TBP Balochi

بلوچستان لبریشن فرنٹ ءَ شال ءَ رودرآتکی بائی پاس ءَ برجاھیں پھازداریں لشکر ءِ چیک پوسٹ ءِ سر ءَ دستی بمب اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءَ گْوشتگ کہ مئے سرمچاراں ھبدہ ساچان ( 17 اگست ) ءِ شپ ءَ زُورگِپتیں بلوچستان ءِ بُنجاھی شھر شال ( کوئٹہ ) ءِ ھند رودرآتکی بائی پاس گوبر میدان ءَ ریل ءِ پٹری ءِ نزّیک ءَ پاکستانی پھازداریں لشکر ءِ چیک پوسٹ ءِ سر ءَ گوں دستی بمب ءَ اُرش کُتگ، اُرش ءِ آسر ءَ دُژمِنیں پوج ءِ دو کارمَند ٹپّی بوتگ۔

جارکشّ میجر گْوھرام بلوچ ءَ وتی درشان ءِ تہ ءَ دیمتِر ءَ گْوشتگ کہ بلوچستان لبریشن فرنٹ پاکستان ءِ پوج ءُ آئی کُمکّارانی سر ءَ گیشتِر گوں تْرندی ءَ اُرش کنت، چہ بلوچ لس مھلوک ءَ دزبندی اِنت کہ آ چہ لشکر ءِ شوربندی، پانگِس ءُ کارواناں ھوار اے دگہ سُر پُراں چِہ دُور بِہ بَہ اَنت۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ دُژمِنیں پوج ءِ سر ءَ دانکہ ایردستیں بلوچستان ءِ آجوئی ءَ مئے اے اُرش گوں تْرندی ءَ برجاہ بَہ اَنت-

بلوچستان ءَ گوستگیں بازیں روچاں برجاھیں گورانی توپان مردمانی ساھگیر جوڑ بیتگ چریشی ءَ جتا جتائیں وئیلاں بیران بیتگیں مردمانی کچ 205 ءَ سر بیتگ اَنت –

انتزامیہ ءِ دراھیں جد ءُ جھداں ابید ھم شال ءُ دگہ جاھاں ریل ءِ ٹریک ءُ دگ اسرمند اَنت ءُ چریشی ءِ سبب ءَ بلوچستان ءَ زمینی راہ ءُ در بند اَنت-

اُستانی سرکار ءَ بنجاھی سرکار ءَ چہ لوٹ کتگ کہ آ بلوچستان ءِ دمگاں کمکی سامان، انفراسٹرکچر ءِ سرجم کنگ ءُ توپاب زدگیں کھولانی کمک ءَ 60ارب کلدار ءِ گچینی پوڑی ءَ بہ دنت-

واکداراں بیران بیتگیں مردمانی کچ 205 گوشتگ ھمے وڑ سَے شمبے ءِ شپ ءَ پشین ءِ دمگ سرانان ءِ نزیک ءَ ھار ءَ برتگ اَنت کہ اشانی تہ ءَ پنچ سالی جنکوے ئے لاش سرانان ءِ دمگ سید حمید کور ءَ دز کپتگ-

اُستانی ڈیزاسٹر مینجمنٹ اتھارٹی ءَ چار شمبے ءِ شپ ءَ داں بلوچستان ءَ بیران بیتگیں مردمانی کچ نہ گوشتگ اَنت-

بلوچستان ءِ دومی جاھاں ھوار گیجوکیں ریل ءِ ٹریک گوستگیں بازیں روچاں آپ ءِ تہ ءَ اِنت چریشی ءِ سبب ءَ مساپر بریں ریل ءُ مال برداریں گاڑی مھتل اَنت ریل ءِ واکدار گوش اَنت ٹریک ءِ جوڑ کنگ ءَ انگت ءَ وھد لگ ایت-

ریل ءِ واکدارانی گوشگ اِنت گوستگیں سَے روچاں چہ شال ءُ کراچی،پنجاب ءُ ھیبرپکتونکواہ ءَ ھچ ریل نہ شتگ اَنت-

بلوچستان ءِ سرکار ءَ اُستان ءِ پتر ءَ منگ بیتگیں یک منگ نامہ ءِ اسلام آباد ءَ راہ داتگ-

اُستانی پتر ءَ منگ بیتگیں منگ نامہ ءَ گوشگ بیتگ کمیں مالانی سبب ءَ بلوچستان ءَ توپان آماچیں مردماں کمکی ءَ بوتگیں تاوانانی پر کنگ ءِ ھاٹیگ ءَ نہ اِنت-

منگ بیتگیناں اُستان ءِ سرکار ءَ گوشتگ کہ آ بلوچستان ءَ سِی ءُ دو تباہ آماچیں دمگانی تاوانی پُر کنگ ءَ کم چہ کم پنجاہ یا ششت ارب کلدار گچینی پوڑی بہ دنت کھر آماچی کنگ بیتگیں دمگاں دراھیں یوٹیلیٹی بلز ءُ کشت ءُ کشاری وام پھل کنگ بہ بنت-

اوگانستان ءِ بنجاھی شھر کابل ءِ گوریچان ءَ مسیت ءِ تہ ءَ بمب تراکے کنگ بوتگ ءُ چریشی ءَ بازیں نمازی یے بیران ءُ زدگ بوتگ انت-

کابل پولیس ءِ جارکش خالد زادران ءِ گوشگ انت کہ تراک کوتل خیر خانہ ءَ بیگاھے نماز ءِ میان ءَ بوتگ –

جارکش ءَ گوشتگ کہ بیران بوتگیں مردمانی کچ تنی وھدی زانگ نہ بیت بلے پھازگی لشکر وئیل ءِ درگت ءَ پٹ پول کنگ ءَ انت –

ناسرجمیں ھالانی رِد ءَ تراک ءَ مسیت ءِ امام مُلا امیر محمد کابلی ءَ ھوار کم چہ کم بیست مردم بیران بوتگ انت ءُ چِل زدگ بوتگ انت –

دومی نیمگ ءَ چاگردی ترامجاھاں داعش ءَ بندوکیں بازیں اکاؤنٹ مُلا امیر خان ءِ مرگ ءِ شادمانی ءَ کنگ ءَ اِنت –

زانگ بہ بیت ھمے ماہ ءِ تہ ءَ اے دومی وئیل انت کہ تالبان ءِ پلامرزی کنوکیں اسکالرز نشانگ کنگ بوگ ءَ انت –

یانزدہ اگست ءَ کابل ءِ دینی وانگجاھے ءَ وتکشیں تراک ءِ کنگ بوتگ ات چریشی ءَ رحیم اللہ حقانی بیران بوتگ ات – ناموریں دینی زانتکار شیخ رحیم اللہ حقانی تالبانی نزریاتی استاد ءِ زانگ بوتگ –

زیارت ءِ لشکر کشی ءُ دروگیں میڑ ءِ بگیری ءَ بلوچستان ءِ بنجاھی شھر شال ءَ بیگواھیں مردمانی کھولاں مروچی بیست ءُ ھشت روچ سرجم بوتگ انت کہ گورنر کارگس ءِ دپ ءَ نندانک ءِ جتگ ءُ نشتگ انت –

مروچی بیگواھیں مردمانی کھولاں منوجان چار راہ ءَ بگر تاں گورنر کارگس ءِ دپ ءَ روانک ءِ کش اِتگ –

بیگواھیں مردمانی کھولاں گوستگیں روچ ءَ شال ءِ جتا جتائیں جاھاں زھرشانی بنجل برجم کُتگ انت کہ مروچی ھمودا بگر تاں نندانک جاہ بزاں گورنر کارگس ءِ دپ ءَ زھرشانی روانک ءِ کش اِتگ – زھرشانی روانک ءَ بیگواھیں مردمانی کھولانی ھمراھی ءَ مزنیں کچ ءَ سیاسی پاٹی ءُ نودربرگلانی باسک ھمراہ بوتگ انت –

بیگواھیں مردمانی کھولاں گوستگیں بیست ءُ ھشت روچ انت کہ نندانک ءَ نشتگ انت کھول وتی دوستیگیں مردمانی یل کنگ ءِ لوٹ ءَ کنگ ءَ انت –

زھرشانی ءَ تران کنان ءَ بیگواھیں مردمانی کھولانی گوشگ ات کہ سرکار گیرسنجیدگی کنگ ءَ انت پرچا کہ بیگواھیں مردمانی کھولاں چار ھپتگ انت کہ زھرشانی نندانک ءَ نشتگ انت ءُ آھانی تہ ءَ شیرمچیں زھگ ءُ پیریں زالبول ھم ھوار انت بلے ھاکم دھ گام نہ جن انت ءُ آھانی لوٹانی گوشدارگ ءَ رازی نہ انت –

کھولانی گوشگ ات کہ نندانک گوستگیں ماہ ءِ بیست ءُ یک جولائی ءَ بندات کنگ بوتگ کہ ھنگت برجاہ انت ءُ اے درگت ءَ مئے سَے لوٹ بوتگ انت – اولی لوٹ ھمے بوتگ کہ زیارت وئیل ءِ بگیری ءَ جوڈیشل انکوائری کمیٹی ءِ اڈ دیگ بہ بیت، دومی بیگواھیں مردمانی کھول باور کنائینگ بہ بنت کہ آھانی دوستیگیں مردم دروگیِں میڑ ءِ نام ءَ جنگ نہ بنت ءُ سیمی بیگواھیں مردم یل کنگ بہ بنت –

آھانی گوشگ ات کہ اولی لوٹ ءِ بزاں زیارت ءِ وئیل ءِ بگیری ءَ جوڈیشیل کمیٹی ءِ اڈ دیگ بوتگ بلے ما اے گپ ءَ پدر کنگ لوٹ ایں کہ آئی ءِ سر ءَ تنی وھدی دیمتر ءَ کار کنگ نہ بوتگ ءُ ناکہ ھما کھولانی کہ مردم جنگ بوتگ انت آھانی گوم ءَ ھال اھوال کنگ بوتگ ءُ ناکہ جونانی ڈی این اے ءُ پوسٹ مارٹم ءِ گپ بوتگ کہ ما ھمے پھم ایں مزن آمیدگس ءُ جوڈیشل کمیشن ءِ گچین کتگیں جج گیر سنجیدگی ءَ زاھر کنت –

زھرشانی ءَ تران کنان ءَ وائس فار بلوچ مسنگ پرسنز ءِ جنرل سیکٹری ءُ بیگواھیں دین محمد ءِ زھگ سمی دین بلوچ ءِ گوشگ ات کہ مروچی چہ رسانکدراں مارا ھمے ھال سربوتگ کہ سوبائی سرکار ءَ وزیر داخلہ ءِ سرکماشی ءَ پارلیمانی کمیٹی ءِ جوڈ کنگ ءِ جار جتگ بلے مئے گوم ءَ مئے گل ءِ یا بیگواھیں مردمانی کھول ءِ گوم ءَ ھچ کس ءَ اے درگت ءَ ھال اھوال نہ کُتگ ءُ ناکہ مئے پیش کتگیں لوٹ یا بیگواھیں مردمانی لڑ ءِ درگت ءَ گامگیج زورگ بوتگ ما ھمے گندگائیں کہ اے جیڑھانی درگت ءَ سرکار گیرسنجیدگ انت –

سمی دین بلوچ ءِ گوشگ ات کہ نون ماہ ءِ سرجم بوگ ءَ انت کہ بیگواھیں مردمانی کھول گورنر کارگس ءِ دپ ءَ نندانک جتگ ءُ نشتگ انت بلے تنی وھدی سرکار مئے لوٹانی منّگ ءُ گوشدارگ ءَ سنجیدگ نہ انت – آئی ءَ گوشتگ کہ اگاں سرکار ءُ برزی تبک ءِ ھاکماں ھمے وڈ وتارا داشت مارا منگ ءُ گوشدارگ نہ بوت گڈا مئے دیمتری گامگیج ترندتر بنت – ما سرکار ءَ باز وھد داتگ ءُ سک باز اوپار ءُ ودار ءِ دامن گپتگ –

زھرشانی ءَ درنگاز کنوکانی گوشگ ات کہ ما برزی تبک ءِ ھاکم ءُ ھستیں وھدے سرکار ءَ ھمے گوشگ لوٹ ایں تاں ھما وھد ءَ.مئے لوٹ منّگ نہ بوتاں ما وتی زھرشانی ءَ ھمے وڈ برجاہ دار ایں ءُ اشی تہ ءَ گیشی کار ایں ھمے میان ءَ مئے کھولانی مردماں ھرچی کہ بیت آئی ءِ زمہ دار ریاست ءُ آئی ءِ ھاکم انت –

شال ءَ ناشناسیں مردماں پوج ءِ پانگس ءِ سر ءَ دزبمبے چگل داتگ ءُ تتکگ اَنت-

سربوتگیں ھالانی رِد ءَ شال ءِ دمگ گوریچانی بائی پاس ءَ ریل پٹری ءِ نزیک ءَ ھستیں پاکستانی پوج ءِ پانگس سر ءَ ناشناسیں پرپٹ سواراں دزبمبے چگل داتگ ءُ تتکگ اَنت چریشی ءِ گوں ترندی ءَ ترک اِتگ-

انتزامیہ رِد ءَ پوج ءِ پانگس ءَ دو مردم ٹپی بوتگ اَنت کہ آ نادُراھجاہ ءَ برگ بوتگ اَنت-

شال تراک ءَ پد وئیل جاہ پوج ءِ مزنیں کچے ءَ سر بوتگ اَنت ءُ اُرشکارانی شوھازگ ءِ بندات کتگ-

نبشتانک: ھیالاں سرّیچ اَت

نبشتہ کار: شیر دل بلوچ

دی بلوچستان پوسٹ

“چہ کُج ءَ ھمراھے بہ شوھازاں؟
گُڈسری زند ءَ چون بہ گوازیناں؟
کپتگ آں مرچاں تھت ءِ باھوٹاں”

ھمکویگیں ھمبل ” سلیم ناز درھبات ئے دوا کناں وتی واھگانی سپر ءَ سوبمند بہ بہ ئے ،گم ءُ سوری مہ گندات ئے ءُ مُدام گل ءُ شات بات ئے انچوش بات-

وشیں گپّے شائرانی لڑ ءَ یکے گیش بوت پہ پدریچ ءُ وانوکاں چدّو وشتریں سوگات دگہ چی بوت کنت انچو گوش اَنت وانگی بزانکہ کتاب مردم ءِ ایوکی ءِ ھمراہ اِنت زانشت ءِ پدیانک اِنت دگہ جاھے ءَ چُش گُش اَنت آدینک ءَ چار ئے وت ءَ را گندگ ئے، ءُ وانگی ءَ چار ئے جھان ءَ گندگ ئے، ھما مردم ازیمیں اِنسان لیکگ بوتگ اَنت ءُ بنت، کہ آیانی سنگتانی گوں وانگی ءَ بوتگ یک وانوکیں مردمے ءِ گور ءَ لپزانی اَمبارے بیت ،وتی دل ءِ تب ءَ لبزاں سینگار اِیت ۔ اے ھما لبزاں کہ ھرچ مردم وتی گپانی تہ ءَ کارمرد اِش کنگ ءَ اَنت ، بزانکہ شائرے ھمے گپّاں ارواھے بکش اِیت دست ءُ پاد پِر کنت، زیمر ءُ ساز ءُ دروشم ءَ ناچ پرمائیت، کماتگیں گالانی اُشکُنگ ھمک مردم ءِ واھگ بیت، من گوشاں جھان ءِ تب ءَ انچو یک شائرے سرپد بیت وتی دردانی زبان ءَ کار اِیت ۔

شائرے ءَ را سک ءَ باز وانگ لوٹ اِیت کہ آئی ءِ کر ءَ بزانی اَمبارے بہ بیت، گڑا آ پہ ارزانی وتی شائری ءَ دیم ءَ جُنزینت کنت، وتی زمین ءُ زبان ءُ راج ءِ ھزمت ءَ کُت کنت، چاگرد ءِ دیمروئی ءِ چیدگ بیت، شَرّیں شائرے چہ وتی پلگاریں ھیالاں چاگرد ءُ راج ءَ شّرْیں کلوھے رسین ایت ءُ تچکیں راہ ءَ شون دنت ۔

مرچی وَ بلوچ راج گوں گرانیں جاوراں دُچار کرتگ اِش ، اے وھد ءَ آشوبی شائر وتی وتواجھی ءِ جنگ ءِ توار اَنت ءُ انگت مھکمیں توارے بات اَنت ،انچو ایدگہ پڑانی راجدوستیں مردماں کومی جھد ءِ واستا باز کرتگ ءُ کنگ ءَ اَنت، ھمک شائر وھد ءِ لوٹ ءَ سرپد بہ بیت ءُ چہ دومی پڑانی مردماں پُشت ءَ مہ بیت وتی بھر ءَ گوں آجوئی ءِ پڑ ءَ ھور بہ کن اَنت چہ ھمے پوہ ءُ آشوبی ئیں شائراں یکے ” سلیم ناز “ھم ھساب بیت، چہ وتی گوھریں گالاں سرڈگار ءِ زیبائی ،سرمچار ءِ دلیری ءُ پند شپ گردی، مسکیں ھاک ءِ وشبو، کوہ ءُ کوچگ ، نیلیں زِر ءِ ساڑاِتگ ءُ لگورین دژمن ئِے ڈوبار اِتگ اَنت ءُ بے بیگواھیں بلوچ پُسگانی درگت ءَ مات ءُ گھارانی ، ماں چار راہ ءُ دگانی ءِ سر ءِ زھرشانی ءُ روانکاں وتی گالانی تہ ءَ درشانتگ ءُ شَیر ئِے بستگ بے دروریں شائری یے کنگ ءَ اِنت، آئی شائری ءِ تہ ءَ زھیر ، درد ، موتک ، نازینک ءُ شاتکامی ءِ گندگ ءَ آیگ ءَ اِنت-

اے ھبر ءَ من بازیں جاھاں اُشکتگ کواس ءُ شائراں ” شائری انچو اَرزان کرتگ، ھرکس شائری کرت کنت اِناں راستی چُُش نہ اِنت من گوں اے گپّاں ھچ تپاک نہ کناں “شائری چُشیں اَرزانیں کارے نہ اِنت چو لیک اِتگ وھد ءِ مردماں۔

نمیران شائر “گل مھمد وپا گوش ایت “
“بْیا او سرگْوات من ءَ زیر گوں زھیراں برو “
“ماھل ءِ گنجیں دَر ءَ سر کن پکیراں برو”

اگاں ما وتی شائرانی سر ءَ چمشانکے بہ دے ایں دراھیں کارست پدر بنت، نامانی لڑے ٹوھیں گندگ ءَ کیت آیانی بابت ءَ زانگ ءُ شائری اِش وانگ لوٹ ایت، شائری ءِ تھرانی پوہ بوگ، شائر ءِ بالاد بیت، گڑا انچیں شَرّیں شائرے وتی چاگرد ءِ دیمروئی ءِ چیدگ بیت، وتی راج ءِ ساڑایگ ءُ گوھریں گالانی ءِ کمایگ انچو ارزانیں کارے نہ اِنت، گوں وتی جند ءَ میڑگ، جھان ءَ گرانینتر کاراں زانگ بیت، وَ ھمے گرانیں کار ءَ وانگ ءُ زانگ ءَ جست ءُ جو ءُ سرپدی اَرزان کرت کنت، انچو یک راہ بلدے آپسرے ءَ رس اِیت ھمے وڑ ءَ نابزانتے نیم راہ ءَ گار بیت، وَ انچو شائری یے واستا وانگ زانگ ھر چیز ءِ بابت سرپدی اِلمی اِنت-

وھدیکہ ” سلیم ناز ءِ شائری اولی وانگی چاپ بوت پہ وانوکاں رس اِیت گڑا تاکے ئِے پمن سوگات کرتگ اَت، وانگی سرجم ءَ وانتاں ھیال ئِے من ءَ باز دوست بوت اَنت، پرچاکہ شائری ئِے وھد ءِ تب ءَ اَت آشوبی ئیں گال چو تھارمائیں شپ ءِ استالاں سر کش اِتگ ءُ وتی رنگ تالاں کرتگ اَت ءُ آئی بے دروریں شائری توسپ ءِ مھتاج نہ اِنت گال ءِ اَمباریں ھیالاں سرّیچ اَت ۔

چہ دومی ءِ شون دیگ ءَ مردم وتی نزوریاں وت دَرگیج اِیت، وتی تہ ءَ شَرّتری آؤرت کنت، اُمیت کناں آیوکیں تاک ئِے گیش جلواھناک بیت ۔

سلیم ناز گوش اِیت
“منی مَیّت ءَ مہ شود اِت اگاں درد بیت پلانی “
“من مرتگاں پہ راج ءَ وت ءَ کس مہ کنت شگانی “

چہ اے گالاں آئی ءِ ھیال ءِ تیوگیں بالاد گندگ بوگ ءَ اِنت آئی لوٹ ءُ تماہ چی اِنت۔؟ ءُ چی گوشگ ءَ لوٹگ ءَ اِنت ۔

دگہ وشیں گپّ ئِے اش اِنت کہ ” سلیم ناز ” ءَ وتی شائری ءِ رنگ مٹینتگ گوں نوکیں داب ءَ شائری کنگ ءَ اِنت من ءَ نوں آئی شائری گیشتر دوست بوگ ءَ اِنت ، اد ءَ وتی شَیرے ءِ تہ ءَ چو گوشگ ءَ اِنت۔

“لبزانی امباراں کروج چمّانی آیاتاں بواں”
“هنجر کُتگ سبر ءَ وتی هوناں بیت مئے تیر کماں”

“کوهانی دلبند ءَ رُد اَنت ماتانی پلّگد دیدگیں”
” من ءُ تو نہ دیستگ گژنگی ونتگ کتاباں بس بیاں”

” اے مهر ءُ اشک ءِ سنگتی وژنام کنت کم نام کنت”
“باریں زمانگ چی بہ دنت مهرانی مُزْ ءَ اے جهاں”

اد ءَ بچار ھیال ئِے کجام ھشیماں سرکشگ ءَ اَنت من گوں آئی دُچار کپتگ آں گپّ ءُ ھبر شائری ءِ سر ءَ بوتگ شائری لھتیں تھراں شَرّ سرپد اِنت ۔ سریچیں ھیالانی ھدابند زانان ئِے شَرّیں رنگے ءَ جنزگ ءَ اِنت اگاں ھمے دروشم ءَ جنزان بہ بیت گڑا وانوک ءُ اُشک کنوکانی دل ءِ واھگ بیت وت ھم مزن نامیں شائرانی لڑ ءَ ھم گوں بیت ۔

سلیم ناز جاھے ءَ اے وڑ ءَ گوش ایت

“مُرگانی تو رم ءَ گوں من ءَ وش بیت سپر”
“بنی آدم ءِ وپا کہ مدام تژن ءُ بس شگان”

“اے مھکجانی مهر من ءَ گران ءَ کپتگ اَنت”
“توبہ من ءَ را چینچو سُچان ، جند ءِ اَندر ءَ”

“بَد دوایے چونیں باریں لگ اِت مئے تالہ ءَ”
“هرکس من ءَ چہ دور تَچ اِیت چو درامد ءَ”

“ورنائیں انگت اے کلم پگر پیر بوت”
“توکل لگور بوت گُش ئے جیڑگی نہ اِنت”

“من سانکلاں گوں بستگاں کولاں همائی ءِ”
“دیوانگیں دل ءَ گوں میاراں میاریاں”

“ارسانی مهرگاں گوں ترانگ تئی لَڈگ اِنت”
“مارا اے گلزمین ءِ هر درچک دوست بنت”

سانکل ءُ آجوئی ، گوں گلزمین ءِ ھمک ھرچ درچک ءُ دار ءَ ئِے مھر ئِے ھست، وتی دل ءِ دردانی کسھے آرگ شَرّ سرپد بیت، چہ ھیالانی درشانگ ءَ انچو سرپد ئِے باں گلزمین ءِ شیدا ءُ ملنگیں شائرے ھست ۔ وَ انچو ھستی ءُ نیزگاری ءَ را وتی سنجیں گالانی تہ ءَ کماتگ ئِے وانگ کرز اِیت ۔

“چُش گوش ایت “

“شیشگ ءِ واسے تسلہ دات نہ کنت “
“نیزگار ءَ کس نوں بْرات نہ کنت”

لوھڑیں ھونانی ھنّی رجتگ اَنت
زالمیں چاکر من ءَ زامات نہ کنت
جی پہ تئی اُوستانی زانت ءُ زانگ ءَ

کول ءُ اکراراں وتی ھیرات نہ کنت دنیا چو کہ آسْیاب ءَ

چھر وارت کس مئے کبر ءَ پاتیا آیات نہ کنت۔

گُڈسر ءَ من گوں وتی اے ساڑایگی دانکان ءُ ناز ءِ اے شَیر ءَ آسر کناں ۔

وتن بچانی ارواه اِنت
وتن مئے دیدگ ساه اِنت

وتن هوناں هواریں مئے
وتن گوانک ءُ تواریں مئے
وتن چمّانی مئے براه اِنت

وتن مئے باگ ءُ بوستانیں
وتن باندات ءِ اوستانیں
وتن مئے دیدگاں جاه اِنت

وتن تئی هاک ءِ شیدایاں
وتن تئی اشک ءِ کیدایاں
وتن تئی رُژن چو ماه اِنت

وتن مئے پهر ءُ تو شان ئے
وتن ستک ءُ ایمان ئے
وتن چو سهب ءُ بیگاه اِنت

وتن کّلیں دل ءِ لوٹ اِنت
وتن الله ءِ باهوٹ اِنت
وتن ناّز گوں تو همراه اِنت

اگاں زبان مان اِیت گڑا راج زندگ بنت ۔
“ھمکوپگیں برات ” شیردل بلوچ”

---

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھئور ءُ ھارانی سوب ءَ پُرشتگیں دگ ءُ ریل پٹیانی شر نہ کنگ ءِ سوب ءَ بلوچستان ءِ بنجاھی شھر شال ءُ دگہ دمگاں تنی وھدی رؤگ ءُ آیگ بوگ ءَ نہ انت –

رپورٹ ءِ رِد ءَ دو شمبے ءِ روچ ءَ ریل پٹی آپ ءَ انت چریشی ءَ ریل روگ ءَ نہ انت ءُ ھمے وڑ شال تاں کراچی ءَ رؤکیں بنجاھی شھدگ ءَ چار روچ انت کہ بند انت وھدیکہ ہائی وے سر ءَ ھنگت آپ تچگ انت –

سبی ءِ ڈپٹی کمشنر منصور قاضی ءَ اھوالکاراں گوں تران کنان ءَ اے گپ رد کُتگ کہ ریل ءِ پٹی بازیں جاھاں آپ ءَ بُرتگ –

آئی ءَ گوشتگ کہ ریل ءِ پٹی آپ انت، دمگ ءِ تہ ءَ آپ کشگ بیت ءُ پدا شال ءُ دگہ دمگاں ریل روت ءُ کئیت –

منصور قاضی ءِ گوشگ ات کہ ھئور ءُ ھارانی سوب ءَ شال، سبی ءُ سکھر ءِ شھدگ بند انت –

دومی نیمگ ءَ بولان ءِ ڈپٹی کمشنر ءَ ھم مھلوک ءَ گوشتگ کہ آ کراچی تاں شال ءَ سپر مہ کن انت وھدیکہ ھئور ءُ ھاراں پد تنی وھدی شال تاں کراچی ءِ دگ پچ کنگ نہ بوتگ انت –

پشین ءِ دمگ سرانان ءَ دردناکیں وئیل ءِ بوتگ کہ آروسی مراگش ءَ بھر زوروکیں پنچ مردم ھار ءَ بُرتگ ءُ بیران بوتگ انت –

بیران بوتگیں مردمانی تہ ءَ سَے زالبول ءُ دو زھگ ھوار انت کہ آ کھول ءِ دگہ مردمانی ھمراھی ءَ رؤگ ءَ بوتگ انت کہ ھار ءَ پنس اِتگ انت –

واکدارانی گوشگ انت زھگ ءُ زالبولاں ھوار دگہ یانزدہ مردم بوتگ انت کہ کھول ءِ ایندگہ مردماں آ رکین اتگ انت کہ ایندگہ گاڑیاں سوار بوتگ انت –

پدا رند ءَ ریسکیو کارمنداں اتکگ ءَ بُکتگ ایں پنچیں مردمانی جون آپ ءَ چہ در کُتگ انت –

ایندگہ دمگاں ھم تنی وھدی جاور نگیگ انت وھدیکہ موسی خیل، ژوب، پشین، قلعہ سیف اللہ، قلعہ عبداللہ، نصیر آباد ءُ لسبیلہ گوستگیں دو روچ انت ھئور یکشل ءَ رچگ ءَ انت –

واکدارانی رِد ءَ ھئورانی سوب ءَ قلعہ سیف اللہ، مسلم باغ، موسی خیل، کوھلو، ڈیرہ بگٹی ءُ دگہ دمگاں سدانی کچ ءَ گِساں تاوان رستگ انت –

موسی خیل ءَ ھئور یکشل ءَ رچگ انت کہ چریشی ءَ کور ءُ شیپاں آپ اؤرتگ ءُ بازیں مردمے پنس اِتگ –

ریسکیو کارمند دمگ ءِ دوریں جاھانی مردماں رکینگ ءِ جھد ءَ کنگ ءَ انت بلے اے دوریں جاھانی دگ ءُ پھلانی پُرشگ ءِ سوب ءَ دگہ جاھاں رؤگ آھگ بوگ ءَ نہ انت –

یک اگدہ دار ءِ گوشتگ کہ موسی خیل ڈیم ءِ پُرشگ ءَ سَے مردم آپ بُرتگ ءُ گار بوتگ انت کہ پدا رند ءَ زدگیں جاور ھالاں گوں دست کپتگ انت کہ نادراہ جاھ ءَ سر کنگ بوتگ انت –

دمگی واکدارانی اگدہ دار ءِ گوشگ انت موسی خیل ءَ ھئورانی میان ءَ جتا جتائیں وئیلاں تنی وھدی دوازدہ مردم بیران بوتگ انت –

سبی ءَ لہڑی ریور ےَ نصیر آباد بازیں گِس ءِ تاوان داتگ کہ چریشی ءَ سدانی کچ ءَ مردم بے گس بوتگ انت –

ھمے میان ءَ پاکستان تاں ایران ءَ رؤکیں ریل ءِ سروس مروچی یانزدھمی روچ ءَ پچ کنگ بوتگ، شال تفتان ریل پٹی شش جاہ ءَ ھار ءَ بُرتگ بوتگ کہ چریشی ءَ ریل رؤگ بند کنگ بوتگ –

بلوچستان ءَ بشی ھئوراں تنی وھدی یکسد ءُ نود ءُ شش مردم مرگ ءِ دیمپان بوتگ انت –

بلوچستان ءِ دمگ لورلائی ربات ءَ زالبول ءُ جنکوے ءَ ھوار سَے مردم کُشگ بوتگ انت –

دکی ءِ ایس پی غلام حسین ءِ گوشگ انت کہ ھر سَے مردم کارچ ءِ سر ءَ ھلار کنگ بوتگ انت کہ آھانی تہ ءَ سیف اللہ ءُ آئی ءِ لوگبانک ءُ شش سالی زھگ ھوار انت –

دمگی واکداراں جون نادارھجاہ ءَ سرکُتگ انت ءُ اے درگت ءَ گیشیں پٹ پول برجاہ انت –

اھوالکار ءِ رِد ءَ وئیل گوستگیں شپ ءَ بوتگ کُشندہ بیران بوتگیں مردمانی ناکو زھگ ایں –

پولیس ءَ چہ کچلاک کُشندہ عباس دزگیر کُتگ نوکی آئی جست ءُ پد کنگ بیت کہ کجام سوب ءَ آئی ءَ اے مردم کُشتگ انت –

دومی نیمگ ءَ بلوچستان ءِ باپاری شھر ھب ءَ تیر گواری ءِ وئیلے ءَ زالبولے بیران بوتگ –

گیشیں ھالانی رد ءَ امیر آباد ءَ تیرگواری ءِ وئیل ءَ پنجاہ سالی زالبول ءِ بیران بوتگ ءُ آئی ءِ جنکو زدگ بوتگ –

پولیس ءِ رِد ءَ زالبول ءُ آئی ءِ زھگ گلیکسی ٹاؤن ھب ءِ جھمنند انت کہ گلشن امیر آباد ءَ نشانگ کنگ بوتگ انت ھمے گوشگ بوگ انت کہ وئیل زاتی جیڑوے بوتگ – بیران بوتگیں زالبول ءُ جنکو جام میر غلام قادر نادراھجاہ ءَ برگ بوتگ انت ءُ اے درگت ءَ پولیس گیشیں پٹ پول کنگ ءَ اِنت –