TBP Balochi

مستونگ ءَ سلاہ بندیں مردمانی تیرگواری ءَ مسیحی برادری ءِ چار زھگ ٹپی بوتگ اَنت-

سربوتگیں ھالانی رِد ءَ بلوچستان ءِ دمگ مستونگ ءِ ھند کرسچن کالونی ءَ ناشناسیں سلاہ بنداں میتگ ءَ ساڑی ئیں مردمانی سرءَ سر ءُ دیمتیرگواری کتگ ءُ تتکگ اَنت-

وئیل ءَ پد پولیس ءُ انتزامیہ ءَ ھما دمان ءَ سر بوتگ ءُ اُرشکارانی پٹ ءُ پول برجاہ کتگ-

اِھوالکارانی رِدءَ ٹپی ئیں زھگ زوت شھید نواب غوث بخش میموریل ھسپتال مستونگ برگ ءَ پد شال ءَ برگ بیتگ اَنت-

دمگی واکدارنی رِد ءَ وئیل ءِ سوب ءَ پولیس پٹ پول کنگ ءَ اِنت بلے اے وئیلے درگت ءَ گیشیں ھال انگت دیمءَ نیتکگ-

بلوچستان ءِ دمگ کیچ ءَ پاکستانی پوج ءَ یک وانگجاھے ءِ اُستاد دزگیر کرتگ ءُ ناشناسیں جاھے ءَ برتگ –

گیشیں ھالانی رد ءَ مروچی سھب ءَ پوج ءَ تربت ءِ دمگ گوکدان ءَ بیڑ برتگ ءُ یک مردمے دزگیر کتگ ءُ بیگواہ کرتگ – بیگواہ کنگ بیتگیں مردم ءِ پجار ایس ایس ٹی نزیر اھمد ء ھولدار فتح مھمد ءِ نام ءَ زانگ بیتگ-

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ اَنت گوستگیں روچ ءَ بلوچستان ءِ بنجاھی شھر شال ءِ ھند جوائنٹ دگ ءَ پاکستانی پوج ءَ مقبول نامیں مردمے دزگیر کنگ ءَ پد بیگواہ کتگ اَت –

دومی نیمگ ءَ چہ بلوچستان ءَ بیگواہ کنگ بیتگیں مردمانی کھول گوستگیں نوزدہ روچاں چہ وتی مردمانی یل کنائینگ ءِ ھاتر ءَ زھرشانی ءَ نیشتگ اَنت-

دومی نیمگ ءَ ھال اِنت بیست ءُ چار مارچ دوھزار ءُ بیست ءُ یک ءَ پنجگور ءِ دمگ چیدگی بارڈر ءَ زورانسری آوار جنگ بیتگیں بلاول جان ء ھاجی یار جان جھمنند پنجگور دیم ءَ آرگ بیتگ-

بلوچ یکجھتی کمیٹی کراچی ءَ دو شمبے ءِ شپ ءَ بلوچستان ءِ ھار آماچیں مھلوکانی ھاترءَ سیمی کمکی مڈیانی بھر رھادگ کتگ اَنت، اے کمکی مڈی چار ٹرکانی ھواری ءَ لسبیلہ ءِ جتا جتائیں دمگاں رھادگی ءَ جنزان اَنت-

کمکی مڈیانی تہ ءَ کمبل، گُد، پِردیگی چادر ءُ نُپاد، روگن، برنج، دال، شکر ءُ دگہ وردنی ھوار اَنت-

بلوچ یکجھتی کمیٹی کراچی ءِ رھشون آمنہ بلوچ ءَ بلوچستان ءِ سرکار ءِ سر ءَ ترندیں ایراد گپتگ ءُ گوشتگ کہ سرکار ءِ نیمگ ءَ ھار آماچیں مردم ایوک ءَ یل کنگ بیتگ اَنت آیانی دزگرگ ءَ سرکاری تکاں ھچ گامگیج زورگ بیگ ءَ نہ اِنت وزیر بس پوٹو کشگ ءَ دزبند اَنت-

آمنہ بلوچ ءَ گُشتگ ھستیں توپانی ھوراں بلوچستان ءَ یک زوالے آورتگ، ءُ اے نگیگیں وھد ءَ سانمندیں مردم یل دیگی نہ اَنت ھرچ کمکے بوت اِنت اے جھد الم کنگ بیت اِنت-

آمنہ بلوچ ءَ زرداریں مھلوک ءَ بلوچستان ءِ ھار آماچیں مردمانی کمک کنگ ءِ دزبندی کتگ ءُ گوشتگ کہ گیش ءَ گیش کمکی کارانی بھر جوڑ بہ بیت دانکہ اے نگیگیں وھد ءَ آیانی درد ءُ گماں ھوار بہ بیت آئی ءَ سرکاری واک زور داتگ ءُ گشتگ اَنت آ اے وھد ءَ ھار آماچیں مردمانی کمک ءَ الم ءَ بہ کنت-

اوگانستان ءَ بیست ءُ چار کلاکانی تہ ءَ تھریک تالبان پاکستان ءِ دو مزنیں کماندار گوں ھمراھاں ھوار دو جتا جتائیں دمگاں جنگ بوتگ اَنت-

جنگ بوتگینانی تہ ءَ ٹی ٹی پی گچینی ئیں راھشون ملا عمر خالد خراسانی، حافظ دولت خان ، ملا حسن، ملا امیر ءُ مولانا عقابی ھوار اَنت-

اے ٹی ٹی پی راھشون دو جتا جتائیں دمگاں کنڑ ءُ لوغر ءَ دو جتاجتائیں وئیلاں جنگ بوتگ اَنت-

زانگ بہ بیت اے وئیل ھما وھد ءَ دیم ءَ اَتکگ اَنت وھدیکہ پاکستانی پوج ءُ ٹی ٹی پی ءِ میان ءَ نند نیاد ءُ جنگ بندی بوگ ءَ بوتگ-

ھالانی رِد ءَ اے وئیلاں ھمینچو مردم جنگ بوتگ اَنت اے دُرست نند ءُ نیاد ءَ منوگر نہ بوتگ اَنت ءُ اے جتگ انت اش ھم ھمے ھاتر ءَ کہ دانکہ ٹی ٹی پی ءَ پہ تاکت ءِ زور ءَ نند ءُ نیاد ءَ پاکستان پوج وتی لوٹانی منّارینگ ءِ ھاتر ءَ ٹُھّین اِیت-

ٹی ٹی پی ءِ درشان اے وئیلانی درگت ءَ ھم دیم ءَ نیتکگ-

بلوچستان لبریشن فرنٹ ءَ مند ءُ گوادر ءَ پاکستانی لشکر ءِ سر ءَ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ تہ ءَ گْوشتگ کہ ھپت ساچان ( 7 اگست ) ءَ بلوچستان ءِ شھر گوادر ءَ میرن ڈرائیو (پدی زر) دگ ءِ سرءَ لشکریانی سنگل ڈور پیکپ گاڑی ریموٹ کنٹرول بمب ءَ گوں نشانگ کُتگ۔ اُرش ءَ لشکری گاڑی ءِ پشتی نیمگ زدگ بیتگ ءُ اُرش ءِ آسر ءَ گاڑی ءَ سواریں چار لشکری کارمند مرتگ ءُ دو ٹپی بیتگ اَنت۔

آئی ءَ گُشتگ کہ اُرش بلوچستان لبریشن فرنٹ ءِ اسکسپلوزو اسکواڈ ءِ نیمگ کنگ بیتگ، اربن گوریلہ تکنیک ءَ کارمرز کنان ءَ مئے سرمچار پہ سلامتی درکپگ ءَ سوبمند بیتگ اَنت۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی دگہ یک درشان ءِ تہءَ گْوشتگ کہ ھپت ساچان ( 7 اگست ) ءِ دِیگر ءَ مئے سرمچاراں کیچ ءِ ھند مند چُکّاپ کَور ءَ اے پانِگس ءَ داں دومی پانگِس ءِ پاند ءَ رؤکیں چار لشکری کارمَند گوں اسنائپراں یکّیں ساھت ءَ نِشانگ کُرتگ کہ چہ آئی ءَ لشکر ءِ دو سِپاھی ٹپّی بوتگ۔

اُرش ءَ پد ھما دمان ءَ لشکر ءِ دو سِپاھی یک دِگہ سنگرے ءَ پہ تچگ ءُ رَوَگ ءَ سوبین بوتگ اَنت۔ اُرش ءِ پُژدر ءَ زُورگِریں لشکر ءَ بازیں مارٹر گولا آس داتگ ءُ گوں مزنیں سِلاھاں تیرگواری کُتگ، بلے مئے سرمچار اُرش کنگ ءَ پد پہ سلامتی وتی مُھکمیں جاہ ءُ ڈواراں سر بوتگ اَنت۔

جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ زُورگِریں پاکستانی لشکر ءِ سر ءَ مئے اے اُرش داں ایردستیں بلوچستان ءِ آجوئی ءَ برجاہ مان اَنت۔

بلوچی اکیڈمی ءِ شست ءُ چارمی جنرل باڈی دیوان چیئرمین رفیق ءِ سروکی ءَ برجم دارگ نیاد ءَ اکیڈمی ءَ بازیں نوکیں لٹریری پراجیکٹس دیگ بیتگ اَنت-

شال ءَ بلوچی اکیڈمی ءِ شست ءُ چارمی سالی جنرل دیوان چیئرمین رفیق ءِ سروکی ءَ برجم دارگ بوتگ- دیوان ءَ جنرل سیکریٹری ڈاکٹر بیزن سبا ءَ رپورٹ ءَ گوستگیں سال ءَ برجم دارگ بوتگیں ادبی چست ءُ ایر ءُ مراگش ، شنگ ءُ تالان ءُ دگہ شوربندیانی درگت ءَ باسک سرپد کتگ اَنت- اشی ءَ اَبید سالگشتی رپورٹ ءَ مالی ھرچ ءُ درچ ءِ درگت ءَ باسک سرپدی داتگ اَنت ءُ منوگری زرتگ اَنت- بلوچی اکیڈمی ءِ باسکاں اے گپ سر ءَ دلپدردی درشان کتگ کہ سرکاری وانگجاھاں وانگ بؤکیں بلوچی نبشتانک ءَ زَرانی سر ءَ کنگ ءُ چریشی ءَ بلوچی وانینگ ھم اوشت آماچ بیتگ-

اشی ءَ اَبید باسکاں لوٹ کتگ کہ بلوچی استاد آرگ بہ بیت – اکیڈمی باسکاں اے گپ ءِ سر ءَ دلپدردی درشان اِتگ کہ کالج کچ ءَ بلوچستان ءِ جتا جتائیں کالجانی ھاتر ءَ بلوچی ءِ ھالیگیں جاھاں پبلک سروس کمیشن ءِ رد ءَ جار بہ بنت استاد بیار اِیت تانکہ سرکاری کالجاں بلوچی وانینگ ءِ تہ ءَ گیشی بیار اَنت – ڈاکٹر بیزن سبا ءَ سالگشتی رپورٹ داتگ ءُ گْوشتگ کہ اکیڈمی ءَ اے سال ءَ بلوچی زبان ءِ ڈیجیٹیلائزیشن ءِ ھاتر ءَ یک موباھلے ایپلی کیشنے تیاری کتگ کہ چریشی ءَ اکیڈمی ءِ شنگ کتگیں کتاب ءِ وانگ ءِ ھاتر ءَ ایر کتگ اَنت- اشی ءَ اَبید پٹ ءُ پولی پڑ ءَ نُھ پٹ ءُ پولی کتاب شنگ کتگ- وھدے کہ اے سال ءَ انگریزی بلوچی ڈکنشری، بلوچی چار زبان ءِ ڈکشنری ءَ اَبید شاعری ءُ فکشن ءِ درگت ءَ دُرستی بیست ءُ یک کتاب شنگ کتگ اَنت –

اکیڈمی ءَ دیوان ءِ مردم سرپد کتگ اَنت کہ آ چکانی ھاتر ءَ وانگی چیزانی تیاری ، درانڈیھی زبانانی کلاسیک ودی کنگ ءَ بلوچی زبان ءَ رجانک ءُ بلوچی شاھزانت ادبی ءُ راجدپتری چیزاں انگریزی یا دگہ زباناں رجانک ، بلوچی زبان ءِ لھجھاں ءُ راجدپتر ءِ درگت ءَ پٹ ءُ پول شنگ ءُ تالان ءُ بلوچستان ءِ راجدپتر ءِ درگت ءَ سر ءُ پُر بہ کن اَنت –

جنرل باڈی ءِ باسکاں وزیراعلیٰ بلوچستان ءُ اسملی باسکانی ھیال اے نیمگ ءَ داتگ کہ بلوچی زبان ءَ ھوار بلوچستان ءَ مزنیں زبان پشتو ءُ براھوئی ءِ سرکاری پرائمری وانگجاھاں وانینگ ءِ واستا چست ءُ ایر ھاتر ءَ کانود سازی بہ کن اَنت- باسکاں بلوچی اکیڈمی کارکردگی درگت ءَ گپ ءُ تران کنان ءَ گْوشتگ کہ اکیڈمی گوستگیں چیزے وھداں چہ پٹ ءُ پولی گپانی سر ءَ ھوار سیمینار برجم دارگ بوتگ ءُ پٹ ءُ پولی نیمگ ءَ گیش واھگدار اَنت چریشی ءَ چہ بلوچی زبان ءِ زبان ءُ ادب ءَ شنگ بوگ ءَ کمک رسگ ءَ اِنت – اشی ءَ اَبید بلوچی اکیڈمی جوڑ کتگیں موباھل اپیلی کیشن ھم اے نیمگ ءَ یک جوانیں گامے-

شست ءُ چارمی دیوان ءَ اے مُھاد ءَ ایر کنگ بوتگ اَنت ءُ ھکومت بلوچستان ءَ ھوار ھمگرنچیں ادارھاں چہ لوٹ کتگ کہ بلوچستان ءِ سرجمیں سرکاری پرائمری وانگجاھاں ءَ بلوچی ، پشتو ءُ براھوئی ءِ الّم استاد آرگ بہ بیت ءُ پرائمری وانگجاھاں اے زبانانی وانینگ ءُ دوبر برجاہ بدار اَنت-

بلوچستان سریاب دگ ءَ برجاھیں میوزیم ءَ ھوارجتا جتائیں دمگاں ربیدگی سینٹر ءَ پچ بہ کن اَنت جعفرآباد ءُ نصیرآباد ءِ دمگاں بلوچی زبان وانینگ ءَ بندات بہ کن اَنت – ریڈیو ءُ ٹی وی مراگشاں جوان جوانیں جوڑ کنگ ءَ اَبید اشاں شنگ کنگ ءِ وھد ءَ ھم بہ وانین اَنت – بلوچی اکیڈمی ءِ چیئرمین سنگت رفیق ءَ دیوان ءَ ھوار سرجمیں باسکانی منت گپتگ ءُ اے اِھد درشان کتگ کہ بلوچی اکیڈمی بلوچی زبان ، راجدپتر ، ربیدگ ءُ ادب ءِ شنگ کنگ ءِ ھاتر ءَ وتی جُھداں گیش تُرند ءُ نوک کار اِیت-