TBP Balochi

نبشتانک: گوریلہ جنگ

نبشتہ کار: ھُدا وشک ءُ مھمد پاروک بلوچ

سیمی بھر

دی بلوچستان پوسٹ

ھبکّہ ءُ چیرڈاھی: ماں چیرجنگ ءَ زورانسریں دژمن باید انت تئی ھند ءُ بُنجل ءِ بارہ ءَ ھچبر سھیگ مہ بیت بلے تو آئی ءِ ھر ھند ءُ بُنجل ءَ سھیگ بِہ بَہ ئے پمیشکا دژمن ءِ سر ءَ ھبکّھیں اُرُشانی کنگ ءَ آئی ءِ کِرّ ءُ کشاں وتی راجی دوزواھیں سنگتانی چیرڈاھواں بدار کہ دژمن ءِ جنگی تیاری ءِ بارہ ءَ چیرجنگولاں وھد ءِ سر ءَ ڈاہ بہ رس ایت۔ اگاں تئی جریدہ کتگیں اُرُشانی مراسا ءِ ھال پاشک بوت انت گُڑا چیرجنگول وتی اُرُش ءَ زیت بدل کن اَنت۔ چوناھیگا چہ ھمے راج ءِ دوزواھیں چیرڈاھوانی ڈاہ دیگ ءَ چیرجنگولاں سما بیت کہ راجی چیرجنگ ءِ گل ءِ تہ ءَ راجدْروہ مان اَنت یا اِنّاں۔ پمیشکا پہ دژمن ءِ اندری ھال، دژمن ءِ جنگی مراسانی بابت ءَ زانگ ءُ دژمن ءِ سِرسُر ءِ ھالانی درگیجگ ءَ چیرڈاھی سک پکار انت کہ تو دژمن ءِ سر ءَ ایمنی ءَ ھبکھیں اُرُشاں بُنگیج کُت بکن ئے۔ چوناھیگا اگاں زیردستیں راج ءِ لس مھلوک ءِ تہ ءَ راجی گلامی ءِ مارشت ھست انت گُڑا چیرجنگولاں چیرڈاھی برجاہ دارگ ءُ دژمن ءِ سر ءَ ھبکھیں اُرشانی کنگ سَک آسان بیت ءُ چریشی ءَ دژمن وت ءَ را وت درآمدیگے زان ایت ءُ زیت پْروش وارت پمیشکا باید اِنت گُلامیں راج ءَ وتی گلامی ءِ مارشت ءُ راجی آجوئی جُنز ءِ بابت ءَ سرپدی اَلمی اِنت۔
 
گوں راج ءَ ھمگرنچی: ماں چیرجنگی جُنز ءَ گوں راج ءِ لس مھلوک ءَ نزیکی ءُ رھوت دارگ سَک زلوری انت، بزاں گوں راج ءَ نزیکی ءُ ھمدرد بوُگ راجی چیرجنگیں جُنز ءِ زِرد(دل) انت۔ اگاں دژمن راج ءِ سر ءَ زُلم ءُ زوراکی کنت گُڑا باید انت کہ راجی چیرجنگول گوں آئی ءَ رھوت بہ دار اَنت گُڑا دلجمی ءَ بزان کہ راجی جُھد سد در سد سوبین بیت چی ءَ کہ چہ ھمے زیردستیں مھلوک ءَ ترا ھبکھیں اُرُشانی آسر کنگ ءَ پناہ رس ایت، سپر ءِ ساھت ءَ ترا نگن ءُ ورگے دے انت، چہ دژمن ءَ چیرڈاھی، زری کُمک، سامان ءُ ورناھیں باسکانی ماں جنگ ءَ ھوار بیگ دْراہ چہ لس مھلوک ءَ کیت۔ ھمے لس مھلوک چیرجنگولانی ھک ءَ زھرشانی ءِ روانکاں کش انت ءُ راج ءِ تہ ءَ راجی جُھد ءِ سرپدی ءُ آگاھی یے ودی کن انت۔ وھدیکہ راج ءِ لس مھلوک ءَ راجی آشوب ءُ راجی مارشتانی سما بیت ءُ راجی جُنز ءِ گیشتر آگاھی یے ودی بوت گُڑا بزاں تئی جُھد شریں نیمگے ءَ روگ ءَ اَنت ءُ تو سوبین بہ ئے۔

اگاں راج چہ راجی جنگولاں دلپروش بیتگ گُڑا اے جُھد یک پَکّیں بے سوبی یے جوڑ بیت۔ گُڑا باید انت کہ چیرجنگول وتی راج ءَ رھوت بہ دار ایت ءُ بلے ھمے ھیالداری ھم بکنت کہ ھمے رھوت دژمن ءِ گوشاں ھلوت مہ بنت کہ چریشی ءَ راج ءِ ھمکاریں مھلوک تکانسری ءُ اندوھانی آماچ بنت بزاں راجی چیرجنگول لس مھلوک ءَ ھچبر وتی ھلاپ ءَ مہ کنت۔
چیرجنگولیں گل ءُ آئی ءِ باسکانی اولی زمہ وار ھمیش بہ بیت کہ چہ زورانسر ءِ بندیگاھاں لٹ شاپ وارتگیں مردماں وتی چیرجنگولی گل ءَ ھوار کنائین اَنت۔ دومی ھما راج ءِ ورنا کہ راجی چیرجنگولانی کُمک ءَ کنگ ءَ انت آیانی رازاں ھچ جاہ پاشک مہ کن انت بزاں وتی جِند ءِ باسکاں ھم سما مہ بیت چی ءَ کہ گوں چوشیں کنوگیاں راج ءِ مھلوک چہ راجی جنگولاں بیزار بنت ءُ وتی راجی جُھد ءَ دلپروش بنت۔
 
تْراکانی تُرس ءُ بیم ءِ کارمرزی: چیرجنگ ءَ دژمن ءِ شھرانی تہ ءَ دژمن ءِ بلاھیں ترامگیجانی سر ءَ بمب تْراک کارمرز اَلم بہ بنت کہ تئی جُھد ءُ تئی جیڑہ میان اُستمانی رسانکدر ءُ جھان ءِ مُلکانی دیم ءَ بئیت چریشی ءَ دژمن ءِ راج وتی سرکار ءَ تْراکانی سوب ءَ ھم جُست بہ کنت۔ البت بلاھیں پائدگ ئِے وَ ایش انت کہ چَہ چوشیں تْراکاں دژمن ءِ دژمناں تئی بامردی ءِ سما بیت ءُ گُڑا توری زری، توری جنگی سامان ءُ ازباب یا دگہ کُمکے تئی چیرجنگیں جُھد ءَ بیت تئی ھر وڑیں کُمک ءَ کیت ءُ ساڑی بیت انچوشکہ ماں چیرجنگ ءَ ڈن مُلکی کُمک سَک زلوری انت۔ درور، میان اُستمانی ڈِپلومیسی ءِ دستورے کہ دژمن ءِ دژمن منی دوست اِنت(اینمی آپ دی اینمی از مائی پرینڈ) ءُ بلاھیں پائدگ ایش انت ئِے کہ چیرجنگ ءِ باسک ءُ راج ءِ تہ ءَ ھاٹیگے ودی بیت۔ تئی چَپیں گَل بے وانک بنت۔ چوشیں بمب ترکائی ءَ ماں دژمنیں مُلک ءَ میان اُستمانی ڈنی واپار(پوران انویسٹمنٹ) نئیت، دژمنیں مُلک ءَ بے پوریاگِری یے ودی بیت ءُ جاور ئِے نگیگ بنت۔ 

بلے دلگوش بِہ بَہ ایں کہ دژمن ءِ سر ءَ ھمے بمب تْراکائی ءَ تئی جِند ءِ ایردستیں شھرانی تہ ءَ مہ بنت کہ چریں تْرکانی زَد ءَ تئی راج ءِ بزگیں لھس مھلوک ءَ بیرانی یے بیت ءُ راج ءِ تہ ءَ تئی ھلاپ ءَ زھرے ودی بیت پرچا کہ یک راجدوستین ءُ آجوئی لوٹوکیں جنگی گلے ءَ تھنا زورگریں دُژمن ءَ پْروش وَ نہ دیگی اِنت بلکیں آئی ءَ وتی راج ءِ تہ ءَ یکمُشتی ءُ تپاکی یے ھم ودی کنگی اِنت کہ راج ءِ لس مھلوک راجی آجوئی ءِ جُھد ءَ چیرجنگولانی ھمکار ءُ کُمکّار بہ بنت۔ اے رِدی ءِ مستریں درور 1979-89 ءَ سوت روس ءِ ھلاپ ءَ پاکستان، سھودی اَرب ءُ امریکہ ءِ کاسگ چٹّیں مجاھدین ءُ پد ءَ 1994-2022 ءَ اوگان تالبان اَنت کہ اے دوئیں گالاں ماں وتی چیرجنگاں بزگیں اوگان کُشارینت ءُ تباہ کُتگ اَنت چیریشی ءَ اوگان راج ءِ تہ ءَ تپاکی ءُ یکمُشتی یے ودی نہ کُتگ پمیشکا داں روچ مرچیگ ءَ اوگان مھلوک ایشاں نپرت کن اَنت چمیشکا اوگانستان ءِ تہ ءَ ایمنی ءُ دیمروئی نہ بوگ ءَ اَنت بزاں اے وڑیں جنگی اُرش ءُ بم تراکائی دژمن ءِ جِند ءِ شھرانی تہ ءَ آئی ءِ ترامگیجانی سر ءَ بہ بنت کہ دُژمنیں ترامگیج ءِ باسکاں بیرانی بیت۔ ھیالداری بیت کہ اگاں دژمن ءِ بے گناھیں لس مھلوک چہ تْراکاں کُشگ بوت اَنت گُڑا میان اُستمانی راجانی تہ ءَ ترا بد چمّاں چارگ بیت ءُ تئی لابی ابرمی نزور تر ایت۔

روان اِنت۔۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ ھند چہ پٹھان کھور ءَ دو ورنائیں نودربر ءُ چہ ڈنک ءَ ھدامرزی اسلم پنام ءِ بلٹ ءِ زھگ پاکستانی لشکریانی دست ءَ دزگیری ءَ پد بیگواہ کنگ بیتگ اَنت۔

اھوالانی رد ءَ بلوچستان ءِ دمگ کیچ ءِ ھند پٹھان کھور ءَ چہ دو ورنائیں نودربر عباس ء علی ءُ شھداد ء حاجی عظیم گوستگیں بیگاہ ءَ بیگواہ کنگ بیتگ اَنت۔

سربیتگیں اھوالانی رد ءَ دویں ورنایانی سند ھژدہ ءُ نوزدہ سالانی نیام ءَ اِنت۔

ھمے وڑ ءَ چہ ڈنک ءَ ھم پاکستانی پوج ءَ صغیر ء ھدا مرزی مھمد اسلم پنام بلٹ ءِ زھگ پاکستانی پوج ءَ آوار جتگ ءُ برتگ –

یات بہ بیت کیچ ءِ بنجاھی شھر تُربت ءِ ھند ڈنک ءَ چہ ھم دو کسانسالیں نودربر بالاچ ءُ براھمدگ موسی ھم گوستگیں شپ ءَ بیگواہ کنگ بیتگ اَنت۔

بیست چار ساھتانی تہ ءَ کیچ دمگ ءِ تہ ءَ بیگواھی ءِ داں انگت پنچ کیس دیما اتکگ اَنت، دومی نیمگ گوستگیں بیست روچاں چہ شال ءِ ریڈ زون ءِ تہ ءَ گورنر ہاؤس بلوچستان ءِ کارگس ءِ دیم ءَ بیگواھیں مردمانی کھولانی زھرشانی نندانک برجاہ اِنت۔ واکدارانی نیمگ ءَ بیگواھیانی دارگ ءُ کھولاں کمک کنگ ءَ ابید بلوچستان ءَ بیگواھیانی کچے تہ ءَ ھمکروچی رد ءَ گیشی گندگ ءَ پیداک اِنت۔

نبشتانک: رضا ءِ شئے مریدیں اَهد

نبشتہ کار سیپ بلوچ

دی بلوچستان پوسٹ

زندمان ءُ زندگی ءِ تَب مُجّتی مٹ بوْان بوت داں مرچیگ ءُ زیکیں اهد ءِ میان ءَ نام ءِ دپ ءِ بنگپ اِنت ءُ زنگ کپتگیں گلهے ءَ گوں دُچّار اِنت، نزاناں اِے گْونگی بے زبانی بے تواری ءِ زِر کدی مئے پیشگاهانی چولانی چادر ءَ پوش اِیت ، بلے اهد ٹپاس اِتگ، ترس روچ ءِ برمشانی کلہ داراں سوار اِنت ، زندگی ءِ آدینک ءَ روچ ءِ سیرت ماهگر ءَ مان شانتگ ، گْونگی ءِ چاگردانی چُل ءَ هاگاه اِنت ، بلے مدتے پیسر هلکے هست ات، مردمے هست اَت اهدے هست ات-

آ اهد مرید ءِ دیوانگے اَت ، آ اهد روچے اَت دراج کشیں کہ کدی بُڈگی نہ اَت آ اهد ءِ شپاں تھاری ءِ بیھار نیست اَت ، آ اهد ءِ مرید ءَ هرچ هلک ءَ چراگ روچ بُڈی ءَ پیسرا روک کت انت ، آ اهد ءِ پاسبان ءَ چراگانی وٹ کدی ٹمبگ ءَ نیشت اَنت، بلے آ مریدیں اهد ءِ روچ ءِ رولہ ءِ گڈی سیمسران اَت کہ تھاری ءَ مانشان اِت ، آ اهد ءِ پادم ءَ کندیل ٹمبگ ءَ ات داں تھاری ءَ روچ پیلوشت ءُ هلاس کت ، بلے گالانی کسهے کہ اهدے چراگ شپچراگ جوڑ بنت کدی تهاری ءِ آماچ نہ بنت-

آ اهد رضاء اَت شئے مریدیں تیرتیج ءِ تبد کپتگیں سوزناکیں هاک ءَ مرید ءِ رنگیں هنچیں چراگے شهم ات کہ اے چراگ ءَ بلوچستان ءِ سرجمیں تھاری یک زیبائی ءِ رنگ ءُ دروشم ءَ روشناه ءُ آشناه کتگ ات رضاء پہ پدمنتگیں هلک ءُ ویرانگیں جاهاں ، زانت ءِ تبلیگ ءَ رپتگ ات رضاء ءِ شیرکنیں اهد ءَ ما همے مار اِت کہ ما وتی سرزمین ءِ سر ءَ آجو اِنت ، همک لوگ ءُ وانگ جاهاں زانت سر اَت همک کشکاں آشوب جلکشان اَت همک ، وانگ جاهاں الم ءِ زیبائی ءُ گلامی ءِ سانکلانی زمزیل پرشتگ اِت انت، کہ هدا ءَ مئے مرید ، چہ،ویرانگیں هانل ءَ سست ءُ جتا کت-

نوں میتگ شهر ویرانگی ءِ آس ءَ سوچگ ءَ اَنت ، همک کشکانی ، رنگ مٹ ات اَنت، همک شپ ءَ تھاری ءِ برمشاں کندیل بے چڑکاه انت، مردم دراهیں تھاریں شپانی رنگ ءَ سیاه ءُ پیلوشتگ انت زند ءُ زندگی هر دو کْوراس اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ سبی ءَ پوج ءِ سر ءَ بوتگیں اُرش ءِ زمہ واری منّ اِتگ-

بلوچ لبریشن آرمی ءِ جارکش ءَ گْوشتگ کہ سرمچاراں گوستگیں روچ ءَ سبی ءِ دمگ کرمو وڈھ ءَ زورگریں پاکستانی پوج ءِ یک چیک پوسٹ ءِ گوں راکٹ ءُ دگہ مزنیں سلاھاں نشانگ کتگ ءُ دُژمن ءَ را جانی ءُ مالی تاوان ءِ دیمپان کنگ کپتگ-

جارکش ءَ گُشتگ اُرش ءَ پد زورگریں پوج ءَ جتائیں نیمگاں سر ءُ دیم مارٹر آس داتگ، بلے سرمچار جوانیں رپکاں کارمرز کنان ءَ پہ سلامتی وتی مُھریں اوتاکاں سر بوگ ءَ سوبین بوتگ اَنت-

جیئند بلوچ ءَ گُڈ سرءَ گُشتگ کہ اے اُرش زمہ واری ءَ بلوچ لبریشن آرمی منّ اِیت، ءُ وتی مکسد ءَ سربیگ ءَ تاں مئے اُرش برجاہ بنت-

بلوچستان ءِ تیابدپی شھر گوادر ءِ جھمنندیں آرٹسٹ چہ کراچی ءَ گوستگیں شپ ءَ پوج ءَ دزگیر کنگ ءَ پد بیگواہ کرتگ-

گیشیں ھالانی رد ءَ کراچی ءِ دمگ لیاری سرگوات کلری ءَ گوستگیں شپ ءَ لس پوشاکی کارندھاں لوگے ءِ سر ءَ بیڑ برتگ ءُ یک مردمے دزگیر کنگ ءَ پد بیگواہ کرتگ –

بیگواہ کنگ بیتگیں مردم ءِ پجار خدابخش ء ڈاکٹر غفور جھمنند گوادر ءِ نام ءَ زانگ بیتگ –

کھول ءِ رد ءَ شپ ءِ نھنگام ءَ ناشناسیں مردماں لوگ ءَ دور کرتگ ءُ خدابخش ءُ ناشناسیں جاھے ءَ برتگ چریشی ءَ کھول ءَ تھانہ ءَ رھوت کرتگ بلے اے درگت ءَ تھانہ رپورٹ نبشتہ کنگ ءَ نہ اِنت-

دومی نیمگ ءَ مروچی تربت گوکدان ءَ سھب ءَ آوار جنگ بیتگیِ ایس ایس ٹی نزیر اھمد ء ھولدار فتح مھمد یل بیتگ ءُ وتی لوگ ءَ سر بیتگ-

بلوچستان ءِ بنجاھی شھر شال ءَ گورنر کارگس ءِ دیم ءَ زورانسری آوار جنگ بوتگیں مردمانی کھولانی زھرشانی نندانک ءَ مروچی نوزدہ روچ سرجم بوتگ انت، موسم ءِ مٹ بوگ ءَ کھول بازیں نادراھیانی آماچ بوگ ءَ انت-

درنگاز کنوکانی گوشگ اَت کہ گوستگیں سینزدہ سالاں شال پریس کلب ءِ دیم ءَ نشتگ انت کسی ءَ ھم نہ اتکگ ءُ جست نہ کُتگ ءُ ناکہ گوشداروک ءِ بوتگ مروچی ما وت اتکگ ءُ واکدارانی دروازگ ءِ دپ ءَ نشتگ انت ادا ھم وتگڑیں نمائندگ دھ گام نہ جن انت ءُ نیا اَنت-

نندانک ءَ نشتگیں ھزدار ءِ جھمنند سائرہ بلوچ وتی برات ءُ وارس ءِ یل کنگ ءِ لوٹ ءَ کنگ ءَ اِنت – سائرہ بلوچ ءِ گوشگ انت کہ آ ھمے امیت ءَ ادا نشتگ کہ بوت کنت آھانی زھرشانی ءَ چہ آئی برات ءُ وارس یل کنگ بہ بنت ءُ آھاں انساپ بہ رس ایت-

سائرہ بلوچ ءَ گوشتگ کہ آ ھمک زھرشانی ءَ ھمے واست ءَ بھر زوریت تانکہ آئی ءِ توار گوشدارگ بہ بیت- آئی ءِ برات ءُ وارس ءِ زورانسری آوار جنی ءَ پد کھول سک باز ازیت ءِ آماچ اِنت- بیگواھیں برات ءِ زھگ وتی پت ءِ درگت ءَ جست کن انت بلے مئے گور ءَ ھچ پسو نیست- ما پسو ءِ ھاتر ءَ ادا نشتگ اِنت بلے پارلمنٹ ءَ نشتگیں وتگڑیں راجی واکدار کھولاں انساپ دیگ ءَ دلگوشی نہ دئینت-

نندانک ءَ نشتگیں کھولانی گوشگ ات کہ ریاست بیگواھیں مردم ءُ آھانی کھول ءِ گوم ءَ وتی رویش ءَ مٹ بہ کنت ھما کہ زورانسری آوار جنگ ءُ بیگواہ کنگ بوتگ انت آ ھم ھمے ملک ءِ جھمنند اَنت اگاں کسے کُتکار اِنت گڑءَ آمیدگساں آرگ بہ بیت ءُ آئی میار ثابت کنگ بہ بیت-

درنگاز کنوکانی گوشگ اَت کہ ریاست ءَ وتی جوڑ کرتگیں کانود ءُ آمیدگسانی سر ءَ اوست نیست اگاں مئے دوستیگیں مردماں گناہ ءِ کتگ آھانی کتکاری ثابت کنگ بہ بنت- بلے ریاست ءَ بہ چار کہ گوستگیں سَے ھپتگ انت کہ پیریں مات ءُ کسانیں زھگ ادا نشتگ اَنت آھاں نہ گند اَنت پہ آھانی گندگ ءَ نیا اَنت کہ ما ادا چیا نشتگ ایں-

شال ءِ نندانک ءَ متحدہ عرب امارات ءَ زورانسری آوار جنی ءَ پد پاکستان ءِ دست دیگ بوتگیں بیگواھیں بلوچ باسک راشد حسین ءِ مات ھم ھوار اِنت-

راشد حسین ءِ مات ءَ گوشتگ کہ اُمیت ءِ زرتگ ءُ کراچی تاں شال ءَ اتکگ انت کہ ادا نشتگیں راجی نمائندگاں مارشت بہ بیت ءُ مئے پریاتاں گوش بہ دار اَنت- بازیں نادراھی ءُ درد ءُ رنجاں ابید وتی پریات آمیدگس، کمیشنز، پولیس تانہ ءَ برتگ بلے گوشداروک نیست پمشکہ لاچار بوتگ ءُ نون زھرشانی ءَ نشتگاں-

راشد حسین ءِ مات ءَ گوشتگ کہ من نزاناں اے زھرشانیانی بدل چی بنت بلے وتی دوستیگیں مردمانی یل کنائینگ ءِ ھاتر ءَ زھرشانی ءَ برجاہ داراں-

دو ھپتگاں نندانک ءَ نشتگیں بیگواھیں مردمانی کھول سک باز نزور بوتگ انت- نندانک ءَ نشتگیں درنگاز کنوکانی گوشگ اَت کہ موسم ءِ بدل بوگ ءُ ھئورانی سوب ءَ نندانک ءَ نشتگیں بازیں یے جاور نگیگ اِنت بلے ھنگت بیگواھیں مردمانی کھول وتی زھرشانی ءَ برجاہ دارگ لوٹ اَنت-

آئی ءَ گوشتگ نندانک ءَ نشتگیں کھول اولی روچ ءَ وتی لوٹ سرکار ءُ کمیٹیانی دیم ءَ ایر کرتگ اَنت بلے سرکاری نمائندگ گیر سنجیدگ اَنت سرکار ءِ وتگڑیں کمیٹی ءِ جوڑ کنگ ءِ جار جنگ ءِ بزانت بس ریڈ زون ءَ زھرشانی ءِ ھلاس کنگ اِنت-

زانگ بہ بیت اشی ءَ پیش کھول ءَ سَے لوٹ پیش کتگ اَنت کھول ءِ گوشگ انت کہ بیگواھیں مردمانی یل کنگ بلوچستان ءِ واک ءَ نہ انت تاگت وریں ادارہ جنرل باجواہ باور بہ کنائین ایت کہ بیگواھیں مردماں یل کن ایں-