TBP Balochi

سربوتگیں ھالانی رِد ءَ بلوچستان ءِ باپاری شھر ھب ءَ یک دگہ نودربر ءِ پاکستانی پوج ءَ زورانسری آوار جتگ ءُ بیگواہ کتگ وھدیکہ ھب چوکی ءِ جتا جتائیں ھند ءُ دمگاں پوج ءِ بیڑ بری ءُ دزگیریانی ھال آھگ ءَ اِنت –

پوج ءِ دست ءَ زورانسری آوار جنگ بوتگیں نودربر ءِ پجار بلال زھری جاھمنند زھری ھزدار ءَ چہ بوتگ –

یک ھپتگ ءِ میان ءَ ھب ءَ پاکستانی پوج ءِ دست ءَ زورانسری آوار جنی ءِ کچ چار ءَ سر بوتگ، وھدیکہ اشی ءَ پیش دگہ سَے نودربر زبیر زھری، عدنان مینگل ءُ اسلم زھری ھم پاکستانی پوج ءَ آوار جتگ ءُ بیگواہ کتگ انت –

عدنان مینگل ءُ زبیر زھری چار روچ پیش وھدیکہ اسلم زھری دو روچ پیش ھب ڈاکخانہ دگ ءَ چہ چیریں ادارھانی کارمنداں آوار جتگ ءُ گوں وت برتگ انت –

دومی نیمگ ءَ بلوچستان شاھدربر جاہ ءَ گوستگیں ھپتگ ءَ چار نودربرانی زورانسری آوار جنی ءِ بگیری ءَ نودربراں مروچی زھرشانی کتگ ءُ وتی کلاس بائیکاٹ کتگ انت ءُ زانشتی سرگرمی ماٹو کتگ انت –

نودربر گلاں پاکستانی پوج ءِ نیمگ ءَ نودربرانی زورانسری آوار جنی ءُ بیگواھی بگیری ءَ چکاس بائیکاٹ کتگ ءُ زھرشانی ءِ جار پرینتگ –

وائس فار بلوچ مسنگ پرسنز ءِ نیمگ ءَ چہ شنگ کتگیں جار ءِ تہ ءَ گوشتگ کہ بلوچستان شھدربرجاہ ءُ جتائیں دمگاں چہ بلوچ نودربرانی پاکستانی پوج ءِ نیمگ ءَ چہ آوار جنگ ءَ پد بیگواہ کنگ ءِ نوکیں درچ ءُ زورانسری آوار جنی ءِ گیشی آرگ ءِ بگیری ءَ وائس فار بلوچ مسنگ پرسننز نیمگ ءَ چہ دوازدہ نومبر ءَ آدینگ بیگاہ ءَ ساھت چار ءَ کراچی ءِ پریس کلب ءِ دیم ءَ زھرشانی کنگ بیت-

وی بی ایم ءِ شنگ کتگیں درشان ءِ رِد ءَ بلوچستان ءَ بلوچ نودربرانی زورانسری آوار جنی ءِ یک نوکیں درچے بندات کتگ اود ءَ نودبر پھازوکی کیمرہ ءِ بوھگ ءُ پاکستانی پوج ءِ ساڑی بوھگ نودربر بیگواہ کنگ بوگ ءَ اَنت وھدے کہ اے درچ نوشکی تربت ھب ءُ کراچی تہ ءَ شنگ کتگ –

بلوچستان ءَ پاکستان ءِ آ دگہ صوبھاں چہ کانون جتا اَنت بلوچستان ھکومت اے سرجمیں جاور بے وس گندگ پیداگ اِنت بلوچستان ءَ اے وھد ءَ وڑیں جنگل واجھی اِنت-

دیمتر ءَ گْوشتگ ئِے کہ سروزیر پاکستان عمران خان ءِ نیمگ ءَ چہ پیسر ءَ چہ بیگواھیں مردمانی یل کنائینگ ءَ باور کنائینگ ءِ ابید ھم آیانی آجوئی وتی جاگہ نو شھدربرجاھاں چہ ھم نودربراں بیگواہ کنگ ءَ اَنت-

وائس فار بلوچ مسنگ پرسننز ءَ وتی درشان ءِ تہ ءَ انسانی ھکانی گل ، وکیل ، سیاسی گل ، سول سوسائٹی ءِ باسکاں گوں دزبندی کتگ کہ آ بلوچستان ءَ انسانی ھکانی بُنکی بگیریانی بگیر ءَ آیانی جُد ءُ جُھد ءَ ھمراھداری بہ کن اَنت-

زانگ بہ بیت بلوچستان ءَ زورانسری آوار جنی ءِ وئیلانی تہ ءَ گیشی گندگ پیداگ اِنت کہ آیانی تہ ءَ گیشتر بلوچ نودبراں – گوستگیں روچاں بلوچستان شھدربرجاہ ءِ چاریں نیمگاں چار نودربر ، ھب ءَ چہ دو نودبر وھدے کہ نوشکی ، ھرنائی ، کیچ ءُ کراچی ءَ چہ گیش دہ مردم زورانسری آوار جنی ءِ پدر بوتگ اَنت-

مروچی شال ءَ نودربراں زھرشانی ءَ شھدربرجاہ ءَ وانگی سُر پُر مھتل کتگ اَنت وھدے کہ زھرشانی برجاہ ءَ اِنت –

انسدادِ دھشت گردی (سی ٹی ڈی) ءَ ٹاہ داتگ کہ ھزدار ءَ کاروائی ءِ وھد ءَ دو مردم کُشتگ اَنت ءُ یکے دزگیر کتگ –

کاؤنٹر ٹیررازم ڈپارٹمنٹ (سی ٹی ڈی) بلوچستان ءِ رد ءَ ھزدار ءِ دمگ سارونہ چیریں ھالے ءِ رد ءَ بیڑ برتگ،بیڑی ءِ وھد ءَ سلاہ بندیں ءُ سی ٹی ڈی ءِ کارمندانی میان ءَ جنگ ءُ چوپ بیتگ چریشی ءَ دو مردم کُشگ بیتگ اَنت –

جارکش ءِ سی ٹی ڈی ءَ گُشتگ کہ کُشگ بیتگیِں ھردوکیں مردن سلاہ بندیں گلے ءَ گوں بندوک بیتگ اَنت ءُ آیانی گور ءَ سلاہ ءُ گولہ بارود دزکپتگ اَنت ءُ لاش ھسپتال ءَ رسینتگ اَنت-

بلے داں انگت ءَ سی ٹی ڈی ءَ کُشتگیں مردمانی نام پدر نہ کرتگ اَنت-

زانگ بہ بیت سی ٹی ڈی ءَ بلوچستان ءَ اشی ءَ پیسر ھم دیم پہ دیمی ءَ مردمانی کُشگ ءِ ٹاہ داتگ اَنت پد ءَ دیم پہ دیمی جنگ ءَ کُشگ بیتگیں مردمانی پجار پیسر ءَ بیگواھیں مردمانی ناماں بیتگ اَنت –

گوستگیں ماہ ءِ بیست ءُ دو اکتوبر ءِ شپ ءَ سی ٹی ڈی مستونگ ءَ کاروائی ءِ وھد ءَ نُھ مردمانی کُشگ ءِ ٹاہ داتگ اَنت کہ اشانی تہ ءَ یکے ءِ پجار پیسر ءَ دزگیر کرتگیں مردمے ءِ نام ءَ زانگ بیتگ –

دروگیں میڑ ءِ نام ءَ کُشگ بیتگیں مردمانی تہ ءَ یارمھند ھوار اَگ – یار مھمد شال ءِ دمگ ھزار گنجی ءَ سال دوھزار ءُ شانزدہ ءَ مارچ ءِ ماہ ءَ آوار جنگ بیتگ –

اشی ءَ پیسر بیست ءُ شش اگست ءَ سی ٹی ڈی ءَ ٹاہ داتگ اَت کہ دیم پہ دیمی جنگے ءَ ھپت مردم کُشگ بیتگ اَنت – سی ٹی ڈی ءَ ٹاہ داتگ اَت کہ کُشگ بیتگیں مردمانی سیادی بلوچ سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ اِنت-

پد ءَ دروگیں میڑ ءِ نام ءَ کُشگ بیتگیں درستیں مردمانی پجار پیسر ءَ بیگواھیں مردمانی ناماں زانگ بیتگ اَنت-

بیست ءُ شش اگست ءَ دروگیں میڑ ءِ نام ءَ جنگ بیتگیں صدام حسین ءِ گوھار ءَ یک تامر بندے ءِ تہ ءَ سی ٹی ڈی ءِ دروگیں میڑ ءِ نام ءَ کُشگ بیتگیں صدام حسین بیست ءُ ھپت اپریل دوھزار ءُ ھژدہ ءَ کراچی ءِ دمگ ملیر ءَ ھما وھد ءَ آوار جنگ بیتگ کہ آ دُبی ءَ موکلانی وھداں اتکگ بیتگ –

مروچی کُشگ بیتگیں مردمانی پجار تنی وھدی نہ بیتگ اَنت گمان ھمے کنگ بیگ ءَ اِنت پیسر ءَ دزگیر کتگیں مردم بنت اِنت –

نبشتانک: ناکو مھراب آشوب ءِ چیدگ

نبشتہ کار: زھرا بلوچ

دی بلوچستان پوسٹ

تھاری ءَ آزمان ءِ دیم ءَ چادرے مانپوشتگ اَت پادان جواب دات ،ابیتکی ءَ انگیرا کتگ اَت ءُ چماناں یک آس ئِے کپت کہ بلگ ءَ اَت جنزان جنزان اَت دانکہ آس ءِ کر ءَ سر بوت آں،یک پیریں کماشے آس ءَ دستاں تپگ ءَ اَت دْروت ناکو، دراھبات ئے ، ناکو تئی نام؟ مھراب ناکو اے کجام میتگ اِنت ؟ ریڈ زون اِنت ۔

چاریں نیمگاں بے تواری اِت انگتہ یک توارے منی گوشاں کپت کہ نعرہ جنگ ءَ اَت ءُ گشگ ءَ اَت ،”ہم پھول ہیں،ہمیں کیوں توڑا جاتا ہے ہم اس سرزمین کا وارث ہیں ،ہم پڑھنا چاہتے ہیں ہمیں پڑھنے دو،ہم پھول ہیں ہمیں بسنے دو” ناکو اے کئی توار اِنت ۔

اے ھما شیرزال ءِ توار اِنت کہ آؤکیں دگہ ھزار سالاں رند ایدگہ سانکلان بستگیں راج ھمے شیرزال ءِ درور ءَ دے اَنت ءُ جنزان بنت ناکو نامے کے اِنت ؟ پاتو کہ زالم ءِ دیم ءَ چو بولان ءِ کوہ ءَ اوشتگ ۔

ناکو اے جون کئی اَنت؟ زمین ءِ چکانی جون اَنت۔ اد ءَ ریڈ زون ءَ پرچا ؟ انساپ ءِ شوھاز ءَ رھادگ آں چہ کئے ءَ؟ چہ بلوچ راج ءَ ءُ انپاپ نہ بلکیں اے ھالات مردم ءِ اندر ءِ انسان ءَ زندگ کن اَنت ءُ من سرپد آں کہ انساپ وت انساپ ءِ شوھاز ءَ تچ ءُ داگ کنگ ءَ رند بیران بوتگ،بلے اے ھون آشوب ءِ چیدگ اَنت باند ءَ درور بنت ناکو تئی میتگ ؟ اے زمین ھر جاہ منی میتگ اَنت ،من اے زمین ءِ وارث اوں ،منی نو چک سانکلان ءُ پنچ شھید ءُ انون اے دوئیں چک ھم۔
ناکو! پرچا تئی چک سانکلان ءُ پرچا شھید مول ءُ مراد؟ آ زمین چک اَنت پہ زمین ءِ رکینگ ءِ ھاتر ءَ ناکو ءَ وتی چم ءِ چشمک چادر ءِ لمب ءَ ساپ کت ءُ گشت الم روچے بل ایت اے تھارُوکی رند بس دم برگی نہ اِنت ۔ پاتو ءِ توار پد ءَ گوشان کپت ، یہ جو دہشتگری ہے اس کے پہیچے وردی ہے یہ بونٹے والی دہشتگرد بلوچ نسل کوشی ؟ بند کرو بندکرو۔

ناکو! کسان سالیں پاتو ءَ را اےدْرستیں نعرہ یات اَنت مکسد چہ بوت کنت؟ ھالات اَنت کہ بنی آدم چہ اندر ءَ مھکم کن اَنت ناکو گڑا اے ریڈ زون ءَ نندگ ءَ تو ءُ پاتو ءَ ترس ءِ آماچ نہ اَنت؟ منی چک! مار ءَ اے ترس نہ اِنت کہ باندا مئے جون چار راہ ءِ سر ءَ ایر بیت بلے ،من اے گپ ءَ پھر بند آں کہ دگہ ھزار کرن ءَ رند ایدگہ گلامیں راج پاتو ءُ ناکو مھراب ءِ درور ءَ دے اَنت کہ تھاری ءَ چراگے روک کتگ تھاری پُرشتگ ءُ گار کتگ ءُ انچو کہ مرچی بلوج راج مدام ھما راجانی درور ءَ دنت کہ مئے راہ ءِ مسافر بوتگ اَنت ۔

ناکو شال ءِ پرپین موسم ءَ نندگ گران اِنت بلے تو ءُ پاتو کجام اوپار کچکول ءَ کتگ ءُ نشتگ اَنت ؟ ناکو!
“چگل بہ داتیں سلاہ من جنگ ءَ گڑا بگشتیں “
“مہ بکشتیں سر پہ لج ءُ ننگ ءَ گڑا بگشتیں”
“من ہرچ ہال ءَ ءُ ہرچ جاہ ءَ بدیستیں دشمن”
“مئے دست لرزت ،نشت تپنگ ءَ گڑا بگشتیں”

ناکو ءَ اے شائِر ءِ گشگ ءَ رند آس ءِ داران شر کنگ ءَ گلائش بوت ءُ درائنت کہ زمین ءِ یک انچنائیں مھرے کہ مھروانان دیوانگ کنت، انچو کہ بلوچ مرچی پہ زمین ءَ دیوانگ اَنت

من ءَ انچو سما بوت ناکو مھراب آشوب ءِ چیدگ ءُ دائم بلان کنت الم اے تھاری ءَ پروشت اِت ءُ باندت ءِ چراگ بیت دل ءَ اومان کت کہ ناکو ءِ چمانی باتن ءَ پاھو داتگیں واب ءَ کسھی دروشم ءَ بہ نویس آں بلے ءُ الم ناکو مھراب ءِ کسہ ءَ نبشتہ کناں۔ ناکو تئی جھد زندگ بات ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: کتابءِ نام “بلوچ اور ان کا وطن”

نبشتہ کار: ڈاکٹر فاروق بلوچ
چمشانکار: اسد بلوچ

دی بلوچستان پوسٹ

“اے کتاب ءِ تہ ءَ نبشتہ کارءَ بلوچ راج، بلوچ ڈیھ، آئیءِ سائل ءُ وسائل ءُ زورگرانی ھلاپ ءَ بلوچ ءِ گھگیری ءِ گوستانک ءِ بارو ءَ نبشتہ کتگ۔ من اے چمشانک ھمے سرھالانی پشدرءَ درشان کتگ”۔

بلوچ راج: چوشکہ بلوچ چہ وھداں زالم ءُ زوراوریں ھاکمانی زلم ءِ آماچ بوتگ ءُ اے وھد ءَ بلوچ بلوچستان ءَ ھوار سندھ، پنجاپ، ایران، افغانستان، عربستان ءُ افریقہ ءَ جھمنند انت- اگاں ما بہ چار ایں تاں بلوچ ءَ ھر وھد ءَ زلم ءُ زالمانی ھلاپ ءَ گھگیری کتگ کہ داں مرچی ءَ آئی ءِ گھگیری برجاہ انت۔

بازیں گوستانک نویس بلوچاں آرین ، کرد ءُ عرب راج ءَ چے آؤکیں راج لیک انت ءُ لھتیں آئی ءَ چہ ایران ءَ آؤکیں راجے گوش ایت بلئے راستی ایش اِنت کہ بلوچ چہ وھد ءَ ھمے ڈیھ بلوچستان ءِ جھمنندیں راجے بوتگ ءُ مرچی ءَ تک بلوچ ھمے ڈیھ ءَ نشتگ ءُ بلوچ ءَ عرب یا آرین گوشگ بے پائدگ انت، چی ءَ کہ بلوچ چہ آرین ،کرد ءُ عرب ءَ پیسر ھمے زمین ءَ نندوک بوتگ ءُ بلوچ ءِ دودمان سک کوھن انت کہ آ “مھرگڑھ” دودمان ءِ نام ءَ زانگ بیت ءُ اے تہذیب ۱۱۰۰ ہزار سال کوھن انت۔

دومی نیمگ ءَ بازیں لبزانکار ءُ گوستانک نویس بلوچی زبان ءَ چہ آرین زبان ءَ در کپتگیں زبانے گش انت کہ اے گپ ءِ تہ ءَ ھم راستی نیست انت چی ءَ کہ بلوچ چہ آرین ءَ پیسر ماں بلوچستان ءَ آباد بوتگ ءُ الّم چہ آرین ءَ پیسر آئی ءَ وت ءَ یک زبانے بوتگ ما اے گشت کنیں کہ بلوچی زبان گوں آرین زبان ءَ ھوار بوتگ-

بازیں گوستانک نویس بلوچ راج ءِ براھوی زبان ءِ ھبر کنوکیں بلوچ ٹکاں جتائیں راجے لیک ایت کہ ایشی ءِ تہ ءَ ھچ راستی نیست، چی ءَ کہ تو زبان ءِ بنیات ءَ ھچ راج ءَ جِتا کُت نہ کن ئے بلوچ ءِ اے ٹک چہ وھداں بلوچستان ءَ نندوک بوتگ ءُ آھاں ھچبر وتی نام ءِ دیم ءَ براھوی کارمرز نہ کتگ۔ اگاں ما بچاریں مارا گوستانک ءِ ھچ کتابانی تہ ءَ براھوی راج دست نہ کپ ایت اے لبز برطانیہ ءَ پہ بلوچ ءِ بھر ءُ بانگ کنگ ءِ واستا کارمرز کتگ۔ اگاں ما بہ چار ایں ھرچ خان بلوچے کہ بوتگ آھاں براھوی زبان کارمرز کتگ بلئے آھاں ھرچ وھد ءَ وتی نام ءِ دیم ءَ خانِ بلوچ نبشتہ کتگ-

بلوچ ءِ زمین: بلوچ ءِ زمین (بلوچستان) ءِ جغرافیائی ارزشت ءِ سبب ءَ تیوگیں دنیا ءِ تہ ءَ یک اھمیتے دار ایت۔ پمیشکا ھرچ وھد ءَ تاکتور ءُ زورگرانی چم ءِ چیر ءَ بوتگ- سکندر اعظم ءُ سائرس اعظم ءَ بِگر تاں سنڈیمن ءُ جناح ءَ ھرچ پیمیں ھاکماں اے زمین ءِ ارزشت زانتگ۔

بلوچستان مغرب ءَ داں بندرِ بلوچ (بندرعباس)، مشرق ءَ داں ڈیرہ جات، شمال ءَ داں دریائے ھلمند ءُ جنوب ءَ داں ساحل مکران ءَ تالان انت۔

بلوچستان مرچی سئے بھر ءِ تہ ءَ بھر انت کہ آئی ءِ یک بھرے گوں ایران، یک بھرے گوں افغانستان ءُ یک بھرے گوں پاکستان بزاں سندھ ءُ پنجاپ ءِ گوم ءَ ھوار انت۔ بلوچستان ءَ چوش بھر ءُ بانگ سامراجی تاکت برطانیہ ءَ کتگ-

بلوچستان ءِ معدنیات ءُ وسائل: انچوش کہ بلوچستان ءِ جغرافیہ دنیا ءِ تہ ءَ پر ارشزت انت، ھمے پیم ءَ بلوچستان ءِ معدنی وسائل ھم دنیا ءِ چمانی چیر ءَ انت بلوچستان ءِ تہ ءَ ۵۱۰ پنچ صد ءُ دہ قدرتی وسائل دست کپ ایت- بلوچستان ءِ وسائلانی تہ ءَ گیس (کہ ۱۹۵۲ ءَ ماں سوئی ءَ دریافت بوتگ)، تیل ، کوئلہ ، سُھر ءُ نُگرہ( کہ اے وسائل مار ءَ چاغی ، ڈیرہ بگٹی ءُ کوھلو ءَ دست کپ انت) اے ذخائر سیندک ءُ رکوڈک ءِ نام ءَ زانگ بنت-

بلوچستان ءِ مختصر سیاسی دور: درکپتگیں آثارِ قدیماں چہ اے زانگ بیت کہ بلوچ بلوچستان ءِ تہ ءَ ۱۱۰۰ یازدہ ھزار سال ءَ پیسر آباد بوتگ بلوچ تہذیب بزاں مھرگڑھ دودمان دنیا ءِ تہ ءَ یک کوھن اِنت دودمانے زانگ بیت- ۲۲۰۰ دو ہزار دو سدق م ءَ مھر گڑھ دودمان زوال ءِ نیمگ ءَ روت بزاں بازیں بلوچ ھُشک سالی ءُ موسم ءِ بدل بوگ ءِ سوب ءَ ماں سندھ ءُ ایران ءَ آباد بنت ءُ ایشی ءِ سبب ءَ بلوچ آبادی کم ترّ ایت ءُ بلوچستان ءِ تہ ءَ دری راج بزاں دراوڈی راج کاینت ءُ آباد بنت کہ آھانی دودمان دراوڈ دودمان زانگ بیت۔

۱۵۰۰ پانذدہ سد ق م ءَ آرین ارشکار بلوچستان ءِ سر ءَ اُرش کن انت ءُ دراوڑ دودمان ءَ ھلاس کن انت چہ آرین ارشکارانی سبب ءَ بلوچ دودمان ھم ھلاس بیت-

آرین ارشکارانی ھلاپ ءَ بلوچ گھگیری کنگ بلئے بلوچ ءِ تعداد ءِ کم بوگ ءِ سبب ءَ بلوچ شکست وارت- چہ آرین ارشکاراں پد بلوچ ءِ سر ءَ ایران ءِ ھاکم ماں نُھمی کرن ق م (۸۵۴) ءَ کبزہ کنت-

ھمے پیم ماں چارمی کرن ق مءَ(۳۵۹) سکندر اعظم ءِ فوج بلوچستان ءِ سر ءَ ارش کنت ءُ فتح کنت- چہ سکندر اعظم ءَ پد بلوچستان ءِ سر ءَ موریا حکمران بلوچستان ءِ سر ءَ کبزہ کنت ماں ھپتمی کرن (۶۴۴) ءَ عرب ھاکم بزاں ریاست مدینہ بلوچستان ءِ سر ءَ کبزہ کنت بلکیں عرب ھاکم تیوگیں ۴۰۰ چارسد سال ءَ مشرق وسطٰی ءِ سر ءَ ھاکمی کنت-
گوستانک نویس گش انت کہ عرب ءِ آیگ ءَ پیسر بلوچ آتش پرست ءُ بُت پرست بوتگ انت کہ ایشانی ڈس ءُ نشان مارا بلوچستان ءِ بازیں ھنداں دست کپ اَنت-

چہ عرب ھاکماں پد بزاں ماں یازدہمی عیسوی ءَ محمود غزنوی بلوچستان ءِ سر ءَ کبزہ کنت ءُ محمود غزنوی ءَ پد مغل ھاکم بلوچستانءِ سرءَ کبزہ کن انت- چوشکہ پانزدہمی کرن ءَ مغل ھاکم زوال بیت ءُ بلوچستان ءِ سر ءَ بلوچ ءِ احمدزئی ٹک ھاکمی کنت- ۱۸۳۹ ءَ یکبرے پد ءَ بلوچستان ءِ برطانیہ کبزہ کنت- برطانیہ ءِ کبزہ داں 1947 برجاہ بیت کہ پد ۱۱ اگست ۱۹۴۷ ءَ بلوچستان یک آزاتیں ریاستے جوڑ بیت ءُ بلئے ایشی ءَ پد یکبرے پد ءَ ۲۷ مارچ ۱۹۴۸ءَ پاکستانی ریاست بلوچستان ءِ سر ءَ کبزہ کنت کہ داں مرچی ءَ آئی ءِ کبزہ برجاہ انت ءُ بلوچ گوں آئی ءَ جنگ کنگ ءَ انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ گوستگیں روچ ءَ دو شمبے ءَ بلوچستان ءَ جھانی وبا کرونا ویروس ءِ نادراھی ءَ آماچ بوتگیں یک دگہ مردمے بیران بوتگ وھدیکہ ھپت دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ دو ھزار ءُ سَے سد ءُ شست ءُ یک ءَ سر بوتگ اَنت-

بلوچستان جان سلامتی ءِ واکدارانی نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں دو شمبے ءِ روچ ءَ بلوچستان ءِ پنچ دمگاں ھپت مردمانی تہ ءَ کرونا نادراھی پدر بوتگ ءُ چریشی ءَ پد تنی وھدی بلوچستان ءِ تہ ءَ کرونا نادراھی ءِ آماچ بوتگیں مردمانی کچ ءُ نوکیں کیسانی ھوار بیگ ءَ پد سرجمی ءَ سی ءُ دو ھزار ءُ سَے سد ءُ شست ءُ یک سر بوتگ اَنت-

رپورٹ ءِ رِد ءَ بلوچستان ءِ تہ ءَ دہ مردم وش بوتگ انت، وش بوتگیں مردمانی کچ سِی ءُ یک ھزار ءُ ھشت سدو ھشتاد ءُ چار ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ یک سد ءُ نوزدہ نادراہ ھست انت کہ دو نادراہ بلوچستان ءِ نادراھجاہ ءَ الاج کنگ بوھگ ءَ انت ءُ آھانی تہ ءَ دو ھائی فلو آکسیجن جنگ ءُ اِلاج کنگ بوھگ ءَ انت –
رپورٹ رد ءَ گوستگیں روچ ءَ چار سد ءُ شست ءُ ھشت مردمانی کرونا نادراھی ءِ ٹیسٹ کنگ بوتگ اَنت کہ اِشانی تہ ءَ تنی وھدی چِل ءُ شش مردمانی رپورٹ نئیتکگ اَنت-

رپورٹ رِد ءَ کرونا ویروس ءِ گیشی یک ٹک پنجاہ درسد ریکارڈ کنگ بوتگ ءُ تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ پنجاہ ءُ ھشت مردم بیران بوتگ اَنت-

سندھ ءِ مزن شھر کراچی ءَ پاکستانی پوج ءِ دست ءَ سے مردم آوار جنگ ءَ پد بیگواہ کنگ بوتگ اَنت-

گیشیں ھالانی رد ءَ سندھ ءِ مزن شھر کراچی ءَ چیزے روچانی تہ ءَ پاکستانی پوج ءُ چیریں ادارھانی دست ءَ پانزده مردم ءَ گیش آوار جنگ ءَ پد بیگواہ کنگ بوتگ اَنت-

ھیومین رائس کونس اف بلوچستان ء انفارمیشن سیکرٹری عبداللہ عباس ءِ رِد ءَ اے مردم کراچی ءِ جتا جتائیں بلوچ دمگاں پاکستانی پوج ءُ چیریں ادارھانی کارندھاں بیڑبرتگ ءُ زوراکی کنان ءَ آوار جتگ اَنت-

بیگواہ کنگ بوتگیں مردمانی تہ ءَ سے مردم ءِ پجّار بوتگ اَنت ءُ آ دگرانی پجّار انگت نہ بوتگ اَنت –

عبداللہ عباس ءِ رِد ءَ آوار جنگ بوتگیں مردمانی تہ ءَ سے ءِ بچّار نبی جھمنند کلری ، عدنان ء صدیق ءُ سمیع اللہ جھمنند فقیر کالونی ھوار اَنت-

زانگ بہ بیت بلوچستان ءَ چہ اَبید آ دگہ شھراں ھم بلوچ نودربر مُھر نہ اَنت آ زورانسری آوار جنی ءِ نشانگ کنگ بوگ ءَ اَنت –

گچک ءَ پاکستانی پوج ءِ دو کارمند کُشتگ اَنت – میجر گوھرام بلوچ

سربوتگیں ھالانی رِد ءَ ناشناسیں سلاہ بندیں مردماں بلوچستان ءِ دمگ گچک ءَ پاکستانی پوج ءِ سر ءَ اُرش کُتگ –

اُرش گچک ءِ دمگ جوان تاک ءَ پنچ ءُ ھپت نومبر ءَ کنگ بوتگ انت چریشی ءَ پاکستانی پوج ءَ جانی تاوانانی دیمپانی بیتگ –

اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ اَنت –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں پنچ ءُ ھپت نومبر ءَ گچک ءِ دمگ جوان تاک ءَ دور جنگیں توپک ءِ سر اُرش کتگ ءُ دو کارمند کشتگ اَنت-

جارکش ءَ گوشتگ کہ دژمن پوج ءُ آھانی کمک کارانی سر ءَ اُرش بلوچستان ءِ آجوئی ءَ تاں برجاہ مان انت –

بلوچ نودربرانی زورانسری آوارجنی ءِ بگیری ءَ انسانی ھکانی گل وتی کرد ءَ پیلو بہ کن انت – ماما قدیر بلوچ

بلوچستان ءِ بنجاھی شھر شال پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ ھشتاد ءُ نھ روچ سرجم بوتگ – ھر تک ءُ پھناتاں سیادی داروکیں مردماں بنجل ءَ اتکگ ءُ بیگواھیں مردمانی کھولانی گون ءَ دلپدردی درشان اتگ ءُ بلوچستان ءَ زورانسری آوارجنی گیشی ایرجتگ ءُ بدتریں انسانی ھکانی بگیری دارگ ءِ گوشتگ –

ھمے وھد ءَ بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءَ زورانسری آوار جنی ءِ درچ یکشل ءَ گیشی ءَ گوں برجاہ انت گوستگیں سَے ماھاں نودربر آوار جنگ بوگ ءَ انت –

آئی ءَ گوشتگ کہ وانگجاھاں پوجی بنجل جوڑ کنگ ءُ بلوچ نودربرانی بگیری ءَ کریک ڈاؤن برجاہ انت –

ماما قدیر بلوچ ءِ گوشگ ات کہ گوستگیں یک ھپتگے ءِ تہ ءَ بازیں نودربر بلوچستان ءِ جتا جتائیں ھند ءُ دمگاں آوار جنگ ءُ بیگواہ کنگ بوتگ اَنت – انسانی ھکانی گل اے زوراکیانی بگیری ءَ وتی کرد ءَ پیلو بہ کن اَنت –

آئی ءَ گوشتگ کہ ریاست اے وھدی وڑ وڑیں زوراکیانی گوم ءَ بلوچانی بگیری ءَ وتی تاکت ءَ کارمرز کنگ انت –

ماما قدیر بلوچ ءِ گوشگ ات کہ اے زوراکیانی بگیری ءَ بلوچ راج دوستیں گل، نودربر گلاں یکجاہ بوگ ءُ توار چست کنگ لوٹ ایت – اگاں ھچ نہ گوشت گڑا بلوچستان ءِ تہ ءَ انسان ءِ نیستی ءِ ودی بیت اِنت –