TBP Balochi

وئیل ھب ءُ ژوب ءَ دیم ءَ اتکگ اَنت کہ اود ءَ چُک ءُ زالبولاں ھوار پنچ مردم بیران بیتگ اَنت ءُ ھشت کس زدگ بیتگ اَنت –

سر بیتگیں ھالانی رد ءَ بلوچستان ءِ باپاری شھر ھب ءَ دگ ءِ وئیل ءَ چُک ءُ زالبولاں ھوار پنچ مردم بیران بیتگ اَنت ءُ ھپت کس زدگ بیتگ اَنت –

وئیل ھب ءَ نورانی کراس ءِ نزیک ءَ ھائی رؤف ءُ کوسٹر ءَ دیم ءَ اتکگ کہ اود ءَ چُک ءُ زالبولاں ھوار پنچ مردم بیران بیتگ اَنت ءُ ھپت کس زدگ بیتگ اَنت –

دگہ وئیلے بلوچستان ءِ دمگ ژوب ءِ دمگ کلیول شھید چوک ءَ دیم ءَ اتکگ کہ اود ءَ تیز روکیں گاڑی ءَ بجلی ءِ کمبھے ءَ ٹکر جتگ ءُ چریشی ءَ یک مردمے زدگ بیتگ –

بلوچستان ءَ ھمک روچ بیتگیں وئیلاں لس مردم بیران ءُ زدگ بیگ ءَ اَنت کہ چریشانی گیشتریں سبب دگانی سر ءَ ترند روکیں گاڑیانی سبب گوشگ بیگ ءَ اِنت –

سر بیتگیں ھالانی رد ءَ گوستگیں روچ ءَ سلاہ بندیں مردماں کیچ ءِ دمگ ھوشاپ ءَ سی پیک دگ ءِ سر ءَ کار کنوکیں ایف ڈبلیو او ءِ کارمندانی سر ءَ اُرش کرتگ، اُرش ءِ زمہ واری بی ایل ایف ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کرتگیں بیان ءِ تہ ءَ ایف ڈبلیو او ءِ سر ءَ بیتگیں اُرش ءِ زمہ واری منّ اِتگ –

جارکش ءَ گوشتگ کہ یکشمبے ءِ بیگاہ ءِ وھد ءَ سرمچاراں کیچ ءِ دمگ ھوشاپ ءَ فیض ھوٹل ءِ نزیک ءَ سی پیک دگ ءَ کار کنوکیں شرکت فرنٹئیر ورکس آرگنائزیشن (ایف ڈبلیو او) ءِ کارمندانی سر ءَ مزنیں سلاھاں گوں اُرش کرتگ ءُ دو کارمند کُشتگ اَنت –

میجر گوھرام بلوچ ءَ گُشتگ کہ زورگریں پوج وتی زوردستی بند ءُ ساچیانی سرجم کنگ ءَ سی پیک دگ ءِ سر ءَ نا ایوک ءَ مھلوک ءَ نشانگ کنگ اِنت بلکیں دمگاں نندوکیں مردماں لڈ ءُ بار ءَ ھم لاچار کنگ اِنت –

آئی ءَ گُشتگ زورگریں پوج ءُ آئی ءِ کمکار زیردستیں بلوچستان ءِ آجوئی ءَ داں برجاہ بنت –

اوگانستان ءِ سرکار ءِ پروشگ ءَ پد بازیں جاھاں بندیگیں طالبان آجو بیتگ اَنت، چاگردی رسانکجاھاں شنگ بیتگیں تامرانی تہ ءَ گندگ بیت اِنت کہ طالبان بندیگجاھاں درایگ ءُ روگ ءَ اَنت –

یک ھسابے ءَ آیانی سر ءِ مِد ءُ ریشاں زانگ بیت کہ اے مردم بازیں سالاں بندیگ بیتگ اَنت –

اوگانستان ءِ بنجاھی شھر چہ کابل ءَ سر بیتگیں ھالانی رد ءَ تحریک طالبان پاکستان ءِ گوستگیں نائب امیر ءُ باجوڑ ایجنسی ءِ امیر مولانا فقیر محمد بگرام ءِ بندیگ جاہ ءَ یلو بیتگ –

گوستگیں وھدیکہ کابل ءَ پلچرخی ءُ بگرام ءِ بندیگجاھاں بندیگانی واستا بندیگ جاہ پچ کنگ بیتگ اشانی ھواری ءَ دگہ بازیں کچے ءَ طالبانانی بندیگاں ھوار مولانا فقیر محمد ھم ھوار بیتگ ءُ اشی ءِ ھواری ءَ تحریک طالبان پاکستان ءَ گوں بندوکیں باشیں کچے ءَ طالبان یل کنگ بیتگ اَنت بلے آیانی کچ ءُ کساس تنی وھدی دیم ءَ سرجمی ءَ نیتکگ اَنت –

یک ھسابے ءِ تہ ءَ گوشگ بیتگ کہ یل بیتگیں طالبانانی کچ کم چہ کم پنچ سد ءِ کچ ءَ بیت اِنت –

تحریک طالبان پاکستان ءَ مولانا فقیر محمد ءِ یل بیگ ءِ ھال راست کرتگ ءُ گُشتگ کہ اُمتِ مسلمہ ءَ مراد باتی داتگ –

مولانا فقیر محمد ءِ بارو ءَ گوشگ بیت اِنت کہ آ بیست ءُ شش فروری سال دوھزار ءُ سیزدہ ءَ اوگان سیمسر ءَ وتی چار ھمراھانی ھمراھی ءَ اوگان لشکر ءِ دست ءَ دزگیر کنگ بیتگ –

گوشگ بیتگ کہ اشانی ھمراھی ءَ گرگ بیتگیں عمر باجوڑ ءِ گورنر نامینگ بیتگ –

طالبان ءِ نیمگ ءَ شنگ بیتگیں ھالانی تہ ءَ گوشگ بیتگ کہ مولابا فقیر محمد ٹی ٹی پی ءِ کلانیں رھشوناں چہ یکے ءُ حکیم اللہ محسود ءِ نائب ھم بیتگ – مولانا فقیر محمد ءَ ھوار بازیں کچے ءَ طالبانی یل بیگ ءِ ھال گندگ ءَ آیگ ءَ اَنت –

طالبان ءِ راجداری کارگس ءِ بنشون مھمد نعیم ءَ خلیجی ھالرسان الجزیرہ ءَ گوں گلگدار ءَ گُشتگ کہ اوگانستان ءِ جنگ ھلاس بیتگ، ڈیھ ءَ نِی نوکیں سرکار زوت یک دروشمے ءَ دیم ءَ کیت اِنت –

آئی ءَ گُشتگ کہ مروچی طالبان ءَ بیست سال ءِ دیمونیانی جد ءُ جھد ءَ گواڑگ رودینتگ اَنت، طالبان کسے ءَ تاوان دیگ نہ لوٹ ایت، دراھیں اوگان رھشوناں گوں گپ ءُ تران ءَ ساجویں ءُ ھمک گام ءَ زمہ واریانی ڈبہ ءَ زوریں، طالبان میان اُستمانی برادری ءِ گشتگیں گپانی رد ءَ گپ ءُ رپ ءَ ساجو اِنت –

طالبان ءِ جارکش ءَ گُشتگ اَت کسے ءَ اوگان ءِ سرزمین ءِ ھلاپ ءَ کارمردی ءَ نیل اِنت، طالبان کسے ءُ کجام ڈیھانی جاورھالانی سر ءَ دزمانجنی نہ کنت ءُ چریشی ءَ لوٹ ایں کہ کجام دومی ڈیھ ءَ ھم مئے جیڑھانی سر ءَ دزمانجنی نہ لوٹ یت، امیت اِنت درملکی زور اوگانستان ءَ بے سوبیں تجربگ ءَ دوبر نہ کن اَنت –

جارکش طالبان ءَ دیمتر ءَ گُشتگ کہ وتی ڈیھ ءُ مھلوک ءِ آجوئی ءِ مول ءُ مراد گپتگ اَنت دراھیں اوگانی رھشوناں گون گپ ءُ تران ءَ ساجو ایں اے پھریزی ءِ مانزمانی ءَ اشرف گنی ءِ تچگ ءِ امیت نہ بیتگ –

بلوچستان ءِ دمگ پنجگور ءُ تیابدپی شھر گوادر ءَ دو کس پاکستانی پوج ءُ چیریں ادارھاں آوار جنگ ءَ پد بیگواہ کرتگ اَنت –

گیشیں ھالانی رد ءَ گوستگیں روچاں پنجگور ءِ دمگ رخشان کور ءَ سرادک پوسٹ ءَ پاکستانی پوج ءُ چیریں ادارھانی کارمنداں یک مردمے آوار جتگ ءُ برتگ –

آوار جنگ بیتگیں مردم ءِ پجار نجیب ء جمیل ءِ نام ءَ زان بیتگ کہ آ پنجگور ءَ دیم پہ کراچی ءَ روگ ءَ بیتگ –

نجیب ءِ گوھار ءَ اسما بلوچ ءَ چاگردی رسانکجاھاں ٹوئٹر ءَ گُشتگ کہ منی پت ءِ بیگواھی ءَ پد نِی منی برات برگ بیتگ –

آسما بلوچ ءِ رد ءَ آئی ءِ پت بیست ءُ نُھ اپریل دوھزار ءُ سیزدہ ءَ آواران ءَ پاکستانی پوج ءَ چِست کرتگ ءُ بیگواہ کرتگ –

آسما بلوچ ءَ گُشتگ کہ اے کجام انساپی اِنت کہ پت ءِ برگ ءَ پد نِی منی برات ھم چما پلگ بیتگ –

بلوچستان ءَ بیگواھیانی درچ یکشل ءَ برجاہ اَنت ءُ ھمے رنگ ءَ گوادر ءَ ھم یک مردمے گوستگیں روچاں آوار جنگ ءُ برگ بیتگ –

ھالانی تہ ءَ گشگ بیتگ کہ گوادر ءَ ھواریں دمگ پسنی باز واجہ کلانچ ءَ چیریں ادارھانی کارمنداں آصف ء حاصل آوار جتگ ءُ برتگ –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ یک مردمے بیران بوتگ ءُ بیست ءُ پنچ دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درستیں مردمانی کچ سِی ھزار ءُ شش سد ءُ پنجاہ ءُ دو ءَ سر بوتگ اَنت –

بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں یکشمبے ءَ بلوچستان ءِ تہ ءَ پنچ سد ءُ دوازدہ مردماں کرونا نادراھی ٹیسٹ کنگ بوتگ، کہ بلوچستان ءِ بنجاھی شھر شال ءَ ھپت، گوادر ءَ ھشت، ھزدار ءُ سبی ءَ سَے سَے، تپتان ءَ دو ءُ کلعہ سیف اللہ ءَ یک یک مردمے ءَ کرونا نادراھی پدّر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سِی ھزار ءُ شش سد ءُ پنجاہ ءُدو ءَ سر بوتگ اَنت –

رپورٹ ءِ رِد ءَ گوستگیں بیست ءُ چار ادارانی میان ءَ ھپتاد ءُ نھ مردم وش بیتگ انت وش بوتگیں مردمانی کچ نوکیں کیساساں ھوار سرجمی ءَ بیست ءُ نھ ھزار ءُ شش سد انت، رپورٹ ءِ رِد ءَ جھانی وبا کرونا وائرس ءِ نادراھی ءَ یک مردمے بیران بیتگ ءُچریشی ءَ پد تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ سی ءُ پنچ مردم بیران بوتگ انت-

رپورٹ ءِ رِد ءَ بلوچستان ءِ تہ ءَ اے وھدی کرونا وائرس ءِ ھپت سد ءُ ھبدہ نادراہ ھست انت وھدیکہ بلوچستان ءِ نادراھجاھانی تہ ءَ ھپت کرونا آماچیں نادراہ ہائی فلو آکسیجن ءُ پنچ لاؤ فلو آکسیجن ءَ الاج انت ءُ بلوچستان ءِ تہ ءَ کرونا نادراھی گیش تالان بوگ ءِ چار ٹک ھشتاد ءُ ھشت درسد نبشتہ کنگ بوتگ-

سر بیتگیں ھالانی رد ءَ گوستگیں روچ ءَ کراچی ءِ دمگ مواچھ گوٹھ ءَ بیتگیں بمب تراک ءَ بیران بیتگیں مردمانی کچ سیزدہ ءَ سر بیتگ اَنت ءُ سَے مردمانی جاور نگیگ گوشگ بیتگ اَنت –

تراک گوستگیں روچ ءَ مواچھ گوٹھ ءَ بیتگ کہ اود ءَ بمب تراک یک بسے ءِ سر ءَ کنگ بیتگ –

دمگی پولیس ءِ رد ءَ تراک آروسی ءَ پد واتر روکیں بس ءِ سر ءَ کنگ بیتگ ءُ بس ءَ جنین ءُ چک ھم ھوار بیتگ اَنت –

تراک ءَ بنداتی ءَ دَہ کس بیران بیتگ اَنت نُھ کس زدگ بیتگ اَنت ءُ زدگ ءُ بیران بیتگیں مردم نادراہ جاہ ءَ سر کنگ بیتگ اَنت ءُ اود ءَ مروچی دگہ سَے کس بیران بیتگ اَنت –

ھالانی تہ ءَ گوشگ بیتگ کہ سَے کسانی جاورھال نگیگ اَنت ءُ دو ٹپی ءِ مردم درمان کنگ ءَ پد واتر لوگ ءَ روان دیگ بیتگ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ نیمگ ءَ زھرشانی برجاہ، زھرشانی ءَ مروچی چار ھزار ءُ چار سد ءُ دَہ روچ سرجم بیتگ، بیگواھیں عابد حسین عمرانی کھول بنجل ءَ اتکگ ءُ عابد حسین ءِ زورانسری ءِ بارو ءَ گل ءِ گور ءَ وتی گپ جتگ اَنت –

یکشمبے ءِ روچ ءَ چہ پشین ءَ بالشویک گروپ آف اسٹڈیز ءِ سروک عبدالنجیب خان، کسان سروک نصیب اللہ خان ءُ دگہ رھشوناں بنجل ءَ اتکگ ءُ ماما قدیر ءُ بیگواھیں مردمانی کھولانی گون ءَ پدردی درشان اِتگ –

بنجل ءَ اتکگیں مردمانی گون ءخ ھیال ءُ لیکہ درشان کنان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ آیوکیں وھد گیش ناوش بیت کُت کن اَنت بلوچ پُر اُیمنیں جھدکار چیر بیگ ءَ ابید تچکیں جد ءُ جھد ءَ ھوار بہ بنت اسلام آباد ءِ زالمیں ھاکمانی زُلمانی دیم ءَ بہ اوشت اَنت –

آئی ءَ گُشتگ کہ بیگواھیں مردمانی جیڑہ دراھیں بلوچانی جیڑہ اِنت پر ایمنیں جد ءُ جھد کنگ ءِ واستا کسے داوت دیگ نہ لوٹ ایت بلکیں ھرکسی وتی زمہ واری بیت اِنت جد ءُ جھد ءَ ھوار بہ بیت اِنت –

ماما قدیر بلوچ ءَ دیمتر ءَ گُشتگ کہ وھد سک نازرک اِنت بیگواھیں مردمانی پُر ایمنیں جد ءُ جھد ءَ گیش ترند بیگ لوٹ ایت اِنت وھد ءُ جاورانی سرپد بیگ ءَ درستاں اے جد ءُ جھد ءَ ھوار بیگی اِنت ءُ زُلمانی ھلاہ ءَ توار برزی کنگی اِنت –

آئی ءَ گُشتگ کہ ھما کس اے وابی ءِ آماچ اِنت جاوراں بے جد ءُ جھد ءَ گھگیری ءَ شر بنت آ گلامی ءِ تہ ءَ اڑیتگ ءُ اے اڑانکی ءَ درایگ ءُ درستاں وتی کرد پیلو کنگی اِنت –

ھمے وڑ زھری ءَ زورانسری آوار جنگ بیتگیں عابد حسین ء غلام حسین عمرانی ءِ کھول اتکگ ءُ بیگواھیں عابد ءِ زورانسری آوار جنی ءِ بارو ءَ گل ءِ گور ءَ سرجمیں گپ کرتگ اَنت –

کھول ءِ رد ءَ عابد حسین بیست ءُ ھشت اکتوبر دوھزار ءُ ھبدہ ءَ ھزدار ءِ دمگ انجیرہ کراس ءَ نامی ئیں مرد نائب ملا مرید ءَ آوار جتگ ءُ ریاستی کارمندانی ھوالگ ءَ کرتگ –

کھول ءِ رد ءَ عابد حسین ءِ زورانسری ءِ ھلاپ ءَ بازیں در ٹک اِتگ اَنت بلے کسے ءِ گور ءَ چوشیں شون نہ دیستگ اَنت –

بلوچ لبریشن آرمی ءِ جارکش جیئند بلوچ ءَ رسانکدران شنگ کررگیں درشان ءِ تہ ءَ گوشتگ کہ بلوچ لبریشن آرمی ءِ سرمچاراں مروچی شمبے ءِ روچ ءَ ھرنائی ءِ دمگ زردآلو ءَ زورگریں پاکستانی پوج ءِ واستا مڈی سر کنوکیں گاڑی بمب ءِ نشانگ کرتگ –

بی ایل اے ءِ جارکش ءِ رد ءَ دشمن ءَ راشن سر کنوکیں گاڑی ھما وھد ءَ نشانگ کرتگ کہ آ یک پوسٹے ءَ راشن سرکنگ ءَ پد شومی پوسٹ ءِ نیمگ ءَ روگ ءَ بیتگ تراک ءِ زد ءَ اتکگ ءُ گاڑی سرجم ءَ تباہ بیتگ ءُ پوج ءِ یک کارمندے مرتگ ءُ دگہ یکے کارمندے ءَ ھوار دمگی کاردارے ترند زدگ بیتگ –

جیئند بلوچ ءَ گوشتگ کہ اُرش ءَ پد پوجی ھیلی کاپٹر دمگ ءَ سر بیتگ ءُ وتی زدگ ءُ مرتگیں کارمند اش برتگ –

جارکش ءِ گوشگ اِنت کہ بی ایل اے ءَ بیست ءُ یک جولائی ءَ یک درشانے شنگ کرتگ کہ ھرنائی ءَ دمگی ٹیکیدار ءُ دگہ مردم زورگریں پوج ءِ راشن سر کنگ ءَ پھریز بہ کن اَنت ما اے پدر کرتگ کہ کجام ھم وڑیں جانی ءُ مالی تاوانانی زمہ وار وت بہ بنت ھما کس کہ دشمن ءَ کمک سر کنت –

اوگانستان ءَ اوگان تالبیان ءِ پیش گامی تیزی ءِ گون ءَ برجاہ اَنت ءُ آیاں اے وھد ءَ ڈیھ ءِ سِی ءُ چار اُستانانی تہ ءَ بیست ءُ ھست اُستاناں ھوار ڈیھ ءِ بنجاھی شھر ھم دستیگ کرتگ –

اوگان وزارت داکلہ ءَ گوشتگ کہ تالبان ءَ بنجاھی شھر کابل ءِ چاریں نیمگ انگیر ءَ کرتگ اَنت ءُ تہ ءَ پُترانان اَنت ھمے وڑ تالبیان ءِ گوشگ اِنت کہ آ جنگ یا تاکت ءِ زور ءَ شھر ءِ تہ ءَ نہ پُتر اَنت –

تالبیان ءِ جارکش ءَ گُشتف کہ تالیبان جنگجو بنجاھی شھر کابل ءَ نہ پُتر اَنت ءُ شھر ءِ کش ءُ کراں ودار کنگ ءَ کڈن کنگ بیتگ اَنت –

تالیبان ءِ جارکش ذبیح اللہ مجاھد ءَ وتی ٹویٹ ءَ گشپتگ کہ امارات اسلامی ءَ وتی دراھیں جنگجو کڈن کرتگ اَنت آ کابل ءِ راھانی سر ءَ ودار بہ کن اَنت ءُ شھر ءِ تہ ءَ روگ ءِ جھد ءَ مہ کن اَنت –

تالبیان ءِ جارکش ءَ وتی بیان ءَ گُشتگ کہ مئے جنگجو شھر ءَ نہ پتر اَنت ءُ آ پُر ایمنیں رنگے ءَ واک ءَ وتی دست ءَ کنگ لوٹ اَنت –

پشتو زبان ءَ شنگ بیتگیں شنگ بیتگیں بیان ءَ لس پھلی ءِ جار کہ دراھیناں سدکی دیگ بیتگ اَنت کسے ءِ ھلاپ ءَ ھچ رنگیں کاروائی کنگ نہ بیت اِنت –

اوگانستان ءَ تالبیان ءِ پیشگامی ءُ کابل ءَ سلاہ بندانی پترگ ءِ وھد ءَ بازیں جاھاں تیرگواریانی توار ھم اشکنگ بیتگ اَنت بلے اوگاب سروک ءَ ٹوئٹر ءَ گشتگ کہ جاور ھال کنٹرول ءَ اَنت –

اے کلوہ ءَ گوشگ بیتگ کہ کابل ءَ وھد وھد ءِ سر ءَ تیرگواری بیگ ءَ اِنت، کابل ءِ سر ءَ اُرش نہ بیتگ ڈیھ ءِ پھریزی لشکر میان اُستمانی ھمسنتاں ھوات شھر ءِ پھریزی ءَ سدکی کن اَنت جاورھال گھتر بنت –