TBP Balochi

بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں ھزدار ءَ آزادی چار راہ ءِ سر ءَ زروگیریں ریاست ءِ وتگڑیں آجوئی ءِ شاتکامی ءِ ھاتر ءَ جتگیں اسٹال ءِ سر ءَ دزبمب اُرش ءِ کُتگ ءُ تباہ کتگ –

جارکش ءَ گوشتگ کہ وتگڑیں آجوئی ءِ شاتکامی ءِ نام ءَ بلوچستان ءِ بازیں دمگاں دژمن پوج ءُ چیریں ادارھانی کارمند مراگش اڈ دیگ انت کہ آھانی مول مراد راستی ءِ چیر دیگ ءُ دنیا باور کنائینگے بے سوبیں کوشست یے کہ بلوچ پاکستان ءِ زورگیری ءَ من ایت ءُ زورگیر ءِ راجی روچاں ھوار انت – اے اسٹال ھم پوج ءِ چیردستی ءَ ھمے مکسد ءِ ھاتر ءَ جنگ بوتگ –

آئی ءَ دیمتر ءَ گوشتگ کہ بلوچ لبریشن آرمی ءَ اے گپ پیش ءَ پدر کُتگ کہ راج اے وڈیں مردم ءُ مراگشاں دور بہ بنت وھدیکہ گوستگیں روچاں بزاں سِی ءُ یک جولائی ءَ بی ایل اے ءَ وتی شوربندی درشان ءِ تہ ءَ اے گپ جتگ کہ بی ایل اے زورگیریں پوج ءُ آئی ءِ کمکارانی سر ءَ چدوگیشتر ترندیں اُرشاں برجاہ داریت –

گڈسر ءَ جارکش ءَ گوشتگ کہ ھزدار ءِ اسٹال ءِ سر ءَ مزنیں سلاہ کارمرز کنگ نہ بوتگ انت دزبمب اُرش ءِ مول کہ انسانی جاناں کم چہ کم تاوان بہ بیت – بلے ما تچکیں لپزاں گوں مکن کن ایں کہ وتگڑیں پاکستان ءِ آجوئی ءِ شاتکامی مراگشانی سر ءَ ترندتریں اُرش کنگ بنت راج اے وڈیں مراگشاں وت ءَ دور بہ داریت اگاں ناں گڈا بلوچ لبریشن آرمی ھچ وڈیں تاوان زمہ وار نہ انت –

بلوچستان لبریشن فرنٹ ءَ کیچ ءِ ھند شاپک ءَ کوہ ء بارگ ءَ برجاھیں پاکستانی لشکر ءِ پانگِس ءِ سر ءَ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ مئے سرمچاراں نُھ ساچان ( 9 اگست ) ءِ شپ ادار یازدہ ءَ کیچ ءِ ھند شاپک ءَ کوہ ء بارگ ءَ برجاھیں پاکستانی لشکر ءِ پانگِس گوں نوکیں سِلاھاں نِشانگ کُرتگ، اُرش ءِ آسر ءَ دُژمِن ءَ را جانی ءُ مالی تاوان رس اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ گُڈّسر ءَ گْوشتگ کہ مئے اے تْرندناکیں اُرش دانکہ بلوچستان ءِ آجوئی ءَ گوں تْرندی ءَ برجاہ بَہ اَنت۔

بلوچ یکجھتی کمیٹی ءَ شال ءَ نندانک ءَ نشتگیِ بیگواھیں مردمانی درگت ءَ رسانکدراں وتی شنگ کرتگیں درشان ءِ تہ ءَ گوشتگ کہ یک نیمگ ءِ بیگواھیں مردمانی کھولاں انت کہ بیست ءُ یک روچ انت گورنر کارگس ءِ دپ ءَ نندانک ءِ جتگ ءُ نشتگ انت ءُ دومی نیمگ ءَ سوبائی سرکار کہ آئی ءِ گوشان مورے نہ وارت سُک ءُ نُک انت – وھدیکہ وتگڑیں کمیشن ءَ دوھپتگ ءَ گیش انت کہ تنی وھدی زیارت وئیل ءِ درگت ءَ ھچ وڈیں گامگیج زورگ ءَ نہ انت –

درشان ءِ تہ ءَ گوشگ بوتگ سرکار سنجیدگ بہ بیت ءُ بیگواھیں مردمانی کھولانی لوٹاں بہ منّ ایت ءُ آھانی گیشگیوری ءِ جھد ءَ بہ کنت، اگاں سرکار ءَ وتی اختیار ھم وت ءَ گون نہ انت گڈا آ ھم نندانک ءَ بھر بہ زور انت کھولانی ھمراھی ءَ چہ ریاست ءَ انساپ بہ لوٹ انت –

جارکش ءَ گوشتگ کہ پیش ءَ آوار جنگ بوتگیں مردمانی یل کنگ ءَ ابید کیچ، گوادر ءُ کراچی ءَ دگہ نُھ مردم زورانسری آوار جنگ ءُ بیگواہ کنگ بوتگ انت – مھلوک ءَ انساپ دیگ استان ءِ زمہ واری انت بلے بدکسمتی ءَ بلوچستان ءَ مھلوک ءِ انسانی ھکانی پچگرگ استان ءَ وتی زمہ واری سمجتگ ھمے ھاتر ءَ ھمک روچ یکے ناں یکے ءِ انسانی ھک پچگرگ بنت –

جارکش ءَ گوشتگ بیگواھیں مردمانی کھول جھد ءُ کوشستان مان نیارگ ءُ چدوگیشتر مردماں بیگواہ کنگ ءُ نندانک ءَ نشتگیں مردمانی لوٹاں نہ منّگ سوبائی سرکار ءُ ریاستی ادارھانی بے سوبی انت – اگان بیگواھیں مردمانی لوٹ منّگ نہ بوتاں آؤکیں روچاں اے جھد شال ءَ ڈن سرجمین بلوچستان ءَ تالان کنگ بیت اِنت – سرکار ءُ ریاستی ادارہ سنجیدگ بہ بنت ءُ بیگواھیں مردمانی کھولانی لوٹاں بہ منّ انت –

بلوچستان ءِ باپاری شھر ھب ءَ ھئوراں پد مکسک ءُ سُنٹواں مھلوک سر ءَ زرتگ – چہ ھب ءِ باپاری دمگ یوسف کالونی، نمرہ کالونی، مدینہ کالونی زھری اسٹریٹ ءُ دگہ دمگاں آپانی تہ ءَ کیمیکل ءِ ھوار بوگ ءَ سنٹو ءُ مکسک بے کساس اتکگ انت –

دمگی مردمانی گوشگ انت کہ میونسپل کارپوریشن ءَ ناکہ آپ درکت ءُ ناکہ دمک ءُ درانی سپائی کتگ ءُ جراسیم کُشیں اسپرے درگت ءَ تنی وھدی ھچ وڑیں گامگیج زورگ نہ بوتگ –

دمگی مردماں بھتام جتگ ءُ گوشتگ کہ لھتے مردم اکس کش انت ءُ وتی واجھاں ھمے رپورٹ پیش دار انت دراہ شر انت –

اھوالکار ءِ رِد ءَ ھب ءَ ملیریا نادراھی ءِ کیس رپورٹ بوگ ءَ انت وھدیکہ تپ ءُ کلگ چمانی نادراہ ھم گیش بوان انت ملیریا گرءُ دار کنوکیں سوبائی کوارڈینیٹر ءَ سال گوزگ انت بس گرگ ءُ ورگ ءَ انت ملیریا گرءُ دار ءِ ھاتر ءَ ناکہ اسپرے جنگ بوگ ءَ انت ءُ ناکہ بشانگ ءُ دگہ پھریزگی چیز دیگ بوگ ءَ انت سالانی سال گوزگ انت کہ ملیریا گرءُدار کنوک کاگزی جوڈ بوتگ انت پہ مھلوک ءَ ھچ ءِ نہ کُتگ –

ھب ءِ جھمنندیں مردماں چہ لسبیلہ ءِ ڈپٹی کمشنر، اسسٹنٹ کمشنر ءَ گوں لوٹ کتگ ءُ گوشتگ کہ اے دمگ زوتاں زوت جراثیم کشُیں اسپرے جنگ بہ بنت ءُ ملیریا گر ءُ دار کنوک جست کنگ بہ بنت – دمگی مردماں بشانگ ءُ دگہ پھازگی سامان دیگ بہ بنت – سول ھسپتال جام غلام قادر ءَ دمگی مردمانی ھاتر ءَ پہ ایمرجنی ءَ الاج ءِ ھاتر ءَ درمان دیگ بہ بیت ءَ اتائی ڈاکٹر در کنگ بہ بنت –

بلوچ اسٹوڈنٹس ایکشن کمیٹی شال ھنکین ءِ نیمگ ءَ “نوشت تاک” ءِ سر ءَ ھیلکاری ءِ سرکلے ھنکینی کارمستر اُزیر بلوچ ءِ پاگواجھی ءَ برجم دارگ بوتگ۔

ھیلکاری سرکل ءَ نیشنل ازم، ریسزم ءُ پاشزم سر ءَ شال ھنکین ءِ ھیلکاری کمیٹی باسکاں تران کتگ –

ھیلکاری سرکل ءَ آھاں تران کنان ءَ گُوشت راجدوستی یک سیاسی لیکہ بزاں (political Ideology) یے- سیاسی لبزانک ءِ رِد ءَ راجدوستی ءِ لیکہ ءِ بنیاد کالونیل ازم ءِ زمانگ ءِ بندات ءَ گون بیت، مارٹن ایکسمن ءِ گُشگ اِنت کہ گْوَستگیں دو کرن ءِ میان ءَ راجدوستی یک سیاسی راھبندے ءِ ھساب ءَ سیاست ءِ یک اَژدری ئیں بھرے جوڑ بوتگ آئی ءِ نزّ ءَ راجدوستی یک انچیں تاکتے کہ آئی ءِ مکسد یک راجےءِ نپ ءُ پائدگانی پھریزگ اِنت ءُ آئی ءِ مِنزل راجی آجوئی اِنت۔

بازیں کواسانی رِد ءَ راجدوستی یک یورپی لیکہ یے کہ رند ءَ دنیا ءِ اے دگہ ھند ءُ دمگاں شِنگ بوتگ، ھمے رِد ءَ ھنس کوھن نبشتہ کنت کہ نوکیں راجدوستی ھبدھمی ءُ ھژدھمی کرن ءَ چہ یورپ ءَ ودی بوتگ آئی ءَ نوزدھمی کرن ءَ یورپ ءَ یک زرمبشتے ءِ دروشم زُرتگ ءُ بیستُمی کرن ءَ دُگنیا ءِ یک تاکتورتریں سیاسی فلسفہ یے جوڑ بوتگ کہ دُگنیا ءِ تہ ءَ ھاکمی کنگ ءَ اِنت-

دیمتر ءَ نبشتانک ءِ دومی گالبند “ریسزم” ءِ سر ءَ آھاں ءَ تران کنان ءَ گُوشت کہ نوکیں دُگنیا ءِ جوڑینگ ءَ ریس ءَ یک بُنکی ئیں کِردے پیلو کُتگ ءُ انگت ھم چاگردانی جوڑینگ ءَ ریس ءِ یک مزنیں کِردے، چوشکہ انگت ھم مزنیں کساسے ءَ مھلوک ءِ زِند ءَ سانمند کنگ ءَ اِنت –

ریسزم ءِ لیکہ چہ یورپ ءَ ہما وھد ءَ ودی بوتگ ءُ دیم ءَ اتکگ وھدے کہ زُلم ءُ زوراکی ءَ مزنیں کساسے ءَ مہلوک ءِ نسل کُشی بوتگ، اے ھمے زوراکی ءِ نزامانی سوب اِنت کہ مروچی نوکیں دُگنیا ءَ ریسزم یک پدریں راستی یے جوڑ بوتگ ءُ مئے ھمروچیگیں زِند ءِ بھر اِنت –

ھٹلر ءَ ریسسٹ تھیوری پمیشکا دیم ءَ آؤرتگ اَنت کہ آ یھودیانی نسل کُشی ءَ بہ کنت ءُ آئی ءَ جُست گِرگ ھم مہ بیت۔ ھمے رنگ ءَ انچیں کانود دیم ءَ آؤرتگ کہ سیاہ پوست ءُ اِسپیت پوست چہ یکے دومی ءَ دور ءُ نابرابر دارگ بہ بنت –

آھاں ریسزم ءِ بنزہ ءِ سر ءَ تران کنان ءَ گُوشت کہ کْوھنیں دُگنیا ءَ تپاوت ءِ وانوکیں بازیں سسّاکارانی گُشگ اِنت کہ آ وھد ءَ ریس ءِ لیکہ ءَ گِریک رومن ءُ ایسائی آنی میان ءَ ھچ وجود نہ بوتگ۔ گریکانی رِد ءَ دُگنیا ءَ دودمان ءُ وھشی مردم بوتگ اَنت بلئے اے تپاوت پِت ءُ پیرکی نہ بوتگ اَنت ھما مردم تھزیب یافتہ گُشگ بوتگ اَنت کہ آ شھری اِستان ءَ جہ منند بوتگ ءُ سیاست ءَ بھر اِش زُرتگ ءُ ھما مردم کہ آ چہ شھر ءَ ڈن زِند گْوازینگ ءَ بوتگ اَنت آ وھشی گُشگ بوتگ اَنت –

فریڑرکسن ءِ رِد ءَ ریسزم بیستُمی کرن ءَ وتی گُڈّی سیمسراں سر بوتگ۔ اے ھمے وھد بوتگ کہ ریسسٹ تاکت ءَ آھگ ءَ پد دوار نِزور بوتگ اَنت زرباری امریکہ ءَ سیاہ پوستانی ووٹ ءِ سر ءَ پابندی ءُ سیگریگیشن ءِ کانود ءِ دیم ءَ آھگ ءَ پد افریکی امریکیانی چاگردی مکام جھل کپتگ ءُ آ کم زات ءُ زریات لیکگ بوتگ اَنت۔ اے وھداں رھبند ءِ توک ءَ بدلی آرگ وَ بوتگ کہ اِسپیت پوست ءُ سیاہ پوست برابر اَنت بلئے ایشی ءِ سر ءَ ھچ وڑیں امل کنگ نہ بوتگ –

آھاں گوشتگ کہ پیئرے اینڑرے ریسزم ءَ دو بہر ءِ تہ ءَ گِیشین اِیت۔ اولی ءَ آ “Racism of Inclusion” ءُ دومی ءَ Racism of” Exclusion” ءِ نام دنت اولی ءِ رِد ءَ یک کمتریں ریسے ءِ مردم جوانتریں ریسے ءِ بہر بوت کنت، اَردیں آ وت ءَ سرجم ءَ ھماھانی رنگ ءَ گوناپ بہ دنت ایشی ءِ درور اِسپیت پوستانی ریسزم اِنت دومی ءِ رِد ءَ دوئیں ٹولی ھچ وڑ ءَ یکجاہ بوت نہ کن اَنت۔ اے دابیں ریسزم ءِ درور اینٹی سیمیٹزم اِنت –

“ریسزم ءُ کالونیلزم” ءِ درگت ءَ آھانی گوشگ ات کہ “البرٹ میمی” ءِ گُشگ اِنت زورگر ھر وھد ءَ ریسسٹ بنت ءُ چوشیں ھچ زورگِرے نیست کہ آ ریسسٹ نہ اَنت ‘البرٹ میمی’ ءِ نِزّ ءَ یک کالونئیل زمینے ءَ ریسزم چہ سہ ھاسیں بھراں جوڑ بیت ریسزم چہ دُرستاں پیش زورگر ءُ جھمنند ءِ میان ءَ تپاوتاں گیشین اِیتھمے تپاوتانی کدر ءُ کیلو بِزاں کہ شَر ءُ ھراب گیشینگ بنت ھمے کدراں زورگر وتی پائدگ ءُ جھمنند ءِ تاوان دئیگ ءِ ھاتر ءَ کار مرز کنت البرٹ میمی ءِ رِد ءَ کبزہ گیر ءِ توک ءَ اے سئیں ھاسیت گِندگ بنت، آ جھمنند ءَ وتی داتگیں کدرانی بنیاد ءَ چہ وت کمتر لیک اِیت ءُ اے ھدّ ءَ رؤت کہ ھمے کمتری ءِ سوب ءَ آئی ءَ بِزاں زورگر ءَ ھمینکس ھک رس اِیت کہ آ جھمنند ءِ سر ءَ ھاکمی بہ کنت –

دیمترءَ آھاں تران کنان ءَ سیمی گالبند “پاشزم” ءِ سر ءَ ھمے گُوشت کہ بندات ءَ پاشزم ءِ گالوار اولی جھانی جنگ ءَ پد بِزانکہ نوزدہ سد ءُ نوزدہ ءَ اٹلی ءَ کارمرز بوتگ کہ ایشی ءِ بِزانت “مُچی” ءِ بوتگ ءُ ایشی ءِ بِنا کنوک بینیٹو موسولینی بوتگ – پاشزم ءِ گالوار چہ اٹلئین زبان ءِ لبز فاشیو ءَ در اتکگ کہ بنیاد ءَ اے روس ءَ کار مرز بوّکیں تپر ءِ کش ءِ راڈ (Rod) آں گُش اَنت۔ ھمے نشانی ءَ گْوَست ءِ تہ ءَ واکداری ءِ چیدگ گوشگ بیت۔ اولی جھانی جنگ ءَ پد وھدے پاشزم یک سْیاسی زرمبشتے ءِ دروشم ءَ دیم ءَ کئیت گُڈا موسولینی ءِ بِنا کُتگیں اے زُرمبشت ءِ چیدگ ھم ھمے بوتگ –

نوزدہ سد ءُ ھشتاد ءُ دو ءَ اٹلی ءِ فلاسپر نوربر ٹو بوبیو گُشگ اِنت کہ ھر ھما جاہ ءَ کہ دود ءُ ربیدگے بوتگ اود ءَ پاشزم نہ بوتگ ءُ ھر ھما جاہ ءَ کہ پاشزم بوتگ اود ءَ دود ءُ ربیدگ نہ بوتگ – پاشزم ءَ ھچ بر دود ربیدگ نہ بوتگ –

اڈورنو ءُ ھورکیمر ءَ یھودیانی درگت ءَ پاشسٹانی ھیال ءَ چو اے ڈول ءَ گیشین اَنت کہ پاشسٹ یھودیاں کسانیں ٹولی یے سرپد نہ بنت بگندئے آ ایشاں وتی داواداریں ریسے ءِ بستار ءَ چار اَنت کہ ھرابْیاں سر ریچ اِنت ایشانی رِد ءَ دُگنیا ءَ یک وشیں جاہ یے جوڑ کنگ ءِ ھاتر ءَ الّمی اِنت کہ یھودی ھلاس کنگ بہ بنت –

ھیلکاری سرکلے گُڈ سر ءَ دیوان دگہ باسکاں جُست ایرکرت انت ءُ جُستانی پسّو دئیگ بُوت اَنت ءُ دیوان آسر کنگ بوتگ-

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھپسد ءُ بیست ءُ پنچ روچ سرجم بوتگ انت –

پریس کلب ءِ دیم ءَ برجاھیں زھرشانی بنجل ءَ مروچی بی ایس ایم ءِ سرکماش شکیل احمد بلوچ، بی وائی سی ءِ سعدیہ بلوچ، این ڈی پی ءِ سینٹرل کمیٹی ءِ باسک شاھمیر بلوچ ءَ اتکگ ءُ دلپدردی درشان اِتگ ءُ بیگواھیں مردمانی یل کنگ ءِ لوٹ کتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ مات ءُ بلوچ راج ءِ مروچیگیں جاور ھالانی گندگ ءَ پد ھما سنگدلیں انسان ءِ وتی ارساں داشت بہ کنت بلے اے بلوچ راج انت کہ بازیں درد ءُ رنجانی سگگ پد ھم اوپار کنگ ءَ انت ءُ ھمے اوپار کنگ ءَ لھتے مردم سوداگری کنگ ءَ انت – زوراکی ءِ اوپار کنگ بلوچانی لاچاری انت پرچا کہ ایردست بید اشی ءَ دگہ ھچ کرت نہ کنت بلے پدا ھم نا دز رسیں ءُ ایردستیں بلوچاں وتی دوستیں مردمانی یل کنائینگ ءِ ھاتر ءَ جُھد کتگ ءُ ھما اولی روچاں چہ دنیا ءَ وتی کلوہ داتگ –

آئی ءَ گوشتگ کہ ما گلامی زنجیراں وتی گردن ءَ درکنگے ھاتر ءَ مدامی پُرایمنیں جھد کن ایں ءُ بلوچستان ءِ سر ءَ پاکستان کبزہ بگیری ءَ بلوچ پرزنداں دیمھونی داتگ ھماھانی دیمھونیانی سوب ءَ مروچی بلوچ ءِ جیڑہ میاں استمان ءَ دیم ءَ اتکگ –

ماما قدیر بلوچ ءَ گوشتگ کہ بلوچانی جُھد ءَ ناکہ آیوک ءَ بلوچ راج چہ واب پاد کتگ بلکنہ بلوچ پرایمنیں جھد ءِ بھر جوڈ کتگ ءُ یک رژناھیں گوستانک ءِ نبشتہ کتگ – بلوچانی جھد ءَ منزل ءَ سرکنگ ءُ راجی سوبینی ھاتر ءَ مھلوک ءِ پلامرزی المی انت ءُ بلوچ راج ءَ سرپدی دیگ بلوچ سیاسی تاکتانی پرز انت –

بم ءِ بندیگ جاہ ءَ نشہ بھتام ءَ بندیگیں بلوچے نادراھی ءِ سبب ءَ بیران بیتگ –

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ ھواریں دمگ بم ءِ زندان ءَ نادراھی ءِ سبب ءَ یک بندیگیں بلوچے بیران بیتگ، گشگ بوگ ءَ اِنت کہ بہ وھد نادراہ جاہ ءَ سر کنگ نہ بیتگ چریشی ءَ آ بیران بیتگ-

بیران بیتگیں زندانی ءِ پجار احمد کرد ء عبدالرحمان ءِ جھمند بخش دزاپ ءِ نام ءَ زانگ بیتگ –

ھالانی رد ءَ احمد کرد ایرانی سال نود ءُ سَے نشہ ءِ بھتام ءَ گرگ بیتگ ءُ چریشی ءَ آئی ءِ سر ءَ پاھو اتکگ ءُ پد آئی ءِ وکیل ءِ دزبندی ءَ دوبر آ اُمر ءِ زند ءِ زندانی ءَ مٹ کنگ بیتگ –

احمد کرد ھشت سال ءَ پیسر گرگ بیتگ ءُ آئی ءِ نادراھی زندان ءِ تہ ءَ بیتگ ءُ چریشی ءَ آ نادراہ جاہ ءَ پہ وھد برگ نہ بیتگ ءُ بیران بیتگ-

ھمے وڑ ءَ چریشی ءَ پیسر موسیٰ رحیمی نامیں مردمے ھم سپاہ ءِ لٹ ءُ کُٹانی سبب ءَ نادراہ ءَ پہ وھد برگ نہ بیتگ ءُ آئی ءَ ساہ ماں بندر عباس ءَ داتگ اَنت –

روکپتی بلوچستان ءَ اے وڑیں یکشل ءَ بیگ ءَ اَنت بلے آ رسانکدراں باز کم گندگ بنت –