TBP Balochi

سمی دم درینگانے

چارمی بھر

نبشتہ کار: زبیر بلوچ

دی بلوچستان پوسٹ

1988ءِ الیکشن ءُ بی این اے حکومت ءَ کمو پیش زیا الحق ءِ برزی وئیل ءَ رَند ملکی سیاست مٹ بیت جنرل الیکشن ءِ جار بنت اد ءَ بلوچستان ءِ لیڈر شپ ووٹ ءُ الیکشن ءِ بھر زورگ ءَ دلمانگ بیت ( پی این پی بیزان میر غوث بخش بزنجو ءُ آئی ءِ ھم ھیال ساری ءَ چہ ووٹ ءُ الیکشن ءِ سیاست ءِ سر ءَ کنونس اِت اَنت ) ما اد ءَ بی ایس او پارگ بوتگیں قیادت ءِ گپ ءَ آں کہ بی این وائی ایم ءِ سر ءَ اے وھد ءَ سیاست کنگ ءَ اِت اَنت۔ اے بی این وائی ایم ءَ زُور آں بی این ایم کن انت ءُ الیکشن کمیشن ءَ یک پارلیمانی پارٹی یے ءِ بستار ءَ رجسٹر ئِے کن انت ءُ ووٹ ءُ الیکشن ءَ رؤگ ءِ پیسلہ کن اَنت-

ناگتیں اے پیسلہ ءِ سر ءَ بی ایس او لس بلوچ پوریاگر مززور ماہی گیر بزگر عام سیاسی کارکن مکران ءَ بگر داں جھلاوان سراوان ءَ بگر داں کچی ءُ بولان کراچی ءُ خلیج ءِ کُلیں بلوچاں کہ ھر وھد ءَ بی ایس او ءُ بی این وائی ایم ءِ کمکار ءُ سپورٹر اِت اَنت بلائینڈ کلٹ ئے بنیاد ءَ بلوچ ءُ بلوچستان ءِ سر ءَ جبر ءُ قھر زُلم ءُ زوراکیانی ھلاپ ءَ قومی ھک ءُ واکداری ءُ وت واجھی ءِ ھاترا لیڈر شپ ءِ توار ئے سرا لبیک اش کت ۔

اے پریکٹس چے ھدّاں داں سوب مند بوت چے ھدّاں سوب مند نہ بوت ایشی ءِ سر ءَ ھرکسی وتی زاتی بنگپے بوت کنت ۔ بلے اے پریکٹس ایش اَت کہ پارلیمنٹ ءِ سالے ءَ رند پروشگ ءَ اکبر خان ءِ حکومت ءِ سر ءَ گورنر بلوچستان ظفر اللہ جمالی ءِ ارش بلے پد ءَ زوت عدالت ءِ نیمگ ءَ چے بھال کنگ بیت کمو وھدا رند ملک ءِ اسمبلیاں غلام اسحاق خان پروش ایت ۔ اسمبلی ءِ پروشگ ءَ رند بی این ایم ءِ پْروشگ اختر مینگل کہ سندھی بلوچ فرنٹ ءِ نیمگ ءَ چے لندن ءَ سردار مینگل ءَ راہ داتگ ات یا یک ٹولی ءَ بی ایس او ءِ پریس کانفرنس کہ ڈاکٹر یاسین بلوچ ءِ سروکی ءَ کنگ بوتگ ات کہ ایشی ءِ تہ ءَ سردار عطا اللہ مینگل نواب مری ءُ دگر بلوچ واجھیں سروکاں دزبندی کنگ بوتگ ات کہ بیا اِت بلوچستان ءَ یک قومی بلوچ پارٹی یے اڑ بِدے اِت ءُ بلوچ راجی جنز ءِ سروکی ءَ بہ کن ات ۔( ھمے دزبندی ءَ پدا بی ایس او ءِ گٹ ئِے توک بوت ءُ بی ایس او ءِ پروشگ ءِ یک واجھے زانگ بوت ) اورتگ ات ۔ بھرھال بی این ایم ءِ مرکزی نائب صدر کنگ بیت ءُ بی این ایم ءَ دو ٹکّرا کن انت ۔ سردار کہ بلوچ مھلوک ءِ کرناں چے دژمناں بلوچ سیاست بلوچ ءِ دودمان بلوچ ءِ زندمان قومی انٹیگریشن ءُ یکجھتی ھمنچو سردار ءُ روایتی مھلوک ءَ نکس داتگ تینگا ھستیں بلوچ راجدپتر ءَ کسّ ءَ نہ داتگ دومی نیمگ ءَ ڈاکٹر حئی وتی بی این ایم ءَ بی این ایم حئی کنت اے ھبر چو روچ ءَ پدّر اِنت کہ بلوچ ءِ پارٹی پروش اَنت گڑا وتی انا ءُ زد ءُ بیرگیری ءَ رو اَنت ھمے ھساب ءَ سردار ءُ مڈل کلاس بی ایس او ءِ توک ءَ لابئینگ بندات کن اَنت ۔ گڑا مڈل کلاسانی نیمگ واجہ گلام مھمد ءُ سردار ءِ نیمگ ءَ ایڈوکیٹ رحیم بلوچ ونڈے ونڈے گر اَنت وتی سنگتاں دے اَنت ۔ بی ایس او ساری ءَ چے دو ات نوں سے بی ایس او بوت اَنت ۔ بی ایس او سھب، بی ایس او حئ، بی ایس او مینگل۔

روان انت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ایران شھر ءَ ناشناسیں مردماں یک مردمے کارچ جتگ ءُ کشتگ –

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ ناشناسیں مردماں کارچ جتگ ءُ کُشتگ –

کُشگ بیتگیں مردم ءِ پجار رضار بامری جھمنند بمپور ءِ نام ءَ زانگ بیتگ –

ھالانی تہ ءَ گوشگ بیتگ کہ رضا درمسیر بمپور نوکجوب ناشناساں وار کرتگ ءُ چاکو جتگ ءُ کُشتگ –

کوش ءِ سبب زانگ نہ بیتگ ءُ ناکہ دمگداراں دگہ گپ پدر کرتگ اَنت-

دومی نیمگ ءَ بلوچ کمپعن فعالین ءِ رد ءَ سال دوھزار ءُ بیست ءُ یک ءَ داں انیگ ءَ یک سد ءُ پانزدہ مردم ھمے رنگ ءَ کُشتگ ءُ زدگ بیتگ اَنت کہ اشانی تہ ءَ پنچ کسان سالیں زھگ ءُ چار زالبول ھوار اَنت-

بلوچستان ءِ کابینہ ءَ بیگواھیں مردمانی جیڑہ ءِ سر ءَ مزنیں واکداراں ھواریں پارلیمانی کمیشن ءِ جوڑ کنگ ءِ سَوڑگ کرتگ-

کمیشن ءِ سروکی ءَ اُستانی وزیر داکلہ کنت – کمیشن سرکار ءُ اپوزیشن ءِ دو دو باسک ھوار بنت-

کابینہ ءِ جھل گیریں نیاد ءَ پد اے سَوڑگ ءِ جار جنگ بیتگ کہ کابینہ ءِ سَوڑک کمیشن بودیشت ءَ زوت ءَ زوت وزیر علیٰ ءَ پیش کنگ بیت اِنت-

زانگ بہ بیت زیارت بیڑ ءُ دروگیں میڑ ءَ بیگواھیں مردمانی کوش ءَ پد کھول شال ءَ ریڈ زون ءَ گورنرھاؤس ءِ دیم ءَ سَے ھپتگاں گیش زھرشانی کنگ ءَ اَنت-

زھرشانی کنوکانی لوٹ اِنت جوڈیشل کمیشن ءِ جوڑ کنگ ءُ زیارت وئیل ءَ ھوار ھوار بیگواھیں مردمانی یل کنگ ءِ سر ءَ چار ءُ ٹپاسی گامگیج زورگ ھوار اَنت – ھمے وڑ زھرشانی کنوک زیارت وئیل ءِ ھواری ءِ دارگ ءَ سالانی سال وتی دوستگیں مردمانی یل کنگ ءِ لوٹ ءَ کنگ ءَ اَنت-

زھرشانی کنوکانی گوشگ اِنت بلوچستان ءِ سرکار بے واک اِنت کہ اشی ءِ درشان وزیراں کرتگ چُشکہ پاکستانی پوج ءِ سروک بئیت ءُ گند ءُ نند بہ کنت سدکی بہ دنت-

زھرشانی کنوک مروچی شال ءَ زھرشانی روانکے کشگ ءَ اَنت اے درگت ءَ گوستگیں روچ ءَ بازیں جاھاں سرپدی مھم ءُ پنتاک بھر بیتگ اَنت-

بلوچستان ءِ دمگ کیچ ءَ سلاہ بندیں مردماں پاکستانی پوج ءِ چیک پوسٹ اُرش ءِ نشانگ کتگ ءُ پشتمانداتگ ءُ شتگ اَنت-

گیشیں ھالانی رد ءَ پوج ءِ سر ءَ اُرش تمپ ءِ بازار ءَ کلات ایکسچینج ءِ سر ءَ ھستیں پوسٹ ءِ سر ءَ کنگ بیتگ – دمگی مردمانی رد ءَ اُرش ءِ وھد ءَ تراک ءُ تیرگواریانی توار اش کُنگ بیتگ اَنت-

واکداراں تنی وھدی تاوانانی بارو ءَ ھچ نہ گشتگ ءُ اُرشکاراں پشتماندتگ ءُ شتگ اَنت-

اُرش ءَ پد پوج ءَ بازیں جاھاں دمک ءُ در بستگ اَنت بلے دگہ دزگیریانی ھال دیم ءَ نیتکگ اَنت-

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ءِ دمگ ھاران ءَ سیکورٹی ادارھاں یک ورنایے گپتگ ءُ ناشناسیں جاھے ءَ برتگ-

دمگی مردمانی گوشگ اِنت گوستگیں شپ ءَ ھاران ءِ شھر ءَ بنجاھی شھدگ ءَ ماشاء اللہ ھوٹل ءَ پوج ءُ چیریں ادارھاں دو ورنا گپتگ ءُ برتگ اَنت پد ءَ یکے یل کتگ –

پوج ءِ دست ءَ گرگ بیتگیں ورناہ ءِ پجار سھیل بلوچ ء عبدالرحمان ءِ نام ءَ زانگ بیتگ –

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ اَنت گوستگیں روچ ءَ آواران ءُ کیچ ءُ کراچی ءَ پنچ مردم زورانسری آوار جنی ءِ آماچ کنگ بیتگ اَنت-

چہ کراچی ءَ زورانسری آوار جنی ءِ آماچیں مردم ءِ پجار جمعیت اھل حدیث بلوچستان ءِ رھشون شیخ ایاز جھمنند تگران ءِ نام ءَ زانگ بیتگ-

ھمے وڑ ءَ گوستگیں روچ ءَ آواران ءِ دمگ جھاؤ شکاری گوٹھ ءَ پاکستانی پوج ءَ لوگانی سر ءَ بیڑ برتگ ات ءُ اود ءَ سَے کس دزگیر کنگ ءَ پد بیگواہ کتگ ات اَنت آیانی پجار اسلام ء حضور بخش، اعظم ء جمیل ءُ یاسین ء رحیم بخش ءِ ناماں زانگ بیتگ اِت اَنت-

کیچ ءِ دمگ تمپ پُل آباد ءَ پوج ءَ لوگے ءِ سر ءَ بیڑ برتگ ءُ محسن ء عبدالصمد نامییں ورنایے آوار جتگ ءُ برتگ –

دومی نیمگ ءَ بنجاھی شھر شال ءَ بیگواھیں مردمانی کھول باندا بیگاہ ءَ روانکے کشگ ءَ اَنت کہ چریشی ءِ درگت ءَ مروچی سرپدی مھم ءُ پنتاک بھر ءُ بانگ کنگ بیتگ اَنت-

بلوچستان ءِ دمگ پشین ءَ بیگواہ بوتگیں وکیل ءِ لاش دزکپتگ-

پولیس ءِ رِد ءَ پشین ءِ دمگ بوستان ءَ یک لاشے ءِ ساڑی بوگ ءِ ھال رس اِتگ چریشی ءَ دزگپتگ ءُ شال ءَ برتگ کہ آئی ءِ پجّار پشین ءِ نندوک صدام خان کاکڑ ءِ نام ءَ چہ بوتگ کہ آ تیر جنگ ءُ کُشگ بیتگ-

وئیل ءِ ھال ءِ سر بوگ ءَ وکیلانی یک مزنیں کچے ءَ سول نادُراھجاہ شال ءَ وت ءَ سر کتھ وھدے کہ لاش ءِ گیشیں چار ءُ ٹپاس ءَ پد کھول ءِ دست ءَ دیگ بیتگ-

انتزامیہ ءِ رِد ءَ صدام خان کاکڑ یک وکیلے بوتگ کہ آ گوستگیں شپ ءَ ناشناسیں مردماں آئی ءِ لوگ ءَ چہ آوار جتگ ءُ وتی ھمراھی ءَ برتگ اِت گوں، انتزامیہ وئیل ءِ گیشیں پٹ ءُ پول کنگ ءَ اِنت-

بلوچستان بار کونسل ءِ نیمگ ءَ چہ وئیل ءِ بگیری ءَ سرجمیں بلوچستان ءَ ھڑتال ءُ آمیدگساں بائیکاٹ ءِ جار جنگ بوتگ بلوچستان بار کونسل ءَ ھکومت ءُ انتزامیہ وکیل ءِ کُشکارانی دزگیری ءِ لوٹ کتگ-

چاردہ اگست ءُ شال ءَ نیشتگیں کھول

نبشتہ کار: ناکو رگام بلوچ

دی بلوچستان پوسٹ

سر جھلی ءُ چم جھلی چم جھلاں مراد بات

گوستگیں روچاں یک وتگڑیں 14 اگست ءِ روش ءِدارگ بیثگ، پاکستان ءِ مزھبی نامنیاد ءُ دین ءِکارڈ ھولڈر ءُ ٹھیکداراں پہ اے چاردہ اگست ھما روش اِنت کہ برطانیہ ءَ اَچ ھندوستان ءَ شہ کوچ کنگ ءِ وھد ءَ پہ وت یک کدوھے کہ پاکستان ءِ نام ءَ جوڑ کرت۔

مرشی ھمے پاکستان انسانی حقانی پادمال کنگ ءَ چَک ءُ پد نہ بیث 27 مارچ 1948 بلوچستان ءِ سرا اولی اُرش کنگ بیثگ ءُ دانکہ روش مروشی اے اَرش پاکستان ءِ لشکر ءَبرجم داشتگ ھزاراں بلوچ بیگواہ کنگ بیثگ ءُ ھزاراں بلوچ کماش مرد ءُ زالبول ءُ زھگ شھید کنگ بیثگ۔ اے یزیدی لشکر وثی چاردہ اگست ءِ دارگ ءِ واستا ھر وڑیں رپک ھُنر ءُ پندل ساز ایت ءُ اے پندلانی توکا ھما بلوچانی دست ھم مان اِنت کہ سکیں بے حیا، بے شرم ءُ بے گیرتیں مردم انت بلکیں بلوچ ءِ نام ءِ سر ءَ داگ اَنت۔

انچوش کہ اے چاردہ اگست ءَ ھمے پدر بیث کہ بلوچستان ءِ شھر کیچ ءَ پاکستانی لشکر ءِچریک ءُ دلار سک باز انت آیانی سروک بازیں سیاسی پولٹیکل پارٹیانی سروک ءُ لس دلار ءُ مخبر ھم ھوار اَنت ھمے رِد ءَ کیچ گرلز کالج ءِ پرنسپل پاکستان ءِ لشکر ءِ سروکانی وش کنگ ءِ ھاترءَ بلوچی دود ءُ ربیدگاں پادمال کنت ءُ بلوچانی کسانیں جنین چُکاں تَلو ءِ سرا کاریت ءُ ناچ کنگ ءَ پرمائیت ءُ ھمے ندارگ چاروکانی رم ءَ نام نہادیں سیاسی پارٹیانی سروک ظہور بلیدی ءُ رشید دشتی کہ لالا ءِ نام ءَ نہ کرزیت ءُ پاکستانی لشکر ءِ دلار یاسر بھرام کہ لشکر ءِ واستا ھر وڑیں دلاری کنت ساڑی بنت، ءُ ھمے چاردہ اگست ءَ شہ ھمے پدر بیت کہ اے مردم پاکستان ءِ لشکر ءِ سروکانی واستا بلوچ ءِ عزت ءَ ھم انچوش سربازار کن اَنت ءُ جنکاں ناچ پرمائینت۔

ھزار لعنت بات شمئے سرءَ مرشی بلوچ ءِ بزگی بلوچ ءِ لاچاری ریڈ زون ءِ سر ءَ نیشتی یے زالبول ءُ زھگ ظہور بلیدی ءُ رشید دشتی ءَ گندگ ءَ نیا اَنت ءُ بلوچ ءِ سوداگر اختر مینگل ءِ ھم چشمک ءِ نمبر ھراب انت ءُ چم نزور انت۔ گڈ سر ءَ یک ٹوکے کناں کہ گرلز کالج کیچ ءِ پرنسپل توکا بلوچی رگ ءُ ھون تقریبا نزوری بیث کہ چشیں ھرکت کنت ءُ میر جلال رند ءَ ھم انچوش بیچارگ ءَ مردین چُک ءِ نہ بوگ راجدپتری اَھدی تاریخ ءِ کارست گوھر ءُ سمی ءُ سازین ءِ پئیم ءَ مرشی زبیدہ ءُ رھیمہ ءُ فلانی ءَ زندگ کرتگ اَنت۔ فرق تپاوت بس ھمیش انت کہ گوھر ءُ سازین ءُ سمی ءَ بس بلوچ وت مہ وت جنگ داتگ اَنت میرجلال ءِ چُک وتی قوم ءَ وتی راج پنجابی گورا آئی ءِ گیرت ءَ آئی ءِ عزت ءَ آئی ءِ ھون بھا ءُ لیلام کنگ ءَ اِنت ءُ اے ھم راجدپتر ءَ ھست ءُ ابدمان بیث۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ھپسد ءُ سِی ءُ یک روچ سرجم بوتگ انت – مروچی ایچ آر سی پی ءِ سوبائی سرکماش حبیب طاہر، شمس کاکڑ ءُ فرید شاھوانی ءُ دگہ مردماں بنجل ءَ اتکگ ءُ دلپدردی درشان اِتگ –

اتکگیں مردمانی میان ءَ تران کنان ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ ات کہ بلوچستان ءِ تہ ءَ پاکستانی پوج ءَ اگست ءِ ماہ ءِ بندات گوں بلوچ پرزندانی ھوناں ششتگ کتگ – اسلام آباد بلوچ راج ءَ وتی واست ءَ ھترہ ءِ پھمیت ھمدردی کنگ ءَ انت آئی ءَ گوں بلوچ راج ءَ ھچ واستا نیست –

ماما قدیر بلوچ ءَ گوشتگ کہ سپریم کورٹ بیگواھیں مردمانی درگت ءَ پیشی بس یک ڈرامہ یے پرچا کہ درکانودی زورانسری آوار جنیانی تہ ءَ گیشی اتکگ –

آمیدگس ءَ زورانسری آوار جنگ بوتگیں مردمانی یل کنگے ھکم داتگ بلے اشی ءَ ابید ھم جون مارا رسگ انت – سیاسی مولانی گرگ ءِ ھاتر ءَ بلوچانی نام کارمرز بوگ ءَ انت – زورانسری آوارجنیانی جیڑو ءِ سرءَ تران کنگ لوٹیت راجی پرایمنیں جھد ءِ دیم ھچ وڑیں اڑاند منگ نہ بنت – رسانکدر جانبدار انت –

ماما قدیر بلوچ ءِ گوشگ ات کہ پرایمنیں جھد ءَ راج ءُ میان استمان ءِ دلگوش وتی نیمگ ءَ ترینگ ءَ سوبمند بوتگ کہ اشی ءِ ھمراھی ءَ جھد ءِ تہ ءِ لھتے جیڑہ چیر تر اِتگ انت کہ دوبر دیما آیگ انت –

ماما قدیر بلوچ ءَ گوشتگ کہ گل ءِ تہ ءَ جیڑو ھست انت کہ آھانی گیش گیوار المی انت کہ آوکین وھداں پاکستان وتی وتگڑیں کرداراں یکجاہ کنگ ءُ اھاں مئے گل ءِ بگیری ءَ کارمرز کنگ ءَ انت کہ چریشی ءَ بے سنچیں مردم پائدگ چست کنگ ءِ کوشست ءَ کنگ ءَ انت –

بلوچستان ءِ جتا جتائیں ھند ءُ دمگاں ھئوراں پد دل ءُ لاپ نادراھی گیش بوتگ، چریشی ءِ سوب ءَ کیچ، پنجگور ءُ ھزدار ءَ ھوار بازیں دمگ ءَ بازیں مردمے بیران بوتگ انت –

مروچی تربت ءِ دمگ گوکدان ءَ یک جنکوے ءَ ھوار سَے مردم بیران بوتگ انت – دمگی اھوالکار ءِ رِد ءَ گوکدان ءَ دل ءُ لاپ نادارھی ءِ تالانی ءَ دمگ ءِ گیشتریں کچ نادراھی ءِ آماچ بوتگ انت وھدیکہ دل ءُ لاپ ءِ نادراھی ءِ درگت ءَ رسانکدر ءُ چاگردی ترامجاھاں ھم بازیں ھالے دیم ءَ آیگ ءَ انت بلے پدا ھم جانسلامتی واکدارانی نیمگ ءَ ھچ وڈیں گامگیج زورگ بوگ ءَ نہ انت –

دومی نیمگ ءَ ھزدار ءِ دمگ وڈھ ءَ چہ ھال آیگ ءَ انت کہ بشی ھئوراں پد آڑینجی ءِ نازیں دمگ زانبری، جلاب، نلی، ٹیبی، بوہر، ماس، کشاری، سیلوڈن، کھوری، سونارو، باسنکانی ءَ ھوار دگہ دمگاں دل ءُ لاپ نادراھی ءَ ھوار، ڈائریا ءُ دگہ نادراھی اتکگ انت –

آڑینجی ءَ کسانیں جنکوے ءَ ھوار چار زالبول بیران بوتگ انت – وئیل ءَ پد جانسلامتی واکدارانی نیمگ ءَ میڈیکل ٹولی دیم دیگ بوتگ انت بلے دمگ ءِ تہ ءَ نادارھی گیش بوان انت –

زانگ نہ بیت اشی ءَ پیش پنجگور ءَ دل ءُ لاپ ءُ دگہ نادراھیاں چار زھگ بیران بوتگ انت ءُ وھدیکہ بازینے نادراھی ءِ آماچ انت –

زیارت بیڑ ءُ دروگیں دیم پہ جنگ ءِ ھلاپ ءَ بیگواھیں مردمانی کھولانی زھرشانی نندانک گورنر ھاؤس ءِ دیم ءَ برجاہ اِنت – کھولاں سمی دین بلوچ ءِ سروکی ءَ پریس کانفرنس کرتگ-

پریس کانفرنس ءَ تران کنان ءَ گوشتگ اش کہ اے وھد ءَ دمگ ءِ تہ ءُ دراھیں سیاسی پاٹیاں ھوار ھوار ریاستی ادارہ اے گپ ءَ گوں تپاک اَنت کہ بلوچستان ءِ تہ ءَ درستاں ناگیگ تریں جیڑہ بیگواھیں مردمانی ئیگ اِنت دانکہ بیگواھیں مردمانی جیڑہ ھلاس نہ بیت بلوچستان ءَ ھچ جیڑہ ھلاس نہ بنت ھمے واستا ما بیگواھیں مردمانی کھول گوستگیں بیست ءُ شش روچاں وتی دوستگیں مردمانی یل کنائینگ ءِ ھاتر ءَ شال ءِ جوانتریں جاہ ءَ زھرشانی نندانک ءَ نیشتگ اِنت-

آئی ءَ گُشتگ اے وھداں مارا درستاں گلگ گوں اھوالکاراں ھست اِنت اے وھد ءَ اھوالکار ھچ رنگ ءَ گندگ بیگ ءَ نہ اَنت ما اُمیت کن ایں اھوالکار مئے توار ءَ دودمانیں جھان ءُ مزنیں واکداراں سر کن اَنت-

آیاں گوشتگ کہ اے نندانک گوستگیں ماہ ءِ بیست ءُ یک جولائی ءَ بندات بیتگ کہ داں انگت ءَ برجاہ اِنت اے درگت ءَ مئے لوٹ اَنت کہ اولی زیارت وئیل ءِ سر ءَ جوڈیشل انکوائری دارگ بہ بیت، دومی کھول سدکی دیگ بہ بنت کہ آیانی مردم اے وڑی ءَ جنگ نہ بنت – سیمی بیگواھیں مردمانی یل کنگ المی کنگ بہ بیت – اولی لوٹ زیارت وئیل ءِ سر ءَ جوڈیشل دارگ بیتگ بلے ما اشی ءَ پدر کن ایں اشی ءَ تنی وھدی ھچ کار نہ کتگ نانکہ اسرمندیں کھولاں گوں گپ ءُ تران کنگ بیتگ نانکہ لاشانی ڈی این اے ٹیسٹ کنگ بیتگ اَنت ما سرپد بہ ایں آمیدگسی ءُ جوڈیشل کمیشن ءِ نامینتگیں سروک دلگوشداری نہ اِنت-

آیاں گشتگ کہ آ دگہ دو لوٹانی سر ءَ انگت ھچ گامگیج زورگ مہ بیتگ اَنت ما گوستگیں روچاں استانی وزیر زمرک خان اچکزئی ءُ آئی ءِ ھمراھی ءَ ایم پی اے شکیلہ نوید دھوار اتکگ اَنت آ اتکگ اَنت مئے گپ اش زرتگ ءُ برتگ انت اے تنی وھدی سے رند ءَ اتکگ اَنت آیانی گوشگ اِنت دانکہ شما نندانک ءَ ھلاس نہ کن ئے شمئے گپ دیم ءَ گواشدارگ بیگ ءَ نہ اِنت آیانی گوشگ اِنت کہ شما نندانک ءَ ھلاس بہ کن ات گڑا دیم ءَ گپ کنگ بیت اِنت کھولانی گوشگ اِنت دانکہ مئے گپانی سر ءَ گامگیجی زورگ نہ بیتگ بلے نندانک ءِ ھلاس کنگ ءِ گپ ءَ کنگ ءَ اَنت چوشکہ کھولانی گون ءَ زوراکی یے دانکہ سد درسد مئے لوٹ منگ نہ بنت اِنت ما نندیں زھرشانی ھلاس نہ بیت اِنت-

آیاں گوشتگ کہ اے وھد ءَ ما شال ءِ جتا جتائیں جاھاں روانک کش اتگ اَنت پنتاک بھر کتگ اَنت دیوالی نبیسی ھم کتگ دانکہ مھلوک ءَ سرپد بہ کن ایں اے درچ ءِ دیم ءَ برگ ءَ شانزدہ اگست ءَ شال ءِ جتا جتائیں جاھاں ھرتانی چیدگ بندات بنت ءُ ھمے رنگ ءَ ھبدہ اگست ءَ کلی ھدہ ءَ یک مزنیں روانکے کشگ بیت اِنت-

آیاں اھوالکاراں گون گپ کنان ءَ گوشتگ کہ ما شمئے زور ءَ واکدارانی سرکار ءَ گوشگ لوٹ ایں دانکہ مئے لوٹ منگ نہ بنت اِنت داں ھما وھد ءَ مئے زھرشانی برجاہ بنت ءُ ما جتا جتائیں رنگاں وتی زھرشانیاں ترند کن ایں ءُ اگاں کسے ءَ تاوان بیت آئی ءِ زمہ واری سرکار اِنت-