TBP Balochi

ھندوستان ءِ نامداریں کامیڈین راجو شری واستوہ دل ءَ گپتگ ءُ نادراھجاہ ءَ برگ بیتگ۔

ٹی بی پی اھوال پتر ءَ سربیتگیں ھالانی رد ءَ ھندوستان ءِ نامداریں کامیڈین راجو شری واستوہ ھما وھد ءَ دل ءَ گپتگ وھدیکہ جیم ءَ ورزش کنگ ءَ بیتگ، آ ٹریڈ میل ءِ سر ءَ تچگ ءَ بیتگ ھمے وھد ءَ آئی ءِ سینگ ءَ دردے چست بیتگ ءُ آ کپتگ۔

ھندوستانی رسانکدر ءِ رد ءَ راجو شری واستوہ آئی ءِ ٹرینر ءَ دھلی ءِ اے آئی آئی ایم ایس نادراھجاہ ءَ برگ بیتگ کہ اود ءَ نامداریں کامیڈین ءِ جاندراھی برجاہ اِنت۔

زانگ بہ بیت راجو شری واستوہ ھندوستان ءِ نامداریں کامیڈینانی رد ءَ زانگ بیت، آئی ءَ بازیں کامیڈی مراگشاں بھر زیرگ ءَ ھوار تامرانی تہ ءَ ھم وشکندیں کردارانی دروشم ءَ کار کُتگ۔

بلوچستان ءِ باپاری شھر حب چوکی ءُ پنجگور ءَ تیرگواری ءُ دگہ وئیلانی تہءَ زھگے ءَ ھوار چار مردم بیران بیتگ اَنت۔

اھوالانی ردءَ گوستگیں روچ ءَ حب چوکی ءِ ھند پیرکس دگ شیرانی فارم ہاؤس ءِ نزیک ءَ تیرگواری ءِ وئیل ءَ نوزدہ سالی محمد حسن ء عبدالقادر نامی مردمے بیران بیتگ وھدیکہ حب چوکی ءِ ھند امیر آباد ءَ یک لوگے ءَ چہ یک زھگے ءِ لاش دزکپتگ۔

دوھیں لاش حب نادراھجاہ ءَ برگ بیتگ اَنت کہ اود ءَ المی کاراں پد لاش کھولاں دیگ بیتگ اَنت۔

ھمے پئیم ءَ وندر رانا بھٹ ءِ نزیک گوستگیں روچءَ ھار ءِ آپانی تہءَ یک مردمے بڈتگ ءُ بیران بیتگ، بیران بیتگیں مردمے لاش چہ آپ ءَ کَشگ ءُ نادراھجاہ ءَ سرکنگ بیتگ۔

ایدھی ءِ اھوالانی ردءَ ھاری آپ ءِ تہءَ بڈوک ءُ بیران بیوکیں مردمے پجار داں انگت نہ بیتگ۔

دومی نیمگ ءَ چہ پنجگور ءَ اھوال اِنت کہ گوستگیں شپ ءَ پنجگور ءِ نزیک ءِ ھند وش آپ سریکوران ءِ جاہ ءَ فرزاد ء سہراب جھمنند واشک حال پنجگور وتی لوگے ءِ کمپان ءَ نشتگ بیتگ کہ سلاہ بندیں مردماں نشانگ کُتگ ءُ کُشتگ۔

داں انگت اے وئیل ءِ سوب زانگ نہ بیتگ اَنت۔

مرحوم مراد جان ناک آؤٹ کرکٹ ٹورنمنٹ شے کھن ءِ گوستگیں بیگاہ ءَ فائنل گوازی کنگ بوتگ، فائنل گوازی ءَ شھید دودا جان ٹیم ءَ جوانی ءَ گوازی کنان ءَ نُھ رناں گوازی کٹ اِتگ ءُ باج بُرتگ –

گوستگیں بیگاہ ءَ بوتگیں فائنل گوازی رند تگران ءُ شھید دودا جان ٹیم میان ءَ بوتگ کہ شھید دودا جان ءِ ٹیم ءَ ٹاس کٹ اِتگ ءُ اولسر ءَ بیٹنگ کنگ ءِ پیسلہ کُتگ – شھید دودا جان ٹیم ءِ لیبیاں جوانی ءَ گوازی کنان ءَ چاردہ اوورانی تہ ءَ نود ھشت رن ءِ ٹارگٹ ایر کُتگ کہ رند تگران ءِ لیبیاں ٹارگٹ پروشت نہ کُتگ ءُ بے سوب بوتگ انت – شھید دودا جان ٹیم ءِ نیمگ ءَ درساں گیش ماجد ءَ چِل ءُ ھشت ءُ شاھد ءَ سینزدہ رن جوڈ کرتگ انت وھدیکہ مزار ءَ سَے ءُ اُمر ءَ یک وکٹ ءِ گپتگ –

رند تگران ءِ نیمگ ءَ دوازدہ اوورانی تہ ءَ ھشتاد ءُ نُھ رن جوڈ کنگ بوتگ ءُ آل آؤٹ بوتگ انت – کہ آھانی تہ ءَ درساں گیش نور اللہ ءَ بیست ءُ ھپت ءُ اُمر ءَ ھبدہ رن جوڈ کرتگ انت وھدیکہ مصدق ءَ سَے ءُ فھد ولی دو وکٹ گپتگ انت – ھمے وڈ شھید دودا جان ٹیم وتی جند ءِ گوازی پٹ باج بُرتگ ءُ ونر کپ دست گپتگ –

گوستگیں بیگاہ ءِ شرتریں لیبی ماجد رشید بوتگ کہ آئی ءَ چہ گچینی مھماناں داد گپتگ –

شھید دودا جان ٹیم ءَ وتی آؤکیں مھمان رنر ءُ ونر ٹیم دلبڈی داتگ انت – ٹورنمنٹ ءَ اتکگیں مھمان ءُ ٹورنمنٹ ءَ بھر زورکیں لیبیانی منت گپتگ – رنر ءُ ونر ٹیم ءِ کپٹناں گچینی مھمان اے سی اکیل دست ءَ کپ دست گپتگ انت –

زانگ بہ اے ٹورنمنٹ ھبدہ جون ءَ بنام ءِ مرحوم واجہ مراد جان ءِ نام ءَ شھید دودا جان ٹیم ءِ چیردستی ءَ شے کھن ءَ ایر کنگ بوتگ کہ اشی ءِ تہ ءَ سرجمی ءَ چِل ٹیماں بھر زرتگ کہ آھانی تہ ءَ شھید دودا جان ءُ رند تگران ءَ جوانی ءَ گوازی کنان ءَ وت ءَ فائنل ءَ سر کتگ ءُ مروچی فائنل گوازی ءَ شھید دودا جان ءَ باج بُرتگ –

اے ٹورنمنٹ ءِ شرتریں لیبی ماجد رشید، شرتریں بالر امر رحیم، شرتریں بیٹسمنین مراد حاصل، شرتریں وکٹ کیپر وقار محمد جان ءُ شرتریں پیلڈر زھیر نصرت بوتگ انت کہ آھاں چہ گچینی مھماناں داد گپتگ –

بلوچستان ءِ تیابدپی شھر چہ گوادر ءَ زورانسری آوار جنی ءِ بگیری ءَ میتگ ءِ مردماں زھرشانی ءَ دگ بند کتگ-

سربوتگیں ھالانی رِد ءَ گوادر مجاھد وارڈ ءَ سیادی داروکیں حلیم محمد رفیق نامیں ورنا پُٹبالر آوار جنگ ءَ پد پاکستانی پوج ءَ بیگواہ کتگ، وئیل ءِ بگیری ءَ گوادر ءِ مھلوک ءَ پدی زر ءَ زھرشانی کتگ چریشی پد ورناہ یل کنگ بیتگ-

زانگ بہ بیت گوستگیں شپ ءَ چہ بگر تاں انّی بلوچستان جتائیں دمگاں چہ نُھ مردم پاکستانی پوج ءِ دست ءَ زورانسری آوار جنی ءِ نشانگ کنگ بوتگ اَنت آوار جنگ ءَ پد بیگواہ بوتگیں پنچ ورناہ آجو بوتگ ءُ وتی لوگاں سر بوتگ اَنت-

گوستگیں شپ ءَ بلوچستان ءِ ضلع کیچ ءَ دو کسانیں سالی ئیں نودربراں ھوار ھشت مردم آوار جنگ بوتگ اَت- چہ کیچ ءَ آوار جنگ ءَ پد بیگواہ بوتگینانی تہ ءَ تربت ڈنک ءَ کسان سالی ئیں نودربر براھمدگ، بالاچ ،کیچ گوکدان ءَ اختر ء ملنگ، احمد ء ملنگ ءُ یک کماشے مردم غلام ء چارشمبے، کیچ پھٹان کھور ءَ آوار جنگ ءَ پد بیگواہ بوتگیں ورناھانی پجّار عباس ء علی، شھداد ء حاجی عظیم، صغیر اسلم ء محمد اسلم ھوار اَنت-

آوار جنگ ءَ پد بیگواہ بوتگیں شاھداد ء حاجی عظیم، عباس ء علی، براھمدگ ء موسیٰ، آئی ءِ برات بالاچ ءُ حلیم محمد رفیق آجو بوتگ اَنت-

بلوچستان ءِ بُنجاھی شھر شال ءَ بیگواھیں مردمانی کھول ءِ گورنر ءُ وزیراعلیٰ گس دیم ءَ نندانک ءَ بیست روچ سرجم بوتگ- بلوچستان ءَ چہ زورانسری آوار جنگ بوتگیں کھول ءِ مزنیں کچے ءَ ساڑی اَنت ءُ انساپ ءِ ودار ءَ اَنت-

نندانک ءَ نشتگیں بیگواھیں مردمانی کھول ءِ گوشگ اِنت کہ بلوچستان ءِ راجدوست پارٹی ھم آیانی واستا توار جوڑ بوگ ءَ نہ اَنت، آیانی سیاسی درشان مدام بلوچ راج ءِ ھستی ءُ شخصیت بوتگ- مروچی بلوچ ءِ پُسگ بیگواہ ءَ اَنت بلے آیاں اینچو پکر نیست اِنت، ھالانکہ دومی نیمگ ءَ صوبائی ھکومت ءِ زمہ واراں اسمبلی فلور سر ءَ مئے جیڑہ ءِ گِشگواری ءَ وتی جاہ مارا سیاسی پارٹی ءِ پلامرزی ءُ آیانی ھمراھداری ءِ بھتام جن اَنت-

آیانی رِد مئے نندانک اے وھد ءَ تاں برجاہ بیت دانکہ مارا شریں وڑے ءَ گوش ندار اَنت ءُ مارا اے باور بہ کنائین اَنت مئے دوستناکاں دروگیں میڑ ءَ نہ کُش اَنت ءُ مئے بیگواھیں مردماں دیم ءَ نیار اَنت، مئے بنداتی روچ ءَ چہ ھمے لوٹ بوتگ اَنت، ما وتی ھکیں لوٹانی منّگ ءَ تاں زھرشانی برجاہ دار ایں ءُ ھمراھی ءَ زھرشانی ءِ سرجمیں کاراں کن ایں-

زانگ بہ بیت مھرم الحرام ءِ پھازوکی نام سر ءَ مروچی سیمی روچ اِنت موبائل فون نیٹورک ھم بند کتگ اَنت- نندانک ءَ ھوار گیشتریں کھول تبیت ھراب بیگ ءَ اَنت، موسم تُرندی ءُ بیست روچاں چہ یکشلہ ڈن ءَ نشتگ اَنت ءُ ھرابیں ورگ ءِ سبب ءَ چہ آیاں سک تکانسری ءِ دیمپانی اِنت-

اے کھولاں سالاں چہ زورانسری آوار جنگ بوتگیں کھولانی زندگی ءِ درگت ءَ ترس ھست اِنت، زیارت وئیل ءَ پد اے تُرس گوں تُرندی ءَ ودی بوتگ ءُ کھول وتی لوگاں نشت نہ کن اَنت-

مکران شھدربر ءَ آرگ بوتگیں نوکیں وائس چانسلر ءِ بگیری ءَ نودربرانی زھرشانی برجاہ، ھمے درگت ءَ شھدربرجاہ ءِ نودربراں سیاسی ءُ چاگردی گلانی ھمراھی ءَ پریس کانفرنس کتگ –

پنجگور پریس کلب ءَ اھوالکاراں گوں تران کنان ءَ نودربرانی گوشگ ات کہ مارا چِل روچ انت کہ مکران شھدربرجاہ بند کتگ وائس چانسلر مالک ترین بگیری ءَ زھرشانی کنگ ءَ انت کہ اے مرد شریں مردمے نہ انت اشی ءِ گوست ءِ کرد جوان نہ انت کہ آئی ءِ سر ءَ بلوچستان شھدربرجاہ ءِ اسکینڈل بھتام ھم ھست انت ءُ لورلائی شھدربرجاہ ءَ ھمے ھرابیانی سوب ءَ سَے ماہ ءَ پد در کنگ بوتگ ءُ ایچ ای سی ءِ نیمگ ءَ سَے سال ءِ شزا دیگ بوتگ – اے وائس چانسلر سر ءَ پلیجیرزم کیس ھست انت اے وڑیں مردمے ءِ مکران شھدربرجاہ ءَ وائس چانسلر کنگ ءَ ما ھچ وڑ نہ منّ ایں –

نودربرانی گوشگ ات کہ ما زھرشانی میان ءَ شھدربرجاہ سرجمی ءَ بند کرتگ ءُ اشی ءِ ھمراھی ءَ پنجگور ءِ درسیں نودربرانی ھمراھی ءَ شھدربرجاہ ءَ بگر تاں ڈپٹی کمشنر کارگس ءَ زھرشانی روانک ءِ ھم کش اِتگ ءُ یک روچ ءَ سرجمیں پنجگور ءَ تھتگ بند ھرتال ءِ جار جتگ کہ پنجگور سرجم بند بوتگ پد ءَ رند ءَ وھد وھد سر ءَ پریس کانفرنس کتگ ءُ سرجمیں بلوچستان ءِ نودربر دگہ تکاں سیادی داروکیں مردم وتی جیڑہ ءِ درگت ءَ سرپد کتگ انت –

نودربرانی گوشگ ات کہ ما اے گپ ءَ پدر کنگ لوٹیں اے وائس چانسلر ءِ درکنگ ءِ لوٹ بس مکران شھدربرجاہ نودربرانی نہ انت بلکنہ اشی ءِ تہ ءَ ھژدہ دگہ اسٹیک ہولڈرزیں گل کہ آھانی تہ ءَ نودربر ءُ سیاسی گل ھوار انت –

مکران شھدربرجاہ ءِ نودربرانی گوشگ ات کہ گوستگیں چِل روچ انت کہ نودربرانی وانگ ءُ زانگ یک مردمے انا پرستی ءِ سوب ءَ اثرمند انت مروچی ما نودربراں ھوار دگہ اسٹیک ہولڈرزانی ھمراھی ءَ ھمے پیسلہ کُتگ کہ بلوچستان شھدربرجاہ ءَ دھ اگست ءَ وانگ بندات کنگ بنت ءُ زانشتی کار دیم ءَ برگ بنت بلے اے وائس چانسلر ءِ بگیری ءَ زھرشانی ترندی ءَ گوں برجاہ بنت ءُ شھدربرجاہ ءِ نودربر شھدربرجاہ ءِ تہ ءَ بنجل جن انت ءُ زھرشانی ءَ نند انت –

آھانی گوشگ ات کہ مئے زھرشانی تاں ھما وھد ءَ برجاہ مانیت تانکہ عبدالمالک ترین ءِ جاہ ءَ دگہ شریں کرد ءِ واھندیں وائس چانسلر ءِ آرگ بیت –

نودربراں دیمتر ءَ گوشتگ کہ اے میان ءَ اگاں عبدالمالک ترین ءَ مکران شھدربر جاہ ءَ آیگ ءِ جھد کُت گڈا ما شھدربرجاہ ءَ سرجمی ءَ بند کن ایں ءُ پنجگور ءِ درسیں اسٹیک ہولڈرزانی ھمراھی ءَ پنجگور ءَ زھرشانی کن ایں اے جاور ھالانی تہ ءَ ھرچی کہ بیت آئی ءِ زمہ دار مالک ترین انت ءُ اشی ءِ ھمراھی ءَ ما شھدربرجاہ ءِ واکداراں گوں دزبندی کن ایں کہ دیم ھپتگ ءَ لیپ ٹاپ بھر بہ کن انت –

شال: بلوچ راجی زْرمبشت (بی این ایم) ءَ پاکستان ءِ جوڑ بیگ ءِ روچ چاردہ اگست ’سیاھیں روچ‘ لیک اتگ ءُ ھمے روچ ءِ بارہ ءَ ماں بلوچستان ءَ دیوال نبیسی کرتگ ءُ بلوچ راج ءِ سرپدی ءُ سکین ءَ پنتاکے ھم شنگ کرتگ۔

کیچ ءُ گواد ھنکین ءِ بازیں ھنداں چہ بی این ایم ءِ نیمگ ءَ دیوال نبیسی کنگ بیتگ۔کیچ ءِ ھند بالیچہ ءُ تمپ ءِ سرجمیں بازار ءَ بی این ایم ءِ باسکاں پاکستان ءِ بگیری ءَ دیوال نبیسی کرتگ ءُ اے کلوہ تالان کرتگ کہ بلوچ پاکستان ءَ نہ من اَنت ءُ پاکستان ءِ جوڑ بیگ ءِ روچ ءَ پہ بلوچ راج ءَ سیاھیں روچے زان اَنت۔

بالیچہ ءَ ابید کیچ ءِ ھند تربت،چاہ سر ، ڈنک ، گوکدان ، ناسر آباد، کلاھو، گومازی، بلیدہ، الندور، میناز، کور ءِ پشت، ڈمبانی ءُ گوادر ھنکین ءِ شھرستان پسنی ءِ میتگ ببرشور ءَ ھم چہ بی این ایم ءِ نیمگ ءَ چاردہ اگست سیاھیں روچ ءِ بارہ ءَ دیوال نبیسی کنگ بیتگ۔

بی این ایم ءَ چاردہ اگست ءِ دم ءُ درگت ءَ ’چاردہ اگست : گْوستانک ءِ سیاھیں در‘ ءِ نام ءَ پنتاکے ھم شنگ کرتگ۔ اے پنتاک دوشی ماں کزدار ھنکین ءِ ھند گریشگ ءِ میتگ سریج،گری،چیل، گواراست،تاپکو،جاروجی،زباد،پتنکنری،بدْرنگ،کوچہ،سھردپ ، سھر کرودی ءُ گونی ءَ شنگ کنگ بیتگ۔باز جاھاں پنتاک دیوالانی سر ءَ ھم لیچینگ بیتگ۔

اے بارہ ءَ بی این ایم ءِ جارکش کازی ریھان ءَ گْوشتگ کہ گوں بی این ایم ءِ لیکہ ءَ بندوکیں درسیں دوزواہ ءُ باسک کڈن کنگ بہ اَنت کہ آ وتی گیگ ءُ گْوم ءَ ’چاردہ اگست سیاھیں روچ‘ ءَ پاکستان ءَ وتی پسو ءَ الم بہ دئے اَنت۔کسے اگاں یک دیوالے ءِ سر ءَ ھم پاکستان ءِ بگیری ءَ ءُ بلوچ راجی زْرمبشت ءِ پلہ مرزی ءَ گپے نبشتہ کنت بزاں آئی ءَ وتی بھر ءِ کار کرتگ۔ھمے پیم بی این ایم ءِ پنتاک ءَ ھم گیش ءَ گیش تالان کن اِت داں مئے چک چکے بہ زانت کہ پاکستان مئے دژمن اِنت ، مئے گلزمین ئِے پل اتگ ءُ مئے سر ءَ زوراکی کنگ ءَ اِنت۔مارا اے زوراکی ءِ دیم گوں وتی راجی وس ءُ واک ءَ دارگی اِنت ءُ بلوچستان ءِ آجوئی ءِ زْرمبشت سوبمند کنگی اِنت۔

سربوتگیں ھالانی رِد ءَ بلوچستان ءِ دمگ کیچ ءَ کماشے ءَ ھوار دگہ سَے مردم زورانسری آوار جنگ ءُ بیگواہ کنگ بوتگ انت –

گیشیں ھالانی رِد ءَ گوستگیں شپ ءَ بلوچستان ءِ دمگ کیچ ءَ جتا جتائیں ھنداں دو کسانسالیں نودربراں ھوار ھشت مردم زورانسری آوار جنگ ءُ بیگواہ کنگ بوتگ انت –

زورانسری آوار جنی ءِ اولی وئیل تربت ءِ دمگ ڈنک ءَ شپ ءِ ادار یانزدہ ءَ دیم ءَ اتکگ کہ پیراملٹری پوج ءَ موسی نامیں مردمے ءِ گس ءَ بیڑ برتگ ءُ آئی ءِ دو کسانیں زھگ بالاچ ءُ براھمدگ زورانسری آوار جتگ ءُ گوں وت برتگ انت – پد ءَ سربوتگیں ھالانی رِد ءَ ھردو نودربر یل بوتگ ءُ وتی گس ءَ سر بوتگ انت –

اھوالکار ءِ رِد ءَ پاکستانی پوج ءَ گوستگیں شپ ءَ کیچ ءِ دمگ گوکدان ءَ ھم بیڑ برتگ ءُ کماشے ءَ ھوار سَے مردم آوار جتگ ءُ گوں وت برتگ انت کہ آھانی پجار کماش گلام ء چارشمبے، اختر ء ملنگ ءُ احمد ء ملنگ ءِ ناماں چہ بوتگ انت –

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ انت گوستگیں روچ ءَ بلوچستان ءِ بنجاھی شھر شال ءَ جوئنٹ دگ ءَ پاکستانی پوج ءَ اُمر نامیں مردمے آوار جتگ ءُ بیگواہ کتگ ھمے وڑ کراچی ءَ گوادر ءِ جھمنندیں نودربر ءِ پھازگی لشکر ءَ بیگواہ کتگ کہ انگت دیم ءَ آرگ نہ بوتگ انت –

کراچی ءَ زورانسری آوار جنگ بوتگیں مردم ءِ پجار خدابخش ء ڈاکٹر غفور جھمنند گوادر ءِ نام ءَ بوتگ کہ کراچی ءِ دمگ سرگوات کلری ءَ چہ جند ءِ گس ءَ آوار جنگ بوتگ –

چاگردی رسانکدراں بلوچستان ءَ پوج ءِ دست ءَ مردمانی آوار جنی ءِ بگیری ءَ بلوچ پھناتاں بندوکیں مردم زھر ءِ درشان ءَ کنگ ءَ اَنت –

آیانی گوشگ اِنت بلوچستان ءَ بیگواہ کنگ بیتگیں مردمانی درگت ءَ پاکستان ءِ پوج ھما کچ ءَ کنگ ءَ اِنت بلے انگت ءَ اود ءَ بندوکیں رسانکدر گُنگی ءَ نیشتگ ءُ بس بلوچانی آوار جنی ءَ چارگ ءَ اَنت-

دومی نیمگ ءَ شال ءَ بیگواھیں مردمانی کھول گوستگیں بیست روچاں وتی مردمانی یل کنائینگ ءُ جوڈیشل کمیشن ءِ برجم دارگ ءَ نیشتگ اَنت-

شال ءَ اے مردماں ھما وھد ءَ وتی زھرشانی بنجل برجم کتگ کہ زیارت ءَ یازدہ مردم پوج ءَ دروگیں میڑ ءِ نام ءَ جتگ ءُ چگل داتگ ات اَنت –

کھولانی ترس ءِ گمان اِنت کہ مئے بیگواھیں بندیگیں مردم ھم ھمے وڑ ءَ جنگ ءُ چگل دیگ ءُ پد ءَ دروگیں میڑ ءِ نام دیگ بنت –

آیانی گوشگ اِنت کہ سرکاری واکدار دانکہ مارا دلجمیں گپ ءُ جوڈیشل ءِ جوڑ نہ کن اَنت ما وتی زھر ءِ درشان ءَ برجاہ داریں –