TBP Balochi

سی ٹی ڈی ءِ بنشون ءَ رسانکدراں وتی شنگ کرتگیں درشان ءِ تہ ءَ گوشتگ کہ آواران ءِ دمگ چیدگی ءَ کمپان ءِ تہ ءَ سلاہ بندانی ساڑی بوگ ءِ ھال سر بوتگ کہ آ چاردہ اگست ءِ مراگشاں اُرش کنگ ءِ شوربندی انت ھما دمان ءَ سی ٹی ڈی ءَ کمپان ءَ بیڑ برتگ ءُ سلاہ بندیں گل بی ایل ایف ءِ دو باسک سراج احمد ءُ حسن جان دزگیر کرتگ انت –

سی ٹی ڈی ءِ رِد ءَ آھانی گور ءَ سیزدہ گرام تراکناکیں شورو، دو ڈیٹونیٹر، سَے میٹر پرائمہ کورڈ ءُ سَے دستی بمب دست کپتگ، کہ پاکستان ءِ آجوئی روچ ءِ درگت ءَ مزنیں ناشرکاری ءِ شور بندی ءَ بوتگ انت کہ سی ٹی ڈی ھما دمان ءَ بے سوب کرتگ انت دوئیں مردمانی ارزی ھزدار ءِ تانہ ءَ نبشتہ کنائینتگ انت گیشیں پٹ ءُ آھانی نیٹورک ءِ دومی باسکامہ شوھاز برجاہ انت –

وھدیکہ چاگردی ترامجاھاں اے ھال شنگ بوگ ءِ ھواری ءَ بلوچ سوشل میڈیا ایکٹویسٹاں سی ٹی ڈی درشان دروگ گوشتگ کہ اے ھردو ورنا پیش بزاں یازدہ جون ءَ پاکستانی پوج ءَ زورانسری آوار جتگ ءُ بندیگ کرتگ انت مروچی آھاں دروگیں درشان ءِ دیگ ءَ گیشتر پسارینگ لوٹ اَنت –

زانگ بہ بیت چد ءُ پیش ءَ سی ٹی ڈی دروگیں میڑ ءِ نام ءَ بندیگیں بندیگیں بلوچ کُشتگ اَنت ءُ آ بلوچ سلاہ بندیں گلاں گوں بندوک کرتگ انت – ھمے زوتاں بلوچستان ءِ بنجاھی شھر شال سی ٹی ڈی ءَ پنچ مردم ءِ کُشگ ءِ ٹاہ داتگ ات ءُ آھانی نام ءَ زاھر نہ کرتگ اِت اَنت پد ءَ رند ءَ پنچیں مردمانی تہ ءَ یکے پجار قدرت اللہ ء محمد وارث ملازئی ءِ جھمنند ھاران ءِ نام ءَ چہ بوتگ ات کہ چہ ھاران ءَ آئی ءِ جند ءِ لوگ ءَ آوار جنگ ءُ بیگواہ کنگ بوتگ ات پد ءَ دروگیں میڑ ءِ نام ءَ کُشگ ءُ چگل دیگ بوتگ اَت –

ھمے سال ءِ ھژدہ جنوری ءَ بلوچستان ءِ بنجاھی شھر شال ءِ رودراتکی شھدگ ءِ سر ءَ پاکستانی پوج ایگل اسکواڈ ءَ پٹ ءُ پول ءِ وھد ءَ دو ورناہ سمیع اللہ پرکانی ءُ جمیل اھمد پرکانی دزگیر کنگ ءَ پد سی ٹی ڈی ءِ دست ءَ داتگ اَنت ایگل فورس ءَ ٹاہ داتگ اَت گپتگیں مردمانی گور ءَ دزبمب دز کپتگ –
ھردوکیں ورنا پد ءَ سی ٹی ڈی ءَ مستونگ ءَ دگہ سَے مردمانی ھمراھی ءَ کہ پیسر ءَ دزگیر کنگ بیتگ اَنت ءُ دروگیں جنگ ءِ نام ءَ کُشگ ءُ چگل دیگ بیتگ اَنت –

سر بیتگیں ھالانی رد ءَ کراچی ءِ دمگ بلدیہ مواچھ گوٹھ ءِ نزیک ءَ بمب تراکے بیتگ، تراک ءَ دَہ مردم بیران بازینے زدگ بیتگ اَنت –

ایڈمنسٹریٹر کراچی مرتضیٰ وھاب ءَ اے وئیل ءِ بارو ءَ گُشتگ کہ تراک ءَ ھپت مردم زدگ بیتگ اَنت –

پولیس ءِ رد ءَ تراک ءِ جاہ چارگ بیگ ءَ اِنت بمب ڈسپوزل اسکواڈ ھم پرمان کنگ بیتگ –

پولیس ءِ رد ءَ مواچھ گوٹھ ءَ تراک ءِ نشانگ بیوکیں مردم یک آروسی ءِ نیادے ءَ واتر روگ ءَ بیتگ اَنت –

ایس پی بلدیہ ءِ رد ءَ گوشتگ کہ گاڑی ءَ بیست ءَ داں بیست ءُ پنچ مردم سوار بیتگ اَنت، زالبول ءُ چک ھوار بیتگ اَنت اے کھول لانڈھی شیرپاؤ کالونی ءِ جھمنند اَنت کہ آروسے ءَ پد واتر روگ ءَ بیتگ اَنت بلدیہ مواچھ موڑ ءَ پرپٹ سواریں مردماں کریکرے چگل داتگ، وئیل ءَ پد ٹرک ءِ ڈرائیور دزگیر کرتگ –

ایس ایس پی فدا حسین جانوری ءِ وئیل ءِ بارو ءَ گُشتگ کہ گاڑی ءَ سلنڈر ءِ ترک ءَ تراک بیتگ،تراک ءِ جاہ چار ءُ ٹپاس بیگ ءَ اِنت دمگ سرجم ءَ انگیر کرتگ ءُ پَٹ ءُ پول بندات بیتگ،وئیل ءِ ھال ءِ سر بوگ ءَ پولیس ءُ کمکی کارمند سر بیتگ اَنت ءُ زدگ بیتگیں مردم نادراہ جاہ ءَ سر کنگ بیتگ اَنت –

تراک ءَ پد وئیل ءِ جاہ ءَ سر بیتگیں کارمندانی گوشگ اِنت کہ منی گاڑی ءَ گیس سلنڈر مان نہ بیتگ، بمب ڈسپوزل اسکواڈ وئیل جاہ ءَ جاڑیگ اَنت ءُ جتا جتائیں پھناتاں چارگ ءَ اَنت، بمب ڈسپوزل اسکواڈ تراک ءِ بارو ءَ گڈی پَٹ ءُ پول بیگ ءَ پد ھال دیگ بیت اِنت –

سول ھسپتال ءِ انتزامیہ ءِ رد ءَ تراک ءِ آسر ءَ نُھ کس بیران ءُ دَہ کس زدگ بیتگ اَنت چریشانی تہ ءَ دو کسانی جاور نگیگ اَنت –

ھسپتال ءِ رد ءَ بیران بیتگیں مردمانی تہ ءَ پنچ زالبول ءُ چار چک زدگ اَنت –

دومی نیمگ ءَ بمب ڈسپوزل اسکواڈ ءَ وئیل جاہ ءَ پَٹ ءُ پول ءَ پد گُشتگ کہ تراک سلنڈر ءِ نہ اِنت بلکیں بمب تراکے بیتگ –

بمب ڈسپوزل اسکواڈ ءِ رد ءَ تراک ءَ ٹرک باڑی ءُ نٹ بولٹانی نشان پِر اَنت اے بمب ءِ کارمرد بیتگ –

پولیس ءِ رد ءَ بیران بیتگیں مردمانی سیادی یکیں کھول ءَ اِنت –

چریشی ءَ ایس ایس پی کیماڑی فدا حسین ءَ بنداتی ٹرک ءِ تراک سلنڈر گُشتگ اَت –

سر وزیر سندھ مراد علی شاہ ءَ مواچھ گوٹھ ءِ وئیل ءِ گامگیج زورگ ءِ کڈن کنان ءَ وزیر ٹرانسپورٹ سندھ ءَ سرجمیں ھالانی لوٹ کرتگ، سر وزیر سندھ ءَ تراک بیران بیتگیں مردمانی کھولانی کمک ءُ زدگ بیتگیں جوانتریں درمان جاھاں برگ ءِ کڈنی کرتگ اَنت –

سربوتگیں ھالانی رِد ءَ بلوچستان ءِ بنجاھی شھر شال، ھب، مشکے، بلیدہ ءُ گچک ءَ ناشناسیں سلاہ بندیں مردماں پاکستانی پوج ءِ پانگس ءُ آجوئی اسٹالزانی سر ءَ اُرش کتگ – اُرشاں پاکستانی پوج ءُ بیرک بھا کنوکیں کارمنداں جانی ءُ مالی تاوانانی دیمپانی بیتگ، اُرشانی زمّہ واری بلوچ آجوئی لوٹوکیں سلاہ بندیں گل بی ایل اے، یو بی اے ءُ بی ایل ایف ءَ منّ اِتگ انت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ مشکے، ھب ءُ بلیدہ ءَ پاکستانی پوج ءِ سر ءَ بوتگیں اُرشانی زمّہ منّ اِتگ ءُ گوشتگ کہ مئے سرمچاراں آدینگ ءِ بیگاہ ءَ آواران ءِ دمگ مشکے ءَ منگلی ھند ءَ برجاھیں پوجی پانگس ءِ سر ءَ راکٹ دگہ مزنیں سلاھانی گون ءَ اُرش کُتگ –

آئی ءَ گوشتگ کہ سَے راکٹ پانگس ءِ تہ ءَ کپتگ اَنت ءُ ھمے وڑ پانگس ءِ پھازگی سنگرانی سر ءَ سرمچاراں مزنیں سلاھانی گون ءَ اُرش کتگ چریشی ءَ یک سنگر ءِ تہ ءَ ساڑی ئیں دو کارمند مُرتگ ءُ پانگس ءِ تہ ءَ کپتگیں راکٹاں چہ ھم پوج ءَ جانی ءُ مالی تاوان رس اتگ –

جارکش ءَ گوشتگ گوستگیں شپ ءَ ادار نُھ ءَ مئے سرمچاراں بلیدہ بٹ ءَ برجاھیں آرمی ءِ بنجاھی پانگس ءِ سر ءَ ھم راکٹ اے ون گولہ آس داتگ چریشی ءَ سَے پوجی کارمند مرتگ اَنت –

جارکش ءَ دیمتر ءَ وتی درشان ءِ تہ ءَ گوشتگ کہ بلوچستان ءِ کار ءُ باری شھر ھب چوکی ءَ ھم مئے سرمچاراں پوجی پانگس ءِ سر ءَ اُرش –

آئی ءَ گوشتگ کہ ھب چوکی پُل کش ءَ مینار ءِ سر ءَ برجاھیں پانگس سر ءَ وتکاریں سلاھاں گوں اُرش کتگ – اُرش ءِ آسر ءَ زورگیریں پوج ءَ جانی ءُ مالی تاوان ءِ دیمپانی بوتگ –

جارکش ءَ وتی درشان ءِ تہ ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی تاں برجاہ مان انت زورگیریں ریاست ءِ نیمگ ءَ آجوئی شاتکامی ءُ مراگش ھچ وڑ ءَ منّگ نہ بنت راج چریشاں چہ دور بہ بنت –

ھمے وڑ بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گچگ ءَ پوج ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں پنجگور ءِ دمگ گچک جوان تاک ءَ پاکستانی پوج ءِ کواری پانگس ءِ سر ءَ راکٹ ءُ دگہ مزیں سلاھانی گون ءَ اُرش کُتگ، اُرش ءِ آسر ءَ پاکستانی پوج ءَ جانی ءُ مالی تاوان رس اتگ –

جارکش ءَ وتی درشان ءِ تہ ءَ گوشتگ کہ اُرش ءَ پد دژمنیں پوج ءِ کارمنداں چہ وتی ترس ءَ لس مھلوک ءِ سر ءَ ھر نیمگ ءَ ماٹر گولہ آس داتگ ءُ دمگ وتی انگیر ءَ کتگ ءُ سرمچارانی گرگ ءِ جھد کتگ بلے بے سوب بوتگ –
جارکش ءَ گوشتگ کہ سرڈگار ءِ آجوئی ءَ تاں مئے اُرش برجاہ مان انت –

دومی نیمگ ءَ بلوچستان بنجاھی شھر شال ءَ پاکستان ءِ آجوئی ءِ شاتکامی اسٹالز ءِ سر ءَ بوتگیں اُرش ءِ زمّہ واری یو بی اے ءَ منّ اِتگ –

یو بی اے ءِ جارکش مزار بلوچ ءَ وتی شنگ کرتگیں درشان ءِ تہ ءَ گوشتگ کہ مروچی چاردہ اگست ءَ پاکستان ءِ آجوئی روچ ءَ مئے سرمچاراں ادار یازدہ ءُ بیست ءُ پنچ ءَ پاکستانی بیرک بھاکنوکیں اسٹالز ءِ سر ءَ دستی بمب ءِ چگل داتگ، دستی بمب اُرش ءَ اسٹال جنوکیں کارمند ءَ ھوار سرکاری ایجنسی ءِ دو کارمند ٹپی بوتگ اَنت –

جارکش مزار بلوچ ءَ گوشتگ کہ ایردستیں بلوچستان ءِ نندوکیں راج ءَ گوں یکبرے پد ءَ گوشیں کہ زورگیریں دژمنیں ریاست ءِ وتگڑیں مراگش ءُ پاکستانی بیرک جنوک مئے نشانگ ءِ تہ ءَ انت مئے سرمچار آھاں کجام ھم وھد ءَ نشانگ کن ایں –

بلوچستان ءَ گوستگیں روچ ءَ بہ گر داں مروچی ءَ بازیں جاھاں سلاہ بندیں گلانی اُرشانی دیمپانی اِنت ءُ چریشی ءَ بازیں جاھاں سرکاری تکاں ھم اُرش راست کنگ بیتگ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ نیمگ ءَ زھرشانی برجاہ، زھرشانی بنجل ءَ مروچی چار ھزار ءُ چار سد ءُ نُھ روچ سرجم بیتگ، کمیونسٹ پاٹی ءِ کلانیں رھشون مھمد یحی، مھمد اسلم بنگلزئی، سلطان ءُ دگہ پھناتاں بندوکیں مردم بنجل ءَ اتکگ ءأ کھولانی گون ءَ پدردی اش درشان کتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ گپ کنان ءَ گُشتگ کہ بلوچستان ھما رھشوناں سیاست ءَ بھر زرتگ ءُ راجدپتر ءِ کرد پیلو کرتگ آیاں راجدپتر ھچبر بے ھیال کت نہ کنت – ھما مردماں سیاست ءَ گام ھما وھد ءَ ایر کرتگ اَنت ھمے وڑ پچیں بنجل ءِ تنک ءُ تھاروکی بیتگ، تیرانی توار، قمر قید، درملکی ءُ بلوچستان ءِ نہ روگ ءَ چنکس درداں گوستگ ءُ مروچی رژناہ بیتگ اَنت –

ماما قدیر بلوچ ءَ گُشتگ کہ بے کساس بلوچ اے راہ ءَ کربان بیتگ اَنت نہ زاناں چنکس سرگردیں بلوچانی ھون ھوار اَنت بلوچستان آس ءُ ھون ءَ گوستگ ءُ مروچی ھم آیانی تپتگیں باپ سما بیگ ءَ اِنت مروچی ھم کجا نا کجا مارا سھری ءِ رنگ گندگ ءَ آیگ ءَ اِنت کوھانی تہ ءَ جنگلانی تہ ءَ ھون ءِ بوہ آیگ ءَ اِنت نہ زاناں چنکس ورنا ھاک ءَ گوں ھوار بیتگ اَنت ءُ بنت ھون ءِ وشبو ءِ رنگ گندگ ءَ آیگ ءَ اَنت ھمے اُمیت ءُ چریشی ءَ پد جنگل ءُ کوھانی دامن ءَ سھر دابیں پُل آیانی کسھاں کار اَنت آیانی گور ءُ کپن جنگل ءُ کوھانی لمب ءَ درتکگ اَنت ءُ گندگ ءَ کاینت بلوچستان ءَ نِی کجا شتگ ءُ سر بیتگ کوھانی دامن ءَ کروتکگیں گدانانی تہ ءَ وشیانی تہ ءَ ایر کپتگ اَنت آیانی مات، گوھار ساپیں آپ ءِ درگیجگ ءَ در پہ دری کوھانی چمگانی بن ءَ شوھاز کن اَنت نا زاناں چنکس دیستگیں واب دنیا ءَ گار کنگ بیتگ اَنت چنکس پشکپتگ اَنت –

آئی ءَ دیمتر ءَ گشتگ کہ بلوچاں وتی ھون یک نوکیں راجدپترے ءِ باندات ءَ نبشتگ کرتگ اَنت نی آیانی ھون جنگل پہ جنگل توار جنان اَنت بنت ءُ کشندھاں ھساب لوٹگ ءَ اَنت آیانی وابیں جون کوھانی تہ ءَ برز بیان اَنت بدبھتی ءَ بلوچستان ءَ ناوشیانی تہ ءَ دور دیگ بیتگ بلوچانی وتی سیاست ءَ دوریں پند ءُ امن ءُ ایمنی ءِ جد ءُ جھد ءَ یک داستانے گوازینتگ –

بلوچ نیشنل مومنٹ ءِ جارکش ءَ وتی شنگ کرتگیں درشان ءَ گُشتگ کہ چاردہ اگست ءِ روچ نا ایوک ءَ پہ بلوچ راج ءَ سیاھیں روچے بلکیں سرجمیں دنیا ءِ واستا یک ساھیں روچے ءِ بستار اِنت –

آئی ءَ گُشتگ کہ اے روچ ءَ رو جھلی زوراوراں وتی مپادانی واستا ھندوستان بھر ءُ بانگ کرتگ ءُ پاکستان ءِ وجود دیم ءَ آؤرتگ کہ چریشی ءَ ھپت ماہ ءَ پد بلوچستان ءِ سر ءَ زورگری کرتگ ءُ مئے راجی پجار لپاشتگ –

آئی ءَ گُشتگ کہ برطانیہ ءِ دزمانجنی ءَ ابید بلوچستان بیست ءُ ھپت مارچ نوزدہ سد ءُ چِل ءُ ھشت ءَ داں وتی وجود ءُ واکدانی رکینگ ءَ سوبمند بیتگ، بلے چاردہ اگست ءَ ھندوستان ءِ بھر ءُ بانگی ءُ پاکستان ءِ وجود ءِ آیگ ءَ پد پاکستان ءِ پوجی زورانی سبب ءَ زورانسری بلوچستان گپتگ-

جارکش ءَ گُشتگ کہ ھندوستان ءِ دینانی بنیاد ءَ بھر ءُ بانگ کنگ ءَ گیشتر دمگ ءِ تہ ءَ ناگیگی آرگ بیتگ اَنت پاکستان ءَ بلوچستان ءِ سر ءَ زورگری کرتگ ءُ مارا گلامی ءِ تھاریں شپ ءِ میار کرتگ –

آئی ءَ گُشتگ کہ ھما روچ ءَ بہ گر داں انیگ ءَ بلوچانی پدریچ کُشی برجاہ اَنت مروچی دنیا نیکراھی وساچی ءُ ناشریانی دیمپان اِنت اے پندل ءُ ھنراں چاردہ اگست نوزدہ سد ءُ چل ءُ ھپت ءَ رو اَنت ھوار بنت، چریشی ءَ پاکستان ءَ پر زور کنگ بیتگ ءَ نیکراھی جزبگ ءِ سر ءَ ھزارانی انسان کُشگ بیتگ اَنت –

آئی ءَ گُشتگ کہ بنگالیاں ھوار ھما مھلوک کہ پاکستان ءِ آیگ ءَ پیش پیش بیتگ اَنت آیانی گون ءَ ھم پاکستان ءَ راجدپتر ءِ بدتریں زلم ءُ رواکی کرتگ اَنت -بنگالی راج وشبھت بیتگ اَنت زوت اش وتی آجوئی ءِ گرگ ءَ سوبمند بیتگ اَنت بلے دگہ راج انگت ءَ زُلم ءِ آس ءَ سُچگ ءَ اَنت –

جارکش ءَ گُشتگ کہ پاکستانی زورگری ءَ پد ھما روچ ءَ چہ بلوچ راج ءَ گھگیری ءِ راہ گچین کرتگ بازیں جنجال ءُ جیڑھاں گوزان بیتگ ءُ مروچی ءَ داں دیمونیانی کاروان برجاہ اِنت – بلوچ راج ءَ کجام ھد ءَ داں دنیا ءَ را اے سدکی داتگ کہ پاکستان ناشرکارانی گُدو اِنت ءُ پاکستان ءِ وجود ءِ ھمراھی ءَ دمگ ءَ ھوار دنیا ءِ امن ءُ ایمنی ءِ واب ناسرجم اَنت –

آئی ءَ گُشتگ کہ پاکستان نا ایوک ءَ بلوچ ڈیھ ءِ سر ءَ زورگر ءُ بلوچ ءِ دشمن اِنت بلکیں دمگ ءَ ھواریں ڈیھانی ھواری ءَ سرجمیں بنی آدم زاتامی دشمن اِنت – مروچی دمگ ءَ ھواریں ڈیھاں ناشرکاری ءَ برانز دیگ ءَ پاکستان ءِ دست ھوار اَنت اے ڈیھاں بلوچ راج ءِ گون ءَ ھوار بیگ ءُ ھمگرنچی ءَ دشمن ءِ ھلاپ ءَ جد ءُ جھد کنگی اِنت –

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کتگیں درشان ءِ تہ ءَ گوشتگ مئے سرمچاراں گوستگیں شپ ھرنائی، بولان ءُ پنجگور ءَ زورگریں پوج چار اُرشانی نشانگ کتگ ءُ چریشی ءِ آسر ءَ دشمن ءِ ھپت کارندہ مرتگ ءُ بازینے ٹپی بوتگ اَنت-

بلوچ لبریشن آرمی ءِ جارکش ءَ گْوشتگ کہ مئے سرمچاراں اولی اُرش شاھرگ ءِ دمگ کھوسٹ ءَ زرد آلو ءِ ھند ءَ زورگریں پوج ءِ یک چیک پوسٹے ءِ سر ءَ گوں ٹوھیں سلاھاں نشانگ کتگ ، اُرش مارٹر پِٹ ءَ ساڑی ئیں دو کارندھاں ھوار چار کارندہ مرتگ ءُ بازینے ٹپی بوتگ اَنت وھدیکہ چیک پوسٹ سک باز تاوان رس اتگ-

چیک پوسٹ ءِ سر ءَ اُرش ءَ پد زورگریں پوج ءِ کمانڈنٹ لورالائی سکاؤٹس ءِ گاڑیانی تہ ءَ ھواریں یک کاروانے دمگ ءَ سر بوگ ءِ جُھد ءَ بوتگ بلے پیسر ءَ چہ شور بندی ءَ پیسر سنگر گپتگیں سرمچارانی دومی ٹولی ءَ ٹوھیں ءُ وتکاریں سلاھاں گوں دشمن ءِ کاروان نشانگ کتگ – اُرش ءِ آسر ءَ دشمنیں پوج ءِ سے کارندہ ھما دمان ءَ مرتگ ءُ میجر کاسم ءَ ھوار بازینے ٹپی بوتگ اَنت وھدیکہ لگوریں دشمن ءِ بازیں کارندھاں وتی ھمراہ یل کُتگ ءُ تتکگ اَنت-

جارکش ءِ گْوشگ اِنت کہ اُرش ءِ آسر ءَ دشمن ءِ سے گاڑیاں سک باز تاوان رس اتگ وھدیکہ اُرشاں پد دشمن ءِ بالگرد وتی مرتگیں ءُ ٹپی بوتگیں کارندھانی برگ ءُ دمگ ءَ شیلنگ کنگ ءِ ھاتر ءَ سر بوتگ اَنت بلے دشمن ءِ سر ءَ بوتگیں سوبمندیں اُرش ءَ پد سرمچار سلامتی وتی مھریں جاھاں سر بوگ ءَ سوبین بیتگ اَنت-

بلوچ لبریشن آرمی ءِ سرمچاراں سیمی اُرش گوستگیں شپ پنجگور ءِ دمگ کرکی ءَ دشمنیں پوچ ءِ یک چیک پوسٹے گوں راکٹ ءُ دگہ سلاھاں نشانگ کتگ – اُرش ءَ چہ دشمنیں پوج ءَ جانی ءُ مالی تاوان چست کنگ کپتگ-

جیئند بلوچ ءَ گْوشتگ کہ سرمچاراں چارمی اُرش بولان ءِ دمگ پیر اسماعیل ءَ دشمن ءِ یک پوجی بُنجلے ءِ سر ءَ گوں راکٹاں نشانگ کتگ – اُرش ءَ دشمن ءِ بازیں کارندھے ٹپی بوتگ ءُ بُنجل ءَ ھم تاوان رس اتگ-

بلوچ لبریشن آرمی بلوچ راج ءَ را سرپد کنگ لوٹ اِیت کہ آ زورگریں ڈیھ پاکستان ءِ وتگڑ ءَ وتساچیں جشن آزادی ءِ مراگشاں چہ وت ءَ دیر بدار اَنت – بلوچ سرمچار اے وڑیں مراگش ءُ مراگشانی اَڑ دیوکیں دشمن ءِ ھنسگ چٹانی سر ءَ گوں تُرندیں اُرش کنت-

نبشتانک: بِہ گندے تو شموشتگ ئے

نبشتہ کار: مھروان کمبر

دی بلوچستان پوسٹ

مُدّتے بیت کہ گوں تو جُتاھاں، مُدّتے گْوستگ کہ پہ ترا نِمدی نبشتہ نہ کُتگ اگاں نبشتہ بِہ کُتیں ھم تا چے نبشتہ کُتگ اَت ھردیں من کلم سیائیاں پِر جتگ گُڑا ھوناں گوں مِیس اِتگ، بلے مروچی من دل ءَ سنگے پِر داتگ ءُ اِسپیت چکیں تاکانی سر ءَ ھوناں گون وتی مارِشتاں نبشتہ کنان آں۔

اِشکنگ ءَ تئی شھر ءَ مروچی وشّیانی زیمر بُتکگ اَنت ءُ کْوزہ گیریں مُلک پاکستان ءِ آجوئی ءِ روچ دارگ بُوَگ ءَ اِنت کیپانی تاس سرّیچ بوان اَنت، ھر گْور ءَ رنگ ءُ نور اِنت جلواہ اِنت ءُ ناچ اِنت، بلے تو بے ھیالے کہ ھمُک سال ھمے ماہ ءَ چینچو ورنا شھید کنگ بوتگ اَنت، چینچو ورنا آوار جَنَگ ءُ زِندان ءِ تھاریں کُوٹِیاں بَرگ بوتگ اَنت۔

بِہ گِندے تو دُرست شمُوشتگ اَنت، بِہ گِندے ترا رزا جھانگیر، اِمداد،کمبر کازی، آسپ جان، ھیات جان کس یات مہ بیت، بلے تئی ءُ بلوچستان ءِ شیدا ءَ ھما وڑ یات اَنت اے انچیں کارِست اَنت کہ گوں من شموشگ نہ بَہ اَنت ، دل ءِ سر ءَ ایریں انچیں ٹپّ اَنت کہ اِشانی درمان آجوئی اِنت ھما رھنیں آجوئی کہ سامراجی تاکتانی سیت ءُ نپّانی ھاتر ءَ جوڑ بیتگیں مُلک پاکستان ءَ اَچ ما پُل اِتگ مئے کودکی واھِشت ءُ ارمان، وشی ءُ بچکند، زندگی ءِ ھزاری جلواہ ، ازّت، لجّ ءُ ننگ ، بلکیں مئے ھر چیز چہ ما پچ گِپتگ ئِے اگاں مارا چیزّے پہ ٹیکی بکشاتگ ئِے، گُڑا آ گم، سکّی ءُ سوری، لاش، کُشت ءُ کوش، ھون، برگ، گار ءُ بیگواہ کنگ، سوچگ ، در پہ دری دگہ بازیں جیڑہ ءُ جنجال۔

اگاں ترا باور نہ کنت ، گُڑا بلوچستان ءِ تتکگیں چمّگانی آپاں چہ جُست گِر کہ شُمارا چینچو ورنا ءِ ھون ھوار اَنت بلوچستان ءِ زیبائیں جنگلاں چہ جُست گِر کہ چینچو ورنایاں وتی ھوناں چہ شُمارا سیراپ کُتگ بلوچستان ءِ کوہ ءُ کوچگاں چہ جُست گِر کہ آھاں وتی دامُن ءَ چِینچو بلوچ ءِ کپتگیں جون پناہ داتگ اَنت۔

تنک ءُ تھاریں کُوٹِیاں چہ گار بیتگیں چیھالاں پول کہ مات ءُ پِتانی، کھول ء مردُمانی، برات ءُ گْوھارانی دیم ءَ چُنت بے میار ءُ کودکیں ورنا چِست کنگ ءَ پد گار ءُ بیگواہ کنگ بیتگ اَنت، گار ءُ بیگواہ کُتگیں ورنایانی درد ھم جُتا اَنت، ھما کہ شھید کنگ بیتگ اَنت ءُ آھانی لاش دست کپتگ اَنت آھانی کھول ءِ مردُماں سبر ءِ دامُن داشتگ ءُ نشتگ اَنت، بلے ھما کہ آھانی آگھیں چمّانی دیم ءَ شپ ءِ تھارونکی ءَ یا روچ ءِ رُژنائی ءَ آھانی تاسپیں بچّ چِست کنگ بیتگ اَنت آ ماتانی چم ھمُک بیگاہ ءُ رولہ ءِ ساھتاں ھمے اُمیت ءَ دروازگ ءَ سک اَنت بلکیں مئے چمّانی چِراگ کونجانی رماں گوں واتر بَہ اَنت ءُ اے اُمیتانی چِراگ ھما ساھت ءَ مِر اَنت وھدے بچّ واتر نہ بَہ اَنت ءُ شپ وتی شار ءَ پر دنت پرچا کہ ھمُک شپ آھانی اُمیتانی میّتاں تلام کنت۔

تو بِہ گِندے بے ھیالے کہ کْوزہ گیریں ریاست پاکستان مئے لجّ ءُ ننگانی پادمال کنگ ءَ شپ ءِ تھارونکی ءَ میتگ پہ میتگ اِنت بِہ گِندے تو اے ھم شموشتگ کہ کماش نورجان وتی لجّ ءُ ننگ ءِ رکّینگ ءِ ھاتر ءَ پاھُو ءِ ساد ءَ پمیشکا چُکّیت ءُ وتی گُٹّ ءَ کنت کہ باندا گْوستانک من ءَ اے شِگان ءَ مہ جنت کہ اَھد ءِ تمردیں زُوراک ءِ دیم ءَ نورجان ءَ وتی سرجھل کُتگ ءُ آئی ءِ لجّ ءُ ننگ آئی ءِ دیم ءَ لِیلام بوتگ ۔

 کیلکور ءِ کماش پمیشکا دُژمن ءِ تیراں وتی سینگ ءَ وش اَتک کنت کہ آیوکیں پدریچ منی کبر ءَ لٹّ مہ جنت کہ کماش ءَ وتی ساہ چہ ننگ ءُ ناموس ءَ گیش دوستِر بیتگ۔

دیر اِنت کہ من ءُ تو گِسر کپتگیں ، پرچا کہ وھد ءَ منی ءُ تئی مْیان ءَ یک سُھریں لکیرے کشّ اِتگ تئی دمبرتگیں پاد ءُ کدم اُوشت آماچ اَنت ، بلے من انگت دم نہ بُرتگ، تو دیر اِنت کہ وتی کِبلہ مٹّ کُتگ ءُ واجہ ءِ در ءَ پہ سُجدگ ءَ کپتگے بلے منی پاد ءُ کدم وتی مِنزل ءِ شوھاز ءَ انگت پیچ ءُ تاب ، کُنٹگ چکاریں راھاں راھی اَنت، انگت منی سگ ءُ ھاٹیگ چو کوہ ءِ البُرز ءَ مُھکم اَنت اے منی ایمان اِنت کہ مئے ھمبلانی رِتکگیں ھون ءُ زمین زادگانی بُر اِتگیں پند تاوان نہ بَہ اَنت، الم یکروچے منی ڈیھ ءَ زوراکی ءِ تھاریں شپ ھلاس بیت آجوئی ءِ سُھر دپیں بامے ٹِکّ دنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹی بی پی پترھال ءَ سر بیتگیں ھالانی رد ءَ گوستگیں شپ ءَ پنجگور ءُ تربت ءَ پاکستانی پوج ءَ دو مردم دزگیری ءَ پد ناشناسیں جاھاں برتگ اَنت ھمے وڑ ءَ ھاران ءَ پوج ءَ شش کس دزگیر کنگ ءَ پد بیگواہ کرتگ اَنت –

پنجگور ءَ دزگیری ءَ پد بیگواہ بیتگیں مردم ءِ پجار مطیع اللہ ء عبدالرزاق جھمنند وشبود پنجگور ءِ نام ءَ زانگ بیتگ –

دمگی مردمانی رد ءَ بیگواہ کرتگیں ورناہ گوستگیں شپ ءَ آوار جنگ ءُ بیگواہ کنگ بیتگ –

زانگ بہ بیت پنجگور ءَ اے بیست ءُ چار ادارانی تہ ءَ اے دومی بیگواھی ءِ دومی وئیل اِنت کہ اشی ءَ پیسر پوج ءَ پنجگور ءِ دمگ گرمکان ءَ سعد اللہ ء ھاجی ھمید آوار جتگ ءُ بیگواہ کتگ اَت –

ھمے وڑ ءَ گوستگیں روچاں پاکستانی پوج ءَ دشتی بازار تربت ءَ یک لوگے ءِ سر ءَ پاکستانی پوج ءَ بیڑ برتگ ءُ اود ءَ اخلاق ء پیر بکش نامیں ورنایے آوار جتگ ءُ برتگ – بیگواہ بیتگیں ورنا ءِ سیاداں آئی ءِ بیگواھی ءِ ھال راست کرتگ –

بلوچستان ءَ زورانسری آوار جنیانی درچ بازیں وھداں برجاہ اَنت گوستگیں روچاں اے وڑیں وئیلانی تہ ءَ گیشی اتکگ اشی ءَ پیسر دہ اگست ءَ پوج ءَ مستونگ ءَ بابل بنگلزئی نامیں ورنایے آوار جتگ ءُ برتگ –

ھاران ءَ ھال سر بیتگ اَنت کہ شش کس آوار جنی ءَ پد بیگواہ کنگ بیتگ اَنت –

دمگی مردمانی رد ءَ ھاران ءِ دمگ لجے ءَ پوج ءُ دمگی ڈیتھ اسکواڈ ءَ شش کس آوار جتگ ءُ ناشناسیں جاھاں برتگ اَنت – کہ چریشانی تہ ءَ یکے ءِ پجار رسول بکش ء مھمد کریم ءِ نام ءَ زانگ بیتگ ءُ آ دگہ پنچ کسانی پجار نہ بیتگ اَنت –

پاکستان ءِ آجوئی ءِ روچ ءِ درگت ءَ بلوچستان ءں جتا جتائیں جاھاں پاکستانی پوج ءَ سلاہ بندیں گلانی نیمگ ءَ اُرشانی دیمپانی اِنت –

سر بیتگیں ھالانی رد ءَ پنجگور ءَ سلاہ بندیں مردماں پوج ءِ چوکی ءِ سر ءَ اُرش کرتگ ءُ پوج ءَ تاوانانی دیمپانی بیتگ –

اُرش پجگور ءِ دمگ کرکی ءَ بیتگ کہ اود ءَ سلاہ بندیں مردماں پوج ءِ سر ءَ اُرش کرتگ، ھال اِنت پوج ءَ تاوانانی دیمپانی کنگ کپتگ – بلے سرکاری تکاں اُرش ءِ راستی نہ بیتگ –

ھمے وڑ ءَ ھرنائی ءَ سلاہ بندیں مردماں پوج ءِ چیک پوسٹ ءُ آیانی کمک ءَ آیوکیں کاروان ءِ سر ءَ سر ءَ اُرش کرتگ –

سرکاری تکاں ھرنائی ءِ اُرش ءِ راست بیتگ ءُ گوشگ بیتگ کہ شاھرگ ءَ کمانڈنٹ ایف سی لورالائی سکاؤٹس ءِ کاروان ءِ سلاہ بندیں مردماں اُرش کرتگ ءُ تیرگواری ءَ یک کارمندے لانس نائیل شریف مرتگ ءُ دو کارمند زدگ بیتگ اَنت –

ھمے وڑ ءَ بولان ءَ سلاہ بندیں مردماں پوجی بنجل راکٹاں گوں مانبستگ –

بلوچستان ءِ دمگ بولان ءِ ھند پیر اسماعیل ءَ شمبے ءِ شپ ءَ پاکستانی پوج ءِ بنجاھی بنجل ءِ سر ءَ راکٹانی گون ءَ اُرش کرتگ –

دمگی مردمانی رد ءَ ناشناسیں سلاہ بندیں مردمانی نیمگ ءَ راکٹ گواری ءِ وئیل پیر اسماعیل ءَ پیش اتکگ اَنت کہ اود ءَ ایف سی ءِ بنجل ءِ تہ ءَ کپتگ اَنت –

زانگ بہ بیت بلوچستان ءِ جتا جتائیں جاھاں سلاہ بندیں گلانی نیمگ ءَ آدینگ ءِ روچ ءَ بہ گر دان انیگ ءَ پوجی بنجل ءُ چوکی ءُ کاروانانی سر ءَ یکشل ءَ اُرش برجاہ اَنت ءُ بازیں اُرشانی زمی واری سلاہ بندیں گلاں منّ اِتگ اَنت ءُ بلے اے اُرشانی زمہ واری تنی وھدی ھچ گل ءَ نہ من اِتگ اَنت –

پاکستان ءِ اجوئی ءِ روچ ءِ درگت ءَ بازیں جاھاں پاکستانی پوج ءَ سلاہ بندیں گلانی نیمگ ءَ اُرشانی دیمپانی اِنت –

نبشتانک: ماتی

نبشتہ کار: میرین زھری

دی بلوچستان پوسٹ

مات ءِ نام ءَ کہ آئی ءِ پُر مِھریں سکیناں من ءَ گوں زمین ،جھان ، انسانیت ءُ دنیا ءِ درائیں چیزاں گوں مھر کنگ سوج داتگ، آئی ءَ منی لنکُک گپتگ ءُ من ءَ گام جنگ ءِ سکین ءِ داتگ۔

آ منی زند ءِ آدینک اِنت چی ءَ کہ آدینک ھجبر دروگ نہ بند ایت مات ھما ھمراہ اِنت کہ بے متلب ءَ گوں تو زندگی ءِ درائیں تکاں ھمراہ داری کتگ۔

من ءَ یات اِنت برے برے ما شپ ءَ بے وھد ءَ گِس ءَ واتر بوتگیں تاں بے تواری ءَ پُترتگ اِنت کہ مئے چمپل توار مہ کن اَنت کہ بلکیں مات مئے مات چرے کارپد ءَ نہ وش بہ بیت بلے پُترگ ءَ گوں دیستگ کہ آ تاں انگت ھاگاہ اِنت، نہ وپتگ، منی ودار ءَ نِشتگ۔

آ ھما ھستی اِنت کہ من ءَ اولی رند ءَ جنگ کنگ ئِے سکینے داتگ پہ وتی ھک ءَ جنگ کنگ ، پہ کوریں چاگرد ءَ جنگ کنگ ءُ وتی کَش ءُ کِرے ھرابیانی ھلاپ ءَ جنگ کنگ آئی ءَ من ءَ مدام گُشتگ ناں تو دگرے ھک ءَ بہ وَر ءُ ناں وتی ھک ءَ دگر ءَ بہ دے- اگاں کسے تئی ھک ءِ ورگ ءِ جھد ءَ کنت آئی ءَ بہ کُش ءُ اگاں زرورت کپت وت ءَ ھم بہ کُشارین بلے وتی ھک ءَ ھجبر یلہ مہ دے-

منی باجنیں مات ھروچ جنگ ءَ اِنت گوں کوریں چاگرد ءَ کرّیں پدریچ ءَ گوں گُنگیں اھد ءِ زوراکاں تاں انگت دم نہ برتگ۔

مدام جھد ءُ جھد ءَ اِنت گھگیری کنگ ءَ اِنت برے شال ءِ سارت ءُ برپ بادیں پھنات ءَ، برے کراچی ءِ روکیں دگانی سر ءَ سپر جنگ ءَ اِنت کُکار ءَ اِنت توار پِر جنگ ءَ اِنت کہ مدتے بیت منی برات زندان ءَ بندیگ اِنت۔

تھنا برات بندیگ نہ اِنت بلکیں مئے گِس ءِ دْراھیں وشی زنداناں بندیگ اَنت تھنا مئے چمانی چراگ بیگواہ نہ اِنت بلکیں مات ءِ لُنٹانی سر ءِ شیرکنیں بچکندگ گوھارانی لاڑکیں واھشت زھگانی کودکیں ارمان بیگواہ اَنت۔

ھما مات ءِ لُنٹانی سر ءَ من بچکنداں اَبید دگہ ھچ نہ دیستگ بلے نوں سک دیر اِنت کہ آئی ءِ چمانی ارس چو ھور ءَ شنزان ءُ مسکیں زمین ءِ دلبند ءَ رِچان اَنت۔

بلے من دلجماں اے ارس ءُ اندوہ ءُ درد ءُ کولنج منی مات ءَ نزور نہ کن اَنت آ یک مھکمیں انسانے آ ھزار درد ءُ دوراں اَبید ھم مارا تسلہ دیگ ءَ اِنت کہ اے کھریں ازابانی روچ گوز انت الم ءَ یک پُر ایمنیں سھبے ماں مئے گیدی ءِ دلبند ءِ سر ءَ کشّ ایت۔

ماتی جان من اشی ءَ ھم زاناں کہ تو شھر پہ شھر، دگ پہ دگ گِنداں من وتی ھستی ءَ چہ ھلاس باں ھما مات کہ من ءَ چم ءِ چارگ ءَ دل نہ بیتگ آ سرجمیں شپ مُسلہ ءِ سر ءَ نشتگ ءُ پریات کنت آئی ءِ چیھانٹاں ارشے سر ءَ زُرتگ منی سینگ ءَ دردانی چیھانٹ رُدَنت، نزور تَرّاں، بلے پد ءَ کہ آئی ءِ توکل ءُ توان ءَ گنداں کہ ھَمُک جاور ءِ دیم ءَ پہ تمردی اوشتاتگ تاں من گیش دلجم ءُ مھکم باں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔