کابل ءَ امریکی ڈرون اُرش ءَ القاعدہ ءِ رھشون ایمن الظواہری ءِ مرگ ءِ درگت ءَ تالبان جارکش ذبیح اللہ مجاہد ءِ درشان دیم ءَ اتکگ۔
ذبیح اللہ مجاہد ءَ ھندی رسانکدر ءَ گوں گپ کنان ءَ گُشتگ کہ امریکی صدر ءِ اے بٹاک داں انگت تھنا یک بٹاکے ، امارت اسلامیہ ءَ ایمن الظواہری ءِ ادا بئیگ ءِ ھچ پئیمیں سرپدی نہ بیتگ۔
آئی ءَ گُشتگ کہ امارت اسلامیہ ءَ ایمن الظواہری ءِ ڈرون اُرش ءَ نشانگ بئیگ ءِ ھم سرپدی نیست اِنت، آھانی نیمگ ءَ چہ اَے درگت ءَ انگت پَٹ ءُ پول برجاہ اِنت۔
تالبان جارکش ءَ گُشتگ کہ کابل ڈرون اُرش دوحہ کرارنامگ ءِ بگیری اِنت، ما اوگان سرڈگار ءِ سیمسری ھدانی لگتمالی ءَ ایر جنیں، چُشیں وئیل پد مہ پد بہ بنت گُڑ ءَ آئی ءَ پشدر ءَ درکپوکیں آسرانی زمہ وار امریکہ بیت۔