TBP Balochi

سربوتگیں ھالانی رِد ءَ پاکستانی پوج ءَ بلوچستان ءِ دمگ کولواہ ءَ زوراکی کنان ءَ دو زالبول آوار جتگ ءُ بیگواہ کتگ اَنت –

زورانسری آوار جنگ بوتگیں زالبولانی پجار برپی ءُ نیال ءِ ناماں چہ بوتگ انت کہ پاکستانی پوج ءَ کولواہ ءِ دمگ شاپکول ءَ آوار جتگ انت –

دمگی اھوالکار ءِ رِد ءَ اے دمگاں گوستگیں بازیں روچاں پوج ءِ لشکر کشی برجاہ انت، گوستگیں روچاں پوج ءَ سَے زھگاں ھوار پنچ مردم آوار جتگ ءُ بیگواہ کتگ اَنت –

اھوالکار ءِ رِد ءَ پوج ءِ لشکر کشی چار شمبے روچ ءَ بندات کنگ بوتگ کہ انگت تاں برجاہ انت ءُ پوج ءَ لشکر کشی ءِ میان ءَ بازیں مردمانی آوار جنگ ءَ ھوار دمگ ءَ شیلنگ ھم کتگ ءُ بازیں گِس ءِ مانداشتگ اَنت –

زانگ بہ بیت گوستگیں روچ ءَ پاکستانی پوج ءَ کولواہ سَے زھگاں ھوار بازیں مردمے آوار جتگ ءُ ناشناسیں جاھاں برتگ انت –

کسانسالیں زھگ پاکستانی پوج ءَ کولواہ ءِ دمگ جت ءَ چہ آوار جتگ ءُ بیگواہ کتگ انت آوار جنگ بوتگیں زھگانی پجار یارو ء لال بکش ءُ نُھ سالی ئیں شوکت ء لال بکش ءُ دوازدہ سالی ئیں لال بکش ءِ بابل ءِ ناماں چہ بوتگ انت –

اے زھگ پاکستانی پوج ءَ ھما وھد ءَ آوار جتگ ءُ بیگواہ کتگ انت کہ آ وتی دلوتانی چارینگ ءَ شُتگ بوتگ انت –

بلوچستان ءِ بنجاھی شھر شال ءَ مروچی دوازدھمی روچ ءَ زھرشانی نندانک برجاہ،شھدربرجاہ بند ءُ دراھیں وانگی پرکاری سرجم ءَ ماٹو کنگ بیتگ اَنت –

بلوچستان ءِ بنجاھی شھر ءَ یک نومبر ءَ بلوچستان شھدربرجاہ ءَ دو نودربر سھیل بلوچ ءُ فصیح بلوچ ءِ بیگواھی ءِ ھلاپ ءَ شال ءَ نودربرانی یکشلیں زھرشانی نندانک انگت ءَ برجاہ اِنت –

گوستگیں روچاں سرکاری واکدار گپ ءُ تران اتکگ اِت اَنت بلے آیاں چوشیں گپ دیم ءَ آورت نہ کت کہ چریشی ءَ نودربر وتی زھرشانی ءَ ھلاس کت بہ کن اَنت ءُ نودربرانی گوشگ اِنت کہ داں ھما وھد ءَ مئے زھرشانی برجاہ مان ایت کہ اے دوئیں نودربر یل کنگ نہ بنت –

ھمے وڑ ءَ بلوچستان ءِ دمگ کیچ ءَ ھم گوستگیں روچ ءَ نودربرانی بیگواھی ءِ ھلاپ ءَ کیچ شھدربر جاہ ءَ روانک کش اِتگ اَت –

ھمے وڑ ءَ اوتھل لومز شھدربرجاہ ءِ نودربراں ھم وتی جارے ءَ گشتگ کہ شال ءَ گرگ بیتگیں نودربرانی بیگواھی ءِ ھلاپ ءَ باندا زھرشانی ءُ روانک کشگ بیت اِنت –

اے اولی بر اِنت کہ بلوچستان ءِ روانکاں مردماں گُد ءِ جاہ ءَ کپن پوش اِتگ ءُ روانک ءَ بھر زرتگ –

گوستگیں سَے روچاں بلوچستان ءِ تیابدبی شھر گوادر ءَ حق دو تحریک ءِ نیمگ ءَ زھرشانی نندانک برجاہ اِنت کہ اے نندانک ءَ بازیں کچے ءَ مردماں بھر زرتگ کہ گوادر ءَ ھوار بلوچستان ءِ جتا جتائیں جاھاں بندوکیں مردم اے نندانک ءَ ھوار اَنت –

گوادر ءِ زرمبشتاں اے اولی زرمبشت گوشگ بیگ اِنت اے کساس ءَ اے زرمبشت ءَ مردماں بھر زرتگ ءُ وتی ھکانی لوٹ ءَ کنگ ءَ اَنت –

گوادر حق دو تحریک ءِ سروک مولانا ھدایت الرحمان ءَ کفن پوش روانک ءَ گوں تران کنان ءَ گُشتگ کہ ما پر ایمنیں مردم اِنت، مئے جد ءُ جھد پر اِیمنیں جد ءُ جھدے جمھوری ءُ رھبندی جد ءُ جھد اِنت۔

آئی ءَ گُشتگ کہ ما مروچی تھنا اے گُشگ ءِ ھاتر ءَ اد ءَ اتکگ آں کہ میرین والا، ایم ایس والا کوسٹ گارڈ والا، آرمی ءُ ایف سی والا ءُ چینی کارمنداں ءُ اد ءِ پھازگی ادارگ ءِ کارمنداں اے ھال بہ دیاں کہ گوادر میگ اِنت ءُ مدام مئے مان ایت۔

آئی ءَ گُشتگ کہ ماں گوں ادارگاں گوں جنگ نہ لوٹ ایں، بلے اے ادارگ نوں وتی کرداں راست بہ کن اَنت۔ اگاں دیمتر ءَ مئے یک مائیگیریں ھم تیاب ءُ زر ءِ دپ ءَ کم شرپ کنگ بیت گُڑا شمے چیک پوسٹ اد ءَ نہ مان اَنت۔

نبشتانک: بلوچستان شھدربرجاہ ءِ آوار جتگیں نودربر ءُ مئے ھاموشی

نبشتہ کار: بالاچ قادر

دی بلوچستان پوسٹ

ھاموشی اَنچیں کیفے کہ کم کمّ ءَ بنی آدم ءِ ایمان ءَ ھوں گوں وت بارت گپّ جنگ ءِ مسال ھما کشگ ئیگ اِنت کہ کسے اود ءَ سپر مہ کنت تہ کوہن تّرایت ءُ گڈّ سرا ھاکانی اندر ءَ انچو بار گیپت کہ مردم زانت ھوں نہ کنت اد ءَ کشکے ھست اَت یا ناں۔

زلم ءُ زواراکی ءِ بگیری ءَ مردم ھمنچو کہ ھاموش بیت اِنت آئی ءِ توار گیش چیر تّران کنت مئے چاگرد ھوں اَنچیں وئیلے ءَ گوْر جتگ اد ءَ ھرکس وتی زبان ءَ پھریزگ ءِ نیّت ءَ گپ نہ کنت ءُ گُڈ سرا ھمے گپ نہ کنگ آئی ءَ گُنگ جوڑ کنت۔

مروچی دو ھپتگ بیت کہ بلوچستان مزن شھدربرجاہ ءِ دو نودربر بیگواہ اَنت اشانی بیگواھی ءِ ھلاپ ءَ نودربرانی زھرشانی یونیورسٹی ءِ گیٹ ءَ برجاہ اِنت ءُ درستیں کلاس ءُ چکّاس ھوں یل کنگ بوتگ اَنت بلئے بیا اد ءَ ایش کن کہ کسّ ءَ سمایے ھوں نیست۔

سرکار پہ بلوچاں نہ بوُت اے ملک ءِ واکدار پہ بلوچاں نہ بوت اَنت انسانی ھکانی پانک جنیں گل ھوں بلوچ ءِ جیڑہ ءَ چمّاں بند کن اَنت اگاں بلوچ ءَ پہ کسّے ءِ دل درکیت گڑا آ ھم پد ءَ بلوچ اِنت۔ بلئے ھیپ پہ اے گپ ءَ کہ کول ءِ کماشانیگ ءَ “کسّے ءِ گوش ءَ مورے ھوں نہ وارت”۔

اے بتل باز رواج گپتگینے چُناھا گوش ءَ کہ مور بہ وارت گڑا مردم ءَ سما کپ ایت کہ من ءَ چیزے ورگ ءَ اِنت ءُ پرے نیّت ءَ آ اگاں دگہ کارے کرت نہ کنت بلئے پہ مور ءَ دور کنگ ءِ نیّت ءَ دست ءَ وتی گوش ءَ وَ بُرت کنت۔

مروچی گوں بلوچ ءَ ھمے جیڑہ اِنت مور گوش ءَ وران اِنت بلئے واجہ ھنچو بے تھمبل ءُ تُرس آماچ اَنت کہ دست ءَ گوں گوش ءَ بُرت نہ کنت چُش نہ اِنت کہ بلوچ بے مردُم نہ اِنت بلوچ ءَ دانشور ھست،سیاسی ءُ چاگردی رھشون ھست،شائر ءُ نبشتہ کار ھست،شّریں گشتانک دیوک ھست،بلوچ ءَ ڈاکٹر ءُ پروفیسر ھست بلئے چہ بازیں بے تھمبلی ءَ درست اے چیز ءَ بے سما اَنت کہ آھانی گوشءَ مورے ورگ ءَ اِنت۔

ھانوادھیں مردماں وتی زبان انچو مُھر داشتگ کہ گُشئے زاناں چو نوک آپیں زھم ءَ کاربندگ ءَ پہ کُنٹ بیت کّسے اگاں شال ءِ جگرسندیں سارتی ءَ شپ ءِ نیم ءَ نودربرانی کّرا اَتک ءَ نشت نہ کنت بلئے پراھاں ٹوکے وَ کُت کنت بلئے زبان پھریزی ءِ اَنچیں کیفے سرکشّان اِنت کہ کّس ھچ نہ گُش ایت ھمے زبان بندی ءُ دل تُرسی ءَ مردُمانی ھبر ھوں چرایاں پچ گپتگ اَنت،اے نیّت ءَ بگندئے کسّے گپے جنگ لوٹ ایت بلئے بازیں بے تھمبلی ءَ آئی ءِ ھبر درآیگ ءَ نہ اَنت-

بلوچاں گشتگ “ائیب چہ باسکان اِنت کہ کمان تیران نہ بارت”
بلوچ ءِ گْونڈو یک پہ یکّ ءَ گار بوان اَنت،لٹّ ءُ کٹ کنگ بیگ ءَ اَنت،تُرس ءُ بیھار ءِ باپُشت ءَ پد کنزینگ بوگ ءَ اَنت بلے ناں شپ ءَ زبان پِر ناں دیوالاں گوش۔

کسّے ءَ اگاں بزانتیں کہ پہ اے زھگاں گپّ جنوکے ھست تہ آئی ءَ کُرتن ءَ پیش ھزار رند جیڑاتگ اَت بلئے آئی ءَ سما اِنت کہ باسک چہ بُن ءَ نزور اَنت۔

زی من ءَ شھدبرجاہ ءَ کماشیں گیٹ پانے ءَ دیست، رؤگ ءِ وھد ءَ پہ من سد کلدارے شھار دات من جُست کُرت ناکو ایش کیگ اَنت،گُشتے اشاں بزیر پہ نندانک جتگیں زھگے آپے کن ءُ بیاراِش من زانت اے پیرمرد ءَ انچیں ھاٹیگے گون کہ اشی ءِ وسوس ءَ گوں واب نہ کپ ایت بگندئے گپ کُرت نہ کنت،گشتانک دیگ نزانت نبشتہ کاری ءِ رھبنداں چہ نابلند اِنت بلئے اے پیرمرد وتی بھر ءِ چکاسّ ءَ دیگ لوٹ ایت۔

او بلوچاں! زبان کارچے نہ اِنت کہ کاربندگ ءَ زنگ بیت اِنچو بے تھمبلی شُمئے تپلیں زھگاں پلّکان کنت گپ جن اِت کہ شمئے گپّ توارے مّچین اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گوھرام بلوچ ءَ شھید شاہ میر بلوچ ءَ ستاشانی ندر کنان ءَ گشتگ کہ سیزدہ نومبر ءَ کولواہ ءِ کوھانی تہ ءَ پاکستانی پوج ءَ سرمچارانی راہ ءِ بندگ ءِ جھد کُتگ۔ ھمے میان ءَ زورگریں گیریں پوج ءُ سرمچارانی نیام ءَ دیم پہ دیمی جنگ بندات بیتگ کہ اِشی ءِ تہ ءَ بلوچ سرمچار شاہ میر بلوچ پنام ءِ شئے شاپکولی سک باز ٹپی بیتگ اَت، ءُ آئی ءَ پہ دوا دارو ءَ نیمگ ءِ برگ بیگ ءَ بیتگ اَنت کہ راہ ءَ نمیران بیتگ۔ دیم پہ دیمی جنگ ءِ تہ ءَ دژمن ءِ پنچ پوجی کارمند ھم کُشتگ ءُ بازینے ٹپی کُتگ اَنت۔

میجر گوھرام بلوچ ءَ گُشتگ کہ شاہ میر بلوچ پنام شئے جھمنند کولواہ شاپکول ءَ دلیری ءَ گوں جنگ کنان ءَ یک ساھتی ءَ بُرز زورگریں گیریں پوج ءَ گوں جنگ داتگ۔ پاکستانی پوج ءِ کمک ءِ ھاتر ءَ جنگی بالی پرگ ھم جنگ جاہ ءَ رس اتگ اَنت۔ ھمے نیام ءَ جنگ ءَ شھید بیتگیں شاہ میر بلوچ ءَ ٹپی ئیں جاورانی تہ ءَ دژمن پوج ءِ انگیر ءَ درآیگ ءَ سوبمند بوتگ۔ رند ءَ آ پہ الاج ءِ نیمگ ءِ برگ بیگ ءَ بیتگ اَنت ئِے کہ راہ ءَ شھید بیتگ۔

میجر گوھرام بلوچ ءَ گُشتگ کہ شھید شئے شاپکولی چہ 2012 ءَ بلوچ راجی جُنز ءَ گوں بندوک بوتگ ءُ بی ایل ایف ءَ سیکنڈ لیفٹیننٹ ءِ اگدہ ءِ سر ءَ بیتگ۔ آ یک دلیریں ءُ بامردے جنگولے بیتگ۔ آئی ءَ بازیں دمگاں اورماڑہ، کلانچ، بالگتر، آواران، جھاؤ ءُ کولواہ ءِ سنگرانی تہ ءَ وتی زمہ واری پیلو کنان ءَ دژمن پوج ءِ دیمپانی کتگ۔

شھیدانی مشن آجوئی بلوچستان مئے جھد ءِ مول ءُ منزل اِنت۔ بلوچ سرمچار بلوچستان ءِ آجوئی ءَ داں ھمے پیم ءَ وتی جھد ءَ برجاہ دار اَنت۔

نبشتانک: ابیتکی موسمے

نبشتہ کار: زھیر مراد

دی بلوچستان پوسٹ

ارواہ شناسی زندمانی ءَ ابد کنت؟ نَمر بوگ چے یے؟ تو باریں من ءَ سرپد بُوَگ ءَ ئے؟ من ءَ گُوشدارگ ءَ ئے؟ من انوں اِے آزمان ءِ بے کچیں ساھگ ءَ ایوک ءَ میلانک آں ءُ ودارِیگ آں کہ اِستالے بِہ سد اِیت ءُ من ترا سھی بِہ کن آں کہ مرچی من ءَ پہ ابیتکی ءَ لبز پکار اِنت ءُ لھتیں نِدارگ گوں یاتاں کہ من  اِے بے موسمیں شپ ءَ ایوک ءَ آزمان ءَ پہ اِستالے ءِ سِدگ ءِ ودار ءَ آں بس یات اَنت کہ ابیتکی ءِ کوار ءَ اَنت چو آزمان ءِ بزّیں سْیاھی ءَ منی اندر ءَ ایر نندان اَنت شپ اِنت، بلے اِے شپ ایوکیں شپے، ناکہ استارے سِد اِیت ناکہ کسے ڈنّ ءَ سرکشّ اِیت من ایوک ءَ اُوشتوک آں! اگاں کسے سر بِہ کشّ اِیت ھم پہ چے۔

مرچی ناکہ موسمے مان اِیت ناکہ چاڑے، بس ایوکیں شپے تو زان ئے چی ءَ ؟ ، زان ئے مرچی ریاز ءَ من ءَ گیش ایوک کُتہ ءُ ابد واب اِنت نوں بِھ آزمان ءَ نہ چار اِیت ءُ پہ استالے ءِ سِدگ ءَ ودار نہ کنت بلے یار ریاز ءِ واب کپگ ءَ مرچی توامیں شپ واب ءُ بے زید اِنت۔من اگاں گوں تو کِسّہ بہ کن آں  دراہ بے زید بَہ اَنت ناکہ اِے وھدی ریاز ءِ ھما جُست ءِ پسّہ ءَ دات کن آں کہ انوں منی اندر ءَ چِست اِنت کہ مُژداں جُست کُتگ اَت ئِے “تئی نام ءَ” کہ اِے کے اِنت؟”
ھرچ ھبر ءِ بندات ءَ منی زُبان ءَ اِنت”۔ءُ منی ھبر بس ھمے بوتہ منی ھُدا ءُ ریاز ءِ کندگ ءُ  ھبر کنگ ءَ گوں منی ءُ آئی مْیان ءَ ابیتکی یے ودّ اِتگ من نہ زانتگ کہ اے چونیں ابیتکی یے بلے دمانے ءَ پد ریاز ءَ وتی کِسّھے کُتگ ءُ من وتی، من وتی کِسّہ گوں ریاز ءَ گیش ھبر کنگ ءَ پہ آؤرتگ اَنت کہ بے کارست بوتگ اَنت ناکہ انوں ریاز ءَ گوں بندوکیں وھد ءُ پاسے ءِ موسمے سھرا کُت کن آں۔

بلے! زان ئے زِندمانی ءِ وتی دْروشمے ءُ سپر ءِ وتی دابے لبزاں گوں ھمے وھد ءُ پاساں آژنا کنگ، زندمانی ءِ اسل دْروشم بہ گِند ئے نہ اِنت، بلے گوں وت آژنائی یے وَ ھست اِنت من ھمے آژنائی ءِ اندیم ءَ گوں تو مُدام ھبر  کن آں ءُ وتی ماسیت ءُ اھوالاں کن آں ،بلے ھبر ءَ پیش مئے سپر بنا بیت ءُ زندمانی گامینگ بیت کہ من وتی تو ءُ وتی اندر ءَ منزلے ءِ مساپر ئے منزل ءِ شوھاز ءَ سپر ءِ اسلیں رنگ ءَ سھرا کنت یاکہ بس جُنزگ ءُ رھادگ بُوَگ گْوشت نہ کن آں چی ءَ کہ برے برے ھمے گُمان بیت کہ سپر چہ منزل ءَ زیباتر  اِنت۔ بہ گِند ئے منی ھمے اندر ءِ سپر ءِ وھد ءَ اگاں ابیتکی یے ءَ ماں شانتگ، گُڑا لبزاں لھم لھم ءَ ماں منی ارواہ سماراں کُتگ کہ ھمدا زھیر ءُ ترانگانی اِمروزے  ءَ وت ءَ ساز اِتگ ھمے دمان ءَ رنگ ءُ جلواھاں سر کشّ اِتگ، بلے انوں زھیر مان اِیت ناکہ رنگے بس تئی گُمان اِنت ءُ ریاز۔

بلے مرچی ریاز ھمے رنگ ءُ لبزانی بریکٹاں گوں پیوند اِنت۔ھمے جلواھانی مْیان ءَ اِنت کہ زی ریاز ءِ ھیال ءَ بوتگ اَنت یار نہ زان آں مرچی  پرچی ءَ ھمے “ھوار اِیں” جیڑگ ءَ پہ لاچار کنگ ءَ اِنت کہ ھرچ سنگت رَوَگ ءَ پیش ھمے گالاں گوں ارواہ ءِ سر ءَ دست ءَ ایرمرزیت اسل ءَ اِے گُڈّی دْروتے نہ اِنت، ھاٹی ءُ توانے۔ من ھرچ وھد ھمے ھبر  گوں ریاز کُتہ یا گوں دِگراں  کہ مارا ایوک ءَ جُنزگی اِنت، اِے دگ اوراہ شُناسیں دگے اد ءِ ھِچّ تاب ءُ ریس  پہ رھگوزاں بے توکل ءُ بے ھاٹی نہ اَنت اگاں منی اندر ءَ پہ ھِچّ ھمسپر ءَ موسمے نہ ساچ اِیت اِے بہ گند ئے ھمے ایوکی ءِ سان اِنت یا اِے راہ ءِ دودے اَنچیں کہ من ناآژنا آں۔چوناھا سپر ءِ ساچ ءُ زیبائی اِنت کہ کِشک ءُ جاگھاں گیش جلواناک کن اَنت ھرچ ھمراہ توانگر ءُ دیرمانیں ترانگاں گوں گندگ بیت سپر ءِ ھمے زیبائی اِنت، ءُ ھمے ھاک اوبادگی ءِ ایمان اِنت اِے بود ءَ گیش توانگر کنت کہ اِے ھبر ءَ پد پرما یک سنگتے ءِ نیمگ ءَ چِہ جُنزگ ءُ زمین پھازی ءِ ڈُبّھے کُوپگاں دَیگ بوتگ کہ اِے ڈُبّہ ھما پیم ءَ نوں من ءَ پیلو کنگی اِنت،ھما ڈُبّہ کہ کرناں چہ دَیگ بُوھان ءُ داں پرما سر اِنت اَچ ما پد اُوں اِے ھمے پیم روان کنت زمین پھازی ءِ ڈُبّہ، ھما بیرک ءِ ڈُبّہ کہ آئی چیر ءَ ھمُک مردُم پہ ایمنی نِشت کنت۔

سنگتی ءِ ڈُبّہ، ھما اھد ءُ اکرار ءِ ڈُبّہ کہ سنگتے ءِ چمّانی تہ ءَ گندگ بیت پہ گُڈّی ارمانے ءَ ءُ ھمے راستی ءِ پد ءَ زندمانی کنگ کہ مرچی وتی ڈوبر ءَ دِگہ لھتیں یات ءُ ترانگ جاگہ دَیگی اِنت دِگہ ھمراھے ءِ اُوست مُھکم ءُ جوزگ زندگ دارگی اِنت ءُ من ءَ ھمے ایوک ءَ جُنزگ ءِ ھیال گیش ھاٹیگ دنت بلے زان ئے مرچی پورا ھما سپر ءِ شپ اِنت کہ ھور ءِ سَوب ءَ بید ء رَوَگ ءَ دِگہ وڑ نیست اَت ھما ویرانیں شپ کہ وت ءَ جمبرانی پُشت ءَ اندیم داتگ اَت ئےِ ھور ءِ ڈلگ ڈلگیں ترمپ مئے جان ءَ میسینان ءُ زمین ءِ سر ءَ کپان ءُ چہ زمین ءَ ھاک ءِ سارتیں بوھے چست بُوھان اَت کہ جبین ءَ دِگہ چاڑے بکشگ ءَ اَت، بلے ھور ءِ وھد ءَ ھرکس بے گُمان اَت کہ اِے چاڑ ءِ کیپ چے اِنت یازدہ کلاک ءِ پند ءِ مْیان ءَ نیم کلاک یا کمّو گیش ھَور ءِ کِسّہ بس ریاز اِے دِگہ سُھب ءَ آؤرت ءُ ھمے ھاک ءِ بوہ ساڑات کہ ما ریاز ءِ ھبرانی پلہ مرز بوت اِیں بلے آ سپر ءَ ریاز ءِ پادانی تراول ءُ مئے ژندی کہ شپ ءِ روچ کنگ ابید بس ساسارگ ءَ پہ گْونڈیں آسراتی یے ءَ مھتل اَت اِیں ، ھمیشیءِ  گُڈّی توجیل بس پہ رھادگ بُوَگ ءَ اَت چوناھا رھگوزے ءَ پہ شپ ءِ سُھب کنگ ءَ زمین وت پُرگنجیں آسراتی یے،بلے آ پدی ھَور ءِ سَوب ءَ بید ء رَوَگ ءَ دِگہ ھِچّ راہ ءُ در نیست اَت۔ چوناھا ما زانت کہ مارا راہ ءَ ھور گِپت، بلے بُنجل ءَ سر بُوَگ ءَ پیش ھَور ءَ ایر دات ءُ چُوشیں نا دریں ھندے گَت ءَ نہ اَت۔

مئے گام پہ ناگیگی زمین ءِ سر ءَ ایر بوھان اِت اَنت، انچو گُش ئے ما نوکیں زمینے ءِ چکّا وتی پاداں ایر کنگ ءَ اِیں۔گِروک ءِ شھم ءُ تھاری چمّاں سُمبان اِت اَنت چمّاں پہ تکانسری ءِ نااُمیتیں ھاٹی ءِ پولگ ءَ ھبّر کنگ ءَ اِت اَنت کہ بید ء اڑان ءُ رَوَگ ءَ دِگہ ھِچّ توجیل نہ منتگ اَت بلے اِے کراماتیں شپ ءِ کِسّہ بس گوں لبزاں مان اِیت کہ اِیشی وتی بیوانک ءُ ویرانی آزمان ءَ جمبرانی پُشت ءَ اندیم داتگ اَت ءُ بے وانکی مارا یکے دومی ءَ چہ درامد کنگ ءِ جھد ءَ اَت اِے نیم کلاک ءِ مْیان ءَ کس ءَ ھبر نہ کُت ، انچو پورا ما ناآژنائیں مردُم اِت اِیں بس آ سپر لبزاں سمبرینت کنت، آ موسم سھرا نہ بیت۔

باریں اِے پیمیں چُنت شپ گوں ھَور، پند ءُ گُژنی ءِ کِسّھاں گوں سرکیل اَنت، بلے ریاز ءِ کِسّہ کولواہ ءِ بھارگائی موسمانی شیر ءُ روگن ءِ کِسّہ اِت اَنت، یا سید ءُ آھوگانی شکار ءِ ، یاکہ رسانکدر ءَ نِندوکیں لھتیں پوچکیں مردُمانی کسّہ ءُ کارپد بلے چے کن ئے کِسّہ وَ کِسّہ اِنت، پر وت ءَ زُبان ءُ دیوانے الم پولیت بلے مرچی ناکہ پرمنی کِسّہ ءَ دیوان مان اِیت ناکہ زُبان ءُ لبزے،بس تئی بودِشت ءُ لبز وارسیں ریاز ءِ پدمنتگیں گُمان اِنت۔

ریاز گوں من اولی سنگت اَت کہ منی اندر ءِ موسماں آژناہ بُوَگ ءَ سرگردان اَت چوناھا من ریاز 2014ء ءَ دیستگ اَت، بلے 14 ءَ پد من ءُ ریاز کُجام وھد ڈیک وارت منی گِندگ ءِ موسم ھما بوت کہ اولی وار اَت۔ انچو گُمان بوت کہ گُش ئے بھ نہ دیستگ، بلے منی ھمے تب گوں ھرکس ءَ اَنچوش اِنت برے برے کہ ما دُچار کپت اِیں، گُڑا بی بی سی ءِ گُوشداگ ءَ پد یا چونائیں وھدے ءَ شُرّے ءِ چکّا نشت اِیں ءُ چمّ آزمان ءَ سک دات اَنت پہ استالے ءِ سدگ ءَ ریاز ھمودا اتک ریاز ءِ نندگ ءُ ھبر کنگ ءَ من ءَ پہ الم اَت کہ من وتی موبائل ءِ سَوت ءَ بند بہ کن آں ، اگاں ما دوئیناں ھبر کُت گُڑا مئے بنگپ جنگ ءُ وتی ھمراھانی بیرگیں گِسر کپگ ءُ آیانی بارو ءَ یا لبزانک اَت۔ بہ گِندئے ما ھردُکاں زانت کہ ما وت ءَ ھالیگ کنگ ءَ پہ ھبر ءَ اِیں۔گُڈّی ءَ ما پہ لاچاری یاکہ وتی دلجم کنگ ءَ اِے ھبر ءِ آسر ءَ زُرت کہ شھیدی ءِ راہ اِنت ءُ بیرانی بیت۔

بلے! ریاز ءِ وتی جتائیں تبے اَت۔کندگ ءُ مسکرا، سرپٹی، بلے آئی اندر ءِ ھما لبز وارسیں مردُم آئی گیش ڈنّ ءَ نہ کُت ھردیں ما ھبر کُت من ءَ ھمے سما بوت ما دو جتائیں منزلانی سربتگیں راھی اِیں کہ ما یکیں ساھگ ءَ پہ ادارُکی نشتگ اِیں ءُ نوک یکے دومی ءَ گوں آژناہ بُوَگ ءَ اِیں شھر ءِ درامدیں دمکانی گولگ بیت یا گورپام ءُ رُنگانی گردگ، آئی ءِ ھبر بس ھمیش اَنت ھما کے اِنت؟ منی پسّہ بس یکین اَت، منی ھُدا۔

نہ زان آں پرچی ءَ ریاز انوگیں وھد ءَ من ءَ وار وار ھمے یکیں جُست ءَ کنگ ءَ اَت من ابرم ءِ ھمک جلواناکیں شے ءِ نیمگ ءَ دست ترّینت ءُ آئی پسّہ ھمے دات کہ آئی اندر ءَ بِہ چار ترا منی ھُدا چمّاں کیت، بلے من زانت منی پسّہ ءَ چِہ دلجم نہ اِنت بلے من کہ جُست کُت داں آئی ھبر ھمیش اَت کہ تو گوں ایشی ءَ من ءَ نوکیں رنگ پیشدارگ ءَ ئے چوناھا مئے داب ءُ پیم ھمیش اِنت۔منیگ ءُ تئی مْیان ءَ ھُدائی ءُ  نہ ھلوکیں دُروی یے، اِے مْیان ءَ باریں چُنت موسم سرکشّ اِیت، چُنت باریگ ودّ اِیت ءُ چُنت سپر بنا بیت۔

“من چار اِتگ منی اندر ءَ دلے نوائیں ھست “
“من جیڑ اِتگ تئی ھدائی اِنت یا دیوانگی”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بیگواھیں مردمانی کھول وائس فار بلوچ مسنگ پرسنز ءِ بنجل ءَ اتکگ ءُ وتی زھرشانی نبشتہ کنائینتگ ءُ وتی دوستیگیں مردمانی بیگواھی ءِ درگت ءَ دلجمیں ھال وائس فار بلوچ مسنگ پرسنز ءِ بنجل ءَ نبشتہ کنائینتگ انت –

نوشکی ءِ جھمنندیں جمیل احمد ء عبدالسلام بادینی ءِ کھول ءِ رِد ءَ جمیل احمد بلوچستان ءِ شھدربرجاہ ءِ گیٹ ءِ دپ ءَ پاکستانی پوج ءَ زورانسری آوار جتگ ءُ بیگواہ کتگ اَنت-

آئی ءِ کھول ءَ بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ جمیل بلوچ ءِ زورانسری آوار جنی ءِ درگت ءَ دلجمیں ھال نبشتہ کنائینتگ انت، آھانی رِد ءَ جمیل احمد گوستگیں ماہ ءِ بیست ءُ دو رمس ءَ پوج ءَ زورانسری آوار جنگ ءَ پد بیگواہ کتگ اَنت –

جمیل احمد ءِ کھول ءَ جمیل ءِ یل کنگے لوٹ کُتگ –

کھول ءِ رِد ءَ جمیل احمد سیٹلائٹ ٹاؤن ءَ چہ گِس ءَ در اتکگ ءُ درمان ءِ گرگ ءَ شُتگ بوتگ چہ آودہ پدا بلوچستان ءِ شھدربرجاہ ءَ شُتگ کہ آودا پیسر ءَ ساڑئیں ایف سی ءُ چیریں ادارھانی کارمنداں آئی ءِ سنگتانی دیم ءَ زورانسری آوار جتگ ءُ گوں وت برتگ –

زانگ بہ بیت جمیل احمد ءِ ھمراھی ءَ آئی ءِ دگہ سنگت ءِ ھم زورانسری آوار جنگ بوتگ –

کلات ءِ جھمنند نظیرہ بی بی ھم شال پریس کلب ءِ دیم ءَ برجاھیں بیگواھیں مردمانی پانکجنیں گل ءِ بنجل ءَ اتکگ ءُ وتی لوگ واجہ ءِ آوار جنی ءِ سرجمیں ھال مسنگ پرسنز ءِ گل ءِ کرا جم داتگ اَنت –

نظیرہ بی بی ءِ رِد ءَ آئی ءِ لوگ واجہ منیر احمد سال دوھزار سینزدہ ءَ کلات ءَ چہ وڈھ ءَ رؤگے وھد ءَ سوراب ءَ پوج ءَ آوار جتگ ءُ بیگواہ کتگ –

آئی ءِ گوشگ ات مناں کسانیں چُک ھست لوگ واجہ آوار جنی سوب ءَ مئے زند ازاب ءِ تہ ءَ گوزگ ءَ اِنت –

نظیرہ بلوچ ءِ رِد ءَ آئی ءِ لوگ واجہ منیر احمد وڈھ ءَ آروس ءَ رؤگ ءَ بوتگ کہ آ گوں دگہ شش ھمراھانی ھمراھی ءَ آوار جنگ ءُ بیگواہ کنگ بوتگ بلے پدا رند ءَ آئی ءِ ھمراہ یل کنگ بوتگ انت بلے منیر ھنگت بیگواہ انت –

جمیل احمد ءُ منیر احمد ءِ کھول ءَ لوٹ کتگ کہ آھانی دوستیگیں مردم دیم ءَ آرگ بہ بنت اگاں آھانی سرءَ بھتام ءِ ھست آمیدگساں آرگ بہ بنت ءُ سزا دئیگ بہ بنت –

بلوچستان ءِ تیاب دپی شھر گوادر ءَ نندانک ھمے ھپتگ ءِ بنداتی روچ ءَ بندات کنگ بوتگ، نندانک ءِ مروچی سیمی روچ ءَ ھم برجاہ ءَ اِنت، شھر ءِ وائی چوک ءَ تمبو جتگ ءُ مردمانی نندانکیں زھرشانی برجاہ اِنت ءُ شپ ءَ ھم ھمد ءَ گوازین اَنت-

ھالانی رِد ءَ ابید قانودی ٹرالرنگ، دریاوردانی آجوئیں وڑ ءُ پیم ءَ کار کنگ، بے مکسدیں چیک پوسٹانی ھلاس کنگ ءُ دگہ لوٹانی ءِ ھک ءَ گوادر پورٹ دگ ءَ زھرشانی کنوکانی نندانک مروچی سیمی روچ ءَ ھم برجاہ ءَ اِنت وھدے کہ شھر ءِ موبائل نیٹورک ننداکیں زھرشانی ءِ بنداتی روچ ءَ بند کنگ بوتگ-

زھرشانی کنوکاں موباھل نیٹورک بند کنگ ءَ ھکومتی بے سوبی زاھر کتگ ءُ گْوشتگ کہ داں گُڈی لوٹ ءَ جُھد برجاہ بیت-

زانگ بہ بیت بلوچستان ءِ تیاب دپی شھر گوادر ءَ اے سال ءِ جولائی ماہ ءَ دمگی مردماں شھر ءِ جتاجتائیں دمگاں آپ ءُ لین ءِ نہ بوگ ءِ بگیری ءَ زھرشانی ءِ درچ بندات کتگ ءُ آیانی تہءَ چُک ءُ زالبول ھوار بوتگ اَنت-

ھمکروچی زھرشانی نندانک ءُ دگانی بند کنگ ءَ پد ھکومت مردمانی بُنکی آسراتیاں دیگ ءِ بے سوب بوتگ اَنت-

اشی ءَ پد دمگی نیکراھی راھشون مولوی ھدایت الرحمان بلوچ ءِ سروکی ءَ شھریاں مزنیں کچے ءَ مکران کوسٹل ھائی وے ءَ داں سے روچ ءَ زھرشانی بندات کُتگ مکران ءَ بلوچستان ءِ دگہ دمگ ءُ سندھءَ روگ ءُ آھگ مھتل بوتگ ءُ ھکومت ءَ زھرشانی کنوکاں گوں نند ءُ نیاد کتگ زھرشانی ھلاس کنائینتگ اَت-

گوادر ءِ دمگی مردم ھکومت ءِ ھشکیں سوگند ءُ وادھاں چہ لاچار بوتگ اَنت ءُ مولوی ھدایت الرحمان بلوچ ءِ سروکی ءَ ھمے سال ءِ 30 ستمبر ءَ گوادر یک بلاھیں مچّی یے برجم داشتگ ءُ گوادر ءَ سی پیک ءِ نام ءِ سر ءَ دیمروئی ءِ شور ءُ شار یک کر کتگ ءُ وتی جیڑھانی گیش ءُ گیوار کنگ ءِ ھاتر ءَ شھر ءَ زھرشانی کنگ ءِ جار جتگ اَت-

ھمے وھد ءَ دمگی انتزامیہ ءُ مولوی ھدایت الرحمان بلوچ ءِ میان ءَ نند ءُ نیاد بوتگ اَت بلے پدا ھم گوادر ءِ دمگی مردمانی جیڑہ ھلاس کنگ نہ بوت اَنت-

زھرشانی ءَ ھواریں مردمانی ھاسیں لوٹ بلوچستان ءِ زری سیمسر ءَ ٹرالرانی ابید قانودی دریاوردانی گر ءُ دار، ایران ءَ چہ آؤکیں توژگ راہ ءِ بند کنگ ءِ ھلاسی، ابید درکاریں پاکستانی پوج ءِ چیک پوسٹانی ھلاس کنگ اِنت، چریشی ءَ دمگی مردم ءُ دریاورداں کلاکانی کلاک دارگ ءُ آھاں زلیل کن اَنت-

گوادر ھک دو تھریک ءِ سروک مولوی ھدایت الرحمان بلوچ ءَ گوشتگ کہ ابید قانودی ٹرالرنگ ءَ زر تباہ کتگ ءُ بلوچستان ءِ ھکومت اشانی دارگ ءَ بے سوب اِنت-

آئی ءَ گْوشتگ کہ ما داں وتی لوٹانی منارینگ ءَ زھرشانی ننداک ءَ برجاہ دار ایں-

اے نندانک ءَ چہ کیچ دمگ ءَ ھم مردماں بھر زرتگ ءُ اے اُمیت ءَ نشتگ اَنت کہ سیمسری کار ءُ بار آجوئیں وڑ ءُ پیم ءَ کنگ بہ بیت-

زھرشانی ءَ ھوار یک ورنایے جمیل بلوچ ءَ دی بلوچستان پوسٹ نیوز ءَ گوشتگ کہ مردمانی تہءَ یک اُمیتے ودی بوتگ ءُ وتی ھک ءِ ھاتر ءَ جھد کنگ ءِ ھاٹیگ دار اَنت-

آئی ءَ گوشتگ کہ اد ءِ دمگی زالبول زھرشانی کنوکانی ھاتر ءَ لوگاں ورگ جوڑ کن اَنت ءُ کار اَنت مردمانی جزبگانی سر ءَ پھر بند ایں-

آئی ءِ گوشگ اِنت گوادر پورٹ، سی پیک ءُ دیمروئی ءِ شور ءُ شاراں اد ءِ مردماں زلیلی ءُ بزگی ءِ دیمپانی کنگ کپتگ-

یک چینی شھری ءِ دگ ءَ گوازینگ ءِ سر ءَ دمگی دریاورداں کلاکانی کلاک زر ءَ روگ ءِ موکل دیگ نہ بیت بلے نو چُش بوگ ءَ نئیل ایں-

پرگینگی وزیر عبدالرحمان کھیتران ءَ درملکی رسانکدر بی بی سی ءَ گوں گپ تران کنان ءَ گوشتگ کہ سیمسری باپاری ءُ ٹوکن سسٹم ءِ درگت ءَ نوکیں ھکومت ءِ جوڑ بوگ ءَ بلوچستان ءِ سروزیر عبدالقدوس بزنجو ءَ اسلام آباد ءَ پاکستان ءِ سروزیر عمران خان ءَ گوں گپ کتگ-

آئی ءَ گوشتگ کہ سیمسری باپاری ءُ ٹوکن سسٹم ءِ درگت ءَ چہ مردماں اے جیڑہ ءِ دیمپان اَنت سروزیر عمران خان ءَ اے جیڑہ ءِھلاس کنگ ءِ باور کنائینتگ –

کھیتران ءَ گوشتگ کہ ھمے وڑ بازیں چیک پوسٹ پاد کتگ اَنت وھدے کہ اے درگت ءَ مردمانی بزگ ءُ لاچاریانی دیر کنگ ءِ چست ءُ ایر برجاہ اِنت –

زھرشانی ءَ ھوار نصراللہ ءَ دی بلوچستان پوسٹ ءَ را گوشتگ کہ دمگی مردمانی مزنیں کچے ءَ زھرشانی ءَ چہ ھکومت تُرس آماچیں ءُ شھر ءِ انٹرنیٹ بند کتگ-

آئی ءَ گوشتگ کہ پیسر ءَ اد ءَ ڈنی مردمانی اکس جوڑ کتگ گوادر ءِ دروگیں رنگ دگنیا ءَ پیش داشتگ بلے نی راستیں رنگ ءَ ما پیشدارگ ءَ ایں-

آئی ءَ گوشتگ کہ دیمروئی اے شور ءُ شاراں اد ءِ دمگی مردم دو وھد ءِ نان ءَ چمّدار بوتگ اَنت-

داں شپ ءَ مولوی ھدایت الرحمان بلوچ ءِ سروکی ءَ زھرشانی شھر ءِ وائی چوک ءَ برجاہ ءَ اِنت ءُ مردمانی آھگ برجاہ ءَ اِنت-

میان استمانی انسانی ھکانی ادارھانی ھچ نہ گوشگ ءَ بلوچستان کوش جاہ ءِ جوڑ بوتگ – ماما قدیر بلوچ

بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ چیردستی ءَ زھرشانی بنجل برجاہ، وکیل ءُ دگہ تک ءُ پھناتاں سیادی داروکیں مردماں بنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

بنجل ءَ اتکگیں مردمانی میان ءَ تران کنان ءَ ماما قدیر بلوچ ءَ گوشگ ات کہ پاکستان ءِ نیمگ ءَ بلوچ سرڈگار ءِ زوراکی بازیں دھکاں برجاہ انت، سال دوھزار ءُ یک ءَ بگر تاں روچ ء مروچی پنجاہ ءُ دو ھزار مردماں گیش زورانسری آوار جنگ ءُ بیگواہ کنگ بوتگ اَنت –

ماما قدیر بلوچ ءِ گوشگ ات کہ میان استمانی انسانی ھکانی ادارھانی ھچ نہ گوشگ ءِ سبب ءَ بلوچستان کوش جاہ ءِ جوڑ بوتگ ءُ ھمک روچ بلوچستان ءَ زورانسری آوار جنیانی درچ یکشل ءَ برجاہ انت –

آئی ءِ گوشگ ات کہ سال دوھزار ءُ پنچ ءَ بگر تاں روچ مروچی ھشت ھزار ءَ گیش مردمانی زانگولیں جون دست کپتگ انت کہ ایمنسٹی انٹرنشنل ءُ دگہ انسانی ھکانی ادارھاں اے گپ وت منّ اِتگ انت بلے پد ءَ ھم آھانی ھچ نہ گوشگ ءَ پاکستان بلوچستان ءِ تہ ءَ وتی زلم ءُ زوراکیاں گیش کنان انت –

ماما قدیر بلوچ ءِ گوشگ ات کہ بلوچ ھچ کس پھریز نہ انت ھمک روچ پوج ءِ دست ءَ مردم آوار جنگ بوگ ءَ انت کہ آھانی تہ ءَ نودربر ءُ زالبول ھم ھوار انت –

ماما قدیر بلوچ ءِ گوشگ ات کہ میان استمانی انسانی ھکانی ادارہ زمین ءِ راستی ءِ زانگ ءَ ابید پاکستان ءِ پروپکنڈھانی سر ءَ اوست مہ داریت بلکیں وت دیم ءَ بیت ءُ اے سیزدہ سالی برجاھیں بنجل ءَ سر ءِ بہ جنت بہ چاریت کہ ما اد ءَ کجام لاچاری ءِ ھاتر ءَ نشتگ اِنت –

زرد آلو ءَ پوجی پانگس ءِ سر ءَ راکٹ ءُ مزنیں سلاھاں اُرش کتگ دژمن جانی ءُ مالی تاوان داتگ – جئیند بلوچ

بلوچ راجی آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں پانزدہ نومبر ءِ بیگاہ ءَ ھرنائی ءِ دمگ شاھرگ ءَ زورگریں پاکستانی پوج ءِ زردآلو ءِ پانگس ءِ سر ءَ اُرش کُتگ – سرمچاراں ھر نیمگ ءَ دژمن پوج ءِ سر ءَ راکٹ ءُ دگہ مزنیں سلاھاں گوں اُرش کتگ –

جارکش ءَ گوشتگ کہ اُرش ءِ آسر ءَ دژمن پوج ءِ سَے کارمند ھما دمان ءَ مُرتگ ءُ بازینے زدگ بوتگ اَنت ءُ دژمن پانگس سک باز تاوان دیگ بوتگ –

جارکش جئیند بلوچ ءَ گوشتگ کہ اُرش ءِ دومی روچ ءَ دژمن پوج ءِ جنگی بالگرداں دمگ ءِ تہ ءَ پوجی لشکر کشی بندات کتگ لس مھلوک نشانگ کتگ بلے بلوچ سرمچار اشی ءَ پیش وتی شوربندیانی رِد ءَ وتی اوتاگ ءَ سر بوتگ انت –

جارکش ءَ گوشتگ کہ اے اُرش ءِ زمّہ واری ءَ مئے گل بی ایل اے منیت ءُ کول کنت کہ سرڈگار ءِ آجوئی ءَ تاں دژمن سر ءَ مئے اُرش ترندی ءَ گوں برجاہ مان انت –