TBP Balochi

یونائیٹڈ بلوچ آرمی ءِ نیمگ ءَ چہ شنگ کتگیں درشان ءِ تہ ءَ گوشتگ کہ سپرےکماندار سرفراز بنلگزئی ءَ پاکستان ءِ گوم ءَ گپ ءِ درگت ءَ چہ آجوئی لوٹوکیں راھشون گلزام امام بلوچ ءِ گپ ءِ پلامرزی کرتگ –

درشان ءِ تہ ءَ گْوشتگ ئِے کہ گپ تھنا چہ بلوچستان ءَ پوج ءِ درایگ ، بیگواھیں بلوچانی یل کنگ ءُ بلوچ آجوئی ڈیھ ءِ سر کنگ بیت ھزاراں پُسگانی کربانیاں پد ریاست چہ صوبائی وتواجھی یا دگہ یک بُنگپے سر ءَ گپ کنگ ءُ یا سلاہ کنگ گناہ سرپد بہ ئے ایں-

زانگ بہ بیت اشی ءَ چہ پیش بلوچ ریپبلکن آرمی ءِ سروک گلزام امام ءَ پاکستان گوں سلاہ کنگ ءِ درگت ءَ گوشتگ کہ بلوچ جُھدکار راجی آجوئی یک جوانیں فلسفے ءِ نکش ءُ کدمانی سر ءَ اَنت ، سلاہ زورگر ءَ چہ تھنا پوج ءِ دراھگ ءِ سر ءَ بوت کنت-

آئی ءَ دیمتر ءَ گوشتگ کہ ما سیاسی مردم ایں سلاہ نند ءُ نیاد ءَ ھچبر مہ کن نہ کن ایں بلے سلاہ زورگر ءَ چہ تھنا پوج ءِ درایگ ءُ راجی آجوئی ءِ بنگپ سر ءَ کنگ بیت-

اے درشان گوستگیں روچاں بلوچستان ءِ نوکیں سر وزیر قدوس بزنجو ءِ بلوچ جُھدکاراں چہ سلاہ کنگ ءَ پد دیم ءَ اَتکگ اَنت – اشی ءَ چہ پیش ھم سر وزیر پاکستان ءَ بلوچ جُھدکاراں چہ سلاہ کنگ ءِ ھیال ءَ اَنت بلے اے درگت ءَ دگہ گپ دیم ءَ نیتکگ-

علی حیدر ءِ چیردستی ءَ کارکنوکیں کارمند ھارون کُشتگ ءُ آئی ءِ ھمراہ زدگ کتگ – میجر گوھرام

سربوتگیں ھالانی رِد ءَ مروچی سھب ءَ مشکے ءِ دمگ گجر بازار ءَ ناشناسیں سلاہ بندیں مردماں تیرگواری کتگ ءُ یک مردمے کُشتگ ءُ یکے زدگ کُتگ –

ھالانی رِد ءَ سلاہ بندیں مردماں گجر بازار ءَ ھوٹل ءَ تہ ءَ ھارون نامیں مردمے تیرباران کتگ ءُ کُشتگ آئی ءِ ھمراہ زدگ کتگ – ھارون ءِ سر ءَ بوتگیں اُرش ءِ زمّہ واری بلوچ آجوئی لوٹوکیں سلاہ بندیں گل بی ایل ایپ ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں مروچی سھب ءِ سر ءَ مشکے دمگ گجر بازار ءَ ھوٹل ءِ تہ ءَ کُشندہ ٹولی ءِ مستر علی حیدر محمد حسنی ءِ چیر دستی کارکنوکیں کارمند ھارون ء شکل تیرباران کتگ ءُ کشتگ آئی ءِ ھمراہ زدگ کتگ –

جارکش ءَ گوشتگ کہ ھارون جھاؤ، گریشہ ءُ راگہ ءَ سرمچارانی مکبری، پوجی لشکر کشی ءُ گسانی سوچگ ءَ پاکستانی پوج ءِ ھمراہ بوتگ – آ دُزی ءُ ڈنگی بلوچ ءِ ھیرواھانی گِساں زوراکی ءَ ھوار بازیں سلکاریاں ھم ھوار بوتگ –

جارکش گوھرام بلوچ ءَ گوشتگ کہ اے وڑیں مردم کہ بلوچستان ءِ آجوئی ءِ بگیری ءَ زورگیریں ریاست ءِ ھمراہ داری ءَ کن انت ھچ وڑ ءَ بکشگ نہ بنت –

ناکو نبی بخش ءَ گوں توانمردی ءَ راجی زرمبشت ءِ تہ ءَ وتی کرد پیلو کرتگ – جئیند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ گوستگیں روچاں ھشت نومبر ءَ زورگیریں دژمن ءِ اُرش ءَ بلوچ لبریشن آرمی ءِ سرمچار ناکو نبی بخش شھید بوتگ – آ سپر ءِ میان ءَ تمپ ءُ تگران ءِ دمگ ابدوئی ءِ نزیک ءَ پاکستان ءِ چیریں ادارہ، آئی ایس آئی ءِ کارمنداں تیر باران کتگ ءُ شھید کتگ –

جارکش ءَ گوشتگ کہ نبی بخش پنام ء ناکو ء رحمت تمپ ءِ دمگ کوھاڈ ءِ نندوک بوتگ ءُ آ سال دوھزار چاردہ ءَ بی ایل اے ءَ گوں ھمگرنچ بوتگ، اے میان ءَ ناکو نبی بخش ءَ توانمردی ءَ راجی زرمبشت ءِ ھاتر ءَ وتی کرد پیلو کرتگ – ناکو نبی بخش ناکہ تھنا وت بلوچ راجی زرمبشت ءَ شپ روچ یک کتگ انت بلکیں آئی ءِ سرجمیں کھول پہ کربانی دئیگ ءَ چک ءُ پد نہ بوتگ –

جارکش جئیند بلوچ ءَ گوشتگ کہ اشی ءَ پیش ھم ناکو نبی بخش ءِ گِس ءِ سر ءَ پاکستانی پوج ءَ بیڑ برتگ آئی ءِ گِس سوچگ بوتگ انت بلے آ وتی کھول ءَ ھوار بلوچستان ءِ آجوئی ءِ لوٹ ءَ پدکنز نہ بوتگ –

جئیند بلوچ ءَ گوشتگ کہ بلوچ لبریشن آرمی کول کنت کہ شھید ناکو نبی بخش ءَ گل ءُ راج ءُ راجدپتر ھچبر بے ھیال کت نہ کنت ءُ بی ایل اے آئی ءِ مشن ءَ گڈسر ءَ سر کنت ءُ ساہ کش ایت –

پوجی مولانی ھاتر ءَ جوڑ بؤکیں دگ ءِ سر ءَ کار کنوکیں ڈمپر تراک ءَ تباہ کتگ، ڈرئیور زدگ بوتگ – دوستین بلوچ

بلوچ آجوئی لوٹوکیں سلاہ بندیں گل بلوچ ریپبلکن گارڈ ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں بلوچستان ءِ دمگ ڈیرہ مراد جمالی ءِ نزیک ءَ بائی پاس ءَ ایف ڈبلیو او ءِ گاڑی تراک ناکیں شورواں گوں ھما وھد ءَ نشانگ کتگ کہ آ پوجی مولانی ھاتر ءَ دگ ءِ جوڑ کنگ ءَ بوتگ انت –

آئی ءَ گوشتگ کہ اُرش ءِ آسر ءَ ایف ڈبلیو او ءِ ڈیمپر گاڑی تباہ بوتگ ءُ آئی ڈرائیور زدگ بوتگ –

جارکش ءَ گوشتگ کہ ما اے گپ ءَ پدّر کنگ لوٹیں کہ پوجی مول مرادانی ھاتر ءَ جوڈ بؤکیں پروجکٹس آنی سر ءَ مئے اُرش برجاہ مان انت –

دوستین بلوچ ءَ دیمتر ءَ گوشتگ کہ مئے سرمچاراں سبی ءَ پولیس گراؤنڈ سر ءَ پولیس ءِ گاڑی ءِ تراکناکیں شوروانی نشانگ جوڑ کتگ چریشی ءَ پولیس ءَ جانی ءُ مالی تاوان ءِ دیمپانی بوتگ –

آئی ءَ گوشتگ کہ بلوچستان ءَ بازیں دھکاں لشکر کشی برجاہ انت نوں پولیس ھم پوج ءِ تچکی ءَ ھمراہ داری ءَ کنگ ءَ انت – ما چہ لس مھلوک ءَ لوٹ کنیں کہ پولیس ءُ ملٹی نیشنل کمپنیاں چہ دور بہ بنت – اے وڈیں مردماں ما کجام ھم وھد ءَ نشانگ جوڑ کرت کنیں –

گڈسر ءَ جارکش ءَ وتی درشان ءِ تہ ءَ گوشتگ کہ بلوچستان ءِ آجوئی تاں مئے سلاہ بندیں جھد برجاہ مان ایت –

بلوچستان ءِ دمگ آواران ءَ سلاہ بندیں مردماں سرکاری پلامرزی ءَ جوڑ بیتگیں ٹولی ءِ سر ءَ اُرش کرتگ، یک مردمے بیران ءُ دو زدگ بیتگ اَنت –

گیشیں ھالانی رد ءَ آواران ءِ دمگ مشکے گجر بازار ءَ سلاہ بندیِں مردمانی سر ءَ اُرش ءَ ھارون ء شکل بیراب ءُ دو زدگ بیتگ اَنت –

دمگی مردمانی رد ءَ اے مردمانی سیادی سرکاری پلامرزی ءَ جوڑ بیتگیں ٹولی ڈیتھ اسکواڈ ءَ اِنت –

بلوچ آجوئی پھناتانی گوشگ اِنت کہ پاکستانی پوج ءُ چیریں ادارھاں بازیں کچے ءَ مردم سلاہ بند کرتگ اَنت آیانی نام گیشتر ڈیتھ اسکواڈ ءِ نام ءَ زانگ بیت اِنت-

بلوچ راجداری تکاں ھمے گوشگ بیت اِنت کہ اے ٹولی پاکستانی پوج ءَ بلوچ زرمبشت ءِ ھلاس کنگ ءَ جوڑ کرتگ ءُ پوج ءَ سرجمی ءَ آئی ءَ را مھار گٹ ءَ داتگ اَنت کُشت ءُ کوش ءُ چاگردی سلکاریاں ھوار اَنت –

بلوچستان ءِ دمگ ڈیرہ مراد جمالی ءَ بند ءُ ساچی شرکت ءُ سبی ءَ پولیس ءِ گراؤنڈ ءَ بمب تراک –

گیشیں ھالانی رد ءَ ڈیرہ مراد جمالی ءَ ناشناسیں مردماں پاکستانی پوج ءِ بند ءُ ساچی شرکت ایف ڈبلیو او ءِ گاڑی بارودی تراکاں گوں نشانگ کرتگ ءُ تاوان بار اش کرتگ –

دمگی مردمانی رد ءَ بمب تراک ءَ گاڑی ءَ کمے تاوان بیتگ بلے بیرانیانی ھال نہ بیتگ اَنت –

گوست ءَ بلوچستان ءَ اے وڑیں اُرشانی زمہ واری بلوچ آجوئی دوستیں گلاں منّ اِتگ اَنت بلے تنی وھدی اے اُرش ءِ زمہ واری کس ءَ نہ زرتگ –

بیست ءُ سَے اکتوبر ءَ بلوچ ریپبلکن گارڈ ءَ نصیر آباد ءِ دمگ ٹیپل شاخ ءِ ھند ءَ ایف ڈبلیو او ءِ کارمند دزبمبے ءِ نشانگ کتگ اِت اَنت –

ھمے وڑ ءَ سبی ءَ دگہ یک تراکے بیتگ بلے دگہ جانی تاوانانی ھال سر نہ بیتگ اَنت –

پولیس ءِ رد ءَ تراک سبی ءَ پولیس گڑاؤنڈ ءَ کنگ بیتگ، تراک ءِ ھال ءِ سر بیگ ءَ پھزدار تراک جاہ ءَ سر بیتگ اَنت ءُ دمگ انگیر ءَ کرتگ اش –

بلوچستان ءِ بنجاھی شھر شال ءَ گوستگیں روچ ءَ چہ بندات بیتگیں زھرشانی مروچی دومی روچ ءَ ھم برجاہ اِنت ءُ شھدربرجاہ ھم بند کنگ بیتگ ءُ شھدربرجاہ ءَ دراھیں پرکاری نودربراں ماٹو کتگ اَنت –

گوستگیں روچاں بلوچستان ءِ بنجاھی شھر شال ءَ بلوچستان یونیورسٹی ءِ ھاسٹل ءَ بیگواھیں بیتگیں سھیل بلوچ صفیح بلوچ ءِ بیگواھی ءِ ھلاپ ءَ نودربراں مروچی دومی روچ ءَ ھم بلوچستان یونیورسٹی ءِ دیم ءَ زھرشانی نندانک برجاہ داشتگ –

گوستگیں روچ ءَ بندات بیتگیں زھرشانی ءَ دوشیگیں شپ ماں یونیورسٹی ءِ گیٹ ءِ دیم ءَ یکبستگیں سارتی ءَ گوں گوازینتگ ءُ مروچی ھم آیانی زھرشانی برجاہ اِنت –

نودربرانی گوشگ اِنت کہ ھما وھد ءَ مئے زھرشانی برجاہ بیت اِنت دانکہ آوار جنگ بیتگیں سھیل بلوچ ءُ صفیح بلوچ یل کنگ نہ بنت –

آیانی گوشگ اِنت کہ سرکار ءُ انتزامیہ ءِ بدیں پندل انگت ءَ نودربرانی یلو کنگ ءَ ھچ گامگیج زورگ ءَ نہ اَنت ءُ ھاسٹل ءِ تہ ءَ دو نودربر گار اَنت ءُ انتزمیہ ءُ سیکورٹی انگت ءَ اشی ءِ منّگ ءَ تیار نہ اَنت کہ اے نودربر کجا شتگ اَنت –

نودربرانی گوشگ اِنت کہ ھمے وھد ءَ اے نودربر گار کنگ بیتگ اَنت ھمے وھد ءَ کیمرہ بند کنگ بیتگ کہ اشی ءَ تچک ءَ زانگ بیت اِنت یونیورسٹی ءِ چانسلر نودربرانی آوار جنگ ءَ ھوار اِنت –

بلوچستان نودربرانی نیمگ ءَ نودربرانی آوار جنی ایر جنگ ءُ آیانی یل کنگ ءِ لوٹ بیگ ءَ اِنت بلے تنی وھدی سرکار ءُ انتزامیہ ءِ ھاسیں گامگیج گندگ ءَ آیگ ءَ نہ اَنت –

بلوچستان ءِ باپاری شھر ھب چوکی ءَ دگہ یک یک مردمے دزگی کنگ ءَ پد بیگواہ کنگ بیتگ –

گوستگیں لھتے روچانی تہ ءَ سرجمیں بلوچستان ءَ یک رندے پد ءَ مردمانی دزگیر کنگ ءُ پھمیانیں جاھاں برگ گیشی گندگ ءَ آیگ ءَ اِنت-

ھالانی رد ءَ پاکستانی پوج ءَ جاؤ ءِ جھمنندے چہ ھب چوکی ءَ دزگیر کرتگ ءُ برتگ، آوار جنگ بیتگیں مردم ءِ پجار میا داد ے رسول بکش ءِ نام ءَ زانگ بیتگ –

دمگی مردمانی رد ءَ اے مرد ءَ پوست ءِ نادراھی ھم بیتگ کہ جاندراھی ءِ واستا ھب چوکی ءَ شتگ بیتگ –

دمگی مردمانی رد ءَ اے مرد پنچ نومبر دوھزار ءُ بیست ءُ یک ءِ شپ ءِ ساھت دوازدہ ءِ نزیک ءَ پاکستانی چیریں ادارہ ءُ پوجی کارمنداں آئی ءِ لوگ ءَ چہ آوار جتگ ءُ برتگ –

بلوچستان شاھدربرجاہ ءِ دو نودربرانی زورانسری آوار جنی ءِ بگیری ءَ نودربر ءُ نودربر گلاں مروچی شاھدربرجاہ ءِ گیٹ دپ ءَ زھرشانی کتگ ءُ گیٹ کُبل ءِ جتگ –

مروچی نودربرانی مزنیں کچے ءَ شاھدربر جاہ ءِ گیٹ دپ ءَ زھرشانی کتگ ءُ شاھدربر جاہ ءَ وانگی سرگرمی ماٹو کتگ انت ءُ لوٹانی سرجمی ءَ نودربرانی زھرشانی برجاہ دارگ ءِ جار جتگ – زھرشانی ءَ پریس کانپرنس کنان ءَ نودربراں وتی لوٹ دیم ءَ آؤرتگ انت –

زھرشانی کنوکانی رِد ءَ بلوچستان شاھدربر جاہ ءَ یک ھپتگے بیت کہ جیڑہ بوگ انت، شاھدربر جاہ ءَ دو سنگتیں نودربرانی زورانسری آوار جنی ھال پھازدارنی گور ءَ سر کتگ بلے پھازدار اے درگت ءَ ھچ وڑیں گامگیج زورگ ءَ نہ انت –

زھرشانی کنوکانی رِد ءَ شاھدربر جاہ ءِ پھازدار مار ءَ پسو دیگ ءَ نہ انت چریشی ءَ نودربر لاچار بوتگ انت وتی درسیں سرگرمی ماٹو کتگ تانکہ لوٹ پورہ کنگ نہ بنت شاھدربرجاہ بند بیت اِنت –

زھرشانی کنوکانی رِد ءَ شاھدربر جاہ پھازدار زھرشانی کنوکیں نودربراں بیھار دیگ انت بلے تاں ھما وھد ءَ مئے آوار جنگ بوتگیں نودربریں سنگت دیم ءَ آرگ نہ بنت زھرشانی برجاہ بیت اِنت –

نودربرانی رِد ءَ پھازدار اے جیڑہ چیر دیگ ءِ جھد انت ءُ گوشگ بوتگ کہ نودربرانی آوار جنی ءِ وھد ءَ شاھدربرجاہ ءِ کیمرہ بند بوتگ انت –

زھرشانی کنوکاں لوٹ کہ سھیل بلوچ ءُ فصیح بلوچ ءِ آوار جنی ءِ ارزی بلوچستان شاھدربر جاہ ءِ وائس چانسلر ءِ نام ءَ نبشتہ کنگ بہ بیت اِنت –

بلوچ شھیدانی کربانی ءُ واب باندات ءِ راستی انت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ چار ھزار چار سد ءُ نود روچ سرجم بوتگ، بلوچ یکجھتی کمیٹی ءِ ماھرنگ بلوچ ءُ چہ ھزدار ءَ سیاسی ءُ چاگردی باسکاں بنجل ءِ تر ءُ تاب کتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ شھیداں ھما راستی ءِ ھاتر ءَ کہ کربانی داتگ پہ بلوچ ءَ مار ءَ آھانی پیش داشتگیں راھے سر ءَ امل کنگی انت ءُ رؤگی انت بلوچ شھیدانی کربانی ءُ واب باندات ءِ راستی انت –

ماما قدیر بلوچ ءِ گوشگ ات کہ بلوچ جھد ءَ زندگ دارگ ءِ ھاتر ءَ بلوچ پرزنداں بازیں کربانی ءِ داتگ مروچی ھمے کربانیانی بدولت ءَ بلوچ وتی پُرایمنیں جھد ءَ مھکمی ءُ توانمردی ءَ دیم ءَ برگ انت اے ھمے شھیدانی داتگیں کربانیانی بدولت انت کہ مروچی بلوچ ءِ جھد اے جاہ ءَ سر بوتگ کہ مروچی ھر بلوچ ءِ وتی سر ءَ بوتگیں زوراکیانی بگیری ءَ جھد کنگ ءَ انت – شھیدانی کربانیاں وتی آؤکیں پدریچ ءِ ھاتر ءَ وتی ھونانی چراگ روک کتگ –

آئی ءِ گوشگ ات کہ مروچی بلوچ سرڈگار ءِ سر ءَ ھر مات ءَ وتی زھگ کربان کتگ انت ھما راجی کمٹمنٹ ھر بلوچ ءِ تہ ءَ ھست انت گڑا ھمے شھیدانی داتگیں ھونانی بدولت انت ءُ ھمے وڑ اے شھیدانی مشن برجاہ بیت –

ماما قدیر بلوچ ءَ گوشتگ کہ مروچی مئے سر ءَ ڈن ءَ چہ یک تاکتے زورگر انت اشی ءِ بگیری ءَ مار ءَ جھد کنگی انت وتی آؤکیں پدریچ ءِ ھاتر ءَ رژنائیں باندات ءِ گچین کنگی انت ءُ وتی سر ءِ راجی پرز گوں مکلسی ءَ پیلو کنگی انت –