TBP Balochi

ایرانشھر ءَ ایرانی لشکر ءِ تیرگواری ءَ یک مردمے بیران بیتگ-

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ ایرانی لشکر ءِ تیرگواری ءَ یک مردمے بیران بیتگ –

بیران بیتگیں مردم ءِ پجار بھزاد دامنی ء شاہ نور سرباز ءِ نام ءَ زانگ بیتگ –

دمگی مردمانی رد ءَ ایرانی لشکر ءَ ھما وھد ءَ بھزاد ءِ سر ءَ تیرگواری کتگ کہ آ روگ ءَ بیتگ ءُ اود ءَ آئی ءِ تیرگواری ءِ سبب ءَ گاڑی لین ءِ کمبہ ءَ لگ اتگ ءُ چریشی ءَ گاڑی ءَ آس کپتگ ءُ بھزاد ستکگ ءُ بیران بیتگ-

روکپتی بلوچستان ءَ ایرانی لشکر ءِ تیرگواریاں بازیں کچے ءَ مردمانی بیرانی ءُ زدگ بوگ ءِ ھال یکشل ءَ رپورٹ بیگ ءَ اَنت-

بلوچ کمپعن فعالین ءِ رد ءَ ھمے سال ءَ پنجاہ ءُ دو وئیل رپورٹ بیتگ اَنت کہ اشانی تہ ءَ ھشتاد ءُ ھشت مردم زدگ ءُ بیران بیتگ اَنت ءُ ایرانی لشکر ءِ تیرگواریانی سبب ءَ بیست ءُ نُھ مردم زدگ بیتگ اَنت اشانی تہ ءَ یک زالبولے ھم ھوار اِنت ءُ چِل ءُ ھشت مردم بیران بیتگ اَنت کہ بیران بیتگیں مردمانی تہ ءَ دو زالبول ءُ پنچ زھگ ھوار اَنت-

ایرانی لشکر ءِ نیمگ ءَ چوشیں وئیلانی ھال دیم ءَ نیتکگ اَنت بلے لس مھلوک ءِ گوشگ اِنت کہ اے وڑیں وئیل ھمک روچ پیش آیگ ءَ اَنت-

بلوچستان ءِ دمگ ژوب ءَ مساپر کوچ ءِ وئیلے ءَ 19 مردم بیران بیتگ اَنت۔

اسسٹنٹ کمشنر شیرانی مہتاب شاہ ءَ گُشتگ کہ کوشکاریں وئیل ءِ آسر ءَ 14 مردم ٹپی ھم بیتگ اَنت۔ آئی ءَ گُشتگ کہ بس چہ راولپنڈی ءَ شال ءَ آیگ ءَ بیتگ کہ دانہ سر ءِ کوھانی تہءَ کَڈی ءَ کپتگ۔

اسسٹنٹ کمشنر ءَ گُشتگ کہ اے دمگاں ھور ءُ گاڑی ءِ تیز تاچگ ءِ سوب ءَ اے وئیل دیما اَتکگ۔ آئی ءَ گیشتر گُشتگ کہ بیران بیتگینانی تہءَ زالبول، زھگ ءُ دو نودربر ھم ھوار اَنت۔ ڈسٹرکٹ ہیڈ کوارٹر ھسپتال ژوب ءَ چار لاش آرگ بیتگ اَنت۔ دگہ لاش ھمے زیتاں ھسپتال ءَ برگ بنت۔

ترسناکیں دگے وئیل ءِ درستیں ٹپی کَشَگ ءُ بنداتی کمک ءَ پہ ڈسٹرکٹ ہیڈ کوارٹر ھسپتال ژوب ءَ برگ بیتگ اَنت ءُ ھسپتال ءَ ایمرجنسی جنگ بیتگ۔

لیویز ءُ واکدارانی مستریں اپسر وئیل جاہ ءَ سر بیتگ اَنت ءُ پَٹ ءُ پول برجاہ اِنت۔

بلوچستان ءَ کسانیں، پُرشت ءُ پروش آماچیں دگ بلوچستان ءَ دگے وئیلانی درستاں مستریں سوب گُشگ بنت وھدیکہ ڈرائیورانی نیمگ ءَ بے پرواھی ھم اے وئیلانی یکے چہ مستریں سوبان اِنت۔

بلوچستان ءَ دگے وئیلانی آسر ءَ ھمک ماہ ءَ بے کساس مردم بیران ءُ ٹپی بنت وھدیکہ اَے کساس سال ءِ آسر ءَ ھزاراں چہ ھم ود اَنت۔

کراچی ءَ بیگواھیں بلوچانی زورانسری آوار جنی ءِ بگیری ءَ برجاھیں زھرشانی بنجل ءَ مروچی ھشت روچ سرجم بوتگ انت – زورانسری آوار جنگ بوتگیں مردمانی کھولاں سند ءِ سرکار ءِ نیمگ ءَ گند ءُ نندی ءِ درچ ساڈاتگ –

کراچی ءَ زھرشانی ءَ نشتگیں بیگواھیں مردمانی کھولاں گوستگیں روچ ءَ سند ءِ سرکار ءِ گوشگے پد ءَ بندات بوتگیں گند ءُ نند ساڈاتگ ءُ گوشتگ کہ سند ءِ سرکار ءِ اے کار ءَ مئے امیت مھکم بوتگ انت –

کراچی زھرشانی ءَ نشتگیں کھولانی تہ ءَ کراچی ءِ دمگ گلستان جوھر ءَ آوار جنگ بوتگیں عبدالحمید زھری، کراچی ءِ دمگ ملیر ءَ آوار جنگ بوتگیں سعید احمد ء محمد عمر، چہ ماڑی پور ءَ محمد عمران، لیاری ءَ آوار جنگ بوتگیں شوکت بلوچ ءُ رئیس گوٹ ءَ زورانسری آوار جنگ بوتگیں نوربخش ء حبیب ءِ کھول ھوار انت –

بیگواھی مردمانی کھولاں لوٹ کتگ سند سرکار ھمے سال ءَ چہ کراچی ءَ زورانسری آوار جنگ بوتگیں مردماں یل بہ کنت – آھاں گوشتگ کہ اے زورانسری آوار جنگ بوتگیں درسیں مردم بے گناہ ءُ بے کسور انت –

زانگ بہ بیت کہ کراچی ءَ زورانسری آوار جنگ بوتگیں مردمانی کھولاں گوستگیں روچ ءَ سند پولیس ءِ برزی تبکے واکداراں گوں ایس ایس پی ساؤتھ کارگس ءَ گند ءُ نندے کتگ بوتگ – گند ءُ نند ءَ بیگواھیں مردمانی کھول سند سرکار ءِ نیمگ ءَ چی باور کنائینگ بوتگ انت کہ آھانی مردم زوت یلہ کنگ بنت –

زھرشانی ءَ ھواریں بلوچ یکجھتی کمیٹی ءِ آمنہ بلوچ ءَ گوشتگ کہ بیگواھیں مردمانی کھول پہ شوک ءَ زھرشانی کنگ ءَ نہ انت آ وتی دوستگیں مردمانی یل کنائینگے ھاتر ءَ زھرشانی ءَ انت کہ آھانی کانودی ھک انت- آمنہ بلوچ ءَ چہ واکداراں لوٹ کتگ کہ جمھوری جھدے اھترام کنگ بہ بیت – سند ءِ سرکار کانود ءُ رھبندانی رِد ءَ بیگواھیں مردماں یل بہ کنت ءُ مئے جمھوری ءُ کانودی زرمبشت ءِ ھلاس کنگ ءَ تاکت کارمرز مہ کنت-

بلوچ لبریشن آرمی ءَ بولان ءَ پوج سر ءَ بوتگیں اُرش زمہ واری ءَ منّ اِتگ ءُ گْوشتگ کہ اے اُرش ءَ دو کارندہ مرتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل اے ءِ سرمچاراں بولان ءِ دمگ نودگھار ءَ ٹاکری ءِ ھند ءِ سر ءَ زورگریں پاکستانی پوج ءِ پانگس سر ءَ اُرش کتگ-

جارکش ءَ دیمتر ءَ گْوشتگ کہ بی ایل اے ءِ سرمچاراں جتائیں نیمگاں چہ پانگس سر ءَ گوں راکٹ ءُ دگہ سلاھاں نشانگ کتگ ، چریشی ءِ آسر ءَ دُژمن پوج ءِ دو کارندہ مرتگ ءُ بازین ئِے ٹپی بوتگ اَنت-

جارکش ءَ گْوشتگ کہ اُرش ءَ پد دُژمن ءِ کارندھاں جتائیں نیمگاں مارٹر آس داتگ، سرمچار جنگی ھُنر ءُ رپکاں چہ وتی مُھریں اوتاکانی سر بوگ ءَ سوبمند بوتگ اَنت-

جیئند بلوچ ءَ گْوشتگ کہ بلوچ لبریشن آرمی اے اُرش زمہ واری ءَ منّ اِیت ءُ اے اِھد کنت زورگریں پوج سرجمی ءَ دراھگ ءَ تاں وتی اُرشاں برجاہ دار اِیت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءَ ھیرونک ءَ پاکستانی پوج ءِ کاروان ءِ سر ءَ بوتگیں اُرش ءِ زمّہ واری منّ اِتگ –

جارکش میجر گوھرام بلوچ ءَ گوشتگ کہ مئے سرمچاراں دو جولائی ءَ شمبے ءِ روچ ءَ کیچ ءِ دمگ ھیرونک ءَ نیمروچ ءِ ادار دوازدہ ءَ پاکستانی پوج ءِ کاروان ءِ سر ءَ راکٹ ءُ دگہ مزنیں سلاھاں گوں اُرش کُتگ – آئی ءَ گوشتگ کہ دژمن پوج ءِ کاروان ءَ ھواریں دو لینڈ کروزر گاڑی ءُ یک ویگو گاڑی ءِ اُرش ءِ زد ءَ اتکگ انت ءُ چریشی ءَ بازیں کارمندے مُرتگ ءُ زدگ بوتگ انت –

جارکش ءَ گوشتگ کہ اُرش ءَ پد بے سوب بوتگیں پوج ءَ کورکاؤ تیرگواری کتگ کہ چریشی ءَ رھگوزیں گاڑی ءَ سواریں دو زھگ زدگ بوتگ انت –

جارکش میجر گوھرام بلوچ ءَ دیمتر ءَ گوشتگ کہ ھمے میان ءَ دژمن پوج ءِ دو جنگی بالگرد سربوتگ انت – نزیکیں دمگاں زوراکی ءَ ھوار بالگرداں سرمچارانی رندگیری ءِ جھد کتگ بلے مئے سرمچار وش ءُ سلامتی وتی اوتاگ ءَ سربوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ ایردستیں بلوچستان ءِ آجوئی ءَ تاں مئے جھد برجاہ مانیت –

بلوچ سلاہ بندیں گل بلوچ ریپبلکن گارڈ ءِ جارکش دوستین بلوچ ءَ رسانکدراں وتی شنگ کرتگیں درشان ءَ تہ ءَ گوشتگ کہ مئے سرمچاراں گوستگیں شپ ءَ ڈیرہ مراد جمالی ءَ نوک جوڈ بؤکیں پوجی بنجل ءِ بنجاھی گیٹ دپ ءَ تراکناکیں شورو کل کرتگ ءُ تراکینتگ انت –

جارکش ءَ گوشتگ کہ اُرش ءِ آسر ءَ بنجاھی دروازگ تباہ بوتگ ءُ ڈوٹی ءَ اوشتوکیں دو کارمند زدگ بوتگ انت –

جارکش ءَ وتی درشان ءِ گڈسر ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –

سربوتگیں ھالانی رِد ءَ پاکستانی پوج ءَ گِسے ءِ سر ءَ بیڑ برتگ ءُ یک مردمے آوار جتگ ءُ گوں وت برتگ –

گیشیں ھالانی رِد ءَ بلوچستان ءِ دمگ مستونگ گردگاپ ءَ پاکستانی پوج ءَ بیست ءُ ھشت جون ءِ شپ ءَ عبدالمطلب سرپرہ ءِ گِس ءَ بیڑ برتگ ءُ عبدالمطلب سرپرہ ءِ زھگ شیرگل زورانسری آوار جتگ ءُ گوں وت برتگ کہ ھما ایں گار ءُ بیگواہ ایں –

زانگ بہ بیت گوستگیں سال ءِ بیست ءُ چار دسمبر ءَ ھم پاکستانی پوج ءَ عبدالمطلب سرپرہ ءِ گِس ءَ بیڑ برتگ ءُ اے مردے دو برات زورانسری آوار جتگ ءُ گوں وت برتگ انت –

اھوالکار ءِ رِد ءَ اشی ءَ پیش آوار جنگ بوتگیں مردم پدا رند ءَ یل کنگ بوتگ انت بلے گوستگیں روچ ءَ آوار جنگ بوتگیں شیر گل تنی وھدی گار انت –

بلوچستان ءِ جتا جتائیں ھند ءُ دمگاں پاکستانی پوج ءِ نیمگ ءَ لشکر کشی، چیریں ادارھانی نیمگ ءَ بیڑ بری ءُ زورانسری آوارجنیانی تہ ءَ گیشی آرگ بوتگ – اے میان ءَ گیشتر بلوچ ورنا ھاسکر نودربر تبک ءِ ورنا آوار جنگ ءُ بیگواہ بوگ ءَ انت –

بلوچستان ءَ ھمے زورانسری آوارجنیانی بگیریءَ بنجاھی شھر شال ءُ سند ءِ بنجاھی شھر کراچی ءَ بیگواھیں مردمانی کھول ءِ نیمگ ءَ زھرشانی برجاہ انت –