TBP Balochi

اوگانستان ءِ بازیں جاھاں تالیبان ءُ اوگان لشکر ءِ میان ءَ جنگ ءُ چوپ برجاہ اَنت، گوستگیں روچ ءَ امریکی جنگی بالیگاں ھم بازیں جاھاں بمبگواری کرتگ ءُ اود ءَ بازیں کچے ءَ جانی تاوانانی گمان کنگ بیتگ اَنت –

دومی نیمگ ءَ اوگانستان ءِ بازیں جاہ تالیبان ءِ دستیگی ءَ گندگ ءَ آیگ ءَ اَنت ءُ دو نیمی جنگ ءُ چوپاں بازیں تالیبانی کوش ھم اوگانستان ءِ لشکر ءَ شنگ کرتگ اَنت –

ھمے وڑ اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 579 تالبان جنگول کُشتگ اَنت ءُ دِگہ 161 ٹپی کرتگ اَنت۔ راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرگار، ھوست، لوگر، پکتیا، کندھار، ھرات، پراہ، جوزجان، سمنگان، ھِلمند، ٹکھر، کندوز ءُ پنجشیر ءِ ھند ءُ دمگاں کرتگ اَنت۔

راجی پھزگ ءَ وتی یکشلیں ٹیوٹر پیگاماں گیشترّیں سرپدی دیان ءَ گْوشت کہ ولایت ھِلمند ءِ بُنجاھی شھر لشکرگاہ ءِ نزیکیں کُوچّگاں اوگان راجی لشکر ءِ بالیگراباں جنگی اُرش کنان ءَ تالبان وتکشی گلانی سرکماش بشیر انیس گوں دِگہ 3 ھاسیں کمانداراں ھوار 63 ناشرکاریں تالبان ءِ جنگول کُشتگ اَنت ءُ 17 زدگ کُتگ اَنت، اے اُرشاں تالبان ءِ بازیں سِلاہ ءُ جنگی ساز ءُ سامان ھم تباہ کنگ بوتگ اَنت۔

گیشتریں سرپدی یے دیان ءَ گْوشت ئِے کہ ولایت کندھار ءِ ڈند ءُ زری دمگ ءِ نزیکیں ھند ءُ دمگاں ھم اوگان راجی لشکر ءِ جنگی بالیگُرابانی اُرش کُتگ چریشی ءَ 16 تالبان جنگول مُرتگ ءُ دِگہ 6 ٹپی بوتگ اَنت۔ اے اُرشاں تالبان ءِ 8 سنگر، 3 پِرپٹ ءُ سِلاہ تباہ کنگ بیتگ اَنت، ھرات شھر ءِ انجیل دمگ ءَ راجی لشکر ءِ جنگی اُرشاں 9 ناشرکاریں تالبان کُشگ ءُ دِگہ 5 زدگ بیتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔

راجی آشوبی گلانی کُمک ءَ اوگان راجی لشکر ءَ تالبان ءِ اُشاں پْروش دیان ءَ گوریچی ولایت بلگ ءَ دھادی دمگ ءِ کوچگ کودبرک چہ تالبان ءِ دستگیری ءَ آجو کنائینتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 572 تالبان جنگول کُشگ ءُ 309 ٹپی بیتگ اِت اَنت۔ اوگان راجی لشکر ءَ ھمے جنگی اُرش ولایت نگرھار، لولمان، گزنی، پکتیا، کندھار، اُرزگان، ھِرات، پراہ، جوزجان، سرئے پُل، ھِلمند، نِمروز، ٹکھر،کُندوز، بدکشان ءُ کاپیسا ءِ ھند ءُ دمگاں کرتگ اَت اَنت۔

دومی نیمگ ءَ اوگانستان ءِ بنجاھی شھر کابل ءَ سروک اشرف گنی ءِ سروکی ءَ سیاسی جاور ءُ جنگی جاورھالانی سر ءَ نیاد کنگ بیتگ –

نیاد ءَ سیاسی مھلوک ءِ سروکاں بھر زرتگ ءُ دمگانی ناگیگیں جاورھالانی سر ءَ گپ ءُ باوست ءُ نوکیں گامگیجانی سر ءَ سوڑگ بیتگ اَنت –

نبشتانک: پت ءِ پَنت پہ مھروانیں بچ ءَ

نبشتہ کار: ھاتر اسلم

دی بلوچستان پوسٹ

دْروت منی چم ءِ چراگ منی دوزواھیں بچ مرچی منی دل ءَ لوٹ اِت کہ پہ تو نِمدی یے نبشتہ بہ کن آں ءُ ترا لھتیں نسیّت بہ گْوش آں منی جگر نوں شری ءِ سر ءَ دِلگوش کن، تو تھنا اے دنیا ءَ آتگ ئے ءُ تھنا سَپر کن ئے داں کہ زندگ ئے اُمیت کس ءَ چہ مہ دار ، کسی گِلگْ ءَ مہ کن ، کس ءَ بد مہ گْوش ، وت ءَ چہ ھرکس ءَ دُور بہ دار، تو سَتّر دَزگَٹ بہ بہ بَلے کس ءَ مہ گْوش منی کُمَک ءَ بہ کن اے دنیا گوں کس ءَ وپادار نہ بیت، اے مردم کسی مھروان نہ بنت منی ساہ، پَد ءَ مئے چاگرد ءِ وَ گپ کنگ نہ بیت پرچا کہ اِد ءَ کَھر ءِ بادشاھی اِنت، مھر ءِ نام ءُ نِشان نیست ءُ نہ کہ اِد ءِ راجدوست ءُ اِنسان دوستیں مردمان ءَ کَدر ھست-

اگاں تو وتی پت ءِ ھبَر ءَ زور ئے من گْوش آں، وتی کِرّد ءُ کاراں اے دنیا ءِ دیم ءَ آرَگ ءِ جُھد ءَ مہ کن، وت ءَ مُدام چہ دنیا ءَ دُور بہ دار ءُ بس ھچ مہ گْوش ، ھنچوش بہ پھم کہ زی تئی پت مُرتگ ءُ تو انگت پُرسیگ پرچا کہ اے دنیا ءَ یک بَلاھیں رَسمے ھست آ رَسم ترا ھچ وڑ ءَ لگتمال کنگی نہ اِنت-

اگاں تو مَزنیں کِردے ءِ واھند بوت ئے ءُ یک نوکیں جھدے بندات کرت انگت ترا دنیا ءَ شریں نامے نہ رَس اِت گڑا دلجَم بو تئی مرگ ءَ چہ پہ سَرجمیں مردم، تئی دوست دژمن وتی ‘profile’ اَکساں سیاہ کن اَنت، داں لھتیں روچ ءَ تئی اکس ءُ گُشتین ءَ وتی ‘Status’ کن اَنت تئی مرگ ءَ وت ءَ سَک گَمیگ کن اَنت لھتیں شائر پہ تو شھر پِر بند اِیت لھتیں نبشتہ کار پہ تو نمدی ءُ نبشتانک نبشتہ کنت اے سرجمیں مردم وت ءَ تئی مھرانی وامدار کن اَنت-

منی چَمروکیں بَچ، اے دنیا ءِ رسم ھمیش اِنت کہ زندگیں مردم ءَ کَدر نیست آ کہ مر اِیت گڑا آئی ءِ اِزّت آزمان ءَ سر بیت ءُ ھر کس وت ءَ گوں آئی ءَ نزّیک کنگ لوٹ ایت من پمیشکا گْوش آں ترا ھچ گلگ کنگی نہ اِنت اے دنیا ءِ رسم اَنت ءُ ترا اے رسم ھچ وڑ ءَ لگتمال کنگی نہ اَنت پد ءَ مئے چاگرد ءِ رسم انگت گیشتر اَنت اِد ءَ گیشتریں شائر ءُ نبشتہ کار مُرتگیں مردمانی توسیپ ءَ دَزگٹ اَنت آیاں ھچ وھد نہ رَس اِیت کہ زندگیں مردماں اے راہ ءَ بیار اَنت ءُ یک شریں کرد ءِ واھند بہ کن اَنت-

اَڑے بابا من و بہ ھیال آں کہ زانگ جنگ آں! پھل کن- من بَلے اے ھبَراں گوں دگہ کس ءَ نہ گوش آں بس ترا یک سوجے دات کہ مئے چاگرد ھمے آس ءَ سُچان اِنت بلے اے گپّاں گوں دگہ ھچ کس ءَ نہ کن ئے کہ منی پت ءَ من ءَ چوشیں پنتے داتگ بَلے اے پنت ءَ وتی کَستِریں برات ءُ وتی چُکاں اَلّم بہ گوش تو سرپد ئے نوں من وَ تھت ءِ باھوٹ آں بہ گند ئے گیش سپر کت مہ کن آں-

تئی کَماشیں پت رھمدل

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ سیستان ءُ بلوچستان ءِ دارالعلوم زاھدان ءِ شوھاز تسنیف ءِ بنجاہ ءِ سروک استاد ادھم سپاھی ماں نادراھی ءِ سبب ءَ بیران بیتگ –

سنی بلوچی آنلائن تندجاہ ءِ رد ءَ آ ماں گوستگیں روچ ءَ یزد ءِ شھر ءَ یک نادراہ جاھے ءَ ناجوڑی ءِ سبب ءَ بیران بیتگ –

استاد ادھم سپاھی ءِ بارو ءَ گوشگ بیتگ کہ آئی ءَ دارالعلوم ءَ تدریس ءَ گیش دگہ بھراں چُشکہ اربی زبان، لبزانکی بھر، پاری زبان ءُ لبزانک ءِ بھر وتی کلاسانی تہ ءَ نودربراں کرتگ اَنت –

استاد ادھم سپاھی ءِ بارو ءَ گوشگ بیت اِنت آئی ءَ دزاپ ءَ ھوار سیستان و بلوچستان ءِ مزن شھدربرجاہ ءَ ھم استادی ءُ زانت ءُ زانشی ھیل داتگ اَنت ءُ اشی ءَ ابید ھم زاھدان ءِ مزن شھدربر جاہ ءَ ھم استادے بیتگ –

ڈاکٹر ادھم سپاھی ءِ بارو ءَ گوشگ بیت اِنت کہ آ سیستان و بلوچستان ءِ دمگ سیب ءُ سوران ءِ میتگ ءَ ودی بیتگ –

آئی ءَ بازیں المی ءُ ھیلکاری جھداں ھوار نیکراھی وانگجاہ، سرکار ءُ دگہ تکاں مزنیں کردے زانگ بیتگ –

بلوچ اسٹوڈنٹس ایکشن کمیٹی پنجگور ھنکین ءِ نیاد ھنکیں گوستگیں سروک شاھنواز بلوچ ءِ چیردستی ءَ برجم دارگ بیتگ کہ چریشی ءَ بنجاھی کمک ھالرسان عارف بلوچ گچینی مھمان ءُ بنجاھی پتر ءِ باسک وھید اباس ھواریں مھمان بیتگ –

نیاد ءَ بنجاھی سرپدی، گوستگیں جاورھال، شرگداری، گلی رھبند، دمگی ءُ میان اُستمانی راجداری ءِ درگت ءَ گپ ءُ باوست بیگ ءَ پد نوکیں گامگیج ءِ سر ءَ شوربندی ءَ نوکیں ھنکین ءِ گچینی کاری بیتگ کہ چریشی ءَ مختار میرک بلوچ ھنکین سروک ءُ زاھد دوست بلوچ کارگشاد نامینگ بیتگ –

نیاد ءَ تران کنان ءَ بنجاھی ھالرسان کمک عارف بلوچ ءَ گُشتگ کہ اے وھد ءَ بلوچ نودربر راجداری ءَ یک جوانیں وھدے گوزگ ءَ اِنت ھمود ءَ نودربر زانت ءُ زانش ءِ بنکی درگیجگ ءَ دزبند اَنت – بلوچ اسٹوڈنٹس ایکشن کمیٹی وتی گلی نیادانی زور ءَ نودربراں راجداری، زانت ءُ زانشی ءِ ھیلکاری ءِ واستا زمینی جاورھالاں چاران اِنت – گل ءِ مھکمی ھمے سرپدی نیادانی تہ ءَ اِنت ھمے سبب ءَ بساک ءِ نودربراں زھنی ردوم ءِ واستا یک پالیسی ءِ داریت اِت اِنت دانکہ بلوچ نودربر سیاست ءِ واستا یک مھکمیں ءُ برجمیں پترے ساجو بہ بیت کہ دانکہ آیوکیں وھداں دیم ءَ اتکگیں جیڑھانی دیمپانی ءَ کُت بہ کن اَنت زھنی ردوم ءِ واستا کتاب دودمان ءِ چراگ المی اِنت، کتاب دودمان ءِ تالان کنگ ءَ گل ءِ نیمگ ءَ یکشلیں جھد برجاہ اَنت کہ اے کار ءِ واستا بازیں سوبمندی بیتگ اَنت بلے انگت ءَ اے کاروان دیم ءَ جنزان اِنت – ایشی ءِ ھمراھی ءَ گل ءِ نیمگ ءَ سرجم ءَ وانگ، بلدکاری ءُ دگہ تکاں زانشی نیاد المی ءِ رنگ ءَ دارگ بیگ ءَ اَنت چُشکہ نودبرانی زھنی ردوم ءِ تہ ءَ باز گچینی کرد پیلو کرت کن اَنت –

آئی ءَ گُشتگ کہ بلوچستان ءَ اے وھد ءَ ناوشیں سیاسی، انسانی ناپھتوی ءِ دیمپان اِنت ھمے وڑ ءَ وانگی تک ھم گڈی ساہ ءَ دمینگ ءَ اَنت بازیں جاھاں وانگ ءِ واستا وانگجاہ، شھدربرجاہ نیست اَنت بازیں جاھاں آسراتی نیست اَنت ھمے وڑ ءَ مزنیں وانگجاھاں ھم نودربر بازیں جیڑھانی دیمپان اَنت سرجمیں بلوچستان ءَ وانگی ادارھانی گھتری ءِ واستا بساک ھروھد ءَ پیشگام اِنت – بلوچ دمگاں وانگی تکانی سرپدی ءِ واستا “بلوچ لٹریسی کمپین “بساک ءِ نیمگ ءَ برجاہ اَنت –

بنجاھی پتر ءِ باسک وھید اباس ءَ وتی تران ءِ تہ ءَ گُشت: پنجگور ءِ شھر ءَ گل ءِ باھینگ وشیں گپے یک ھنچیں وھدے بیتگ کہ اد ءَ سیاست ءِ سر ءَ گپ کنگ بیتگ مروچی نودربر گلی پتراں زانتی جد ءُ جھد ءِ بھر بوگ ءَ اَنت بساک ءِ ھمراھانی اے جپاکشیں جھد اَنت کہ مروچی گل بلوچ پھناتاں وتی ریشگ ءَ ایر کنگ ءَ اِنت ءُ نودربرانی سیاسی، زانتی ءُ زانشی ھیلکاری ءِ واستا سرگام اِنت – امیت اِنت کہ پنجگور ھنکین نوکیں گیچین اگدوداع زمینی جاوراں تپاس کنان کن اَنت ءُ سرجمیں پنجگور ءَ نودربر سیاست ءَ برجم دارگ ءَ وتی کرد ءَ پیلو کن اَنت –

گڈی ءَ سرگپ ءِ ھلاسی ءَ گوستگیں کابینہ ھلاس کنگ بیتگ ءُ نوکیں کابنیہ اڈ کنگ بیتگ چریشی ءَ مختار میرک بلوچ سروک، سمیر بلوچ کسان کمک سروک، زاھد بلوچ کارگشاد، عطاء اللہ کسان کمک کارگشاد ءُ عدنان بلوچ ھالرسان نامینگ بیتگ اَنت –

بلوچستان ءِ بنجاھی شھر شال، شاھرگ ءُ تمپ ءَ پاکستانی پوج ءُ نام وتگڑیں آجوئی ءِ شاتکامی اسٹالز ءِ سر ءَ بوتگیں اُرش ءِ زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ انت –

بی ایل اے ءِ جارکش جئیند بلوچ ءَ رسانکدراں وتی شنگ کرتگیں درشانانی تہ ءَ گوشتگ کہ مئے سرمچاراں مروچی یک شمبے ءَ شال ءَ پولیس ءُ وتگڑیں آجوئی ءِ شاتکامی اسٹالز ءِ سر ءَ اُرش کتگ –

آئی ءَ گوشتگ کہ مئے سرمچاراں سرینا ہوٹل ءِ ڈن ءَ پولیس ٹرک تراک ناکیں شوروانی نشانگ کرتگ، تراک ءَ دو پولیس کارمند نیاز احمد ءُ علی اکبر مُرتگ انت ءُ دوازدہ کارمند ٹپی بوتگ اَنت وھدیکہ ٹپی بوتگیں مردمانی تہ ءَ چاردہ اگست ءِ وتگڑیں آجوئی ءِ شاتکامی ھاتر ءَ اسٹالز جنوک ھم ھوار انت-

جارکش ءَ گوشتگ کہ چریشی ءَ پیش بی ایل اے ءَ باز براں پولیس ءُ لیویز مکن کرتگ کہ آ زورگیریں پاکستان ءُ آئی ءِ پوج ءِ گوشگ ءِ پد ءَ بلوچ راجی زرمبشت دیم ءَ اڑاند بوگ ءَ پھریز بہ کن انت، ءُ چاردہ اگست ءِ دابیں زورگیر ءِ پرپکنڈھاں بلوچستان ءِ تہ ءَ برجاہ دارگ پد کنز بہ بنت بلے اے لشکر ءِ تہ ءَ لھتے ھنچیں سیاھیں روباہ ھست انت کہ زورگر ءِ گوشگ ءِ پد ءَ سرمچارانی مکبری، لس بلوچانی سر ءَ بیڑ برگ ءُ آھانی آوارجنی ءُ دگہ سلکاریاں ھوار انت اے اُرش ھما ادارھانی ھاتر ءَ بیھارے اگاں راج دژمنی ءَ پد کنز نہ بوت اَنت گڑا اُرشانی تہ ءَ ترندی آرگ بیت انت –

آئی ءَ دیمتر ءَ گوشتگ کہ بی ایل اے ءِ سرمچاراں سریاب دگ ءِ سر ءَ سدا بھار ٹرمینل ءِ نزیک ءَ پاکستانی آجوئی ءِ شاتکامی ءِ ھاتر ءَ جتگیں اسٹالز ءِ سر ءَ دستی بمب اُرش ءِ کتگ کہ اُرش ءَ اسٹال جنوک مردم زدگ بوتگ اَنت –

جارکش ءَ گوشتگ کہ بی ایل اے بلوچ راج ءَ یکرندے پد ءَ مکن کنت کہ مدامی ءِ وڑ ءَ اے سال ءَ ھم آ چہ پاکستانی پوج ءِ وتگڑیں شاتکامی مراگشاں چہ گستہ بہ بنت بلوچ سرمچار کجام ھم وھد ءَ اے مراگش ءُ دژمن گوشگ ءِ پد ءَ مراگش اڈ دیوکانی سر ءَ اُرش کرت کنت – بی ایل اے بیھار ءَ پد ھم کسے مراگشاں شُت ءُ اُرشاں چہ آئی ءِ تاوان رس ایت گڑا اشی ءِ زمّہ وار آ وت انت ءُ ھچ وڑیں ھمدردی ءِ تلبداری گوشگ نہ بیت –

بی ایل اے ءِ جارکش جئیند بلوچ ءَ وتی دگہ شنگ کرتگیں درشان ءِ تہ ءَ گوشتگ کہ مئے سرمچاراں گوستگیں روچ ءَ ھرنائی ءِ دمگ شاھرگ ءَ زرد آلو ءِ ھند ءَ پاکستانی پوجی کارندہ بمب اُرش ءِ ھما وھد ءَ نشانگ کتگ اَنت کہ آ زرد آلو چیک پوسٹ ءَ گوں پَرپٹاں در اتکگ اَنت – تراک ءِ آسر ءَ دشمنیں پوج ءِ یک کارندھے ھما دمان ءَ مرتگ ءُ وھدیکہ پرپٹ ءَ سک باز تاوان رس اتگ-

جارکش ءَ دیمتر ءَ گْوشتگ کہ بی ایل اے سرمچاراں آدینگ ءِ شپ ءَ کیچ ءِ دمگ تمپ ءِ ھند تگران آباد ءَ دشمن ءِ چیک پوسٹ ءِ سر ءَ گوں گرنیڈ لانچر ءُ دگہ سلاھانی ھمراھی ءَ نشانگ کتگ – اُرش ءَ دشمنیں پوج ءَ جانی ءُ مالی تاوانانی دیمپان چست کنگ کپتگ-

جارکش ءَ دیمتر ءَ گوشتگ کہ مئے گل بلوچ لبریشن آرمی دوئیں اُرشانی زمہ واری ءَ منّ اِیت ءُ داں ڈیھ ءِ وتواجھی ءَ جُھد برجاہ بیت-

بلوچستان ءِ بُنجاھی شھر شال ءَ یک بمب تراکے ءَ کم چہ کم دو سیکورٹی کارمند بیران ءُ ھشت کارمنداں ھوار دوازدہ مردم ٹپی بیتگ-

بنداتی ھالانی تہ ءَ گوشگ بیتگ کہ اے تراک ءَ سیکورٹی لشکر نشانگ کنگ بیتگ ءُ چریشی ءَ سیکورٹی کارمنداں جانی تاوانانی دیمپانی کنگ کپتگ-

سربوتگیں ھالانی رِد ءَ بلوچستان ءِ بُنجاھی شھر ماں شال ءَ بُنجاھی شھدگ ءِ سر ءَ سرینا ھوٹل ءِ ڈن ءَ چار راہ ءِ سر ءَ یک تراکے بوتگ-

تراک نشانگ پھازوکیں کارندہ بوتگ اَنت ءُ تراک ءِ آسر ءَ پولیس ءِ دو کارندہ مرتگ ءُ ھشت کارندھاں ھوار دوازدہ مردم ٹپی بوتگ اَنت –

تراک ءِ انچش تُرند بوتگ کہ نزیکیں ماڑیانی کانچ پروشتگ اَنت ءُ شھر جکسیتگ-

تراک ءَ چہ رند پاکستانی پوج ءَ دمگ انگر ءَ کتگ ءُ گیشیں پٹ ءُ پول برجاہ ءَ اِنت –

بوتگیں تراک ءِ زمہ واری انگت ءَ ھچ وڑیں گل ءَ نہ زرتگ –

بلوچستان ءِ بنجاھی شھر شال ءَ ھوار دگہ جاھاں ھم سیکورٹی لشکر یکشل ءَ نشانگ کنگ بیگ ءَ اِنت چرے نشانگاں سیکورٹی لشکر ءَ جانی ءُ مالی تاوانانی دیمپانی کنگ کپگ اِنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ چار سد ءُ سَے روچ سرجم بیتگ – نیشنل پاٹی ءِ اکرم رمضان، گوستگیں دمگی آرگنائزر گوادر ءُ آئی ءِ ھمرھاں اتکگ ءُ پدردی درشان اِتگ –

وی بی ایم پی ءِ رھشون ماما قدیر بلوچ ءَ ھمے اتکگیں مردمانی میان ءَ گپ کنان ءَ گوشتگ کہ بلوچ راج ھرکجا ریاستی زُلم ءُ زوراکیانی آماچ اِنت ءُ ھمود ءَ ھمک روچ زانگول کرتیں جون دور دیگ بیگ ءَ اَنت ءُ بیگواھیانی تہ ءَ بے کساس گیشی آیگ ءَ اِنت بلوچستان ءِ جاور ھال کسے ءَ چیر نہ اَنت ریاستی زُلمانی دیمپانی ءَ پُر ایمنیں جھد بھادری ءَ گوں کنگ ءَ اِنت –

ماما قدیر بلوچ ءَ گُشتگ کہ بیگواھیں مردمانی کھول بازیں سالاں انساپ ءِ دروازگ ءَ ٹگ ءَ اَنت بلے اد ءَ درست گنگ ءُ کور اَنت بیگواھیں مردمانی کھول رسانکدراں وتی پریات ءَ سر کنگ ءَ اَنت بلے گوشداروک نیست اِنت ریاستی زُلم ھما وڑ ءَ بلوچانی سر ءَ برجاہ اَنت –

آئی ءَ دیمتر ءَ گُشتگ کہ راجاں مرگ امباز کرتگ ءُ وتی راجی سنچ مٹ کرتگ ءُ یک سر بلندیں راجے ءِ بستار ءَ دیم ءَ اتکگ اَنت با بد بھتیں بلوچ یک منزلے ءِ نزیک ءَ سر بیگ ءَ بہ ایں اود ءَ مارا مرگ ءَ گیش گلامی ءِ ترس ءُ آئی ءِ ھلاپ ءَ نپرت مئے گلامی ءِ توک ءَ لومپ بیت اِنت پر ایمنی ءَ مروک ءُ کشوک کسے ترس یا شک ءَ نہ بیت اِنت اشی ءَ پرچا مارا یاتگیری بیت اِنت کہ اود ءَ شما کُشگ ءُ گار کنگ بہ اِت اِنت –

نبشتانک: مئے اَہد ءِ سماجی کارکن

نبشتہ کار: سعید احمد بلوچ

دی بلوچستان پوسٹ

من نزاناں مروچیگیں مئے مردم وت ءَ پہ نام کنگ ءِ واستا چونیں چونیں ہنر ساز اَنت گُش اَنت کہ کیچ ءَ یک پینٹر ءِ بوتگ آئی ءَ وتی ہرچ نِبشتہ کُتگیں چیزانی سر ءَ وتی نام نِبشتہ کُتگ گُڑا شہید فدا یک روچے همے پینٹر ءِ کر ءَ شُتگ ءُ جُست ءِ گپتگ کہ تو وتی نام ءَ وتی اڈ کُتگیں یا نِبشتہ کُتگیں چیزانی سر ءَ پرچی نِبشتہ کنے گڑا آئی ءَ دراھینتگ کہ من ءَ مردم پجا بیار اَنت شہید ءَ گُشتگ کہ تو وت انچو شوک جوڑ بکن کہ مردم ترا وت دربگیج اَنت گُشگ ءِ مول ءُ مراد همیش اِنت اَنچیں کار بکن مردم تئی وت شوهاز ءَ در بہ کپ اَنت-

اَنچو من یک روچ باز دیر اِنت من ءَ ماه ءُ سال یاد نہ بنت وش نیوز ءِ یک مراگش ءِ قدیر لقمان تران کنگ ءَ اَت قدیر لقمان انوگیں سوشل ویلفئر ءِ ڈاریکٹر اِنت آ گُشگ ءَ اَت کہ یک مردے است اِنت گوادر ئیگ اِنت ءُ باز وهد اِنت کہ معذوریں گوانڈوانی وانگ ءِ توامیں هرچ ءُ درچ ئے وتی کوپگاں زُرتگاں ءُ تنی وہدی من نزانی مردم کئے اِنت ءُ انوں لہتیں وهد اِنت هال اهوال نیست هُدا بزانت مالی هالت ءَ نزور بیت ءِ دئیگہ سبب ئے کار بکن بلے پہ نام مکن-

مروچی ما ہرچی پہ نام کنیں مرچی ما پریس کانفریس کنیں کہ ما چُش کُتگ آ کُتگ ءُ ما دیما چو کنیں بِل اِت یار اے بزگیں کوم ءَ گیشتر بزگ مکن اِت چیزے کنگی اِنت بکن اِت بلے سوشل میڈیا ءُ میڈیا ءِ توکا مکن اِت میدان(گراؤنڈ) بکن اِت-

من داد دیاں هما مرداں کہ آیانی ذاتی کُتگیں کار یک اداره ئے ک‍ُتگیں کاراں هم دیم ءَ تِر انت بلے من تنی وہدی آیانی یک اَکس ئے هم نہ گنداں نزاناں اے چتوریں سسٹمے ما بندات کُتگ هور ءَ مردمے ءِ لوگ آپ ءَ کمُک ءِ کنگ ءِ بدل همیش اِنت چار اَکس بہ کش سوشل میڈیا ءَ بدے آ بزگ ءَ گیشتر ازیت بکن –

مروچی مئے سماجی کارکن ءَ کُمکی ساز ءُ سامان ءِ گیشتر کیمتی کیمره ءُ موبائل گون پہ اَکس ئے کشگ ءَ تنی وہدی شوکیں مراگش کیچ ءَ منی چمّاں نہ گوستگ کہ آ علمی بنیاد ءَ بہ بیت تنھا کیچ لیٹریری فیسٹول کہ آ ناں یک اداره ءَ چیردستی ءَ بوت ءُ ناں کہ انوگیں فاونڈیشن ءُ سوسائٹی آیانی آ کیچ ءِ نودربرانی وتی جُھدانی مُز اَت کہ شریں وڑے ءَ سوبمند بوت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی اوگانستان ءِ بُنجاھی شھراں چہ تالبان ءِ دستگیری ءَ رکینگ ءِ ھاتر ءَ زی امریکہ ءِ سروک جو بائیڈان ءَ ھم امریکی لشکر ءَ پرمان داتگ کہ تالبان جنگی کاروان، سنگر ءُ بُنجاھانی سر ءَ زیت جنگی بالیکُراب B-52 ءُ دِگہ جنگی مِیزائیلانی تْرُندیں اُرش کنگ بہ بنت۔ بائیڈن ءِ ھمے جنگی پرمان ءَ پد امریکی B-52 جنگی بالیگُراباں گوریچی ولایت جوزجان ءِ شبرگان بُنجاھی شھر ءَ تالبان ءِ کاروان ءَ اُرش کنان ءَ 200 تالبان کُشتگ اَنت، ھمے اُرشاں پد اوگان لشکر ویل ءِ جاہ سربوتگ زدگیں تالبان دزگِیر کُتگ اَنت۔

دگہ یک ھالے ءِ رد ءَ دومی نیمگ ءَ ھِلمند ولایت لشکرگاہ ءَ ھم امریکی B-52 جنگی بالیگُراب ءُ میزائیلانی اُرش برجاہ اَنت چریشی ءَ اوگان تالبان ءَ جنگانی دیمپانی اِنت –

زانگ بہ بیت کہ اوگانستان ءِ تہ ءَ تالبان راجمستری سرکار ءِ ھلاسی ءُ وتی زورانسری ئیں نیکراھی اسلامی شرھیت ءِ رھبندانی اڈ کنگ ءَ اوگانستان ولایتانی بُنجاھی شھر ءُ دمگاں دزگِیر کنان اِنت۔ دومی نیمگ ءَ اوگانستان ءِ راجی لشکر، راجی آشوبی گل ءُ آزات ھیالیں راجدوستیں پاٹی تالبان ءِ زورانسری ءِ بگیری ءَ گھگری کنگ ءَ انت۔

اوگان لشکر ءَ وتی شنگ کرتگیں ھالانی تہ ءَ اوگانستان ءَ بیست ءُ چار ادارانی تہ ءَ 572 تالبان جنگول کُشگ ءُ 309 ٹپی کنگ ءِ ھال شنگ کرتگ اَنت –

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 572 تالبان جنگول کُشتگ ءُ دِگہ 309 ٹپی کرتگ اَنت۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرھار، لولمان، گزنی، پکتیا، کندھار، اُرزگان، ھِرات، پراہ، جوزجان، سرئے پُل، ھِلمند، نِمروز، ٹکھر، کُندوز، بدکشان ءُ کاپیسا ءِ ھند ءُ دمگاں کرتگ اَنت۔

راجی پھزگ ءَ وتی یکشلیں ٹیوٹر پیگاماں گیشترّیں سرپدی دیان ءَ گْوشت کہ ولایت ھِلمند ءِ بُنجاھی شھر لشکرگاہ ءِ نزیکیں کُوچّگاں اوگان راجی لشکر ءِ بالیگراباں جنگی اُرش کنان ءَ 54 ناشرکاریں تالبان ءِ جنگول کُشتگ ءُ دِگہ 23 زدگ کُتگ اَنت، اے اُرشاں تالبان ءِ بازیں سِلاہ ءُ جنگی ساز ءُ سامان ھم تباہ کنگ بوتگ اَنت۔ گیشتریں سرپدی یے دیان ءَ گْوشت ئِے کہ لشکرگاہ شھر ءِ تہ ءَ تالبان گل ءِ مستریں جنگی سروگان مولوی ھِجرت ھم اوگان راجی لشکر ءِ جنگی بالیگُرابانی اُرش ءَ کُشگ بیتگ۔
ولایت کندھار ءِ ڈند ءُ زری دمگ ءِ نزیکیں ھند ءُ دمگاں ھم اوگان راجی لشکر ءَ گوں بالیگُراباں جنگی آپریشن کنان ءَ 47 تالبان جنگول کُشتگ ءُ دِگہ 26 زدگ ھم کُتگ اَنت۔ ھمے آپریشن ءَ دژمن ءِ 6 پرپٹ ءُ دِگہ سِلاہ ءِ کوت ھم تباہ کنگ بیتگ اَنت۔

ھرات شھر ءِ نزیکیں دمگاں گوں اوگان راجی لشکر ءِ بالیگرابانی بمب گْواری، آشوبی سِلاھبند ءُ راجدوستییں گلانی کُمک ءَ راجی لشکر ءِ جنگی اُرشاں 17 ناشرکاریں تالبان کُشگ ءُ دِگہ 19 زدگ بیتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔

کندھار ولایت ءِ دمگ ڈند ءُ نزیکیں کوچّگاں اوگان راجی لشکر ءِ جنگی بالیگُراباں ارش تالبان ءِ 26 جنگول کُشتگ ءُ دِگہ 6 زدگ کِتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔

ھمے وڑ ءَ ولایت ٹکھر ءَ اوگان راجی لشکر ءَ گوں جنگی بالیگرابانی کُمک ءَ آپریشن کنان ناشرکاریں تالبان ءِ ولایت کندوز ءِ نام داتگیں گورنر مولوی شاہ مھمود گوں دِگہ 12 جنگول ءَ کُشتگ اَنت۔ ماں ٹکھر ولایت ءِ دِگہ دمگے ءَ رستک دمگ ءِ گورنر اِجازلھک ھم گوں 8 جنگول ءَ کُشگ بیتگ اَنت۔

ھمے پیم ءَ ولایت نگرھار ءِ دمگ شرزاد ءَ ھم اوگان راجی لشکر ءِ بالی گُرابانی اُرش ءَ 33 ناشرکاریں تالبان کُشگ ءُ 30 ٹپی بوگ ءَ ھوار راجی لشکر ءَ راہ ءُ دگانی سر ءَ ناشرکاریں تالبان ءِ 15 چیریں بمب ءُ شور ھم پدرا ءُ ناکار کُتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 385 تالبان جنگول کُشگ ءُ 210 ٹپی بیتگ اِت اَنت۔ اوگان راجی لشکر ءَ ھمے جنگی اُرش نگرھار، لوگر، گزنی، پکتیا، میدان، واردک، کندھار، ھِرات، پراہ، جوزجان، سمنگان، ھِلمند، ٹکھر، بلگان ءُ کاپیسا ءِ ھند ءُ دمگاں کرتگ اَت اَنت۔

پنجگور ءَ دو جتاجتائیں جاھاں پاکستانی پوج ءَ ڈیتھ اسکواڈ ءِ دست ءَ سے مردم آوار جنگ ءَ پد بیگواہ کنگ بوتگ اَنت-

سربوتگیں ھالانی رِد ءَ پاکستانی پوج ءَ پنجگور ءِ دمگ کیلکور سری گڈگی ءَ یک لوگے ءِ سر ءَ بیڑبرتگ ءُ دو مردم آوار جتگ-

پاکستانی پوج دست ءَ آوار جنگ بوتگیں مردمانی پجّار نواز ء عیسیٰ ءُ اللہ بخش ء سخی داد ناماں چہ زانگ بوتگ اَنت ءُ پوج ءَ اللہ بخش پد ءَ یل کتگ ءُ وھدیکہ نواز انگت بیگواہ ءَ اِنت-

دمگی مردمانی رِد ءَ پاکستانی پوج ءَ لشکر کشی ءِ وھد ءَ لوگانی تہ ءَ ساڑی ئیں زھگ ءُ زالبولانی سر ءَ زوراکی کتگ آ لَٹ ءُ کُٹانی نشانگ کتگ اَنت ءُ پوج دست ءَ آوار جنگ بوتگیں ورنا نواز عطاشاد ڈگری کالج تربت ءِ یک نودربرے –

دومی نیمگ ءَ گوستگیں روچ ءَ پنجگور ءِ دمگ وشبود ءَ پاکستانی پوج ءِ چیردستی ءَ جوڑ بوتگیں ٹولی ڈیتھ اسکواڈ ءِ کارندھاں یک مردمے آوار جتگ ءُ گوں وت برتگ آوار جنگ بوتگیں مردم ءِ پجّار فیض ء وحید نام ءَ چہ زانگ بوتگ-