ءِ کوش ءِ ھلاپ ءَ مروچی بلوچ یکجھتی کمیٹی ءِ نیمگ ءَ زھرشانی کنگ بیتگ –

زھرشانی پنجگور ءَ جاوید چوک ءَ بندات بیتگ ءُ شھر ءِ جتا جتائیں دگانی سر ءَ تران بیتگ ءُ بسم اللہ چوک ءَ مُچی ءِ دروشم ءَ مُچ بیتگ –

زھرشانی بلوچ یکجھتی کمیٹی ءِ نیمگ ءَ کنگ بیتگ ءُ زھرشانی ءَ آل پارٹیز شھری ایکشن کمیٹی انجممن تاجران ءُ سول سوسائٹی ءَ ھوار بازیں کچے ءَ مھلوک ءَ بھر زرتگ اَت –

زھرشانی پنجگور ءِ جتا جتائیں دگانی سر ءَ تران بیتگ ءُ چار سالی ئیں قدیر بلوچ ءِ کوش ءِ ھلاپ ءَ زھرشانی کنوکاں پلے کارڈ ءُ نبشتگیں تاک ءُ اوگام جتگ –

زھرشانی کنوکاں گوشتگ کہ مروچی بازیں روچانی گوزگ ءَ پد ھم انتزامیہ ءَ بے سوب بیتگ کہ پنجگور ءِ وڑیں شھرے ءَ یک کسان سالیں زھگے آوار جنگ ءُ گران گران کنگ ءُ سنگ ءِ سر ءَ آئی ءِ سر چوپگ بیت ءُ کُشگ ءُ چگل دیگ بیت اِنت –

آیاں گُشتگ کہ اینچُک روچ ءِ گوزگ ءَ دمگ ءِ واکدار بے سوب اَنت گڑا اشی ءَ تچک ءَ زانگ بیت اِنت اے کسان سالیں زھگ ءِ کوش ءِ کڑی ھم ھما کوشاں گوں ھوار بیت اِنت بلوچستان ءَ ھمک وھد بیگ ءَ اَنت –

زھرشانی کنوکاں قدیر بلوچ ءِ کشندھانی دزگیر کنگ ءِ لوٹ کرتگ ءُ گوشتگ کہ سرکار ءُ دمگدار اے وئیل ءِ ھلاپ ءَ گامگیج بہ زور ایت بلے آ تنی وھدی گامگیج ءِ زورگ ءَ گندگ بیگ ءَ نہ اِنت –

آیاں گُشتگ کہ پنجگور ءِ مھلوک ایمنی لوٹ ایت بلے اد ءَ لھتے زور دستاں پنجگور ءِ ایمنی پُل اِتگ اَنت –

ھمے وڑ گوستگیں روچ ءَ بلوچستان ءِ بنجاھی شھر شال ءُ بلوچستان ءِ تیابدپی شھر گوادر ءَ سول سوسائٹی ءِ نیمگ ءَ ھم زھرشانی کنگ بیتگ اِت اَنت-

زانگ بہ بیت گوستگیں روچاں پنجگور ءَ چار سالی ئیں قدیر ء خلیل وتی گس ءِ دپ ءَ دگہ زھگانی ھمراھی ءَ لیب ءَ بیتگ کہ ناشناسیں پرپٹ سوارے ءَ آ گپتگ ءُ ساد گُٹ ءُ داتگ ءُ گران کرتگ –

لھتے گاماں پد آئی ءِ سر سنگ جنگ ءُ چگل دیگ بیتگ ءُ کھول ءِ مردماں آ نادراہ جاہ ءَ برگ بیتگ کہ اود ءَ آئی ءَ ساہ داتگ ءُ بیران بیتگ –

قدیر بلوچ ءِ کوش ءِ ھلاپ ءَ چاگردی رسانکجاھاں ھم زھر ء درشان بلوچ تکاں یکشل ءَ برجاہ اَنت ءُ سرکار ءَ ھوار دمگدارانی سر ءَ ایراد گرگ ءَ اَنت –

بلوچستان ءِ دمگ پنجگور ءَ سی پیک دگ ءَ پاکستان فوج ءِ دو چوکیانی سر ءَ سلاہ بنداں اُرش کتگ ءُ اُرش ءِ زمہ واری بلوچستان لبریشن فرنٹ ءَ منّ اِتگ اَنت –

میجر گْوھرام بلوچ ءَ رسانکدر ءَ وتی شِنگ کُتگیں یک درشانے ءِ تہ ءَ گْوشتگ کہ آدینگ ءِ روچ ءِ ساھت دو ءَ سرمچاراں پنجگور ءِ دمگ گوران ءَ سی پیک بند ءُ ساچی دگ ءِ سر ءَ پاکستانی فوج ءِ بُنجل ءِ پھازوکی ءِ ھاتر ءَ جوڑ کتگیں دو چوکیانی سر ءَ یکیں وھد ءَ اُرش کتگ-

جارکش ءَ گوشتگ کہ سرمچاراں دوئیں چوکیانی سر ءَ راکٹ ءُ گوں مزنیں سلاھاں نزیک چہ ءَ نشانگ کتگ اَنت – دوئیں چوکیانی تہ ءَ ھستیں فوج ءِ کارندہ مرتگ ءُ ٹپی بوتگ اَنت – تُرندیں اُرش ءَ چہ پد وھدیکہ سرمچاراں دوئیں چوکیانی دستیگ کنگ ءَ نزیک ءَ سر بوتگ اَنت گُڑا ھمے وھد ءَ زورگریں پوج ءِ بُرزی کُمک اَتکگ ءُ سر بوتگ – اشی ءَ چہ پد سرمچاراں جوانیں چیر جنگی ءِ ھُنر ءُ ھیلّاں دشمن ءَ را بے سوب کتگ وتی مُھریں جاھاں سر بوتگ اَنت-

میجر گْوھرام بلوچ ءَ دیمتر ءَ گْوشتگ کہ سی پیک دگ ءِ سر ءَ پاکستانی فوج سرجمیں میتگاں لڈ ءُ بار کنگ ءَ لاچار کنگ ءَ اِنت – اے میان اُستمانی راہ ءُ رھبندانی بگیری ءِ سر ءَ دشمن پاکستانی پوج گوں تُرندی ءَ پسّہ دَیگ بیت۔

سر بیتگیں ھالانی رد ءَ روکپتی بلوچستان ءِ دمگ راسک ءَ وت ما وتی جنگ ءُ چوپ ءَ دو کس بیران بیتگ اَنت ءُ بازینے زدگ بیتگ اَنت –

یک ھالے ءِ رد ءَ اے جنگ ءُ چوپ کم چہ کم چار کس بیران بیتگ اَنت جنگ گوست ءِ جیڑھے ءِ سر ءَ پاد اتکگ، جنگ ءَ پیسر دمگ ءِ پیش امام اتکگ ءُ آئی ءَ مردمانی سِلاہ کرتگ بلے آئی ءِ روگ ءَ پد مردم برانز گپتگ اَنت –

بیران بیتگیں مردمانی پجار منصور دھانی ءُ یونس دھانی ءِ نام ءَ زانگ بیتگ اَنت، بیران بیتگیں مردم ھردک یکیں ٹکے مردم اَنت –

دمگی مردمانی رد ءَ پھزدارانی جاڑیگ ءَ ابید مردماں جنگ ءُ چوپ کرتگ ءُ چریشی ءَ کوش ھم دیم ءَ اتکگ بلے پھزداراں ھچ وڑ ءَ مردمانی گر ءُ دار ءَ گامگیج نہ زرتگ –

دمگی مردمانی رد ءَ بیران ءُ زدگ بیتگیں مردم نادراہ جاہ ءَ برگ بیتگ اَنت ءُ اود ءَ پد دوبر جنگ ءُ چوپ مچ اِتگ ءُ اود ءَ ھم بازیں کس ئِے زدگ بیتگ اَنت –

دمگی مردمانی رد ءَ دمگ ءِ انتزامیہ ءِ جاڑیگ ءُ آئی ءِ گامگیج نہ زورگ جیڑین اِت کہ اد ءَ مردم کُشت ءُ کوشار کنگ ءَ اَنت بلے آ واب اِنت –

شال ءَ پریس کلب ءَ نیشنل ڈیموکریٹک پاٹی ءِ رھشوناں پریس کانفرنس کنان ءَ گوشتگ کہ اگان چارگ بہ بیت اے وھدی اھوالکاراں ھم بازیں اڑ ءُ جنجالانی دیمپانی کنگ کپگ انت پرچاکہ یک نیمگے سرجمیں رسانکدر سنسر شپ ءِ زد انت ءُ دومی نیمگ ءَ اگاں یک اھوالکار ءِ راستی ءَ دیم ءَ بیاریت گڑا آ اھوالکار ترسینگ بیت ءُ یا کُشگ بیت یاکہ آئی ءِ سر ءَ گداری ٹپہ جنگ بیت ما شمارا اے باور کنائینیں نیشنل ڈیموکریٹک پاٹی آزاتیں درشان سر ءَ یکین داریت ءُ ما ھمے سرپد بہ ایں وھدیکہ ریاست یا چاگرد ءِ تہ ءَ درشان دیگ ءِ آزاتی مہ بیت اود ءَ جمھوری ءُ پروگریسو پگر رواج نہ گپت اود ءَ ناشرکاری تالان بیت اگاں چارگ بہ بیت مئے دمگ ھاسکر بلوچستان مروچی ھما جیڑھانی آماجگاہ جوڑ بوتگ آئی ءِ مستریں سوب ھمیش انت کہ اد ءَ جمھوریت ءُ جمھوری پگر ءُ آزاتیں درشانے ءِ سر ءَ بندش انت –

آھانی گوشگ ات کہ بلوچستان ءِ سرڈگار کہ ھاوند ءَ بازیں مال مڈیاں گوں بکش اتگ آئی ءِ کسمپرسی ءُ پسماندگی ءُ بزگری گندگ ءَ ھر زانتکار ءِ دل ھون ءِ ارس گریت اگاں بلوچستان ءِ تہ ءَ نگرہ ءَ بگر ھر وڑیں کدرتی مال مڈی ھست انت اشی ءِ ھواری ءَ گوادر ءِ وڑیں زِر ءِ ھم بلوچ ءِ کر ءَ ھست انت اشی بلوچ ءِ وش بھتی بگوشیں یا بدبھتی پرچاکہ استبدادی ءُ نوک آبادی پالیسیانی رِد ءَ اے سرڈگار ءِ مال ءُ مڈی ادے جھمنندانی ھاتر ءَ بندش جنگ بوتگ انت –
بلوچستان ءِ تہ ءَ اے وھدی ایمنی جاورھال روچ پہ روچ ھرابتر بوان انت، زورانسری آوار جنی، کشت کوش، دزی ءُ ڈنگی گیش بوتگ دمگی پھازدار اشی ءِ دارگ ءَ بے سوب بوتگ انت گوستگیں روچاں ھاران ءَ ھوار ایندگہ دمگاں روچ رھمانی دُزی کنگ بوتگ ھمے وڑ گوستگیں روچاں پنجگور ءَ کسان سالیں زھگے ءِ بے دردیں کوش ءِ وئیل دیم ءَ اتکگ کہ آ ھمنچو ایرجنگ بہ بیت کم انت ھمے وڑ گوستگیں روچاں عوامی نیشنل پاٹی ءِ بنجاھی رھشون عبیداللہ کاسی ءِ پہ تاوان ءَ آوار جنی ءُ پد ءَ زیکیں روچ ءَ آئی جون چگل دیگ بوتگ سرکار ءَ بید چہ ایرجنگ ءَ دگہ ھچی نہ کرتگ –

آھانی گوشگ ات کہ بنداتی روچاں چہ ما ھمے اشکنان ءُ پیداک انت کہ سی پیک ءِ سوب ءَ اے سرجمیں دمگاں ھاسکر مکران ءُ گوادر ءِ مردم دیمروئی کنگ ءِ گڈی کڑی ءَ سربوتگ انت بلے اے درسیں سرکاری دروگانی بن ھما وھد ٹنگ بیت وھدیکہ گوادر ےَ ھوار سرجمیں مکران ءَ لین نہ بوگ ءِ سوب ءَ تھاروکی مانشانیت راج وتی بنکی لوٹ آپ ءُ لین ءِ ھاتر ءَ دگانی سر ءَ در کائینت ھمینچو لاچار بنت کہ پُرشت ءُ پروش ھم کن انت بلے سرکار وش واب انت آئی راج ءُ راج ءِ بنکی لوٹانی ھچ پرواہ نیست انت اے وھدی سرجمیں بلوچستان ءَ آپ ءُ لین ءِ نہ بوگ ءِ سوب ءَ راج ءِ زند گوزینگ ءَ زبھر بوتگ – اگاں چارگ بہ بیت اے وھدی بلوچستان ءِ تہ ءَ ھب ءُ اوچ پاور پلانٹ بلوچستان ءِ لوٹاں چہ گیش میگا واٹ لین پیدا کنگ انت بلے مئے شُمیں کسمت بلوچستان ءِ تہ ءَ ھر مڈی پیداک بیت آھانی سر ءَ درساں پیسر دگہ سبباں دیگ بیت اے پارمولہ ءِ رِد ءَ ھبکو ءُ اوچ پاور پلانٹ ءَ چہ بلوچستان سرجمی ءَ لین دیگ نہ بیت اے گرمی موسم ءَ ھم بلوچستان ءِ بنجاھی شھر شال ءَ ابید ایندگہ درسیں دمگانی جھمننداں چار یا شش ادار لین دیگ بیت انت – سوئی گیس ءِ ھم ھمے ھال انت نیم ءَ گیش دگہ پاکستان ءِ دگہ سبباں گیس سرکنگ بیت بلے اے تنی وھدی ڈیرہ بگٹی ءَ درآوکیں گیس ڈیرہ بگٹی ءَ مکران ءَ ھوار بلوچستان ءِ گیشتریں بھر چریشی ءَ زبھر انت –

آئی ءِ گوشگ ات کہ اگاں نسیرآباد سر ءَ گپ بہ کنیں تو اے وھدی اود ءَ درساں مستریں جیڑہ ساپ آپ ءِ نیستی انت اود ءَ مردم کنڈاں چہ آ ورگ ءَ لاچار انت ھمے ھاتر ءَ نود درسد ءَ مردم ھیپاٹائٹس ھوار دگہ نادراھیانی آماچ بنت پانزدہ لک گیش جھمنند ادے مردم ساپیں آپ ءَ چہ زبھر انت ھمے ھاتر ءَ کنڈ ءُ دگہ جاھانی زھریں آپانی ورگ ءَ ھر سال دہ درسد ءَ گیش مردم نادراھیانی آماچ بنت مرگ ءِ دیمپان بنت ھمے وڑ بلوچستان ءُ سند کشت ءُ کشاری دمگ نسیر آباد کہ اود ءَ زمیندار ءُ دھکان سند ءَ چہ آؤکیں آپ ءِ سر ءَ اوست دار انت بلے سند سرکار ءِ نیمگ مدامی ارسا بزاں انڈس ریور سسٹم اتھارٹی بگیری دارگ بیت انت ءُ بلوچستان ءَ کم آپ سرکنگ بیت ھمے ھاتر ءَ نسیرآباد بیلٹ دھکان کار ءُ زمیندارانی کشار ھر سال آپ کمی ءَ تباہ بوگ ءَ انت بلے ناکہ سرکار ءِ نیمگ ءَ گامگیج زورگ بوتگ ءُ ناکہ اے جیڑہ گیش ءُ گیواری درگت ءَ سند سرکار ءَ گوں باوست بوتگ –

آھاں دیمتر ءَ گوشتگ کہ ما درست سرپدیں ءُ زانیں سیمسراں گوں نزیکی مردمانی کار ءُ بار گوں سیمسر ءَ بندوک انت سرکار ءِ نیمگ ءَ ٹیل کار ءُ بار ءِ سر ءَ بندش جنگ سدانی کچ ءَ مھلوک جیڑھانی شکار انت دومی نیمگ ءَ ٹوکن سسٹم آرگ بوتگ ما ھمے سرپد بئیں اے دمگانی مھلوک ءِ زند گوں ھمے کار ءُ بار ءَ بندوک انت کہ سرکار ءَ بند کرتگ ٹوکن ءُ اسٹیکر ءں سر ءَ کتگ او ھما وتی پسند ءِ مردماں ٹوکن دیگ بوگ ءَ انت ءُ اے ٹوکن ءُ اسٹیکر سسٹم کنگ نوک آبادی پالیسیانی رِد انت ھمے ھاتر ءَ ما پاٹی ءِ نیمگ ءَ اے سسٹم ءَ نوک آبادی پالیسی گوشیں ءُ اشی ءَ رد کنیں ءپ اے سسٹم ھلاس کنگے لوٹ کنیں ءُ سرکار ءَ چہ لوٹ کنیں کہ ایران سیمسر کارباری بندش ھلاس بہ کنت ءُ مھلوک آزاتی ءَ کار ءُ بار کنگے موکل بہ دنت تانکہ اے مردم وتی کارو بار ءَ برجاہ بہ دار انت –

آھانی گوشگ ات کہ جھانی وبا کرونا ءِ چارمی لہر ءَ اے وھدی سرجمیں دنیا وتی انگر ءَ کتگ تیزی ءِ گوما تالان بؤکیں کرونا وائرس مئے دمگ ھم پھازگ نبوتگ بندات ءَ بگر تاں روچ مروچی اے وبا ءَ زانگ نہ بیت چینکس مردم گس ویران کتگ زانگ نہ بیت چینکس مردم کُشتگ مئے دمگ پیش ءَ چہ پسماندگی، گریبی ھچ نبوھگ ءِ ھوار بازیں جیڑھانی آماچ انت ھرچی کہ بچتگ آھاں کرونا سرجم کنگ انت اے دمگ ءَ ھاسکر مکران ءَ اے وھدی درساں گیش کرونا زد ءَ انت اودا آپ ءُ لین پیش ءَ چہ نیست انت راج زھرشانی کنگ انت آئی ءِ ھمراھی ءَ کرونا وڈیں نادراھی ءَ اودے مردمانی زند گیشتر متاثر کتگ – ھمے ھاتر ءَ سرکار ءَ لوٹیت کہ مکران ءَ ھوار ایندگہ دمگاں کرونا وائرس ءِ درگت ءَ سنجیدگی گامگیج بہ زوریت یک جوانیں پالیسی ءِ اڈ بہ دنت ءُ دیما بیاریت ءُ ایشی ءِ ھمراھی ءَ ویکسینیشن عمل ھم گیشی ءَ دیم ءَ برگ بہ بیت انت تانکہ اے جھانی وبا ءَ کم ءَ چہ کم.مھلوک ءَ جانی ءُ مالی تاوان ءِ دیمپانی بہ بیت انت –

آھانی گوشگ ات کہ بلوچستان ءَ تہ ءَ مستریں جیڑہ انسانی ھکانی لگتمالی انت کہ اودا یک نیمگے سرکار مزاکرات ءِ گپ ءَ جنت دومی نیمگ ءَ بلوچ مھلوک ءِ سر ءَ لشکر کشی ءِ رِد یکشل ءَ برجاہ انت کہ آئی ءِ تہ ءَ ھچ وڈیں کمی نہ اتکگ ءُ اے لشکر کشیاں چُک ءُ زالبول ورنا ءُ پیریناں زورانسری آوار جن انت ءُ وتی پوجی زنداناں بندیگ کن انت اودا آھانی سر ءَ لٹ کُٹ کنگ بیت چریشی ءَ بازیں مردمے بیران بوتگ انت – ھمے زوتاں مکران ءَ کیگد نامی زالبول ھوار یک ورنائے بیران بوتگ دومی نیمگ ءَ بیگواھیں مردمانی کھول وتی دوستییگیں مردمانی ھاتر ءَ پُرایمنیں زھرشانی ءُ کانود ءِ رِد ءَ توار چست کن انت گڑا ریاستی ادارھانی نیمگ ءَ آ ترسینگ بنت اھانی گِس آنی سر ءَ بیڑ برگ بیت کھول مردم لٹ شاپ کنگ بنت – ھمے زوتاں بیگوھیں راشد ھسین بلوچ ءِ گِس ءَ بیڑ برگ بیت انت آئی مات ءُ پت لٹ شاپ کنگ بنت ءُ زامات ءِ آوار جنگ ءُ برگ زاھریں درور ئے –

آھانی گوشگ ات کہ نیشنل ڈیموکریٹگ پاٹی ھمے سرپد بیت اے وھدی بلوچستان ءِ تہ ءَ سرکار ءِ نام نشان نیست انت بس لھتے تاکتوریں مردم انت کہ اے وھدی تاکت کارمرز بوھگ انت آ ھمے پھم انت کہ بلوچستان ءِ جیڑھانی گیش گیوار بس تاکت ءِ زور گیشینگ بنت – اے جیڑھاں ھوار دگہ بازیں جیڑہ ھست انت ھنچوش کہ بے روزگاری، زالبولانی جیڑہ، کہ کاربار ءِ نام ءَ اھانی کوش، دوریں ھند ءُ دمگاں زچگی سینٹر نبوھگ ءِ سوب ءَ بازیں زالبول ءِ کپگے میان بیران بوتگ انت ھاسکر اے وئیل کوھلو ءُ ڈیرہ بگٹی وڈیں دمگاں بازیں زالبول ءِ بیران بوتگ ھمے وڈ وانگجاھاں نودربرانی جیڑہ ءُ دگہ بازیں جیڑہ ھست انت کہ آھانی سر ءَ گپ جنگ بیت توار چست کنگ بیت ءُ مئے پاٹی کدی کدی شمے اھوالکارانی کمک ءَ توار چست کنت اے وھدی اے درسیں جیڑھانی سیادی گوں راج انت ءُ سرکار ءِ نیمگ ءَ اشی ءِ سر ءَ ھچ وڈیں دلچسپی زورگ بوھگ ءَ نہ انت ما ھمے سرپد بئیں تاکت راج انت ھمے ھاتر ءَ اقتدار ءَ نشتگیں ھاکماں لوٹیت کہ آ راج ءِ جیڑھانی سرا سنجیدہ بہ بنت آھانی گیش گیواری بہ کن انت اگاں ناں اے ھمے وڈ برجاہ بوت انت گڈا اشی ءِ بیمناکیں رزلٹ ءِ درکیت انت –

یات لچہ: پُلّیں شھید تابش جان ءِ یات ءَ

لچہ کار: یھزدر بلوچ

دی بلوچستان پوسٹ

کشّ اِت سر گْوات ءَ میزریں پنجگور ءِ دراں
بـوئے تالان اِنت ماں بلوچڈیھ ءِ کُھسراں

میچل اِنت سینگ مادر ءِ یکرندے پـد ءَ
شَنز اِتگ ھونانی رگاماں گنجیں دراں

میتگ ءِ کاڑاں یکبرے ھالویے کن اِت
پُلگدیں سالونک ءَ منی گرانازیں سراں

کس مہ شنزیں اِیت مھلبیں اَرساں تْرونگلیں
سر وتی بَکشاتگ تابش ءَ چو کہ کُنگراں

لیٹ اِتگ شھمیری گُداں ورنا پُلگُدیں
چو پہ وژنامی دیم پہ گُلباگ ءَ بوت رواں

در نہ بیت چہ مئے سینگ ءَ مھرانی کُلہ
چے تو گوشت زان ئے؟پہ وتن روچے من مِراں

در نـہ بنت ترانگ چہ دل ءَ ھچ رنگ ءَ تئی
ھَکّ اِت پیلو کُت چو کہ وَشکولیں مھتراں

شوُلام کشّاں اَنت کُھسر ءِ بے تاکیں کُنر
یھزارد چاپ ءَ اَنت ھوُر بھشی چو کوتراں

کیچ ءَ جھانی وبا کرونا ویروس ءِ گر ءُ دار ءَ کنگ بیتگیں لاک ڈاؤن ءِ ھلاس کنگ ءَ گوں انجمن تاجر ءُ کمشنر مکران ءِ میانی ءَ گند ءُ نند سوبین بوتگ-

سربوتگیں ھالانی رِد ءَ کیچ ءَ انجمن تاجرانانی مستر شاہ دوست دشتی ءِ سروکی ءَ چہ کار ءُ بار ءَ سیادی داروکانی یک ٹولی ءَ آدینگ ءِ روچ ءَ کمشنر مکران شاہ عرفان غرشین ءَ گوں گند ءُ نند کتگ، لاک ڈاؤن ءِ درگت ءَ گپ ءُ تران کتگ –

آئی ءَ گوشتگ کہ پانژدہ روچ ءَ برجاھیں لاک ڈاؤن آدینگ ءِ روچ ءَ ھلاس کتگ-

آئی ءَ گوشتگ اینچو روچ ءَ کار ءُ باری مردماں انتزامیہ ءِ گون ءَ کمک کرتگ ءُ دکان ءُ نھاد جاہ بند کتگ اَنت کہ چریشی ءِ مستریں لوٹ جھانی وبا کرونا ویروس ءِ ھلاپ ءَ جد ءُ جھد ءُ آئی ءِ پروش دیگ بیتگ –

آئی ءَ گُشتگ کہ اے وھداں تاجر برادری ءَ ھمک وڑیں جیڑھانی دیمپانی کرتگ ءُ بلے لاک ڈاؤن ءِ پاسداری کرتگ –

آئی ءَ گُشتگ کہ ھمے وھد ءَ تاجر برادری ءِ یک ٹولی ءَ بدنیتی ءِ زھر ء درشان کرتگ ءُ تاجر برادری ءِ تاوان دیگ ءِ جھد کہ اے ایرجنی اِنت-

آئی ءَ گُشتگ کہ کمشنر مکران نیمگ ءَ تاجر برادری ءِ جیڑھانی گوشدارگ ءُ لاک ڈاؤن ءِ ھلاس کنگ ستا کرز اِنت –

شاہ دوست ءَ گند ءُ نند ءِ بارو ءَ گپ کنان ءَ گوشتگ کہ انجمن تاجرانی راستیں نمائندگی ءَ کنگ ءَ اِنت پرچاکہ یک ٹولی ءِ ھمک وھد ءَ بس زات ءِ سر ءَ تاجرانی نام ءَ کارمرد کنگ ءُ سیاست کنگ ءَ اِنت نی اشانی ھچ اوپار کنگ نہ بیت اِنت –

بلوچ یکجہتی کمیٹی کراچی ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ شاہ لطیف تانہ ءِ دمگ کوھی گوٹ ءَ پانزدہ سالی ئیں جنکو مومل گون ءَ بندات ءَ زورانسری جنسی زوراکی کنگ ءُ پد ءَ بے دردی ءَ آئی ءِ کُوش دلپدردی وئیلے آئی ایرجنگ ما بہ لوٹ ایں پہ لبز کرت نہ کنیں –

جارکش ءَ گوشتگ کہ پانزدہ سالی ئیں جنکو مومل ءِ کوش ناکہ تھنا آئی ءِ جندے کشگ انت بلکیں سرجمیں انسانیت ءِ کوش انت ھما جنکو کہ آئی ءَ دنیگت ءَ بازیں وابانی تابیر کنگی ات، ھما جنکو کہ آئی ءَ اُمر دنیگت ءَ بالُو ءِ گرگ ءَ ات، زالم ءُ زوراکاں وتی وھشی ءُ ھوّس ءَ آ درست چہ آئی ءَ پچ گپت اَنت –

جارکش ءَ دیمتر ءَ گوشتگ کہ ما اے وئیل ءَ انسانیت ءِ مرگ گوشیں پرچاکہ بلوچ چاگرد زالبول ءِ شرپ دیگ ءَ زانت، آئی ھک دیگ ءَ زانت بلے زالبول ءِ ننگ ءُ ناموس ءِ لگتمال کنگ بلوچ چاگرد ءِ تہ ءَ نیست انت ءُ اگاں کسے اے وڑیں کاراں مئے چاگرد ءَ گوں ھوار کنگ لوٹ ایت گڑا آ بلوچ چاگرد ءَ چہ نہ انت –

آئی ءِ گوشگ ات کہ مومل ءِ گون ءَ زیادھی کنگ ءُ آئی ءِ کوش ءِ الزام آئی ءِ ماتو ءُ کھول سرا دیگ بوتگ بوت کنت کہ راست بہ بیت بلے اے ھما چاگرد ءِ پیداوار انت کہ درندگی ءِ گوانزگ انت – مئے گور ءَ چشیں لبز ءِ نیست کہ پہ درشان ءَ اے وئیل ءَ ایر بہ جن ایں –

جارکش ءِ گوشگ ات کہ مروچی مومل ءِ گون ءَ زیادھی کنوکیں بےھس زالم ءُ ھما انسان کہ انسان گوشگ ءِ لاھک ھم نہ اَنت اگاں آئی ءَ گیش ءَ چہ گیش ترندیں سزا دیگ نبوت گڑا باندا اے دگہ مومل ءِ نیمگ ءَ رو انت – ھمے ھاتر ءَ ما ھستیں وھد ءِ سرکار ءَ چہ لوٹ کنیں کہ اے درگت ءَ گیش ءَ گیش پٹ ءُ پول بہ کنت اشی ءِ تہ ءَ ھما وھشی کہ ھوار انت اھاں ترندیں سزا دیگ بہ بیت –

سر بیتگیں ھالانی رد ءَ تربت ءَ ڈپٹی کمشنر کیچ حسین جان بلوچ ءِ گوشگ ءِ پد ءَ اسسٹنٹ کمشنر تربت عقیل کریم ءِ چیردستی ءَ لیویز پورس ءَ کلاتک ءَ بیڑ برتگ –

اود ءَ لیویز پورس ءَ کوشاں ھواریں جرمکار حمید ء مراد مھمد جھمنند شے کھن کلاتک ءُ نشہ باپار عبید ء سبزل جھمنند کلاتک دزگیر کرتگ اَنت –

لیویز پورس ءَ گُشتگ کہ گپتگیں جرمکارانی گیشیں پٹ ءُ پول بیگ ءَ اَنت –

رسانکدراں گوں گپ کنان ءَ اے سی تربت عقیل کریم ءَ گُشتگ شھر ءَ نشہ باپاریانی دزگیر کنگ ءُ دگہ جرمکارانی دزگیر کنگ ڈی سی کیچ ءِ ھکم ءِ سر ءَ بیگ ءَ اَنت –

آئی ءَ گُشتگ کہ اے درگت ءَ لیویز پورس پرمان کنگ بیتگ ءُ دمگ ءَ ھواریں مھلوک ءَ گوں دزبندی اِنت کہ وتی کش ءُ گوراں ھواریں سلکاریانی نشانی ءَ بہ کن اَنت دانکہ ما چرے سبب ءَ کمک زرت بہ کن ایں سلکاری ھلاس کنگ بہ بنت –

آئی ءَ گُشتگ کہ کلاتک ءَ لیویز پورس رسالدار میجر اسماعیل خالق ءِ سروکی ءَ کہ ھمے جرمکار گرگ بیتگ اَنت مزنیں سوبمندی یے –

سر بیتگیں ھالانی رد ءَ سول سوسائٹی گوادر ءِ نیمگ ءَ پنجگور ءَ کسان سالیں قدیر ءِ “ ناھکیں کوش ” ءِ ھلاپ ءَ زھرنانی روانک کشگ بیتگ –

زھرشانی کنوکاں گوادر ءَ شہدائے جیونی ءِ چار راہ ءَ مُچ بیتگ ءُ اود ءَ زھرشانی کتگ-

زھرشانی ءَ سول سوسائٹی ءَ ھوار سیاسی پاٹیاں ھم بھر زرتگ ءُ زھگ ءِ کوش ایر جتگ –

زھرشانی کنوکاں گُشتگ کہ بلوچستان ءَ سرکار ءِ کانون ءَ مھلوک سُچگ ءَ اَنت مئے واستا ھچ پش نہ کپتگ ءُ چوشیں زھگانی گران کنگ ءُ چگل دیگ بلوچستان ءِ مھلوک ءِ کوش اِنت –

آیاں گُشتت کہ اے زھگ ءَ کجام کسوت کرتگ ءُ چو اے وڑ ءَ گران کنگ ءُ کُشگ ازاب کوش کنگ ءُ آئی ءِ کوش بلوچستان ءَ سودمانیں دردے –

آیاں گُشتگ کہ چرے وئیل ءَ پیسر ھیات بلوچ، برمش بلوچ ءِ کشندہ ھم گرگ بیگ ءَ پد یلو کنگ بیتگ اَنت بلے اشی ءِ ھچ گمان نیست اِنت کہ قدیر ءِ کوشکار گرگ ءُ سزا دیگ بنت بلکیں مھکوک ءِ تسلہ دیگ ءِ واستا بلکیں گرگ بنت –

آیاں گُشت: سرکار گوش ایت کہ بلوچستان امن ءُ ایمن اِنت اد ءَ بلوچانی دود لگتمال اَنت ءُ بلوچ زھگ لوگانی دپ ءَ چِست کنگ ءُ کُشگ بنت اے کجام امن ءُ ایمنی اِنت –

زھرشانی کنوکاں انیگیں سرکار ءِ سر ءَ ایراد گپتگ ءُ گوشتگ کہ اے انیگیں وئیلانی زمہ وار سرکار اِنت –

زھرشانی کنوکاں گُشت کہ ما کوشکاراں اے وڑیں سزا نہ لوٹ ایں کہ ھیات ءِ کشندھانی پیم ءَ کشندہ انگت ءَ تربت ءِ بازار ءَ ترگ ءَ اَنت باید ھنچش قدیر ءِ کُشگ بیتگ ھمے وڑ ءَ کشندہ ھم رنگ ءَ کنگ بہ بنت –

ھمے وڑ بلوچستان ءِ دمگ واشک ءَ بلوچ نودربرانی نیمگ ءَ زھرشانی کنگ بیتگ –

زھرشانی کنوکانی دست ءَ پلے کارڈ قدیر ءِ ناھکیں کوش ءِ ھلاپ ءَ نبشتگیں تاک دست ءَ بیتگ اَنت –

زھرشانی روانک ناگ ءِ بازار ءَ تران بیتگ ءُ چار سالی ئیں زھگ ءِ کوش ءِ ھلاپ ءَ اوگام جنگ بیتگ-

اشاں ھوار بلوچستان ءِ دگہ جاھاں ھم زھرشانی کنگ ءِ جار جنگ بیتگ اَنت –

ھمے وڑ بی ایس او پجار ءِ نیمگ ءَ باندا تربت ءِ پریس کلب ءِ دیم ءَ ھم پنجگور ءَ کُشگ بیتگیں زھگ قدیر ءِ کوش ءِ ھلاپ ءَ زھرشانی کنگ ءِ جار جنگ ءُ بھر زیرگ ءِ دزبندی کنگ بیتگ اَنت –