TBP Balochi

سربوتگیں ھالانی رِد ءَ بلوچستان ءِ دمگ نسیرآباد ءَ ناشناسیں مردماں لوگ ءَ شتگ ءُ یک مردمے تیرباران کتگ کُشتگ –

تیرگواری ءِ وئیل نسیر آباد ءِ دمگ چھتر ءَ شاھپور ءَ دیم ءَ اتکگ کہ ناشناسیں مردماں گوستگیں شپ ءَ لوگ ءِ تہ ءَ نبوجت نامی مردمے تیرباران کتگ کُشتگ –

اھوالکارانی رِد ءَ اے مردم سرکاری کشندہ ٹولیانی باسک ءِ بوتگ بلے تنی وھدی ءِ وئیل درگت ءَ گیشیں ھال ءِ سرپدی نہ رستگ –

زانگ بہ بیت بیست ءُ چار ادارانی میان ءَ بلوچستان ءِ تہ ءَ اے دومی وئیل انت اشی ءَ پیش پنجگور ءَ ریاستی ادارھاں گوں سیادی داروکیں مردمے ھمے وڈ گِس ءِ تہ ءَ جنگ بوتگ –

نیشنل ڈیموکریٹک پاٹی بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ گوستگیں دو ھپتگاں آوار جنگ ءُ بیگواہ بوتگیں نودربر دنیگت یل کنگ نبوتگ اَنت زانشجاھانی آباد کنگے بدل ءَ زندان آباد کنگ بوگ ءَ انت زانشجاھاں چہ نودربر آوار جنگ بوگ ءَ انت ءُ زنداناں بندیگ کنگ بوگ ءَ انت کہ نوآبادیاتی نزام ءِ عکاسی ءَ کنت – زانشجاھاں پُترگ ءُ نودربرانی آوار جنگ ءُ بیگواہ کنگے مول مراد بلوچستان ءِ زانشجاھانی تہ ءَ تُرس ءِ پیدا کنگ تانکہ نودربر ماژگی پریشانی آماچ بہ بنت ءُ چہ زانشتی ءُ راجکار ءَ دور بہ بنت –

جارکش ءَ گوشتگ کہ راجکاری ءِ سر ءَ بندش جنگے وڑ وڑیں پندل کنگ بوگ انت اشی ءِ تہ ءَ راجداریں گل ءُ پاٹیانی رھشوناں آوار جنگ آھاں بیھار دیگ انت – راستی ءَ بلوچ ورنایانی راجداری سرپدی ءَ چہ بازیں تاکت ءِ ترس آماچ انت کہ بلوچ ورنایاں ھر وڑ راجداری ءَ چہ دور دارگ لوٹ انت –

جارکش ءَ گوشتگ کہ بلوچستان شاھدربرجاہ ءِ رجسٹرار وتی ردی ءُ بے بسی منّگے بدل ءَ آوار جنوکانی وکالت ءَ کنگ انت، بلوچستان شاھدربرجاہ ءِ پھازدار شاھدربرجاہ ءِ تہ ءَ نودربرانی پھریزی ءَ سرجمی ءَ بے سوب بوتگ – پھازدارانی نیمگ ءَ شاھدانی گار کنگے ھاتر ءَ وڈ وڈیں بھانہ کنگ انت برے گُش انت لین نبوتگ ءُ برے کیمرھانی ھرابی بھانہ ءَ کن انت پھازدارانی بے سوبی ءُ ردی ءِ سوب ءَ شاھدربرجاہ ءِ پھازدار اے کتکاری ءَ تچکی ءَ ھوار انت –

زانشجاھانی تہ ءَ سیکورٹی پوج بوھگے سوب ءَ نودربرانی تہ ءَ ترس ءِ ودی بوتگ شاھدربر جاہ ءِ گیٹ ءُ ھاسٹل گیٹ پوج ءِ ھوالگ ءَ انت چریشی سوب ءَ نودربر ھاسکر زالبول بے وار انت ھر ھما وھد ءَ اے درگت ءَ پھازداراں چہ شکایت کنگ بیت انت گڈا پھازدار سیکورٹی ءِ بھانہ کن انت ءُ آھاں شاھدربرجاہ ءِ تہ ءَ نندگ ءَ جواز ءَ دیم ءَ کار انت – ھمے زوتاں شاھدربرجاہ ءِ تہ ءَ نودربرانی بیگواہ بوھگ سیکورٹی بے سوبی انت پمیشکہ ما ھمے پھمیں نودربرانی آوار جنی ءَ سیکورٹی والا ھوار انت ھمے ھاتر ءَ ما لوٹ کنیں بلوچستان شاھدربرجاہ ءَ ھوار درسیں زانشجاھاں چہ پوج در کنگ بہ بیت انت –

نیشنل ڈیموکریٹک پاٹی ءِ جارکش ءِ گوشتگ کہ یکرندے پدا ما بلوچستان شاھدربرجاہ ءِ نودربرانی نیمگ ءَ زھرشانی ءُ نودربرانی یل بوھگ ءَ تاں زانشجاھانی بند کنگ ءَ ھوار آھانی نیمگ ءَ دیما آؤرتگیں درسیں لوٹانی پلّامرزی ءَ کنیں ءُ ما آھانی گوم ءَ ھر ھال ءَ اُشتاتگ ایں –

یونائیٹڈ بلوچ آرمی ءِ جارکش مرید بلوچ ءَ ناشناسیں جاھے ءَ رسانکدراں شنگ کرتگیں وتی یک درشانے ءَ گشتگ کہ گوستگیں شپ ءَ کیچ ءِ دمگ شاپک ءَ کوہ بارگ ءَ پاکستانی پوجی بنجل ءِ سر ءَ بلوچ سرمچاراں راکٹ ءُ وتکاریں سلاھانی گون ءَ اُرش کرتگ ءُ زورگریں پوج ءَ را جانی ءُ مالی تاوانانی دیمپانی کنگ کپتگ ءُ اے اُرش ءِ زمہ واری ءَ یو بی اے منّ ایت –

جارکش ءَ گشتگ کہ اُرش ءَ پد بلوچ سرمچار درایگ ءُ روگ ءَ سوبمند بیتگ ءُ وتی مُھریں جاھاں شتگ اَنت –

مرید بلوچ ءَ گشتگ کہ پاکستانی لشکر ءَ بارگ کوہ ءِ سر ءَ اے بنجل سال دوھزار ءُ چاردہ ءَ سی پیک دگ ءِ پھزداری ءُ بلوچ نسل کشی ءِ واستا جوڑ کرتگ –

جارکش ءَ گشتگ کہ ما چائنا ءُ دنیا ءَ اے تچکیں کلوہ ءَ دے کہ بلوچستان ءَ بلوچ ءِ منَک ءُ رزامندی ءَ ابید ھچ وڑیں پروجیکٹ سوبمند بوت نہ کن اَنت اے وڑیں اُرش بلوچستان ءِ آجوئی ءَ داں برجاہ بنت –

بلوچستان ءِ بنجاھی شھر شال ءَ بلوچستان شھدربرجاہ ءَ زورانسری بیگواہ بیتگیں دو نودربرانی جیڑہ ءِ سرءَ بلوچستان سرکار ءُ نودربرانی نیام ءَ گپءُ تران بے سوب بیتگ اَنت، مروچی یک رندءِ پدءَ بلوچستان شھدربرجاہ ءَ وانگ ءُ زانگی کار ماٹو کنگ بیتگ اَنت۔ 

زانگ بہ بیت کہ بلوچستان شھدربرجاہ ءَ چہ دو نودربرانی باسکاں پرگینگی حکومت ءِ گپ ءُ ترانی کمیٹی ءَ چار روچ ءِ وھد داتگ اَت ءُ بنجاھیدروازگ ءِ بندگ ءُ وانگی ءُ زانشتی کارانی ماٹو کنگ ءِ جار پدءَ زرتگ اَت۔

دوھیں نودربر سھیل بلوچ ءُ فصیح اللہ یک نومبر ءَ بلوچستان شھدربرجاہ ءَ چہ بیگواہ کنگ بیتگ اِت اَنت، کہ اِشی ءَ پد وانندہ گلاں زھرشانی ءِجار جنان ءَ شھدربرجاہ ءِ درستیں کار ماٹو کُتگ اِت اَنت۔

نودربرانی زورانسری بیگواھی ءِ ھلاپ ءَ شال ءَ ھوار دگہ وانگی ادارگانی تہءَ زھرشانی کنگ بیتگ اَت۔ 

شھدربرجاہ ءِ تہءَ زھرشانی ننداک کنوکیں نودربراں گوں گوستگیں ھپتگ ءَ سرکاری پارلیمانی کمیٹی ءَ ھواریں سَے باسکاں عبدالرحمن کھیتران،ملک نصیر شھوانی ءُ اھمد نواز ءَ نیاد کُتگ اَت ءُ آیاں نودربرانی یل کنائینگ ءِ باوری داتگ اَت۔ 

بلے گوستگیں روچ ءَ بلوچستان شھدربرجاہ ءِ تہءَ وانندہ گلانی سروکاں زھرشانی کنان ءَ گُشتگ اَت کہ مروچی یک رندے پدا بلوچستانشھدربرجاہ ءَ بند کنگ ءِ جار جنان ءَ گُشتگ کہ اگں دوھیں نودربر جرمکار اَنت گُڑا آیاں قانودءِ رد ءَ آمید گساں آرگ ءُ سِزا دیگ بہ بیت۔ 

آیاں گُشتگ کہ چار روچ پیسر سرکاری نمائندگاں اتکگ ءُ مئے گومءَ گپ ءُ تران کُتگ ءُ ما وتی لیکہ آیانی دیما ایر کُتگ۔ بلے سرکاری نمائندگ وتیقولانی پیلو کنگ ءَ بے سوب بیتگ اَنت۔ 

آیاں گُشتگ کہ مروچی شھدربرجاہ رجسٹرار ءِ درشان ءَ پدر کُتگ کہ ادا یک تاگت ءِ آئین (رھبنداں) ءَ لگت مال کنگ ءَ اِنت۔ 

بلوچستان شھدربرجاہ ءِ یک پروفیسر حامد علی بلوچ ءَ گُشتگ اَت کہ سر وزیر بلوچستان ءِ نیمگ ءَ اڈ داتگیں سَے مردمی کمیٹی ءَ سھیل بلوچ ءُ فصیحبلوچ ءَ ھمے ھپتگ ءِ سے شمبے ءِ روچ ءَ داں یل کنائنگ ءِ باوری داتگ اَت۔

دومی نیمگ ءَ چاگردی رسانک ءِ تند جاہ ٹوئیٹر ءَ یک برے پدءَ وانندہ گلانی رھشوناں سرکاری نمائندگانی بے سوبی ءِ سرءَ اپسوز ءِ درشانی کنان ءَگُشتگ کہ وانگجاھانی تہءَ نودربرانی زورانسری بیگواھیانی سرءَ سرکارءِ بے بسی ایر جنگی کرد اِن۔ 

نبشتانک: منی وابانی تابیر ھانی

نبشتہ کار: مھم جان گُل

دی بلوچستان پوسٹ

تئی بولانیں سینگ ءَ چو بولان ءِ مزاریں بچّانی تیر سُپتگیں سینگ ءِ پیم ءَ یک اُمیتے ءُ یک وشیں بانداتے ءِ شُھازگ ءَ یک اُوستے ماں تئی سینگ ءَ مانگیشّ اِتگ چو روکیں کندیل ءَ دائم رُوک ءُ رژناہ اِنت ءُ تو اے ناشریں اھد ءِ مُساپِرے ءُ اے اھَد زُوراکے ، اے کھر شان اِیت، درد بکشا اِیت، زھیر ءُ لھڑیں ترانگاں ، پشت کپتگیں یات ءُ وشیں لِزّتاں ھم پچ گیپت چہ ترا ءُ چہ من ءَ ھم بلے! من زان آں تو چو بولان ءِ پیم ءَ درد ءِ کشّگ ءَ پوہ ءُ سرپدے تو زُوراک ءِ زُلم ءُ زُوراں ماں نیارے ، شرتگیں کاراں وتی مِنزل ءِ توکل لیکے ءُ جُنزان بَہ ئے۔ اَنچو کہ مریدے پہ وتی ھانی ءَ شیدا بیت ءُ وتی سرجمیں زند ءَ ھانی ءِ نام ءَ کُربان کنت ، اَنچو ترا کنگی اِنت پہ ھانی ئیں گُلزمین ءَ ، پہ من ءَ۔

بلے! من ترا گْوش آں تو منی وابانی تابیریں ھانی ئے، من ءُ منی مِنزل ترا جُنزگ پرما اِیت۔ من مہ باں ھم اے جُنز ءَ ھزار تئی دابیں مھنازیں کاڑ ، دُتکیں شاری، شیرزالیں یاسمِین تھنا جُنزاناں پہ وتی ھمسپرانی وابانی تابیر ءَ۔

اے زمین ءِ مھر زمین زادگاں وتی گُڈّی ھِکّگ ءَ گوں پیوست کُتگ اَنت۔ تو بہ بَہ ئے یا کہ مھروانیں زمین، من وپا ءِ گُڈّی سِیمسراں چہ سر گْوزاں، بلے بے وپائی نہ کناں ءُ باندات ءِ زھر ءُ کُچلیں تژن ءُ پیگورانی دیمپان نہ بہ آں شالا چی ءَ کہ من گُلیں زمین ءِ رکینگ ءُ راج ءِ رُوژنائیں باندات ءِ واب  وتی تُنّیگیں چماں دیستگ، ءُ من اے واب گوں تئی ھمراھی ءُ ھمکُوپگی ءَ سرجم کنگ لوٹ آں، بلے اگاں من نہ بیتاں گُڑا اے پِگر ءُ لیکہ ءَ وتی دل ءُ سینگ ءَ پیوست بہ کن ءُ دیم پہ آجوئی ءِ مِنزل ءَ رھادگ بو ، جزماں تھنا کدی نہ بَہ ئے۔ گُڑا من ھمے پھماں ءُ سرپد باں کہ تو من ءَ وتی دل ءُ سینگ ءَ پیوست کُتگ۔

بلے! ترا نمیرانیں نامے بکشایاں کہ باندا بلکیں من گوں تو ھمراہ مہ باں ءُ زمین ءِ سرجمیں ھک ءِ پیلو کنگ ءَ چہ ترا سک دُور برواں ءُ تو اے رستریں دھر ءَ اِیوک ءُ تھنا سپر بہ کن ئے ، گُڑا اے نام ترا توکل ءُ ھاٹیگ دنت۔

من وتی تُنّیگیں چمّانی واب کہ گوں تئی ھمراھی ءَ دیستگاں ، اِشاں تو سرجم بہ کن ئے، ءُ تئی پدکِنِزگ منی وابانی گُٹگِیری بیت ءُ دوستی ءُ مھر ءِ کُول ءُ کرارانی پدا بے وپائی ءُ دُروگے مان اِیت ، پمشکا من گْوش آں تژن ءُ شِگاناں من وتی اَندر ءَ جاہ دات نہ کناں ءُ پہ ترا بے وپائی ءِ نام من ءَ ھِچّ وڑ ءَ شات نہ بیت، بلے من دلجماں کہ تو من ءَ چہ پد ھم وتی مِنزل ءِ وشھالیں باندات ءِ واباں سرجمی ءَ پیلو کن ئے ءُ جُنزانَ بَہ ئے۔ من ءَ شِگانی نہ کن ئے ءُ وت ھم شِگانی نہ بہ ئے شالا۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

رسانک ءِ ردءَ 13 نومبر ءَ دُز آپ بنجاھی زندان ءَ بندیگیں سَے شھری زندان ءِ واکداراں پاھو داتگ اَنت۔

پاھو دیگ بیتگیں بندیگانی پجار دُز آپ ءِ ھنکین شیر آباد ءِ جھمنندیں “سعد اللہ خرکوہی”، “عبید اللہ خرکوہی” ءُ “محبوب رخشانی” نامءَ چہ بیتگ اَنت۔چہ اِشاں سعد اللہ ءُ عبید اللہ برات اَنت۔

ھر سئیں پاھو دیگ بیتگیں بلوچ، منشیات ءِ جرمکاری ءِ بھتام ءَ پاھو دیگ بیتگ اَنت۔

ھمے سال ءِ بندات ءَ بگر داں انگت اسلامی جمہوریہ ایران ءِ زندانی تہءَ کم چہ کم 15 بلوچ پاھو دیگ بیتگ َانت۔

ھالانی ردءَ اسلامی جمہوریہ ایران ءِ سرکاری زندانانی تہءَ بازیں مردماں پاھو چیروکائی ابید رسانکدر ءِ شنگ کنگ ءَ دیگ بنت۔

بلوچستان ءِ کیچ دمگ ءِ شاپک ھنکین ءَ گوستگیں شپ ءَ سلاہ بندیں مردماں پاکستانی پوج ءِ بُنجل اُرش ءِ تہءَ نشانگ کُتگ۔

اھوالانی ردءَ شاپک بُنجل ءِ سرءَ اُرش ءَ پد اُرش کار در اَتکگ ءُ شُتگ اَنت وھدیکہ پوج ءُ اُرش کارانی نیام ءَ داں دیرءَ تیرگواری جُنز اِتگ، ھمے نیام ءَ تراکانی ھم توار اِش کَنگ بیتگ۔

اُرش ءِ زمہ واری داں انگت ھچ گلءَ نہ من اِتگ وھدیکہ چہ اِشی ءَ پیسر ھم اَے دمگانی تہءَ بلوچ آجوئی لوٹوکیں سلاہ بندیں گلاں لشکریانی سر ءَ اُرش کُتگ اَنت۔

سر بیتگیں ھالانی رد ءَ روکپتی بلوچستان ءِ دمگ ریگان ءَ سلاہ بندیں مردمانی ءُ ایرانی پھزدارانی میان ءَ جنگ ءُ چوپ ءَ چار ایرانی پھزدار زدگ بیتگ اَنت ءُ دو بیران بیتگ اَنت –

ھالانی تہ ءَ گوشگ بیتگ کہ ایرانی پھزداراں نشہ باپاری ءِ بھتام ءَ اشانی سر ءَ بیڑ برتگ ءُ چریشی ءَ دوئیں نیمگاں تیرگواری بندات بیتگ –

تیرگواری ءَ آسر ءَ ایرانی پھزدارانی دو احسان شیرخانی ءُ رضوانی بیران ءُ زدگ بیتگءں محسن اعلایی، مھمد صادق، معین نژاد، علی ذوالعلا ءُ علی تانوردی ءِ ناماں زانگ بیتگ اَنت –

ایرانی پھزدارانی نیمگ ءَ تنی وھدی اے ھال ءِ درگت ءَ دگہ ھال دیم ءَ نیتکگ اَنت ءُ ناکہ آئی ءَ دگہ جانی تاوانانی بارو ءَ گپ دیم ءَ آورتگ اَنت –

زانگ بہ بیت روکپتی بلوچستان ءَ گیشتر چوشیں وئیل بیگ ءَ اَنت ءُ اشانی گر ءُ دار کنگ ءَ گوستگیں روچ ءَ انٹی نارکوٹکس ءَ ھم تیرگواری کرتگ اَت ءُ چریشی ءَ یک مردمے بیران بیتگ اَت –

سربوتگیں ھالانی رِد ءَ بلوچستان ءِ دمگ کیچ ءُ آواران ءَ پاکستانی پوج ءَ لشکر کشی کنان ءَ کسان سالیں زھگاں دگہ بازیں مردم ءِ زورانسری آوار جتگ ءُ بیگواہ کتگ کہ تنی وھدی آھانی ھچ وڈیں ھال اھوال ءِ نیست اِنت –

پاکستانی پوج ءَ کسانیں زھگ کیچ ءِ دمگ کولواہ جت ءَ چہ آوار جتگ ءُ بیگواہ کُتگ انت – آوار جنگ بوتگیں زھگانی پجار ھپت سالی یارو ء لال بکش، نُھ سالی شوکت ء لال بکش ءُ دوازدہ سالی لال بکش ء بابُل ءِ ناماں چہ بوتگ انت –

اھوالکار ءِ رِد ءَ اے زھگ پاکستانی پوج ءَ ھما وھد ءَ آوار جتگ ءُ بیگواہ کُتگ انت کہ وتی پَس ءُ دلوتانی چارینگ ءَ رؤگ ءَ بوتگ انت –

اشی ءَ ابید پوج ءَ کولواہ ءِ دمگ شاپکول ءَ چہ پیر محمد ء قادربخش جاھمنند شاپکول ءُ بدل ء روشن جاھمنند کولواہ گودری شاپکول ءَ برجاھیں پوجی پانگس ءَ لوٹائینتگ ءُ بیگواہ کتگ انت –

ھمے وڈ آواران ءِ دمگ جاؤ ءَ جھل جاؤ میتگ ءَ ھم پاکستانی پوج ءَ لشکر کشی کنان ءَ بازیں مردم ءِ زورانسری آوار جتگ ءُ وتی بنجل ءَ بُرتگ انت –
بلے پدا ھم تنی وھدی اھوالکاری نزام نبوھگے سوب ءَ لشکر کشی ءَ زورانسری آوار جنگ بوتگیں مردمانی پجار نبوتگ –

بلوچستان ءِ بنجاھی شھر شال ءَ ھمے ماہ ءِ یک نومبر ءَ بلوچستان شھدربرجاہ ءَ بیگواہ کنگ بیتگیں سھیل بلوچ ءُ فصیح بلوچ ءِ بیگواھی ءِ ھلاپ ءَ برجاھیں نندانک ءَ نودربرانی گون ءَ گپ ءُ تران ءَ سرکاری واکدار بے سوب بیتگ اَنت ءُ نودربراں دوبر شھدربرجاہ ءِ گیٹ بند کرتگ ءُ گیٹ ءِ دپ ءَ زھرشانی نندانک ءِ برجاہ کنگ ءِ جار جتگ –

گوستگیں ھشت روچاں نودربراں شھدربرجاہ ءِ ایڈمین گیٹ ءِ دیم ءَ نندانک جتگ ءُ سرکاری واکداراں لھتے روچانی مھلت لوٹ اِتگ بلے مروچی سَے شَمبے ءِ روچ ءَ سرکاری واکدارانی گڈی گپ ءُ تران ءِ روچ بیتگ ءُ مروچی آ گپ ءُ تران ءَ اتکگ اَنت ءُ چریشی ءِ پژدر ءَ گپ ءُ تران بے سوب بیتگ ءُ نودربراں دوبر زھرشانی بندات کرتگ –

زھرشانی ءَ گپ ءُ تران ءَ عبدالرحمان کیتھران، ایس ایس پی آپریشن، اے سی شال، میر اختر لانگو، سیکورٹی انچارج یونیورسٹی ءُ اقبال زرکون اتکگ بیتگ اَنت –

نودربرانی گوشگ اِنت مئے زھرشانی داں ھما وھد ءَ برجاہ بیت اِنت کہ اے بیگواھیں دوئیں نودربر دیم ءَ آرگ نہ بنت –

نودربراں وتی وانگی پرکاری بند کرتگ ءُ شھدربرجاہ ھم بند کرتگ ءُ گیٹ ءِ دپ ءَ نندانک ءَ نشتگ اَنت –

زانگ بہ بیت یک نومبر ءَ بلوچستان شھدربرجاہ ءَ دو نودربر سھیل بلوچ ءُ فصیح بلوچ گرگ ءُ بیگواہ کنگ بیتگ اَنت ءُ نودربرانی گوشگ اِنت کہ اے مردم بیگواہ کنگ بیتگ اَنت ھمے ساھت ءَ کیمرہ ءُ دگہ انتزمیہ پرکاری مئے ھمراھداری کنگ ءَ نہ اَنت چریشی ءَ اشی ءَ زانگ بیتگ کہ اے نودربرانی بیگواھی ءَ انتزامیہ ءَ ھوار شھدربرجاہ ءِ دگہ واک ھم ھوار اَنت –

زانگ بہ بیت بلوچستان ءَ ھمے ماہ ءَ بازیں کچے ءَ نودربر گرگ ءُ بیگواہ کنگ بیتگ اَنت ءُ نودربرانی بیگواھیانی ھلاپ ءَ کراچی ءَ ھوار بلوچستان ءِ دگہ جاھاں ھم زھرشانی کنگ بیتگ اَنت –