TBP Balochi

سر بیتگیں ھالانی رد ءَ سیستان و بلوچستان ءُ اوگانستان ءِ سیمسراں ھواریں دمگ زابل ءَ ایرانی چیریں ادارھاں اھل سنت ءَ بندوکیں یک مردمے آوار جتگ ءُ برتگ –

بلوچ کمپن فعالین ءِ رد ءَ گوستگیں روچ ءَ زابل ءِ ھند اسلام آباد لوتک ءَ ایرانی چیریں ادارھاں یک مردمے آوار جتگ کہ اھل سنت ءَ گوں بندوک اِنت –

آوار جنگ بیتگیں مردم ءِ پجار ھاپز صدیق ء مولوی دین مھمد جھمنند اسلام آباد زابل ءِ نام ءَ زابگ بیتگ –

چیریں ادارھاں آئی ءِ آوار جنگ ءِ بارو ءَ دگہ گپ دیم ءَ نیاؤرتگ ءُ آوار جنگ ءَ پد ناشناسیں زنداناں برتگ –

بلوچستان ءِ دمگ گریشہ ءَ دامن شاشان پبلک لائبریری کمیٹی ءِ نیمگ ءَ لبزانکی دیوان بیتگ، نیاد ءَ نودربر ءُ کمیٹی ءِ سرجمیں باسکاں بھر زرتگ ءُ دمگ ءَ دگہ مردماں ھم وت ءَ کمیٹی ءِ بھرمند کرتگ –

نیاد گریشہ ءِ ھنکین گیشتری ءَ وانگی کوٹی ءَ برجم دارگ بوتگ کہ اود ءَ دیوان ءِ پاگ واجہ گوھرام بلوچ ءُ دیوان ءِ گچینی ءِ مھمان گل ھسن بلوچ بیتگ –

نیاد ءَ بھر زیروکیں سروکاں وتی وتی ھیال درشان کرتگ ءُ نودربر پہ وانگ ءِ نیمگ ءَ دلگوش کنگ ءِ کڈن کرتگ اَنت –

آیاں گُشتگ کہ اے بیست ءُ یکمی کرن ءَ دنیا ءَ چنکس دیمروئی کرتگ ءُ مارا وتی دیمروئی کنگ ءَ چی چی کنگی اِنت –

آیاں گُشتگ کہ ابید ء وانگ ءُ زانگ ءَ ھچ راج ءَ دیمروئی نہ کرتگ گڑا باید ما ھم وتی دلگوش ءَ وانگ ءُ زانگ ءَ بہ دے –

آیاں گُشتگ کہ اے راستی ءِ کہ مارا ھچی نیست پہ دیمروئی ءِ واستا بلے ما وتی دیمروئی ءِ واستا وتی جھد ءَ بہ کن ایں دانکہ اے دنیا ءِ تیزیں گاماں ما ھم ھوار بہ ایں –

آیاں گُشتگ کہ اے گپ راستی ءِ بلوچستان ءَ کتاب جاہ، وانگجاہ ءُ وانگی تکاں دگہ آسراتی نہ بوگ ءِ بروبری ءَ اَنت ءُ چرے سبب ءَ ما دنیا ءِ تیزیں گاماں باز پشکپتگ اِنت –

نیاد ءَ گیشتری ءِ بنزہ ءِ واستا نوکیں ارگنائزر ءِ سروک عبدالطیف، ڈپٹی آرگنائزر سنگت گوھرام ءُ کمیٹی ءِ باسک شکر اللہ بلوچ، عبدالحالق بلوچ ءُ شاکر الاھی بلوچ گچین کنگ بیتگ اَنت –

بلوچستان ءَ وانگی تکاں گیشتر نودربر وتی کمک ءَ وت کتابجاہ ءُ دگہ پھناتاں کار کنگ ءَ اَنت –

سربوتگیں ھالانی رِد ءَ بلوچستان ءِ دمگ ڈیرہ مراد جمالی، دالبندین، ژوب ءُ وڈھ ءَ تیرگواری ءُ دگہ وئیلاں شش مردم بیران بیتگ اَنت ءُ بازینے زدگ بوتگ اَنت –

گیشیں ھالانی رِد ءَ بلوچستان ءِ دمگ ڈیرہ مراد جمالی ءَ تیرگواری ءِ وئیل ءَ یک مردم ءِ بیران ءُ یک ءِ زدگ بوتگ –

پولیس ءِ رِد ءَ وئیل نسیرآباد ءَ خان کوٹ ءَ بچاؤ بند دیم ءَ اتکگ کہ عمرانی ٹک ءِ دو ٹولیانی میان ءَ جنگ چوپ ءُ تیرگواری ءَ محمد اکبر نامیں مردم ءِ بیران بوتگ ءُ یکے زدگ بوتگ – بیران ءُ ٹپی بوتگیں مردم نادراھجاہ ءَ برگ بوتگ انت –

ھمے وڑ دالبندین ءَ ناشناسیں مردمانی تیرگواری ءَ یک مردم ءِ بیران بوتگ – پولیس ءِ رِد ءَ وئیل فیصل کالونی ءَ دیم ءَ اتکگ کہ ناشناسیں مردماں گیراج ءَ کارکنوکیں استاد محمد نبی ءِ سر ءَ تیرگواری کتگ چریشی ءَ آ سک باز ٹپی بوتگ کہ ھما دمان ءَ پرنس فھد نادراھجاہ ءَ سرکنگ بوتگ اود ءَ ٹپانی درمان کنگ ءَ پد شال ءَ دیم دیگ بوتگ بلے آئی ءَ ٹپانی درد نہ سگتگ ءُ نیم راہ ءَ بیران بوتگ –

دگہ وئیل ءِ گوستگیں روچ ءَ ژوب ءَ دیم ءَ اتکگ کہ ناشناسیں مردمانی تیرگواری پت ءُ زھگ ءَ ھوار سَے مردم بیران ءُ یک ءِ زدگ بوتگ – وئیل ژوب ءِ دمگ بابڑ ءَ دیم ءَ اتکگ کہ ناشناسیں مردمانی تیرگواری ءَ ملک حمداللہ ءُ آئی زھگ امین اللہ ءُ حاجی عنایت اللہ بیران بوتگ انت – دمگی لیویز ءَ وت ءَ وئیل جاہ ءَ سر کتگ بیران بوتگیں مردم نادراھ جاہ ءَ سر کتگ انت اود ءَ اژدری چار ءُ ٹپاس ءَ پد جون کھول ءِ ھوالگ ءَ داتگ – ھمے گوشگ بوگ ءَ انت وئیل پیشی زاتی جیڑو ءِ سوب ءَ بوتگ – وھدیکہ ژوب ءَ اناگتی تیرلگگ ءِ سبب ءَ عبدالسلام ء امیر محمد نامیں مردمے ٹپی بوتگ –

ھمے وڑ ژوب ءَ دو جتائیں دگ ءِ وئیلاں دو مردم بیران ءُ بازینے زدگ بوتگ انت –

ھالانی رِد ءَ اولی وئیل ژوب ءِ دمگ ڈی آئی خان ءَ دگ ءِ سر ءَ ٹرک ءِ ٹیر ترکگ ءِ سوب ءَ وئیل آماچ بوتگ چریشی ءَ یک مردم ءِ بیران ءُ دو زدگ بوتگ انت –
دومی وئیل سروبی ءَ دیم ءَ اتکگ کہ تیز رؤکیں گاڑی چپی بوگ ءَ یک مردم ءِ بیران ءُ بازینے زدگ بوتگ –

ھردو وئیلاں آماچ بوتگیں مردم دمگی نادراھجاہ ءَ سر کنگ بوتگ اودا اژدری چار ٹپاس ءَ پد جون کھول ءِ ھوالگ ءَ کنگ بوتگ انت –

دومی نیمگ ءَ وڈھ دمگ دراکھالہ آمورزئی ءَ کرومائیٹ ءِ مائن ءَ گیس پُربوھگے سوب ءَ چار مردم دمتوس بوتگ – ریسکیو کارمنداں ھما دمان ء وت ءَ وئیللوچستان

جاہ ءَ جاہ ءَ سرکتگ دمتوس بوتگیں مردم مائن ءَ چہ درکتگ ءُ نادراھجاہ ءَ سر کتگ ھوش آیگ ءَ پد گس آں دیم دیگ بوتگ انت –

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ گوں بالیگرابانی بمب گْواری ءَ ھوار اوگان راجی لشکر ءَ وتی تْرُندیں جنگی اُرشاں 385 تالبان جنگول کُشتگ اَنت ءُ دِگہ 210 ٹپی کرتگ اَنت۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش نگرھار، لوگر، گزنی، پکتیا، میدان، واردک، کندھار، ھِرات، پراہ، جوزجان، سمنگان، ھِلمند، ٹکھر، بلگان ءُ کاپیسا ءِ ھند ءُ دمگاں کرتگ اَنت۔

راجی پھزگ ءَ وتی یکشلیں ٹیوٹر پیگاماں گیشترّیں سرپدی دیان ءَ گْوشت کہ اوگان تالبان ءِ دست ءَ دزگیر بوتگیں زِرباری ولایت نمروز ءِ بُنجاھی شھر زَرنج ءَ اوگان راجی لشکر ءِ بالیگرابانی اُرش ءَ ناشرکاریں تالبان ءِ نوک اڈکُتگیں گورنر مولوی ابدلھالک گوں وتی دِگہ 14 باسکاں کُشک بیتگ۔

ھرات ءِ انجیل ءُ دِگہ نزیکیں دمگاں گوں اوگان راجی لشکر ءِ بالیگرابانی بمب گْواری، آشوبی سِلاھبند، راجدوستییں گلانی کُمک ءَ راجی لشکر ءِ جنگی اُرشاں 35 ناشرکاریں تالبان کُشگ ءُ دِگہ 12 زدگ بیتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔ کندھار ولایت ءِ دمگ ڈند ءُ نزیکیں کوچّگاں اوگان راجی لشکر ءِ جنگی بالیگُراباں ارش تالبان ءِ 26 جنگول کُشتگ ءُ دِگہ 6 زدگ کِتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔

ھمے وڑ ءَ ولایت ٹکھر ءَ اوگان راجی لشکر ءَ گوں جنگی بالیگرابانی کُمک ءَ آپریشن کنان ناشرکاریں تالبان ءِ ولایت کندوز ءِ نام داتگیں گورنر مولوی شاہ مھمود گوں دِگہ 12 جنگول ءَ کُشتگ۔ ماں ٹکھر ولایت ءِ دِگہ دمگے ءَ رستک دمگ ءِ گورنر اِجازلھک ھم گوں 8 جنگول ءَ کُشگ بیتگ۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 404 تالبان جنگول کُشگ ءُ 209 ٹپی بیتگ اِت اَنت۔ اوگان راجی لشکر ءَ ھمے جنگی اُرش نگرھار، لوگمان، گزنی، پکتیا، ھوست، کندھار، زابُل، ھِرات، جوزجان، بلک، سمنگان، پریاب، سرئے پُل، ھِلمند، ٹکھر، بلگان ءُ کاپیسا ءِ ھند ءُ دمگاں کرتگ اَت اَنت۔

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں شست ءَ شش دگہ نوکیں نادراہ پدر بوتگ ءُ اے وھد ءَ کرونا وائرس ءَ آماچ بوتگیں درسیں مردمانی کچ سِی ھزار ءَ دوسد ءُ چِل ءُ شش ءَ سر بوتگ اَنت-

بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءَ شمبے ءِ روچ ءَ یک ھزار ءُ پنچ سد ءُ سِی ءُ شش مردم ءَ کرونا وائرس ءِ ٹیسٹ کنگ بوتگ کہ آھانی تہ ءَ یک شست ءُ شش مردماں کرونا نادراھی پدر بوتگ-

رپورٹ ءِ رِد ءَ شال ءَ سی ءُ یک، تربت ءَ بیست ءُ دو، گوادر، پنجگور ءُ مستونگ ءَ سَے سَے، صحبت پور، خاران، لورلائی ءُ ژوب ءَ یک یک مردمے ءِ کرونا وائرس ءِ آماچ بوتگ انت – چریشی ءَ پد تنی وھدی بلوچستان ءِ تہ ءَ کرونا نادراھی آماچ بوتگیں مردمانی کچ نوکیں کساساں ھوار سرجمی ءَ سِی ھزار ءُ دوسد ءُ چِل ءُ شش ءَ سربوتگ انت –

رپورٹ ءِ رِد ءَ بلوچستان ءِ تہ ءَ بیست ءُ چار ادارانی میان ءَ کرونا وائرس ءِ نوزدہ نادراہ وش بوتگ انت، وش بوتگیں مردمانی کچ نوکیں کساسیاں ھوار سرجمی ءَ بیست ءُ ھشت ھزار نُھ سد ءُ نُھ ءَ سربوتگ انت –
رپورٹ ءِ رِد ءَ بلوچستان ءِ تہ ءَ یک ھزار ءُ شش نادراہ ھست انت ءُ وھدیکہ چاردہ نادراہ بلوچستان ءِ نادراھجاھانی تہ ءَ ہائی فلو آکسیجن ءُ ھپت لو فلو آکسیجن الاج کنگ انت –

رپورٹ ءِ رِد ءَ بلوچستان ءِ تہ ءَ تنی وھدی سَے سد ءُ سِی ءُ یک مردم کرونا نادراھی ءَ بیران بوتگ ءُ بلوچستان ءِ تہ ءَ کرونا نادراھی گیش تالان بوگ ء چار ٹک بیست ءُ نُھ درسد بوتگ-

پنجگور وشبود کسٹم ءِ نزیک ءَ پاکستانی پوج ءِ گاڑی تراک ناکیں شوروانی نشانگ جوڑ کرتگ – بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ پنجگور ءَ پاکستانی پوج ءِ سر ءَ بوتگیں بمب تراک ءِ زمّہ واری منّ اِتگ ءُ آئی ءِ تامر شنگ کرتگ –

جارکش بیبگر بلوچ ءَ گوشتگ کہ مروچی بیگاہ ءَ پنجگور ءِ دمگ وشبود ءُ کسٹم ءِ میان ءَ سی پیک ءِ پھازگ ءِ ھاتر ءَ داشتگیں زورگیریں پاکستانی پوج ءِ یک گاڑی ءِ دیرواگیں تراکناکیں شوروانی نشانگ کتگ ءُ تباہ کتگ – تراک ءِ آسر ءَ دو کارمند مرتگ ءُ سَے زدگ بوتگ انت –

جارکش ءَ گوشتگ کہ ما یک رندے پد ءَ گوشیں نام نھادیں سی پیک ءُ چائنہ ءِ بے سوبیں سرمایہ کاری ءِ بگیری ءَ مئے سلاہ بندیں جھد تاں ھما وھد ءَ برجاہ مان ایت تانکہ چائنہ بلوچ ءِ مرزی ءِ بگیر بلوچ سر ڈگارے سر ءَ وتی سرمایہ کاری ءَ وت ءَ گستہ نہ کنت –

مئے اے دابیں اُرش بلوچستان ءِ آجوئی ءَ تاں برجاہ مان انت –

بلوچستان ءِ دمگ چاگی ءِ ھند نوکنڈی ءِ سیمسری دمگاں اوگان تالیبان ءُ ایران ءِ بگیر داروکیں سلاہ بندیں ٹولی جیش العدل ءِ میان ءَ ترندیں جنگ ءُ چوپ، ھردوکیں نیمگاں جانی تاوانانی گمان کنگ بیگ ءَ اِنت –

گیشیں ھالانی رد ءَ دالبندین ءِ ھندی اھوالکار علی رضار رند ءِ رد ءَ بلوچستان ءِ دمگ چاگی ءِ ھند نوکنڈی ءِ سیمسری دمگ اوگان ءِ ھند ڈک ءَ ایران ءِ بگیر داروکیں سلاہ بندیں ٹولی جیش العدل ءُ اوگان تالیبان ءِ میان ءَ جنگ ءُ چوپ بیتگ ءُ چریشی ءَ جیش العدل ءِ امیر ءِ برات ءَ ھوار دو ناشرکار جنگ بیتگ اَنت ءُ تالیبان ءَ ھم بازیں کچے ءَ جانی تاوانانی دیمپانی کنگ کپتگ –

زانگ بہ بیت جیش العدل ایران ءَ پرکاریں سنی گلے کہ ایران ءِ بگیر ءَ جنگ کنگ ءَ اِنت ءُ اوگانستان ءِ گوستگیں این ڈی ایس ءِ سروک ءُ اوگان رھشون رحمت اللہ نبیل ءَ مروچی اے بھتام جتگ کہ جیش العدل ءُ اوگان تالیبان ءِ میان ءَ بگیر داری ءَ ابید پاکستانی چیریں ادارھاں بلوچستان ءِ دمگ دالبندین، نوشکی، ماشکیل ءُ پنجگور ءَ جیش العدل ءِ کم ءُ گیش شش سد ناشرکار تالیبان ءِ کمک ءَ نیمروز، ھرات، فراہ ءَ سرجمی ءَ جنگی ساز ءُ ساماناں گوں اتکگ اَنت –

بلے مروچی بلوچستان ءَ بیوکیں اُرش ءِ بارو ءَ تالیبان ءُ جیش العدل ءِ ھردوکانی بیان تنی وھدی دیم ءَ نیتکگ اَنت –

دگہ یک دمگی مردمے ءِ رد ءَ لھتے وھد ءَ پیسر جیش العدل ءُ تالیبان ءِ میان ءَ جیڑہ ودی بیتگ اَنت کہ ھردوکانی میان ءَ گپ ءُ تران بندات بیتگ ءُ چریشی ءِ سبب ءَ وت ماں وت مِڑ اِتگ اَنت –

پنجگور ءِ دمگ سراوان ءَ بلوچی زبان ءِ لبزانکار حاجی عبدالقیوم بلوچ ءِ بوتن ءِ روچ ءِ درگت ءَ لائبریری ءِ بنھشت ایر کنگ بیتگ –

لائبریری ءِ بنھشت ءِ ایر کنگ ءَ ڈپٹی کمشنر پنجگور عبدالرزاق ساسولی اسسٹنٹ کمشنر پنجگور امجد سومرو اسسٹنٹ کمشنر گوارگو برکت بلوچ، لائبریری ءِ اسسٹنٹ آفیسر امان اللہ بلوچ، صالح اعجاز جنگی، عبدالشکو بلوچ، سر طارق بلوچ، سر قدیر،عتیق اللہ، داد مھمد، عبدالحمید بلوچ، لالا عمیر، مھمد اسلم ءُ نودربرانی بازیں کچے جاڑیگ بیتگ اَنت –

ھمے وھد ءَ ڈپٹی کمشنر عبدالرزاق ساسولی ءَ گُشتگ کہ ما منت ءَ گراں امان اللہ صالح ءِ آئی ءَ مارا چوشیں وشیں وھدے داوت داتگ ءُ اے امر ءَ آئی ءِ المی ءُ ادبی چاگردی کار ستاکرز اَنت –

آئی ءَ گُشتگ کہ لائبریری ءُ کتاب ءِ بستار ءَ کس رد کرت نہ کنت اگاں کسے ءِ لوگ ءَ کتاب مہ بیت گڑا سرپد بہ بیت کہ آئی ءِ لوگ ءَ ھچ نیست اِنت –

آئی ءَ گُشتگ کہ کتاب ءُ لائبریری مردماں شریں ءُ جوانیں راھاں پرینین اِیت ءُ کتاب ءُ الم ءِ چراگ ءَ رژنا کن اَنت –

آئی ءَ گُشتگ کہ حاجی عبدالقیوم ءَ ھما دیمونی الم ءُ ادب ءَ داتگ اَنت ءُ ھما وڑ ءَ شمارا لوٹ ایت کہ الم ءُ ادب ءِ واستا کار بہ کن اِت –

آئی ءَ گشتگ کہ حاجی عبدالقیوم لائبریری ءِ واستا ھر وڑیں کمک کنگ بیت اِنت دراھیں جیڑھانی گیش ءُ گیوار آیانی گون ءَ اوشتوک اِنت –

بھر زیروکیں مردماں گُشتگ کہ پنجگور ءَ الم ءِ چراگ برز بیان اِنت ءُ باید نودربراں گیش اء درگت ءَ جھد کنگ لوٹ ایت ءُ تانکہ دراھیں مردم ھمے کاروانانی بھر بہ بنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی ءَ مروچی چار ھزار ءُ چار سد ءُ دو روچ سرجم بیتگ – زھدشانی ءَ بی این پی تربت ھنکیں سروک شَے نزیر اھمد بلوچ، ندیم بلوچ، گوستگیں سینیٹر مھیم ھان بلوچ ءُ دگہ مردماں بنجل ءِ تر ءُ تاب کرتگ ءُ پدردی درشان اِتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ گپ کنان ءَ گُشتگ کی پاکستانی زورگری ءَ پد بلوچستان بلوچ ریاستء زُلم ءُ زوراکیانی دیمپان اَنت – بلوچ راج ھمک وھد ءَ ناوشیں جیڑھانی آماچ بیتگ اَنت بلوچ راج ءِ ساہ ءِ کشگ ءَ دری پنجگ تنی وھدی زورمند اَنت ءُ بلوچ راج ءِ ریشگ ءِ ھلاس کنگ ءَ داں مروچی ءَ ریاست وتی پنجگاں سک کنگ ءَ اِنت –

آئی ءَ گُشتگ کہ پُر ایمنیں جد ءُ جھد ءِ اے رواج ءَ چہ بلوچ راج اے جاورانی گوجگ ءَ انگت ءَ سوبمند بیان اَنت روان اَنت –

آئی ءَ گُشتگ کہ زھگانی پریات ءُ زاری جھلانکیں ٹپ ءُ دومی نیمگ ءَ پوج ءِ بالیں راکٹ گولہ ءُ بارود ستکگیں گدانانی آس کاپینگ ھمک روچ بلوچ پسگانی آوار جنگ ءُ بیگواہ کنگ ءِ وڑیں درچ یک ھما رنگ ءَ آیانی واستا زمین تنک کنگ بیتگ ءُ ریاستی بندیگ جاھاں بیگواھیں مردمانی کھولانی گمانی یات دگ ءُ بنجلانی سر ءَ زھرشانی ءَ اَنت –

ماما قدیر بلوچ ءَ گُشتگ کہ ریاستی زُلم ءُ زوراکی ءُ ابید سد آفرین اِنت بلوچ راج ءِ جزبگ ءَ ھما ایمان ءَ گوں زانت ءِ سر شاھاں رودینان اَنت ءُ جنگ ءِ پِڑ ءَ دیمداری ءِ واستا ھاٹیگ دار اَنت، بلوچ کُشگ بیگ اِنت، مرگ ءَ اِنت بلے وتی پجار ءِ توار ءَ بُرز کنان اَنت چُش کہ اے شھیدانی داتگیں دیمونی اَنت –