TBP Balochi

نبشتانک: بھتام جنیں باسک

نبشتہ کار: برز کوھی

رجانک: مھروزھمل

دی بلوچستان پوسٹ

راجکاری بہ بیت یا لبزانک، مزھب، جنگ، زرمبشت یا ھر وڑیں گل، ھر یکجاھی ءُ ھر یکجاھیں سُرپرانی تک ءَ نگد ءُ جست ءِ دلبڈی بیت اِنت ءُ گپ باوست بنت اِنت ءُ بوگ ھم لوٹ ایت اگاں ناں چیر بستگی ءِ سر ءَ تَوک بیت ءُ ناوشی پیداک کنت –

راجدپتر ءِ تہ ءَ نگدکاری ءِ سر ءَ مدامی شرکشیں مھلوک ءِ دست جنی بوتگ بلے وھد ءِ ھمراھی ءَ نگد بیت کنت سرکشی ءَ چہ در اتکگ ءُ لس مھلوک ءِ دستاں کپتگ – مروچی ھر یکے ٹوئیٹر یا دگہ چاگردی ترامجاھاں سدانی کچ ءَ بھر زُرت کن اَنت، ھمے ھاتر ءَ مروچی نگد ءَ راجکاری ءِ تہ ءَ مھکمی ءَ گوں گام ڈکّ داتگ اَنت – نگد ھاسکر راجکاری ءِ تہ ءَ شرّ ءُ ھراب ھردوکانی دامن ءَ گون بیت اِنت کہ آ یکے دومی ءِ بگیری ءَ شاھیم کنگ لوٹ ایت – مزنیں کساسے ءَ نگد بدگمانی ءُ دروگیں ھالانی شنگ بوگ ءِ سبب جوڑ بوت کنت – بلے نشان ءِ جوڑ کنگ، زانتکاری ءَ گوں نگد کنگ تاکت ءَ کنٹرول ءَ دارگ مئے چاگرد ءَ شرتر جوڑ کنگ ءِ کار ءَ کنت، ھمے ھاتر ءَ نگد ھر وڑیں راجکاری گام ءِ گچینی بھرے –

راستی ءَ جمھوریت یا راجکاری ءِ تاکت ءِ ٹپاسگ ءِ زور ءَ سبب ءَ نگد جمھوریت ءِ اُنڈال گوشگ بیت اِنت – راجکاری ءُ نگد ءِ مدامی یکے دومی ءَ نزیکی بوتگ، جوانی ءَ گوں راجکاری کنگ بید اشی ءَ نہ بیت بلے پد ءَ ھم ھما چیز کہ یک مھکمیں راجکاری ءِ بن ھشت بیت اِنت آئی ءَ ھم ترس بوت کنت – کہ آئی ءَ چاگردی ترامجاھاں مزنیں کساسے ءَ بے نپیں نگد ءُ بھتام جنی ءِ دروشم ءَ گندگ بنت – نگد کجام ھم کار ءَ کنگ بہ بیت آئی ءَ ھما ٹِک ءِ سر ءَ دارگ ءُ جوان کنگ الّمی انت تاکہ ایش ستکی جوڑ کنگ بہ بیت کہ جوڑیشت ، سرپدی ءِ زانشت بہ بیت –

اے نوکتریں دور ءِ تہ ءَ نگد کجام وڑ ءَ جوان ستک کنگ بیت اشی ءِ یک درور ءِ دوھزار ءُ سیزدہ واشنگٹن پوسٹ ءَ شنگ بوتگ کہ آ نگد امریکی راجی سلامتی ایجنسی ءِ امریکی شھریانی سر ءَ مزنیں کچے ءَ نگھپانی ءِ سر ءَ انت – اے امریکی پالیسی ءِ بگیری ءَ واشنگٹن پوسٹ یک نگدکاری مھم چلائینتگ کہ شھریانی سر ءَ نگھپانی زوراکی ءِ امل ءُ شھری آزاتی ءِ بگیری دارگ انت – اے جیڑہ ءِ سر ءَ واشنگٹن پوسٹ ءِ نگد ءَ جوانیں بدلی ءِ آؤرت ءُ سرکار ءِ تاکت مھکم داشت ءُ امریکی جمھوریت ءِ مھکم کنگ ءَ ھم کمک کرت –

لبزانک ءِ پڑ ءَ چہ چست بؤوکیں نگد، لبزانک ءَ چہ راجکاری ءِ پڑ ءَ اتک ءُ پد ءَ راجداریں مردماں اے وتیگی کرت بلے نیم بُندگیں راجکاریں مردماں اے نہ پھم اِیت کہ نگد وت یک زانت، ازم، پولکاری ءُ ساچشت ءِ ھمراھی ءَ یک بدلی آروکیں پروگرامے، پالیسی ءُ کارشونی ءِ نام انت بزاں نگد” برائے تعمیر ” ھر جاہ ءَ رھبنداں گوں بندوک بیت – نگد ءُ جست کنگ ءُ ٹک چینی، گلہ ءُ زاری ءُ بھتام جنی ءِ تہ ءَ بلاھیں دیگری ءِ ھست جست کنگ ءُ جست ءِ دیم ءَ آرگ ساچشت، پولکاری ءُ دربرگ ءِ ھاتر اِنت، بلے ٹِکچینی، گلہ ءُ زاری، بھتام بندگ دگہ پساتانی تالان کنگ ءِ ھاتر ءَ بنت –

یونانی کولے کہ بگیر زانت ءُ دلیل ءَ نگد کنگ ءُ آئی ءَ شرّیں آسر ءِ اُمیت دارگ ھنچوش انت وتی سنگت ءِ پیشانیگ ءِ سر ءَ نشتگیں مکسک ءِ بال دیگ ءِ ھاتر ءَ زھم ءَ چہ آئی سر ءِ بُرگ –
شما دنیا ءِ ھر وڑیں زرمبشتاں جھلانکیاں گوں بوان اِت یک امر ءِ شما جوانی ءَ گند اِت کہ نگد بس زانتکار ءُ سنجیدگیں ٹولیانی نیمگ ءَ چہ کنگ نہ بیت بلکیں نگد ءِ شری ءُ درشان ءِ آزاتی دامن ءَ چیریں ٹولی ءِ ھم ناجائزیں پائدگ ءَ چست کنگ ءَ گندگ بیت اِنت ارزانیں لبزاں آھاں بھتام جنیں باسک یا شکایتی جھدکار اگاں گوشگ بہ بیت ھم رد نہ ایں – ھمک وھد ءَ اے درساں چہ گیش چَلڑ، سست، ھُشک، سرمب چار ءُ دمبرتگیں مردم بنت بیست ءُ چار ساھت آھانی دپ ءَ بید گلہ زاری، ٹِکچینی ابید دگہ ھچ در نہ ئے، پرچاکہ اے انسانی ابرم ءِ یک رویشے کہ وتی سستی، نزوری، ھرابی، ترس، دمبرگ ءُ چلڑی ءِ چیر دیگ ءِ ھاتر ءَ شکایتی رویش چکسانین انت بلے اے سرجم نہ انت –

اگاں چلڑی، بزدلی ءُ بے سوبی، گلہ زاری ءَ کسے چیر بوت اِنت، گار بوت اِنت یا شر ءُ ھراب بوت اِنت گڑا مروچی دنیا ءِ تہ ءَ راجدپتر ءِ تاں ھچ کس ناسرجم ءُ چلڑ ءُ بزدل نہ بوتگ اَت –

چار روچ ءَ چار مردم اے وڑیں مردماں الّم گوشداراں ءُ آھاں چہ وشی زور انت بلے چار روچ ءِ شاتمانی ءَ پد اے مردم ھنچوش نند انت ءُ ھاکاں ھوار بنت ھنچوش کہ ڈھل جنوکیں مردم ءِ پاداں چہ چست بوتگیں دنز دمال ءَ پد ایرنندانت –

گیشتر مردم بے سوبی ءُ زوال ءَ چہ رکگ ءِ ھاتر ءَ بے زانتی ءُ بے سمائی ءِ تہ ءَ وت بے سوب بوتگیں ھنچیں رویش ءِ وتیگی کن انت کہ وت بے سوبی ءُ زوالی ءِ نیمگ ءَ سپر کن انت – شکایتی جھد کار وتی وھدے برباد کنگ ءِ ھمراھی ءَ دومیانی ھم وھد ءَ ھراب کن انت – اے وڑیں جھد کار جھد ءِ تہ ءَ بوگ ءَ ابید جھد ءِ تہ ءَ نہ بنت، اے زرمبشت ءُ گلانی تہ ءَ یک جوانیں کرد ءِ پیلو کنگ ءَ ابید وتی سر ءَ وت گرانیں بار ءِ بنت زرمبشت ءُ گلانی سر ءَ بارے جوڑ بنت –

وھدیکہ انسان بے امل جوڑ بہ بیت درسان چہ مستریں شکایت نامہ آئی ءِ دامن ءَ نبشتہ بیت – من پیسر ءَ ھم گوشتگ ات کہ پگری پھتویں جھد کار دلیر بنت، بس وت ءَ تیرانی دپ ءَ دیگ ایوک ءَ دلیری ءِ نہ انت بلکیں ھما وڑ ءَ ھم دلیر جوڑ بنت کہ آھانی پگری پھتوی آھاں ھما کابل جوڑ بہ کنت کہ آ بھادری ءَ گوں جاورھالانی زانشت ءَ بہ داریت، راستیں پرّیس بہ کنت ءُ ھما گواچن ءَ گواچن دوستی ءَ گوں بہ پھمیت کہ زمینی جاورھال چی انت، ءُ اے جاور ھال پہ من ءَ کجام وڑیں جھدے ءِ لوٹ ءَ کنگ ءَ انت ءُ دلیری ءُ ایمانداری ءِ ھمراھی وتی زاتی نپاں پُشت ءَ یل بہ کنت ءُ ھما زرمبشتی جھل ءُ برزیانی کاربند بہ بیت – وت ءَ ھیل ھُنراں چہ دارگ راستیگیں برزی ءُ جھلیانی پھمگ ءُ وتی جند ءَ ھر ھال ءَ ھماھاں گوں بندوک کنگ دلیریں جھد کارانی دستور انت –

ھما کہ املی جھد کار انت یا چیزے کنگ ءِ زور ءَ دار انت آ مدامی گلہ ءُ زاریاں بیزار بنت ھمے کہ بے امل انت ءُ دگہ ھچ نہ کن انت ھمے ٹِکچینی ءَ وتی دستاں ٹٹا اَنت ھمائی ءِ پُشت ءَ وتی بے املی ءُ بزدلی ءَ چیر دے اَنت –

یک وھدے بوتگ ما درسیں جھدکار ھمے راہ ءَ رؤگ ءَ بوتگیں وتی زوال ءُ انا ءِ ساماناں وت یکجاہ کنگ ءَ بوتگ انت بلے مروچی انچوکیں بلاھیں جھد ءُ بازیں دیمھونیانی برکت ءَ پگر ءُ ھیال مٹ اِتگ انت، دلیری کربانی ءِ کچ ءُ ستاہ مٹ بوتگ انت، جوانمردی ءُ توانمردی ءِ مانا بدل بوتگ انت، ٹِک ءُ نشان ءُ رویش بدل بوتگ انت تاں ھمود ءَ کہ جھد ءِ تہ ءَ یک سرجمیں نسل ءِ ودی بوتگ جنگ ءِ میان ءَ رُدان بوتگ مروچی وت جنگ ءِ بھرے بزاں جھد ءِ میان ءَ جھد کار ھم مٹ بوتگ اَنت اگاں انگت کسے گوست پرست ءِ جوڑ بیت ءُ گوست ءِ سوچ ءَ گوں روگ ءِ جھد ءَ کنت گڑا روگ ءَ الّم روت بلے گولیں دائرہ ءَ دیم شُت نہ کنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دستونک

شائر: دیدگ بھار

دی بلوچستان پوسٹ

نوک بائندیں ورنا آں انکلاب زندگ کُتءَ
راج دپتراں پدا نوکیں کتاب زندگ کُتءَ

تو بگُش کہ شراب ھرام انت پہ کازی ءَ
کازیءَپُرشتگیں شیشگءِشراب زندگ کُتءَ

بدوا لیکیت ماہ رنگ ءُ سمی ءِ اَرساں نزور
اے دیوانگاں کوھیں دلانی آب زندگ کُتءَ

نزاناں روچ ءِ چنت درُوشم ءَ وتا جَھل دئے
بلے تئی ھر دروشم ءِ واب زندگ کُتءَ

تئی اِشک ءُ تئی مُھبت زندان ءِ باھوٹ انت
مجید بریگیڈ ءِ ورنا آں آشوب زندگ کُتءَ

بلوچ نیشنل مومنٹ ءِ سرکماش خلیل بلوچ ءَ سیزدہ نومبر شھیدانی روچ ءِ درگت ءَ گوشتگ کہ خان محراب خان کمیں کساس ءَ مال ءُ مڈی لھتے مردمانی تاکت ءَ ابید تاکتوریں دشمن ءِ دیم ءَ دلیری ءَ گوں جنگے درور، زورگیر ءِ بگیری ءَ گڈی ساہ ءَ تاں جنگ کنگ پہ سرڈگارے ھاتر ءَ کربان بوھگے نشانی انت –

چئیرمین ءَ گوشتگ کہ خان محراب خان ءِ راجدپتری گام ءَ ناکہ تھنا سرڈگار ءِ پھازگ، راجی بقائے جھد ءِ ھاتر ءَ بلوچ راج ءِ تہ ءَ ساھے بکشتگ بلکنہ دنیائے دگہ ایردستیں راج باور کنائینتگ انت زورگیری ءِ بگیری ءَ ھچ نگوشگ ایردستی ءَ گیشتر مھکم کنت – وھدیکہ جنگ زورگیری ءَ رکگے یکیں راہ انت

آئی گوشتگ کہ نوزدھمی کرن ءَ استعماری تاکتانی دور بوتگ کہ آھاں سیمی دنیائے ڈیھ وتی تاکت ءِ سر ءَ کبزہ کنگ بندات کتگ ھندوستان، چین ءُ افریقی ملکانی تہ ءَ برتانیہ ءَ وتی ھونی چنگل اڈینتگ انت ھندوستان ءِ سر ءَ کبزہ پد برتانیہ اے ترس آماچ بوت کہ روس افغانستان ءِ راہ ءَ ھندستان ءَ پترگ لوٹیت گڈا آئی ءَ بلوچستان ءِ سر ءَ دور کت – اے اُرش ءِ بگیری ءَ خان محراب خان وتی سنگتانی ھمراھی ءَ جنگ کت شھید نوش کت بلوچ راج دپتر ءِ تہ ءَ وت ءَ ابدمان کت –

چیرمین حلیل بلوچ ءَ گوشتگ کہ برتانیہ ءَ بلوچستان ءِ سر ءَ کبزہ کنگ ءَ پد سنڈیمن ءِ فارورڈ پالیسی ءُ یکنیمگی معاہدہانی کمک ءَ بلوچ چاگرد ءِ ارتقاء نزور کت وتی ھُنراں چہ بلوچ چاگرد ءِ تہ ءَ بازیں چاگردی نادراہ ودی کت کہ آھانی تہ وراثتی سرداری نزام، ٹکی فرقہ واریت ءِ زریہ بلوچ چاگردی دیریگیں رواداری ءُ دیمروئی لوٹ ءِ سوچ ءَ سک باز تاوان دات –

آئی ءِ گوشگ ات کہ بلوچستان ھچبر ھندوستان ءِ بھرے نہ بوتگ بلکنہ بلوچستان کلات، ھاران مکران ءُ لسبیلہ سر ءَ مشتمل یک ڈیھے بوتگ کہ انگریز سرکار ءَ کبزہ کتگ ءُ آجوئی ءِ نُھ ماھاں پد پاکستان ءِ بکشتگ تانکہ پاکستان ءِ زریہ ءَ اے دمگ ءِ تہ ءَ وتی بادشاھی ءَ برجاہ بہ داریت –

بی این ایم چیرمین ءَ گڈسر ءَ گوشتگ کہ خان محراب خان ءِ جنگی جھد ءُ شھیدانی دیمونی بلوچ سرڈگارے پھازگی ءَ بوتگ انت کہ مار ءَ ھمے درونت ءَ دئینت کہ راج پہ مرگ ھلاس نہ بنت بلکنہ دیمونی پلسپہ ءِ سر ءَ بوھگ ءَ زندگ مان انت – اے جنگی جھد ءَ بلوچ راج راجدپترے تہ ءَ یک زندگیں راج ءِ بستار دئیانتگ – ھمے جنگی جھد بلوچ راجی آجوئی زرمبشت ءِ سوبمندی زامن انت – اے موہ ءِ سر ءَ مار ءَ زانشت بوھگ لوٹیت کہ راجی آجوئی ءِ جھد اڈوجنجالانی نام انت اے وڈین اڈو جنجال ھمک روچ اوپار کنگ لوٹ انت پرچاکہ راجی آجوئی عمل سبر اوپار ءَ چہ بیت ناکہ یکیں دمان ءَ منزل ءَ سربوھگے نام انت اگاں ما شھیدانی گامانی پدرندانی سر ءَ بوتیں گدا دنیائے ھچ وڈیں تاکت مار ءَ منزل ءَ سر بوھگ ءَ داشت نہ کنت –

بلوچ نودربر گل آزات سرکماش ابرم بلوچ ءِ شھیدانی روچ ءَ بلوچ شھید دروت ندر کتگ ءُ گوشتگ کہ نواب محراب خان ءُ آئی ءِ سنگتانی جرت ءُ دلیری ءِ درور انت – نواب محراب خان ءَ بھیسیت ءِ بلوچ رھشون زورگیرانی بگیری ءَ یک راجدپتری پیسلہ ءِ زرتگ مروچی بلوچ راج زورگیرانی بگیری ءَ ھمے پیسلہ ءِ سر ءَ عمل کنگ انت –

چیرمین ءَ وتی درشان ءِ تہ ءَ سینزدہ نومبر ءِ درگت ءَ گوشتگ کہ وھدیکہ برتانیہ ءَ دنیائے تاکتوریں زوراکیں ھاکمی ءِ دروشم زرت دنیائے دگہ ملکانی سر ءَ وتی کبزہ دارگ ات ھمے دمگاں وتی تاکت ءِ برجاہ دارگے ھاتر ءَ بلوچ سردگار ءِ سر ءَ اُرش کت کہ آئی ءِ بگیری ءَ نواب محراب خان ءُ آئی سنگتان جھد کتگ زورگیرانی بگیری ءَ جنگ زندگ داشت – سرڈگار ءِ پھازگ ءَ وتی جانانی کربان کنوک مدامی مئے دلانی تہ ءَ زندگ انت آ شھیدانی جھد ءُ دیمونی پہ مئے ھاتر ءَ درونت انت –

ابرم بلوچ ءَ دیمتر ءَ گوشتگ کہ آجوئی جنگ بس جنگ نہ انت بلکہ راج دیمروئی ءُ اڈ دئیگے جنگ انت کہ آئی ءِ تہ ءَ بھیسیت ءِ راج مار ءَ بازیں اڈوجنجالانی دیمپانی کنگ کپیت ءُ زند ءِ درسیں تک پھناتاں وت ءَ منارینگ یک باشعوریں راج ءِ جوڈینگ انت – پرچاکہ ھستیں دور ءَ ھما راج سوبمند بوت کن انت نا کہ تھنا شھیدانی پدرنداں رؤنت ءُ جنگ ءَ دیم ءَ بر انت ءُ بلکنہ یک راجی سنچ ءَ سریچیں راج ءِ جوڈ کنگ ءَ ھم جھد کن انت – نارہ جنگ ءُ آزاتی درشان دئیگ واب ءِ تعمیر ءِ نام نہ انت بلکنہ سیاسی وڈ ءُ ڈول ءَ باشعوریں مھلوک ءِ راجی آجوئی ءَ آؤرت کنت –

چئیرمین ءَ وتی درشان ءِ گڈسر ءَ گوشتگ کہ مار ءَ سینزدہ نومبر ءَ اے کول کنگ لوٹیت کہ ما شھیدانی پدرنداں رؤیں ءُ آجوئی جھد ءَ ھر وڈیں جیڑہ جنجالانی دیما داریں – بلوچ راجی زرمبشت ءِ سوبمندی ءُ یک باشعوریں راج ءِ جود کنگ مئے شھیدانی داتگیں کربانی ءُ جھدے برورد بنت – اشی ءِ ھاتر ءَ مار ءَ بیمناکیں دیومالائی رسم رواج ءُ ضعیف الاعتقادی رویش ءَ چہ راج دور دارگی انت ءُ راجی آجوئی زرمبشت ءِ نیمگ ءَ آرگے جھد کنگی انت – پرچاکہ سینزدہ نومبر مار ءَ چہ ھمے لوٹ کنت کہ کربانی، بلند ھوسلہ، دلیری ءُ کارشونی ءَ چہ آجوئی زرمبشت منزل ءَ سر کنگ بیت انت

بلوچستان ءِ بنجاھی شھر شال ءَ سیزدہ نومبر شھیدانی روچ ءِ درگت ءَ روانک ءِ کشگ بوتگ ءُ شھیدانی اکس گوں پُلاں سمبھینگ بیتگ انت –

شمبے ءِ روچ ءَ مردمانی مزنیں کچے ءَ شھیدانی اکس زرتگ ءُ روانک کش اتگ کہ آئی ءِ تہ ءَ چُک ءُ زالبولاں ھم مزنیں کساسے ءَ بھر زرتگ –

شھیدانی روچ ءِ درگت ءِ روانک ءَ وائس فار بلوچ مسنگ پرسنز ءِ کمک سرکماش ماما قدیر بلوچ، کلانیں بلوچ رھشون حکیم لہڑی، پشتون راج دوستیں رھشون ملا بھرام ءَ ھوار شھیدانی کھول بلوچ ءُ پشتونیں باسکاں بھر زرتگ –

اے درگت ءَ تران کنوکاں شھید سھر چکیں دروت ندر کتگ انت ءُ گوشتگ کہ مروچی ھما شھیدانی روچ دارگ بوگ ءَ انت کہ آھاں بلوچستان ءِ وشھالی ءِ ھاتر ءَ وتی نگرھیں جان کربان کتگ انت –

آھانی گوشگ ات کہ بلوچ پرزندانی دیمونیاں چہ مروچی بلوچ راجی زرمبشت دیمروئی کنان انت –

تران کنوکاں بلوچ پرزندانی کربانی دروت ندر کتگ ءُ گوشتگ کہ بلوچستان ءِ سرڈگار ورنایانی ھوناں رنگ داتگ –

آھانی گوشگ ات کہ بلوچ پشتون شھیدانی کربانی اے دمگ ایمنی ءُ وشھالی ءِ مانزمان انت –

پد ءَ رند ءَ روانک ءَ بھر زوروکاں شھیدانی اکسانی سر ءَ پُل چنڈیتگ ءُ آ سھر چکیں دروت ندر کتگ انت –

بلوچستان ءِ گیشتر ھند ءُ دمگاں ھوار ھلیج ءُ یورپی ڈیھاں نندوکیں بلوچ چُک ءُ زالبول ءُ ورنایاں وتی گِسانی تہ ءَ شھیدانی یات ءَ چراگ روک کتگ ءُ آ سھر چکیں دروت ندر کتگ اَنت –

دومی نیمگ ءَ شال ءَ شھیدانی مانشجاہ ءَ ھم شھیدانی مانش ءِ سر ءَ پل چنڈگ بوتگ –

دومی نیمگ ءَ بلوچ شھدا کمیٹی ءُ بلوچ گلانی نیمگ ءَ چہ چاگردی ترامجاہ ٹویٹر ءَ شھیداں دروت ندر کنگ ءَ آن لائن کمپئین برجاہ انت –

بلوچستان ءَ ھوار سرجمیں دنیائے جھمنندیں بلوچ سوشل میڈیا ایکٹوسٹ، پشتون ءُ سندھیانی نیمگ ءَ شھیدانی دیمونی ءِ درگت جتائیں پگرے منوگراں سوشل ایکٹوسٹس وتی ٹویٹانی تہ ءَ بلوچ جھد آجوئی ءِ ھاتر ءَ شھید بوتگیں بلوچ پرزند دروت ندر کتگ انت –

شھیدانی روچ ءِ درگت ءَ بنام شھدائے آجوئی ءِ ساز زیملی مرگش ءِ ھم برجم دارگ بوتگ کہ بلوچی ءُ براھوی زبان ءِ ازمکار میر احمد بلوچ ، ساول کندیل ءُ میرل بلوچ وتی ازم ءِ درنگازی کتگ ءُ شھید سر چکیں دروت ندر کتگ انت-

نبشتانک: بِشکُن! مرچی تئی روچ اِنت

نبشتہ کار: برزکوہی

رجانکار: مھروان کمبر

پیسر ءَ نبشتہ کُتگ، گمان بیتگ کہ تھنائی ءِ گباراں لبزانی دْروشم ءَ تاکانی میار کنگ ءَ آں، نی انچو گُمان بیت کہ زھن ءِ گبارانی زِر ءَ اُوژناگ ءَ آں۔ شالا! انچُوش کہ من جیڑاں ھما پیم نبشتہ کُت بہ کُت اِیں۔ شالا! من ھیالانی دیوانگی لبزانی دْروشم ءَ تاکانی میار کُت اِیں۔ شالا! من ھمے شُد ءُ گنوکی ءِ ھمراھی ءَ نبشتہ کُت بہ کُت ایں، پد ءَ من داں ھما وھد ءَ نبشتہ بہ کُتیں کہ لبزانی دستاں منی گُٹ مہ گپتین ءُ منی ساہ بند نہ بوتگ اَت، پد ءَ من داں ھما وھد ءَ نبشتہ کُت اِیں کہ لبزانی چیھالاں جھانے سرا زُرتیں، پد ءَ ھم من نبشتہ کُتگ اَت، ھمک لبز تئی نام ءَ نبشتہ کُتگ اَت، پد ءَ من تئی ھمُک کِسّہ نبشتہ کُتگ اَت، تئی ھر ھما کِسّہ کہ آئی ءِ بندات گوں منی اُمیتاں بندوک اِنت ءُ آئی ءِ ھلاسی ءَ منی درد، گم، نااُمیتی چیر داتگ اَنت، ھما کِسّہ نبشتہ کُت اَنت، کہ آیانی بار ءِ زورگ تاکانی بستار نہ اِنت۔
بلے پد ءَ ھم من وتی پُرشتگیں لبز ءُ وتی بستار ءِ ھساب ءَ نبشتہ کن آں کہ من وتی درد ءُ گماں لوٹانی تھا ءُ دوری ءَ یاتانی تہ ءَ مٹ بہ کن آں۔

وتی زات ءِ اندر ءَ نہ گْوشتگیں کِسّھانی چیر دَیگ ءِ ھزاب ءُ چکاس بہ گندئے درد ءَ جوڑ کُتگ۔ پیتروکلس یکروچے اکیلیس ءَ جُست کنت “ترا یات اِنت، یکرندے تو ورنا بُوَگ ءِ بارو ءَ چے گْوشتگ اَت؟” اکیلیس ءَ دِرّائینت “ھو! ورنائی یک انچیں مارشتے گْوشے تو کسے ءِ پُشت ءَ تچان ئے بلے آئی ءَ رسینت کُت کنگ ءَ نہ ئے ، ھر وڑ بہ کن بلے تو انگت چار گام پُشت ءَ ئے۔” پیتروکلس پد ءَ گْوشت “منی سیادی گوں ترا ھمے وڑ ءَ اِنت۔”

ترا سما اِنت؟ منی لبزانی سیادی ھم گوں ترا ھمے داب ءَ اِنت۔ بلے پد ءَ ھم من نبشتہ کن آں کہ ھال بِہ دے آں کہ اے ھما سُتکگ ءُ پُر بیتگیں بچّانی روچ اِنت کہ آیاں آس ءَ گوں مھر اَت۔ اے تئی ماہ ءُ تئی روچ اِنت، اے نومبر اِنت۔

نومبر ھم اجبیں ماھے، گْوشے انچو گْوشگ ءَ اِنت کہ “بچار من تئی کسانی ءِ لھتیں گرم بھا زرتگ ءُ اتکگاں، ترا یات اِنت وھدے تئی کسانی ءِ گرمی ءِ رُوژنائی ءِ تِپناکی جتا اَت؟ من وتی سارتیں ریشُمی گْواتانی شیکگ ءَ تئی مودانی شِنگینگ ءَ اتکاں، من ھما گُڈّی دستاں کہ چہ  ٹَنٹُّرتگیں سارتی ءِ دیم ءَ جُکگ ءَ پیش تو دست گِپتگ اَت۔”

من ءَ باز وشی بیت کہ من یک انچیں دُنیاے ءَ نشتگ آں، کہ اُود ءَ نومبر ھست اِنت۔ تْرپش ءُ شیرکنیں نومبر، نازرکیں تب بلے مانگیش اِتگیں ءُ شنگ ءُ شانگیں نومبر، برے ھُشکیں تاکاں وتی داب ءَ تاچین ایت ءُ برے وتی سارتیں دم ءَ چہ تاکانی چِست کنوکیں نومبر۔ ھمُک سال ءِ نومبر روچ ءِ رُژنائی ءِ زردیں شال ءَ زور اِیت ءُ مئے مانپوشگ ءَ کیت۔ نومبر ابرم ءِ کبر ءُ کسارت ءِ ماہ اِنت ءُ ابرم چہ زندگی ءَ گیش مرگ ءَ رُد اِیت۔ اے ماہ ءَ ھمُک نرم ءُ نازرکیں سبزوکیں تاک، چہ درچکانی زرد چکیں رنگانی لوٹاں سِد اَنت ءُ مرگ ءَ امباز کن اَنت۔ ترا ھم زردچکیں رنگانی لوٹ اَت کہ تو درچکانی امباز یل کُت۔ پمشکا نومبر تئی ماہ اِنت ءُ سینزدہ تئی روچ اِنت۔

اے ماہ ءُ اے روچ تئیگ اَنت، تو؛ ھزارانی مرگ ءُ یک کبرے ءِ۔ تو؛ ھزارانی مرگ ءِ نشہ ءَ ناچ ءَ ئے ءُ وتی کِسّہ ءَ وت ءَ گْوشگ ءَ اِت کہ تو اے باور بہ کن ئے زمین ءِ تہ ءَ ھما کس کہ واب اِنت آ تو ئے۔

اے مرگ! تئی راستی چو منی ماتی زبان ءَ چہ گیش اٹل اِنت، بِہ گْوش کہ ھما شُتگ اَنت آ کئی بیتگ اَنت؟ چوں آ وتی دْروشم ءَ بدل کن اَنت ءُ واتر بَہ اَنت ءُ پد ءَ رو اَنت؟ منی دوستگیں زندگی! بس تو اے بِہ گْوش کہ پرچا مرگ ءَ چہ گیش درد دئے؟

اِستالانی ودی بُوَگ ءَ ھژدری اِنت کہ ” نیبولا” بہ کپ ایت، وتی اندر ءَ انچو بہ کپ ایت کہ بہ شنگ ایت۔ اے منی شھیداں! اے کپگ شُمے مرگ نہ اِنت، بلکیں رُژنائی ءِ ودی بُوَگ اِنت۔ گْوش اَنت آزمان ءَ انچیں استال ھست کہ آ لکّاں سال پیش ھلاس بیتگ اَنت، بلے آیانی رُژنائی وھد ءِ دامُن ءَ کید بیتگ ءُ زندگ اَنت۔ گوشدار! تئی رُژنائی ھم وھد ءِ تہ ءَ ودی بوتگ۔ نی زمانگ بہ گْوز اَنت ءُ کرن بہ مٹّ اَنت، بلے تئی رُژنائی زِر ءِ تہ ءَ گار بیتگیں ناھُدا آں راہ ءَ پیش دار اَنت۔

اے منی شھیداں! چہ تئی کل کُتگیں جان ءَ پُل رُد اِیت کہ آیاں تو ءُ تو بَہ ئے۔ ھمیش مُدامی زندگی اِنت۔ تو مُدام ھست ئے ءُ مُدام ھست بَہ ئے، بِشکُن! مرچی تئی روچ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شال کیچی بیگ ءَ چہ پاکستانی پوج ءِ دست ءَ زورانسری آوار جنگ ءُ بیگواہ بوتگیں ھاران ءِ جاھمنند حبیب اللہ مات ءَ بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ اتکگ ءُ وتی زھرشانی نبشتہ کنائینتگ –

آئی ءِ گوشگ ات کہ منی چک حبیب اللہ سَے سال انت کہ آوار جنگ ءُ بیگواہ کنگ بوتگ اگاں آئی ءِ سر ءَ الزام ھست آمیدگساں آرگ بہ بیت ءُ بے گناھی ءِ ثابت کنگے موہ دئیگ بہ بیت –

ھاران ءِ جاھمنند بی بی حاجرہ ءِ گوشگ ات کہ آئی ءِ چُک سَے جون دوھزار نوزدہ ءَ پوجی کارمنداں شال کیچی بیگ ءَ مئے سیادانی گِس ءَ چہ آوار جتگ ءُ گوں وت برتگ آئی ءَ چہ پد منی چُک حبیب اللہ ءِ درگت ءَ مال ءَ ھچ وڈیں سرپدی دئیگ نبوتگ –

حبیب اللہ ءِ مات ءَ سرکار ءُ انسانی ھکانی ادارھاں چہ لوٹ کتگ کہ آئی ءِ چُک دیم ءَ آرگ آئی یل کنائینگ ءَ وتی کرد ءَ پیلو بہ کن انت –

دژمن پوج ءِ سر ءَ دستی بمب ءِ چگل داتگ ءُ سَے کارمند کشتگ – جئیند بلوچ

سربوتگیں ھالانی رِد گوستگیں روچ ءَ بزاں پنچ شمبے ءَ ناشناسیں مردماں کلات ءَ پاکستانی پوج ءِ سر ءَ اُرش کتگ –

اُرش کلات ءَ بابو محلہ پاکستانی پوج ءِ پانگس ءِ سر ءَ کنگ بوتگ چریشی ءَ پاکستانی پوج ءَ جانی تاوان ءِ دیمپانی بوتگ – اُرش ءِ زمہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ-

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں پنچ شمبے شپ ءَ کلات بابو محلہ ءَ زورگیریں پاکستانی پوج ءِ پانگس ءِ میس گیٹ ءِ دپ ءَ ڈوٹی دیوکیں کارمندانی سر ءَ دستی بمب ءِ چگل داتگ – چریشی ءَ دژمن پوج ءِ سَے کارمند ٹپی بوتگ –

جارکش جئیند بلوچ ءَ گوشتگ کہ اے اُرش ءِ زمّہ واری مئے گل بی ایل اے منّیت ءُ سرڈگار ءِ آجوئی ءَ تاں مئے جھد برجاہ مانیت –

بلوچ اسٹوڈنٹس ایکشن کمیٹی کراچی ھنکین ءِ شھدربرجاہ بنزہ ءِ نیمگ ءَ مرچی بزاں 12 نومبر 2021 ءَ ادبی دیوانے گمشاد بلوچ ءِ سروکی ءَ برجم دارگ بوتگ، دیوان ءِ گچینی ءِ مھمان بنجاھی کسان کمک سرکماش شبیر بلوچ بیتگ۔

دیوان دو بهر ءَ بوتگ، اولی بھر ردانکی بھر ءُ دومی شیٔری بھر ءَ بوتگ۔

بنزہ کارگشاد ءَ دیوان ءِ بُنگیج کنان ءَ رِدانکی بھر پَچ کُت کہ اود ءَ دیوان ءَ بھر زرتگیں باسکاں آزمانک، نبشتانک ءُ رجانک ونتگ اَنت –

رجانک ءِ سر ءَ دیوان ءَ بھر زرتگیں کوامے ٹورے ءِ انٹرویویے ءِ رجانک ونت کہ آئی ءِ تہ ءَ کوامے موبلائیزیشن ءُ آرگنائزیشن ءِ سر ءَ گپ ءَ اِنت کوامے ءِ ھساب ءَ موبلائزیشن اگاں آرگنائزیشن ءِ بھرے ءِ ھساب ءَ مہ بیت داں ایشی ءِ سر ھر نیمگ ءَ تاب دیگ بوت کن اَنت، کوامے دَرور دیان ءَ گُش اِیت کہ باز رند ءَ چُش بیت کہ پلانی ءِ چُک اسکول ءَ چہ کشگ بوتگ بیائے روانک کش اِیں، پلانی چہ کار ءَ دَر کنگ بوتگ بیا زھرشانی کن اِیں بلے آرگنائزیشن ءِ رھبند ءِ ھساب ءَ اگاں اے دْراھیں املانی راھبند اگاں ارگنائزیشن ءِ بنیاد ءَ گشّینگ مہ بیت داں اے دراھیں امل دانکہ یک وئیلے ءَ گوں بندوک بنت بلئے ارگنائزیشن ءِ تہ ءَ اے گِیشّ اِیت کہ اے کسان کسانیں امل منی مقصد ءِ بھر اَنت ءُ منی مستریں Goal دگرے کہ ھمائی ءِ بنیاد ءَ من ءَ اے املانی سبب ءَ راہ درچنگی اِنت ءُ مردم ھما آرگنائزیڈ لیکہ ءِ پلو ءَ آرگی اَنت۔

دیوان ءَ آزمانکاں ھوار صبا دشتیاری ءِ نبشتانک “ادب ءِ تہ ءَ کمٹمنٹ” ونتگ ءُ دیمتر ءَ شاعری بھر ءَ باسکاں وتی ءُ بلوچی ءُ براھوئی ءِ مزن نامیں شاعرانی شئیر ونتگ اَنت ءُ دیوان وشنود کُتگ-

نبشتانک: سرمچاریں سربُلند

نبشتہ کار : جلال اهمد

دی بلوچستان پوسٹ

یک کساں سالیں گْونڈل ءِ کہ آه پنجگور ءَ پروم ءَ نِندوک اَت ءُ آئی ءِ نام اُمر جان اَت آهی ءَ وتی بِنداتی وانگ چہ پروم ءَ بندات کُت اُو آهی ءَ را وتی زمین سک دوست اَت هر مُدام سربُلند ءَ پہ وتی زمین ءِ هاترا جِیڑیتگ اَت بلکیں آهی ءَ وتی شپ ءِ واب یل کُتگ اَت ءُ وتی زمین ءَ واست ءَ پِگر کُتگ اَت کساں اُمری ءَ سربُلند جان ءَ یک انچیں پِگر ءُ لِیکہ ءِ داشتگ اَت کہ آه پِگر پہ بلوچ ءِ باندات ءَ یک روشنائی اَت سربُلند ءِ سنگت آں مُدام وتی وهد لیب ءُ گوازی ءَ گوازینتگ اَت بلے سربُلند چہ اِشاں جِتاهیں مَجگی ءِ واهُند اَت آئی ءَ وتی وهد مپت ءَ نہ گوازینتگ اَت هر وهد ءَ سربُلند ءَ وتی وهد پہ شرّیں وڑے ءَ گوازینتگ اَت کدی آهی ءَ پہ وتن جیڑیتگ اَت ءُ کدی نوکیں پِگر ءُ هیالاں گوں جیڑگ آه اَت گڑا همے وڑ ءَ وهد گوزاں بُوت سربُلند ءَ بلے یک شلہ وتی جُھد داشتگ اَت چیزے مُدّت گوست گُڑا سربُلند وتی گِس ءَ چہ رهادگ بُوت دیم پہ کوه ءَ نوں اے وهد ءَ سربُلند ءَ همے پیسلہ کتگ اَت کہ منی زمین منی ننگ اِنت منی مات اِنت ءُ اِشی ءِ سر ءَ ناشریں دژمن آں اُرش کُتگ من اے زمین ءِ رکّینگ ءِ هاترا وتی جان ءَ ندر کن آں-

گڑا سربُلند مجید برگیڈ ءِ کاروان ءِ سنگت آں گوں هوار بُوت گڑا سربُلند ءَ آواں گوں گپ ءُ تران کُت او همے پیسلہ کُت کہ اے بزّگی ، لاچاری ، گلامی ءُ زُلم ءَ من برداشت کُت نہ کن آں پہ اے زُلم ءُ زوراکی آں چہ رکّگ ءَ هاترا من وتی جان ءَ کُرباں کن آں پہ وتی ماتیں زمین ءَ-

مجید برگیڈ ءِ سپاهی آں سربُلند ءِ کساں اُمری دیست گڑا سربُلند ءَ را آواں یک سالی ءِ وهد دات کہ یک سال ءِ انگت تو پِگر ءُ سوچ بکن بے جیڑ ءُ وتی گوم ءَ وت پیسلہ بُزور کہ تو وتی جان ءِ ندر کنگ ءَ تیار ءِ بلے سربُلند ءَ وتی زُرتگیں پیسلہ رد نہ کُت آهی ءَ کہ هما پیسلہ زُرتگ اَت سال ءِ رند سربُلند ءَ پیسلہ هم هما اَت کموکیں من بدل نہ اَت گڑا سربُلند ءَ را یک سال ءِ سرجم بُوت پہ پِگر کنگ ءَ گڑا کاروان ءِ سنگت ءَ سربُلند ءَ را جُست کُت کہ تو چی پیسلہ کُتگ همے وهد ءَ سربُلند ءَ بچکند اِت ءُ گُشت کہ هما پیسلہ کہ سالے پیسرا بُوتگ منی پیسلہ انگت هما اِنت مَٹ نہ بُوتگ کاروان ءَ سنگتاں کہ سربُلند ءَ اے پسّو دیست گڑا آه دُراه هیران بُوت اَنت کہ اے کسانیں گونڈل ءَ سرجمیں سالی ءَ وتی پیسلہ رد نہ کتگ گڑا انگت بلوچ ءَ نام ءُ ننگ گار نہ اِنت-

سال ءَ سرجم بُوگ ءَ چہ رند کہ سربُلند ءَ پیسلہ انگت هما اَت گڑا کاروان ءِ سروکاں سربُلند ءَ را درس دات کہ ترا پہ بلوچ زِر ءَ رکِینگ ءَ هاترا ءَ وتی جان ندر کنگی اِنت اے گپ ءَ سربُلند سک گَل بُوت چیا کہ سربُلند ءَهواهش هم همیش اَت کہ من وتی ماتیں گلزمین ءَ رَکینگ ءَ هاترا وتی جان ءَ ندر بکن آں پہ بلوچ زِر ءَ رکّینگ ءَ هاترا بیست اگست دو بزار ءُ بیست ءُ یک ءَ بیگاه ءَ ادار شش ءَ دْژمن ءَ ٹولی ءَ سر ءَ سربُلند اُرش ءَ کنت او وتی جان ءَ ندر ءَ کنت دْژمن ءَ را همے درس ءَ دنت کہ ءِ زِر مئے اِنت ما وتی زِر ما وتی ماتیں گُلزمین نہ بکشاتگ ترا ما وتی زمین ءِ واهُند وت اِنت گڑا اے اُرش ءَ دُژمن ءَ نه کارمند مِریت ءُ پُروش وارتگیں دْژمن هما وهدی پیما ءَ لس مهلوک ءِ زهگانی سر ءَ تیرگواری کنت ءُ سے زهگ شهید ءَ بیت پد ءَ دْژمن وتی گپ ءَ چیر دنت ءُ گُش ایت کہ چینی کارمندانی سرا بُوتگیں تراک ءَ بس سے زهگ شهید بُوتگ ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔