TBP Balochi

بلوچستان ءَ جھانی وبا کرونا ویروس ءِ آماچ بوتگیں یانزدہ نوکیں نادراہ دیما اتکگ اَنت-

سربوتگیں ھالانی رِد ءَ گوستگیں بیست ءُ چار ادارانی تہءَ بلوچستان ءَ جھانی وبا کرونا ویروس ءِ نادراھی ءِ آماچ بوتگیں یانزدہ دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ دو ھزار ءُ چار سد ءُ بیست ءُ پنچ ءَ سر بوتگ اَنت-

ھمے پئیم ءَ بلوچستان ءَ جھانی وبا کرونا ویروس ءِ نادراھی ءَ بیران بوتگیں مردمانی کچ داں اَے وھدءَ سَے سد ءُ پنجاہ ءُ ھشت ءُ سر بوتگ-

دومی نیمگ ءَ چہ کرونا ویروس ءَ سِی ءُ یک ھزار ءُ نھ سد ءُ ھشتاد ءُ دو مردم داں انگت وش بوتگ انت-

زانگ بہ بیت جھانی وبا کرونا ویروس ءَ گوستگیں دو سال ءِ تہءَ سرجمیں جھان ءَ لکھاں مردم کُشتگ ءُ نادراھی ءِ آماچ کُتگ اَنت، ھمے پئیم سرجمیں جھان ھم پہ تر ءُ تاب ءَ بند کنگ بیتگ-

بلے نوں کم کم ءَ جھان پچ بیگ ءَ اِنت ءُ ھمک روچی زند پدءَ دیمروی کنان اِنت-

سربوتگیں ھالانی رِد ءَ بلوچستان ءِ دمگ پنجگور ءُ ڈیرہ بگٹی ءَ تیرگواری ءَ یک مردم ءِ بیران ءُ یکے زدگ بیتگ وھدیکہ بسیمہ ءُ وندر ءَ دگ ءِ وئیلاں پنچ مردم زدگ بوتگ –

گیشیں ھالانی رِد ءَ بلوچستان ءِ دمگ پنجگور ءَ ناشناسیں مردمانی تیرگواری ءَ یک مردم ءِ بیران بوتگ – بیران بوتگیں مردم ءِ پجار ارشاد ءِ نام ءَ چہبوتگ –

اھوالکار ءِ رِد ءَ وئیل چتکان بازار ءَ دیم ءَ اتکگ کُشندہ گاڑی ءِ سوار بوتگ اتکگ انت مرد ءِ تیر باران کُتگ کُشتگ –

دمگی پولیس ءَ جون دست گپتگ ءُ نادراھجاہ ءَ سر کتگ ءُ اودا اژدری چار ٹپاس ءَ پد کھول ءِ ھوالگ ءَ داتگ –

دگہ یک تیرگواری ءِ وئیل ءِڈیرہ بگٹی ءِ دمگ جروار ءَ دیم ءَ اتکگ کہ ناشناسیں مردمانی تیرگواری ءَ یک مردم ءِ زدگ بوتگ – زدگ بوتگیں مردمنادراھجاہ ءَ سر کنگ بوتگ –

دومی نیمگ ءَ دگ ءِ وئیل ءَ سَے مردم زدگ بوتگ –

وئیل وندر ءِ دمگ ساند ءَ دیم ءَ اتکگ کہ دو پرپٹانی ڈیک ورگ ءَ سَے مردم زدگ بوتگ – زدگ بوتگیں مردمانی پجار مبارک جاموٹ،  ناصر بلوچءُ نورداد ءِ ناماں چہ بوتگ انت –

ویلفئیر ٹرسٹ ءِ مردماں زدگ بوتگیں مردم دست گپتگ ءُ جام غلام قادر نادراھجاہ ءَ سرکتگ انت –

دگہ وئیل ءِ بسیمہ ءَ دیم ءَ اتکگ کہ گاڑی ءِ چپی بوھگ ءَ دو مردم زدگ بوتگ انت – 

وئیل بسیمہ ءِ دمگ قیصر آباد ءِ نزیک ءَ ھما وھد ءَ دیم ءَ اتک کہ مردم نوشکی ءَ چہ پنجگور روگ ءَ بوتگ انت –

زدگ بوتگیں مردم ھما دمان ءَ بسیمہ نادراھجاہ ءَ برگ بوتگ انت وئیل ءِ آماچ بوتگیں مردمانی سیادی چہ نوشکی ءَ اِنت ءُ وئیل تیز روگے سوب ءَدیم ءَ اتکگ –

کلاتو ءَ پوجی پانگس ءِ سر ءَ اُرش کتگ ءُ جانی ءُ مالی تاوان داتگ – میجر گوھرام بلوچ

بلوچ آجوئی لوٹوکیں سلاہ بندیں گل بلوچستان لبریش پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں جاؤ ءَ دژمن پاکستانی پوج ءِ پانگس ءِ سر ءَ اُرش کتگ –

جارکش ءَ گوشتگ کہ اُرش گوستگیں روچ ءَ دوشمبے ءَ آواران ءِ دمگ جاؤ کلاتو ءَ برجاھیں پاکستانی پوجی پانگس ءِ سر ءَ راکٹ ءُ مزنیں سلاھانی گوم ءَ کنگ بوتگ – چریشی ءَ زورگیریں پوج ءل جانی ءُ مالی تاوان ءِ دیمپانی بوتگ –

جارکش میجر گوھرام بلوچ ءَ درشان ءِ گڈی ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

بلوچستان ءِ دمگ ھرنائی ءِ ھند شاھرگ ءَ پاکستانی پوج ءِ نیمگ ءَ برزی لشکر کشی بندات کنگ بیتگ –

گوستگیں روچ ءِ بیگاہ ءَ شاھرگ ءِ دمگ زر آلو ءَ پوجی چیک پوسٹ ءِ سر ءَ سلاہ بندیں مردماں اُرش کرتگ اَت – مروچی سھب ءَ پوج ءِ نیمگ ءَ شاھرگ ءُ کش ءُ گوری دمگاں برزی لشکر کشی بندات کنگ بیتگ –

ٹی بی پی ءَ سر بیتگیں ھالانی رد ءَ لشکر کشی ءَ شَش ءِ کچ ءَ ھیلی کاپٹر بھر زرتگ ءُ کہ چریشانی تہ ءَ گن شپ ھیلی کاپٹر ھم ھوار بیتگ اَنت بلے دگہ جانی تاوانی ھال سر نہ بیتگ اَنت –

واکداراں گوستگیں روچ ءَ بیتگیں اُرش ءُ مروچیگیں لشکر لشکر کشی ءِ بارو ءَ ھچ نہ گوشتگ ءُ اُرش ءِ زمہ واری ھم تنی وھدی ھچ گل ءَ نہ منّ اِتگ –

بلوچستان ءِ دمگ ڈیرہ مراد جمالی ءَ زمین ءِ جیڑہ ءِ سر ءَ سَے مردمانی گوش ءِ ھلاپ ءَ تربت ءَ سول سوسائٹی ءِ نیمگ ءَ پریس کلب ءِ دیم ءَ زھرشانی کنگ بیتگ –

زھرشانی ءَ سول سوسائٹی، سیاسی ءُ کیچ آل پارٹیز ءِ رھشوناں بھر زرتگ ءُ کچھی ءَ کشگ بیتگیں مردمانی واستا انساپ ءِ لوٹ اش کرتگ –

زھرشانی کنوکاں گوشتگ کہ سرداری نزام ءَ سَے نیزگاریں زمیندار کشتگ اَنت ءُ انگت ءَ آ ڈن ءَ ترگ ءَ اَنت ءُ چریشی ءِ پژدر ءَ آیاں مجرمانی دزگیر کنگ ءُ سزا دیگ ءِ لوٹ کرتگ –

اے وھد ءَ کیچ آل پارٹیز ءِ کنوینر مشکور انور، بی این پی عوامی ءِ بنجاھی رھشون مھمد جان، جماعت اسلامی ءِ امیر غلام یاسین، انجمن تاجران تربت ءِ سروک حاجی کریم بکش، نثار آدم جوسکی، اعجاز جوسکی، چیئرمین گوھرام اسلم، تربت سول سوسائٹی ءِ کنوینر گلزار دوست، چاگردی باسک میران حیات، بی ایس او ءِ بنجاھی جوائنٹ سیکرٹری ظفر رند ءَ ھوار دگہ مردم جاڑیگ بیتگ اَنت –

زانگ بہ بیت گوزگیں ماہ نومبر ءِ سیزدہ رمس ءَ نسیر آباد ءُ ڈیرہ مراد جمالی ءِ ھواریں دمگ کچھی ءَ سَے زمیندار کُشگ بیتگ اَنت کہ آیانی بھتام دمگی سردار ءِ سر ءَ لڈگ بیتگ –

کُشگ بیتگیں مردمانی کھولاں لاش زرتگ ءُ دگ ءِ سر ءَ زھرشانی کنان ءَ انساپ ءِ واستا دگ بند کرتگ ءُ مجرمانی گرگ ءِ لوٹ کرتگ –

دومی نیمگ ءَ کُشتگیں مردمانی ارزی نامہ گوستگیں اُستانی وزیر مھمد عاصم کرد گیلو ءَ ھوار دگہ مردمانی نام ءَ نبشتگ کنگ بیتگ –

سر وزیر بلوچستان قدوس بزنجو ءَ اے جاورانی گر ءُ دار کنگ ءَ اسپیشل سیکریٹری ہوم ولی مھمد کاکڑ کمشنر نصیر آباد ڈاکٹر سعید اھمد جمالی ءِ سروکی ءَ یک کمیٹی ءِ ھم جوڑ کرتگ ءُ لیویز فورس ھم جاڑیگ کنگ بیتگ اَنت –

روکپتی بلوچستان ءِ دمگ قلعہ گنج ءَ ایرانی نارٹکس ءِ تیرگواری ءَ یک مردمے بیران ءُ یکے زدگ بیتگ-

دمگی مردمانی رد ءَ اے گاڑی ءِ سر ءَ ھما وھد ءَ تیرگواری کنگ بیتگ کہ اے گاڑی روگ ءَ بیتگ ءُ انٹی نارٹکس ءَ آئی ءِ سر ءَ تیرگواری کرتگ ءُ چریشی ءَ یک مردمے بیران ءُ یکے زدگ بیتگ-

انٹی نارٹکس ءَ دگہ گپ دیم ءَ نیاورتگ اَنت ءُ نانکہ اے مردمانی پجار دیم ءَ آورتگ اَنت – بلے گوست ءَ انٹی نارٹکس ءَ نشہ باپاری ءِ بھتام ءَ باز ھمے وڑیں مردمانی سر ءَ تیرگواری ھم کرتگ-

دمگی مردمانی گوشگ اِنت کہ انٹی نارٹکس ءِ تیرگواری ءَ گاڑی کپتگ ءُ چریشی ءَ گاڑی آس ھم لگ اِتگ –

بلوچ کمپن فعالین ءِ رد ءَ ھمے سال ءَ بازیں چوشیں وئیل بیتگ اَنت کہ نسبت گوستگیں سال ءَ اے سال ءِ وئیلاں دَہ درسد گیشی اتکگ ءُ آئی ءِ گوشگ اِنت انتزامیہ ءُ دگہ ادارہ باید ناروائی مہ کن اَنت –

بلوچستان ءِ دمگ آواران ءَ سلاہ بندیں مردماں پاکستانی لشکرءِ بُنجل ءِ سرءَ اُرش کُتگ۔

اُرش آواران ءِ ھنکین جھاؤ ءِ کلاتو ءِ ھند ءَ بستگیں لشکری بُنجل ءِ سرءَ بیتگ۔

ھالانی ردءَ لشکریاں اُرش ءِ تہءَ تاوانءِ دیمپانی کنگ کپتگ بلے داں انگت تاوانءِ سدکیں ھال نہ رس اتگ وھدیکہ اُرش ءَ پد اُرش کار در آیگ ءَ سوبمند بیتگ اَنت۔

زانگ بہ بیت اے دمگانی تہءَ بلوچ آجوئی لوٹوکیں سلاہ بندیں گل مدام لشکریانی سرءَ اُرش کن اَنت، بلے داں انگت اے اُرش ءِ زمہ واری کجام ھم گلءَ نہ زرتگ۔

ایردستیں راج سندھی بلوچ ءُ پشتوناں ھوار بوھگ ءُ جھد کنگی انت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ نود شش روچ سرجم بوتگ – پشتون تحفظ مومنٹ ءِ رھشوناں بنجل ءَ اتکگ ءُ بیگواھیں مردمانی کھول ءِ گوم ءَ دلپدری درشانتگ –

بنجل ءَ اتکگیں مردمانی میان ءَ تران کنان ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ پاکستان ءِ تہ ءَ ایردستیں راج سندھی بلوچ ءُ پشتوناں ھوار بوھگ ءُ جھد کنگ لوٹیت اِنت –

ماما قدیر بلوچ ءِ گوشگ ات کہ پاکستان ءِ زوراکیانی سر ءَ میاں استمانی راج ءِ ھچ نگوشگ پدردی ئے، میاں استمان ءُ انسانی ھکانی ادارھانی بلوچستان ءَ برجاھیں زوراکیانء سر ءَ ھچ نگوشگ ءَ ریاست ءِ پاکستان ءَ بلوچانی زروانسری آوار جنی ءَ گیشتر دئیگ بوھگ انت –

ماما قدیر بلوچ ءِ گوشگ ات کہ زورگیریں پاکستان وتی سرجمیں تاکت ءَ گوں بلوچ ءِ پُرایمنیں جھد ءَ کاؤنٹر کنگے کوشست انت بلے مئے شھیدانی ھونانی بدولت ءَ مروچی بلوچ راجی زرمبشت مھکمی ءَ گوں برجاہ انت ءُ دیم ءَ روان انت –

آئی ءِ گوشگ ات کہ پاکستان وتی زر زیریں ایجنٹ آنی کمک ءَ بلوچستان ءِ جیڑہ ءَ ادے نشتگیں لس مھلوک ءِ محرومی مارشتاں گوں ھوار کنت ءُ نزریاتی باسکانی جھد ءَ کاؤنٹر کنگے جھد انت بلے بلوچ شھیداں وتی جان پہ یک مکسدے ءِ ھاتر ءَ کربان کتگ پہ ملام ھاتر ءَ ناں –

ماما قدیر بلوچ ءِ گوشگ ات کہ پاکستان ءِ زوراکیانی آماچیں ایردستیں راج سندھی بلوچ ءُ پشتوناں ھوار بوھگ ءُ وتی شھیدانی جُھد ءَ دنیائے دیم ءَ آرگ ءُ آھانی جھد منزل ءَ تاں سر کنگ لوٹیت –

بلوچستان ءَ زورانسری آوار جنگ ءُ بیگواہ بوتگیں مردمانی درگت ءَ بلوچستان ءِ سر وزیر قدوس بزنجو ءِ درشان ءِ سر ءَ بیگواھیں مردمانی کھولاں گوشتگ کہ بیگواھیں مردمانی درگت ءَ قدوس بزنجو ءِ درشان راستی ءَ چہ باز دور انت –

بیگواھیں مردمانی کھولاں گوشتگ کہ سر وزیر ءِ درشان ءَ چہ کھولاں گیشتر ناامیتی بوتگ –

دوازدہ سالاں چہ زورانسری آوار جنگ ءُ بیگواہ بوتگیں ڈاکٹر دین محمد بلوچ ءِ زھگ ءُ وائس فار بلوچ مسنگ پرسنز ءِ رھشون سمی بلوچ ءَ بلوچستان ءِ سر وزیر درشان ءِ سر ءَ ھمے گوشتگ کہ دوازدہ سال انت بیگواھیں مردمانی کھول دگانی سر ءَ زھرشانی کنگ ءَ انت لھتے ءَ وتی بیگواھیں مردمانی جون دست کپتگ انت، شاھد ھست انت، آمیدگساں کیس چلگ ءَ انت کمیٹی (غیرفعال) جوڑ کنگ بوتگ انت –

آئی ءَ گوشتگ کہ مزن وزیر عمران خان ءَ دوستیگیں مردمانی یل کنائینگ ءِ ھاتر ءَ کول کُتگ ءُ نوک گچین بوتگیں سر وزیر ءِ گپاں اشکُن اِت –

بیگواھیں انسانی ھکانی باسک راشد حسین بلوچ ءِ گوھار فریدہ بلوچ ءَ ھم قدوس بزنجو ءِ بیگواہ مردمانی درگت ءَ داتگیں درشان ءِ سر ءَ گوشتگ کہ بلوچستان ءَ راجی نمائندگی نام ءَ ھما مردم گچین کنگ بنت کہ بلوچستان ءِ ناھکی ءِ ھک انت –

آئی ءِ گوشگ ات کہ قدوس بزنجو سر وزیر انت آئی ءَ ھچ ھک نیست کہ بیگواھیں مردمانی کھولانی ٹپ ءَ واد پربریچیت سروزیر ءِ درشان ءَ بیگواھین مردمانی کھول ناامیتی ءِ آماچ بنت –

زانگ بہ بیت گوستگیں روچاں ھستیں وھدے بلوچستان ءِ سر وزیر قدیوس بزنجو ءَ بیگواھیں مردمانی درگت ءَ درشان داتگ ءُ گوشتگ کہ بیگواھیں مردم اوگانستان ءُ دگہ دری ملکاں تتکگ ءُ شتگ انت –

سر وزیر ءِ اے درشان ءَ پد بلوچستان ءَ ساڑی ئیں راجدوستیں راجکاری گل ءُ بیگواھیں مردمانی کھولان سر وزیر درشان رد کُتگ ءُ گیرزمہ واری گوشتگ –

سر وزیر ءِ درشان ءِ سر ءَ بلوچ نیشنل مومنٹ گوشگ ات کہ قدوس بزنجو پوج ءِ نیمگ ءَ چہ گچین بوتگیں نمائندگے آئی ءِ اے درشان ھیرانی ءِ نہ انت –

نوشکی ءَ زورانسری آوار جنگ بوتگیں آصف ءُ رشید بلوچ ءِ گوھار سائرہ ءَ بلوچ ءَ ٹوئیٹر ءِ تہ ءَ نبشتگ کہ بلوچستان ءَ زورانسری آوار جنی ریاستی ادارھاں وت وھد وھدے سر ءَ منّ اِتگ –

ھمے سال ءَ مچ ءَ پوج ءِ دست ءَ زورانسری آوار جنگ بوتگیں ودود ساتکزئی ءِ گوھار گل زادی بلوچ ءَ گوشتگ کہ مئے دوستیگیں مردم مئے چمانی دیم ءَ آوار جنگ بوتگ انت سر وزیر ءِ درشان بید ءِ دروگ ءَ دگہ ھچ ءِ نہ انت –