لال سنگھ چڈھا عامر خان ءِ نوکتریں تامر کہ ٹوم ھینکس ءِ انگریزی تامر فورسٹ گمپ ءِ ھندوستانی دروشم ءَ اِنت، اے تامر یازدہ اگست دوھزار ءُ بیست ءُ دو ءَ سینیما آں جنگ بیت، تامر ءِ آیگ ءَ پیش لال سنگھ چڈھا ءِ بگیر ءَ سوشل میڈیا ءَ کمپین برجاہ اِنت کہ اے تامر بائیکاٹ کنگ بہ بیت۔
ٹی بی پی اھوال پتر ءِ رد ءَ عامر خان چار سال ءَ پد وتی نوکتریں تامر ءَ گوں دیم ءَ اتکگ، اے تامر ءِ تہ ءَ عامر خان یک نوکتریں دروشمے ءَ گندگ بیت اِنت، تامر ءِ تہ ءَ عامر خان ءِ پجیگ ءَ کرینہ کپور ھم ھوار اِنت ءُ اے تامر 1994 ءَ جوڑ بیتگیں ھالی ووڈ ءِ تامر فورسٹ گمپ ءِ ھندوستانی دروشم ءَ اِنت۔
دومی نیمگ ءَ تامر ءِ آیگ ءَ پیسر تامر ءِ بگیر ءَ ھندوستان ءَ چاگردی رسانکدراں عامر خان ءِ تامر ءِ بائیکاٹ کنگ ءِ ھاتر ءَ کمپین برجاہ اِنت، اے درگت ءَ عامر خان ءَ گُشتگ کہ مئے تامر یک جوانیں تامرے ءُ اِشی ءِ چارگ ءَ من واھگ داراں مردم الم رؤ انت۔
زانگ بہ بیت ھندوستان ءَ سرکار کنوکیں پاٹی بی جے پی ءِ باسک ءُ دوزواہ گیشتر چاگردی رسانکدر ءَ بالیووڈ ءِ تامر ءُ ازمکارانی بگیر ءَ کمپین جنزین اَنت چہ لال سنگھ چڈھا ءَ پیسر رنبیر کپور ءُ سنجے دت ءِ تامر شمشیرہ ءِ بگیر ءَ ھم انچیں کمپینے ءِ جنزینتگ اَت، ءُ شمشیرہ تامر ءَ مزنیں کساسے ءَ تاوان ھم وارتگ اَت۔