TBP Balochi

بلوچستان ءِ دمگ ھرنائی ءُ بولان ءِ نزیکیں ھنکین ءَ سلاہ بندیں مردماں پاکستانی پوج ءِ بنجل ءِ سرءَ اُرش کُتگ ۔

اھوالانی ردءَ سلاہ بندیں مردماں شاھرگ ءَ زرآلو بنجل ءِ سرءَ راکٹ ءُ دگہ سلاھاں گوں اُرش کُتگ، کہ اِشی سوب ءَ لشکریاں جانی ءُ مالی تاوان رستگ۔

واکداراں داں انگت اے درگت ءَ ھچ پئیم ءِ لیکہ ءِ درشان نہ کُتگ بلے ھندی اھوالانی ردءَ ترندیں اُرش ءِ تہءَ داں دیراں تراک ءُ تیرگواری ءِ توار اِش کُتگ بیتگ۔

شاھرگ ءُ کش ءُ کرءِ ھنداں چہ اِشی ءَ پیش ھم پاکستانی پوج ءِ سرءَ جتاھیں اُرش بیتگ اُنت کہ اِشانی تہءَ لشکریاں جانی ءُ مالی تاوانانی دیمپانی کنگ کپتگ۔

ھمے دمگانی تہءَ بلوچ سلاہ بندیں آجوئی لوٹوکیں گل بلوچ لبریشن آرمی ءَ پیش ءَ ھم انچیں اُرشانی زمہ واری من اِتگ اَنت۔

دو روچ پیسر بولان ءِ مارگٹ ھند ءَ تراکناکیں شورانی ترکگ ءِ سوب ءَ پاکستانی پوج ءِ بمب ڈسپوزل اسکواڈ ءِ یک کارمند ءِ مُرتگ اَت، آ اُرش ءِ زمہ واری ھم بی ایل اَے ءَ من اِتگ اَت۔ مروچی بیتگیں اُرش ءِ زمہ واری داں انگت ھچ گل ءَ نہ من اِتگ۔

بلوچستان ءِ دمگ دالبندین ءَ پاکستانی پوج ءَ یک مردمے دزگیر کنگ ءَ پد بیگواہ کرتگ-

بیگواہ کنگ بیتگیں مردم ءِ پجار گل حسن سیاپاد ء اللہ بکش ءِ نام ءَ زانگ بیتگ –

دمگی مردمانی رد ءَ گوستگیں روچ ءَ ھدائے رھم کلی ءَ آئی ءِ لوگ ءَ آ پاکستانی پوج ءَ دزگیر کرتگ ءُ برتگ –

زانگ بہ بیت بلوچستان ءَ زورانسری آوارجنیانی وئیل گوستگیں دو دھکاں برجاہ اَنت –

گوستگیں روچاں انٹرویو ءِ وھد ءَ وزیراعلیٰ بلوچستان قدوس بزنجو ءَ گوشتگ ما اے چارگ ءَ ایں بیگواھیں مردمانی کچ چُنت کساس ءَ اِنت ءُ آ ڈنی ملکاں نہ شتگ اَنت-

دومی نیمگ ءَ بلوچ نیشنل مومنٹ ءِ انفارمیشن سیکرٹری دلمراد بلوچ ءَ قدوس بزنجو ءِ بیان ایر جتگ ءُ گوشتگ بیگواھیں مردمانی بارو ءَ قدوس بزنجو ءِ بیان راستی ءَ چہ یکدم دور اِنت-

آئی ءَ گشتگ کہ بیگواھیں مردمانی بارو ءَ بنداتی ءَ پاکستان ءِ بیان ھمے بوتگ کہ قدوس بزنجو ءَ گشتگ بلوچستان ءَ ھچ مھلوک ءِ نمائندگ نیست پارلیمنٹ مھلوک ءِ نمائمندگی ءِ نام ءَ ریاست وتی کارندھاں کار ایت ریاست ء پاکستان ءَ اینچک ھمت نیست کہ آ چِست کرتگیں مردماں آمیدگساں پیش بہ کنت –

بلوچستان ءِ تیابدپی شھر گوادر ءَ برجاھیں زرمبشت “حق دو تحریک ” ءِ سروک مولانا ھدیت الرھمان ءِ سروکی ءَ گوادر ءَ زھرشانی نندانک بندات کنگ بیتگ –

نندانک گوادر ءَ پورٹ ءِ دگ وائی چوک ءَ بندات کنگ بیتگ کہ اود ءَ بازیں کچے ءَ مھلوک ءَ زھرشانی نندانک ءَ بھر زرتگ ءُ دگ بند کرتگ –

زھرشانی نندانک ءَ گوادر ءَ ھوار جتا جتائیں جاھانی مردماں بھر زرتگ ءُ زھرشانی نندانک ءَ نشتگ اَنت –

گوادر ءِ نندانک ءِ سروکی ءَ “حق دو تحریک ” ءِ سروک مولانا ھدایت الرھمان کنگ ءَ اِنت کہ آیانی گوشگ اِنت گوادر ءَ دری ٹرالرمافیا ءُ روزگار ءُ دگہ لوٹانی پژدر ءَ بیگ اِنت –

آیانی گوشگ اِنت کہ اد ءَ ھزاراں چوکی ءُ چیک پوسٹ پھزداری ءِ نام ءَ برجم کنگ بیتگ اَنت بلے اے چیک پوسٹ ءُ چوکیاں لس مھلوک ازاب کنگ بیگ ءَ اِنت –

آیانی گوشگ اِنت کہ مئے لوٹانی پژدر ءَ یک لوٹ ئے سرکار ءَ کول کتگ کہ آ گوادر ءِ یونیورسٹی اِنت کہ آئی ءِ منزوری بیتگ ءُ دومی سرسرانکی ھمے ھال ھم بیتگ کہ گوادر ءِ ضلع ءَ بازیں چیک پوسٹ چست کنگ بیتگ اَنت –

زھرشانی نندانک ءَ نندوکیں مردمانی گوشگ اِنت کہ مئے زھرشانی نندانک ھما وھد ءَ برجاہ بیت اِنت دانکہ سرکار مئے سرجمیں لوٹاں سرجم نہ کنت –

دومی نیمگ ءَ سینیٹر کھدہ بابر ءَ زھرشانی نندانک ءَ نندوکیں مردماں وتی بیان ءِ تہ ءَ دزبندی کرتگ ءُ گوشتگ کہ اے نندانک ءَ ھلاس بہ کن اَنت –

کھدہ بابر ءِ گوشگ اِنت کہ انیگیں سرکار نوک اتکگ ءُ آ گوادر ءِ جیڑھانی گیش ءُ گیوار ءَ جیڑگ ءَ اِنت ءُ زوت ھمے جیڑھاں ھلاس کنت –

آئی ءَ گشتگ کہ انیگیں سرکار ءِ تر ءُ تاب گوادر ءَ اشی ءَ گمان کنگ بیت اِنت کہ آ بلوچستان گوادر ءِ جیڑھانی گیشنگ ءَ دلجمی اِنت –

کھدہ بابر ءَ گشتگ کہ انیگیں سرکار ءَ کنٹانی ہور ءَ ھوار سیمسر ءِ پچ کنگ ءُ باپاری ءِ بارو ءَ گامگیج زرتگ –

آئی ءَ گشتگ کہ ٹرالرنگ ءِ جیڑہ ءِ لوٹ کنگ بیتگ اے ھم انیگیں سرکار ءَ گامگیج زرتگ ءُ زوت ٹرالرنگ بلوچ زر ءَ گلینگ بنت –

زھرشانی نندانک ءِ سبب ءَ مھلوک ءَ دگ بند کرتگ ءُ چریشی ءَ شھریاں بازیں کچے ءَ روگ ءُ آیگی جیڑہ ءُ مشکلانی دیمپانی اِنت –

پاکستانی نجی ٹی وی چینل مراگش جرگہ ءَ سلیم صحافی ءَ گپ کنان ءَ وزیراعلیٰ بلوچستان قدوس بزنجو ءَ گوشتگ کہ ما چارگ ءَ ایں بیگواھیں مردمانی کچ چُنت کساس ءَ اِنت –

آئی ءَ رسانکدراں بازیں نمبر گوش اَنت بی این پی مینگل ءِ کچ جتا اِنت – وزیر اعلیٰ قدوس بزنجو ءَ گوشتگ کہ ھوم ڈپارٹمنٹ چارگ اِنت کہ بیگواھیں مردم اوگانستان ءُ دگہ ڈیھاں نہ شتگ اَنت –

مھماندار سلیم صحافی ءَ جست ءِ سر ءَ بلوچستان ءَ برجاھیں بیگواھیں مردمانی جیڑہ ءِ سر ءَ چی گامگیج زورگ ءَ اِنت چریشی ءِ سر ءَ وزیراعلیٰ بلوچستان ءَ پسو داتگ ءُ گوشتگ کہ راستیں کچ ءِ سرجم کنگ ءِ جھد ءَ ایں –

وزیراعلیٰ بلوچستان ءَ گوشتگ کہ ھوم ڈپارٹمنٹ راستیں کچ ءِ شوھاز ءَ اِنت، آئی ءَ ٹاہ داتگ کہ بیگواھیں مردمانی لھتے ءِ لسٹ ھنچین اَنت کہ لھتے اوگانستان ءُ دگہ ڈیھاں شتگ اَنت –

مھماندار ءَ جست ءِ سر ءَ تو اشی ءِ زورامندیں کمیٹی جوڑ کنگ ءَ ئے چریشی ءِ سر ءَ وزیراعلیٰ ءَ پسو داتگ کہ اگاں کسے بیگواہ اِنت دراھیں اسٹیک ھولڈرزاں ھوار کار کن ایں گمان بیگ ءَ اِنت لھتے مردم اوگانستان ءَ شتگ اَنت –

اے درگت ءَ ٹی بی پی ءَ بلوچ نیشنل مومنٹ ءِ بنجاھی انفارمیشن سیکرٹری دلمراد بلوچ ءَ گوں گپ کرتگ ءُ آئی ءَ گُشتگ کہ بیگواھیں مردمانی بارو ءَ پاکستان ءِ بنداتی بیان ھمے بیتگ کہ انی قدوس بزنجو کنگ ءَ اِنت اے راستی ءِ بلوچستان ءَ ھچبر مھلوک ءِ نمائندگیں سرکار نہ بیتگ پارلیمنٹ ءَ مھلوک ءِ نمائندگ ءِ نام ءِ سر ءَ ریاست وتی کارندھاں کار ایت، ریاست پاکستان ءَ اے ھمت نیست اِنت آ بیگواھیں مردماں آمیدگساں بیاریت ءُ پیش بہ کنت –

دلمراد بلوچ ءَ گوشتگ کہ پاکستان یک پوجی ریاستے کہ آئی ءَ پوج ھلائینگ ءَ اِنت اد ءَ ھچ جمھوریت نیست اِنت، بلوچستان ءَ پوج ءِ سرکار اِنت ءُ اُستانی نامگپتیں نمائندگاں ھم پوج اد ءَ داریت اِت اِنت پوج آیاں کار ایت کہ آ بلوچ راجی زرمبشت ءِ ھلاپ ءَ گیش کار کت بہ کن اَنت –

آئی ءَ گُشتگ کہ بیگواھیں مردمانی بارو ءَ قدوس بزنجو ءِ بیان راستی ءَ چہ یکدم دور اِنت کہ اشی ءَ ھچ بستار نیست اِنت –

دلمراد بلوچ ءَ گشتگ کہ قدوس بزنجو ءُ آئی ءِ برات وت بیگواھیں مردمانی آوار جنگ ءَ ھوار اَنت ءُ نیکراھی ءِ نام ءِ سر ءَ برانزگری ءَ قدوس ءُ آئی ھاندان ھوار بیتگ اَنت -قدوس بزنجو ءُ آئی ءِ برات ءَ جتا جتائیں جاھاں ڈیتھ اسکواڈ جوڑ کرتگ ریاستی سروکی ءَ بلوچ زرمبشت ءِ ھلاپ ءَ کار کنگ ءَ اَنت ءُ ھمے وڑ ءَ اشانی پت ھمے کارانی بھرمند بیتگ –

زانگ بہ بیت اشی ءَ پیسر سرکاری وزرا ضیاء لانگو ءُ وفاق ءَ بیگواھیں مردمانی بارو ءَ ڈری ڈیھاں روگ ءِ بھتام جتگ اَنت کہ چریشی ءِ سر ءَ بلوچ پھناتاں اے گپ رد کرتگ اَنت ءُ سرکار ءَ ایرادگریانی دیمپانی کنگ کپتگ –

قدوس بزنجو ءِ اے بیان ءِ پژدر ءَ ٹی بی پی ءَ بلوچستان ءَ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءِ چیئرمین نصراللہ بلوچ ءَ گوں گپ کنان ءَ آئی ءَ گُشتگ کہ مارا قدوس بزنجو ءِ سرکار ءَ گوں باز اُمیت بیتگ اَنت بلے نوکیں وزیراعلیٰ ءِ اے بیان ءَ مارا ناامیت کرتگ ما یک پَٹ ءُ پولے بندات کرتگ چریشی ءَ پد دوھزار ءُ نوزدہ ءَ اُستانی سرکار ءَ بیگواھیں مردمانی لسٹ سرکرتگ ءُ ھمے لسٹ بنجاھی سرکار ءِ گور ءَ ھم سر کرتگ، قدوس بزنجو ءَ چیلنج کن آں آ مئے گپ ءِ نیمگ ءَ سرکرتگیں کچاں رد بہ کنت –

نصر اللہ بلوچ ءَ گُشتگ کہ ما نہ گوش ایں بیگواھیں مردماں یل بہ کن بلے ابید آمیدگس ءَ گیر کانونی منگ نہ بیت اِنت، بیگواھیں مردماں آمیدگساں پیش بہ کنت سرکار ءِ اے گپ بیگواھیں مردمانی کیساں تاوان دات کت کنت –

آئی ءَ گُشتگ کہ اشی ءَ پیسر ھم اے وڑیں ٹاہ دیگ بیتگ اَنت کہ بیگواھیں مردم درملکاں شتگ اَنت بلے پد ءَ اے گپ ءِ پژدر ءَ سپریم کورٹ ءَ چیلنج کنگ ءَ پد ریاستی ادارہ وتی گپ ءَ پشتکنز بیتگ اَنت –

دبئی ءَ برجاھیں گوازی آئی سی سی ٹوئنٹی ورلڈکپ ءِ مزن ءُ گڈی آسری ءَ نیوزلینڈ ءِ کپتان کین ولیمسن ءَ وتی زور ءَ بیست آوارانی تہ ءَ چار وکٹانی تاوان ءَ یک سد ءُ ھپتاد ءُ دو رنز جوڑ کرتگ اَت-

آسٹریلیا ءِ نیمگ ءَ کپتان ایرون فنج پنچ رنزانی مھمان بیتگ اَت بلے ڈیوڈ وارنر ءُ مچل مارش ءَ نود ءُ دو رنز آوارتگ ءُ میچ نیوزلینڈ ءَ چہ پچ گپتگ ھردوکیں بیٹسمیناں نیم سنچری اسکور کرتگ اَت –

ڈیوڈ وارنر ءَ پنجاہ ءُ سَے رنز ءَ آوٹ بیتگ اَت بلے مچل مارش وکٹ ءَ جاڑیگ بیتگ اَت – نیوزلینڈ ءِ نیمگ ءَ ھردوکیں وکٹ ٹرینٹ بولٹ ءَ گپتگ اَنت –

اشی ءَ پیسر آسٹریلیا ءِ کپتان ایرون فنج ٹاس کٹ اِتگ ءُ نیوز لینڈ ءَ را بیٹنگ کنگ ءِ سِلاہ جتگ- کیویز ءِ نیمگ ءَ سیمی فائنل ءَ ہیروڈیرل مچل بازیں چیزان بے سوب بیتگ بس تھنا یازدہ رنز ءَ پد پویلین واتر بیتگ اَت – فلپس ءَ ھژدہ رنز اننگز گوازی کنگ ءَ سوبمند بیتگ اَت –

مارٹن کپٹل ءَ بیٹنگ ءِ وھد ءَ بازیں مشکل پیشداشتگ اَنت ءُ سِی ءُ پنچ بالاں بس بیست ءُ ھشت رنز ءَ اننگز گوازی کنگ ءَ پد آوٹ بیتگ اَت بلے کپتان کین ولیمسن ءَ وتی زور ءِ وس ءَ نیم سنچری کرتگ اَت چِل ءُ ھشت بالانی تہ ءَ ھشتاد ءُ پنچ رنز ءِ جوڑ کرتگ اَت ءُ پد ءَ آؤٹ بیتگ اَت-

آسٹریلیا ءِ نیمگ ءَ جوش ھیزل ووڈ ءَ باز جوانیں رنگے ءَ بولینگ کتگ اَت کیوی ءِ بیٹیمن سک پریشان بیتگ اِت اَنت ءُ سَے وکٹ ھم گپتگ اِت ئِے ھمے وٹ یک وکٹے ایڈم زمپا ءِ بھر ءَ کپتگ اَت –

مارگٹ اُرش ءَ زورگیریں پوج ءِ بمب ڈسپوزل اسکواڈ نشانگ کتگ – جئیند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ مارگٹ اُرش ءِ زمّہ واری منّ اِتگ گوشتگ کہ مئے سرمچاراں گوستگیں روچ ءَ بولان ءِ دمگ مارگٹ ءَ زورگیریں پاکستانی پوج ءِ کارمند نشانگ کتگ انت –

آئی ءَ گوشتگ کہ اُرش ءِ آسر ءَ زورگیریں پوج ءِ بمب ڈسپوزل اسکواڈ ءِ کارمند سپاھیگ انعام اللہ مرتگ ءُ دگہ یکے زدگ بوتگ –

جارکش ءَ وتی درشان ءِ گڈسر ءَ گوشتگ کہ مئے گل بی ایل اے اُرش زمّہ واری ءَ منیت ءُ کول کنت کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں ترندی ءَ گوں برجاہ بنت –

سربوتگیں ھالانی رِد ءَ بلوچستان ءِ دمگ دکی ءَ اشکرانی کاریز ءَ گیس پُربوھگ ءَ تراک ءِ بوتگ چریشی ءَ چار کاریز کار زدگ بوتگ ءُ سَے دمتوس بوتگ انت –

مائنز بنشون ءِ رِد ءَ وئیل گوستگیں شپ ءَ کساس ادار چار بج ءَ دیم ءَ اتکگ کہ دکی ءَ اشکرانی کاریز ءَ زھریں گیس پُر بوھگ ءِ سوب ءَ تراک بوتگ –
بنشون ءِ رِد ءَ وئیل ءَ پد چار کاریزکار کاریز ءِ تہ ءَ پنستگ انت آھانی تہ ءَ سَے ریسکو کتگ ءُ در کتگ انت –

بنشون ءِ رِد ءَ ریسکیو میان ءَ کمکی دگہ چار دمگی کاریز کار دمتوس ءُ زدگ بوتگ انت کہ ھما دمان ءَ نادراھجاہ ءَ سر کتگ انت – اشکرانی کاریز ءَ پنستگیں چارمی کاریز کار وئیل ءِ ھپت ادار پد ھم کشگ نبوتگ-

یک شھری داں یک ماھے ءِ بندیگ بیگ ءَ پد مروچی یل کنھ بیتگ –

ھالانی رد ءَ گوشگ بیتگ کہ گوستگیں ماہ دَہ اکتوبر ءَ ایرانی چیریں ادارھانی دست ءَ گرگ بیتگیں یونس کوھی مروچی زنداناں یل کنگ بیتگ –

ھالانی تہ ءَ گوشگ بیتگ کہ یونس جکیگور ءِ نندوک اِنت کہ گوستگیں ماہ ءَ ایرانی چیریں ادارھاں دزگیر کرتگ ءُ برتگ کہ آ جکیگور ءَ ویرنگ ءُ دگہ کار ءُ کسابی مردم بیتگ کہ آ گوستگیں دَہ سالاں جکیگور ءَ نندوک بیتگ –

یونس ءِ گرگ ءُ برگ ءِ بارو ءَ چیریں ادارھاں دگہ گپ دیم ءَ نیاورتگ بلے آیانی رد ءَ یونس ءِ جتگیں بھتام رد بیتگ ءُ چرے سبب ءَ یونس یل کنگ بیتگ –

بلوچ کمپن فعالین ءِ رد ءَ ھمے سال ءَ نود مردمانی دزگیریانی رپورٹ سر بیتگ اَنت کہ آیانی شست کسانی ھال دیم ءَ آرگ بیتگ ءُ آ دگہ سِی مردمانی بارو ءَ دگہ تچکیں سرپدی نہ بیتگ اَنت –

روکپتی بلوچستان ءَ گیشتر گرگ بیتگیں مردم پاھو دیگ بنت کہ گوست ءَ بازیں کسے ایرانی آمیدگساں جتا جتائیں بھتامی پژدر ءَ پاھو داتگ اَنت –

بلوچستان ءِ دمگ بولان ءَ گوستگیں روچ ءَ ناشناسیں مردماں پاکستانی پوج ءِ سر ءَ بمب اُرشے نشانگ کتگ-

ٹی بی پی ءَ سر بیتگیں ھالانی رد ءَ بولان ءِ دمگ مارگٹ ءَ پوجی کارمند نشانگ کنگ بیتگ اَنت اود ءَ بمب ڈسپوزل اسکواڈ ءِ کارمند کلئررینس ءَ دزبند بیتگ اَنت کہ تراک بیتگ –

پاکستانی پوج ءِ انٹر سروسز پبلک ریلیشنز (آئی ایس پی آر) ءَ یک کارمندے ءِ مرگ ءِ راستی کنان ءَ گوشتگ کہ لکی مروت ءَ سیادی کنوکیں سپاھی انعام اللہ راہ ءِ سر ءَ کلیں بمب ءِ دور کنگ ءَ بیران بیتگ –

چہ گوستگیں روچ ءَ پاکستانی پوج ءِ سر ءَ بلوچستان ءَ بیوکیں اُرشاں اے سیمی اُرش اِنت –

چریشی ءَ پیسر بنجاھی شھر شال ءِ دمگ نواں کلی ءَ پولیس اسکواڈ ءِ نزیک ءَ بمب تراکے ءَ پولیس کارمندے ءَ ھوار شش کس زدگ بیتگ اَنت –

پولیس ءِ رد ءَ تراک نواں کلی بازار ءَ، اود ءَ ایگل اسکواڈ گشت ءَ بیتگ، واکدارانی رد ءَ تراک پرپٹے ءَ پِٹ بیتگ کہ ٹائم ڈیوائس ءِ زور ءَ تراکینگ بیتگ – تراک چار سیر بیتگ کہ اشی ءَ بیرنگ مان بیتگ –

شال ءَ بیتگیں بمب تراک ءِ زمہ واری بلوچ سلاہ بندیں گل یونائیٹڈ بلوچ آرمی ءَ من اِتگ-

یک دگہ اُرشے بلوچستان ءِ دمگ کیچ ءَ پاکستانی پوج ءِ سر ءَ بیتگ کہ چریشی ءَ دو کارندہ مرتگ اَنت- آئی ایس پی آر ءَ وئیل ءِ راستی کنان ءَ گُشتگ کہ پوج ءَ تربت ءِ کش ءُ گوراں ناشرکارانی جاڑیگ بیگ ءِ ھال ءِ سر بیگ ءَ دمگ ءَ بیڑ برتگ –

درشان ءَ گوشگ بیتگ کہ پوج ءِ نیمگ ءَ انگیر کنگ ءَ پد تیرگواری بیتگ کہ چریشی ءَ سلاہ بنداں بازیں کچے ءَ تاوان چِست کنگ کپتگ، تیرگواری ءَ دو سپاھی سرگودھا ءِ جھمنندیں رمضان ے سوابی ءِ جھمنند لانس نائیک لیاقت اقبال بیران بیتگ اَنت –

اے دمگ ءَ بلوچ سلاہ بندیں گل پرکار اَنت – بلے تنی وھدی سلاہ بندانی جانی تاوانانی ھال نیتکگ اَنت ءُ اے اُرش ءِ زمہ واری تنی وھدی ھچ کس ءَ نہ منّ اِتگ –