TBP Balochi

نبشتانک: راجی بامرد شھید ھنیپ بلوچ

نبشتہ کار: جَنگی بلوچ

دی بلوچستان پوسٹ

“پریشتگاں سوتیں پہ سالونکیں ھمید”
“آ کہ مردے مرگ پہ وشیں نام کنت”

اے گوستانکی دوئیں بند واجہ کریم دشتی ءَ پہ شھید ھمید ءَ گُشتگ اِت اَنت۔ چہ ھمے بنداں زانگ بیت کہ بلوچ ءِ دود ءَ مرگ ءَ وشیں نامے گون کنگ مردانی کار اِنت۔ بزانکہ لگور نہ بیت ءُ پہ وت ءَ تھنا زندگی نہ کُت ئے۔

دُنیا ءَ باز براں انچیں انسان ودی بیت کہ آ تھنا پہ وت ءَ زندگی نہ کن اَنت نیکہ پہ وتی وش ءُ آسودگیں زندمانی ءِ ھاترا وڑے ناں وڑے وتی وھد ءَ تیلانک دنت ءُ زندمان ءِ دوئیں روچاں وتی سر ءَ تیلین ایت ، بلکیں آ وتی پہ وتی راج ءَ پہ وتی زمین ءِ مسکیں پُلک ءُ ھاکاں شیدا بیت ءُ پراھاں زندگی کنت چُشیں انسان سک کم بیت اِنت اے ھمے انسان بنت چو نبشتہ کارے ءَ وتی چاگردے آزگسمائیں انسانانی وڑا کش ءُ کِرانی ھرچ بوئکیں جاواراں دگہ یک دروشمے ءَ چار اَنت ءُ سما کن اَنت آ وتی لوگ ءُ مردماں گون وتی راج ءَ ھوار کنت ءُ پہ ھماھاں ءُ پہ ھماھانی باندات ءَ یک نوکیں زرمبُشتے بندات کنت۔

بنی آدم ءَ ھُدا وھدیکہ زمین ءِ سر ءَ دیم دنت گُڑا پہ آئی ءَ ھرچ چیز دز رس ءَ بنت بلے پہ پراھانی گیشینگ ءُ وتی کارآمد کنگ ءِ واستا انسان ءَ یک مزنیں جُھدے کنگی اِنت ھچ کار اَنچو پہ دیم آسانی نہ بنت ، چُشکہ زانتکار گُش اَنت شائری چو ھما ھُسن ءَ اِنت ھرکسی تہ ءَ ھست ءُ مان اِنت بس مارا آ پلگارگ ءُ سمبھینگی اِنت ھمے وڑا ھرچ چیز اے جھان ءَ ھمے وڑ اِنت ۔

ھمے پلگارگ ءُ سمھینگ ءَ ھم یک تھمبُلے پکار اِنت یک ھِمّت ئے پہ وتن شیدا بوئکیں کارست مُدام وتی دژمناں ھمے داب ءَ جنگ کن اَنت ءُ پیشدار اَنت کہ دژمن بزانت ءُ بہ پھم ایت پہ وتی سرڈگار ءَ ما ھرچی کُت کن ایں ھچ وڑیں چِست ءُ ایراں چَک ءُ پد نہ بئیں۔ ھمے وڑیں کارستانی تہ ءَ یک راجی بامردے شھید ھنیپ بلوچ اِنت کہ آ کلانچ ءِ دمگ کوڑیچ ءَ نوزدہ سد ءُ نوّد ءُ چار ءَ ودی بیت۔ شھید ھنیپ ءَ وتی بنداتی وانگ ءُ زانگ ءِ بندات کوڑیچ وانگجاہ ءَ کُت ، پنچ مکتب ئِے دربرگ ءَ پد آ پسنی ءَ رؤت ششمی مکتب ءَ پسنی سکینڈری وانگجاہ ءَ داں دہ مکتب وان ایت۔ شھید ھنیپ وھدیکہ ھپتمی مکتب ءَ وانگ ءَ بیت گُڑا آ یک “لینگونج سنٹرے “وانگ ءِ ھمرائی ءَ وت وانینیت ھم۔ شھید ءَ وتی وش ءُ ڈولڈاریں سرزمین ءِ سمین ئِے کَوش ، زِرانی ناچ ءُ سُھبتیں چَول ، بیگھانی دَنز ، دیگرے ملاریں نِدارگ ، ھَوراں پد درچکانی جان شُشتیں سبزارنگیں برھنگیں بالادانی وت واجھی ءِ بیگواھی مار اِت کہ دَری دُزّ ءُ ڈُنگانی دست ءَ لگتمالیں کِردگار مار اِت اَنت ءُ وتی سیاسی سپر ءِ بندات گون اے نام ءَ “زُبیر بلوچ” ءَ دوھزار ءُ ھپت ءَ کُت بلوچ نودربر گَل (آزاد ) ءَ بھر زور ایت یک باسک ئِے ءِ بستار ءَ وتی زمین ءُ راج ءِ سر ءَ بوئکیں زُلم ءَ مار ایت یک نوکیں سپرے بندات کنت کہ آ سپر ءَ تھنا پہ وت ءَ مساپر نہ بیت یک زمینے ءَ ھوار یک راج ئِے یے گم ،درد ، اندوھاں وتی ارواہ ءَ مانپوشیت ءُ در کپ ایت۔ زندمان ءِ تہ ءَ اے وڑیں سوڑگ ءُ پیسلہ تھنا سکیں مزنیں انسان کن اَنت ۔ اے ھمے کارِست باں ایشانی تہ ءَ مھروانی ءَ ابید دگے ھچ مان نئیت۔ ھمے مھر ءُ مھروانی بیت کہ اے وڑیں کارِست مزنیں کِردانی ھُدابُند بنت۔ شھید ءَ دو سال ءَ پد بلوچ ریپبلِکن نودربر گَل ءَ بھر زُرت وتی ھند ءُ دمگاں شریں رنگے ءَ زمہ واری پیلو کُت اَنت۔ پد ءَ چیزے سال ءَ پد شھید ءَ بزانکہ دوھزار ءُ یازدہ ءَ جنگ ءِ لوٹ دیست اَنت مار اِت اَنت کہ نُو من ءَ دژمن ءِ زُبان ءَ گپ کنگی اِنت آئی ءَ زانتگ اَت دژمن ءِ زُبان تپُنگ اِنت ۔ یک جِھد کارے ءِ بستار ءَ شھید ءَ تُپنگ وتی کوپگاں اڑینت ءُ وتی بھر ءِ جنگ ءَ گون گیروشگ بیت۔ آئی ءَ زانتگ اَت کہ نُو مئے بھت ءَ کہ جنگے کپتگ اے آجوئی ءِ جَنگ وتی زمین ءُ راج ءَ ھوار زمین ءِ سر ءِ ھرچ ساھدارانی وت واجھی ءِ جنگ اِنت ، وھدیکہ من ءَ اے سما بوئگ ءَ اِنت اے بودناکی ھست اِنت گُڑا من ءَ ھم چو آ دگہ شھیدانی وڑا وتی بھر ءِ جنگ کنگی اِنت۔ چوناھا انسان ءِ تہ ءَ ھرچ شریں کارے ئے بودِشت مان بیت آئی ءَ بس وتی کمال پیشدارگی اِنت۔ ھمے رنگ ءَ شھید ءَ وتی بھر ءِ جنگ ءَ کنان داں دو ھزار پانزدہ ءِ اُستپان ءِ ماہ ءَ دَری لشکر آئی ءِ میتگ کوڑیچ ءَ انگیر کنت شھید ءَ آوار جَنت ءُ وتی بندی جاھاں بندیگ کنت۔ شھید ءَ بازیں لَٹ ءُ کُٹ کنگ ءَ گون چیزے ماھاں پد دو ھزار ءُ شانزدہ ءِ مولمان ءِ ماہ ءَ گون شھید ایسُپ یونس ءِ ھمرائی ءَ ماں پسنی ریکپُشت ءَ شھید ءِ ژانگولیں کُنٹ دؤر دنت ھمے وڑا یک جوانیں راجی بامردے چہ مارا جُتا بیت ءُ شُت۔”میتّ ءَ شھیدانی زانت بکش اِتگ مارا –

اے ھمے سرزمین اِنت کہ ایشی ءِ بَچ پہ وتی زمین ءِ آجوئی ءَ ھچ وڑیں پُرشت ءُ پروشاں چَک ءُ پد نہ بنت ۔ اِد ئِے شائرانی شئر ھم دژمن ءَ ھمے کلوہ ءَ دنت کہ مئے شھیدانی میّتاں مارا زانت بکش اِتگ۔ ما ھرچ سھت ءُ دمان اے جنگ ئِے بھر بوان ایں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ ڈیرہ بگٹی ءِ میتگ سوئی ءَ ٹیل ءُ گیس ءِسرکاری کمپنی پی پی ایل ءِ ھلاپ ءَ بلوچ بے روزگاریں انجینئر، ڈِپلومہ اسوسیئیٹ انجینئر، نِشگتیں ءُ بیران بیتگیں مردمانی کھول زھرشانی کنگ ءَ اَنت ءُ گیٹ لمبر 4 ءَ زھرشانی ءِ نِندانک برجاہ اِنت۔

زھرشانی کنوکیں مردماں دمگ ءِ واھکدار ءُ پی پی ایل ءِ مینجر ءُ ایم ڈی ءَ لوٹ کُرتگ کہ کمپنی ءُ بلوچستان سرکار ءِ میان ءَ منّگ نامہ ءِ رِد ءَ ڈیرہ بگٹی ءِ بے روزگاریں بلوچ انجینئر ءُ ڈِپلومہ اسوسیئیٹ انجینئراں روزگار بہ دنت ءُ پد ءَ وتی کْوھنیں پوریاگِر ءُ باسکانی نِشگتین ءُ بیران بیتگینانی زھگاں روزگار بدنت۔

زھرشانی کنوکیں مردماں دگانی سر ءَ ٹائر مانداشتگ ءُ پہ موٹلانی روگ ءَ دگ بند کُتگ اَنت۔ ماں زھرشانی ءَ بلوچاں لوٹ کُتگ کہ داں وھدے مئے لوٹ منّگ نہ بنت مئے زھرشانی ھر روچ تْرُند ءُ برجاہ بیت انت۔

زھرشانی کنوکاں پی پی ایل چہ ڈیرہ بگٹی ءِ دمگ سوئی گیس ءَ چہ 1952 ءَ گیس ءَ ودی کنگ ءَ اِنت ءُ ھمے گیس سرجمیں پاکستان ءُکشمیر ءِ چُلاں روک کنت بلے بلوچ راج ءِ دمگ ءُ شھر چہ وتی ھُدائی مڈیاں زبھر اَنت-

آیاں گوشتگ پی پی ایل ءَ ابید او جی ڈی سی ایل ھم چہ ڈیرہ بگٹی ءِ میتگ پیرکوہ، لوٹی، زین ءُ اوچ ءَ گیس ودی کنگ ءَ انت بلے دمگی بلوچ وانندہ چہ روزگار ءُ پوریاگِریاں زبھر اَنت۔

زھرشانی ءَ ھواریں مردماں گوشتگ ھمے ٹیل ءُ گیس کمپنانی بلوچ دُژمنی شونداتانی آسر ءَ چہ بُنگیج ءَ ڈیرہ بگٹی ءَ پاکستانی پوج ءَ لشکرکشی بندات کُت ءُ پد ءَ ھمے جنگ سرجمیں بلوچستان ءَ شِنگ بیتگ ءُ راجی آجوئی ءِ گھگیری ءَ بدل بوتگ۔ ھمے جیڑھانی تہ ءَ 2001 ءَ سندھی لیڈی ڈاکٹر شازیہ مھر ءِ ویل نامدار بوتگ کہ بلوچ راجی میارجلی ءِ بلاھیں اندوھے اَت۔

شال ءِ نزیکیں دمگاں پاکستانی پوج نیمگ ءَ چہ لشکر کشی ءِ دْرچ برجاہ ءَ اِنت – گوستگیں یک ھپتگے ءَ زرغون، ولی تنگی ءُ کش ءُ گور ءِ دمگاں وھد وھد سر ءَ لشکر کشی برجاہ ءَ اِنت-

پوج ءِ لشکر کشی ءَ بمب گواریں بالگرداں کارمرز کنگ ءَ اَنت کہ اود ءَ لَس میتگ ءَ جانی ءُ مالی تاوان چست کنگ ءِ ھال اَتکگ وھدے کہ دو کسانیں بچک ھم گْوستگیں روچاں چست کنگ ءَ پد بیگواہ کنگ بوتگ اَنت-

اِھوالکارے ءَ ٹی بی پی ءَ گوں ھال ایوال کتگ گْوشتگ کہ گوستگیں روچ ءَ ھم زرغون ءِ کوھی دمگ ءَ لشکر کشی برجاہ بوتگ کہ اود ءَ جتائیں ھنداں بالگرداں تیرگواری کتگ بلے ھچ وڑیں جانی ءُ مالی تاوانانی ھال دیم ءَ نیتکگ-

اے دمگ ءَ دو روچ ءَ ساری ھم لشکر کشی کنگ بوتگ کہ اود ءَ دو کسانیں بچک آوار جنگ ءَ پد بیگواہ کتگ اَنت کہ آیانی درگت ءَ ھچ وڑیں ھال ایوال دست نہ کپتگ –

دمگی مردمانی گْوشگ اِنت اے گونڈل دمگی پشتون ٹَک ءَ گوں سیادی دار اَنت کہ آیانی زند ھمے مالداری ءَ گْوزگ ءَ اِنت – ھمے وڑ گوستگیں روچاں لشکر کشی ءِ وھد ءَ بمب گواریں بالگردانی تیرگواری ءَ چہ بازیں مال ءُ دلوتی مرتگ-

شال ءَ اَبید ھرنائی ءِ جتائیں دمگاں ھم لشکر کشی کنگ بوگ ءَ اِنت – دو روچ ءَ ساری ھرنائی ءِ دمگ چھپر رفٹ ءَ سلاہ بنداں دگ ءَ جوڑ کنوکیں کمپنی ءِ سائٹ سر ءَ اُرش کتگ چریشی ءِ آسر ءَ چار پوریاگر مرتگ ءُ چار ٹپی بوتگ اَنت –

ھرنائی لیویز کنٹرول رِد ءَ اُرش ءَ پد پنچ پوریاگر بیگواہ ءَ اِنت – تنی وھد ھچ وڑیں ھال نیست کہ پوریاگر تیرگواری ءَ چہ رکگ ئے ھاتر ءَ یک جاگھے ٹپ اِِتگ اَنت یا کہ اُرشکاراں گوں وت برتگ اَنت- اُرشکاراں جوڑکنوکیں کمپنی ءِ دو مزنیں گاڑی ءُ بُنجل مانداشتگ اَنت ءُ تتکگ اَنت – اُرش زمہ واری انگت ھچ گل ءَ نہ زرتگ-

بلوچستان ءِ جتا جتائیں ھنداں تیرگواری ءُ آپ ءِ بڈینگ ءَ ھشت مردم بیران بیتگ اَنت-

تیرگواری ءِ وئیل پنجگور ءُ ھزدار ءَ پیش اتکگ اَنت اود ءَ بیران بیتگیں مردمانی پجار اصغر ء ابوبکر، ھدایت اللہ ءُ مھمد ناصر ضیاء ءِ ناماں زانگ بیتگ اَنت-

پنجگور ءَ تیرگواری ءِ وئیل ھما وھد ءَ غیریب چتکان ءَ پیش اتکگ کہ ناشناسیں دُزاں اصغر نامی ئیں مردمے ءِ پرپٹ ءِ دُزگ ءِ جھد گڑا گھگیری ءِ وھد ءَ اُرشکاراں تیرگواری کتگ ءُ تیر ءِ لگگ ءَ آ زدگ بیتگ ءُ آ نادراہ جاہ ءَ برگ بوتگ ءُ اود ءَ آئی ءَ دردانی ٹپ نہ سگ اِتگ ءُ بیران بیتگ-

دومی نیمگ ءَ ھزدار ءِ دمگ وڈھ ءَ ناشناسیں مردماں تیرگواری کتگ ءُ ھدایت نامی ئیں مردمے کشتگ ءُ آئی ءِ سنگت ناصر زدگ بیتگ ءُ پد ءَ ناصر ءَ ٹپانی درد نہ سگ اِتگ ءُ بیران بیتگ –

تیرگواری ءِ وئیلانی سبب زانگ نہ بیتگ اَنت-

ھمے وڑ ءَ سبی ءَ توپانی ھوراں پنچ مردم بیران بیتگ اَنت-

بلوچستان ءِ جتا جتائیں ھنداں ھورانی درچ برجاہ بیتگ اَنت-

بلوچستان ءِ دمگ سبی ءَ کٹ منڈائی کور ءَ ھار ءَ گاڑی ءِ برتگ ءُ گاڑی ءَ سواریں پنچ مردم بیران بیتگ اَنت ءُ سَے زدگ بیتگ اَنت-

لیویز ءِ واکدارانی رد ءَ بیران ءُ زدگ بیتگیں مردمانی تہ ءَ زھگ ءُ زالبول ھوار اَنت – گاڑی ءَ سواریں مردم کٹ منڈائی ءَ دیم پہ سبی ءَ روگ ءَ بیتگ اَنت-

اود ءَ بارکھان ءَ عیشائی باڈیانی ڈیم سرگرد ءَ بیتگ ڈیرہ بگٹی ءِ بازار ءَ توپانی ھورانی گوارگ ءَ آپ مُچ بیتگ اَنت گاڑی بُڈ اِتگ اَنت ءُ دمگ ءَ چار روچاں بجلی ءِ نزام بند اَنت-

موسیٰ خیل ءَ ھورانی گورگ ءَ پد توپانی ھار ءِ دیم بارکھان ءِ دمک ءُ دران سر بیتگ ءُ آپ ءِ ترندیں لوھڑ ءُ مُچیاں شھری تکانسر اَنت-

شیرانی ءِ کوھی دمگاں ھورانی گورگ ءَ چیل ءُ کنڈ پُر بیتگ ءُ ھیبرپکتوانواہ ءِ روانی راہ مھتل بیتگ –

سوناری پھل ءِ پروشگ ءَ کوھلو، شال، ڈیرہ بگٹی ءِ دگ بند بیتگ رودراتکی بلوچستان ءِ توپانی ھار لسبیلہ ءِ نیمگ ءَ پُر بیان بیتگ –

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں وتی درشانی ءَ گشتگ سرمچاراں گوستگیں شپ ءَ بولان ءِ دمگ بی بی نانی ءَ زورگیریں پاکستانی لشکر ءِ پانگس ءِ سر ءَ اُرش کتگ ءُ تاوان داتگ-

جارکش ءَ گوشتگ کہ لشکری چیک پوسٹ ءِ سر ءَ سرمچاراں راکٹ ءُ دگہ جوانیں تپنگ کار مرز کتگ ءُ دژمن جانی ءُ مالی تاوان داتگ۔

بی ایل اے ءِ جارکش ءَ گوشتگ زورگیریں لشکر ءَ رند ءَ جتا جتائیں نیمگ ءَ چہ بازیں مارٹر گولھے آس داتگ بلے سرمچار گوں وتی جوانیں رپکاں درآھگ ءُ وتی جاگہ ءَ سر بوگ ءَ سوب مند بوتگ اَنت۔

جارکش ءَ گوشتگ اے اُرش ءِ زمہ واری ءَ بلوچ لبریشن آرمی من ایت، زورگیریں لشکر ءِ سرجمیں درآیگ ءَ مئے جد ءُ جھد برجاہ بیت اِنت۔

بلوچستان ءِ بنجاھی شھر شال ءَ پوج ءِ دست ءَ زورانسری آوار جنگ ءُ پدا پولیس ءِ دست ءَ دیگ بوتگیں سئیں ورنا مروچی پولیس ءِ یل کُتگ انت –

یل بوتگیں ورناھانی پجار ہارون ولید ء حاجی نثار احمد سرپرہ، محمد عاقب ء حاجی نوراللہ ءُ سدیس احمد ء حاجی نثار احمد سرپرہ ءِ ناماں چہ چہ بوتگ انت –

زانگ بہ بیت ھمے سال ءِ دوازدہ فروری ءِ شپ ءَ پاکستانی پوج ءَ فیض آباد ءَ گِس ءِ سرا بیڑ برتگ دھمی تبک ءِ نودربر سعود سرپرہ ءُ یازدھمی تبک ءِ نودربر سدیس ء حاجی نثار سرپرہ آوار جتگ ءُ بیگواہ کُرتگ انت – ھمے وڈ ھپت فروری ءَ پوج ءَ حاجی نوراللہ سرپرہ ءِ گِس ءَ بیڑ برتگ ءُ آئی زھگ فرہاد سرپرہ ءُ حاجی نثار سرپرہ زھگ ثاقب سرپرہ آوار جتگ ءُ گوں وت برتگ انت – وھدیکہ ایشاں یک روچ ءِ ساری بزاں شش فروری ءَ حاجی نثار گِس ءَ بیڑ برتگ ءُ آئی ءِ دگہ زھگے ہارون ولید ء حاجی نثار آوار جتگ ءُ بیگواہ کتگ انت –

آوار جنگ بوتگیں ورنا چار ماہ ءَ پوج ءَ ھاران ءُ چمن ءَ پولیس ءِ دست ءَ داتگ انت، کہ آھانی تہ ءَ ہارون، سدیس احمد ءُ محمد عاقب ھاران یے ءُ ثاقب زیب ءُ فرہاد چمن ءِ پولیس دست ءَ دیگ بوتگ انت – ہارون، سدیس ءُ عاقب مروچی پولیس ءَ یل داتگ ءُ وتی گِس ءَ سربوتگ انت –