TBP Balochi

اوگانستان ءِ بنجاھی شھر کابل ءَ سکھ برادری ءِ عبادت گاہ ءِ تراک –

درملکی خبر رساں ایجنسی رائٹر ءِ رد ءَ سکھ برادری ءِ عبادت گاہ ءِ سر ءَ تراک بیتگ-

تراک راجدانی کابل ءَ شمبے ءِ سھب ءَ بیتگ کہ اود ءَ چم دیستگیں مردمانی گوشگ اِنت “اے سرپدی نیست کہ جانی تاوان بیتگ “-

گورنام سنگھ ءَ رائٹرز ءَ گوشتگ “مندر ءِ تہ ءَ کچ ءُ کساس 30 مردم جاڑیگ بیتگ اَنت، اے زانگ نہ بیتگ اشانی تہ ءَ چنکس زندگ اِنت ءُ چنکس بیران بیتگ “-

آئی ءَ گوشتگ کہ طالبان ءَ مارا تہ ءَ روگ ءَ نیشتگ مارا سرپدی نیست اِنت –

تراک ءِ راستی طالبان ءَ نہ کرتگ –

زانگ بہ گوستگیں روچ ءَ گوریچانی اوگانستان ءَ یک مسیتے ءَ بیتگیں بمب تراکے ءَ آدینگ ءِ نماز ءِ وھد ءَ کم چہ کم یک نمازی ءِ بیران ءُ ھپت دگہ زدگ بیتگ اَنت-

اے تراک گوریچانی اُستان قندوز ءَ بیتگ کہ اود ءَ اپریل ءِ ماہ ءَ یک ھنچیں تراکے ءَ بازیں کچے ءَ نمازی بیران بیتگ اِت اَنت-

اُستانی پولیس ءِ جارکش قاری عبید اللہ عابدی ءَ گوشتگ کہ امام صاحب دمگ ءَ الف بردی مسیت ءَ آدینگ ءِ نماز ءَ بیتگیں بمب تراک ءَ یک نمازی ءِ بیران بیتگ –

تراکناکیں شورو مسیت ءِ تہ ءَ ایر کنگ بیتگ اَنت – تراک ھما وھد ءَ بیتگ کہ نمازی آدینگ ءِ نماز ءِ وانگ ءَ بیتگ اَنت – اُستان ءِ یک ڈاکٹرے ءَ بیران ءُ زدگ بیتگیں ھالانی راستی کرتگ-

داں انگت ءَ ھچ ٹولی ءَ اے بیتگیں اُرش ءِ زمہ واری نہ زُرتگ –

سربوتگیں ھالانی رِد ءَ پاکستانی پوج ءَ گوستگیں روچ ءَ (آدینگ) سھب ءِ سر ءَ سند ءِ دمگ حیدرآباد ءَ گِس ءِ سرا بیڑ برتگ نودربرے زورانسری آوار جتگ ءُ گوں وت برتگ –

آوار جنگ بوتگیں ورنایے پجار اختیار سوڈھر نام ءَ چہ بوتگ ءُ آ کانود ءِ وانگ انت –

اھوالکار ءِ رِد ءَ آوار جنگ بوتگیں ورنا جئے سند اسٹوڈنٹس فیڈریشن میہڑ (دادو) ءِ باسک یے ءُ اے وھدی حیدراباد لا کالج ءَ وانگ ءَ بوتگ –

زانگ بہ بیت سرجمیں سند ءَ بازیں سندی باسک ءِ زورانسری آوار جنگ ءُ بیگواہ کنگ بوگ ءَ انت – ھمے ماہ ءَ دھ ءَ گیش سندی راجدوستیں باسک سند ءِ جتاجتائیں دمگاں آوار جنگ بوتگ انت، کہ آھانی تہ ءَ جساف ءِ گوستگیں بنجاھی سرکماش دوست علی بھٹی، سرمد میرانی، فرمان میرانی ، ظہیر بسمل، سرمد جونیجو، صدالدین کولاچی ءُ دگہ ھوار انت کہ آھانی یل کنگے ھاتر ءَ گوستگیں روچ ءَ حیدرآباد ءَ وائس فار مسنگ پرسنز آف سند ءُ سند سجاگی فورم نیمگ ءَ زھرشانی ھم کنگ بوتگ –

شال ءِ نزیکیں دمگاں پاکستانی پوج ءِ نیمگ ءَ لشکر کشی برجاہ انت، لشکر کشی ءَ جنگی بالگرد ھم کارمرز کنگ بوگ ءَ انت –

ھالانی رِد ءَ مروچی شال ءِ نزیکیں دمگ زرغون ءَ لشکر کشی کنگ بوتگ کہ اودا جنگی بالگراداں زرغون ءِ کوھی دمگ ،پی ڈی ایم سی ڈیم ءُ چپ چاگرداں بازیں اداراں شیلنگ ھم کتگ ءُ وھدیکہ بمب تراکانی توار ھم اشکنگ بوتگ انت –

اھوالکار ٹی بی پی ءَ گوں تران کنان ءَ گوشتگ کہ لشکر کشی ءِ میان ءَ پوجی کارمنداں پشتون راج ءَ سیادی داروکیں مردمے ءِ گس ءِ بیڑ برتگ ءُ دو کسانسالیں چُج آوار جتگ ءُ گوں وت برتگ انت وھدیکہ مال ءُ دلوت ھم نشانگ کنگ بوتگ انت چریشی ءَ بازیں دلوت ءِ مُرتگ –

گوستگیں روچاں شال ءِ نزیکیں دمگ ولی تنگی ءُ چپ چاگرداں ھم لشکر کشی کنگ بوتگ – دمگی اھوالکار ءِ رِد ءَ لشکر کشی ءِ میان ءَ جنگی بالگرداں دمگی مردم ھم نشانگ جوڈ کرتگ انت – بمبگواری ءِ سوب ءَ یک گِس ءِ سُتکگ ءَ پُر بوتگ بلے تنی وھدی جانی تاوان ءِ ھچ وڈیں ھال نیست –

اشی ءَ پیش بولان ءُ ھرنائی ءِ ھم بازیں دمگاں لشکر کشی کنگ بوتگ –

سرکار ءِ نیمگ ءَ اے دمگاں بوتگیں لشکرکشیانی درگت ےَ تنی وھدی ھچ وڈیں درشان دیگ نہ بوتگ-

شال پریس کلب ءِ دیم ءَ برجاھیں وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ شش سد ءُ ھپتاد ءُ پنچ روچ سرجم بوتگ انت، نیشنل پاٹی زالبول سیکرٹری کلثوم نیاز بلوچ، فریدہ بلوچ، سعدیہ بلوچ، سائرہ شاھوانی، سویرا بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ زالبولانی اے دلیری ءُ دلبڈی ءِ گندگ ءَ پد بائد انت ھر بلوچ زالبول ءِ تہ ءَ راجی جزبگ پیداک بہ بیت – مروچی بلوچ زالبول ھر پِڑ ءَ دیم ءَ اوشتاتگ اَنت ءُ رھشونی کنگ ءَ اَنت، توار چِست کنگ، زوراکی سگگ انت ءُ بندیگجاھاں بند اَنت-

آئی ءَ گوشتگ کہ مئے پُرایمنیں جُھد ءَ سینزدہ سال سرجم بوتگ انت ،ما اے پُرایمنیں جُھد ءَ جھان ءَ بلوچستان ءَ زورانسری بیگواھی ءُ مردمی اگبالانی بگیریانی بابت ءَ سرپد کنگ ءِ جُھد کُرتگ- باز بَر ءَ چہ مزن آمیدگس ءِ نیمگ ءَ پھازگی ادارھاں پرمان دیگ بیتگ کہ زورانسری بیگواھیں مردم دیم ءَ آرگ بہ بنت بلے اے ادارھانی سرا ھچ اسر نہ کپ ایت – اے سیزدھیں سالانی میان ءَ بازیں مردمے نگیگیں جاوراں گوں یل کنگ بوتگ انت کہ مرگ بوتگ انت بلے آھاں چہ گیشتر پد ءَ آوار جنگ ءُ بیگواہ کنگ بوتگ انت –

آئی ءَ دیمتر ءَ گوشتگ کہ مرچی ما میان استمانی انسانی ھکانی گلاں گوشگ لوٹ ایں کہ بلوچ ءِ سر ءَ سک باز زوراکی کنگ بوھگ ءَ انت- ما لوٹ کن ایں کہ اقوام متحدہ بلوچستان ءَ اے انسانی ھکانی بگیری ءَ گامگیج بہ زور ایت –

بی ایس او ءِ بُنجاھی کارگشاد عظیم بلوچ دگہ رھشوناں گوادر پریس کلب ءَ اھوالکاراں گوں تران کنان ءَ گْوشتگ کہ بلوچ چاگرد ءِ تہ ءَ گوں یک پندلے ءِ بنیاد ءَ راجدوستی سیاست بنام ءُ نزور کنگ ءِ جُھد کنگ بوھگ ءَ انت – جتائیں پندلانی بنیاد ءَ رستراں یکبرے جتائیں اوگام دیگ ءُ راج ءِ تہ ءَ نامان کنگ بنت،پد ءَ ھمے مردمانی زور انت ءُ چاگرد ءِ تہ ءَ کینگ،اڈاند ودی کنگ ءُ وتی لوٹ پیلوکنگ بنت – گْوستگیںھپتاد سالانی تہ ءَ بلوچ راجی اُگبالانی جُھد ءِ دزکش کنگ ءَ تچکی ءَ زوراکی کارمرد کنگ ءُ راجمستری سیاسی توار گُٹگیر کنگ بیگ ءَ اَنت- بلوچ چاگرد ءِ تہ ءَ یک پندلے ءِ بنیاد ءَ مردم ودی کنگ بیگ ءَ اَنت داں راجی جُھد ءِ دیم ءَ دیوال جوڑ بہ بنت۔چوشیں مردم بلوچستان ءَ راجدوستی سیاست ءَ بنام کنگ ءُ بلوچ راج ءِ تہ ءَ وتی روتگاں مُھکم کنگ لوٹ اَنت۔اے وڑیں مردم یک پندلے ءِ بُنیاد ءَ آدگرانی بُنگپانی سرجم کنگ ءَ کمکارے ءِ کِرد ءَ پیلو کن اَنت-

آھانی گوشگ ات کہ مرچیگیں اے پریس کانپرنس ءِ مول ءُ مُراد جماعت اسلامی ءِ سروک مُلا ہدایت الرحمان ءُ آئی ءِ ھمکار ایں کُشندہ ٹولی ءِ کارمندانی بلوچ نودربر ءُ مئے وانگجاھانی بابت ءَ نازیبائیں درشان ءِ سر ءَ وتی گپ ءِ ایر کنگ اِنت۔گْوستگیں ھپتگ ءَ مُلا ہدایت یک اھوالکاری ءَ داتگیں گُلگدارے ءَ بلوچ نودربرانی سر ءَ کہ ھرچی بُھتام جتگ اَت آ دروگ ءُ وتسریں دانک اَنت – مُلا وتی درشان ءِ تہ ءَ پنجاب زانشجاہ ءَ اسلامی جمیعت ءِ نودربرانی بلوچ ءُ پشتون نودربرانی سر ءَ اُرش ءُ زوراکی ءَ پلہ مرزی کنگ اے گپ ءَ پدر کنت کہ مُلا وتی گُنڈہ ٹولی ءِ ناشرکاری رویشت ءِ ایرجنگ ءِ جاہ ءَ اے چیزاں شر لیکگ ءَ اِنت، بلے راستی اِش اِنت کہ مُلا ءِ گل ءِ نودربر ٹولی گوں ناشرکاری پگرے ءَ چاگرد ءِ تہ ءَ کینگ ودی کنگ ءِ یک نوکیں درورے جوڑ بیتگ – پنجاب زانشجاہ ءِ تہ ءَ ایشانی گُنڈہ گردیں گل ءِ نیمگ ءَ مدام اود ءَ وانوکیں بلوچ نودربرانی سر ءَ اُرش کن اَنت ءُ اے ناشرکاری رویشت کراچی ءَ ھوار پاکستان ءِ دگہ وانگجاھاں ھم بلوچ نودربرانی سر ءَ کنگ بیگ ءَ اِنت – بلوچستان ءَ راج ءَ پہ اُگبالی زْرمبشت ئِے ءِ نام ءَ ریپینگ ءُ مُلا کُشندہ ٹولی ءِ کارمندانی کمک ءَ بلوچستان ءِ سیاسی چاگرد ءَ بد ءُ رد،کینگداری رویشت ءُ اڈاند ودی کنگ ءِ جُھد ءَ کنگ ءَ اِنت-

آھاں گْوشتگ کہ مُلا ہدایت الرحمان ءَ وھدے کہ بلوچستان ءِ زانشجاھانی سر ءَ وتسریں بُھتام جتگ ءُ نودربر آئی ءِ بگیری ءَ پاد اتکگ اِت اَنت گڑا آئی چہ پھلی لوٹگ ءَ جاہ ءَ انچیں مردم میدان ءَ یل کُرتگ کہ نہ تیوک ءَ بلوچ چاگرد ءَ آیانی کِرد شر نہ اِنت بلکیں تچکی ءَ سلاہ بند ءُ کُشندہ ٹولی ءِ مردم اَنت- مُلا ءِ ھک بہ دیئت زْرمبشت ءِ شال ءِ سروک کشندہ ٹولی ءِ کارمند ندیم گْوستگیں روچ ءَ ہدایت الرحمان ءِ درشان راست لیک اِتگ ءُ ھک بہ دیئت زْرمبشت ءِ نیمگ ءَ ھمے درشان ءِ سر ءَ برجاہ بیگ ءِ جار جتگ- مُلا ءِ گون ءَ دست ماں دست بیتگ ءُ نودربرانی سر ءَ انچیں بُھتام جتگ کہ دروگ اَنت ءُ بلوچ نودربرانی چہ وانگ ءَ گستاہ کنگ ءِ شوربندی ءِ سر ءَ اِنت – ندیم  نامی مردم بلوچستان زانشجاہ ءَ اسکینڈل ءِ بُھتام ءَ جتگ ءُ وتی واجھانی وش کنگ ءُ وتی وپاداری ءِ ہیشدارگ بےسوبیں جُھدی کُرتگ- ما تچکی ءَ گْوشگ لوٹ ایں کہ بلوچ راجی سیتانی بگیری ءَ ما ھچی اوپار کُرت نہ کن ایں ءُ دُرسیں بنشوناں دیم ءَ کاریں ءُ چوشیں مردمانی چھرگاں راج ءِ دیم ءَ پدر کن ایں-

بی ایس او ءِ رھشوناں گوشتگ کہ جماعت اسلامی ءِ سروک ءَ بلوچستان زانشجاہ ءِ بابت ءَ سکیں ردیں ءُ نازیبائیں زُبانے کارمرد کُرتگ کہ ھمک شرپمندیں بلوچ اے گپاں رد کنت- بلوچستان زانشجاہ ماتیں وانگجاھے کہ ما آئی ءَ وتی گِس سرپد بہ ایں – ھزارانی کچ ءَ جنک ءُ بچکیں نودربر وانگ ءَ اَنت – مُلا ءِ نیمگ ءَ بلوچستان زانشجاہ ءِ نودربرانی سر ءَ نہ تیوک ءَ بُھتام جتگ بلکیں بلوچ ءِ دودمان رد کُرتگ اَنت کہ اے یک رَد کِردیں کارے- اے درشان گوں مزھبی پگر ءَ بندوک اِنت کہ چہ ایشی ءَ ھزارانی کچ ءَ زھگانی وانگ سانمند بیت- ما ھچبر یک پدمنتگ ءُ وتسریں گلے ءَ اے موہ ءَ نہ دئیں کہ مئے وانگجاھانی بگیری ءَ سرکشی بہ کنت –

آھاں گوشتگ کہ ما مُلا ءَ کڈن کن ایں کہ آ وتی داتگیں درشان ءِ سر ءَ چہ بلوچ راج ءُ نودربراں پھلی بہ لوٹ ایت ءُ مئے ادارھانی بگیری ءَ سرکشی کنگ ءَ بند بہ کنت- گوں آدگہ نودربر گلاں یکجاہ بہ ایں اے پندل بازیں مردمانی بگیری ءَ زوت یک گامگیجے ءِ زورگ ءِ جار ءَ جن ایں-

بلوچستان ءِ ضلع قلات ءِ دمگ جوھان ءَ چیرکتگیں تراکناکیں شوروانی ترکگ ءَ دو چُک سک ٹپی بوتگ اَنت- یکیں سک ٹپی بوتگیں مستونگ نادُراھجاہ ءَ برگ بوتگ-

قلات انتزامیہ ءَ وئیل پدر کتگ ءُ گْوشتگ کہ جوھان ءِ دمگ پھرانی کوہ ءَ چیرکتگیں شوروانی ڈِک دیگ ءَ چہ دو شپانکیں چُک ٹپی بوتگ اَنت-

زانگ بہ بیت مروچی بلوچستان ءِ دمگ کچھی ءَ شوروانی ترکگ ءَ دو پرپٹ سواریں مردم ٹپی بوتگ اَنت – کچھی ءَ ٹپی بوتگیں دمگی انتزامیہ ءَ وئیل جاہ ءَ سر بوتگ ءُ نادُراھجاہ ءَ برتگ اَنت- بلے دوئیں مردم کمو ٹپی اَنت-

قلات تراک ءِ ھال رسگ ءَ ایس ایچ او لیویز جوھان سیف اللہ لھڑی وئیل جاہ ءَ سر بوتگ ءُ یکیں سکیں ٹپی ئیں چُک حضرت اللہ ء سید محمد ٹَک سرپرہ جھمنند جوھان نواب غوث بخش نادُراھجاہ مستونگ ءَ برتگ ءُ انتزامیہ گیشیں پٹ ءُ پول کنگ ءَ اِنت-