نبشتانک: وداریگیں چماں کَے مار ایت
نبشتہ کار: لیاکت وپا بلوچ
دی بلوچستان پوسٹ
دنیا ءِ تہ ءَ مستریں مال ءُ مڈّی پت ءُ مات ءِ ساھگ انت مات ءُ پت ءِ پادانی چیر ءِ ھاک پہ زھگ ءَ بھشت انت اے گران بھائیں درداں ھما مردم مار اِت کت کن اَنت کہ آئی ءِ سر ءَ گوستگ ھما مردم ھمے آس ءَ ستکگ ءُ انگت ءَ سوچگ ءَ انت۔
انگت ءَ منی وداریگیں چم راھچار انت ودار ءِ نام ءِ گرگ سک آسان انت بلے ودار کنگ سک گران انت سمی ءُ مھلب آس ءِ تہ ءَ ودار کنگ انت کہ اباجان زوت واتر بیت ءُ لوگ ءَ کیت
مئے زندمان ءَ وشی کار ایت ءُ مئے زندگی وش تر بیت ھمے ودار ءِ آس ءَ انچوش کتگ مئے زندمان ءِ تہ ءَ وشی نیست مئے وشیں روچ ھما وھد ءَ بیت وھدے کہ اباجان لوگ ءَ واتر کنت۔
گڑا ما ائید کن ایں مئے ائید ءِ روچ اباجان انت اے گران بھائیں ساھتاں سینزدہ سال سرجم بوت سینزدہ ءِ نام ءِ گرگ دپ ءَ کیت سینزدہ سال سک گران انت یک شپے ءِ دوری چو آس ءَ سوچ ایت ما انگت ءَ سینزدہ سال ءَ سوچگ ءَ ایں ءُ ھمے ودار ءَ نشتگیں انگت ءُ تئی ھچ ھال ءُ اھوال نیست اباجان! مھلب مدام من ءَ جست کنت اباجان ءَ چی ءَ بُرتگ ئِے اباجان ءَ چے گناہ کتگ اباجان ءَ چی ءَ زندان ءَ بندیگ ئِے کتگ ھمے گپ ءَ رَند گیر اتک ءُ اباجان ءِ اکس ءِ کر ءَ رؤت ءُ چار ایت اباجان زوت واتر کن پد ءَ منی گْور ءَ کیت ءُ گوش ایت باندا پد ءَ بیا رو ایں ءُ زرشانی کن ایں اباجان ءِ واست ءَ ءُ کلیں بندیگانی واست ءَ ھر کجا زرشانی ءِ نام ءَ ھش کت الم ما وت ءَ زوت ساڑی کتگ ات ھمے زرشانی ءِ تہ ءَ مدام توار چست کت ءُ اباجان ءُ کلیں بندیگانی واست ءَ گریوگ ءُ پریات کت اد ءَ نہ بوت بزگ کس ءَ مئے سر ءَ نہ زاناں پرچا اد ءَ کس گوش نہ دار ایت مارا ھر کجا سر کپ ایت گڑا تئی شوھاز ءَ شت ایں اے ملک ءِ آمیدگس ءَ نیست انساپ اے ملک ءِ آمیدگس پہ کلدار ءَ بھا انت اے ملک ءَ انساپ ءِ امیت ءِ گس نیست انت اے ملک ءِ ھاکم ءُ راھشُون درست بھا بوتگیں مردم انت اد ءَ کس مئے سر ءَ بزگ نہ کنت اد ءَ درست کور ءُ گنگ انت اد ءَ کَے ءَ ءُ چے امیت بہ دارایں اد ءَ کس نہ دنت تسلا مارا بس ھمے گرانیں ساھتاں گوں روچ ءُ شپ گوازینگ ءَ ایں نیست انت ائید ءِ وشیں روچ ءِ روچ پہ بلوچ راج ءَ ودارِیگیں چم نشتگ انت راہ ءِ چارگ ءَ واتر کن ابا جان بے ترا ھچ وش نہ بیت مارا مدام ھمے ارز ءَ کن آں پاک ھدا ءِ کر ءَ آجو بات اباجان منی کبلہ گوں کلیں بندیگاں ھوار-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔