TBP Balochi

بلوچستان ءِ دمگ کیچ ءَ گوستگیں شپ ءَ پیش اتکگیں یک وئیلے زالبولے ءِ سر ءَ اُرش کنگ بیتگ ءُ کُشگ بیتگ-

وئیل کیچ ءِ دمگ مند لبنان ءَ پیش اتکگ، پولیس ءِ رد ءَ گوستگیں شپ ءَ لبنان مند ءَ لھتے مردماں کارچانی گون ءَ مسماہ (م) جھمنند پُل آباد تمپ کُشتگ –

مند پولیس ءِ رد ءَ وئیل ءَ ھواریں جرمکارانی بگیری ءَ برانز گران ءَ جرمکار دزگیر کتگ اَنت بلے پولیس ءَ داں انگت ءَ جرمکارانی نام پدر نہ کتگ اَنت-

وئیل ءِ بارو ءَ دگہ گیشیں ھال دیم ءَ نیتکگ اَنت-

زانگ بہ بیت بلوچستان ءَ زالبولانی سر ءَ اُرش وھد وھد ءِ سر ءَ برجاہ اَنت گوستگیں وھداں تربت ءَ ملکناز ءُ تمپ ءَ گلثوم ھم ھمے وڑ ءَ کُشگ بیتگ ات اَنت-

ایران ءَ گوستگیں شپ ءَ بیتگیں زمین چَنڈ ءَ پنچ مردم بیران ءُ بیست ءَ گیش زدگ بوگ ءِ ھال اِنت –

یورپی بحیرہ روم ءَ زمین چنڈ ءِ بنجل ءِ رد ءَ زمین چنڈ ایران ءِ زرباری دمگ ءَ بیتگ، آئی ءِ جھلانکی دَہ کلو میٹر ءُ زور شش ٹک یک بیتگ –

ایرانی رسانکدر ءِ رد ءَ شش ٹک یک ءِ زور ءَ ماڑی تاوان داتگ اَنت، زمین چنڈ ءِ بنجل ایران ءِ دمگ بندرگاہ لنگہ ءَ بیتگ کہ اماراتی ریاست شارجہ ءَ چہ یک سد ءُ پنجاہ میل ءِ دوری ءَ اِنت-

ایرانی ایمرجنسی مھکمہ ءِ واکداراں زمین چنڈ ءَ اسرمند بیتگیں دمگاں کمکی کار بندات کتگ اَنت ءُ زمین چنڈ ءَ اسرمند بیتگیں مردمانی واستا تمبو جتگ –

دومی نیمگ ءَ ابوظھبی، دبئی ءُ شارجہ ءَ ھوار متحدہ عرب امارات ءَ ھم زمین چنڈ سما کنگ بیتگ- یورپی بحیرہ روم ءَ زمین چنڈ ءِ بنجل ءِ رد ءَ زمین چنڈ ءِ بنجل ایران ءِ بندرگاہ لنگہ ءَ بیتگ کہ شارجہ ءَ یک سد ءُ پنجاہ میل ءِ دوری ءَ اِنت-

تھران یونیورسٹی ءِ انسٹی ٹیوڑ آف جیو فزکس ءِ رد ءَ خلیج فارس ءُ ھرمزگان ءِ سیمسر ءِ نزیک ءَ گوستگیں شپ ءِ ساھت دو ءُ دو منٹ ءَ ریکٹر اسکیل ءَ شش ٹک یک ءِ زور ءَ زمین چنڈ بیتگ، اے زمین چنڈ زمین ءَ دَہ میل ءِ جھلانکی ءَ بیتگ زمین چنڈ ءِ بنجل کانگ شھر ءَ چل ءُ یک میل ءُ لانگہ بندرگاہ ءَ چل ءُ ھشت میل ءِ دوری ءَ بیتگ اشی ءَ ابید یک سد ءُ ھپت میل ءَ دور بیتگ-

ھرمزگان ءِ سرکار ءِ ڈائریکٹر ءَ سَے سد ءَ گیش لوگانی میان ءَ ھوش ءِ میتگ ءِ زمین چنڈ ءِ بنجل بیتگ اے دمگ ءَ درستاں گیش تاوان بیتگ-

اشی ءَ ابید زمین چنڈ ءِ سما سیستان و بلوچستان ءِ دمگ سرکان ءُ کش ءُ گوری دمگاں سماہ کنگ بیتگ-

سیستان و بلوچستان ءِ کرائسز مینجمنٹ کارگس ءِ ڈائریکٹر جنرل ءِ رد ءَ سراوان ءِ ھند سرکان ءَ چار ٹک یک ریکٹر زمین چنڈ بیتگ دگہ جانی تاوان نہ بیتگ اَنت-

زاھدان ءِ علی رزا شاھراکی ءَ گوشتگ کہ گوستگیں بامسار ءَ ساھت سَے ءُ سِی ءُ نُھ دمان ءَ استان سیستان و بلوچستان ءِ شھر سراوان ءِ ھند سرکان ءَ چار ٹک یک زمین چنڈ بیست ءُ ھشت میل ءِ دوری ءَ بیتگ-

سیستان و بلوچستان ءِ گورنریٹ ءِ کرائسز اسٹاف کارگس ءِ ڈائریکٹر جنرل ءَ اے گپ گمانی کتگ کہ کجام ھم آفٹر شاکس ءِ کمکی جاور ساجو اَنت اے زمین چنڈ ءَ پد دگہ ھچ جانی تاوان نیست اَنت-

زانگ بہ بیت ایران ءِ جغرافیائی ءِ مزنیں فالٹ لائنزے جاڑیگ اِنت کہ ھمک روچ یک زمین چنڈے ءِ دیمپانی ءَ کنت-

سال دوھزار ءُ نوزدہ ءَ ایران ءِ گوریچانی دمگ ءَ پنچ ٹک نُھ زمین چنڈ ءَ پنچ مردم بیران بیتگ اِت اَنت بازیں کچے ءَ زدگ بیتگ اِت اَنت-

سال دوھزار ءُ ھبدہ ءَ بیتگیں ریکٹر اسکیل ءِ ھپت ٹک زمین چنڈ ءَ شش سد مردم بیران بیتگ اِت اَنت ھزارانی کچ ءَ زدگ بیتگ اِت اَنت-

سال دوھزار ءُ سَے ءَ راجدپتری شھر ءَ شش ٹک شش ءِ زور ءِ زمین چنڈ ءَ بیست ءُ شش ھزار مردم بیران بیتگ اِت اَنت-

دکی ءَ دمگی اشکر کھن ءَ زھرناکیں گیس پُر بوگ ءِ سبب ءَ یک کھنجنے بیران وھدے کہ یکے تُستگ-

ھسپتال ءِ رِد ءَ زھرناکیں گیس ءِ سبب ءَ بیران بوتگیں کھنجن ءِ پجّار شاہ محمد ء ملا فضل جھمنند اوگانستان ءِ نام ءَ چہ بوتگ ءُ تُستگیں کھنجن سول ھسپتال دکی ءَ برتگ ، بیران بوتگین ءِ لاش گیشیں چار ءُ ٹپاس ءَ پد لاش کھول ءَ داتگ-

زانگ بہ بیت بلوچستان ءَ گیشتر وھد ءَ اشکر کھناں وئیل دیم ءَ کاینت ھمے سال ءَ دوازدہ نزیک کھنجن وئیلاں بیران بوتگ اَنت وھدے کہ گوستگیں ماہ ءَ جتائیں کھناں وئیلانی آسر ءَ شش ءَ گیش پوریاگر ٹپی بوتگ اَنت –

پوریاگر گل اشکر کھناں اے وئیلاں آسراتی نہ بوگ نزورتریں اوزرانی سبب گوشتگ وھدے کہ وئیل نشانگ بوتگیں گیشتر پوریاگرانی سیادی اوگانستان ءُ دمگی مردم اَنت-

گلاں شکایت کتگ کہ اشکر کھنانی وئیلانی دْرچ برجاہ ءَ اِنت وھدے کہ انتزامیہ ءُ کھن واجکار نیمگ ءَ چہ اے وئیلاں گر ءُ دار ھاتر ءَ ھچ وڑیں گامگیج نہ زرتگ ءُ پوریاگر وئیلاں وتی کمک ءَ وت لاچار اَنت-

مروچی آدینگ ءِ روچ ءَ بلوچ یکجھتی کمیٹی کراچی ءِ آرگنائزر آمنہ بلوچ ءِ سرکماشی ءَ چہ کراچی ءَ آوار جنگ بوتگیں مردمانی کھولاں سند پولیس ءِ برزی تبک ءِ واکداراں گوں ایس ایس پی ساؤتھ ءِ کارگس ءَ گند ءُ نند کُتگ – سند سرکار ءِ گوشگے پد ءَ سند پولیس ءُ بیگواھیں مردمانی کھول ءِ میان ءَ بوتگیں گند ءُ نند ءَ بیگواھیں مردمانی کھول باور کنائین اتگ انت کہ آوار جنگ بوتگیں مردم زوت یل کنگ بنت –

ھمے وھد ءَ آمنہ بلوچ ءَ چہ کراچی ءَ زورانسری آوار جنگ بوتگیں مردمانی سرجمیں ھال ءُ اھوال ایس ایس پی ساؤتھ اسد رضا ءَ داتگ انت کہ پدا ایس ایس پی ءَ آ باور کنائینتگ انت کہ بیگواھیں مردمانی درگت ءَ ایندگہ سرکاری ادارھاں گوں ھال اھوال کنت ءُ آھاں شوھاز کنت –

پولیس ءَ گوشتگ کہ یک ءُ دو روچ ءِ تہ ءَ دگہ گند ءُ نند ءِ ھم بیت کہ آئی ءِ سرکماشی ءَ سند ءِ وزیر میر شبیر بجارانی کنت –

ھمے وھد ءَ آمنہ بلوچ ءَ گوشتگ کہ بیگواھیں مردمانی کھول پہ شوک ءَ زھرشانی کنگ ءَ نہ انت آ وتی دوستگیں مردمانی یل کنائینگے ھاتر ءَ زھرشانی ءَ انت کہ آھانی کانودی ھک انت –

آھاں پولیس واکدارانی دیما گوشتگ کہ اے مردم کہ آوار جنگ بوگ ءَ انت بے کسور انت اے زورانسری آوار جنگ ءُ بیگواہ کنگ بوگ ءَ انت –

آمنہ بلوچ ءَ گوشتگ کہ اگاں سرکار گپ ءَ گوشنداریت گڈا بیگواھیں مردمانی کھول وتی جستانی پسو ءَ زھرشانی ءِ دروشم ءَ لوٹ انت کہ آھانی کانودی ھک انت –

آمنہ بلوچ ءَ چہ واکداراں لوٹ کتگ کہ جمھوری جھدے اھترام کنگ بہ بیت – سند ءِ سرکار کانود ءُ رھبندانی رِد ءَ بیگواھیں مردماں یل بہ کنت ءُ مئے جمھوری ءُ کانودی زرمبشت ءِ ھلاس کنگ ءَ تاکت کارمرز مہ کنت –

آمنہ بلوچ ءَ چہ کراچی ءَ زورانسری آوار جنگ بوتگیں مردمانی لڑ سند پولیس ءَ داتگ – کہ آئی ءِ رِد ءَ کراچی ءِ دمگ گلستان جوھر ءَ آوار جنگ بوتگیں عبدالحمید زھری، کراچی ءِ دمگ ملیر ءَ آوار جنگ بوتگیں سعید احمد ء محمد عمر، ماری پور ءَ آوار جنگ بوتگیں محمد عمران، چہ لیاری ءَ شوکت بلوچ، رئیس گوٹ ءَ آوار جنگ بوتگیں نوربخش ء حبیب کہ آ سی ٹی ڈی ءُ پھازگی لشکر ءَ آوار جتگ انت –

زانگ بہ بیت کراچی پریس کلب ءِ دیما بیگواھیں مردمانی ھاتر ءَ برجاھیں زھرشانی بنجل ءَ مروچی ھپت روچ سرجم بوتگ انت –

سربوتگیں ھالانی رِد ءَ مروچی آدینگ ءِ روچ ءَ ناشناسیں سلاہ بندیں مردمانی تیرگواری ءَ یک مردمے بیران بوتگ –

تیرگواری ءِ وئیل ھزدار ءِ دمگ کھنڈ رسول آباد ءَ بوتگ، تیرگواری ءَ بیران بوتگیں مردمے پجار حاجی خان میراجی ءِ نام ءَ بوتگ –

بیران بوتگیں مردمے جون نادارھجاہ ءَ سرکنگ بوتگ اود ءَ ھژدری چارٹپاس ءَ پد جون کھول ءِ دست ءَ دیگ بوتگ – بلے تنی وھدی وئیلے درگت ءَ ھچ وڈیں سرپدی نہ رستگ کہ کجام سوب ءَ مرد جنگ بوتگ –

زانگ بہ بیت کہ بیست ءُ چار ادارانی میان ءَ ھزدار ءَ تیرگواری ءِ دو وئیل بوتگ انت چریشی ءَ دو مردم بیران بوتگ انت، گوستگیں روچ ءَ ھزدار ءِ دمگ زھری ءَ سلاہ بندیں مردمانی تیرگواری ءَ یک مردمے بیران بوتگ ات کہ آئی ءِ پجار عبداللہ جھمنند ھزدار مولہ ءِ نام ءَ چہ بوتگ ات –

سربوتگیں ھالانی رِد ءَ ابدوئی سیمسر ءِ بند بوگ ءِ سوب ءَ فقیر جان ء دلدار جھمنند کیچ ھوشاپ بیران بوتگ –

گیشیں ھالانی رِد ءَ پاکستانی پوج ءَ بازیں روچ ءِ بیت کہ عبدوئی ءِ سیمسر ءَ ٹیل باپاری کنوکیں گاڑی داشتگ انت – چریشی ءِ سوب ءَ مردم سک باز دلسیاہ انت ءُ زگریں روچ ءِ سر ءَ ازیت سگگ انت کہ آھاں دگہ کمک کنوک نیست –

ھزارانی کچ ءَ ٹیل باپاری کنوکیں مردمانی وردنی سامان ھلاس بوتگ انت وھدیکہ یک گاڑی ڈرائیور ءِ وتی زند ءَ زبھر بوتگ –

زانگ بہ بیت روکپتی ءُ رودرآتکی بلوچستان ءَ روزگار ءِ نہ بوگ ءِ سوب ءَ بازیں ورنایے ٹیل ءِ باپاری کنگ ءَ انت کہ اودا پوج ھم ترندی کنگ ءَ انت چریشی ءَ بازیں وئیلے بوگ ءَ انت –

ھمے سال ءِ اپریل ماہ ءَ بلوچستان ءِ سیمسری دمگ چاگے ءَ پاکستانی پوج ءَ حمید نامیں گاڑی ڈرائیور ءِ تیرباران کُتگ ءُ کشتگ ات ءُ وھدیکہ بازیں گاڑی ءِ ھراب کُتگ ات ءُ آھانی ریڈیٹراں ریک مان کتگ ات ءُ ڈرائیور پیادگ دیم داتگ ات انت کہ چریشی ءَ دگہ بازیں ڈرائیور ءِ بیران بوتگ ات انت –

وئیلے بگیری ءَ زھرشانی کنوکانی سر ءَ ھم پوج ءَ تیرگواری کتگ ات کہ چریشی ءَ ھشت مردم زدگ بوتگ اتنت –

ھمے وڈ گوستگیں سال ءَ روکپتی ءُ رودرآتکی بلوچستان ءَ جتا کنوکیں گولڈ سمتھ لائن سر ءَ ایرانی سیمسری پوج ءِ تیرگواری ءَ سِی مردماں گیش مردم بیران بوتگ انت –

بلوچستان ءِ ضلع کیچ جھمنندیں علی محمد ءِ گْوشگ اِنت کہ گوستگیں سال ءِ جون ءَ منی کسان سالی ئیں چُک سادھیں پُچّانی تہ ءِ کارندھاں آوار جنگ ءَ پد بیگواہ کتگ- کہ آئی ءِ درگت ءَ ھچ وڑیں ھال دست نہ کپتگ-

ضلع کیچ ءِ دمگ گورکوپ جمک ءِ جھمنندیں علی محمد ءِ گْوشگ اِنت کہ آئی ءَ وتی چُک ءِ یل کنائینگ ءِ ھاتر ءَ ھرچ وڑیں در ٹُکّ اِتگ اَنت بلے ھرچ جاہ بے اُمیتے ءَ دگہ ھچ نہ رستگ-

آئی ءَ گْوشتگ کہ منی سیزدہ سالی ئیں چُک نودربرے کہ آ گوستگیں سال 26 جون ءَ تربت ءِ دمگ زیارت سر ءَ آوار جتگ ءُ اشی ءَ پد پولیس تھانہ ءَ ایف آئی آر درج کتگ ھرچ وڑیں جُھد کتگ بلے ھچ جاگہ ھچ وڑیں ھال دست نہ کپتگ-

زانگ بہ بیت گوستگیں سال ءَ ضلع کیچ ءِ دمگ زیارت سر ءَ چہ کسانیں بچک ءِ ھمراھی ءَ یک یازدہ سالی ئیں بختیار ھم آوار جنگ بوتگ-