TBP Balochi

بلوچ اسٹوڈنس کونسل اسلام آباد ءِ نیمگ ءَ بیگواھیں بلوچ نودربر فیروز بلوچ ءِ زورانسری آوار جنی ءُ یل نہ کنگ ءِ بگیری ءَ ایرڈ ایگریکلچر شھدربرجاہ ءِ ڈن ءَ زھرشانی بنجلے برجم دارگ بیتگ-

نودربرانی ھواری ءَ فیروز بلوچ ءِ پت نوربخش بلوچ ءَ ھم زھرشانی بنجل ءَ بھر زرتگ ءُ وتی زھگ ءِ یل کنائینگ ءِ ھاتر ءَ زھرشانی کنگ ءَ اِنت –

فیروز بلوچ ءِ پت ءِ رِد ءَ ھبدہ سالیگیں فیروز بلوچ سیادی گریبیں گِس انت ءُ آئی ءِ زند ءِ درگت ءَ آ ترس ءِ آماچ انت – آئی ءَ ھر تک ءُ پھناتاں سیادی داروکیں مردماں ھوار ھوار نودربراں چہ دستبندی کتگ کہ زھرشانی بنجل ءَ مئے ھمراہ داری ءَ بہ کن انت ءُ زھگے وش سلامتی یل کنگے لوٹ بہ کن انت-

نودربر فیروز بلوچ ءِ یل نہ کنگے بگیری ءَ زھرشانی نشتگیں آئی ءِ سنگتیں نودربراں گوشتگ کہ کیچ ءَ سیادی داروکیں فیروز بلوچ روالپنڈی ائیریڈ شھدربرجاہ ءِ نودربر یے کہ آ گوستگیں ماہ ءَ چہ شھدربرجاہ ءَ دیم پہ کتاب جاہ ءَ روگ ءَ بوتگ کہ ناشناسیں مردماں زورانسری آور جتگ ءُ بیگواہ کتگ –

نودربر ءِ سنگتانی رِد ءَ فیروز بلوچ ملکی ادارھاں زورانسری آوار جتگ ءُ بیگواہ کتگ – نودربراں گوشتگ کہ اشی ءَ پیش ھم پنجاپ ءِ شھراں بلوچ نودربرانی زورانسری آوار جنی ءُ بیگواھی ءَ سی ٹی ڈی ءُ چیرین ادارھانی دست مان بوتگ –

زانگ بہ بیت پنجاپ ءَ دیر انت کہ بلوچ نودربر آوار جنگ بوھگ ءَ انت اشی ءَ پیش لاھور، فیصل آباد، ملتان، اسلام آباد، بہاولپور ءَ وانوکیں نودربر آوار جنی ءَ پد بیگواہ کنگ بوتگ انت – کہ آھانی تہ ءَ ھمے سال ءَ لاھور پنجاپ ءِ شھدربرجاہ ءَ بیبرگ بلوچ، اشی ءَ پیش بھاولپور ءِ زکریا شھدربرجاہ ءَ یاسین بشام ءُ بھاولپور اسلامیہ شھدربرجاہ ءَ ایجوکیشن ڈیپارٹمنٹ ءِ تھرڈ ایر ءِ نودربر الطاف نصیر نام ھوار انت –

بلوچ نودربرانی زورانسری آوار جنی میان ءَ نودربر بیبرگ بلوچ ءِ سی ٹی ڈی ءِ دست ےَ آوار جنی ءِ تامر ھم ترامجاھاں شنگ بوتط بلے پدا ھم اے وئیل ءَ پد بیبرگ بلوچ ءَ ھوار ایندگہ نودربر یل بوتگ انت –

بلوچستان ءَ زورانسری آوار جنیانی بگیری ءَ توار چست کنوکیں گل وائس فار بلوچ مسنگ پرسنز ءِ رِد ءَ ھزارانی کچ ءَ بلوچ ریاستی چیریں ادارھانء دست ءَ آوار جنگ بوتگ انت کہ آھانی تہ ءَ مزنیں کچ ءِ بلوچ نودربرانی انت – گل ءِ رِد ءَ بلوچستان، سند، پشاور ءُ پنجاپ ھِ جتا جتائیں دمگاں پھازگی ادارھانی دست ءَ بلوچ نودربرانی آوار جنی ءِ ھال نبشتہ کنگ بوتگ انت –

گل ءِ گوشگ انت کہ زورانسری آوارجنیانی ءِ لڑ ءِ تہ ءَ چُک ءُ زالبول ھم ھوار انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ شش سد ءُ ھپتاد ءُ چار روچ سرجم بوتگ انت –

مروچی بی ایس او ءِ رھشون ءُ دگہ پگرے منوگراں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ایردستیں راج ءِ ھاتر ءَ ھمک روچ یکیں داب ءَ گوزگ ءَ انت – ھر سھب ءِ بندات چہ زورانسری آوار جنی ءُ زانگولیں جولانی درآھگ ءَ گوں بندات بیت، ایندگہ ماھانی وڈا مئی ءِ سرجمیں ماہ ءُ جون ءِ ماہ ءَ ھم بلوچانی زورانسری آوارجنیانی درچ یکشل ءَ برجاہ بوتگ ءُ اشی ءِ تہ ءَ سک باز گیشی اتکگ –

آئی ءَ گوشتگ کہ گوستگیں روچاں زورانسری آوار جنگ بوتگیں دو مردم زندانانی تہ ءَ شھید کنگ بوتگ انت کہ پدردی یے – بیگواھیں مردمانی کھول وتی دوستیگیں مردمانی ھاتر ءَ سک باز پریشان انت آھاں ھمے ترس انت کہ زندانانی تہ ءَ لٹ کٹ میان ءَ مئے مردم شھید کنگ بنت –

آئی ءَ گوشتگ کہ زوراکی ، چک چینی، زورانسری آوارجنی، لشکر کشی ءُ در آمیدگسی کشت کوش سامراج ءِ ایردستی ءَ گیش کنگے زریہ انت –

آئی ءَ گوشتگ کہ بلوچستان ءِ جتا جتائیں ھند ءُ دمگاں کیچ، ھاران، آواران، ھزدار ءُ دومی دمگاں لشکر کشی بندات کنگ بوتگ انت کہ چریشی ءَ لس مھلوک سک باز آماچ بوھگ ءَ انت –

وتگڑیں سوبائی سرکار ءُ آئی ءِ باسک بلوچ چکچینی تچکی ءَ ھوار انت ءُ وتی دپ ءِ بستگ ءُ ھچ گوشگ ءَ نہ انت –

بلوچستان ءِ دمگ کیچ ءَ پاکستانی پوج ءِ سر ءُ مانسرانی تہ ءَ گندگ بیتگ-

دمگی مردماں ٹی بی پی ءَ گوں گوشتگ کیچ ءِ دمگ کولواہ ءُ بالگتر ءَ پوج بازیں کچے ءَ مُچ بوتگ اَنت، ھمے وڑ گن شپ ھیلی کاپٹرانی بال گوستگیں دو روچاں یکشل ءَ برجاہ اَنت-

بازیں کچے ءَ زمینی لشکر ءِ ھواری ءَ گن شپ ھیلی کاپٹر ھم دمگ ءَ سر بیتگ اَنت بازیں کچے ءَ لشکر کشی ءِ گمان کنگ بیگ ءَ اِنت- ءُ بلے تنی وھدی سرکاری بنشونانی رد ءَ اے وڑیں گپ دیم ءَ نیتکگ اَنت-

زانگ بہ بیت دو روچ ءَ پیسر ھمے دمگ ءَ بلوچ نیشنلسٹ آرمی ءَ پوج ءِ دو چوکیانی سر ءَ اُرشانی زمہ واری منّ اِتگ ات اَنت، بلوچ نیشنلسٹ آرمی ءِ جارکش ءَ رسانکدراں شنگ کرتگیں درشانی ءَ گُشتگ کہ مئے سرمچاراں ھوشاپ ءُ بالگتر ءِ میانی دمگ آسانک چڑھائی ءِ ھند ءَ وتگڑیں سی پیک ءِ پھازگی ءَ لشکریانی دو چوکیانی سر ءَ راکٹ ءُ نوکیں سلاھاں گوں اُرش کرتگ ءُ زورگریں لشکر ءِ پنچ کارندی کشتگ اَنت ءُ بازینے زدگ کرتگ اَنت جوانیں رپکانی گون ءَ چوکیانی دستیگ کنگ ءِ جھد کرتگ ءُ یک سنگرے ءِ تہ ءَ پُترتگ ءُ اود ءَ جتگیں کیمرہ، سولر سسٹم ءُ آ دگہ ساز ءُ سامان تاوان داتگ اَنت-

بلے سیکورٹی ءِ واکدارانی نیمگ ءَ اے درگت ءَ دگہ گپ دیم ءَ نیتکگ اَنت-

زندگی آجو اِنت

نبشتہ کار : شاھد اھمد

دی بلوچستان پوسٹ

چوشیں روچے نیست کہ ءُ ھر روچ گندان ءُ مار آں دل منی گْوش اِیت کہ ھمے بلوچیں ءُ بزگیں ءُ پنڈوکیں بلوچاناں سردیں ساھِگ ءَ برگ نان بہ وارین آں ءُ ایشی ءَ چہ ابید من پد ءَ جیڑ اِت کہ ھمے بزگیں جنین بزاں بلوچ جنین آدماں وھدے کہ من پہ وتی بزگیں چمّاں چارن ءُ گنداں کہ سرکاری نادْراھجاں شریں ءُ شِھمیں الاج بوگ ءَ نہ اَنت ءُ منی دل گْوش اِیت کہ ایشانی نادْراھی ءِ درداں گوں وت ءَ ھمگرنچ بہ کن آں ءُ ایشاناں چہ نادْراھانی آسودگ کنگ ءِ ھاتر ءَ شپ ءُ روچ مہ چار آں۔

کمے ساھت ءَ پد دل ءَ گوں مولور مولوری ءَ ءُ چم بند کُت اَنت ءُ جیڑ اِت کہ دو ھزار ءِ موٹل ءَ گوں بلوچ برات ءُ کماش ءُ پِتاں گند آں کہ چنکس پہ بزگی پہ وتی لاپ ءِ شوھاز ءَ چہ سیمسراں در پہ در اَنت منی دل ءَ دم بُرت ءُ گْوشت کہ واجہ ھدا من ءَ تو امینچو ھاٹیگ بہ دئے کہ من اے بزگیں بلوچ براتاں کمک ءُ آسودگ بہ کن آں۔

کدی کدی من جیڑاں کہ من بلوچے آں پرچا کہ بلوچے ءُ چی ءَ بلوچے بوت آں زاناں گُڈی زُلم ءُ ناھکّی پہ بلوچ راج ءِ واست ءَ چہ پیشانی ءَ شما نَکش کُتگ ؟ ءُ زاناں بلوچ اے دگنیا ءِ بد بھتیں انسان اِنت کہ شما چو کہ لانک بستگ پہ بلوچ راج ءِ تبا ءُ بربادی ءَ؟ اے وڑ بوت نہ کنت کہ شما کنگ ءَ اِت۔

راجدپتر شاھد اِنت کہ ھما راج گلام جوڑ کتگ اَنت آیاں ھم وتی گلامی نہ مَنّ اِتگ چی ءَ چہ بندر ءَ بنی آدم آزات اِنت ءُ کس وتی گلامی نہ منّ اِیت۔

آسر وَ زُلم ءِ ھلاسی اِنت تو وت ھم بزگ ءِ انچو زُلمی ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنلسٹ آرمی ءِ جارکش مرید بلوچ ءَ رسانکدراں وتی شنگ کرتگیں درشان ءِ تہ ءَ کیچ ءِ دمگ بالگتر ءَ پاکستانی ءِ پوج ءِ سر ءَ بوتگیں اپرشانی زمّہ واری منّ اِتگ انت –

جارکش مُرید بلوچ ءَ گوشتگ کہ مئے سرمچاراں زیکیں بیگاہ ءِ ادار پنچ ءَ ھوشاپ ءُ بالگتر ءِ میانی دمگ آسانک ڈَکّ ءَ وتگڑیں سی پیک ءِ پھازگ ءِ ھاتر ءَ برجاھیں زورگیریں پوج ءِ یکیں وھد ءَ دو پانگسانی سرا گوں راکٹ ءُ نوکیں سلاھاں ترندیں اُرشے کتگ ءُ چریشی ءل زورگیریں پوج ءِ پنچ کارمند مُرتگ ءُ بازین ئِے زدگ بوتگ انت-

جارکش ءَ گوشتگ کہ مئے سرمچاراں وتی جنگی ھیلکاریانی رِد ءَ پانگسانی دستیگ کنگ ءِ جھد کتگ وھدیکہ یک سنگرے ءَ پُتِرتگ اَنت ءُ آئی ءِ تہ ءَ لگوکیں کیمرہ ، سولر سسٹم ءُ آ دگہ ازباب تاوان داتگ اَنت –

جارکش ءَ دیمتر ءَ وتی درشان ءِ تہ ءَ گوشتگ کہ ھمے میان ءَ زورگیریں پوج ءَ چہ سھاکی بالگتر ءِ بنجاھی بُنجل ءَ ڈرون کیمرہ بال داتگ اَنت ءُ سرمچار چہ پُشتی نیمگ ءَ انگِر کنگ ءِ جھد کتگ انت گڑا سرمچاراں ڈرون کیمرہ آنی سرا اُرش کتگ ءُ یکے جتگ ءُ دؤر داتگ ءُ پدا یک دراجکش ءُ ھونی ئیں میڑے بندات بوتگ- وھدیکہ زورگیریں پوج ءِ کُمک ءَ جنگی بالگرد اوں اتکگ اَنت- مئے سرمچاراں لشکر ءِ بُرزی کمک ءَ آیوکیں بالگردانی سرا گوں راکٹ ءُ اسنائپر توپکاں اُرش کنان ءَ آھاناں کسانیں کَچّے ءَ تاوان داتگ – دو ءُ نیم کلاکانی اے دراجکشیں میڑ ءَ پوج ءَ مزنیں کچے ءَ جانی ءُ مالی تاوان داتگ ءُ پوج ءِ انگیر ءِ پروشگ ءَ پد سرمچار پہ سلامتی مھکمیں دوارجاھانی نیمگ ءَ درآھگ ءَ سوبمند بوتگ اَنت-

جارکش ءَ گوشتگ کہ بلوچ نیشنلسٹ آرمی زورگیریں اِستان ءِ دیم ءَ اے ھبر ءَ تچک کنگ لوٹیت کہ بلوچ مات ءُ گھارانی دَگّانی سرا کم شرپی ءُ ورناھانی ھاس کن نودربرانی پہ زورانسری کلپیں دزگیری آں ما ھچبر ھاموش نہ بئیں ءُ کُلانی ھساب ءَ گِریں-

جارکش ءَ گڈسر ءَ وتی درشان ءِ تہ ءَ گوشتگ کہ مئے اے پیمیں اُرش زورگیر ءِ چہ بلوچ سرڈگار ءَ سرجم ءَ درآھگ ءُ داں آجوئیں بلوچستان ءِ دستیگ کنگ ءَ گوں ترندی ءَ برجاہ مان اَنت-