TBP Balochi

سر بیتگیں ھالانی رد ءَ سندھ ءِ مزن شھر کراچی ءَ نامی ئیں ازمکار دردانہ بٹ کرونا ویروس ءِ نادراھی ءَ مروچی بیران بیتگ –

دردانہ بٹ ءِ بارو ءَ گوشگ بیت اِنت کہ نُھ مئی نوزدہ سد ءُ سِی ءُ ھشت ءَ لاھور ءَ ودی بیتگ ءَ آئی ءَ کینیئرڈ کالج ءَ وتی وانگ سرجم کرتگ –

چریشی ءَ پد آ گیشیں وانگ ءِ ھاتر ءَ یونیورسٹی آف ٹولیڈو ءَ شتگ ءُ اود ءَ آئی ءَ کی ایچ ڈی کرتگ ءُ چرے وانگ ءِ سرجمی ءَ آئی ءَ ازمکاری بندات کرتگ –

آئی ءَ کمرشل ءُ ماڈلنگ ءِ کرد ھم پیلو کرتگ ءُ آئی ءخ تھیٹرانی سر ءَ ھم کار کرتگ –

آئی ءَ بازیں ٹی وی چینلاں وشکندی ڈرامھانی تہ ءَ کرد پیلو کرتگ ءُ نوزدہ سد ءُ ھپتاد ءُ ھشت ءَ آئی ءَ معین اکتر ءِ گون ءَ”ففٹی ففٹی ” وشکند ءِ تہ ءَ ھم یک کردے پیلو کرتگ –

چریشی ءَ ابید آئی ءَ بازیں وشکندانی تہ ءَ کار کرتگ ءُ اشانی ھواری ءَ آئی ءَ پرائیویٹ ٹی وی چینلانی تہ ءَ ھم ڈرامہ کرتگ اَنت –

لھتے وھد ءَ پیسر آئی ءَ شومک ءِ نادراھی ءِ گورجنگ ءَ آئی ءِ جاندراھی ھم بیگ ءَ بیتگ کہ گوستگیں روچاں آ ساہ کشگ ءِ ناجوڑ بیتگ ءُ نادراہجاہ ءَ برگ بیتگ کہ اود ءَ آئی ءَ کرونا ویروس پدر بیتگ ءُ مروچی آ بیران بیتگ –

بلوچستان ءِ بُنجاھی شھر شال ءَ ناشناسیں مردماں یک درزی دکانے ءِ سر ءَ دزبمب اُرشے کتگ-

گیشیں ھالانی رِد ءَ شال ءِ دمگ سریاب دگ ءَ کیچی بیگ شھید چوک ءِ سر ءَ ھستیں درزی دکان ءِ سر ءَ ناشناسیں مردماں دزبمبے چگل داتگ ءُ تتکگ اَنت-

دمگی مردمانی رِد ءَ اُرش ءِ آسر ءَ دو مردم ٹپی بوتگ اَنت، ٹپی بوتگیں مردم پہ الاج ءِ ھاتر ءَ نادُراھجاہ ءَ برگ بوتگ اَنت-

زانگ بہ بیت سے ءُ چار روچانی تہ ءَ بلوچستان ءِ بُنجاھی شھر شال ءَ چار تراک بوتگ اَنت ءُ آ گوستگیں بوتگیں تراکانی زمہ واری بلوچ لبریشن آرمی ءِ جارکش جیئند بلوچ ءَ زرتگ اِت اَنت ءُ جارکش ءَ وتی درشانانی تہ ءَ اے ھم گوشتگ کہ لَس مھلوک پاکستان ءِ وتگڑیں جشن آزادی ءِ شاتکامی ءَ چہ دور بہ بنت اگاں ناں آ وتی جانی ءُ مالی تاوانانی زمہ وار وت بنت –

بلے اے اُرش ءِ زمہ واری انگت ھچ گل ءَ وتیگ نہ کتگ-

نبشتانک: گُڈّی دیدار

نبشتہ کار: ڈاکٹر شکیل بلوچ

دی بلوچستان پوسٹ

آئی ءَ گْوشت کہ من ترا رُکست نہ کن آں پرچا کہ تو منی ارواہ ءَ گوں بندوک ئے، بہ گند ئے اِے منی ءُ تئی گُڈّی دیدار اِنت، باندات ءِ روچ ءَ بِہ گند ئے من ءُ تو دوچار مہ کپ اَنت، بلے منی ءُ تئی میان ءَ بازیں ھیال، ترانگ، یات، زھیر ءُ مِھر پشکپتگ اَنت-

مِھروان! وھدے کہ من ایوک بہ آں گُڑا تئی ھمے پشکپتگیں ھیال، یات، ترانگ ءُ زھیر من ءَ بے تاھیر کن اَنت ءُ بے کساس من تئی ترانگاں کپ این اَنت، اِے ساھتاں منی ارواہ سرجم ءَ تئی باتِن ءَ ایر کپ اِیت ءُ منی ارواہ نپَس بند بِیت ءُ دل درد کنت بلے منی جان ءِ کُجام درد ءُ اندوہ، منی ژانگولیں ارواہ ءِ اِے نپَس بندی کہ گْوں ترا بندوک اَنت من ءَ ھم چہ وت ءَ دوستر اَنت من ءَ تئی داتگیں درد ھم چہ وت ءَ دوستر اَنت پرچا کہ تو منی زندمان ءِ اولی ءُ گُڈّی مِھر ئے، چہ تئی مِھراں من زندمان ءِ زگریں بِزانت پَھم اِتگ، چہ تئی داتگیں درداں من کازماس ءِ زیبائی ءَ را چْو کوہ مراد ءَ زیارت کرتگ-

بلے تو گپّے زان ئے تئی داتگیں درد من ءَ چو پیر ءُ آجزیں زالے ءِ سریگی ڈکّے ءِ پیم ءَ وتی زِرد ءِ گُشان ءَ ڈکّ داتگ ءُ ھر جاہ، ھر دمان ءُ دل ءِ ھر دِریکگ ءَ گْوں من ءَ گْون اَنت۔

مِھروان من ترا گْوشگ لوٹ آں کہ تو انچش گْوں من ءَ بندوک ئے ءُ انچش منی جان ءِ رگ رگاں ایر کپتگ ئے کہ تو منی ساہ ءِ کشّگ ءَ ھم گْوں من ءَ گْون ئے گْوں۔

مِھروان من وتی زِندمان ءِ گْرانتریں کِسّھے گْوں ترا مرچی درشان کنگ لْوٹ آں، مرچی سُھب ءِ سمین کشّگ ءَ اِنت ءُ من ءَ بے کساس تو یات پیداک ئے، من ترا پْیسر ءَ ھم اِے گپ گْوشتگ اَت کہ تو منی زندمان ءِ ھر پِڑ ءَ گْوں من ءَ بندوک ئے،
مِھروان گْوش بِہ دار، مرچی من ءَ وھدے کہ سُھب ءِ وش دابیں سمین ءَ تئی ترانگ ءَ گْیج اِت، اِے ساھت پہ من ءَ بھِشت ءِ ندارگاں چہ کمتر نہ اَنت، شال ءَ من ءَ وتی گرمیں زانسرانی سر ءَ واپینتگ، بلے من ءَ تو بے کساس یات پیداک اَت ئے، مرچی منی دل ءَ ھمے لْوٹ اِت کہ من چہ ترا بے ھیال بِہ باں ءُ منی ژانگْولیں جبین چہ تئی کُنٹگیں یات ءُ زھیراں ھْورک ءُ ھالیگ بِہ بیت۔

بوت کنت اِے منی کْوریں بھادری اَت کہ من لْوٹ اِت کہ تئی کوھیں زھیراں گْوں وتی نِزوریں کوپگاں بَڈ ءَ بہ کن آں ءُ چہ دل ءِ دیار ءَ در اِش بہ کن آں بلے وھدے من وتی اولی گام ایر کرت منی نپَس بند بُوت ءُ بے سماہ بوت آں، ساھتے ءَ پد وھدے کہ من سماہ کرت من چار آں تئی یات، زھیر ءُ ترانگ نوں پَھک ءَ گْوں منی ارواہ ءَ بندوک اَنت، وھدے کہ من تئی یاتاں چہ دل ءَ در کنگ بِہ لوٹ آں گُڑا منی ارواہ ھم بال کنت ءُ روت، ھشکیں جْوں پَشکپ اِیت۔

مھروان تئی گپ ءُ ھبَر، تئی دُرّیں دانکاں من کدی ھم بے ھیال کرت نہ کن آں، پرچے کہ من وتی ھیالانی دنیا ءِ سرجمیں کوہ ءُ کوچگ، زید، ھلک ءُ میتگ گْولتگ اَنت بلے من ھر چیز ءَ چار آں منی چمّانی دیم ءَ تئی اکس اِنت تو انچش منی باتن ءَ ایر کپتگ ئے کہ من چار آں ترا گِند آں وت ءَ، وھدے کہ من چاراں وت ءَ گِند آں ترا، بس من ءُ تو انچش ھمگرنچ اَنت کہ کدی جِتا بوت کرت نہ کن آں –

مِھروان ھما اِنت کہ تو رپتگ ئے، تئی ھما گپ ءُ تران، تئی کندگ ءُ مسکرا، من ءَ چو سِیپارگ ءَ یات اَنت تئی ھما گُڈّی بچکندگ کہ تو رھادگ بوت ئے چَک تر اَینت ءُ یک بچکندگے سوگات کرت، تئی اِے بچکند انگت منی چمّانی دیم ءَ نکش اِنت۔

مِھروان اِے گپ ءَ من ھم زان آں کہ تو چہ من ءَ دور رپت ءُ شت ءُ بلے منی دل اِے گپ ءِ منّگ ءَ کدی ھم تیار نہ اِنت کہ تو چہ من ءَ دور ئے۔

پمیشکا من ترا گْوشت کہ من ترا الوِداہ نہ کن آں پرچے کہ تو منی ارواہ ءَ گْوں بندوک ئے، بے ترا منی ارواہ یک شانتلے بیت ءُ زَھیر نالان کنت ءُ دردانی جنگل ءَ کُوکُو کنان کنت ءُ روت۔ بس منی گُڈّی ھبَر ایش اَنت کہ تو چہ من ءَ دور نہ ئے ءُ من چہ ترا جِتا نہ اوں۔ تئی یات، زھیر ، ترانگ، درد، بچکندگ گْوں منی ارواہ ءَ بندوک اَنت ءُ زندمان ءِ گُڈّی ساھتاں ھم تو من ءَ گیر کا ئے، تاں زندمان ءِ گُڈّی ساہ ءِ کشّگ ءَ من ءُ تو ھْوار آں۔ پمیشکا من ترا الوداہ نہ کرت پرچے کہ تو منی ارواہ ءَ گْوں بندوک ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: ورنا دلیرا زندہ باد

نبشتہ کار: اَبرم بلوچ

دی بلوچستان پوسٹ

من زان آں، 31 سوچکان ءَ وھد ءِ کہ روچ ءَ وتی اولمی شھم ءَ زمین ءِ دلبند ءَ ایر داتگ ءُ سرجمیں جھان ءَ رژنائی ءَ انگیر ءَ کتگ ءُ تھاری ءَ چہ زبھر کتگ ،ھمے سھت ءَ ھزاراں واھگ چو گیمرتگیں پُلاں مُجیتگ انت لھتے انچیں واب چہ دیدوک ءَ سستگ ءُ جتا بیتگ اَنت کہ ھر یک کنکگریں بچیگ ءِ چہ وتی دید ءَ گند ایت ءُ پھر بند ایت وتی سر ءَ کہ اے آجوئی ءِ کاروان ءِ من بھر آں بلے لھتے جاہ ءَ زند وپا نکنت ءُ لھتے واب سرجم نہ بنت بلے آ وابانی برورد ءَ الم آؤکیں پدریچ چَشِ ایت۔

من آں ھمیش گمان بیت وھد ءِ کہ اے روچ اتکگ زمین تُنیگ بیتگ کہ دیریں زمین ءَ وتی دلبند ءَ ھونانی رگام نہ دیستگ ءُ اے واھشت ءِ پیلو کنگ ءَ ھزار سرمست ءُ سرچند ساڑی انت ھمے واھگ ءِ بنھشتہ ءِ توک ءَ سَے نرمزاراں دیم پہ دیمی جنگ ءَ وتی ھون ءَ گوں زمین ءِ تُن پروشت ءُ ابدمان بیتگ اَنت۔

گوش اَنت کہ جنگ کنگ ارزان نہ اِنت مھکمیں ھاٹیگ ءِ لوٹ ایت سُھریں تیرانی دیم ءَ چوں مھکیں کوہ ءَ اوشتگ لوٹ ایت واھشت گٹ گیر کنگ لوٹ انت درد ءُ دور چو زھریں جُور ءَ ھیر برگ لوٹ انت جنگ ھما بِہ بیت کہ تئی پدریچ یاد بہ کنت، جنگ ھما بہ بیت کہ تئی مرگ ءَ پد تو ابدمان بہ بئے ، جنگ ھما بہ بیت کہ دشمن تئی نام ءَ چہ پچ بہ لرزایت ءُ دل ءِ بُستگانی توار ءَ دل گیر بہ بیت ءُ ملکمت ءَ وت گوانک بہ جَنت جنگ ھما بہ بیت کہ دشمن ءِ دست ءِ سلاہ پچگرگ بہ بیت ءُ دشمن دست ءَ ھم سرینت مہ کنت مرچی ھمے جنگ من وتی چماں گوں دِست دیم پہ دیمی جنگ ءُ جنگ ءِ باج برگ۔

ندر پہ ھما نرمزاریں بچاں کہ اے جنگ ءِ بھر بیتگ انت ندر پہ ھما زِرپھازیں کنگراں کہ آیاں وتی تنگوئیں جان پہ راج ءَ ندر کتگ انت ءُ زمین ءِ تُن پروشتگ ۔

شاویز جان من زان آں اگاں تئی ماس تئی نمیران بوگ ءِ تامر ءَ بچار ایت ءُ تئی دیمونی ءِ جاگہ ءَ بچار ایت یک چیلانکے الم جنت ءُ پہ ارس ءِ گوارگ ءَ ھمیش گوش ایت کہ تو ابدمان ئے تو وتی پرز پیلو کُت آپتاب جان تئی نہ ترسی ءِ سر ءَ من پھر بند آں کہ تو وتی دیم ءُ پشت ھچ نہ چار ایت ءُ رسترانی بنجل ءَ تیر گواران کُت ءُ پہ بچکندے مرگ امباز کُت لیلٰہ جان تئی بچکند ابدمان انت کہ تو وتی ٹپی ئیں جاوراں ھم دشمن پروش ءَ چہ دُچار کُت ءُ کندان کندان ءَ زمین ءِ دلبند ءَ وپت ئے ءُ آجو بات بلوچستان ءِ توار گوں آزمان ءِ دلبند یں سر ءَ زرت ۔

شمئے دیمونی ءَ کُل راج پھر بندیت ءُ ھمیش جیڑ ات کہ اے جنگ ھمے وڑ سرجم ءُ برجم بیت، جنگ داں گڈی ساہ ءَ، جنگ داں آجو بلوچستان-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشانی ءَ گُشتگ کہ چاردہ اگست ءَ پاکستان ءِ بنھشت ءِ روچ بلوچ راج ءَ ھوار دمگ ءَ درستیں مھلوک ءِ واستا یک سیاھیں روچے –

پاکستان ءِ وجود ءِ آرگ ءِ سبب ءَ بلوچ راج وتی آجوئی ءَ زبھر بیتگ اے بے رھبندین ریاست ءِ بنھشت ءَ نہ ایوک ءَ بلوچ بلکیِ سندھی، پشتون ءُ سرائیکیاں ھوار ھر ھما مھلوک وتی راجی آجوئی، بستار ءُ پجاراں زبھر بیتگ اَنت –

میجر گوھرام بلوچ ءَ گُشتگ کہ پاکستان ءِ بنھشت ءِ جشن ءَ بلوچاں ھچ وڑیں ھُبناکی نیست پرچاکہ بلوچ نا وتی زیردستی ءِ جشن ءَ کن اَنت نا دشمن ءِ وشی ءِ جشن ءَ ھوار بنت ءُ وتی جنگ ءِ مزاک ءَ کن اَنت –

پاکستان تاکت، لالچ ءُ بیھارانی زور ءَ یک ٹولی ءِ وتی دست ءِ چیر ءَ کتگ ءُ آیاں زر دنت پاکستانی کنگ ءِ جھد ءَ اِنت -اشانی تہ ءَ لھتے لالچ ءُ لھتے ترس ءِ سبب ءَ پاکستان ءِ آیگ ءِ روچ ءَ مراگشاں بھر زور اَنت ءُ جشن آجوئی ءِ نام ءَ چیر ءَ پتر اَنت –

میجر گوھرام بلوچ ءَ گشتگ کہ چاردہ اگست ءَ جتا جتائیں مراگشانی چن ءُ لانچ بلوچستان ءَ مردماں پوجی تاکت ءِ زور ءَ یکجاہ کنگ اِنت -اے درچ ءَ کیچ ءَ بارڈر ٹریڈ یونین گپ ءُ تران ءِ نام ءَ پندل کنگ ءَ سیمسر ءَ یکجاہ کنگ اے مراگش ءِ واستا ھنر بیگ ءَ اَنت اے یک شرمناکیں گامگیجے پیسر ءَ سیمسری کار ءُ بار ءِ سر ءَ پابندی جنگ بیتگ ءُ مھلوک ءِ نان پچگرگ بیتگ نِی گپ ءُ تران ءِ نام ءَ مھلوک ءَ رد دیگ ءَ اِنت تانکہ چاردہ اگست ءَ یک مراگشے ءَ آرگ بہ بنت تانکہ گپ ءُ ترانی ءِ وھد ءَ جشن پاکستان ءِ مراگش ھم دارگ بہ بیت ھمیشی ءَ ما بارڈر ٹریڈ یونین مکران ءَ اے شور ءَ دے آ سیمسری کار ءُ بار ءِ پچ کنگ ءِ واستا چاردہ اگست ءَ ابید دگہ روچے ءَ بہ کن اَنت تانکہ سرمچارانی اُرش ءَ بہ رک اَنت –

میجر گوھرم بلوچ ءَ گوشتگ کہ اے کار ءُ باری مھلوک ءَ سرپد بیگ لوٹ ایت کہ کار ءُ بار آیانی انسانی ھک اِنت پاکستان ءِ وڑیں ریاستانی گون ءَ ھک ءِ پچگرگ ءِ واستا گھگیری کنگ لوٹ ات اِنت – دومی منت گرگ ءَ شرتر اِنت شما وتی ھک ءِ واستا جنگ کنگ ءَ در بہ بر اِت –

ما دراھیں مھلوک ءَ گوں دزبندی کن ایں آ چاردہ اگست ءَ پاکستانی مراگشاں گستا بہ بنت پرچاکہ بی ایل ایف چاردہ اگست ءِ مراگشاں نشانگ کنت بلوچستان ءَ پاکستان ءِ زورانسری وجود ءُ جشن ءِ آجوئی ھچ رنگ ءَ منّگ نہ بنت –

11اگست 1947 بلوچستان ءِ آجوئی ءِ روچ ءِ درگت ءَ چاگردی رسانکجاہ ٹوئٹر یک ہیش ٹیگ

11AugBalochistanDayپاکستان ءَ درستاں سر بُر بیتگ-

اے وھد ءَ بلوچ چاگردی راجداری باسکاں ھوار دگہ پھناتاں بندوکیں مردماں ھزاراں کچ ءَ مردماں اے روچ ءِ درگت ءَ وتی وتی ھیال ءُ لیکہ درشان کتگ اَنت، ھمے رنگ ءَ سدانی کچ ءَ سندھی، مھاجر ءُ پشتون سوشل میڈیا ایکٹیویسٹساں ھم اے روچ ءِ درگت ءَ وتی ٹویٹ کرتگ ءُ گُشتگ کہ بلوچ مھلوک ءِ گون ءَ ھمدردی اِنت –

بازیں سالانی تھاریں شپ ءَ پد پہ بلوچاں یک رژنے آجوئی ءِ بلیتگ اَت، بلے اے رژن ءَ دیر نہ گوازینت ءُ پد ءَ پہ بلوچاں یک تھاریں زمزیل بندیں شپے ءَ وتی روچ بکینت –

یازدہ اگست ءِ درگت ءَ بلوچستان ءِ آجوئی لوٹوکیں سیاسی ءُ نودربر گلاں اے روچ بلوچستان ءِ آجوئی روچ لیکیت ءُ چاگردی ترامجاھاں وتی ھیال درشانتگ انت –

اے درگت ءَ بلوچ نودربر گل آزات ءَ وتی شنگ کرتگیں درشان ءِ تہ ءَ یازدہ اگست بلوچ راج ءِ ھاتر ءَ کول ءُ کرار ءِ روچ نامینتگ ءُ گوشتگ کہ بلوچ راج ءَ سداں سالاں پد انگریز ءِ ایردستی ءَ وت ءَ رکینتگ ءُ وتی سرڈگار ءِ واجہ وت بوتگ اَنت بلے انگریزانی دگہ جوڈ کرتگیں بے دودیں ریاست ءَ آجوئی ءِ نھ ماہ ءِ گوزگ ءَ پد بلوچ سرڈگار ءِ سر ءَ دوبر زوگری کتگ ءُ بلوچ راج ءِ آجوئی پچ کپتگ –

آئی ءَ گوشتگ کہ بلوچ راجدپتر گواہ انت کہ بلوچ راج ءَ ھنچوش کہ زورگر ءُ سامراجی تاکتاں آھانی سرڈگارے سر ءَ بدیں چماں چارگ ءِ جھد کرت گڑا ڈیھ ءِ پُسگاں سرڈگار ءِ پھازگ ءَ وتی جانانی کربانی داتگ اَنت- پرتگیزیاں بگر تاں انگریزاں بلوچ راج ءَ ھچبر سامراجی تاکتانی دیم ءَ سر جھل نہ کرتگ ھما اولی روچ ءَ گوں آھاں جنگ داتگ بلوچ راج ھما اولی روچ ءَ انگریزانی سداں سالانی زورگیری نہ منّ اِتگ کہ آئی ءِ پدّریں درور خان آف قلات میر مھراب ھان انت کہ آئی ءَ نوزدہ سد ءُ سی ءُ نھ ءَ گوں انگریز ءَ جنگ کتگ کہ آئی سیزدہ نومبر ءَ تاکت ءِ زور ءَ کبزہ کنگ نہ منّیت ءُ شھید کنگ بوتگ – زورگیری ءِ اے دراجیں پند ءَ بلوچ راج ءِ پُسگاں ھر دَور ءَ جھد کُرتگ انگریز ءِ زوراکی ءَ زوگیری ءِ ھلاس کنگ ءِ ھاتر ءَ درسیں سیاسی ءُ جنگی وڑ ءُ ڈول کارمرز کرتگ انت – نوزدہ سد ءُ چِل ءُ ھپت ءَ آجوئیں راج ءِ جھد ءِ سوب ءَ یازدہ اگست ءَ بلوچ راج دنیا ءِ نقشہ ءِ تہ ءَ سرڈگار ءِ واھند بوتگ –

آئی ءِ گوشگ ات کہ بلوچ راج ءِ سداں سالانی جھد ءُ آجوئی ءَ پد انگریزانی جوڑ کرتگیں بے دودیں ریاست ءَ اے ایرنہ شُت ءُ پاکستان ءَ آجوئی ءِ نھ ماہ ءَ پد زوراکی کنان ءَ بلوچ سرڈگار ءِ سر ءَ اُرش کت ءُ بلوچ آجوئی پچ گپت – بلوچ راج ءَ پاکستان ءِ زورگیری ھچبر نہ منّت ءُ اولی روچ ءَ جھد بندات کرت کہ روچ ء مروچی برجاہ انت –

آئی ءِ گوشگ ات کہ زورگیری ءِ بگیری ءَ بلوچ راج ءَ مدامی یک دیوال جوڑ بوتگ ءُ ھچ وڑیں دری تاکتاں بلوچ سرڈگار ءِ سر ءَ ھاکمی کنگ ءِ موکل نداتگ – بلوچ راج ءَ پاکستان ءِ زورگیری ھم ھچ وھد ءَ نہ منّ اِتگ ءُ آجوئیں سرڈگار ءِ دوبر آجو کنگ ءِ ھاتر ءَ جھد برجاہ داشتگ ءُ یازدہ اگست مار ءَ وت پُشتی ھما جھد ءِ یاتاں پرینیت کہ آھاں زورگیری ءِ بگیری ءَ وتی جان کربان کرتگ انت – یازدہ اگست مار ءَ راجی آجوئی ءِ یاتاں پرینیت کہ یک بے دودیں ریاستے ءَ کسانیں وھد ءَ چہ ماں پچ گپتگ – یازدہ اگست بلوچ راجدپتر ءِ تہ ءَ کول ءُ کرار ھیسیت ءِ داریت ءُ مار ءَ راجی آجوئی ءِ ھاتر ءَ جھد کنگ ءِ راہ ءَ پیش داریت –

ھمے وڑ بلوچ سیاسی گل بلوچ نیشنل مومنٹ ءَ یازدہ اگست ءِ درگت ءَ وتی شنگ کرتگیں درشان ءَ گوشتگ کہ یازدہ اگست پہ بلوچ راجی گْوستانک ءَ یک چیدگے کہ بلوچ راج ءَ ھزاراں سرانی ندر کنگ ءُ بے کساس جنجالانی دیمپانی کنگ ءَ پد گیپتگ- بلوچ راج ءَ آ وھدے جھانی ءِ نوآبادیاتی زوراک برطانیہ چہ یکشلیں جُھد ءَ باور کنائینت ءُ لاچار کُرت کہ آ بلوچ ءِ سرڈگار ءَ توپک ءِ زور ءَ ایردست کُرت نہ کنت – ھمے ھاتر ءَ ھندوستان ءِ بھر ءُ بانگ ءُ آجوئی ءَ چہ چار روچ پیش بلوچستان ءِ آجوئی منّ اِت-

جارکش ءَ گْوشتگ اے برطانیہ بیتگ کہ چہ آئی ءِ پندلاں ھندوستان بھر ءُ بانگ کنگ ءُ چہ ھندوستان ءِ کش ءَ پاکستان نامیں سرکار ءِ جوڑ کُرت – آئی نہ ایوک ءَ بلوچ راجی آجوئی پچ گپت بلکیں مرچی اے سرجمیں دمگ ءُ جھان چہ ایشی ءِ ناشرکاریاں پھریز نہ اِنت –

آئی ءَ گْوشتگ کہ پاکستان گْوستانک ءُ دودمان ءَ زبھریں انچیں استانے کہ ایشی ءَ برطانیہ ءَ ھوار روکپتی زوراکاں پہ وتی نپ ءُ سیتانی پانپانی ءَ جوڑ کُرتگ – بلے اے استان دگرانی اوست ءَ پشت کپتگ کہ ایشی ءِ آسر ءُ ھلاس کنگ راجانی گْواچنی جُھد ءِ سوبمندی ءِ دروشُم ءَ پہ دلجمی بوت کنت-

جارکش ءَ گْوشتگ کہ گْوستانک ءِ اے جاہ ءَ برطانیہ ءَ وتی گْوستانکی ردی ءِ گِرگ ءَ بلوچ راجی ءِ آجوئی زْرمبشت منّگ ءُ پلہ مرزی کنگ لوٹ ایت – ایشی ءَ ابید دمگ ءُ جھان ءِ ایمنی ءُ سلامتی ءِ واب ھچبر سرجم نہ بنت۔

دومی نیمگ ءَ چاگردی ترامجاھاں آجوئی روچ ءُ بلوچ سرڈگار ءِ ھاتر ءَ دیمونی دیؤکیں ورنائیں سر نمیرانیں ریھان اسلم ءِ درگت ءَ کمپئین کنگ بوتگ –

سربوتگیں ھالانی رِد ءَ کیچ ءِ دمگ تجابان ءَ گوستگیں شپ ءَ ناشناسیں سلاہ بندیں مردماں یک مردمے تیرباران کتگ ءُ کُشتگ –

آئی ءِ پجار سردار عظیم ء حسین نام ءَ چہ بوتگ کہ سنگ آباد ءِ دمگ ءَ ناشناسیں مردماں تیرباران کُتگ کُشتگ –

دومی نیمگ ءَ بلوچ سلاہ بندیں گل یونائیٹڈ بلوچ آرمی ءِ جارکش مُرید بلوچ ءَ رسانکدراں وتی شنگ کرتگیں درشان ءِ تہ ءَ آئی ءِ کوش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ تجابان ءِ دمگ سنگ آباد ءَ ریاستی کمک کار عظیم ء حسین تیرآماچ کتگ ءُ کُشتگ –

آئی ءَ گوشتگ کہ سردار عظیم ریاستی کشندہ ٹولی دیدگ گچکی ءُ سعید لانٹو ءِ چیردستی ءَ دمگ ءِ تہ ءَ بزگریں راج ءَ تنگ کنگ، آھانی زمینانی سر ءَ توپک ءِ زور ءَ زورگری کنگ ءُ لس بلوچانی جنگ ءُ بیھار دیگ ءَ ھوار بوتگ ءُ یک زمینی جیڑھے ءَ سردار عظیم ءَ یک بزگریں زالبولے ٹیکٹرے سر ءَ لگت داتگ ءُ زدگ کرتگ ءُ ریاستی کشندہ ٹولی دیدگ گچکی ءِ چیردستی ءَ یک کمیٹی ءِ اڈ داتگ ءُ بزگریں راج ءِ زمینانی سر ءَ زورگری کُتگ ءُ وتی نام ءَ کُتگ انت –

جارکش ءَ گوشتگ کہ مئے گل اے وڑیں مردماں ءُ ریاستی کمکاراں ھچ بر پھل نہ کنت کہ آ بزگریں بلوچ راج ءَ تنگ بہ کن انت ءُ آھانی زمینانی سر ءَ زوگری بہ کن انت – ریاست ءِ چیردستی ءَ بلوچ راج ءِ سر ءَ زوراکی کنگے موکل ھچبر دیگ نہ بیت اِنت –

ترانگے پہ تابش ءَ

یاتگیری لچہ: یھزدار بلوچ

دی بلوچستان پوسٹ

تْرانگاں در نہ بئے پُلگدیں تابشی
چونیں مِھرے تئی پُلگدیں تابشی

آہ کہ ھین ءُ دَماں مجگ سر ءِ پَلپَٹ اَنت
ترانگ ءَ تئی اَڑے پُلگدیں تابشی

اَنگت ءَ زوت شُت ئے، کسّہ ناسرجم اِنت
گوشت ترا چو مکن تُلّسی! تابشی

تو و ھُدوناک اِت ئے گُلزمین ءِ وتی
زان ئے ھال مئے چے اِنت، پُلگدیں تابشی!

دپتر ءَ، تو و تاکے ٹھینت پہ وت ءَ
ما ودار ءَ ھمے نشتگ ایں تابشی

تنک ءُ دَر ایر بَر اَنت ما را تئی میتگ ءِ
او اَڑے تابشی، پُلگدیں تابشی

بلوچستان ءِ تیابدپی شھر گوادر ءَ ھواریں دمگ پسنی ءَ بجلی ءِ نہ بوگ ءِ سر ءَ زھرشانی، دگ بند، روانی مھتل بیتگ اَنت –

زھرشانی ءَ زالبولاں ھوار دگہ مردینانی ھم بازیں کچے ھوار اِنت، زھرشانی کنوکانی گوشگ اِنت کہ پسنی ءَ بازیں روچاں بجلی نیست چریشی ءِ سبب ءَ ما لاچار اِنت کہ دگاں بند بہ کن ایں –

آیانی گوشگ اِنت کہ ھردیں ما دگاں بند کن ایں گڑا ھما چندے دمانانی تہ ءَ بس بجلی شری ءِ سر ءَ پجینگ بیت اِنت پد ءَ مکران کیسکو وتی ھما ھادتاں یلو نہ کنت –

آیانی گوشگ اِنت مکران کیسکو ءَ یک رندے پد ءَ ایران ءِ نام گپتگ ءُ گُشتگ کہ ایران ءَ بجلی کم پیداک اِنت چریشی ءِ سبب ءَ مکران ءَ بجلی پُجگ ءَ نہ اِنت-

زھرشانی کنوکانی گوشگ اِنت مکران کیسکو ایران ءِ نام ءَ کارمرد کنت ءُ مھلوک ءِ زندگی چو تھاریں شپ ءَ اش کرتگ –

زھرشانی کنوکاں پسنی ءِ زیروپوائنٹ ءَ مزن شھدگ بند کرتگ ءَ نشتگ اَنت آیانی گوشگ اِنت وھدیکہ مھلوک برانز گپت گڑا کیسکو وتی بجلیاں شری ءِ سر ءَ دنت بلے اگاں پُر ایمنی ءِ بہ نند اِت گڑا مکران کیسکو وتی ھنراں ساز ایت اِنت –

آیانی گوشگ اِنت مکران کیسکو پہ زانت مکران ءَ بجلی نہ دیگ اِنت-

زانگ بہ بیت گوستگیں بازیں روچاں مکران ءِ دمگ کیچ ءُ پنجگور ءَ ھوار بازیں جاھاں بجلیانی بندش یکشل ءَ برجاہ اَنت –

مکران کیسکو ءِ واکدارانی گوشگ اِنت کہ ایران ءِ نیمگ ءَ بجلی بند کنگ بیتگ اَنت چریشی ءَ بجلی بند اَنت –

گوستگیں وھداں مکران ءِ مھلوک ءَ بجلیانی بندش ءِ ھلاپ ءَ زھرشانی کرتگ ءُ گُشتگ کہ مکران ءَ نیشنل گریڈ ءَ ھوار بہ کنت تانکہ مکران ءَ ھم کوراسی ھلاس بہ بیت، بلے دومی نیمگ ءَ کیسکو ءُ سرکار ءِ گامگیج گندگ بیگ ءَ نہ اَنت –